返深圳睇結婚用品

星期日一行八人返大陸，主要目的係去睇結婚用品和飲飲食食慶祝父親節。前一晚上網睇過，深圳有一個地方叫荀崗，有兩個文具精品批發市場，有好多結婚用品賣，所以我地食完午飯就去左荀崗。我地係福田口岸附近食飯，之後分兩架的士去荀崗，點知架的士唔識路，行遠左好多路，一架車要大約$38人仔。

網上講個兩個批發市場分別係荀荀崗文具玩具禮品批發市場和百合隆文具玩具批發市場，名不虛傳，果然係有勁多玩具精品賣，賣結婚用品既主要有幾間，都有好多唔同種類既貨，問左幾樣野，價錢都似乎比香港平﹝其實我地係未係香港格個價既！﹞，而且質素和香港差唔多﹝應該係同一批貨﹞。另外一樣野，就係呢度似乎好難講價，咁樣就有好有唔好啦。

見到既產品種類有喜帖、敬茶茶壺、利是封、假花、布藝布置、剪紙布置、花鞋、上頭用品、紅傘、戒指枕、花籃和小禮物盒，遲下係香港睇完價錢，會上去再睇和買。

晚飯去了中發源，好多羊，煎餃和魚頭湯最好味。

如果皇馬再唔買後防的話...

如果皇馬在未來數月，在建造那隊像笑話一樣的水兵時，再唔增強後防的話，我可以肯定以下三件事必定在下個球季發生：

1. 西甲四強不入
2. 歐聯16強不入
3. 卡斯拿斯宣佈提早退休或轉會

第一點和第二點可謂十分肯定，在皇馬得到卡卡加C朗這對一個用腦加一個無腦既驚人組合後，聽說還想買列貝利和聿拿，完全無加強中場防守及後防的消息，簡直諗起都驚，就像一個女人花盡金錢去把自己的樣子整容成一個美女，身上卻長滿怪毛及奇臭無比。

第三點會否發生，視乎卡斯拿斯到底當唔當自己係一個人。他的情況就像一個大婆，老公在外包2、3、4奶，大婆就係屋企照料哂全家上下三代，做到死都唔會得到老公歡心。在這幾季有眼既都應該睇到，卡斯拿斯絕對係皇馬上下最痛苦既一人，完全無支援，縱有鋼門之身手都無用，前線那班明星又只懂踢風流波。如果佢仲有自尊，就好應該強烈表示不滿，球會對佢唔好，佢無需要繼續為球會賣命。

試用Google Maps畫歐洲及北海道旅遊路線

今日試玩了Google Maps，畫了2005年的歐洲及2008年的北海道旅遊路線，感覺不太好用，但用作粗略地計劃及紀緣行程也是不錯的。

在較大的地圖上查看Darth Mike Travel Path

在較大的地圖上查看Darth Mike Travel Path

烏蛟騰->亞媽笏->荔枝窩->印洲塘->三椏村->烏蛟騰

星期日去左行山，又係行烏蛟騰->亞媽笏->荔枝窩->印洲塘->三椏村->烏蛟騰，最主要都係為左去三椏村食客家菜和蠔，但好可惜，夏天既蠔無咁肥美，問過伙計，12月既蠔先靚，咁我地可以等半年後先再去，幸好還有不錯既三杯鴨。

唔計食飯，全程行左四個鐘多少少，上落比較多，不算太好行。

試用了google地圖去畫今次的行程，但地圖的細節不夠，我只是憑衛星圖去估我們的路線出來。

酒店及婚紗相落訂

在剛過去的婚紗展，我們的取得意想不到的進展。除了本身已經決定好的酒店外，我們亦即場選擇埋婚紗攝影公司。

正如之前既文章講過，我地已經hold左一間酒店，係星期六個日，我地正式落訂同埋簽臨時合約，我地亦順利咁講左幾樣我地希望有既著數，呢間酒店就係海景嘉福。酒店既Michelle亦很合作地解答左我地好多問題，我地亦成為左佢sales生涯既第一張單，希望之後我地一直都合作愉快啦。

搞掂酒店之後，我地就開始睇影婚紗相，原本諗住今日只係收集資料，絕對唔做決定。

但是在睇第二間攝影公司Zara Bride的時候，看見那個套餐本身唔錯，而我地亦確實講了勁多著數返來，感覺上似乎已經係無可能再抵及再多禮物，加上Zara的相片質素亦唔錯。在即場問了其他朋友，亦得知此公司在網上的評語甚好。另外因為Zara是一間新公司，近期亦有很多廣告，感覺上設備及服飾應該會比其他公司新款，所以我便答應了。

後來我們亦在網上看了很多Zara用家的意見，大部份都是良好的，希望我地都可以一次過影到心滿意足既靚相啦！

Beatles - Revolver

兩星期前既今日，係圖書館借左五隻cd，聽得最多既係Beatles既《Revolver》，呢隻係我第四隻聽佢地既碟，入面可以見到佢地玩左好多音效及加入印度元素。

在〈Tomorrow Never Knows〉和〈Yellow Submarine〉可以聽到好多特別既音效，例如倒播和回音，當時而言應該係好新奇。

係〈Love You To〉聽到佢地既印度風格，George Harrison彈Sitar真係幾勁。

結他部份當然係Beatles強項，好多首歌都有好多強勁的riff，例如〈Taxman〉和〈She Said She Said〉。〈And Your Bird Can Sing〉的獨奏更加係我既全碟最愛，超正。

Beatles係呢隻碟有玩弦樂，在〈Eleanor Rigby〉一曲，重型和不繼重覆的小提琴聲，令到整首歌有一種高壓的感覺。

全碟我最鍾意既係〈Here, There and Everywhere〉，很溫柔很輕的一首歌，就像細細聲在耳邊唱那樣。找不到Beatles的版本，聽住Paul McCartney的個人現場版本頂住先吧，反正呢首歌本身都係佢作和唱的。

另外三隻聽過既係《Rubber Soul》、《Sgt. Pepper's Lonely Hearts Club Band》和《The Beatles》﹝白碟﹞

在港建立六四資料館

林行止在昨天的專欄提到，在香港建立一個六四資料館，以不加插立場的方式展示對事年的不同意見，並分析的六四的後影響，不單止對當事人及中國政府，還有香港的回歸問題，台灣和海外的影響等，作一個全面和完整的整理。

對於在港建立六四資料館一事，我十分讚成，並且會以此為榮，但始終係一個好遠既夢，實行上存在很大的障礙。

建立資料館，不離民辦或公辦。民辦者，經費上會存在很大的問題，總不能期待十五萬支持者，每個月也前往支持一下。另外，民辦者亦必定被有關人士扣上得外國勢力支持的帽子，容易失去中立了解事件的第一立場。

公辦可算是一個不可能完成的任務。近十年的香港政府在建立不論紀念館、資料館和藝術館也好，必定反民意而行。單是一個事在必行的李小龍博物館也弄得好事變壞事，更可笑的是曾灶財的作品保育事件，竟然因為一個不能定論曾灶財的塗鴉是否藝術的問題，而一直放任曾灶財的作品在街上一個又一個的被"清潔"，可算係無能之最。

酒店初選

之前提到我地去左好多酒店拎酒席資料睇，經過一輪挑選，一堆超高級既酒店好快已經俾我地放棄左，港島區可以算得上係全軍覆沒。

我地既初選以場地容量、場地形狀、酒店地點和價錢為主，有七間較合心水，我們亦把握上週末的時間，用了兩天約埋經紀親身去睇場地。現簡單咁記低視察結果，我唔公開價錢及最低消費，始終係人地既商業秘密，有興趣可以直接問我。以下次序跟我們的睇場次序，不代表喜好。

• 香港馬哥孛羅酒店 - 六樓的翡翠蓮花廳較適合我們的預計圍數。此場地為一個正方形，樓底高度可以接受，中間有柱，有兩部投影機在側邊。新娘房由function room改造而成，無洗手間。同層可以直出停車場。
• 日航酒店 - 此酒店有兩個場，一個對我地太大，另一個太小。細間那個呈彎形，甚古怪，最後兩圍必定睇唔到台。
• 帝苑酒店 - 二樓的Garden Rooms適合我們的預計圍數。窄長方形，樓底唔高，有邊柱，舞台細。新娘房由function room改造而成，無洗手間，出入要行經走廊，走廊電梯口可布置。租車加鐘價錢最平。
• 海景嘉福酒店 - 地庫的Picasso適合我們的預計圍數。正方形，樓底夠高，無柱，舞台高及大。新娘房超大，由function room改造而成，無洗手間。場外有好大既位置與另一場地同用，租用Picasso者可得到較好的位置。可以租琴，平過街租。環境布置感覺十分古典豪華。
• 朗豪酒店 - 六樓的明閣適合我們的預計圍數。闊長方形，樓底夠高，有柱。米芝蓮一星。新娘房一般大，有洗手間。同層會有其他晚市街客。場地新及靚。值得一提，此酒店另一個在四十二樓的Star Room可算係超正，全層單邊落地玻璃，可以好清楚咁睇唒成個九龍，新娘房超大超靚仲要有洗手間，可惜我地實在擺唔到咁多圍，所以用唔到呢層。
• 富貴九龍酒店 - 適合我們的預計圍數的廳呈窄長方形，樓底唔高，舞台細。新娘房一般大，無洗手間。
• 九龍萬麗酒店 - 適合我們的預計圍數的廳由一大廳一分為二，隔音程度成疑，樓底夠高，舞台大。新娘房細，無洗手間。未接受2010年預訂。

現時有一間俾我地hold左，另外亦有兩間屬於我地既心水。要進入更詳細既考慮了。