一早寫左《傷城》的影評，但係放唔到上網。唔經唔覺都已經寫了兩年，有時睇完部戲好快寫，有時隔幾星期，各有各好，前者印象較深，後者對劇情消化得更多。

和獎門人到港島搵食。先在蘭芳園食了心多多撈丁和牛利包。係中環行行下，兩條友好奇由皇后大道中一號的匯豐銀行到獎門人工作的新世界大廈中間有甚麼大廈。一號匯豐銀行，二號長江中心，三號渣打銀行，五號衡怡，七至九號嘉軒廣場，八號唔記得叫咩名，十號係中航大廈，十二號係上海商業銀行大廈，十一至十九號係公爵大廈，十六至十八號係新世界大廈。當中四號、六號、十四號也不知所縱。

行經金鐘，在外圍參觀了環球嘉年華，那個同時公轉和自轉的遊戲真係會玩到嘔。現場唔算太多人，兩小時應可玩哂所有遊戲。拍了幾數照片和食了杯雪糕便離開。

落灣仔，一心去巴路士街個間快餐店食漢堡飽，點知假期休息無開。心神無主之下，去左太原街蛇王燊食蛇，食左套餐A，有蛇羹一碗，龜苓湯一碗，田雞煲仔飯，都只係六十二蚊，平靚正。唔知係咪真係舊區特別有感情，食飯途中，竟然先後有一老伯和一少女搭訕。

食完飽哂，係灣仔亂咁行，又睇藍屋，又睇巴浩斯建築風格的灣仔街市，又參觀左以前係郵政局，現身係唔知咩館既地方，仲玩左陣俾小朋友玩既環保遊戲。

坐丁丁去銅鑼灣，勁爆多人，行左陣街，係百德新街見唔到阿SA，但係見到差唔多廿架警車，勁。

返返去灣仔，諗住俾獎門人試下林海峰同小克都話係全世界最正既义燒，點知又係無開。最後去左食Subway。最後返到荃灣食糖水，終於食到花生糊，勁開心。

今日又做左壞蛋，真係唔合格呀！！

近日真係俾科技玩死，好多網上唔到已經夠大濟，blogger升左級之後重要將template入面既中文變哂怪字，真係食哂屎。

已經一星期無更新blogger那邊了，i雞保，你幾時先復活呀？好慢呀！

去了看《傷城》，唔好做壞事。

今日睇左《教父續集》，《教父》系列其實係講緊一個大家族的興旺衰落，在續集便以雙線發展，一邊講老教父域圖年青時點樣掘起，另一邊講域圖的兒子米高在繼承父親後的發展。域圖和米高兩人同樣智勇雙全，但觀眾睇到域圖點樣獲得勢力和支持，而米高在得到更多權力時卻失去家人和朋友。此片雖然色調過黑及長達三小時，觀看時很容易入睡，但其實劇力十足，很多場口也充滿張力，值得一睇再睇。

早幾日寫左《戀愛夢遊中》的影評，因為boxing day台灣地震引致好多網都上唔到，今日都仲係咁，真係超級唔方便。

晚上和獎門人家人食煲仔飯，正。

殺片行動正式展開。今日睇左《祖與占》，碟盒寫這是史上最浪漫的愛情故事，可能我唔夠浪漫，唔知佢係咪最浪漫。但係片內的祖、占和Catherine對於愛情的執迷不悔，愛一個人和擁有一個人的不同睇法，祖的讓愛、占的自制、Catherine的無常都是值得深思的。

睇書利動亦進展良好。在這假期，我決定暫停睇《基地》，全力解決《Intelligent Investor》和《字花》。

放假。揀畢業相去唒，我們竟然哂差唔多六百張相，勁。睇書計畫正式開動，希望可以在這假期解決《The Intelligent Investor》及《字花》第二期。《The Intelligent Investor》這本書注定是要經常番看的，但我想盡快先看一遍，記下重點，在遇上問題時可以參考。

數天前想到一些關於興趣的問題，小學紀念冊要寫Hobby，我通常都係亂寫，當時實際寫咩唔記得，但自己估自己童年，最有可能的答案應是"訓覺"、"做愛"和"唔知咩係Hobby"。

廿幾歲人，叫你到底有咩Hobby？你對自己既Hobby又有幾hardcore、幾狂熱？我諗如果而家有人問我有咩Hobby，我諗我會首先張開口發呆五秒，然後答一個自己都估唔到既答案，例如"訓覺"和"咩話？"。長大了的唯一改變竟然是反應慢了和聽覺差了？不是，只是我有太多興趣，一時間唔知答邊樣。扮無知的答案，只因為羞於啟齒。

其實，我喜歡音樂、電影、閱讀和旅行。搖滾音樂是我的最愛，Nirvana、Guns and roses、Radiohead是我的最喜歡的樂隊，我會因為Doors的主音Jim Morrison和我同一日生日而感到高興，我會幻想我三十五歲時成為巨星，然後在三十七歲時死亡，就像Kurt Cobian、Jimi Hendrix等人一樣。

我喜歡電影，基本上電影對我只有兩種，喜歡的和不喜歡的，絕大部份也是前者，所以其實只有一種。喜歡的電影實在太多。香港、中國、日本、美國、韓國、法國、巴西、台灣等等等地的電影我也看過，能夠引起幻想的便是好電影，大師名作和新晉導演短片同樣吸引。
閱讀。我屋企開報紙檔，小學開始睇港日慢畫，娛樂及流行雜誌，雜誌令我更認識這個世界。中學開始上堂睇小說，武俠及科幻小說也在書桌下看了很多。特別喜歡的作家有劉以鬯、村上春樹及卡夫卡。

以上的話題，如果可以遇上同路人，可以暢快地談上數天，但我總是不喜歡和別人交流。原因我都唔知點解，可能因為無咩和別人溝通的勇氣。另一個可能性，是我覺得自己不夠狂熱。

生日個日都講過，廿三歲，唔可以再避。

今日去左海洋公園玩，十點幾去到，無咩人，好快就玩左大部份機動遊戲。正午開始就好多人了，做咩都要排隊。下午去了看海豚，爆可愛。拋公仔中了兩個細獎及一個開心獎，三隻都好得意。入夜後落了山，在愛斯基摩人村外拍了很多照片， 上期忽週教用紙市擋住閃光燈個招好似真係駛得。

晚餐去了旺角米飯班主，介紹過好多人，個個都話正。之後去了松記食糖水。本來今日100分，可惜最後大意，扣了15分。

聖誕節。

今日和獎門人去了很多地方。中午先去灣仔Shake En' Bun食飽飽，好味到爆。之後去左會展購物節和美食節，爆多人，食左盒CP雲吞，和味。坐丁丁去太古城，有個歌劇台，但係時間唔夾，所以無睇。過海返尖沙咀，係Kebab店食Pizza和"沙毛沙"，正。之後睇煙花，映左勁多相。

聖誕快樂。

今日和獎門人玩了一個別開生面的遊戲，就是兩人指定在一個商場內以一小時及一個金額為限，選購聖誕禮物給對方。為免太簡單，我們刻意選擇一個無咁勁既商場，結果我們選中了荃灣廣場。比賽由下午兩點至三點，集合地點便是戲院門外的聖誕樹。

一小時轉眼便過去，我在最後一刻才趕到，俾錢及包禮物用去了很多時間。

登登登登，兩人交換禮物。多謝哂！

但混帳既係，獎門人竟然估中左我送咩俾佢。

今晚獎門人親自下廚，煮聖誕大餐，好味！等食既時侯，我就睇左《Before sunrise》，很有意思的電影呢，全片都是兩位主角知性的交談，一段剛開始便立即要分開的愛情，兩人有關死亡、友情、愛情及性的討論，同樣是廿幾歲，我實在唔敢講自己可以好似兩位主角有咁多見解。

昨天買了Nirvana的《In Utero》，點知電腦個喇叭壞鬼左，一味鬼叫，聽唔到歌。

昨天晚上，路過文化中心，拿了一些藝術節及乙城節的資料，對幾個節目都有興趣，雖然好大機會最後都唔會睇，但即管記低。

• 羅尚正與友人 - 是爵士樂‧更是音樂 ﹝音樂﹞
• 廖綺玲與友人，星期六大樂隊 - 生死戀與香港歌集 ﹝音樂﹞
• Eva Meier - 愛‧失去‧笑聲裡 ﹝音樂﹞
• Tommy Chung & friends ﹝音樂﹞
• 域多利監獄12小時 ﹝展覽﹞
• 香港失物尋找處 子夜杜可風 ﹝座談放映會﹞
• 恭碩良X香港小交響樂團 ﹝音樂﹞
• 包以正‧渡邊香津美‧李宇鎮 ﹝音樂﹞
• Chucho Valdes Quartet ﹝音樂﹞
• 下周村 ﹝話劇﹞
• 留著愛 ﹝話劇﹞
• 天工開物．栩栩如真 ﹝話劇﹞

今日亦都睇了《戀愛夢遊中》，後記。

生日快樂！

就在獎門人生日這個大好日子，我終於執完屋，執了兩星期。另外亦看了《下妻物語》，有趣。雖然很多人也不喜歡Lolita或cos play的人，但我覺得他們的堅持很有型。

昨晚睇《胡桃夾子》，昨天打錯字，寫了胡桃鉗子，笑死人。

第一次睇芭蕾舞，以門外漢身份觀看，尚算有趣，舞者的動作充滿活力及美感，配上香港小交響樂團演奏柴可夫斯基的樂曲，賞心悅目。

現場的舞台演出是很容易令人感動的，除了故事外，閒角的演出及場景更換的安排，都是很有趣的。

聽日開始放假，下次番工已經係下年了。

臨近放假，都想搵ｄ野搞下。原本想裝個ｕｂｕｎｔｕ玩下，點知記憶體最低要有２５６ｍｂ，比我多一倍，睇番佢有咩包，似乎都係ｇｎｏｍｅ和ｅｖｏｌｕａｔｉｏｎ食ｒａｍ多，兩個我其實都用唔著，都係用番最好既ｄｅｂｉａｎ算。

點都估唔到，七十六人將艾佛遜交換去丹佛金塊，得到安德烈米拿及祖爾史密夫，加上明年兩個首圈新秀選擇權，算幾抵，末來數年七十六人將有一番新景象。反而較難想像在金塊的艾佛遜。

今晚和獎門人兩人化身周啟邦夫婦去睇《胡桃鉗子》，期待。

今晚部門聖誕派對，連續兩星期抽獎，都係完全抽唔中。

楊千嬅新碟有首歌，〈她成功了他沒有〉，講一對情侶工作多年後，一起開唱片店，後因不和而分開。她後來做了明星，萬人擁戴。他結束了唱片店，組織一個小家庭。台下的他看著台上的她，他得到家庭，她得到理想。

楊千嬅像在說自己，但其實在說世上所有情侶。男人總是唔肯cut lose，對理想盲目堅持，女人做事爽快得多，轉個圈可以再來過。要得到理想，又得到愛情，除左了解，還有大量的體諒，大家退一步，妳賣流行我賣小眾，我唔眼紅妳好生意，妳唔怪我無生意，這不是妳的店亦不是我的店，是我們的小店，大家快樂地享受理想。

放假，在家睇檔。

經過了差不多半年，重拾《字花》第二期，看了數個關於專題〈惡〉的文章，感覺良好，很認同惡是迫出來的這道理，但是否無壓力就無惡人？相對第一期的〈買〉，這期的〈惡〉實在進步了很多。因為那個〈買〉實在係爆ｈｅａ。

難得空閒，今天和獎門人在尖沙咀和旺角行了一個下午，買了一件外套和毛衣，還有抽了一些玩具，竟然中左1/96既特別版，但係我覺得普通版型d。

寫了《遇上塔羅牌殺手》的影評，距離睇戲已經數星期，但味道還在。

因為放假，所以代媽睇檔，變左係佢放假去旅行。

去了cwk屋企玩wii，果然好玩，玩了網球、棒球、保齡球和拳擊，好像我這個打機低能，第一次玩都可以控制得幾好，個remote真係幾利害。

晚上去了泰國味館，晚餐無午餐咁好食。

昨晚發夢，我成為了紐卡素的足球員，我的其中一位隊友，正是我的偶像-舒尼亞，而我的對手，正是車路士。我清楚記得，舒尼亞在中場右邊邊線，傳了一個醫院波給我，足球落在我和洛賓之間，我以極速向足球跑去，我更看到龍門的右上角有一大個空位，我趕在洛賓到達前拉弓起腳。

結果，我一腳踢左埋牆，右腳腳指公腫左，痛到半死。

今期經濟學人有文章提到紐約市長彭博的改造紐約的計劃，該計劃的目標聽落好勁，如下：

"The goals include a massive increase in affordable housing; the pledge that every New Yorker will live within ten minutes' walk of a public park; and an overhaul of public transport, including a subway extension. Mr Bloomberg wants New York to have the cleanest air of any big city in America and to reduce emissions that contribute to global warming by 30% by 2030. And he wants to open 90% of the surrounding rivers, harbours and bays for recreation by reducing water pollution and preserving natural spaces."

當然，做唔做到甚至係得唔得到通過都係未知，但係如果真正實行，當中必定引起很多保護舊文物的爭論，好有興趣睇紐約市政府會點樣處理呢件事，紐約的《地標保護法》在這事件會受到怎樣的對待呢。

計埋今日，今年只需要返多六日工，已經準備好放假心情。

有說政府刻意收藏一份古物古跡辦事處關於天星碼頭文物的報告，如果事件屬實，政府會好大件事。

看了民間一些天星碼頭的改建設計，當中一個實在幾好，一個陸地上的碼頭。

明天中午，會有一班人去阻止工人拆卸天星碼頭，有心既都應該支持。

在剛過去的週未，台灣和香港也舉行了選舉。

民進黨戰略成功，全力保住高雄，台北輸得好睇，宋楚榆玩完，馬英九無面。

香港的可笑選舉，雖然可笑，但亦見反對和不滿的聲音。今次梁家傑的選舉，目的應和謝長廷一樣，就是要對手贏得無面，及令平民看見現有制度的問題。

今天和屋企人去拜山，好累。

晚上去了九龍城的"番版牛肉館"食，食飽飽。

Pulp - Fat Children Took My Life

昨天開始的執屋行動，今日繼續進行，亂到爆。

晚上和大同們到小欖燒野食，$68位另加開爐$10，幾抵食。

生日。

一早便去了和獎門人食早餐。之後係中環遊蕩左一陣，點知俾差佬逗，仲要搜袋，個差佬知道我生日後重恭喜我，真係吹脤。

返屋企後執玩具，勁迫。有五個重變左做行為藝術家，訓左係地下示威。

晚上和獎門人去左Epoch食"飯兜"，芝士"飯兜"有好多隻味，我地試左個三味餐，原味、薄餅味和阿拉斯加蟹腳味，加無限供應法包。蟹腳味最好食，其他兩款都OK，但係我覺得包比較硬，略為美中不足。叫左杯唔知咩千奴飲，原本以為係朱古力味咖啡，點知原來粒朱古力係分開上，真係笑爆咀，可憐我地兩個都唔鍾意飲咖啡都要飲哂杯野。

埋尾食左兩個甜品，雖然個名好似好另類，但其實都係心太軟和tiramisu，個心太軟好脆，一流，但係個tiramisu就比較普通。

正，多謝各位恭喜我生日既人。多謝獎門人。

明天便生日了。今晚和家人去泰良園，很好味。

廿三歲，唔想逃避。

快生日了。

只想抱著妳。

《基地》已經睇到第七期，基地紀元快五百年了。

紀念日。

晚上光顧九龍酒店的比薩餐廳，點了一個晚餐和一個pizza。一坐低便有一盤餐包，有咬勁及香，幾好味，隨包有醋、橄欖油、牛油、一個焗蒜頭和數隻不知名酸果，唔識食，最後都係覺得就咁食最好味。

頭盤是蕃茄蒜蓉包和煙三文魚，唔錯。餐湯勁重蘑菇味，好飲。主茶是雜菜意大利飯，條露筍好粗壯，但反而覺得不及上星期在ThreeSixty冷食好味，第一次食意大利飯，較硬身，濕濕地食落幾得意。Pizza是最傳統的蕃茄芝士味，個底好脆，但蕃茄過多，鮮味搶過了芝士味。

整體ok，但我地都認為試過就算。

交換了禮物，收到一份食得一份玩得既禮物，兩份都咁好味。

今日都是在家製作一件小禮物。聽了數遍陳奕迅的新碟，〈裙下之臣〉氣勢磅礡；〈最後的嬉皮士〉見到陳奕迅唱腔的多變，期待睇佢唱現場會唔會走音；〈白玫瑰〉、〈富士山下〉和〈天公地道〉也屬細水長流形歌曲，編曲甚佳﹝尤以弦樂部分更為討好﹞，各有各的詞意，陳都唱得有感情；〈黑擇明〉講人生，曲詞俱佳；如果可以加強殘舊感，〈不如不見〉將會更佳；好一首〈解藥〉，一如Eels或Pulp的自憐歌曲，聽得人心也傷了；〈心深傷透〉是碟內最重型的歌曲，掌握得幾好；聽〈粵語殘片〉的感覺就像看一個小故事，舒服心酸，很喜歡這首歌。

晚上去沙田會合獎門人及天使家族﹝好似係天使家庭，又好似係天使小組，哈，邊個知？﹞，晚飯後便去了看《父子》，多得有線電影台，雖然譚家明足足十七年沒有執導電影，但其實這已是我看他的第三部電影了，之前看的《烈火青春》和《最後勝利》也令人形象難忘。

《父子》的節奏的確是慢了一點，但當中幾位角色的內心世界都很立體，情感角力亦很有張力，譚家明使用鏡頭去表達感情確係一流。上星期看《信報》，得知原來現在上映的是濃縮版，原版的張力更強，好想睇。

今日上午去了三家銀行，H記、渣記和中記，三家銀行的分行和屋企的距離都很近，去H記是為了轉存摺，去渣記是為了兌現禮卷，去中記是為了取消戶口。星期六早上，渣記很少人，完全唔使排隊，極快完成。H記有接近十人在排隊提存，但幸好轉存摺是另一條隊，也是很快便完成了。中記有大約二十人在排提存，排了不足十分鐘便輪到我，但因為該行不是我的開戶分行，需要把資料傳真至那間分行，等了接近四十五分鐘。職員最初試過留我，但見我狀曾堅決，亦沒有死咬唔放，態度甚佳。在四十五分鐘後，該職員亦多次表示唔好意思要我等咁耐，結數手續亦很快手。

一大早便光顧了三家銀行，感覺甚好。國內銀行業即將開放，有人認為這是對國內銀行有利，但實際上，客戶只會選擇最方便及服務最好的一間，引入國際銀行後，國內銀行的對手實力立即加強了很多，相信很多國內銀行將會敵不過該浪潮而被吞併。

下午和獎門人去了久聞其名的Shake 'em Buns食漢堡飽，點了一個Cushin' for the Pushin'連薯條和一杯Creamy Choco Love。Cushin' for the Pushin'是一個十分簡單的芝士漢堡，那塊即點即烘，烘至香脆的飽皮，夾著極度多汁的漢堡、半軟的芝士、燒個既蕃茄和勁大塊既生菜，一咬落去，真係好味到想喊。薯條係傳統粗條薯條，因為新鮮剛炸好及粗粗的很好肉，食落的感覺甚滿足。Creamy Choco Love是朱古力、花生牛油和雲尼拿雪糕混合而成，講得上係又甜又香又滑。因為塊漢堡都幾大塊，所以我地兩個人咁樣都食得幾飽。

店內的面積很細，只能容下不多於十位客人，開放式廚房，可以一路食一路睇住煮，感覺甚溫暖，油煙味亦唔算勁。

一流。

中午食飯前睇《信報》已經是例行公事，次次睇到唯靈及劉健威的專欄時，通常都會令到我更我肚餓，兩位食家介紹的食物餐廳有平有貴，介紹三聖灣食海鮮食古法燒鴨，講解九肚魚的各種煮法等，都係睇見就想食。

這個十二月，我將會有一個全無準備的假期，希望可以清一下那些未看的電影及書籍。

今晚和獎門人試了三六零。講緊既唔係昂平360，而係在置地廣場新開張的以賣有機產品為主的超級市場-ThreeSixty。佔地兩層的ThreeSixty，下層為超市，上層為foot court。下層超市所發售的產品，有一半以上也是從未見過的，麵包部的款式都很吸引。上層的foot court包含了很多間餐廳，較常見的是XTC、Wildfire和MX，希望呢間Wildfire不要好像其他分店咁死得咁快。我地係一間叫做Good Food Factory點了三樣食物，Traditional Lasagna、雞批和露筍，三樣都好味。之後臨走再係XTC買左杯雪糕，不過西柚味勁苦，怕怕。

我諗無人鍾意遲放工，但係我幾鍾意早返工，睇返尹思哲講早返工有咩好處。

同事L今日下午開始放假，去東京旅行。我和獎門人也打算明年三或四月去東京睇櫻花，雖然仲有幾個月，但我們已經開始計劃行程了。

旅行的目的，當然是放鬆一下心情，另外重有食好野、睇靚野和買正野。賞花當然唔小得，另外位於三鷹的官崎駿博物館也是一個很想去的地方，上次去比賽時無時間去都覺得幾可惜。上網搵地方賞花既時候，發現原來係官崎駿博物館的附近，便是其中一個賞花勝地─井之頭公園，而在井之頭公園的另一面，正是漫畫《東京部族》內主角阿海所屬幫派SARU的地頭─吉祥寺。網上流傳吉祥寺有一檔燒牛肉餅勁好味，到時真係要一試。

另外，仲有一樣野好想試，就係松屋既牛肉飯。松屋類似吉野家，但係牛肉採用本土牛隻，質素絕對有保證。家姐推荐左好耐，好多明星都話遊日必食，但係我兩次去日本，雖然曾經幫襯過松屋，但係竟然無食到牛肉飯，以此為一大憾事。

今日終於可以幫部NDSL充電，狗仔未死得。晚上和choco參加接飛碟比賽，雖然只是初級，但竟然第一次玩就得到第一名，有一百蚊獎金。

中午和阿爺食M記，談了一些關於職業、進修、買樓和投資等問題。NDSL無電，勁驚狗仔餓親。

今日和屋企人映相。映左一個月，終於映完。今日去了香港公園映，好多畢業生和新人。晚上去了香港仔珍寶海鮮坊，一嘗心願。

今日和中同們映畢業相，全班都咁hea。之後去左睇活地阿倫既《遇上塔羅牌殺手》，不錯。晚飯返荃灣食煲仔飯，好食。看了一回《無間道三》，實不相暪，我是很喜歡無間道及覺得片中的主角很有型的。

晚上幫獎門人在鋼琴背後用衣架釣了一塊膠塊，順利取回一排朱古力，自己都覺得自己勁。

天氣漸凍，早上總是不願起床，今天看了一回書便再次上床。

和獎門人談到，早前我在$7.5時有興趣的大快活，今日已經$9.9，佢話過左去唔好諗，我話無所謂，因為我已選定了我的目標。大快活係好，但正如優質的內地金融股一樣，在一個健全的組合內，正如市場先生或東尼的組合，它們可以佔不多於20%，但主力的還是穩健及保持有增長的匯豐、恆生、宏利。我希望自己也可以做到一個這樣的組合。

買左新電話EF71，唔駛驚爆XY。

今晚食左MOS BURGER，飯堡確係正。

內地對於wiki的封鎖真的難以捉摸。才剛剛無聲無色地解封，現在又傳出被封了。

開始計劃明年的東京之旅了。

我部電話舊電脹左，但我還是冒著爆XY的危機，把它放在褲袋，請祝福我的子孫。

原來曾在公司和我通電話的一位同事，竟是獎門人的副同，真是世界真細小。

今日和獎門人的副同映相，晚上去了獎門人家姐屋企打邊爐。

當我是小朋友時，我可以開心快樂地和剛認識的大人或小孩玩耍。現在，我還可以快樂地和小孩玩耍。未來，我唔敢想像，我唔想失去童真。

昨晚換新檔口，全家人執到一點幾先返屋企，今朝五點又起身開檔，個個都好眼訓。

中午都要睇檔，今日獎門人公司有緊要事，OT左幾個鐘，起埋一齊一陣就分頭行事，真係唔好意思。因為新檔口，要返去幫手收檔，幸好獎門人都禮諒我。

晚上兩個人在巴士剛訓著就要落車了，呢數個星期係咁映相，都真係映到好累。

有人答：「我都係。」

我們一向也有一個訂位詛咒，就是大部份我們事前訂了位的餐廳，我們最後都因為有事故發生而去唔成，差唔多萬試萬靈。昨晚，我們訂了朗庭酒店的甜品自助餐，其實我們原本是訂了兩星期前的，但那次又因為某些事情而去唔成，所以我們昨天再接再厲。

訂了八點半，大約八點，我們到達朗豪坊。心諗今次仲唔得米之時，安全為上，我們先去視察環境。奈何天意弄人，我們發現這裡是朗豪酒店，而不是朗庭酒店！我們原先還猜測我們記錯了訂位的那間酒店的名字，但經電話証實後，事實已擺在眼前。﹝後話：當接線生聽見我問我係朗豪坊可以點樣去佢地餐廳既時候，佢答我「唔好意思，我地係尖沙咀」，雖然呢個絕對係一個笑話，我深深感到佢既無奈，但其實我既無奈更大。﹞

仲有半粒鐘，旺角去尖沙咀搭地鐵其實都仲夠時間，再一次為保安全，我地以高速行進，結果成功在八點十五分抵達酒店大堂。

有志者事竟成，我們最終享用了一個很甜蜜及滿足的晚餐，陪伴我們，還有一隊現場演奏樂隊和孖寶賽車。

而家係屋企聽緊Jarvis Cocker既《Jarvis》，世界上最幸福既仲唔係我？

昨日買左飛睇胡桃夾子，期待，第一次睇芭蕾舞。

呢排隻眼成日都好累，睇野又唔清楚，唔通咁大個人先至有近視？

公司有同事請食Jenny Bakery既曲奇餅，拎左幾塊俾獎門人一齊食，果然好味。

昨日講起一個細路四百萬，今期《東週刊》都有講到，原來四百萬呢個數係由中大經濟系副教授關焯照所講，佢係假設一個月入七八萬、只生一個小朋友的中產家庭，由幼稚園開始，一直讀名校及出國留學，直至二十歲，四百萬只係計教育費。

咁如果好似你同我咁，要幾多？雜誌咁樣計，普通幼稚園、政府小學中學、本地大學和一個月課外活動用一千，幼稚園至畢業，總共需要四十九萬。

不過，養細路唔係講錢，最緊要就係肯俾多一些時間個細路，從小朋友的角度，你的一個週未，比送一部PS3/WII俾佢，更加珍貴。

結果今日我們還是未婚。要心上人肯嫁，其實重難過搵錢呢一關，幾時都話，錢解決到既問題就唔係問題。

昨天話因為投資年期只可以有三、四年，好難玩，其實都唔係絕對，如果買到可靠穩健的增長股，如匯豐銀行、宏利金融，他們的盈利可靠及業務分散於世界各地，在受到個別地區的突發事件影響後，回復正常都較快。

無錯，我的確將很多人認為是大笨象型的匯豐銀行和宏利金融當做增長股。只要看看他們積極開發新興市場的決心，便知道他們從未滿足。

如果可以，我真的恨不得明天便把妳娶回家，今天更好。

兩個人在一起，頂撞當然有，作為一名流著美式足球員血液的人，當然知道頂撞可以解決任何問題，但優秀的美式足球員，更會懂得甚麼時候要撞，甚麼時候不要撞，正如《One Piece》的路飛所言，好打唔代表俾人打要還手，最重要的是戰的理由。

但好可惜，作為一個負責任的人及打算負責任的人，總不能在全無經濟基礎的情形下結婚。

結婚最好可以住自己樓，對老婆和將來的小朋友都較好，一層七百多呎，界乎市區和郊區交界，需要大約二百多萬，三成首期六十萬。計埋裝修傢私，好保守七十萬。

結婚擺酒，聽講可以有得收番轉頭，單純地信住先。蜜月加結婚相加雜費，五萬。

婚後，供樓一個月一萬，十幾年後供完。水費電費衣食行，一個月差不多一萬。李麗珊話一個小朋友要4百萬，但這是長命數，分開咁計，其實唔係好多。當個仔要養到廿二歲，唔計通脹都係萬五一個月，計埋通脤大約一萬。

結婚前要有八十萬，婚後每個月經常開支起碼三萬。

條數睇清楚，其實唔係好難。最緊要有人肯做我老婆，同埋將來仔仔女女健健康康。

只係幾年內結婚，只可以短線投資，但係短線唔符合我既價值型投資，所以我既投資理念都係無得係短期內達成，但係我唔會放棄。結婚生仔後再達成市場先生所講既財務自由境界，咁我地就可以歎世界了。

今日和獎門人一家拍畢業照，好多細路，好開心。

之後上左山頂，裝修後既凌霄閣大左，EA間機鋪好CYBER。

去左大家姐屋企食大閘蟹﹝糕及肉﹞，好味。

晚上寫了死亡筆記感想。

今日畢業禮，無驚無險咁就過左。開心的一天，見到好多同學仔既屋企人。

今天，永遠難忘。

知日部屋的吳偉明寫了一篇〈最後的手塚，最高的手塚〉， 講他在看了NHK的一段手塚治蟲死前的紀錄片的感想，甚感人。

今日是一位中同的結婚大喜之日，明日是我的畢業典禮。時間過得真快。

好多戲殺到埋身。

已上畫既有不羈逃情、死亡筆記: 最後的名字；就上既有父子、奏出我未來、師奶唔易做、陽光小小姐、墨攻。

未來數週未都應該忙於拍畢業照，睇戲難度大增。

某人當選，只係想講兩件事。一，中國政府再一次證明他們在“可控制範圍選舉”內的能力；二，祝你好運，希望在她任內，世界各地不要有任何重大傳染病，我倒希望在她任期完結時，國際間和香港對她的評價，還是好像現在一樣兩極化。

第三件事，今日《信報》社論提到希望她可做一個改變中台關係的角色，期望好大。祝你好運。

過左好多game。今日放工掛住打機，差點兒忘記上車。

民進黨如果繼續支持陳水扁，將會失去支持者。蘇貞昌，辭職吧，綠色現時最可靠的便是你了。

和獎門人買了ndsl，成為有機一族。

信和賣遊戲機那間店舖的男人講野很有趣。

呢幾日決定聽從專家們的意見，睇下東尼和市場先生都經常介紹的恆生和宏利到底有咩特別之處。

一睇宏利過去五年既股價，真係驚為天人，我終於真正相信buy and hold的真諦。佢過去五年既股價平均增長係22%，唯一一年沒有增長的是2003年，該年下跌3.7%，但在隨後一年已重拾升勢。簡單咁講，即是不論在2000-2005年內任何一日買左宏利，你的買入價也是比現價低得多，買得愈耐，相距愈大。

股價上升原因可以有好多，但最令人信服的是，宏利的升勢是一直有足夠的盈利支持，股價雖然升得勁，但相對的P/E卻可以一直保持在十多倍的合理水平。

除了一個美麗的往積外，宏利更有一個明確的目標，便是將在亞洲區的生意進一步提升，令亞洲區在未來成為集團盈利的最重要來源。宏利的ROE很高，投資的取向亦不似中資保險公司般投機﹝以大量金錢抽IPO﹞，穩定性明顯較佳。

一間公司有簡單易明的生意，管理層有亮麗的成績表，公司有明確及有發展空間的目標，我找到了。

十分可惜，以我今天的財力，買一手宏利並不容易，唯有向月供著手。但我可愛的HSBC所提供的月供股票計劃，竟然不包括宏利，灰。

仲有恆生，但係睇左幾日，我都重係唔係好明，1﹞恆生在過去數年盈利不進不退的公司，2﹞好多人都話恆生P/B特別高係有原因，但我未知係咩。恆生最大的好處便是利息高，但這應不足以令到這麼多名家高手愛戴，好坦白咁講，我重未睇得通。

今日和同學仔們影畢業相，好耐無見到咁多同學仔，其實只係影左U-CYCLE、四不象、正門和LAB，但係大家都已經影到好累，所以影相行動會有下集，影埋課室。

影相笑到塊面硬哂，加上今日又單眼皮，睇番相片，我兩集眼好似得番一條線咁。

獎門人今日唔舒服，快D好番呀~~~

今日我個靚女女生日~

多得史丹利指正，再上了一課不要輕信傳媒的教訓。

今朝起身無彈結他，因為經常彈到訓著。今朝變左睇書，睇個陣無訓，但睇完勁眼訓。

呢排兩隻眼都係單眼皮，好似好無精神咁。真係唔受控制。

英國政府在近期的行動上都表現得很為了地球未來的環境，更聯同美國的戈爾一起想遊說布殊重新出動環保活動。

不論這些活動是出自真心還是政治活動，我只希望能夠令多些人注意到地球未來的問題。

今日開檔，五點起身，但係下午因為有家姐睇檔，所以可以去街街。

同獎門人玩左一樣我成世人都未玩過既運動，雖然玩法有別於常人，但係真係好開心，多謝妳俾呢個機會我。

我知妳睇到別人笑我，妳好難過，但係唔緊要，我預左，妳明白又支持我便可以了。

真係好開心。

今日同獎門人去左好多地方。先去林村，許願樹有得睇無得拋橙了，行左一陣食個豆腐花，就去大埔了。

係鐵路博物館影左好多相，靚靚。

之後去左海濱公園，行左上個座二十世紀少年風格既回歸紀念塔，睇左陣海。

出觀塘，原本想食MOS漢堡，但係超多人排隊。晴天霹靂，APM的wildfire執左！！！！最後食日本咖哩，正。

之後去左旺角。係朗豪坊一人買左一對鞋。因為許錯地址，所以睇唔到levis premium。

今日要睇檔，五點便起身，下午獎門人爆出，弄得我呆了來不及反應。在獎門人幫助下，我終於完成了那個旋轉木馬。如果手工藝能夠以數值評分，我絕對相信我的分數是負數。不論摺紙、畫畫還是模型，也能令我的自信心趺至低潮。

晚上看新聞，睇到大陸有很多學校爆動，雖然詳情未係好知，但值得注意。大陸並不如想像中咁和平，深圳和廣州近期也出了很多打鬥，當中更泄及民警及開槍。政治局面亦是，由陳良宇開始，愈查愈多，今日報紙話賈慶林也受到調查，由上海殺到北京，其實這些行動的最後目的是否為了胡溫清除政敵，無人知。黃世澤也有談到國內的危機。

各位對國內銀行股很有憧憬的人，請千萬不要聽今日的《LTV cafe》內蔡東豪對於工行的分析，因為我驚你會好似曾智華咁，驚到話要星期一即刻放左手上抽到的兩手股票。不過星期一放還是有好處，因為重有好多人發緊夢，而你星期一放已經袋了幾百蚊。遲下發完夢，你失去的便不止幾百蚊了。

近期係咁聽林一峰首〈martin〉，真係好好聽，歌詞亦很喜歡。

Maybe 21st's not the right time
Maybe my expectation was a little bit high
Or maybe cos i was still drunk since may
Or between us there is nothing to say
To be frank i have forgotten your voice
To be honest i can't even remember your face
Somehow in my heart you've occupied a place
Every now and then you make me fall
You bring me sore
So by the time you came passing by
I knew it was all designed
I knew there's no place where i could hide
You know i can't decide
You know i can't deny
So by the time you came passing by
And then you left me behind
Oh martin you messed iit all up
So how you took me up into the sky
let me fall let me cry
All along i'd been waiting for your call
After all just a simple lie is nothing at all
but you've decided not to call anyway
Cos between us there is really nothing to say
So by the time you came kissing me
You know you're confusing me
Oh martin you know it's all wrong
So how you threw me up into the sky
Shot me down and said goodbye

再開日記

2006-10-27星期五

我要過度活躍！要把壓力變成挑戰，把工作視為樂趣！

開日記

2006-10-26 星期四

就像一個活在過去的人，我星期日才寫回數天前的日記。但其實為了掩人耳目，我的日記早就失去了時間性了，講既野早一星期或遲一星期，都係無分別，而更實際上，我的日記就是只有兩隻手都數得哂既讀者。

上一星期香港好多show，結果我同vincent都係無睇Evanescence，同樣地，我亦都平淡地流失了觀看板本龍一和明和電機的演出。阿里安係《東touch》報導佢係澳門睇板本龍一，因為澳門將此演出以免費形式送給所有市民，所以好多香港人去澳門人睇，貪佢特別有feel。佢阿里安既描述亦都有趣，佢話這個演出是在臨天進行的，吸引了很多家庭當係一個中秋節目，一邊賞月，一邊睇show。但係個show就好似《以一敵百》咁，走下一班，走下又一班，最後還是只有樂迷無被教授的實驗性趕走。

另外關於明和電機，早在他們出道時已經知道有樣一班人，亦覺得很有趣，但是就是沒有當遠在日本的他們來香港演出時去看他們。Sunny的演唱會後記，縱然唔識明和電機都值得一看，因為當中提出了一些人、音樂和樂器之間的反思。

近期睇過最愛的電影，第一位是《浮花》，第二位才是《放‧逐》。看了不少兩部電影的影評，馬家輝的兩篇《浮花》影評，從故事內容到男女分別都有提到，值得一看。雖然無睇《無間道風雲》，但馬生的影評對於這改編故事"改d唔改d"的批評還是很有參考意義的。馬田史高西斯的高潮是否已過，實在無人知，但係佢近年幾年電影既吸引力，實在比不上早年的《的士司機》和其中一部我最愛的《盜亦有道》，想當年無意中在有線電影台看《盜亦有道》時，還未知道誰是馬田史高西斯，但就係覺得部戲好有趣，好正。

講開影評，在miumiu的《艷屍案中案》影評中，講完故事幾唔掂後，也為一位可能你都鍾意既Hilary Swank祝福，希望佢下一部戲唔駛死。

"錢從何處來？"

商台節目《左右大局》主持發現政府在大呼無錢及環保之時，原來剛用了1260萬元為司局長更換36部新車，及36.8萬元為警方買至少九部新車，全屬非環保型，而司局長們的舊車是年齡大約十年的寶馬七系房車，車行人指該款車現況應屬良好，無轉車必要。

而那36部新車，是在美國被評為「最低能源效益」汽車之一的福士輝騰（Volkswagen Phaeton）型號房車。

試想將來我們的司局長用"錢從何處來？"的錢去買了這些車後，落區親民，落自將廢氣送給市民。

藍天行動，原來是南柯一夢。

在《基地與帝國》上的〈市長與上尉〉一篇內，描寫了一位角色，雖然他對故事發展影響不大，但作者對他的設定卻十分有趣。

基地經過三百多年的發展，一位既殘忍又精明能幹的市長，茵德布爾，奇蹟地廢將民選制度轉為世襲。他的第一位兒子，茵德布爾二世，繼承了他的一半，殘忍。而我想講的，是基地史上第二位世襲市長，茵德布爾三世。他甚麼也繼承不到。書中這樣描寫他。

"對他而言，矯揉做作地喜好各種規則就是「有系統」，孜孜不倦、興致勃勃地處理雞毛蒜皮的公事就是「勤勉」；對於該做的事情優柔寡斷就是「謹慎」；對於錯誤地盲目地、固執地堅持到底就是「決心」。"

似曾相識的領袖，但我希望自己唔好有口話人，無口話自己。

另外，他與一位上尉的對話，亦顯出一些人對國家的錯誤理解。首先是市長指這位上尉反對上級命令，而上尉說：

"市長閣下，我的首要職責是效忠國家，而不是效忠上級。"

"簡直大錯特錯，你的上級還有上級，那個上級就是我，而我就等於國家。得了吧‧‧‧"

今日做左好多野咁。上午用了很長時間去寫《放‧逐》的影評，長長的一篇。

中午便去了獎門人屋企，一起做Tiramisu，打Cream打得太勁，出哂水。等食既時候，幫上星期買的模型上油，真係幾廿年無玩過顏色。個Tiramisu很好食，飽。

收左一間由兩個靚女送俾我既屋，勁鍾意。

話說今日番學校取畢業袍。比預定安排早很多，十點便到達，以致一個同學仔都見唔到。程序上很快便取得畢業袍了。但是之後在檢查和試穿時便出了一個很大的問題，那就是我實在估唔到那件披肩應該是怎樣穿著的。徬徨無助的我，當時甚至有想過去問其他正在試穿的同學，但最後也沒有，因為這些問題實在太低能了。在多次偷師後，我才模出穿畢業袍的方法，實在極度唔簡單。坦白講，我到現在也是不太肯定的。

近期有大量吸引的電影上畫，《放‧逐》、《妄想》、《花之武者》、《奏出我未來》、《死亡筆記: 最後的名字》、《不羈逃情》。今天便和獎門人看了《放‧逐》，杜琪峰保持風格，但取向不似《黑社會》系列般大眾，較似《PTU》和《柔道部物語》，將很多技巧都玩得很盡，睇得好開心。

獎門人不適，發緊第九個夢。

買入了一些日圖，以作明年旅行之用。

這個星期在《信報》內林行止先生的〈政經短評〉都在介紹一位經濟學家熊彼得，從他的經濟理論至他對其他大師的意見及他日常的生活也有講到，值得剪存。

晚上開了生平第一張支票，甚為緊張。幸得獎門人提醒，否則便要彈票了，因為我根本從未存錢入我的往來戶口內。想起也覺得驚險萬分，我還細讀支票簿的說明，學習怎樣令一張支票變成劃線支票﹝如果你也不懂，可以問我，因為我以防萬一，細心閱讀了中文和英文版。﹞。

數分鐘後我便開了人生的第二張支票。

我人生的第一張支票，是為了大學畢業而開的，不禁有種感動的感覺。

希望不要彈票吧。哈。

還欠一場。祖雲達斯便可以升破零分了。祖雲達斯，我支持妳！

今晚去左新德里食飯，勁好味。食咖哩，佢最掂。

食獎門人整既椰汁糕，因為唔夠魚膠粉，所以唔夠實，但係味道一流。

"有人又冇開日記喇"

剛到達萬八點，陸東便把明年的預測定為二萬一千點了。

唔係好記得自己今日做過咩野和諗過咩野。

昨晚提起《銀英傳》，便在網上找了一些相關網頁，看了數個也覺得內容很充實，特此記下。﹝一、二﹞

官員對於議員有關銷售稅的回應實在有趣。馬時亨早前直指議員為了討好選民而反對，而不考慮社會長遠發展，指責議員同時亦再次當大眾市民為低智生物。昨天唐英年話議員在反對銷售稅時，應為政府考慮錢從何處來。此言一出，立即出賣了繁忙的司長，看漏了很多議員、學者、傳謀等關於錢從何處來的建議，當中包括增加外匯基金的回報率、仿傚中國和新加坡成立政府投資部、回復舊有賣地政策、增加環保稅等，多不勝數。局長言下之意，就像指責旁人只會批評，但實情是只有他沒有看到建議。

坦白講，我一向也懷疑高官便看的報紙、雜誌和電視也是和我們不同的，就像兩個世界一樣。

"哈哈，開埋今日先"

今朝起身勁眼訓，無去晨操，訓多半粒鐘。

《基地》已經睇到第三期，帝國既力量開始出現。呢本真係唔係一本簡單既科幻小說，艾西莫夫真係一位十分博學的作家和科學家，在數十年前已經想像到大量核能的運用，其太空觀亦充滿想像力，最令我驚嘆的，是除了科幻外，在作品內，他在描寫基地的發展中，所利用到的宗教入侵、商業入侵等經濟學，還有在帝國的沒落中的人民及貴族心內的群眾慣性、驚覺性低和拒絕相信警告等，形如一間正在走下坡的超級大企業，管理層優越感過大，目中無人，員工工作得像機械人一樣，旁人亦被企業的巨大形象所蒙蔽，其實公司已經開始走下坡。

書內形容的一個社會的發展，當中的經濟、管理和政治，艾西莫夫在當中下展現出不同的社會局面，實在強勁。

如果唔係番睇這書，也不會發現當中這麼多的智慧。

講起科幻小說當中的智慧，便自然想起《銀河英雄傳說》，楊威利的民主取態和萊因哈特的君主制，一套科幻小說內差不多將兩種社會體制的架構、問題、優點和缺點都展現出來。

不過《銀英傳》實在太長，重開所需的心力真的不少。

"等我一次過幫佢開幾下先"

天陰陰。一早寫埋《浮花》影評。

獎門人似乎好鍾意食我整既茶葉雞翼和茶葉蛋。

晚上去禾輋大排檔食，二條友三味菜，勁飽，兩盒打包。

"有人好多日都冇開日記喇......."

一早起身洗鞋，中秋個陣滴左一滴蠟落番工個對鞋度，洗極都洗唔走。

去左黃金報價。之後同獎門人係尖沙咀食左個勁好味既Tiramisa，勁好味。

今晚整左神秘食物。

近日睇左兩篇人物訪問，令到我對“保持形象”有一個新體驗。第一篇是《東週刊》訪問梁家傑，梁家傑話佢小學做班長，因為要保持較成熟的形象，在小息的時間，當其他同學都在飲可樂玩耍時，他卻要在一旁散步扮沉思，但佢坦言其實無野諗。

另一篇是今日《AM730》節錄港台節目《數風流人物》甘國亮訪問陳冠中，陳冠中是《號外》雜誌的創辦人。他說在辦書初年，曾經多次因為經費不足而差點結業，但幸好多次最後都得到新投資者注資。但為了不被投資者發現經費不足及辦保持潮流書籍的有型形象，要強忍興奮和裝酷。

身在其位，便要投入。保持形象和假面具是一線之差，前者感覺較為正面。我認為形象的作用是宣傳，但重點在於宣傳實際成績，否則只是吹噓及扮野。

中國民間傳出中國政府再次對Wikipedia解封，官方沒有任何表示，希望這次是真正的解封。

Google以16.5億美元收購youtube，全數以股份支付。以巨額收購一間尚未有利潤的公司，不是泡沫是甚麼？但需注意此交易Google全以股份支付，完全不需要現金，而Google的股價，正是泡沫的典範，以泡沫收購泡沫，既不影響公司現金，亦增加公司的市場能力。公司股份的確是分薄了，但若股價在收購成功及見成效後上升，皆大歡喜。但是，youtube內的短片大量和版權有關，這可以造成一場超大型的控訴，Google在決定收購前必定有解決這個問題的計劃，而這計劃能否成功，將會極度影響Google及未來網上資訊流通的發展。

台灣150萬人天下圍攻。孩子氣陳水扁話考慮以後唔搞國慶慶祝。台灣政局會變成點，13號既罷免案有好多影響力。

愈來愈覺得在台灣搞政治的發展空間比在本港大很多很多。政客可以選市長，由小城市做到大總統，政客的領導能力及實認承諾的誠信都讓市民有目共睹。反之香港，民選的區議員全無權力，只是一個反映民意的聲音，但聽唔聽完全根據政府的喜好。立法會議員的情況亦好不了多少，不是說他們沒有遵守對選民的承諾，而是他們實在缺乏人力物力權力去實行，高票當選議員也只會變為投票機器。

今日補假，唔駛番工。朝早寫左《寶貝計劃》個影評，自己都唔知自己係讚定係彈。

早上在家真好，可以輕輕鬆鬆咁睇兩份報紙和兩本雜誌。獎門人睇廣告睇到申請X打信用片有得用二百幾買NDS，去X打問，點知個職員話無呢樣野，重笑住咁反問我係咪睇錯其他銀行既廣告。而家份報紙廣告就係我面前，真係想星期六拎去俾佢睇。呢種咁既質素，真係“渣”。

中午去了中環和獎門人食飯，的確係中環返工比係大角咀個感覺型好多好多，但係食飯既時候真係多人到爆炸，重要貴成倍，型真係要付出代價，唔怪得家姐成日都話佢而家食飯方便同慳左好多。

下午去中央，一心諗住安心睇《Intelligent Investor》，但係其實多鬼如，圖書館本身就已經係一個超級大既誘惑，結果我都拎左兩本林行止﹝1991年的《求財若渴》及2001年的《極度亢奮》﹞既書睇。巧合地，在2001年出版的《極度亢奮》有大量篇幅是講台灣大選，當時陳水扁及民進黨剛勝出大選，想不到在五年後陳已快地位不保了。

結果，我還是看了一會《Intelligent Investor》的，看了Jason Zweig在第十一章〈Security Analysis for the Lay Investor〉的comment，得益不少，這書真是愈後愈精彩，理論與實例俱備，加上意見精闢，真係好想可以明白多一點。

調查發現，64%既網上遊戲玩家是女性。

點樣做一個Gothic Lolita？

今日去左睇艾慕杜華既新戲《浮花》，這導演一向給我的印象也不太好，有一種很荒亂的感覺，但可能因為這次是正正經經睇足全場，《浮花》給我的感覺良好，氣氛集中，咁多位女角的感情亦很明確，好戲一部。

行尖沙咀，買左三盒Playmobil，食XTC，而家要12個印才有得送一杯。之後食Ebeneezer's Kebabs & Pizzeria，點左燒雞肉串燒Kebab和芝士Pizza，勁好味，個Pizza勁多芝士。

三聯特價，我們一人買左一本書，睇完可以交換睇。

今晚燒野食，之後又玩火，兩條友好似縱火狂徒咁。

市況極牛，我對於同事們近日對5號的升勢，而產生大手買入的意欲，感到極度不解。在低位時不買，卻高追去期待升勢未停。唔明白。

今日中秋，放三點，三點半離開公司，下午好似無番工一樣。搵埋獎門人，一齊塞車返荃灣食飯。之後睇《寶貝計劃》，好睇，個BB真係表情多多勁好戲咁。

上象山玩蠟燭燈籠，兩條友係咁燒，點兩個燈籠，好鬼靚。之後一齊睇《飛黃騰達》。

獎門人今日番工遇著壞車，真係唔好彩。不過唔緊要la，運氣既野，時好時壞，壞完就好。希望下次有咩事我都可以係妳身邊la。

晚上立即有運行，先去復活既民園食左牛腩面和鮮牛肉面，正。之後行過天橋，見到傳說中既阿伯砵仔糕，仲熱，好彈。

去維園睇花燈，之後入大坑睇舞火龍。點都諗唔到睇舞火龍係咁好玩，條火龍係大坑個條街左穿右插，一大班人就係咁追住條龍，好似打巷戰咁，勁開心，我地兩個好似戰地記者咁。

最後再係銅鑼灣食冬甩，勁好彩，一入去就有店員請食$10一個既原味，另外我地再買多個牛古力蛋糕，勁正。

好多書想睇，好多戲想睇，好多歌想聽，好多地方想去。

昨晚收到一位中學同學的電話，告訴我他快要結婚了，一時間真係反應不來，還好尚記得恭喜佢。今晚和cwk講起，原來另一中學同學已經結左婚，我真係out到爆，咩都唔知。

他們在我就讀中六時已開始工作，做左咁多年野，有一定經濟基礎，相反我還是一名剛畢業的小朋友。

希望我們可以如計劃一樣，建立我們的家庭。

黃世澤介紹了一些東亞新聞的來源，及了解台灣歷史的材料，看了一下他介紹的網頁，便在此連結一篇有關近期台灣最紅的施明德的文章。

昨晚和獎門人利用google spread sheet整了一個全港美食紀錄，一路寫一路流口水。

今日係屋企整薯仔牛肉飯，好評如潮。

咁就放完三日假，話咁快。

寫左《大丈夫2》感想，隔得太耐，已經無咩印象，所以寫得好短。

一早起身睇埋黑澤明套《天國與地獄》，氣氛節奏一流。

今日和獎門人行街街，行花墟、買玩具、睇軍褸、食CPK甜品，正，行到雙腳發軟。

昨晚和獎門人去了維園睇花燈，讀唐詩，型。

正牌小新在內地被評為番版，奇事。

星期五晚在書店看見數本新書，林行止先生的《意趣悠然》，當然還是將他在《信報》的文章結集，內容繼續保持他的多元化，談經濟、書籍、本地作家、造琴、放屁等，有趣。另一書是劉以鬯編輯的中文百年短篇小說集，作品由在2000年之前一百內尚保存的短篇小說內選擇，分上下兩本。

路勁在內地擁有公路及土地，內地物業有升值能力，此公司屬資產富裕型，但對香港平民來說，這些資產的質素是一個問號，可能分析員或報告可以俾到答案，此問題並不是重點。重點是對於這些在內地擁有大量資產的公司，在它們獲得這些土地和公路時，有否使用不法行為，我們並不知道，但我好肯定，一場商業詐騙官司，足以令一間公司清盤。

當我連招商銀行也忍到手，在這市況，還有甚麼新股能令我落買盤？

睇完《基地》上集了，星期六去借下集。father病了，擔心。

社保基金於星期五在A股市場大幅減持招商銀行，數目大約估總發行量的4.72%，套現12.5億元。這個社保基金認真奇怪，第一，作為一個號稱“保障社會”的基金，竟然多次於摸頂位放貨，以官方之名促進股市的波動及炒風；第二，於可見的十年後，這社保基金若繼續奉行這種以高價賣掉那些原本以超低價買入的國企，社保基金將會完全脫離股市，因為低價優質的股份已經全部換來現金，而即使再買入已上市的股份，所需要付出的金錢將會極高。

遲左係度講，今個星期有線為紀念黑澤明逝世八週年，一連十二晚播放黑澤明導演的電影，絕對不容錯過。

有線電影二台真係充滿驚喜，間唔中又整部奇斯洛夫斯基，如果可以有埋高達和杜魯福就仲好。另外十月中亦有得睇《下妻物語》，期待。

今天看《東touch》，才得知gardner已經七歲了，由最初刊登在《東touch》的漫畫，到包氏畫廊的展覽，我也棒了七年了。

早上五點收到電話，六點離開屋企，七點返到公司，下午三時離開。幸好還能和獎門人行了一會，否則人生還有甚麼樂趣？

雖然唔識唱，但我真心認為《只要還有你》。

係cwb買左兩個donut，過海俾獎門人食，可惜發生左一些意外，但都重食到，不過都係原味好食。去深水步買砵仔糕食，好味。之後番左屋企食飯。

今日有好味donut食，正。晚上和獎門人去左灣仔食小x園素食，好味。買左隻白兔燈籠，很可愛。

你知唔知咩係A0或O1？唔知就睇下大學怪談呢篇野。

你個blog值幾多錢？我個日記值$0，Movie Record就值$2,822.70，斷估係美金。

星期六係圖書館借左艾西莫夫的《基地》第一集。其實《基地》系列係早幾年已經睇過，但係已經唔記得哂，現在因為受到《Pluto》的影響而重燃我對科幻小書的興趣，睇完《基地》，重可以睇埋《機械人》和《帝國》兩個系列。

另外係圖書館亦見到多左幾本喬斯坦‧賈德的小說，這位挪威的通俗哲學作家著有《蘇菲的世界》和《紙牌的秘密》等書，我亦只看過他這兩本書，感覺良好。看了數頁他的另外幾本書，都是關於生命、宗教等的故事，有時間亦可一看。

今日做左壞蛋。

今晚去工聯會報名學跳舞，點知第一日公開報名就無哂位。

獎門人係工作上受到大考驗，要努力面對呀，實力便是從難關中得來的。

打好基礎。

借了Radiohead的《Pablo Honey》，從中發現New order和Smith的味道。

市場永遠是對的。

以現價對比招股價，交通銀行升102%，建設銀行升41%，中國銀行升14%，好一條斜線。呢條斜線的形成絕非巧合，市場反應好，賣家開價自然高，最緊要就係有買家。守舊古老的國家銀行也懂得進取定價，以商人為本的招商銀行又點會錯過良機。

有傳招商的高層對於是否一人一手十分苦惱，我相信他們一定同時很後悔當初不把招股價定在十元。

在追逐價格的同時，到底這些中資銀行股的增長，是否真的可以支持這麼高的P/E和P/B呢？狂熱容易造成不幸。

願我能盛心等待，直至人們夢醒，大手拋售之時，正是買貨好良機。

如果這曲線是對的，第四家國內銀行在穩定後的市價應只比招股價高5%。

五十步笑百步。

希望自己唔好咁樣。如果我有一日都係咁樣，我會好傷心。

今晚我就像一個小fans一樣，觀看著x的網頁，看林佳樹(Yoshiki),出山利三(Toshi),松本秀人(Hide),石塚智昭(Pata),澤田泰司(Taiji)等人的故事。

今日報紙頭條講google高薪請左cytse。cytse係港大ACM人，曾於數次本地及海外的比賽見過面，簡單咁講，佢係勝方，我係敗方。我唔相信幸運，除了天賦外，從他日常生活可知他是一名十分勤力及專注於科學的人。如果你都可以做到好似佢咁，腦內只有電腦科學，一日做十題題目，你也可以是神級。

快d好番！！！

仲有三分鐘，就到左911五週年，聽住電視機內那些死難者的家屬讀出死難者的姓名。生命無常，戰爭無情，希望人們在看這電視和想起911時，也能想起在中東和非洲等一些從來未得到和平的地方，那些平民甚至士兵，他們的死也是不幸的，戰爭不能解決問題，不平等的待遇卻會造成暴力。

Peace, and Love. Please.

“中大一項調查顯示，不聽收音機的人由2002年的38%，增至50%，2成人不看報紙(不包括網上版)。”﹝摘自明報﹞

近年我都愈來愈少聽收音機了，但其實有幾個電台節目我也希望可以聽的，好像《不設劃位》、《LTV Cafe》和《講東講西》，網上重播幫助了很多人可以重溫錯過的節目，卻同時給了人們一個機會去聽少一個節目。

真的很喜歡X在《Jealousy》這唱片內的歌曲，純音樂的《Es Dur》、《White Wind From Mr.Martin  Pata's Nap》和《Love Replica》動靜皆宜，盡顯樂隊的音樂性，搖滾味十足的《Silent Jealousy》、《Stab Me In The Back.》和《Joker》展現出樂隊的技術和功架，《Voiceless Screaming》和《Say Anything》均深深感動了我，充滿感情，聽得很舒服。

有別於其他國家的樂隊，日本的樂隊好像總喜歡寫一些令人感動的歌曲，我其實不太懂日本的搖滾音樂。

為左解決自己對抽新股的疑惑，今晚決定在《Intelligent Investor》找答案，在第139至144頁內，作者從公司上市的原因，至公司決定何時上市的時機都有講到。簡單咁講，第一，上市價入面必定包左承銷商、會計等既價錢；第二，幾無腦既公司，都一定識得選擇一個可以賣到好價錢既時侯上市，個時機對賣家愈有利，即係對買家愈不利，你可以話你可能比該公司的管理層和會計更睇得穿隻股票個潛力，但係我想話你知，最清楚間公司既，絕對唔會係你。

睇左一陣阿仙奴對米杜土堡，感覺上當對手在死守時，阿仙奴的進攻完全老鼠拉龜，一大班進攻球員﹝亨利、艾迪巴約、希比、路斯基、巴里斯達﹞明顯地未有默契，單打獨鬥走埋中間，然後浪射或傳失，只有後防助攻的加拿斯和伊保爾間唔中有一球傳中波，但都因為中間太多人而徒勞無功。

雲加的戰術調配絕對值得信賴，當年亨利、韋托特、伯金、龍格保、皮里斯和柏奴亞等人的進攻絕對是歐洲頂級組織，期待今季建立默契的阿仙奴，費比加斯連繫前中後場的能力將有很大的影響力。

獎門人幫手拎左招商銀行既招股書。要出票，真係唔方便。

昨晚睇《Intelligent Investor》，在講市場波動那一章中提到大牛市的五個特徵，如下：

1. 歷史性高位
2. 高P/E
3. 低股息
4. 大量投機
5. 湧現大量低質素新股

1和4都中，股息亦和優質債券差不多，所以3都可以算中。但係恆指平均P/E未算高，5就中一半，因為除左大量低質新股外，亦有不少國內優質企業，如銀行及保險業等，質素前景皆唔差﹝價錢是否合理便是另一問題了﹞。年尾上唔上到二萬點，邊個知？

《盲流感》的評論 也放上網了。

今天工作比平時落力了很多，感覺良好。

寫了《我要成名》的影評，原先打算將這文章也拿去投犒，但動筆時還是放棄了這個念頭，以一部電影為主題的文章的刊登價值不高，還是等寫了一些討論味道較重的文章時，才作投犒吧。

Joker's Joker, loser's loser

漫畫內的世界過份簡單經常也是一般人看不起漫畫的原因。在《Pluto》第三期內﹝無錯又係《Pluto》，我承認不能自拔﹞出現了隨著機械人普及後，預期應該會出現的兩種極化組織。第一種是人類認為機械人不應享有人權及智慧，應將所有機械人滅絕的反機械人組織。另一種是人類利用機械人的力量，去復仇，去減低敵國威力等的政治行動。

最有趣的是，浦沢直樹寫一個共和國國家，先成立一條國際法律去禁止國家擁有及製造殺人機械人，之後指某中東國家違法，派出一班專家去當地搜尋，再在搜尋其間，以正義之命向對方發戰，將對方滅國，最後在當地建立“民主”國家。

熟口熟面，浦沢直樹，你竟然夠膽參考得咁出面。

那篇《盲流感》投犒去《信報》都差唔多一個星期了，全無回音，似乎已經投籃了。連續兩期《字花》也沒有我作的那篇短篇故事《路》，似乎也是投籃了。

睇左《Pluto》第二期。浦沢直樹既功力真係深不見底，係分鏡擺位上成功將機械人面對自己智能上的轉變和心理上的變化展現出來。故事上更是利害，德國機械人刑警基斯克開始懷疑自己曾被改寫記憶；土耳其的職業摔角手布蘭度獨力迎戰luto?amp;#65292;於被轟散後將戰鬥資料傳給另外三位七大最強機械人時，但因為死前只能夠想起家人，怎樣也控制不了自己的記憶，因而無法傳送。

參與過戰爭的七大最強機械人都學會了人性，他們對善惡出現疑惑，不明白為何要破壞其他機械人及殺死人類去維持和平。

第一期的管家諾斯二號之死令人難過，今期布蘭度死前只能想起家人更甚，浦沢直樹為機械人派上人性之時，亦刻劃出機械人面對自己智能上轉變時的不安。

在《Pluto》內的七大最強機械人有別於手塚治虫的原著，在網上找了一篇文章有原著七大機械人的樣子。

太耐無做運動，昨晚打左兩三場波，都已經累到半死。

阿仙奴係交易窗口最後一日，一連做左兩個交易。艾殊利高爾換加拿斯、雷恩斯換巴迪斯達。艾殊利高爾係真金白銀交易，雷恩斯就係互借一季。兩個交易都對阿仙奴有幫助，最明顯係踢走兩個有離心既人，加拿斯可以踢後防多個位置和防守中場，又有經驗，對阿仙奴後防有很大幫助。雷恩斯係阿仙奴踢左幾季都無料到，雖然唔知巴迪斯達會唔會適應到英超，但係巴迪斯達係進攻招數上係多個雷恩斯，防守能力亦唔差，有望增強到阿仙奴既進攻動力。< /p>

電影節目辦事處攪的《世界電影經典回顧2006 節目二:德國電影新浪潮》選播了一些六七十年代德國新流潮電影。對德國電影一向認識不多，今次節目介紹的那班導演，我都只是睇過雲溫達斯既戲和聽過法斯賓達個名而已。

看了那些電影介紹，覺得《昨日之女》、《安娜．巴哈紀事》、《少年杜里斯》、《小心聖妓》和《歧路》個故事都幾吸引，特別係以著名音樂家巴哈的太太的資料去拍成一部巴哈紀錄片的《安娜．巴哈紀事》。

據講今次呢個節目放映既電影好多都未係香港上過畫，亦沒有影碟，實在係機會難逢。不過因為知得太遲，八月四日已經開始發售，好大機會已經賣哂。

程翔案終於宣判了，五年有期徒刑。官方自然有它堂而皇之的控罪，你以咩態度去睇呢單案就隨你喜歡。愛國並不容易，愛國家的人因為不愛政府而受害。

mcc氟左，篇野寫到有文有路，以門外漢身份都可以有哂各方觀點咁，勁，真係要講一句，“個個都係原復生”。

身處香港的大家可能沒有太注意台灣的新聞，也許只知道有個叫施明德的人，係台灣攪倒扁，但詳情並不知道。其實他是前民進黨主席，公開收集了大量金錢物資，發起一個倒扁靜坐。這個活動的計劃安排目標都十分清晰，是一個有勝算的行動。

香港也有民主運動，但全無計劃或全部人也以私利行頭。有計劃的人民運動可以很有威力，韓農反世貿是最近期的一例，還有毛澤東長征後的反擊和哲古華拉的游擊戰。

黃世澤對民主活動的意見值得一看。

奇怪的社會。

阿嬌和她的公司一同呼籲市民罷買一本大便，因為此書偷拍藝人生活，全無道德。唔睇大便，咁咪全部人都睇雪糕新地？在阿嬌的公司大聲聲討的同時，他們在今天出版的雪糕新地上刊登了兩張藝人生活照﹝當然是偷拍得來﹞，如果大便需要受禁，沒有理由雪糕新地能獨善其身。

阿嬌換衫還是天王閨房樂好睇，真係好決定於讀者們鍾意睇阿嬌定係樂基兒無著衫。當然，讀者有選擇權，聰明的自然會選擇睇哂兩個，然後再說一句這是道德淪亡的照片，週未有空的話，還可以一家大小參與由一家出版社發起，反對另一出版社的遊行，話唔埋重可以近距離見到明星，唔清唔楚咁睇阿嬌個膊頭，倒不如近距離睇女明星們低胸烏身秋波大陣送。

明星就係明星，諗野都和常人與別不同。阿嬌話佢既ｆａｎｓ多數係小朋友，今次事件之後，佢唔知點樣面對天真的小朋友。我很好奇令她難堪的是甚麼，換衫沒有錯，ＢＢ仔都要換衫，錯的是偷拍的人和喜歡的人。我也有選擇權，我選擇相信阿嬌的內心和她的面孔一樣純潔，令她難堪的是要她以自己的私人事件去協助公司消滅市場對手。

Delay No More!!!

寫完，投稿。

多謝妳的支持及體諒！！！

今日勁型，中午和大同們飲茶賀雞坤生日。之後行左陣uniqlo，特價買左兩件$39既衫，抵到爆。

之後就上左獎門人家姐屋企，試新相機，遠近都幾靚。晚上打邊爐，之後影夜景，快門3秒鏡果然勁，燈光變成一粒粒鑽石咁，勁靚。

忙了數星期，獎門人今日完成伴奏工作，真係恭喜哂。之後還有另一位學生的考試，要多加努力。聽說這些小妹妹中的其中一位快要去外國讀書，百感交集，小小年紀便要離開家人，最可惜還是那句，“其實唔係我自己選擇既”。

之後和獎門人去了買dc，最後都係買了fuji F30，眾望所歸。

晚上去睇話劇《盲流感》，小弟第一次睇公開演出的話劇，以前只是在中學時代睇過社際戲劇比賽。決定去睇既時候，其實都唔知部劇講咩，只係覺得張海報和宣傳口號都幾型，但係勢估唔到，個故仔咁鬼卡夫卡，即係個種要個主角超級無奈和無力地接受人性和社會的所以最殘酷既事情，當中的所有反抗也是徒然的，與其說是一場悲劇，倒不如說是上天和你開了一個很大很大的玩笑。

睇完之後整晚感覺都十分沉重，在那個被隔離的房間，就像一個社會的縮影，所發生的所有事情，也是人性完全不能接受的，所有人也表現得和平常不同，所有人也變成動物，難道這就是人的本我，只有在絕對無望的時候才顯露出來的人性？

很沉重，我相信我又是想得太多了，我幾乎把自己代入了劇中的每個角色，以去體會當中的徬徨無助，當眼內看見的都只是白色一片時，恐懼已估有身體，還能當甚麼聖人？

在萬分沉重下，我燃起了一個希望，再一次的嘗試，我從來沒有放棄我的夢想。

今個星期終於一如預期咁睇完Peter Lynch本書，我想將書入面既重點寫出來，俾自己可以當筆記咁番睇。

今晚亦都開始睇另一本書了。

呢幾日新聞都緊貼報導阿嬌偷拍事件的投訴宗數，關注程度直迫恆生指數，似乎數字愈大，迴響就愈勁咁。我十分好奇係咪宗數愈多，政府做野既決心就愈大，唔通呢種係一種“以民意為先”的表現？還是另一次顯示出政府的慢動作和後知後覺？

我有一個提議，如果真係想谷大個投訴宗數，就將一張已填上詳細投訴資料的投訴信連埋信封郵票，放入Twins即將出版的唱片內，歌迷只需要簽個名就可以寄出，到時必定可以成為香港首宗雙白金投訴。反正Twins的唱片一向都很大盒，多一兩封信絕對唔成問題。

Walter S. Mossberg介紹左一隻利用電力系統連接網絡的工具，用家只需要將屋企部寬頻機接上這個連接器，再將它插入牆上的電插頭，而在放置電腦的地方，即把另一個連接器，插在牆上的電插頭及連住電腦，這樣電腦便可上網，十分方便，但價錢並不便宜，一個連接器約需一百美元。

前天提到艾西莫夫，他既一位科學家，亦是一位科幻小說作家，《基地》、《機械人》和《帝國》都是他最出名的作品。幾年前曾經睇過《基地》，讀到他中的機械人三大原則，這三大法則是人類生產機械時內建的安全機制。艾西莫夫為機械人及未來定下很多設定，很多後期的電影都是參照他的設定。以下便是著名的機械人三大原則。

1. 機器人不得傷害人類，或袖手旁觀人類受到傷害。
2. 除非違背第一法則，機器人必須服從人類的命令。
3. 在不違背第一法則及第二法則的情況下，機械人必須保護自己。

做人愈來愈開心，繼睇卡通片可以止痛後，有報告指食咖喱都可以止頭痛。可能遲下會有打牌可以止肚痛，睇4仔可以止抽筋。

單眼皮，咩心情都無。

“頭大如斗，智商照舊”既史丹利係佢既大頭日記介紹左一間係東涌叫Chu's Cuisine的餐廳，好似幾好味咁，有機會真係要一試。

何俊仁在中環M記遇襲。又一個公眾人物受襲，香港警方在眾多民主反共派受襲案中，一直表現得很無力。今次事件發生的地方是一個人多密集的餐廳，希望今次香港警方可以做到野。特首今次好浪漫，願意為左何俊仁去天涯海角。港燦有很詳細的分析。

借左《Pluto》﹝浦澤直樹新作，改編自手塚治蟲的《小飛俠》﹞。感覺強勁，浦澤直樹的對未來世界的構想一向利害，手塚治蟲更加是超級大師級，睇左半本，對機器人的心靈，人類與來機械人的交住，機械人的道德觀念等話題都有落筆。

等我睇完哂有時間再講，我話哂對機械人既心理有一定興趣﹝其實都只係睇過幾本艾西莫夫既小說﹞。

七點幾起身寫《死亡筆記》既影評。呢排個邊好冷清，但我都係會繼續寫。

再一次整親條頸，痛。

睇左《柔道龍虎榜》，其實唔係好知部戲講咩。晚上去了游水，有點運動後條頸無咁痛，但係番到屋企之後又痛番。

今日去左青衣城睇《死亡筆記》，有VIP優惠，勁正。

晚上係荃灣食元綠，一般。抽了三個《狐忍》的公仔，幾型，但係企唔到。平生第一次租漫畫睇，租了兩期《NANA》和一期《琴弦森林》。

唔講唔覺，話咁快英超聽日又開鑼。我當然要整番隊Darth Mike Football Team，玩左幾季，今次第一次由第一週開始買人，班新人真係超級超值。當亨利賣22.6和林柏特賣18.63既時候，我竟然可以6.24買舒夫真高，5.53買波歷克，係個一刻，我覺得自己心靈上比油王更富有。另外重有5.53既路斯基，6.24既貝碧托夫，個種低價既感覺，就好比中石油，平安及交通銀行的IPO。買完11個球員之後竟然仲有9.2現金，以現價計算，夠買半個林柏特和一個半舒夫真高。

講下我隊波，因為第一週有部份球隊打兩場，所以我都盡量買這類多打一場的球員。龍門原本想打連拿，但因為較貴及買少一場，所以買左雲達沙，我的球隊內唯一的曼聯球員。後衛李榮杓、依保爾和軒斯，李榮杓亞洲情意結及助攻力強，依保爾攻守同樣強勁，軒斯因為前季受傷無踢，所以勁平，唔買唔得。中場費比加斯、路斯基、謝拉特、波歷克和艾朗連儂，勁到唔知講咩好。前鋒貝碧托夫和舒夫真高，低價之選，兩個前鋒都係英超新人，投機成份的確較高，即管試幾場先，如果唔係就買番個亨利朗尼。

上網睇左篇野，講香港學生既態度，似曾相識。

英格蘭以新中場打法4比0擊敗上屆歐洲國家杯盟主希臘，聽落令人興奮。雖然希臘現時已不及當年之勇，加上友誼賽更加沒有併盡的必要。但真正令人振奮的是英足總對新領隊麥卡倫的信任及麥卡倫的選人之大膽。唔選碧咸、重用夏格維斯、放謝拉特去打邊線、重用雙箭頭等都是對球隊的好舉動。

今日報紙寫話傳聞陳奕希會考得3分，科大收左佢對其他學生唔公平。第一，校長已經話左陳有雙位數字分數。第二，3分又如何？會考係咪真係唯一測量學生能力的一個方法？陳奕希小小年紀，在機械學上已達得獎級數，更難得是他對科學研究的進取心，這在香港青年中十分少有，單準這一點，已值得科大收錄他為學生。

想深一層，自私的香港人更應該多謝科大為我們保留了一位可造之才，否則陳奕希又會成為另一個外籍華人科學家。

早幾日社區盾，報紙話利物甫半力擊倒強陣出擊既車路士。車仔教頭摩連奴上個星期先講，佢班球員打完世界杯狀態無咁好，其他球隊要好好把握季初搶分，否則車仔好快就無哂對手，睇完呢場波就知佢講真話。不過佢真係型爆，剪左個戰鬥格頭之後重型，竟然夠膽死串到要其他對手把握機會。

下年會考英文科再唔分兩個課程，真係唔好講笑，如果當年唔係考課程甲，我連原校升讀既分數都唔夠。呢個改革對個班中中學生影響好大，但我相信學生好快就習慣到，只係個條血路更加難行。

小泉純一郎今日一如預期都係去左靖國神社，佢去既目的主要係為左保住國內強戰派勢力對佢既支持。很大機會成為日本下任首相的安倍晉三，對於靖國的態度比小泉更強硬，如果佢真係上任，中日韓的真係諒解和平真係遙遙無期。

星期六個日寫左《加勒比海盜：決戰魔盜王》既影評，隔左一個星期，其實都已經唔係好記得部戲講咩野。呢一兩個星期都有幾部想睇既戲上左或就上，番工之後真係變左有錢無時間。

聽左幾首Kings of Convenience既歌仔，感覺良好。

去左《樂米的秘密花園》展覽，哈，用左過期學生証，鬼叫我地兩個生得細，恨唔來。包氏畫廊有幾大其實一早都知道，預左唔會好多野睇，所以完全無失望既感覺。數十幅彩稿，幾隻一比一既公仔，幾套以前出既產品，一部電視，一個場景，總知係幾米fans既都應該會鍾意。入場有一包今次展覽既memo紙，另外入場券及宣傳卡的製作都很精美，值得一去。

離開藝術中心，行落灣仔，去左Ebeneezer's食Kebab，正，有歐洲街頭水準。

行開灣仔同銅鑼灣個頭，見到好多Lacrimosa演唱會的海報，數星期前vincent已經通知左我有呢單野，仲已經開始左有得買飛。係香港呢個地方，講到話請外國band來表演，真係話多唔多，話少唔少，上星期才剛有DJ Shadow，近年在一眾英倫樂隊及DJ外，亦多了一些金屬界的樂隊，實屬好事。但係我地都決定唔買飛住，因為外國show外左，攔尾既show亦都唔少，事後追番條數都咪話唔煩。

《信報》賣盤已成事實，網上有一篇由負責《求知者週記》的小曹講佢身為《信報》讀者及員工的睇法，當中好一句“引清兵入關並必係壞事”幾講得中我呢位小讀者既心情。

係圖書館借左四集碟。

• Pink Floyd - Dark side of the moon
• X - Jealousy
• Suede - Coming up
• Kings of Convenience - Quiet is the new loud

Pink Floyd唔駛多介紹，之前聽過幾首佢地歌都幾鍾意，但係一直都未試過全集碟咁聽。X呢集碟其實好耐以前已經聽過，今次純粹係見到有就借來聽下。Suede由呢集碟開始無左Bernard Butler彈結他，對好多人來說好可惜，但係我一向都幾鍾意《Coming Up》入面既歌，節奏爽快，感覺有型。Kings of Convenience呢隊野就由一出隊既時候已經聽過佢地既名，話佢地係新一代既Belle and Sebastian，即係歌曲清新、歌詞青澀，佢地算係四集碟入面令我最好奇既唱片。

Xanga轉了新編寫介面，尚未找到可以成功顯示中文的方法。

祖雲達斯星散潮原來還未結束，後生細仔大把前途既伊巴謙莫域以轉會費大約二千四百八十萬歐元轉投國際米蘭。國際米蘭今個假期買左好多人，但感覺格格不入，領隊文仙尼能否像摩連奴咁，令到一大班星級球員聽聽話話，個老闆科水之餘，又唔好手多多口多多。雖然國米多左好多人，但我都係睇高AC一線。

英格蘭球迷選左夏格維斯為世界盃最佳球員，我諗有份做呢個選舉既英格蘭球迷一定覺得勁無奈，因為唔知點選好。個班勁高名氣既球星，去到世界杯全部廢哂，到最後選左夏格維斯呢位不是必然正選的球員，可能英格蘭球迷都唔再受那套救世主形球員了。

昨晚睇完《水滸傳》了。開始讀《Intelligent Investor》，今次唔駛怕睇到一半就到期要還書了。

買左《魔盜王》vcd，聽人講睇完第一集既人會更加唔明白第二集既內容，勁神奇。

《metropop》繼續訪問我喜歡的導演，今期有鄭保瑞，好期待佢套《狗咬狗》。另外在節錄陳皮《跟世界熱戀308天》的部份，今期登出了埃塞俄比亞之旅，看到埃塞俄比亞並不是只有皮包背大肚的小朋友，原來文化古蹟十分強勁，驚訝得知原來有些土人會用長矛指著遊客強逼拍照﹝拍照後當然要收費﹞。

開著窗，坐在電腦前面，竟然有點呼吸困難的感覺。家住元朗，很接近香港空氣污染的最大源頭，珠江三角洲。平日空氣已經唔好，加上打風前夕，咩風都無，勁焗。

天氣差，咩都唔想做，快看完《水滸傳》了，初期睇既時候，想從書本內學習組織內的人際關係，扮係勁咁諗王倫之死有咩啟發，宋江點樣得人心上位，到左後期，已經變到純粹追故仔。

點都好，從此書得益不少，起碼攪清楚好多以前只係識個名既英雄好漢故事。

之後排著隊想睇既書有好多，但呢幾日好想了解多一些日本和新加坡的近代政治。

都係個句，思考快過行動，想做既野永遠多過做到既野，係咁追，人生便不會停下來。

信報有限公司正式宣佈，已將《信報財經新聞》及《信報月刊》的五成股權賣給李澤楷名下的一間信託公司，林山木、駱友梅及曹志明三人保持原職，所有舊員工亦會受到新公司所聘用。

得到獎門人通知，幾米將會於包氏畫廊攪一個名為《幾米的秘密花園》的展覽，我地會去睇，睇完再講。

晚上在Discovery Channel看了一個有關新加坡在李光耀執政初期的節目，當中兩件事都令我覺得李光耀好勁。第一件事係李光耀在當選後，守諾言釋放與他政見不同的左派份子，講到明要打一場公開的政治戰爭。第二件是在李光耀一心攪新加坡和馬來西亞合併，但事後失敗，馬來西亞總理單方面宣佈與新加坡再無關係，李光耀在訪問時直認自己做錯決定，當眾落淚。

大家都知道，失敗過後，李光耀和人民行動黨將小小的新加坡，發展成亞洲區其中一個最重要的國家。

新加坡的政治、經濟、民主和政黨都值得香港人去參考。林行止先生今日在《信報》講特首南洋之行取錯經，當中提到新加坡國家投資局之利害，便是另一例子。

近排睇左兩本高木直子的漫畫書，《一個人的第一次》和《150cm Life 2》。這位日本女漫畫家近年在港台都甚為受落，著作出完一本又一本。簡單粗糙的圖畫，配上真實生活化的內容，以輕鬆筆觸，記錄都市單身女士的生活點滴，甚有趣。

好耐以前，我曾經係呢度講過我送完獎門人返屋企，搭32B巴士落荃灣，選擇座位時所考慮既野，其中一樣係要坐一個司機睇到我既位置，因為晚上32B好少人搭，乘客一隻手都數都哂。我曾經擔心司機忘記了車上尚有我這一名乘客，當我按燈落車既時侯，會令佢誤以為撞鬼，驚到佢撞車。所以在晚上坐32B的時候，我必定坐係一個可以見到司機，司機又見到我既位置。

在高木直子的《150cm Life 2》上看到類似的故事，佢坐巴士時，因為個子太小，被前座的椅背檔了她的身體，當車上只剩下她的時候，司機誤以為無人，把車燈關掉，弄得她和司機都十分之唔好意思。事後再有同樣情況發生時，她會故意做一些動作去發出聲音，令司機發現到她的存在。

想不到相隔兩地，原來我們都是這麼無聊。

講開巴士司機熄燈，這又是一個值得我們香港人應向別人學習環保的地方，停車熄匙熄冷氣，在日本是一件很普通的事，停低等旅客的旅遊車同樣熄冷氣，總之司機導遊會同你講，上車唔該忍一陣。

就即管睇下我地香港團幾時先夠膽咁樣和我們偉大的同胞咁樣講。

唔好以為我覺得外國的月光特別圓，講到環保，我們北京的的士司機，排隊等客時，以人力推車，雖然他們的原意不在環保，但同樣是值得學習。

立法會終於結束長達數日有關《截取通訊及監察條例》的會議，討論內容係咩野、特首出過咩手段、個別議員怎樣用心地討論、投票機械人怎樣只在投票時才進入議事廳等，我想大家只要了一些新聞及報紙也可以知道詳情。

在此提供一些關於題外話的資料。有說此次立法會討論屬於拉布戰，上星期六的“LTV Cafe”內，便談及拉布戰的歷史及經典。另外更值得睇既係黃世澤講長毛是全中國唯一貨正價實的共產黨人，我地應該正面欣賞下呢位出位的議員。

今日睇《加勒比海盜：決戰魔盜王》，我未睇過第一集，感覺上故事背景甚為浩大，英國政府、東印度公司、海盜、鬼船長等，場面亦十分強勁。較有趣的是在這嚴肅故事上，加上了很多喜劇式動作場面，感覺上很有成龍式動作喜劇的感覺。期待下集的周潤發，有說他是張保仔，勁。

大大話話係兩年來都寫左幾十篇影評,但係其實我還在找尋緊一個合適的框架去分析電影，我相信有條理的框架可以引導出紮實的分析。

像《信報》內講足球的索卡和講科技的狄高，兩人的分析和視野可謂是本地同行內之最佳，兩人也有自己的一套框架。索卡善於分析球員和球隊的住績及心理因素，一場比賽可以由兩隊的關係講到整個聯賽。狄高善於以客戶角度著眼，重視可用性多於技術性，但同時亦掌握最新技術，所以經常可以預測到產品的方向和受歡迎程度。

到底電影評論有無一套可行的分析框架？電影是一種藝術，天方夜譚，無數據可言，故事剪接導演配樂等等等等都可以影響一部電影的好與壞。若果以一固定的框架去評論全部電影，又是否對電影公平？可能一部電影的音樂故事剪接皆優，奈何合在一起時總是格格不入，將塔倫天奴﹝《Kill Bill》﹞的劇本送給岩井俊二﹝《花與愛麗詩》﹞執導，也未得一定是好事。

對於影評，睇得最多的便是每日也在《明報》娛樂版寫電影評論的石祺，他很少技術性地分析電影，他著重於電影要傳達的信息，或評論近期電影的走勢及觀眾對不同類型電影的反應。

我還在寫，還在找尋一套自己的分析方法。

八號風球掛定唔掛，成為今日城中熱話。有說若風眼離本港三百米內便要掛八號波，在今日最近的時候，距離只有二百八十米。但天文台以維港兩岸風勢並不是持續強烈為由而不掛較高風球。

好多猜想，好多陰謀。

政府令人在一個風球都可以聯想起這麼多陰謀，到底是不是應該檢討一下自己到底曾經做過甚麼，產生這麼多的不信任。

韋拉最後都係唔去曼聯，轉會國際米蘭，祖雲達斯持有一年，身價減半，可惜。

祖雲達斯上訢失敗，証明上訢唔係萬能。但係意大利聯賽宣怖推遲舉行，彷彿件事仲有排都未完。

因為不正常時件導致球季縮短唔係天方夜譚，早幾年nba都曾經因為球員工會運動而令賽季縮短了一半，但係足球唔同nba，各地聯賽之間既聯繫多好多。

講開nba，姚明宣怖以後都唔食魚翅，勁。

都已經八月，但係轉會市場都未有咩大交易，最勁都算係祖雲達期既星散，但係星散既程度比預期少好多。可能因為今屆世界杯無咩新星湧現，球會無目標。

曼聯係呢個暑假都算係較有娛樂性既一隊，隊中既C朗拿度可能係足球史上，第一個人因為得罰隊友而需要逃離球隊，佢由最初既必走，到可能走，到而家既唔走，戲劇性十足。據悉近日收到死亡恐嚇，就睇下佢係咪真係唔走。

同隊既雲佬最後終於過檔皇馬。和費sir過唔去但可以係曼聯繼續受到重用既難度重大過荷蘭贏世界杯。佢同C朗一樣，都係唔走奇過走。

利物甫買左比拿美和賓特。買比拿美絕對令人費解，唔通真係諗住買個有經驗既活力型前鋒協助高治？有經驗同有活力本身已經有些矛盾，更何況比拿美一向都係狀態不穩和難於控制，真係唔知佢以老帶新。賓特的速度和技術都值得期待，但是和比拿美一樣，都係經常犯事。利物甫的球員一向給予人乖仔感覺，今次新收購的兩人，都給人格格不入的感覺，實在不明白賓尼迪斯的意圖。

今天《信報》沒有了孔少林和方卓如了。由方卓如第一篇“我不是原復生”到孔少林上星期五最後一篇的“你也可孔少林”，他們的真身到底是誰始終是一個迷，是一人，還是數人也是一個迷。但無論如何，從他們離去，已可預計《信報》易主的時候快到了。

他們的寫作風格一如原復生，以公眾垂手可得的資料，去分析公司運作及市場交易，一切講求分析和因素，而不是靠估及睇短期走勢。

無錯，人人也可以是原復生，多理性分析和討論，功力自然增長。

有人話《信報》從此無野睇，我諗未免太灰。一路以來，《信報》的受歡迎欄目也是無聲無息地爆出，真正利害的，是編輯及老闆的大膽和識見。少了兩員大將不是太大問題，易主後少了原有的風骨，才值得擔心。

為響應便服上班，今天獎門人陪我去左尖沙咀買衫買褲買鞋，係uniqlo買左兩件衫兩條褲和walker shop買左對鞋。walker shop個服務員勁熱心，叫我做“細佬”，又表演扭鞋。

uniqlo進駐香港真係一件好事，款式多，唔太貴，剪裁適合亞洲人，又有平民價既特別版﹝$79一件andy warhol，仲想點？﹞，對平民來說，最大壞處便是去日本少左個地方買手信。

但對其他香港休閒服務品牌來說，佢造成了多大影響？個人而言，如果我而家要買衫，時間許可的話，我都會想先去uniqlo睇下先，因為款式價錢合心水的機會都較大。

順帶一提，今晚原本想去海港城city super個food court食wildfire，點知執左，同樣位置開左係中環賣意粉個間野，食過覺得十分一般，所以最後食左間日本野，都係唔好食。

今朝去左深圳幫阿哥整機，點知愈整愈衰。

下午同獎門人去左深水步間生隆餅家食真係既“砵”仔糕，唔太甜，咬感好，$1件，行過可以再食。另外亦買左幾款其他餅，水準一般，無咩驚喜，但都係可以一試。

係朗豪坊池記食下午茶，正。

晚上去了獎門人屋企食飯，正。飯後討論事業問題。很喜歡和妳一起理性討論。

普通的一晚變得不普通。兩個人都諗住一個人。

估唔到意甲單野咁鬼兒戲，四隊受罰，審訊過程已經欠透明度，各球隊的判罰準則是甚麼完全係一個迷。更估唔到既係，宣判後只是個多星期，上訴後竟可全部球隊都得到減刑，原因都係無公開。講唔埋上訴多幾次，祖雲達斯都唔駛降班。

其實一開始就已經有陰謀，打開祖雲達斯序幕的梅度，正是轉會去另一支當時都可能要被罰降班的球隊，行為令人覺得古怪，除非一早就知有內情，唔係四隊都要降班。

話咁快就六百日，昨晚去了尖沙咀食吉列，勁正，勁肥美既炸蠔，大隻又彈牙既炸蝦，有肉有膏既炸軟殼蟹，任食鮮甜既生椰菜，香濃咖哩汁。好貴，不過真係值得。

大雄過身了。為大雄配音10多年的資深配音員盧素娟，上周六因腸癌在沙田醫院逝世，終年54歲。下次有機會睇叮噹，大家記得聽清楚大雄把聲同以前有咩分別。

看了一篇名為《10 tips for a better Linux experience》的文章，作為一個linux用家多年，就看看我本身有否實行這些tips。

10) Choose the right distribution。我現在使用debian，早期曾經用過redhat，很喜歡debian的簡潔及apt安裝套件的方便，在可見的將來，我還是會繼續使用debian。

9) Join an on-line forum for your distribution。我曾經是摩托學園討論區﹝一個中文debian用家的主要討論區﹞的活躍份子，但現在已經很少參與討論，甚至到訪。

8) When you need help ask good questions。當我有關於linux的問題時，我會去摩托學園討論區問，是否好問題我唔清楚，但《How to Ask Questions The Smart Way》絕對值得一看。

7) Do some research before you install。對上一次安裝linux已經是很多年前的事，我搵了很多資料才開始安裝，在設置中途亦要找很多資料才能順利使用。

6) Make and keep making backups。很可惜，沒有。

5) Keep a notebook。很可惜，沒有。

4) Read Linux news sites。我也是看Linux Today的，這文章也是在那裡發現。

3) Join or visit a Linux User Group (LUG)。唔講都無人知，我係HKLUG的會員，但好像只參與過一次公開入場的SAMBA開發者演講，其他一概活動都無參與過。

2) Be an explorer (or at least have the mindset of one)。有興趣，有時間都會去試既。

1) Have fun。如果唔覺得有fun，都唔會打咁大篇野。

剪刀、鐵枝、床褥、水喉通，防不勝防。我們的生命危在旦夕。石屎、磚頭、鋁窗，我們都經歷過，危險依然存在。有心或無意的，也足以致命。

高樓大廈，你為我們香港人解決了居住問題，成為了城市的一個特色。雖然有人說你阻礙空氣流通，但你的地位無可替代。

今天，有人利用你的高度，進行無理性的攻擊，我知道你和路人一樣，感到無奈。

Linux Planet在一篇名為《 What Can System Administrators Learn from Programmers?》的訪問中，訪問了《Code Quality: The Open Source Perspective》的作者Diomidis Spinellis，在這篇訪問中談到系統分析員應該注意的地方，怎樣從開源軟件中學習，及未來系統開發時要注意的地方。有幾個位都幾值得注意，包括點樣係系統上進行類似軟件開發的Nightly Build去提升可靠性，另外佢提到要注意系統的複雜性，當個系統變得太巨大既時侯，就會變得失控，好像MS這麼大的公司，也未能控制到vista便是一例。談到系統效能工具時，佢引用了"you can't improve what you can't measure"這句說話，好似好有道理咁。

Pew Internet & American Life Project在美國做了一個有關blog的調查，結果幾有趣，有時間可以一看其summary。

今日去了機場接機。原來接機和送機也是我這家族經常會做既事，可見我們的無聊程度之高。

今日去書展，終於買左兩本以前成日係圖書館借，但係次次未睇完都已經要還既書。好開心。

行過灣仔一些小食店，發現在巴塞隆納時食過既subway，另外亦發現了數間很有歐洲平價小食店風味的店舖。

隨著祖雲達斯被降落乙組變成事實後，預期內的星散亦已展開，西甲兩大班霸已各買去四名主力球員，分別是簡拿華路、艾馬臣、杜林和森保達，正所謂大難臨頭各自飛，球迷對他們的離去也不能抱甚麼怨言，甘願留下的巨星，反成為異數。傳聞中老將尼維特和迪比阿路唔會走，但正值當打時期，剛在世界杯有極佳表現的保方，亦傳聞會繼續為祖雲達斯保住後方。傳聞未到最後都唔知真正假，但肯定既係迪甘斯成為球隊降班後的領隊，有一定實力保證。

但到底被扣三十分的祖雲達斯，在下一屆便重返甲組的機會有多大？粗略計算一下，祖雲達斯今季的打三十八場聯賽，勝廿七場﹝71%﹞，和十場﹝26.4%﹞，負一場﹝2.6%﹞，在球隊實力及對手實力同樣下降的情況下，假設得勝比率一樣，乙組上屆有廿二支球隊，打四十二場，若套用同樣的比率，再扣三十分，祖雲達斯將會得到七十分，比今屆意乙第三名拖連奴的七十三分略低，將不能升班。

但若我們假設三隊被罰降班的球隊，實力也是比現在意乙的球隊高。那麼本身意乙球隊的得分將會減少，而因為這三隊被罰球隊都會被扣分，所以七十分是足夠升班的。

有野要聲明，我唔確認來屆意乙有多少支球隊，及有幾多隊球隊可以升班。

我想，祖雲達斯的重返甲組，並未如迪甘斯所說的那麼遙不可及。

今期《metropop》訪問導演葉偉信，他的《朱麗葉與梁山泊》和《爆裂刑警》都是我的心頭好。睇佢個作品年表，才發現原來我看了很多他的電影。計埋即將上既《龍虎門》，佢拍左總共十六部電影，而我曾經看過當中的九部電影，順時間是《夜半一點鐘》、《旺角風雲》、《誤人子弟》、《生化壽司》、《爆裂刑警》、《神偷次世代》、《朱麗葉與梁山伯》、《乾柴烈火》和《小城大事》。佢拍既戲種都算十分廣闊，都係個句，舊既，小本製作既好睇過近年大製作，但係聽聞佢舊年部《殺破狼》玩得幾盡，有機會真係要睇下。

希望佢除左得閒客串下電影角色，都可以得閒拍番幾部小品，俾大家細味一下。

話說蔡東豪、梁文道和蔡子強三條友，攪左個 UP 出版社，今次書展會一次出過六本新書，聲勢浩大，當中賣點當然是自稱為《信報》 twins 的孔少林和方卓如及首次出書的梁文道，另外東尼愛徒林少陽亦會於是次書展出書。近年社會大眾的文化水平都好像提升了很多，網上有內涵的本地博客十分多，涉及的題目亦很廣闊，關於政治、財經、電影、音樂的評論亦很有質素。連電視旅遊節目的水準亦好像提高了，由食買玩變成懶有文化，都叫做一個好開始。

成日都有人講，資訊過多，容易令人迷失自己，因為新事物在吸收前，已經變得又老又舊了。現在一天看兩份報紙，追幾本雜誌，睇好多個 blog，基本上已應接不了電視和收音機的節目。我想有些時候，真的要停一停，看少一點，想多一點，想深入一點。

好多野都係慢慢就覺得正，好似 Radiohead 隻《Hail to the Thief》咁，開頭聽都唔覺有咩特別，坐車聽多左，係屋企聽多左，又愈來愈鍾意。

係香港大既人，實會聽過“生舊叉燒好過生你”呢句野，唔好彩既就做埋當事人。今朝搭西鐵番工，見到一位阿媽教一個大約五歲既男仔英文發音，呢位女士教得好嚴。其實要個細路仔學呢類純粹記憶既野，真係幾慘，但係個阿媽又無講錯，世界唔係得佢一個人，唔可以輸俾人。睇到呢個情況，真係心都實埋，咁個五歲既細路，學一些我都覺得難既野，而學習既目的，竟然係為左生存，幾咁殘酷。

老實講，我真係覺得香港既小朋友實在太慘太辛苦，讀書大壓力，教習制度唔好，可以玩既野又唔係多。有時我會諗，如果個細路實在太辛苦，一時忍唔住，同個阿媽講，“做舊叉燒好過做你個仔”，都唔知個阿媽會點。

講到尾，最勞苦功高既都係父母。

今日係朗豪坊等獎門人，都好少咁得聞咁係度行咁耐。

朗豪坊開左大約兩年，算得上係睇住佢開，初初都覺得佢條長電梯好搵笨，有點上左去有排都走唔到既感覺，加上客人及店舖皆令人有龍蛇混集的感覺，其實感覺並不良好。但係攪耐左，又慢慢有自己既風格，晚晚都有現場音樂表演已經係香港大型商場既少有既舉動，加上早排又有電視劇以這裡為主要場景，令商場大小角落都深入民心。

以今晚所見，人流之多絕對符合旺角既風格，即係勁多人，後生仔和放工人士為主，家庭客比較少，但係咁反而重配合商場個主題。

另外以商場而言，朗豪坊真係算幾有心攪另類文化，推動本地音樂唔在講，早前個太空四條友都算夠哂玩野。對比同樣都係好新既 apm，佢係差在 footcourt 既野無咁好食，但係整體較多驚喜。

又到咁上下時侯要睇有幾多人去我個電影博客，仲差唔夠一千次就夠二萬人次了，大部份人都係由搜尋器進入，有新文章個幾日就特別多人，好耐都無新野個排就特別少人。

有咁多人睇，我梗係開心，最緊要就係有獎門人陪我睇咁多戲。

呢排搭車又聽番歌，希望唔好咁快耳仔痛。不過今日頭痛都重係好勁，可能真係因為訓得唔好。

睇番星期六用 fisheye2 影，但係哂相鋪唔幫我哂既相，好多都影得幾好，有幾張用左 MX 效果既相都好型。想睇可以問我。

獎門人送左新一期《字花》俾我，不過無登我投稿那篇文章，真係可惜，我要再接再厲。

去西貢，見到很多魚船泊在碼頭邊賣海鮮，情況甚為壯觀。係獎門人介紹下，食左兩間甜品店，試左個勁好味既葡撻。以前都去過幾次西貢，不過都無今次係市中心行咁耐，今次重有獎門人帶路。行過有兩隻紙船模型那個噴水池，立即諗起上次 JJ 無厘頭咁行左耐去，攪到成腳濕哂，勁經典。

昨晚和獎門人回想番舊年去歐洲，話咁快就一年，諗番起好似仲係前幾日咁清楚。真係好想可以再背起背囊，自由自在咁去旅行。如果佢地三個真係可以一齊番工，咁我地四個再次成行既機會都好大，JJ 和 KALEE 真係十分唔錯既旅行伙伴。

昨晚暴風襲擊屋企，風力強得好像要把窗打破，睡在窗邊的我，整個晚上都未能安睡，今日頭痛得要命。

早上寫了《新紮師妹3》及《反斗車王》的影評，一彈一讚，想支持港產片，但奈何馬偉豪這位曾經令人有過希望的本地導演實在太唔長進。

今日終於聽左四分一集 “LTV Cafe”，原來阿蔡生講野咁鬼快，聽得唔係好多，聽佢地講 8 號仔和施丹紅牌和介紹了幾篇文章，內容似乎都真係唔錯，有時間要聽下。其實今時今日，電台都還有唔少值得一聽既節目，好似“不設劃位”和“講東講西”咁，本地電視台都尚未能製作出咁有料到既節目。

聽完蔡東豪個節目，咁巧合地要幫朋友借書，重讀原復生本《原氏物語》，佢講得無錯，分析力真係好重要，特別在這資訊過剩既年代。

下午和獎門人去了玩 Fisheye 2，兩下就玩完一卷菲林，聽日有相睇。

晚上去了深井食燒鵝，勁好味。

夏日炎炎，睇下呢篇野幫唔幫到你。

Slashdot 有人討論到 IT 界對技術和商業需求的變化。有興趣長做 IT 既，可以睇下。

係 openrice 寫左昨天食那間米飯班主既食評，呢間野真係掂。

今日睇明報，有篇報導講香港學生參加某軍訓，由田二少及董太做負責人，原本都無咩野，但當我睇到最後話董太好關心那班學生時，發現左樣野，正所謂從小事言行，可看清一個人的性格。董太對記者表示，她極度關心這班“仔”，並已對隨行醫生講明，如果班仔的任何一個，俾蚊咬一啖，都唯你事問。野外軍訓，大熱天時，俾蚊咬一啖都唔得，呢種講法，不是無常識，便是不實際吧。

魚腐津白粉絲煲，燒茄子，汁燒肥牛荷葉飯。勁正。

今晚去左睇迪士尼和彼思復合後的首部電影《反斗車王》，真係不得不服彼思，在故事和畫質上，都比早前迪士尼自己攪的《四眼雞丁》好好多，配音上更見驚喜，預左林海峰和葛民輝正，點知班綠葉重出位，絕對係估佢唔到咁正，不過最衰就係身邊個細路，全程作反，真係想整野施丹式頭鎚過佢歎下。

有時真係覺得自己好鬼幸福，要咩有咩，自己睇中部相機，原來獎門人一早就想送俾我，今日收到份禮物，真係開心到爆。哈，不過俾人投訴，話次次都係佢俾驚喜我，唔係我俾佢。呀，下次我會更口密，唔會一早爆俾妳聽。

今日真係 on 居居，問條友 grad din 既詳情，點知原來大圍一早決定左唔去，我問左都唔知為咩，真係 on 居居。

部魚鏡真係幾好玩，好想可以快些和獎門人一齊去街影。

點都估唔到，前祖雲達斯及法國國家隊隊長迪甘斯竟然願意接任祖雲達斯教練一職，重要係即使降班亦無所謂。施丹就係人都識，而當呢位球王仲係黃毛小子既時候，就係呢個迪甘斯照住佢，無論係祖記定係法國隊，兩人在中場一前一後，風頭一時無兩。而迪甘斯退休後轉為領導層的成績亦十分好，曾經帶領法國的摩納哥晉身前年的歐聯決賽。如果尼維特同迪比阿路真係唔走，再加上迪甘斯既領導，祖記一定可以好快就重返甲組。

睇雜誌見到 LOMO 部新機，Fisheye 2。除左擺到明有魚眼﹝可視角高達 170 度﹞外，重有 B 快門和重覆曝光，好似好好玩咁，比第一代多左個魚眼觀景窗，咁影相既時候就可以大約估到影左咩野。

五舊水，真係幾難忍手。就睇下佢幾時成為我既第二部 LOMO 相機吧。

有睇過《少林足球》既人都應該知道，分唔清鐵頭功和金剛腿既人，多數都無好收場。勢估唔到，係呢場世界杯決賽，施丹呢位世界頂級球王，竟然以這個錯誤去終結自己職業生涯的最後一場比賽。他這個舉動對一直支持他的球迷的傷害，可能比法國最後以十二碼輸掉比賽更甚，法國隊失去了的不只是一個大力金盃，而是一位英雄。

而那位引得施丹使出鐵頭功的，竟然係那個樣衰衰既馬達拉斯，真係唔抵到爆。相比之下，同樣係世界杯發生既列卡特與禾拉互吐口水就抵好多，起碼兩人都叫同等級數，可算是“識英雄，吐英雄”。

唉，本來法國意大利我都鍾意，諗完睇場開心波，點知睇完今次施丹忍唔住氣被小人所害，韋拉又中段傷出，真係心都實埋，唉。

今晚決賽，歷時一個月的世界杯快要結束了。不論今晚是意大利還是法國取勝，對他們的球迷來說，兩隊今屆的成積都已是超額完成了，可能係因為無咁多外來壓力，所以兩隊球員都打出真水準。

無個別明星球員及大部份球員受到假波傳聞所影響下，意大利以只失一球的超強勁防守，中場加度素及派路亦持續好狀態，加上納比多變大膽既戰術，意大利隊絕對係勁。

法國情況都唔好得好多，外圍賽打到要班退出左國家隊既“老將”出山助拳；教練選人又備受非議；全隊球員係聯賽打得最好個位人兄，叫亨利，但係佢出名係大賽腳軟及打國家隊既表現比球隊差好多倍；中後場骨幹年齡都唔細；不利因素多到爆。但係打打下，發現中後場個班老人家，愈老愈可愛，穩陣之餘，亦有驚喜，施丹、韋拉、杜林等，簡直係超越九八年世界杯水準。那幾個唔知點解選入隊既新人，打落亦有驚喜。如果計以舊帶新，法國隊既安排真係比英格蘭好好多，保守地唔換走中後場老人骨幹，起碼唔會令那些新人受太大壓力及增加球隊的危險。龍門就更驚險，唔用狀態好既哥柏，雖然真係好驚險，但起碼到而家都未失過大意波，令球迷睇得更緊張。

點都好，只係睇字數，都知道我支持法國隊，加油呀，施丹，加油呀，韋拉，加油呀，亨利，加油呀，馬基里利，加油呀，杜林，加油呀，列貝利，加油呀，法國隊！！！！！！！！！！！！！！！

獎門人落哂力幫手救番 mother 今日唔覺意洗哂既相，最抵錫就係妳~~~~~

"Some people believe that football is a matter of life and death. I am very disappointed with that attitude, it is much, much more important than that!" - Bill Shankly

從新聞得知在一個由簡明英語運動所舉辦的一個調查中，這名前利物浦領隊的豪語，成為最令人難忘的足球名言。原本都唔識呢位已經過左身既人兄，睇番 wiki，先知佢既威水史，係佢領導下利物浦真係拎左唔少獎，唔怪得佢可以咁串，睇下佢點睇係利物浦市既球隊。

"There's only two teams in Liverpool: Liverpool and Liverpool Reserves" - Bill Shankly

幫大家補習一下，利物浦市內除了利物浦，還有愛華頓這支職業球隊，兩隊的恩怨就像曼聯與曼城，一世都講唔完。

今日同獎門人和 stella 去左睇《新紮師妹3》，沒有抱甚麼期待去睇，只求一笑。但今集既製作實在係求其，個警察局竟然就係我地舊年打 war game 個場，只睇裝飾，重以為睇緊舞台劇。

晚上去獎門人屋企食飯，正。

唔好意思，昨日個日記講那位意大利停賽球員其實係迪羅斯，唔係格羅素。

唔甘心。點解我好似總是令到身邊的人變得不幸。好憎自己，腳痛勁痛頭痛。

講開可樂就特別開心，等我以小人之心，去估下點解百事係今次事件咁鬼好人。

1. 百事睇完份秘方之後，覺得隻新飲品實唔掂，所以俾佢都唔要，更何況要俾錢買。

2. 百事高層睇過《三國演義》，驚可口可樂用左黃忠既苦肉計。如果呢個真係可口可樂設既局，而百事又上當的話，百事就真係出哂事。

3.百事清楚明白，不論新產品的質素係點，公司都要付出大量宣傳費，然後到最後大家還是飲番最原始味道的可樂。推唔推出一隻新產品係一個重大決定，如果係推人地既發明，就更加有苦自己知，冒既險亦都更大。

以上純為小人之斷估，絕不可信。

昨天結束 IF1，今日開始 IF2。

法國憑十二碼擊敗葡萄牙。睇番重播，如果足球比賽以點數定勝負，晉身決賽的便是葡萄牙。葡萄牙球員戰術多變，相比下，法國以同一陣容和戰術打足幾場，中路骨幹球員缺一不可。巴夫斯呢條友，絕對係個種可以令一場沉悶既比賽變得緊張既球員，對於葡萄牙球員的所有遠射，他也彷彿不能安全沒收。可能就是他的這種表現，令後衛更加打醒十二分精神。

算是球迷的幸運，決賽和季軍戰中，四隊也沒有重要球員需要停賽，可以最佳陣容出戰。意大利尼斯達唔打得係可惜，不過已經有幾場既時間俾隊友去適應。反而我幾好奇，意大利今場會唔會出唔入決賽都未停完賽既格羅素。

兩隊決賽球隊的隊長在今場都有特別意義，施丹的職業生涯最後一場和簡拿華路的第一百場代表國家隊。

無論如何，這是為榮耀而戰既一場比賽。

講完波，講下可樂。幾名可口可樂高層想將某可口可樂的新飲品秘方售予百事可樂，最終事敗，幾名有關人士現已被捕。當中值得一提的是，把事件告發的竟然就是百事可樂。百事在收到賣方聯絡後，便將事件交給可口可樂處理，然後可口可樂聯同 FBI 拉人。同所謂同行如敵國，更何況兩者在可樂市場上強勁的鬥爭，在這次事件上，竟然看到企業正直的一面。

係 William 個 blog 度睇到佢係印尼個幾間鋪頭既相，真係覺得佢好勁，有心有力攪生意。係人都知攪生意要擺好多時間落去，開頭既時候要請人、搵鋪、搵貨、運貨，做落就好多人事、會計、管理、銷售既野要攪，佢仲要去到印尼，不過 William 做野一向都好認真，個人又醒，有心機做無話唔得既。話我老土都係咁話，守業難過創業好多好多，從客人角度睇，新鮮感好快就無，如果過左半年，生意做少左都唔好灰心。仲有錢唔好搵得太急，個名做好左，生意易做好多，如果擴充得太快或向太多方向發展，反而會超越左自己既能力可以控制既範圍。加油呀，William！！！

今早意大利在加時下半場最後一分鐘連入兩球，擊敗德國，晉身決賽。原本我同獎門人都有起身睇，但睇左唔夠廿分鐘，我地已經勁眼訓，放棄左。

三個女人在天水圍集體自殺，元朗天水圍都係窮人、怪人和社會問題特別多，絕對夠料俾 Fernando Meirelles 拍番部新界西版《無主之城》。

今日 training 第二天，上午玩 File-aid，下午自修 JCL。Nick 和 Jessica 教了我一些 ESD 既野。

繼續睇港燦個九十幾個 comments，獲益良多，我已經開始儲低那些有意義既意見。勁 buy 港燦講關於人脈。

「人脈是怎樣建成的 ? 你平時與人合作完成某件事時，人家覺得你有無實質貢獻，還是講多過做。你在不同 team work 中累積的口碑，是項極重要的資產。點解其他人肯再搵你做野 ? 他認為你過去對他某個 project 有實質貢獻。」(港燦)

今日開始上 training，其實那些內容我已經在前兩星期看了，所以都幾無新意，上堂既時侯係咁入睡。

港燦度有篇野，講香港人既工作，當中個九十幾個 comment，來自唔同職位既人，咩意見都有，我覺得都幾值得睇，對未出社會、剛出社會或已工作多年的人都有幫助。當中有幾點我都覺得幾好，就係唔好成日諗轉工，同埋如果有理想，就真係要試下。It's now or never。

Yahoo! 登了一篇足球新聞，標題係『聯賽巨星紛紛失意，德國世界杯星光黯淡。』。我覺得這文章有很大的錯誤，它用一些正確的例子去引出的一個不正確的觀點。這文章以朗拿甸奴、洛賓、美斯等人的出局都很可惜這事實，去令人信服「到現在為止，世界杯只剩下最後四場比賽，卻沒有哪一位球員能讓人眼前一亮。」這觀點。事實上，單是德國隊的普度斯基和舒韋恩史迪加已絕對是令人眼前一亮，以他們今屆的表現，即使入選最佳陣容，也當之無愧。另外，法國的列貝利和德國的拿姆，他們的表現，也絕對令人驚喜。葡萄牙全隊合作性之強， C 朗拿度和迪高在大賽的穩定心理，都是無可厚非的好，只係唔知點解，經歷過歐洲國家杯和今次進入四強，一般人總是不願意承認葡萄牙在球場上的利害。

如果世界杯只是為了看球星，那麼倒不如學 NBA 攪一個明星賽，起碼唔會睇得咁傷心。

法國今早憑強勁的中場，擊敗巴西，除了施丹的精彩球技外，今場法國隊的韋拉和馬基里利可算是展現了防守中場的最佳典範，在不斷破壞巴西的進攻之餘，亦參與了多次反攻。今場可算是技術性擊倒。

今日去了獎門人屋企，晚上打邊爐，飽。

近日正全力加速睇《水滸傳》。

七一。過了數十年，人們對董建華的印象，可能就是他令七一回歸這一天有了令另一個意義。

七點幾起左身。睇電視知道意大利三比零出線，還是不太能夠沖走昨晚看著阿根廷出局的傷感。意大利東尼一係唔入，一入就兩球，射手一發力就唔係人咁品。阿根廷今場真係打得好，進攻有耐性有組織，防守亦很好，德國隊入個球實在係二傳得太靚。最可惜係阿根廷太早換走列基美和基斯普，難得是阿根廷在失去中前場兩名大將後，在加時賽繼續有高水準演出，取得較多的攻勢。十二碼出局，足球場真係一個傷心地。

和阿媽食早餐，之後返屋企訓到十二點。今日和獎門人去了沙田和機場，跟 《 metropop》去了那間諾富特酒店一間甜品店食朱古力餅，甜。原來東薈城而家有咁鬼多 outlet，加埋幾間舒適既咖啡店，作為遊客離港前的最後一站，相信唔錯，就像關西機場旁的 Rinku Outlet。不過個商場始終太大，要建立一個完整既氣氛真係唔容易。

今晚又睇多一場要靠十二碼分勝負，真係爆殘忍。

返左工兩星期，都仲係咁 hea，無人搵我做野，食飯又一條友，離哂群咁，真係無咩心機。不過有樣野好，就係生活固定左，朝早搭車睇《am730》，食飯前就睇《信報》，十二點半先叮飯又唔駛排隊，食完飯洗碗又係唔駛排隊，放工搭車就睇書，其實咁既生活都真係唔錯。點都好，希望可以快些做下 mainframe 既野，front-end 和 backend 既野都識，咁對將來做 system design 有幫助好多。

Walter S. Mossberg 係華爾街日報個專欄度引述左一件關於 Sony 既 CEO 係一個展覽上面俾人問左一個問題，個問題係而家咁多手提電器，點解佢地既充電器或者接駁器唔可以純一，攪到出一次 trip 要帶多咁鬼多野。呢個係一個現代人都有既問題，連 Sony CEO 都承認自己都覺得好煩，仲話呢個係一個人人平等既問題﹝I think it's a fair question.﹞，另外佢亦表示，呢類電器副產品偏偏就係 Sony 過去三年利潤最高既部分。Mossberg 從幾個方面分析點解這些充電器，電池，接駁器等總係唔可以純一到，當中較有趣既原因係現在有些生產啇，將這些副產品的設計也當成產品的賣點，設計層出不窮，所以即使要在同一牌子上達到相容，也不是易事。

今晚頭場阿根廷對德國，德國隊除了有主場之利外，球員穩定性亦似乎較好，但阿根廷亦絕不可睇少。德國隊應可應付阿根廷既中路進攻，不過就應該睇唔住美斯和泰維斯係兩邊既發難，加上德國既拿娒經常都去左助攻，增加左阿根廷兩翼既機會，而且列文俾人既感覺，總係好似好易俾細細粒既人玩死咁，所以今場美斯和泰維斯絕對需要睇實。相反咁睇，今屆德國隊喜歡用高路斯、普度斯基和舒韋恩史迪加係中路係咁以快打快，只要蘇連唔好經常走左上前面，加埋軒斯和阿耶拉應有足夠速度和體力去應付德國呢三條友仔。但係唔好忘記德國仲有個波歷克，列基美到前一場都未打到應有水準，波歷克既防守壓力相對減少，如果前面個三條友攪唔掂，德國隊大可以變番以往既一人球隊。阿根廷今次呢關真係唔易過，但係波既野，一兩個球員超水準表現或失準，已可影響戰局。

去到八強，心入面經常都唔係好知自己想邊隊出線，兩邊都有支持既人，頭場我就支持阿根廷，尾場意大利對烏克蘭唔知點咁，我由巴治奧年代開始支持意大利，算係鍾情左最耐既球隊，但係而家陣內實在無咩鍾意既人，最睇得上眼都係派路和加度素，本來都鍾意迪比阿路，但佢而家正選不保。相反我對而家既烏克蘭就真係有些感情，當年基輔戴拿模係歐聯好勁既時候，人人都鍾意舒夫真高，但係我就鍾意佢個拍擋列保夫，佢呢幾年浮浮沈沈，又患過抑鬱症，今屆佢幾次上陣表現都幾好，又係佢第一次亦係最後一次打世界杯，真係幾希望佢可以打多幾場。

昨日終於打左《海神號》個影評，事隔咁耐，真係連部戲講咩都唔多記得。

番左個零星期工，都重係自修緊。Mainframe 對我來講真係一樣全新既野，除左要學識玩個 TSO 外，而家要學既 programming language 有三種，分別係 cobol、jcl、和 assembly，又係完全唔識既。

不過都好既，起碼學多幾樣野傍身，自己個價都提高左。希望遲下可以 backend 同 frontend 兩面都有得做吧。

遲左五十多個小時，和記的員工昨日終於上左獎門人屋企，兩下就整番好個上網，好心之前就唔好拖咁耐。

好消息一浪接一浪。法國入八強、mp3 機自動好番、可以兩個一齊上寬頻，仲有一樣都好快攪掂，要加油呀！

本《Intelligent Investor》又到期，次次都係睇睇下就到期，真係可能成世都未睇完。借左三隻碟，Kraftwerk、Radiohead和一隻 jazz 女歌手碟，唔錯。

法國今次真係勁掂，對著今屆咁有氣勢既西班牙，先失一球，再反勝三球，真係咩仇都報哂。今年西班牙中場咁鬼勁，今場仲用埋費比加斯加正選，另加沙比、沙維和祖阿昆，真係幾係幾人驚，不過法國個中場就出名勁，雖然係比較老，但施丹、馬基理尼加韋拉發威起來，唔係人咁品。韋拉繼續保持水準，助攻力愈來愈強，可惜祖記負面新聞太多。從上場可見，亨利和查斯古特既默契係開始番番來，只係欠運，但係今場都係無出查斯古特，有些可惜。

點都好，近幾年世界杯，就只有一隊法國可以打低巴西。我勁期待和支持法國下場擊敗巴西。

昨日睇左篇How to Retire in Your 30's，幾有趣，當中講 it 係其中一個可以搵大錢既行業，不過要係公司開國公臣，同埋間公司有一日會上市升幾十倍，另種情況係美國經常有，係香港就只可以當新聞睇。係香港做 it 只係一個技工，唔會有得跟住間公司發達。因為香港人只覺得 it 人既存在，只係為左令電腦正常運作，就像保安既存在係為左保護個人及財物安全一樣。李嘉誠點樣發達都好，當年睇住佢發達既看更，都已經唔知去左邊度了。

和記寛頻呢間野真係勁唔掂，收錢收得唔清楚，試過停用其中一款配套服務，點知幫我停左上網，而個服務又差唔多半年都未停到，攪到要個個月打去問。點知間野既維修重差，約左二點至四點，三點幾話整緊，六點幾話師傅八點半到,八點幾話聯絡唔到師傅，十點幾話要聽日約另一個時間。真係浪費光陰，最大既問題係全程都無人主動聯絡我地，次次都係我地打去維修部問，話會覆電話，但係無一次有覆到，個師傅就全程失蹤，真係令人懷疑係咪真係有師傅做過野。無論如何，我地對呢間公司都已經死哂心，上網唔穩定，服務唔掂，收費唔掂，維修唔掂。一個字，勁廢。

今晚上獎門人匡企食飯，個個都話我番工樣靚仔哂,哈，唔通平時好唔掂？不過今日忻忻見到我都特別開心，係咁捉住我玩。

法國今晚要加油呀！

荷蘭出局，不過葡萄牙都唔好得好多，咁鬼多人下場唔出得，益左無鬼用既英格蘭。意大利好彩完場前有球十二碼，如果唔係都咪話唔危。馬達拉斯呢條友真係唔係路，又會咁茅都有既。

今日番工都係學 JCL 和熟習 mainframe 環境。

唔好彩總會過去，之後便是好彩了。

短週。昨晚睇完法國個場先訓，今日十點先起身。可能我都係一個比較婦人之仁既人，通常睇呢類好似世界杯、歐洲國家杯、nba 季後賽等勝者為王，敗者為寇既賽事，我都會覺得有點傷心。球場地、英雄地，三十二支球隊，經歷外圍賽，在國民及球迷的支持下，出戰世界杯。可惜，一次世界杯，只有一隊世界杯冠軍，失望的比快樂的，多三十一倍。

ACM 訓練，今日教得勁求其，簡介左一下 MST 後，就叫學生分組睇題目，講完題目後，就叫佢地二個人一組咁做題目。

和獎門人去了食野，之後行街，i.t. mickey 勁特價，可惜無男裝。

晚上睇德國對瑞典。原本諗住兩隊會勁對攻，點知瑞典中場完全唔夠德國搶，組織唔到咩攻勢，反而德國隊就真係愈睇愈勁，波歷克在中場較後分波及防守，前面三條友就係咁進攻，拿姆和芬寧斯既助攻亦都好有威力，後面幾個又好似幾穩陣咁。德國隊今次真係唔再係一人球隊。

我又用番有線上網，今晚師傅來安裝。download 好快，但係 upload 勁慢。我又可以用番 linux 了，真好。

肥，唔好灰心呀，開心就有好運，唔好放棄呀！

今日搵左 Alan 等人食飯，都成一年無見佢地了，不過大家都無咩變。

繼續學習 JCL，有些概念，臨走時 Nick 教左我一陣，希望下星期還記得吧。

昨晚和尼維特忍著淚說再見，希望今晚法國隊順順利利吧，亨利和施丹都係我偶像，好想佢地可以在今次世界杯有好表現。

原本今晚約左有線裝上網，點知等左一輪都未到，為左唔好阻住睇波，改期至聽晚。

出左封電郵問學校可唔可以出信証明我 OSS 既工作紀錄，成個星期都無回音，都唔知點做野。

今日獎門人搵我食午飯，食韓國野，正。係公司繼續自修 JCL，差唔多睇哂。

放工係西鐵無訓覺，睇《新君王論》，唔覺太累，感覺良好。

獎門人今日行到腳仔都痛，心痛死。

呢期世界杯的風頭最勁，連nba總決賽都無咩人注目。在 o'neil 和 wade 的合作下，熱火連追四場奪去第一名，勁。

今日返工自學 JCL。

返到屋企好累，波都無心機睇。

今日番工都係自修。中午和一些 CBW 的舊同事食飯，CRMS 實習生三代同堂。

放工獎門人拎左一些食物給我，正。

和獎門人去了上環睇樓，之後番旺角，小小大肥重出江湖。食咖哩大王，唔太 spice，又香，一流。

番左工，好似無哂時間睇書咁。

今日第一日番工。勁黑仔，一起身就勁肚痛，係咁 or，攪到遲哂到。家姐係地鐵站等我，俾左封開工利是我，今次開工一定掂，加埋收左三封開工利是。係 HR 攪完手續後，九點多便去報到，但係老細們去了開會。我個位係以前實習時代的左下角，附近的都是熟口熟面既人。番到公司都係勁去廁所，真係煩。睇左一些 mainframe 既野，Nick 又教左我一些。中午老細請食飯，之後又有人請飲野。六點鐘走人，現時都係無野做，繼續自學 mainframe。

放工就番屋企，勁眼訓，檔都無收。

今朝和獎門人一齊同屋企人返深圳慶祝父親節，去左好倫哥食自助餐，正，好多野食。

之後同獎門人返香港。坐通關巴士去左油尖，架車個座位勁好坐，超好訓。過銅鑼灣，行街街，買左好多野準備聽日番工，多謝哂獎門人。

食日本野，大大肥同小小肥慶祝父親節。原本諗住叫野食，點知見到自助餐實在太抵，所以今日食第二次餐自助餐。飯後行多陣街就番荃灣，落車勁大雨。又食野，係杏花樓食士多啤梨水晶翅和芒果水晶翅，芒果幾好味。

聽日番工了，真係好唔捨學生時代。

今朝打左北京之旅既旅行日記。我既打字速度真係要改善下。

下午去了獎門人家，一齊睇《海神號歷險記》，睇到好緊張。之後落左荃灣食飯慶祝父親節，飯後大家姐車埋我番屋企。

今日終於睇完《水滸傳》上集了，宋江也快上梁山了，到底他是怎樣奪去晁蓋的領導地位，而吳用、公孫勝等舊人在當中又擔當甚麼角色，實在令人很好奇。《水滸傳》真係一本充滿管理學問既小說，王倫之死已是中小企老闆的典範，宋江、晁蓋、柴進等領導型人物怎樣收服人心亦值得學習。因為我看這書得很慢，所以出現了一些問題，就是經常都會忘記一些角色的背景，而需要向前參考番。

今晚捷克和意大利都失分，呢一組算係目前形勢最緊張既一組了。

今朝去天水圍申請智能身份証，月尾有得取証，之後就可以做個有智能既人。行過間恒生，勁難得地無咩人，就入去取消左個 BIA 戶口，呢個戶口係當年申請信用卡既時侯開既，一路都無錢係入面，就咁四年之後就被我取消了。

下午和獎門人行中環，係 IFC 行左陣，之後就上半山 Vanilla 食蛋糕。呢間 Vanilla 由一個法國女廚師經營，賣既蛋糕類以小店來說算幾多，另外還有一些熱食，我和獎門人都很喜歡到這裡食野。今次試左兩款撻，一個檸檬和一個栗子味，栗子味正，檸檬那個表面有些泡沫狀糖，勁甜，檸檬漿亦勁重檸檬味。食極都唔夠，我地再食左個焗牛肉面，勁好味。呢間店最特別既地方係佢既地點，位於中環半山電梯既接近最頂位置，上既時侯唔覺累，食飽行番去地下就唔講得笑，不過食到飽飽行行都好既。

和獎門人係 HMV 掃影碟，狂，買左五部戲。之後去獎門人度食飯，飯後一路睇世界杯，一路泡腳，勁過穩。

講番場波，阿根廷對塞黑。塞黑都算得上係最令人失望既其中一隊﹝英格蘭都係，不過其實都預計到既。﹞，阿根廷大勝六球，阿根廷係中場唔算勁過塞黑好多，兩隊都有進攻，只係阿根廷在埋門最後幾腳既處理比較好。另一焦點是美斯復出，佢比昨日同樣都係復出既朗尼幸運，佢出場既時侯阿根廷已經打緊順景波，唔似朗尼咁大壓力。美斯既表現真係勁好，咁短時間都一助攻一入波。不過另一中場列基美就比較無影無縱了。

Bill Gates 宣佈 08 年退出前線，連後補人選都已經有埋。呢個世界首富真係唔到你唔服，係公司進取期就勁進取，成熟期就展現出佢既決策能力。早幾年讓出 CEO 個位已經見到佢既勇氣，雖然 Steve Ballmer 是否一個好既 CEO 就比較令人非議。今次佢既保留主席和升兩個人上位亦見心思。點講都好，放手係一個好難既決定，重要係一間全球最有錢既公司，佢咁都做得到，真係服。另外亦估唔到，Bill Gates 同畢菲特既退休時間會咁接近。

今晚番屋企既時侯，係西鐵見到一個男人著住件畢卡索衫係度睇書，先至記起我地曾經去過畢卡索係巴塞隆納既故居。諗番起舊年我地四條友去歐洲，真係好鬼文藝青年，係巴塞隆納追蹤米羅既畫和高第既建築，係羅馬睇米高安捷勞既雕塑，係維也納睇百水既建築和到貝多芬既故居，我地重偷偷地咁同貝多芬個琴合照，重有好多好多。事隔一年，而家諗番都重係好開心。好開心有過呢一個經歷。

我地都鍾意旅行，拎住本書，行行行，搵搵搵，好累好累，但係好開心。

今次去北京，我都係郭沬若門口影左張相，重係咁文藝。

昨日睇《milk》話 thom yorke 會以個人名義出一隻唱片，幾期待，傳說話創作模式會以番唱歌為主。畢竟呢幾年既 radiohead 真係愈走愈遠，真係跟唔上。

今日去左獎門人屋企整糯米‘池’，第一次整，都幾好玩，又幾好食。

繼續睇《水滸傳》，希望可以係下星期番工前睇完本上集。

今日回復正常八點起身。都係食完早餐就落街睇報紙，下星期就無得過呢種退休生活了。

整理照片。哂了去北京的照片，今次和獎門人合力，很快便把照片分好了。順便入埋之前上海大阪既相。

今日大入貨，買左好多野，我買左集錶，DW 5600b，型。

睇西班牙對烏克蘭，估唔到西班牙三箭頭咁鬼勁，加上烏克蘭中場完全唔夠班，結果西班牙四比零取勝。

今日訓到十一點，去完旅行真係特別累，好似訓極都唔夠咁。

起身上網，睇下電郵和過去幾日人地既 blog，加埋過相，攪攪下又幾粒鐘。

今次去旅行我係途中寫左旅行日記，所以都係要搵個時間打番出來。不過通常寫左出來既日記多數都係唔會打番出來，好似舊年既歐洲之旅，日記還是只有硬本﹝hardcopy﹞。

今次旅行都好開心，去左好多歷史名勝，導遊既歷史知識又勁，講極都有。不過我都係比較鍾意自由行，因為我覺咁可以認識個城市多一點。

番到香港，又開始睇報紙、雜誌和書本既生活，有時覺得有點未能消化的感覺。昨晚上機前，在北京首都機場用 19.8 人民幣買了 Peter Lynch 的投資書，真係勁平。

今日攪下個世界杯陣容，我隊波真係勁落後，不過今晚有八位球員上陣，希望可以多分一點。

今晚首場比賽，南韓反勝多哥二比一，不過我持有的三位球員都唔係打得幾好。

北京之旅 第一天 六月八日

今次去北京所乘搭的班機比去上海的更早，四點便要起身。計過度過，最好既去機場方法是先坐 n269 去荃灣，會合獎門人再轉 a31 去機場，結果準時到達機場。

乘坐中國國際航空公司的飛機，大約三小時的機程，十一點多便到達我們的首都，北京。

這是我第一次到北京，現在可算是一個不錯的時機。剛過了六四 17 週年，北京以至中國有甚麼改變？兩年後便是北京奧運，現在四處也在擴建維修去迎接這盛事，但人民政府在此出的金錢背後，得到的除了名譽外，對人民有甚麼幫助？更重要的是北京的沙漠化，外來的風沙及本地的車輛污染，北京的藍天已經買少見少了。一日污染未能解決，種再多的白陽樹也是無法阻止沙漠化。

今天的第一站是秀水市場，即是以前的秀水街，只是現在上了商場而已。

之後去的便是天安門。很緊張，一來便是這北京最重要的地方。這個全球最大的廣場，導遊小姐說當年興建的目的是為了造一個足夠一百萬人示威集會的地方，但提到在這裡的示威，我相信大家只會想起十七年前的那一次。

我們先到毛主席紀念館。係呢度最值得睇既唔係毛主席條屍，而係那些人民對他的神化。我真的完全想像唔到，人們爭先恐後地排隊，搶住買三元一朵既菊花，眼神充滿敬畏。入內後更是奇景，很多人對他作拜神狀。場面真係幾震撼，一方面感到反感，一方面害怕這場種國民教育。據我所知，毛主席並不喜歡拜偶像，而天葬更是他的願望。

離開之後，我們便在天安門到處拍照。國家博物館、天安門城樓、人民英雄紀念碑和人民大會堂，廣場內有很多人，保安十分嚴密，但唔知點解會容許咁多捨荒者，莫非佢地就係傳說中既特務？

行完奧運紀念品店便番酒店。今晚住係春暉園溫泉渡假酒店，正，有私家溫泉外，更有一個溫泉樂園，有好多類型既池，我地四個都浸到好累，實好好訓。

北京之旅 第二天 六月九日

八點半離開酒店，呢度既早餐都唔好食既。

整個上午都在遊故宮。紫禁城真的很大，我們穿過一座又一座的皇宮，行以住只供皇帝行既路，可惜最大座既太和殿正在維修，無得睇。行在差唔多四個鐘，食完飯就去王府井大街。這裡有很多商場及店舖，但無收穫，畢竟購物天堂還是香港。

今晚在中央電視塔內的餐廳內食自助餐。

終於試到北京既塞車了。實際行車時間比導遊預期既多一半，真係停車多過行車。

今晚入住的是在萬里長城居庸關下的古式四合園，但因為到達時已入黑，咩都睇唔到。

北京之旅 第三天 六月十日

「不到長城非好漢。」

天光望出四合園，原來我地真係已經在萬里長城之下。

我成為好漢了。在長城行了個多小時，上了四個烽火台，感覺好偉大，係山上風景好靚。對於行長城，我覺得落比上辛苦好多，對腳行到無哂力。

中午食水果宴，一般。另亦去了玉器城和寶樹堂參觀。

下午去天壇，無咩特別。

晚上食全聚德烤鴨，和獎門人一齊食最好味。

行程上有個節目听「夜遊天安門」，勁期待，點知原來係架車度遊，真係爆失望，天安門夜晚幾靚。

番酒台，今晚住嘉里中心飯店，超五星級，勁豪華。

北京之旅 第四天 六月十一日

今日七點半 morning call 先起身，勁好訓。呢間酒店既早餐好多野食。

第一站去頤和園，好靚。可惜我係度肚痛，個廁所又勁臭。

中午食餃子宴，全豬，無咩好食。

之後去同仁堂，中國最聞名既中藥店。係度有得按摩，幾舒服。醫師幫我把脈之後叫我做多些運動。

之後三輪車遊胡同及參觀四合院，感覺良好。在郭沬若門前拍了一張照片。

又是車上夜遊，今天是三屯里

今晚食羊肉火鍋，和獎門人分開食。

呢幾晚也是和獎門人家人一起睇世界杯。真開心。

明天便是北京的最後一天了。

北京之旅 第五天 六月十二日

今天是這個行程的最後一天了，這個充滿歷史的首都給我感覺是不錯的，我覺得政府在保護文物上很盡力。

北京人普遍也不喜歡坐公共交通工具的，好像巴士和地鐵，沒有空調的列車和有售票員的巴士，確是有點脫節。我認為要減輕私家車的數目，先要從根本去整頓路線和車箱質素，另外亦要強制車輛使用環保燃料，否則本地人也不會乘坐公共交通工具。

第一站德勝門城樓，當年北京有九座城樓，各有不同的用途，運水、運屎和運貨等也在不同的城門出入。而德勝門則是士兵出征的門，這裡有貔貅，傳說可給士兵好運。

飯後去了試茶，飲左幾杯。

之後去做腳底按摩，按摩技師是北京中醫大學的學生，很年青，按得幾舒服。

最後坐飛機返香港，因雷雨關係，班機延遲了差唔多兩小時才起飛，返到香港又要坐 N 車了。

今日出成績，原本都唔記得左，起左身成粒鐘先醒起。一上網，vincent 和 lee hang 已經立即問我咩成績。勁緊張，個網又出得慢。個成績很好，合乎最理想的成績。之後獎門人都睇左成績，都係很好。我地兩個都勁開心，雖然唔係 A+，但得到既已經係我地希望既最好。

中午和 mother 食完死仔面就番學，mother 話我煮得好味，識貨。番學校拎信，比原定既時間早有得拎，之後番 lab 勁 hea。

三點多便去到奧運，今日簽約。勁驚，人事部話我封信唔得，要等到七月先可以開工，其實我都無咩所謂既，不過佢問左一輪之後，又話可以第日補番。

之後番屋企，執行李。聽日出發去北京。朝早機，要六點十五分去到機場，都咪話唔驚。

今朝早換左人民幣，銀行真係無哂錢，得番三位數字。同獎門人交換番那些昨天被我分錯的相片，兩人在地鐵企係度執相，難度真係甚高，幸好有默契。

下午和大同們 happy hour 唱 k，七條友唱左差唔多五個鐘。之後去左食芝士公仔面，正。再之後去左黃埔睇《海神號》，好一部逃亡戲，中段逃亡部分真係好迫真，可惜災難前及脫險後的劇情有點奇怪幼稚。

和獎門人由黃埔坐巴士番荃灣，路經一條獲嘉路，我地兩個都覺得呢條街個名幾好，就係咁，我地就幫我地既仔女諗左個名。

周獲家~~周獲晴~~

我係今次上海大阪之旅哂左勁多相，同獎門人兩條友仔加埋成四百張，仲多過去歐洲。可能因為人老左，都係覺得哂出來既相先至有意義，就好似唔知邊個話過，用既錢先至係自己既錢，擺銀行無鬼用一樣。四百幾張相其實都幾壯觀，成舊磚頭咁厚。攪左個幾鐘，先可以將相片分番類。真係諗起都煩，之後重要原來有好多都分錯左。

下午和獎門人屋企人去茶會，無咩野食，個茶會比原定遲半個鐘，要呆等。講到唔信，我地今次既團友入面，竟然有一位女模特兒，今次重要恨死隔離。

開完茶會，我便去搵獎門人，拎住幾袋野由旺角行上何文田，熱到死咁濟，著新鞋行咁多路，重攪到隻腳勁痛。

之後便去了獎門人屋企食飯。晚上回家後便執野準備星期四出發。

今日同左獎門人去太古城，原本想睇《海神號》，點知勁多人睇，得番最前個幾排，結果無睇。之後去左尖沙咀，點知尖沙咀幾間戲院都無上呢部戲，真係可惜。約左屋企人晚餐一齊係尖沙咀食，但係當時都只得三點幾，兩條友要行幾粒鐘街等齊人。

見到 Playmobil 足球公仔，獎門人原本諗住偷偷地送俾我，點知俾我發現左，但係都唔錯，我地一人買一隻，之後仲係 McCafe 同 CitySuper 開波踢番兩腳，勁好玩，不過係咁踢個波落地。

終於等到佢地，原本想食重慶咖哩，但佢地驚辣，所以轉食另一間餐廳，但係點知間餐廳星期日休息，最後都係食番重慶。原本一心想去新德里食，但係 father 遇到朋友，結果去左另一間食，點知呢間野好似無冷氣咁，勁熱，食物水準又一般。

之後去左食 XTC，八條友食四杯，好味。

晚上睇《搵 Jack 嫂》大結局，睇左幾集，其實都唔係好明個遊戲想點同埋有咩獎品。另外亦睇左陣足球友誼賽。

又開始睇《水滸傳》，睇到武大郎被毒死了。另外數星期前借的《Common stock and uncommon profit》亦到期無法續借了，但我又借到《The Intelligent Investor》了。

今天和獎門人去了何文田探路，之後去了新世紀，睇左一些番工衫。又食 M 記，中左百搭卡。

昨晚食飯講起，我話三份免費日報當中，以《AM 730》最好睇，除了紙質好外，專欄內容亦是一流。原來阿爺同我一樣，都鍾意睇禢中怡的中環博客和林少陽的專欄，我地都覺得林少陽寫野有料到。《AM 730》在搵人寫專欄和做訪問既選擇的確係唔錯，今日便訪問了陸東，另一位金錢之王。

其實現在差不多全部報章都有數個投資專欄，但有部份作者是那些只會談價位、平均線等廢話的財經演員，有理性分析的並不多，理性分析有多方面，好像公司管理、營業前景等，當中我最欣賞的是原復生和孔少林﹝傳聞都係蔡東豪﹞、東尼、林少陽、方卓如等，蔡東豪主要從企業管治方向分析，無咩數字，東尼一派便比較從行業前景及價值等分析。

昨天都唔記得講，我收到匯豐的 offer 了，十九號番工，下星期可以和獎門人一家去北京。要番工了，真係要趁機玩盡。

感謝獎門人，幫我將上海大阪的相片放上網。這個是獎門人拍的照片。

中國銀行最高試過 $3.5，係時候放了。廿幾倍市盈率加上此公司的往績，實在不敢恭維。可惜今日無機會上網放，希望下星期一個泡未爆。

今日同獎門人去了灣仔春天花花特賣場，收穫勁多。之後食 M 記，中左 Micheal Lau 既德國卡。和獎門人係灣仔電腦城一人買 1G 記憶卡俾相機用，佢係 CF 我係 SD。

連續兩晚在燒碟，雖然燒碟機已經非常普及，但我還是近來才開始燒碟，因為我一直也覺得燒碟的最後結果是製造垃圾及浪費資源，結果我證實這想法是對的，在未有燒碟機時，我不會想去燒碟，有得到燒碟機後，我不斷想有甚麼可以燒。

今日成九點先起身，但係都重有得睇《信報》。今日中行掛牌，開市前我訂下一高一低目標，如果今天高過 $3.5 就放，如果低過 $2.7 就入，結果收市 $3.4，我咩都唔駛做。

寫左上海大阪旅行日記。

下午選左百幾張相去哂。今次影左好多相。

晚上和中同食飯，勁飽和好笑。

話說昨天抽了《魔神英雄傳》蛋，勁開心，中左幾隻主角機械人。今日係咁叫人抽，但係竟然俾 mcc 話人引誘佢，勁無奈。不過我就真係中哂毒。

今日計今個月用左幾多錢，今個月數目繁複，比平時多了買賣外幣、股票和旅費等，計左好耐先計得掂。

昨晚起身睇足球友誼賽，巴西大勝，好大原因係對方太弱，巴西隊中並未見有甚麼默契可言，兩邊後衛年老及中堅喜歡引球推進都可以係致命傷。早上看 NBA，太陽輕鬆打敗小牛。

下午去了獎門人家，做了幾個朱古力軟心蛋糕，之後過了獎門人家姐屋企打牌。晚上食飯後睇旅行相。

今日《信報》孔少林講佢對天律港和冠君上市表現後“榮辱互見”的意見。佢指出，大股東或母公司真正收錢落袋是靠 IPO 時的定價，上市後點升都只係數字上既收益，上市後勁升只是顯示出該公司在上市前定價唔夠進取，即是議價能力不足。我認為好像天律港此類公司，質素低劣，若非市況強勁，根本就唔值呢個價。而好像冠君、泓富等私人公司的 REIT，本身只擁有很少物業和非甲級物業，上市最主要目的就是為母公司套現及增值，以上限定價對他們來說已是最重要的任務，之後個價點樣插水，都有小股民一齊分擔，過得幾年，到個價趺到勁低既時侯，就玩私有化或配股等財技，一來一回，市民既錢就變成富豪既錢。

講開 IPO，一向被認為國內質素最好的招商銀行傳聞即將上市，值得期待，但相信定價必定甚高。

今日和獎門人番學校執野走。離開前遇見 patpat。去了行黃金，行黃金唔知點解成為左我和獎門人近月常去的地方，買了一盒 cd 和 dvd。

旅行回來後心情保持在煩躁狀態。好像做甚麼也不順利。

見到隻新叮噹蛋，以為係新野，抽完之發現原來係勁舊。

今日唔知點解獎門人勁早就著到好整齊咁去左尖沙咀，我又唔知點解係海港城企左個幾鐘，之後兩條友又去左旺角先至清醒番。獎門人北京之行成團了，真係好，我都唔知有無得去。

之後獎門人係無印買左個袋，勁 formal。食左餐野就番屋企。

被 Yahoo 拒絕了。不過知道左總好過呆等既，唯有繼續搵工。

中行最少一人一手，即是我得到一手。

今日想講下西班牙隊今年世界杯既陣容。如果單計龍門，西班牙總對超班，卡斯拿斯、連拿及簡尼沙尼斯今年在自己球隊的表現都是超勁，可惜正選只需要一個龍門，似乎最大機會都是卡斯拿斯，其他二人有點浪費的感覺。防守力唔錯，中路直頭係好勁，由中場既沙比阿朗素和費比加斯，至後面既佩奧爾都十分穩陣，可惜迪賀奴傷左，否則佢同沙加度兩邊後衛助攻力都極強。中場進攻力都算唔錯，但好像路爾斯加西亞、沙維、恩尼斯達、祖亞昆等都太年青，未必夠穩定，同埋唔知打落後波掂唔掂。前鋒放棄左老臣子摩連迪斯，祝福佢教練唔好後悔，魯爾狀態唔好但在球隊受尊重，出唔出都可能引起不滿，托利斯打大賽掂唔掂又係未知之數，韋拿聽講唔錯，但係未必有得出。有傳西班牙想唔出魯爾打三箭頭，真係祝佢好運識入波同埋唔好後悔無選摩連迪斯入隊。

回港第一天。下午去了將軍澳和獎門人家人行街，之後上了獎門人家，合二人之力，攪掂左係日本便利店買既《最後的晚餐》迷你併圖。晚上落荃灣食日本野，勁飽。

晚上攪掂埋幅《維特魯威人》

五月廿二日 香港 → 上海

因為乘搭勁早九點三十五分的東方航空班機，所以未到七點已經到達機場，我們五女一男齊集後便去食大力水手早餐，期待左呢間野好耐，但係原來唔好食既。我們的領隊加日本導遊叫做 Ben 張，貌似劉松仁。

大約十二點到達上海浦東機場，Bonnie 的朋友 Carol 嘔過不停。我們的上海導遊叫徐小姐，側面貌似肥版陳慧x。第一個去的景點是城隍廟，下著雨，很多人，感覺不太好。今餐自費，食左間湯圓店，十分普通。第二站是孫中山故居，間隔唔錯，但係室內光線十分不足，唔知當年孫中山和宋慶玲晚上點樣睇野。第三站是新天地，被譽為上海新一化潮流點，有好多餐廳和酒吧，裝潢幾舒適，可惜此時還是有雨。最後便晚餐了，勁多野食，順帶一提，我們六人在上海從未試過一餐係無食剩野既。

住係千鶴酒店，屬於旺旺集團，所以全酒店既野都有旺旺公仔，勁 cute。

五月廿三日 上海

勁早起身，話說我地既上海導遊徐小姐性格開朗，喜歡在旅遊車上高歌一番，所以我地經常都不能在旅遊車上安睡。今日先去睇珍珠，再去睇貔貅，然後再坐個幾鐘車去朱家閣水鄉，都咪過唔悶。但係朱家閣都幾靚既，不過都係太過商業化吧，唔係假期都幾多人，坐左陣船仔，不過隻船重慢過阿婆係岸邊行路。今日日頭都去左浦東睇新式商廈，真係幾勁，不過天氣唔係太好，好大霧。晚上去了黃浦江的另一邊上海灘睇舊式商廈，重勁，一條街連續廿三間殖民地時代既古老商廈。之後去左步行街。

明天便離開上海了，上海整體都唔錯既，最衰係好多洗手間都無門鎖，勁唔方便。

五月廿四日 上海 → 神戶

今日又係搭早機，九點五十五分離開浦東機場，接近一點到達關西機場。一落機就係機場食面，正。一離開機場就坐差唔多一個鐘車去神戶，去了一個叫做 Porto Bazar 既 outlet，環境真係唔錯，可以睇到又名珍珠大橋既明石大橋。幾多野賣，不過價錢都唔平，係 lego 買左兩隻星戰鎖匙扣，型爆。獎門人買左隻錶，靚。

之後便番酒店，自費食左餐西日混合餐，都唔錯。

日本既便利店文化十分強勁，通街都係便利店，主流既都有四、五間，未有獨市情況出現。佢地既便利店有好多野賣，食物既種類勁多，玩具和世界杯精品都有好多。係日本呢幾日，行便利店成為我地做得最多既野。

五月廿五日 神戶 → 大阪

一早便去了北野異人館，異人在日本人即是等如我們的「鬼佬」，異人館便是外籍人士居住的地方，這一區的住宅比較西式，導遊 Ben 張話呢度係豪宅區。之後去了清酒廠，飲番杯。呢個清酒廠有一些人型公仔示範製酒過程，像真度極高。離開後便坐車去有馬溫泉區，唔浸溫泉都唔駛怕無野做，呢一區都有個商店街，都有好多日本傳統野賣。食完午餐便離開有馬區，呢餐勁正，有溫泉蛋，六件壽司，一份烏東。

之後便去大阪，我地呢團以購物為主題，當然係去心橋買買買，我買左件 Beatles 既 Abbey Road tee，百五都唔駛，平靚正。獎門人買左對白橙 superstar，型爆，比香港一般 superstar 平差唔多兩舊。係道頓堀食左燒墨魚丸，勁大粒墨魚係入面，個店員重要識講廣東話，勁。今晚食神戶牛，我地食 A4 級，不過要自己燒，幸好獎門人都燒得幾好食，正。

五月廿六日 大阪 → 奈良 → 京都 → 大阪

第一站去奈良東大寺，勁多鹿，係咁追住人搶野食，見到有個肥仔俾著鹿咬住件衫。東大寺入面有條柱，傳說穿過後會行好運，以我的身型來說，要穿過都幾高難度，但係我地全部人都穿過左。之後去睇和服展，有幾個模特兒著和服行 cat walk，食左個特色豆腐料理，基本上食唔出個豆腐有咩咁特別。之後去京都，去了嵐山，這裡有一條保津川峽，風景幾靚，但下著毛毛細雨。最後去了藝妓街，但係見唔到藝妓，亦見唔到章子怡。

五月廿七日 大阪 → 上海 → 香港

行程最後一天，今日只有一個地方要去，就是 Rinku Premium Outlet，得一個多小時，我和獎門人便進入作戰狀態，我買左對 574，型。

係機場要自費食最後一餐，食咖哩蝦飯，正。係日本呢幾餐食物都很好，除了一餐中式外。

係咁轉機，去到上海再番香港，大約晚上八點便到香港。在飛機發現還是香港的夜景最靚。

對於一個抽一手中銀國際的人來說，在扣除在一買一賣的經紀佣金等雜費後，要升幾多先至真係有錢落袋？等我而家計下先，事先聲明，白表黃表收費不同，不同銀行經紀收費亦不同，以下計算，只是我的個人情況，不能作準。好，先假設中銀定價為上限 $3，我是在中銀網上以黃表認購的，銀行手續費 $50， 1.000%經紀佣金 $30、 0.005%證監會交易徵費 $0.15 及 0.005%香港聯交所交易費 $0.15，在認購過程，總共花去 $80.3。假設在將來我亦是使用網上交易出售我的股份而售出價是 X，經紀佣金是成交金額的 0.25%，最低收費是 $80，以一手一千股來算，中銀國際需升去 $32 ﹝即比招股價高了十倍﹞才能到達這最低收費，我們這裡便算經紀佣金是 $80 吧，印花稅 0.10%、0.005%證監會交易徵費及 0.005%香港聯交所交易費合共 0.11% * Y。即一買一賣的雜費總和是 $80.3+$80+(0.11%*Y)，經過計算，若我他日出售的價格是比招股價高 5.46%，我便有錢袋。如果睇到新聞話上市第一日就勁升 10%，其實我只係賺左當中大約 4.5%，即 $135。單以回報來看，4.5% 絕對不算少，但當中假設了第一天升 10% 和未計股票存倉費。

睇得張五常書多，我幾相信佢話交易費用可以動搖消費者既購買意欲。

今日睇左幾回《水滸傳》，看了約兩星期才看到第廿二回，都唔知幾時可以睇哂全部一百二十回。今日睇到王倫死左，佢既死都幾令人值得反思，佢係第一代梁山泊上的頭領，但無咩特別才能，統領一些烏合之眾還是可以，但當組織可以擴大時，他亦害怕下屬的能力比自己高，所以他曾經拒絕林沖﹝此“沖”實為兩點水，但我唔識打。﹞及晁蓋等的加盟，可見他有自知之明，但最後他還是死於林沖手下。相信他的害怕，很多小型公司的老闆亦會遇到，如何處理這種下屬能力太高的問題，實在值得深究。

下午在家看《教父》，買左個珍藏版都有一年，今日終於肯睇。其實我之前已經睇過第一集，今次溫故知新，覺得部劇個節奏唔快，但幾緊張，兩位教父馬龍白蘭度及阿爾伯仙奴都做得很好，睇到佢地既內心，幾好戲，其他黑幫配角都好神似。

聽日便出發去旅行了，這裡休息數天。22/5 - 24/5 香港、上海，24/5 - 27/5 上海、大阪、神戶、奈良、京都、香港。

昨天講到《春雨》的故事，講少了我認為最有趣的一個，就是《動亂》。此故事描述一眾死物對於香港暴動時在現場的感受，全文共分十四段，全部都是以好像“我是一架電車”、“我是一枚催淚彈”等自我介紹式的句子為開首，有趣。

H5N1 關注組攪左個公廁評分，妙。我認為對於都市人來說，掌握附近公廁的位置及清楚情況十分重要，如果《迷幻列車》內的 Ewan McGregor 知道優質公廁的位置，便能少受一些苦。在這個評分表內，數個得到滿分十分的公廁我也經常光顧，好像朗豪坊、葵青劇院、大會堂等也是實至名歸，得到九分和八分的時代廣場和中央圖書館也是不錯的選擇。

亨利續約阿仙奴，這是廣大球迷的喜訊。曾經有人憧憬亨利加朗拿甸奴的無敵組合，但實際上，真的是無敵嗎？這不是算術，一加一並不等如二，朗拿甸奴的傳送加亨利的接應，在廣告內睇過就算吧，只要看看法國國家隊，施丹的接送能力比得上朗拿甸奴吧，但卻不見亨利有在阿仙奴的水準。亨利的打法根本上是有別於一般前鋒，他需要的是在前半場一大片空地讓他發揮。而作為接應朗拿甸奴的前鋒，速度、觸角和把握力是最重要的，依杜奧、古利和朗拿度都是人辦，坦白講，我認為全隊阿仙奴最適合朗拿甸奴的是龍格堡。

亨利唔走，英超下屆就重好睇，阿仙奴前線一班後生仔好似費比加斯、艾迪巴約、雲佩斯等，無左個大佬係度真係差好多，加上阿仙奴個後防絕對可靠，下季一定有料到。曼聯無左雲佬，中場又唔多掂，今個暑假一定要買番幾個人，前線單靠朗尼也太危險，沙夏根本上無料到。利物甫同科拿續約絕對值得一讚，他們中後場皆強勁，只是前鋒把握力太低及進攻缺乏合作性。車路士終於買左波歷克，好似重會買多幾個頂級前鋒，坦白講，而家睇英超其中一個樂趣就係睇車路士輸波，曼聯同利物甫都似乎有佢地既辦法。

亨利留效當然是好事，睇埋佢對記者講既野就更感動，「我的隊友在歐聯決賽中表現出決心和熱情，他們向我證明根本不需要離隊，而且我實在不忍心離開一直支持我的阿仙奴球迷，他們好像我的家人一樣，所以我希望繼續留效直至掛靴為止。」。

今日去獎門人二家姐家燒野食，之前和忻忻去了公園玩，看著她一天一天長大，真開心，現在已經可以自己一個行樓梯了。今晚試左兩樣新野食，就係燒蟹同埋燒白鱔，不錯，蟹保持到鮮味，但係燒既時侯霸哂個火，燒白鱔亦好味，很脆。

之後去左獎門人屋企，裝左兩條 RAM，獎門人部機而家有 640MB RAM，幾勁呀。

返到屋企竟然有《One Piece》，正。另外都執左陣去旅行既野。

雖然有感違背原則，但還是申請了抽一手中銀國際。今朝要睇檔，之後去左銀行換錢。世界杯足球隊的現法，不同之前 Yahoo 英超，要選 23 人，再選 11 人作正選，再再選其中一人為隊長，不設金錢限制，但一個國家只可選三名球員，即是去到決賽，最叻都只可以有六名球員重踢緊。好似咩人都揀得咁開心，但其實都幾難揀。

我隊波，Darth Mike Football Team。

執左部份行李。寫左《達文西密碼》的影評，Darth Mike Movie Record 已達萬六人次了，真係多謝支持。

應該今晚便會看完《春雨》，這本短篇集有數個故事都很值得推荐。《打錯了》及《春雨》的實驗性皆很高，《春雨》利用自然環境對比社會現象，《打錯了》將同一個故事重復一次咁講去表示少許的分別造成重大的改變；《蜘蛛精》將故事和內心混在一起，是作者在《他有一把小刀》前的一個嘗試；《不，不能再分開了！》和《猶豫》也是作者擅長的寫實類型，前者利用一個旁觀者的角度講一對分隔了數十年的夫婦重遇，由期待，到重新摸索，到不願分開的心情，後者則講一婦人面對家庭、工作及外來誘惑時的迷茫。

事隔數天，想不到由 Creative 告 Apple，去到 Apple 告番 Creative。商業社會真係多變。

今日 How To 教點樣作歌，有趣。

昨晚睇歐聯，巴塞隆納早段開始打多一人，先失波後反超前以二比一擊敗阿仙奴。比賽頭段，朗拿甸奴已多次在中場放直線，由伊杜奧和古利去湧。結果只是十八分鐘，阿仙奴龍門列文因為阻擋伊杜奧的單刀而被趕出場，要換走皮里斯換入後備龍門。但最先入球的卻是打少一個的阿仙奴，蘇金寶接應罰球頂入。阿仙奴後防伊保爾防守朗拿甸奴算做得很好，朗拿甸奴做唔到個人推進，只能在中場作傳送。在打少一人情況下，阿仙奴的亨利及龍格堡其實也有數個反擊機會，可惜把握得不太好。巴塞隆納眼見落後一球，逐換入拿臣等多名進攻球員。後亦見其功效，反勝的兩球都多得於他們。久守的阿仙奴球員在落後之後已體力不支，最後失掉捧杯機會。

總體來說，阿仙奴今場表現絕對一流，後防在失去正選門將後依舊穩定。隊長亨利在龍門出場後亦負出安撫隊友心理的責任。奈何始終太早打少一人及後備深度不足。雲加在下半場換走費比加斯亦令人不解，他防守及反擊的能力也不錯，反而換入的費明尼就打到無影無縱。亨利最後十多分鐘比較“雲游”都唔怪得佢，始終獨力難支。

看見亨利支持及安撫自己的隊友，實在唔希望佢下屆離隊他投。上屆已走了一個韋拉，再走一個亨利，阿仙奴的年青球員便失去一條支柱了。

今日下午才和獎門人去街，在家看了數回《水滸傳》，已經睇到智取左生辰網了。《春雨》也快讀完了。

和獎門人去茶會，第一次去旅行社茶會，基本上係勁食野，拎左幾個旅行袋，換購左一個好大既飛行棋。之後去睇《達文西密碼》，無咩技巧，只以宗教迷團為賣點，娛樂性在於那些教會的秘密，而不在主線故事。

睇完戲食 wildfire。行陣街後搵家姐，借左個“急”，換左 d 日元和拎左 d 日本旅行資料。

有得玩世界杯足球隊，正。可惜無繁體中文版。

三號風球。早上因為有雨，所以無落街睇報紙。明天中銀國際開始公開招股，巧遇股市調整期，類似早前建行上市的情況，但那時的牛氣沒有現在那麼強勁。現是很多公司的市值也極度超出本身的價值，市盈利也過達二十倍以上，股價已達失去理性的位置，美元弱勢及過份依賴國企，極大幅度的股價下趺現在隨時發生。

今日和獎門人去了 APM，買了明晚《達文西密碼》的劇票，買左個咖哩大蝦食，睇電器。之後番荃灣，取支票及報團。大風大雨，去 M 記登記左八達通積分，食下野就番屋企。晚上阿爺俾多兩條 RAM 我，真係多謝哂。

好多國家隊都出左世界杯陣容。荷蘭領隊雲巴士頓今次就夠絕，唔選施多夫和戴維斯，杜絕球隊出現如上次世界杯的種族不和問題。以他們兩人今年在 球隊的表現，絕對有力入選任何一支國家隊。試從多方面分析今次荷蘭的陣容，進攻方面有洛賓、雲尼斯達萊和雲達華治，不成問題。但後防較令人擔心，無左體力化既維斯和已限出國家隊既史譚，中路防守要依靠一老一幼的高古和希汀加，後方則只有雲邦賀斯算得上係世界級。經驗方面亦令人擔心，新人過多，洛賓隨時出事既機會都好大。單從能力上看，施多夫和戴維斯在陣絕對有很大幫助。但從經驗得知，他們只造成不和，外圍賽亦顯示沒有他們的球隊表現更好。雖然唔選佢地更顯示出種族不和，但雲巴士頓此舉實是管理手法之高章。

今晚便是歐聯決賽。話咁快就一年，還記得舊年還在實習的時侯，歐聯那天我請了假睇波。

Google 出了一個 Ajax 的 framework 供人開發有關技術的網頁，攪到件事愈來愈 hit 咁。

今日試左阿爺俾個兩條 ram，雙面那條用唔到，單面個條用到，但係當與我舊那條一齊用時，便有一條 detect 唔到。不過唔緊要，我原先都是打算俾阿哥的。另外重裝左獎門人那個燒碟機，勁，有得燒碟。

同獎門人去剪頭髮，型，好耐無幫襯人地剪頭髮了。獎門人個頭短左好多呀，細左十年。之後食必勝客，我有一張 $10 現金卷，點知咩都唔用得，到最後要聽日再去食過。

勁聽昨天借的 Beatles 白碟，勁正，編曲與音樂都是一流，正正正。昨天同時借了 Led Zepplien 的無名唱片﹝江湖人稱之為 “IV”﹞，Bossa Nova 之父 Antonio Carlos Jobims 的《Finest Hour》，Massive Attack 的《Blue Lines》和 Miles Davis 現場錄音《Birdland 1951》。正，邊個敢話香港圖書館只係得書？

意甲事件愈搞愈勁。最搞笑都係 AC 個主席，竟然叫人地俾番之前兩年個第一佢地，但係 AC 現在自己都身有屎，據悉如果事件真係屬實，第一之位便會屬於原本第三的國米，波真係夠哂圓。

包以正爵士五重奏。正，真係不能錯過。包以正、Ted Lo 和 Peter Scherr 這個組合之前都曾經睇過，今次更可能係我最後一次用學生優惠既機會。

晚上收到前阿頭 Eric 電話，佢問我幾時可以番工。現在機會都幾大，不過卻失去了去北京的機會。

隨《東 Touch》附送了一本 adidas 「+10」 Impossible Team 特別編集，介紹了 adidas 那個兩位小朋友召來大量球員的最新廣告，除此之外，亦登出了那些球員心中的夢幻「+10」陣容。廣告老早已在網上看過，那些夢幻陣容更有參考意義。首先假設那些球星是真心選擇的，他們選擇的隊員，主要分為四類，第一類是足球名宿，好像比利、馬勒當拿等；第二類是現在的隊友；第三類是舊隊友；最後一類是從未合作過的敵隊隊員。以碧咸為例，他是一名沒有落底及防守能力的右中場，最強招式是在半場線和禁區之間的斬波，以戰術而言，一位跑上跑落的右後衛十分重要，當對方的左後衛要防備碧咸的傳球時，後衛的壘瓦式助攻便十分具破壞力。從皇馬和曼聯亦可看到這戰術的可行性之高，而碧咸在他的「+10」中，選擇的右後衛並不是皇馬內腳法速度皆強的沙真奴和施仙奴，而是擁有三大缺點的加利仔。有睇過當年碧咸還在曼聯的球迷，一定會記得碧咸和加利仔在右邊壘瓦，另加左邊速度技術型的傑斯，可謂真正兩翼齊飛。

隨了碧咸需要一名右後衛外，他的隊友施丹其實亦十分需要一位防守中場以令他可以放心地進攻。皇馬近數年的防守中場可以講得上係得啖笑，除了加維臣外，其他曾經擔任此位置的都是領隊的「大膽嘗試」。而施丹所選擇的，正是他的舊皇馬及國家隊隊友馬基里利，一名完完全全的純粹防守球員，對施丹而言，組織進攻便即管交給我去做，身為我在中場的 partner，你把對方全部進攻擋下來，再專一的把球送給我便可以。所以他不選現在皇馬的奇怪防守中場，亦不選擇擁有進攻能力的國家隊隊友韋拉。

利物甫人腳不錯，但總給人不太合作的感覺，從謝拉特和基維爾的陣容中可得知他們對自己隊友的不信任程度，見慣大場面的謝拉特陣容中除他以外並無一名利物甫現役球員，原來除了球迷外，連他自己也是覺得利物甫係完全靠哂佢的。基維爾的陣中亦只有一名芬倫咁多，而他安放自己的位置是中場正中間進攻中場，此為謝拉特專有位置，而他多數是被安排踢左中場或唔前唔後的前鋒，難怪佢成日予人唔知踢緊咩位的感覺。

這些陣容雖然只是廣告幻想性質，但玩味極高，絕對可以成為球迷討論話題。

可口可樂推出黑罐 Zero 版本專攻年輕男性市場。Zero 屬於減肥可樂，加上全黑勁型包裝打入男士市場，個 look 真係幾型。雖然可口可樂聲稱味道調較到最迎合男士味蕾的味道，但我諗我都係會比較鍾意肥仔可樂，不過個罐咁型，真係幾吸引。

今日獎門人去中環學整蛋糕，勁，個師傅曾經係半島做過。那個蛋糕名為“愛是恆久”，勁靚，成束花咁咁，朱古力表皮包住朱古力海棉蛋糕和慕絲，上面有由糖粉做成的花。好味，獎門人整得 d 花好真好靚。

係獎門人整餅既時候，我便在中環遊蕩。在大會堂圖書館借了六集碟。飲左支「油切烏龍茶」，飲完肚痛，果然係去油。

等獎門人整完餅後，便去了“參觀”開業一段時間的 Bape HK。間鋪裝修很有型，員工比想像中有禮得多，部份衣物亦唔錯，可惜太貴。

之後回獎門人家食飯和蛋糕。

今日明報介紹悉尼，叫 ERIC 睇。後來佢話那篇文章是出自我們 SS 那科的老師，我真的完全無印象，連佢個樣係點都唔記得。

今天母親節，母親節快樂。一早起身和家人去拜山，之後飲茶。因為飲完茶已經三點幾，又幾飽，所以提議今晚去家姐屋企食，唔出街食，被接納。斬哂料咁上家姐屋企。食完飯，屋企三條友都要兵分兩路咁番屋企。

在新聞看見新渡輪高層親吻早幾日意外那位受傷阿婆，雖然好像有點做作，但我從此公司在這次意外後所進行的事後工作，包括事件調查的透明度、並無將責任推在那位懷疑量倒引致此次意外的員工、及對受害者的補救行動，亦可見這公司行動之心思及責任感。雖然民間上亦有很多不滿聲音認為他們票價過高。

受意大利甲組懷疑打假波事件影響，本港賽馬會即時停止意甲冠軍投注。勁，係 AC 和祖雲達斯鬥到最後一場的時候，馬會竟然自斷客路。從壞方向想，馬會此舉從了自減客戶外，亦將舊客送給外圍莊家，外圍當然唔會考慮那些打假波的道德問題，他們最緊要有客。但從好方向睇，馬會此舉將自己從不明確事件中退身，實是有遠明之舉，某程度上亦增加自己的公眾道德。

The New York Times 報導中國上海交通大學偷取某外國公司的晶片技術，如果屬實都幾大濟。

去了旅行社退錢，要星期三才能拿支票。去了數個地鐵站破解達文西密碼，買了一個 BENQ 的 DVD 燒碟機給獎門人，等她教完琴後，一起去了世貿中心破解終極密碼，有機會參加達文西解碼之旅。要在世貿中心消費一次才能參加抽獎，幫襯了 MIX，食物一般，但那杯唔識讀既飲杯很正。

行了一會街後，便番元朗。今晚和中同們食飯。食印尼。阿爺給了兩條 RAM 給我。之後去了獎門人屋企幫手裝 DVD 機，順利。

WALTER S. MOSSBERG 在 The Wall Street Journal 的專欄中，他認為電腦產品可分為組裝機﹝生產商如 MS 和 Dell 等﹞與完整 End to End 產品﹝Mac﹞，在過去，組裝機完全勝出，但他認為在將來 End to End 的優勢將會愈來愈多，好像 iPod 等更是現有的最佳例子，而除了 Apple 外，其他生產商亦開始向這方向開發，好像 MS 的遊戲機 X-Box。有趣，這篇文章值得一看。

還是獎門人利害，懂得把 mp3 機內的歌曲排次序。我很執著於順次序地聽唱片，一些唱片的播放次序會影響歌曲的感覺，監製們不是胡亂排次序的，播放次序對演唱會錄音更為重要。獎門人，勁。

昨晚 Vincent 介紹了 google 的個人化版面，簡直勁爆。一試就唔肯收手，RSS 的應用真是偉大，現在把很多常看的網頁﹝Yahoo 新聞、slashdot、Linux Today、wiki、google reader、google calendar 和 gmail﹞也放了入去。我加了一雙會跟隨我的滑鼠走動的眼睛，這是很經典的卓面小程式，我在 linux 時也有一對。另外 wikihow 提供的 "How-To" of the day 亦甚有趣。

去上海廣島的旅行團宣佈唔成團，頂。急急腳搵另一團，經過一輪商議，報了原先的第二選擇，上海大板 outlet 團，在我們報名後，此團亦宣佈已經成團，好。

獎門人陪我去買 mon，買了 Philips 的 170S6。現在正在使用，感覺良好，但是有一點死點，唔夠三點又無得換另一部。

陳輝陽，你到底去了那裡？這位香港作曲人，曾經作出「暗湧」、「K歌之王」、「黑夜不再來」及「少女的祈禱」等十分流行的歌曲。他的作品音樂性較強，含有陣陣古典味，常以弦樂及鋼琴為主導，及後更曾出版鋼琴作品集。可惜在這一年多，市面上不再聽到他的作品，年頭的頒獎體亦不見其影，傳說是有病在身。但近數期的《Milk》終於再看到他的文字，在一個名為「AD:Outsider」中介紹廣告歌曲，總算和音樂有關。希望這是一個他回歸樂壇的第一步，期待他的作品。

自拍短片功能在近年的電話中十分普遍，將有趣片段放上網供人觀看，更是型人大哂創意之舉。Youtube 的掘起更是「食正個勢」，他們儲存的短片更大大多於 google 及 yahoo。從 CNN 的一個訪問才得知，原來 Youtube 的創辦人之一 steve chen 是一位華人，真係勁。他們兩人都原是 paypal 的員工，這訪問內便講了他們成立的原因及經營的方法。

話說上回﹝昨天﹞講到我的顯示器把畫面變肥了，今天事態發展迅速，在下午開電腦時，它發出一陣火花爆裂聲，我立即關掉電源。在過了一會後，我再次開 機，顯示器竟然冒出黑煙，勁得人驚。我的顯示器是 CRT 形，把它拆開後，看見內理已變得焦黑。今次真係大濟，而家屋企無 mon 用，呢篇日記都是在學校打的。早前見到一些 Philips 的 17" LCD 有特價，幾抵買，而家希望佢重有特價。如果唔係就要買貴 mon 了。

在 香港搞的《超級機械人演唱會》取消了，主辦單位亦失蹤了。之前 mcc 都曾經叫過我去睇，但我實在無咩興趣，所以拒絕左佢，現在無故取消，港日也有很多不滿聲音。門票的金錢也許能夠取回，但支持者失望之傷痛，卻無法補救。日 本人也很重視這個演唱會，從知日部屋得知“日本方面其實打算組團來港﹝75000日元，包兩晚入場﹞”，今次無故取消，相信會影響香港在這類國際娛樂界的 聲名。其實在香港，這類外國大 band 臨時放飛機的情況間有出現。原因可能是那些樂隊真的出現問題或臨時改變行程，有些則是搞那活動的團體，根本並未與樂隊簽訂演出合約便開始售票，之後傾唔掂 數便搞不成。很多樂迷甚至久久未能退回金錢。

今天繼續看了數回《水滸傳》和看了數個《春雨》的故事。現在獎門人正在考試，尚有一小時。之前 行過民主牆，有人投訴 MS 學系霸用了大量課室。原來到了考試期間，MS 學系便會 book 了很多課室供他們的學生溫習之用。有些人投訴這班 MS 的學生，兩三個人便估用一個課室，有些情侶甚至在課室狀甚親熱，而同時有很多其他學系的學生，在校內苦無地方可供使用，從而引起不滿。有學生反擊說，這班 提出投訴的學生，因為他們的學系無幫佢地 book 課室，就出來發難。另有一些學生說，從此不再理會 MS 的 booking，玩先到先得，霸到便死都唔走。

同學們考試期間特別好火氣。校方今次應該要睇下 MS 係咪真係做多左？還有如果那些課室無人 book 的話，係咪會鎖門？如果鎖左，便更浪費資源。其實學校可以考慮下，容許以學生名義 book 課室，但設置優先權給學系部門，而個別學系再不可以供學生溫習為理由去 book 課室。另外亦設置使用時間限額，以杜絕過份佔用的情況發生。

其實我都試過好幾次搵唔到課室用，一是之前 present 找課室作採排，另一是找課室睇戲。通常假期回來，大部份課室都是給鎖上的。而臨近考試，則常看見一些課室只有 1-3 位學生在使用。總之就係好難搵。

今日為了看信報，早上八點落檔口。全日大部份時間都係屋企，看了數回《水滸傳》和數個《春雨》的故事。下午在家看《梁祝　下世傳奇》，故事感人，音樂亦很不錯。梁祖堯的演出十分出眾，身兼主角及監製的何韻詩真的做得不錯，整個舞台劇都很好。

樓下公園的那幾棵木棉花提醒我季節的轉變，今天滿街都是它的棉花，有些甚至被風吹了入我的家。

昨晚睇了一個減肥電視節目，講一個二百多磅的肥仔減左九十幾磅。節目內容無咩特別，反而係那些減肥專家話個肥仔肥到條腰骨都變左形，一睇之下，發覺自己都好似係咁，仲要 mother 今日都話我個肚肥到個人都企唔直，真係大濟。肥唔係問題，影響骨格係問題，真係做番下運動注意下。

整野食都算係運動。今日整可樂雞翼，網上流傳很多食譜，有些是煮之前先將雞翼用可樂醃一段時間，然後炸/煎，再放回可樂煮；另一些則是先將雞翼飛水，後再炒雞翼，最後加可樂炆。其實大同小異，我採用的方法正是後者，因感覺上此方法較為入味及方便。最後出來的雞翼幾好味，但只有甜味，沒有可樂味，可惜，可能係落多了鹽，把可樂味蓋過了。

晚上收檔前在家看了一個港台節目《藝文部落》，講到一些本地獨立音樂，訪問了幾隊樂隊。我也很久沒有去睇 show 了。

電腦的顯示器出現了問題，畫面肥了，只看到中間的部份。試過拔去電線再插回，但無助。現在看得頭也痛了。唔通真係整定要買新 mon？乘機換埋電腦？

Vim 7 面世。現在不用寫程式，所以也沒有抓來玩了。不知道將來工作環境會是怎樣呢？各人有各人的路，神快人一步，搵到成為師父﹝master﹞之路了；林晨亦找到工作了，但他強調是工找他，不是他找工，串爆。真係恭喜哂佢地。

電腦界上的潮流其實和今個 S/S 興咩衫一樣，轉來轉去都係將舊野改頭換面重新包裝上市。好似 IBM 咁，近年就多多動作想搞旺 Mainframe，又降價，又加應用程式咁。CS 界超硬頸理論人 Andrew Tanenbaum 就又走出來話現行既作業系統核心﹝kernel﹞架構有咩唔好，最好都係 MicroKernel 咁，呢條友真係勁堅持。

表哥昨日臨走前買左陳奕迅演唱會 CD，益左我都有得聽。呢個演唱會我都有同獎門人去聽，氣氛勁好。聽碟就梗係清楚過現場吧，音樂聲好清楚，樂隊及管弦樂團都好清楚，但係因為清楚左，所以係開場頭幾首歌都覺得陳奕迅唱得唔係咁好，過左幾首之後就好番好多。

表哥今早返美國了，佢走的時候我還未起床。aunt 2 之後到表哥，現在全部都走哂，屋企又變回原狀了。細個既時候，我間唔時都會因為親戚要四散各地而感到好唔開心，一家人為何要存在時差。其實，現在都有這種感覺。

今日係圖書館借左幾本書。劉以鬯的《春雨》、施耐庵的《水滸傳》和 Philip A. Fisher 的《Common Stocks and Uncommon Profits and Other Writing》。我愛讀劉以鬯簡直去到不能自拔的地步。中國人雖然唔係一定要看四大名著，但身為愛書之人，點都要睇下，加上之前睇過《三國演義》，對這類舊式長篇小說都很有興趣。Philip A. Fisher 與 Benjamin Graham 同是理論派投資始祖，呢本書的中文譯名為《非常潛力股》，原書只有《Common Stocks and Uncommon Profits》這部份，現再加多作者的兩篇投資文章。

成日借咁多書，其實好多時都未睇哂就夠期要還，根本自己都無咁多時間睇。

今日陪獎門人回校溫書。努力呀，後天便考試了，之後便自由了！

英超終於完結了。雖然英超唔係特別勁，但總係最得我注目。最後一週，曼聯、利物甫和阿仙奴齊齊得三分，車路士反而失分，但頭三位都和上數週一樣，唯獨阿仙奴最後趕過熱刺成為第四名，取得來屆歐聯外圍賽資格。球員新聞較為吸引，雲佬賽前返屋企，和費 sir 的關係似乎已經完全破裂。季中受到怪病影響，盛傳失明的史高斯，竟然可以在季尾最後一場復出，狀態仲要幾好，可能有機會入國家隊。早幾年廢哂既科拿，返利物甫之後完全番生，獲得續約之外，昨晚亦有士哥，因為奧雲及朗尼的受傷，科拿入國家隊的機會亦不少。意甲要鬥到最後一週才分勝負，祖雲達斯下場和波都能夠保住一哥之位。歐聯決賽是目前最關心的事項，阿仙奴及巴塞隆納近期都狀態勁好，勁希望美斯能夠傷愈復出。

在網上看了一個青年在 68X 上被一阿叔問候的片段。68X 正是元朗至旺角的巴士線，曾幾何時我都經常坐。那位阿叔固然係惡，但那位青年畢竟是太忍得了。從那位阿叔的問候得知，片段開始前應是這位青年叫這阿叔講電話唔好咁大聲，點知個阿叔咁鬼勁，媽到個青年聲都唔敢出。真係睇唔過眼，如果本身唔係惡，好心就唔好咁多事。要多事都得，反正無理虧，要出聲就一定要堅持，必要時搵司機或報警都係自己著數。反觀那青年，出完第一句聲後就係咁俾人鬥，阿媽都俾人話埋，叫伸手就伸手，仲衰過隻狗。但係佢又唔服得哂，握完手又要人唔好話佢阿媽，結果佢都係講完就算，佢阿媽仲俾人話多幾句，真係自取其辱。最睇唔過眼既係，呢個青年既唯一一下反擊動作，是在那阿叔睇唔到佢時作出一手指指狀，真係廢到無人有，好彩個阿叔睇唔到佢呢下，如果唔係佢阿媽就俾人話多幾句。

忍一時係風平浪靜，但總唔能夠咩都可以忍。反正理虧的是對方。

通常見到呢種情況，我又會亂諗。正如片中那大叔那講，人人都有壓力，咁經過呢一濟，我相信那位阿叔的壓力已經得到解放，但那位青年呢？佢落到車，返到屋企，會唔會打老婆話阿媽呢？老婆受左氣，又會唔會打仔呢？阿仔俾阿媽打得多，番到學校會唔會打同學呢？人人都有壓力，一層傳一層，在場合 A 表現無能的人，在場合 B 可以是一家之主，無辜的人便是這樣受到暴力對待。

我不是想得太多，這些都是真實的社會現象。

中午和了獎門人回校，佢溫書我上網和燒碟。晚上去了洪水橋食飯，表哥明早便返美國了。原來我勁 out，好多人都睇過那段巴士短片了。YouTude 好偉大，但同時都好可怕。

法德二國聯合編制教科書，書中內容提及到兩國在世界大戰前後的敏感關係。是次合作希望化解對歷史的分歧以加強兩國關係。錯誤或含偏見的歷史教學住住就是造成民族鬥爭的導火 線，正確真實客觀的歷史記載難求。縱使由不同民族人士所聯合編制的教科書，亦不一定能夠客觀地展示歷史，國與國之間還是有很多利益關係，巨大而公開的國際 間分歧也許可以得到不偏袒任何一方意見的客觀報導，但單一國內的某些事件，卻可能還是被隱藏起來。歷史真相難求，漫畫《One Piece》內的魯賓便是為了找到「歷史正文」而自小與不同犯罪組織共事。但不論怎樣，我都有希望有朝一日，中國日本韓國台灣新加坡等國都能聯合編制近百年的東亞歷史，如果香港能成當中的協調角色，便更好了。

今天一早便和獎門人上深圳。和家人一起在歡樂谷那一區行了很久，坐左幾圈觀光車。為免晚上過關太多人，所以我們未到七點便返香港。與獎門人，爸媽一齊去左一番食野慶祝 mother day。超勁多人，等左一個鐘位。壽司都係咁大件，係幾抵食，不過真係等好耐同埋服務態度唔係咁好。

家姐受到欺負。內心不太好受，有些時候，縱使本身多麼不甘，但不在現場，真的無能為力。

Xanga 變回舊模樣了，新的那個出不了街。這些科技野都是不太可靠的。

還了投資人，今次看了八節，唔知幾時先可以再借到。

下午和獎門人行街，行到好累。晚上和獎門人家人慶祝 mother day。

今晚又是只有我一人在家。

等左好耐，星球大戰終於推出第四、五和六集的 DVD。每一集都包括兩隻碟，一隻是 2004 年重修版，另一隻是當年上畫的原版，絕對吸引。

數天前電視有個節目介紹香港的 Kidult，巧遇電車男近期又在電視播映，一時之間被那些 Kidult、御宅族﹝otaku﹞或 geek 等名稱弄得一頭霧水。知日部屋最新的文章便講了他認為 Kidult 和御宅族的分別，我很喜歡他那句“今天喜歡高達，一生喜歡高達。”的精神。動慢線有更詳細的介紹。我個人覺得 otaku 精神上類似 geek，都係勁專門於某類興趣。不過 geek 鬼佬較多，文化背景有點不同，喜歡的多是星戰而不是高達。

xanga 轉了介面，變得很 ajax，可惜效果勁廢，而家出唔到 post。聽聞 yahoo email 也攪了一個 ajax 化了的 beta 版本，樣子還很接近 outlook。真的要試用一下。

今日真係陪太子讀書。去了獎門人家姐家中陪讀書，讀了頭三份筆記。之後上了獎門人屋企，睇左兩集聖鬥士星矢冥王篇。講到星矢佢地即將進入冥界，黃金聖鬥士又差唔多死哂，星矢佢地又就快變做神鬥士，好似好緊張咁。其實我已經睇過漫畫，之後既劇情都大約記得，今次係第一次睇動畫版。其實一直以來，我都是看漫畫多於睇動畫。

昨晚終於都投稿了去《字花》。第一次寫野就投稿，都係多得獎門人俾信心我。希望被登出吧。其實我一向都好主動，可能無咩人知我之前都曾經應徵過《Friday》的音樂和電影專欄。

《The Intelligent Investor》快到期了，只看了大約三分一，希望能夠續借。fyp 結束後看書的速度好像還慢了。《身外物語》也只看了很少。

我簡直無聊到爆，竟然在網上找星矢的資料，並一口氣看了全部劇情及人物介紹。除了冥王篇外，其他的內容也是細個既時侯睇，冥王篇就係早幾年先睇番。我最鍾意就係黃金聖鬥士篇和冥王篇，只係聽佢地既招式就覺得型：曙光女神之寬恕、水晶牆、天空霸邪魑魅魍魎、廬山昇龍霸和鳳翼天翔等。最勁就係要三個黃金聖鬥士合力先可以出既禁招：雅典娜感嘆，更勁既係由白羊座穆、獅子座艾奧里亞和山羊座修羅出既雅典娜感嘆對由水瓶座卡妙、天蠍座米羅和雙子座撒加出既雅典娜感嘆。冥王篇既內容真係好爆，當中天秤座童虎爆得最勁，完全係爆體而出，真係估佢唔到。

今日中國政府受到兩個責備，一個可笑，一個可怕。台灣陳總統指責中國使用野蠻外交手段，斷絕台灣與其他國家的交住。事情其實是因為陳水扁出訪外國，想取道美國，點知美國方面要求多多，好似好唔想同台灣有接觸咁，最後搞到陳水扁要改道而行。陳水扁今次真係樣衰到爆，我們偉大的胡主席早前才風風光光地到訪美國，還和 MS 做埋朋友。台灣國內反對黨當然唔放過呢個機會，狂插陳水扁外交政策有問題。中國政府今次真係高招，一面搞好和藍營的關係，一面搞死陳水扁，增加下次選舉藍營勝算，到時台灣便是共產黨的朋友，奸計得呈。

另一個責備來自梵蒂岡。對於天主教愛國會近期私自擢升主教，教宗表示感到不快及認為中國國內完全沒有宗教自由。有消息更指愛國會將會再擢升多大約二十名主教。國內今次的行動令人難以明白，完全影響國際聲譽，亦增加敵國的談判本錢，更增加了那些假民主人士的聲威，實在百害而無一利。教宗的指責對國際影響十分重大，中國政府可真要小心估計行動的代價。

今天是五四運動八十七週年。我是從《中國近代史》得知五四運動的詳情的，這是一個歷史上有名的革命，某程度上，它協助了共產黨的誕生及強大，但需要強調五四精神是比現在大家所見的共產黨來得偉大得多，不要把他們混在一起。蔡元培、李大釗、陳獨秀、胡適和魯迅等人也是值得尊敬，是真正的愛國人士，非假借愛國之名而實為利益名譽之流。真正的愛國，是愛國家的人民和文化，而不是單單愛執政黨。

下午四時半到雅虎進行面試，見了人事部和開發部的人，全程大約半小時，快，要即席在白板寫程式，驚。等消息。

今晚要把作品投稿了，心大心細。很緊張，會被刊登嗎？

今朝起身睇完報紙後再勁訓，十二點先起身。和獎門人屋企人飲茶慶祝獎門人媽媽生日。之後上了獎門人屋企，食蛋糕，正。晚上回家食飯。

明天便去雅虎見工。真好奇他們的工作方式是怎麼樣，好像總喜歡在下午和晚上工作。之前 JJ 見過，佢話他們全是便服，顯得他很奇怪。所以我問人事部那小姐應該點著，一問左出口佢都未答，其實我已經感到出事，點知佢真係答 smart causal。呢款 dress code，玩足幾年我都仲係未掌握到，太 causal 又好似唔係咁好，太正式又唔夠 smart，左右做人難。真係早知唔問，而家都唔知聽日點著好。問左唔跟又好似好唔俾面咁。

唔講可能好多年青人都唔知，我們自小學習和使用的繁體字，已經危在旦夕。連聯合國也打算以簡體字為正式中文書寫文字。繁體字為正式中文文字，有數千年歷史，唐詩宋詞都是用繁體寫的。簡體字是毛伯伯其中一件傑作，為求簡筆，將中文字本身的形意完全破壞。其實有關繁簡的討論，在華人文化界常有討論。從使用者的數目著眼，使用簡體的有國內十三億人，使用繁體的只有香港、台灣和一些華僑，不足五千萬人。聯合國或其他外國人將簡體定為正式語言，也不為過。但若果有一日，繁體正式沒落，那對中華民族數千年的文化，到底有多大影響？請支持繁體普及，除了不要讓日本人改變歷史外，亦不要讓華人改變歷史。

今日一早食完早餐，就和表哥去探七姥。我都好耐無去搵七姥了，早前七"爸"過身，我都無出現。去到坐左陣，佢地兩個老人家以前都好照顧我阿媽一家，又好錫我，所以基本上年年新年我地都必去佢地度拜年。同七姥傾傾下，佢諗起七"爸"時都好傷心，搞到我都勁想喊。其實係人都有生老病死，七"爸"都有差唔多一百歲命，但係我諗起佢都好傷心，更何況係對左幾十年既老伴。所以真係要珍惜身邊既人，給多一些時間屋企人，關心多些朋友，陪下老人家。

之後和獎門人會合，再搵埋其他人，我地終於去報名。報左 23 號去上海加日本團。係銀行中心見到 eric 等人，佢地去澳洲，有米，但係原來佢地連去邊都未諗。

勁感動，獎門人睇完我個故仔後，覺得我寫個學生既心情寫得幾好，勁感動，我最想表達既就係個學生既心理變化，增添左我既自信。

星期四見工。今次是 Yahoo!。

和獎門人去昂船洲睇解放軍軍營開放。勁熱，勁多人，上左戰艦，參觀左軍人宿舍，行左一個鐘度就走。番元朗，整心太軟。開頭我做主力，之後獎門人協助。整左好多件，可惜全部蛋糕都在烤模倒出來時弄倒，朱古力漿爆哂出來。不過都好好食，朱古力味很好，唔太甜，個表皮都好，脆脆地。最可惜都係爆哂。差少少就滿分，即是下次還可次進步。

今日做乖乖仔，陪足一日阿媽老豆。先是去了小學開放日，之後出灣仔，再去埋花墟，最後去深水步，無食晚飯，因為中午食得太飽，食左糖水佬之後返屋企。

係深水步行經一條小巷，看見數人圍在一張小桌玩牌，其中一女人伏在桌上，似乎已經輸了很多。另外三個男人，一個在洗牌，一個對那女人說下一局就會贏。我們行遠了便不知道他們的情況了。看見這個情況，我的心情沉了下來。想著那把頭埋在手臂下，看不到樣子的女人。可能在今天下午之前，她還是一個好太太、好媽媽，但就在這一局局的牌，她輸掉可能不只金錢，那欠下的債，更可能影響到一個家庭、一些小孩子的成長。我不斷對自己講，不要想太多，可能他們只是玩，沒有賭錢，可能那女人是贏家，真的不要想太多。但那個女人，在輸了一次後，還會繼續沉迷嗎？還是她已經沉迷了？她的家人知道嗎？想起那三個男人的嘴臉，我實在不能不感到擔心，但我可以做甚麼。唔係唔想諗佢，係實在唔敢去諗。唔知點解，看著那個伏低頭的女人，我好驚，真係好驚。

我的電影 blog 近期都好多人到訪，平均一日都有百多人次，除了 hkifflink 和 movieworld 外，很多也是從 yahoo 和 google 進來的，亦有一些是從別人的連結進來的。好開心咁多人睇，可惜都係無咩人寫 comment，討論氣氛勁低，我諗係因為我講既野無咩特別，太大路既野通常都係唔值得討論，其實我已經注意左呢點好耐了，哈。

唔知點解，係早個排，有一日我勁想聽衛蘭既《My Love》，多得獎門人幫手，我終於得到呢集碟既歌。但勁黑仔，獎門人幾個月前送俾我既耳筒竟然左耳間歇性無聲。我懷疑係我既使用問題，因為我已經唔係第一次整壞耳筒了，所以獎門人先買個貴野俾我，點知都係兩下俾我整壞，真係激死我。有無人試過耳筒會因為插線的唔同方向而引致耳筒無聲，而又識得點樣可以整番好？我真係唔想再浪費金錢去買耳筒了。

縱然我已經於上星期完結了 fyp，但在今天看見大家終於都可以放下這個歷時一年的包袱時，也感到很開心。雖然獎門人四點半才 present，但我們一點多便回到學校，看見已經 present 了的 Vincent 和 JJ。之後我們去了找課室排練，事前練習真的很重要。終於等到四點半，獎門人與 Annie 和 Betina 一組，佢最後出場。表現很好呢，問答也處理得不錯。

返到 lab，見到很多同學，大家也 present 完了。真好。之後便是慶祝了，為免出現圍圈情況，所以我們決定先找地點才出發。擾攘一輪，終於決定去旺角食 Calafonia Pizza Kitchen，但係唔知點解，十一條友仔分唔同隊伍出發。叫左五個 pizza、一碟意粉、一份沙律、一份意大利雲吞和一人一杯無限派飲既飲品。Bonnie 勁遲到，全部人食哂野佢都未到，結果之後全部人一路係咁飲野咁睇佢食，食相甚噁心。

圍圈還是避不了。食完野後便開始圍，之後決定行去尖沙咀。再次擾攘一番，終於去了 da doice 食雪糕，坐左好耐。之後散水。

下一次集體見面，便是考試了﹝雖然我還是不用參與﹞，畢業後再齊集圍圈便沒有那麼容易了。

話說早幾天前，政府審計署出了一份報告，大數香港電台營運管理不善共九宗罪。對此指責，港台可謂照單全收，廣播處長朱培慶更大表港台角色左右做人難，無奈感直逼電影《PTU》內臥底探員貓仔話做臥底兩頭唔到岸咁樣。市民學者倒為港台反抗，蔡子強在今天明報的《蜈蚣的故事》便舉出了數項報告內的指責不公之處。其中較有趣的是對報告指港台部份節目認受性低的反駁，蔡子強認為根據曾特首去年講過港台節目不應去做一些其他私營機構會做的大眾節目，那麼，發展小眾的節目才是尊重特首意願。現在大家也應感受到港台逐漸失去自主的機會，請再細想一下，當有一天港台成為單一政治方向平台時，我們或我們的子女，在香港還有明天嗎？

波係圓呢一個願望無係 AC 身上達成，但實現了在米杜土堡身上。在歐洲足協杯四強，米杜土堡首回合落後一球，次回合更先失兩球，之後竟然可以連入四球晉身決賽。就係咁樣，今年兩個歐洲賽的決賽都是由英超球隊對西甲球隊。

睇完《字花》了。關夢南有一篇題為《離家》的新詩﹝其實我唔識分係咪新詩﹞講父親對女兒出嫁的心情，感情不流於表面，甚感人。我一向都讚成男人一生最敵不過的女人便是自己的女兒的講法，亦認同當女兒長大時，世上所有男人除了自己外，都是不懷好意的。

全日都待在家中，看書及上網。昨晚訓唔著，想了一個中學生放榜後迷茫失落的故事，今天用了數小時寫了出來，二千多字的文章。寫的和心想的並不相同，始終未能表達到那份亂的感覺。想睇既朋友便問我吧。

很喜歡可口可樂的世界杯廣告，沒有大牌球星，使用泥公仔去表達足球使敵人也變成朋友。這個廣告的節奏掌握得很好，先是林尚義的緊張評述，入球後便換來一首快版《Cannon In D》襯托出足球的喜悅。

隨著世界杯即將開始，可以預期不少球星會宣佈在世杯後掛靴。首先的便是近十年其中一位最具影響力的球員，施丹。施丹曾經得到意甲、西甲、歐聯、歐洲國家盃、世界盃，並曾當選歐洲與世界足球先生。

球員引退，球隊便要找尋合適的新人。青黃不接是所有團隊公司組織的問題。《Death of a Salesman: What Would Happen to Apple or Microsoft if Bill or Steve Die?》便談到兩位電腦界重量級人物對其公司的重要性。球員最重要的是球技體能合作性；公司領導層最重要的便是視野﹝vision﹞，沒有 Jobs 的 Apple 便失色了。

講開引退，Sun 的 Scott McNealy 便放下了 CEO 的職位，只保留主席身份。Scott McNealy 是 Sun 的創辦人之一，如果不是 mcc 那次美國之行，我也不知道有這一號人物。傳聞中 Scott McNealy 是一位有性格的人，這網頁便引述了數句他關於 MS 的言論。這篇《Thank you, Mr. McNealy》便講述了他的生平。

昨晚起身睇 AC 對巴塞隆納，緊張而無入球。兩回合計 AC 以一球落敗，一賠八失敗，無左十皮。

法國五月有很多有趣的節目。伊莎貝．雨蓓的電影很吸引，早前在電影節才看了她的《嘉比愛》。音樂節目《爵士樂的創作： 法國視野 》也很吸引，舊年在朗豪坊看包以正的時侯曾看過今次有份演出的香港音樂人 Peter Scherr，好勁。

獎門人星期六便要 present 和交中文電腦功課了，今天她努力準備，希望一切順利吧。和同學談旅行，不斷遊說他們跟我們一起去跟團，大家也好像很不確定似的。晚上落堂後去了食 M 記，想不到我們兩人大學生涯最後一餐放學後既晚餐竟然係食 M 記。

英超球隊龍門在歐聯再次發威。繼去年利物浦門將杜迪克以蛇舞勇救多球十二碼協助利物浦奪標後，昨晚阿仙奴全隊防守球員皆表現出高水準，龍門列文更在完場前數分鐘拿下對手維拉里爾主將列基美的十二碼。昨晚舉行的是四強次回合，首回合阿仙奴主場領先一比零。維拉里爾最強的是快速反攻，主攻反而不太強勁。有見及此，阿仙奴昨晚採取完全不進取踢法，前鋒亨利全場行行企企，全場全隊射門次數為零。得到大量小組進攻機會的維拉里爾，反而顯得有點進退失據；有威脅的進攻也是來自列基美的定點球和阿根廷狂人蘇連飛來飛去的搶點。結果阿仙奴成功守和，殺入決賽。

今早看了黃精甫的《唐狗與北京狗》，隻碟係 mcc 係學校借既。話說早前唔知佢受左咩打擊，問我有咩戲睇完覺得好驚，我就問非所答，話睇完黃精甫既《青梅竹馬》後覺得好噁心，有一種好難受既感覺。就係咁樣，佢就一次借左兩部黃精甫既戲，而我又未睇過《唐狗與北京狗》，所以咪乘機睇埋。《唐狗與北京狗》感覺都似《青梅竹馬》，但係俾我既感覺就無咁強烈，雖然都係變態﹝相傳黃精甫第一部得獎短片《我愛水龍門》重變態﹞。戲內最驚喜位可算是一個下個落雪的香港，雖然效果很假。故事性比前作完整了。很喜歡女主角講：「如果你係唐狗，我都只不過係北京狗。」。

看了一些《The Intelligent Investor》，我有可能在到期前看完點。已經一些《字花》內的短篇故事。我很少看短篇，不懂得分好壞，只能夠話感覺良好，當中李維怡的《聲聲慢》、亞文諾的《俱樂部》和張婉雯的《鳥》印象較為深刻。

下午到了獎門人家，中文電腦功課出現不正常現象，無解。看了一下她 present 的簡報。晚上在二家姐屋企食飯，好多野食，正，我愈來愈肥，昨晚才和家人打邊爐。今天忻忻係咁捉住我玩，真係得意。

查看電郵，才知道原來已經被學校雇用做一些 ACM 的工作了。不錯，可解工作前的財困，亦增加去旅行的彈藥。

在每一個早上，除了刷牙、食早餐及換衫等基本行為外，大家還做著幾多無謂野？我便有很多了，簡直是兩個鐘都做唔完，都唔知為咩。好吧，食早餐的時侯，便看報紙吧，好運那天兩份，正常一份。上網，先查看三個電郵，基本上全是垃圾郵件。然後便是看那些網誌，朋友的和網上巧遇而迷上的，合共十多個。再看一些專門網頁，好像slashdot、developerWorks和Linux Today等。還有一些論壇，大同的中同的電影的音樂的。幸好我不看那些星座運程，否則又要睇多幾個網頁。對，我在每天美麗的早上，便是盡做這些可算是十分無聊，但唔做又心掛掛既野。

今天和獎門人行街。兩條友勁無聊，行深水步。雖然無厘頭，但我們都在鴨寮街買左一個電器插頭和音箱延長線，又係黃金買左個籃芽接收器。見到菲利普那些 17 吋 LCD 好抵，計埋兩百超市現金卷，千六都有找，勁吸引，但現在實在太窮了。之後行去旺角。

和獎門人行了很多間旅行社，今次我們跟團了，打算去兩次，一次同屋企人，一次同朋友仔。跟旅行團最大的煩惱係唔成團，預備哂時間心情，出發前一星期先知唔成團，簡直係勁大打擊。

之後去了換禮物。自問見識甚少，唔知道係咪由有信用卡開始，便有信用卡禮物這回事。作為一個現代人，試問有幾多個係未試過親身、幫人或要人幫咁去排隊換這些信用卡禮物。這些禮物，有些是只需申請便可得到，有些是需要達到某個簽帳額才能得到。但不論從何途徑得到，以我屋企為例，這些禮物多數也是"得個擺"字，最後更連擺左去邊都唔知，甚至唔記得曾經擁有過。我想這些禮物的最大用處，便是令我們在儲夠積分可以換它們時，可以開心暢快一下﹝當然，在那一刻，不要想起排隊換禮物的不便。﹞。

值得慶祝. 一本新的香港文學雜誌出版了. 這本名為<字花>的雙月刊雜誌, 根據它的發刊辭, 不可能的文學雜誌, 所講, 這是由一班"出生於七十年代末，未滿三十的年輕人"製作. 辦書的宗旨是"打破各種局限，如果年輕是代表勇於嘗試和更新，我們願意宣稱自己是年輕的；然而惟望各位相信，年輕不等於幼稚，活潑不等於輕率。高質素的文學雜誌不等於某種自以為高人一等的拒人千里，始終希望以跳脫活潑的形象，與讀者及作者一同向未知的世界伸手、探入。". 在香港攪這類文學雜誌, 難度很高, 要維持文章的質素特別困難. 正如他們自己所說, 這是一個不可能的嘗試, 但是一切已經開始了.

看見這本文學雜誌, 自然想起<酒徒>. 出人意表地, 從明報的專欄得知, 在一個由<字花>所搞的網上問卷調查, 學生時代睇櫃桶底書調查, 劉以鬯的<打錯了>竟然名列文學界別的前茅. 雖然坦白講, 我一向不相信網上調查的全面性及代表性, 但這証明劉以鬯也有一些支持者, 起碼會在上網填問卷時記得自己睇過呢本書. 想當年中學時期, 我看得最多便是金庸和村上春樹.

只係今朝講過<字花>這本雜誌, 小小肥便買了給我, 真係抵錫. 比想像中厚, 封面的畫也很靚. 看了數篇短文章, 感覺也不錯. 在網上看到很多人說這本雜誌的斷市消息, 希望這本雜誌除了讀者的支持度能夠維持外, 編者們的決心也要堅持.

中午陪獎門人回校做功課, 進度不高, 但總算大致完成.

好。為了尊重中文及自己，從這一段起，我的文章將會採用正式的中文標點符號。特別鳴謝獎門人教我怎樣輸入標點符號。

因為王家衛的電影, 我認識了劉以鬯這位香港作家. 這一年, 他的名字便經常在我的日記內出現, 甚至可以說他是我最愛的作家. 我已經看了四本他的小說, 包括<對倒>, <酒徒>, <島與半島>和<他有一把鋒利的小刀>. 他喜歡運用不同的寫作技巧. 好像<對倒>內的並排記事便是一個經典. 我最新看的這本<他有一把鋒利的小刀>便把內心獨白和劇情發展混在一起. 書中對主角阿洪的心理描寫十分真實, 由他無錢想打劫, 到打劫, 逃走, 得錢但無所用, 賭錢, 到無哂錢既心路歷程, 都如真人親身經歷一樣. 當中描寫他打劫後那份焦急, 更引起全書高潮.

我總覺得, 劉以鬯先生的作品應該得到更多的重視. 起碼在香港, 看過<哈利波特>及<達文西密碼>等外國書籍的讀者人數, 便比知道有劉以鬯這一位作家的人數多起碼一百倍.

要推薦一下劉以鬯的作品, 我會先推薦看<對倒>, 看著書中一老一少, 樂趣委實不少. 想較深層次的, 便看<酒徒>吧, 除了看著書內那位不自愛的作家的起起伏伏, 心內亦要準備承受那一份揮之不去的壓力. <島與半島>算是比較悶, 真實地抽寫一些草根人士的生活. <他有一把鋒利的小刀>便可看到一個青年內心善與惡的鬥爭, 也許從中會看到自己的影子.

繼續假期工作. 整理了網頁書籤. 係執既過程, 不斷係度諗, 其實而家 google, yahoo 都咁勁, 重駛咩自己記那些網址. 想要咩, 只要去搜尋便可以找到. 書籤內那些網頁, 仲要有好多都係去唔到. 日子耐左, 個書籤入面既網頁, 九成都係唔會再去, 在那些會再去那 10%, 又有一半根本上係自己打網址. 雖然唔知點解, 但係我都執左.

獎門人做了朱古力軟心蛋糕. 勁, 第一次造已經好高水準, 好味, 好多朱古力漿. 今日去左兩次宜家, 一次係買椅子去獎門人屋企, 另一次係買番自己屋企. 我地基本上同款, 佢隻腳有得轉, 我就係梗腳.

在圖書館借了四本書一隻碟. 其中一本係借俾表哥既旅行書. blur 的 Parklife 很令人失望, 無咩特別. 另外仲有一本北京書, 林行止的<身外事物>, Benjamin Graham 的<The Intelligent Investor>. 最尾呢本次次都係未睇完就俾人預約左, 睇極都睇唔完, 最大濟我次次睇左都好似無睇過咁, 由此可証明我唔係一個智慧型既人.

今天是英女皇壽辰. God save the queen. 除了在英倫三島外, 英女皇在散播各地的英國殖民地也有不少支持者, 雖然反對的也不少. 至少在回歸前, 她便為我們造就了一天假期. 如果中央想更得到香港人觀心, 大可考慮攪一些毛主席或鄧小平冥壽等假期, 起碼小學生會觀天喜地.

講到英國人, 今天便要講下正式宣佈因傷退休的舒利亞. 從大約 97/98 年球季開始睇踢波, 我已是舒利亞的 fans. 雖然個人技術和速度不及南美球員, 但他擁有一流的射術, 門前把握力及身位. 在 1988 至 2006 年, 他先後效力過修咸頓, 布力般流浪及紐卡素三支英超球隊. 他可算是英超成立十多年來最偉大的前鋒. 他是英超第一個射入 100 球和 200 球的球員, 同是間亦是第一位為兩家球會都入超過100球的球員. 他曾三次當選英超神射手. 在 2003 年亦被官方選為英格蘭超級聯賽創辦十年來的最佳球員. 舒利亞已經退出國家隊多年. 在 1992-2000 八年國家隊生涯, 他總共參與 63 球比賽, 得到 30 個入球. 自從前領隊桑拿士離隊後, 舒利亞開始兼任球隊助教, 正式展開教練生涯. 而因為在2006年4月17日作客東北部打比對新特蘭時撕裂膝頭韌帶受傷, 亦令到他在今天宣佈從此掛靴. 以後球迷要看到他入球後的招牌舉手動作, 便只能從重播或友賽中看到.

今天和獎門人回校做中文電腦功課, 看似不太難, 但做左四五個鐘都未做完. 之後去了家姐屋企食飯. 姐夫在酒店拿了一些鵝肝回來, 很好食, 但很肥膩, 小量便不錯. 飯後重食埋雪糕先走, 正. 在荃灣抽公仔, 中完米妮中米奇.

香港在華人文化界總是比較後知後覺. 原來舊年在內地有一本名為<兄弟>的長篇小說引起了極大回響. 近來便出了下集. 今次香港也同步有售, 連同上集一併推出. 據說這本書的上集講述兩兄弟的童年及文革期間怎樣同渡難關. 而下集則講兩兄弟在文革後數十年經濟大發達的明爭暗鬥. 隨著小說興起, 相信不久之後, 電視電影也會隨之而來.

早幾日行過書店, 見到盧健生的<出差旅人>出版了. <出差旅人>原本在<新假期>周刊內連載, 講作者出差多年的經歷, 間唔時我都有睇, 甚為有趣.

如果俾我選擇一些香港雜誌的專欄去出書, 我希望<飲食男女>內的<老字號>可以輯錄成書. 在這個專欄, 每一期也會以四版去介紹一些香港傳統飲食老店, 一直以來, 介絡過食物包括油炸鬼, 馬仔, 嫁女餅, 茶果, 豆腐花, 鹹魚等, 連煮食工具好似蒸籠和刀等都介紹過. 呢類老店全部都係小本經營, 員工個個年過四十, 生產力不及工廠和大陸平. 十多年後, 可能好多都已經結業. 佢地做既野食, 係咪真係特別好食我唔知, 但係從報道中, 我都感受到那份人情味和製造食物的真心.

今天八點多起身. 擺脫 fyp 後的第一天, 便要做 yahoo! 的測驗. 好難, 由十點幾做到五點幾. 問過好多人, 真係唔該哂大家.

大師兄有 parttime 介絡. 如果做便可以一解呢幾個月既金錢難關.

昨晚的足球只看了半場, 阿仙奴首回合領先一球. 今天便是 fyp 的 present 了, 大學生涯的最後一關. 十點多便和獎門人一起回了學校, 今日都係要多謝哂獎門人, 聽我排左咁多次, 又俾咁多意見我, 真係錫哂妳~ 下午二時半便開始 present 了, 廿分前我們已經到達現場. 一齊 present 的是 kalee 和 chris, 觀眾有獎門人, 林晨, jj 和雞坤. 阿 chris 第一個 present, 開場白好似咁好勁咁, 最後 liuliu 問左佢好多問題, 勁驚. 之後到我, 我既英文就無阿 chris 咁流利了, 十多分鐘就 present 完, 之後 Q&A, ngo 問我個題目係咪自己諗, 又問有關 memory 既野, 真係難答, liuliu 就好似無咩興趣咁, 無問題, 真係大濟, 佢係我 1st reader. 最後係 kalee, 因為 present 未定下神, 所以都無咩聽佢講. 不過 liuliu 都有問佢問題, 只係唔問我一個, 真係唔知係咪好事.

就係咁樣, 我的大學生涯便結束了.

係 lab hea, 印左份終極報告做紀念. hea 下 hea 下咁就夠鐘食飯. 晚上一班人咁去食糖水, 大家也在談論旅行的事情. 唉, 後生仔, 就係咩地方都想去, 咩野都想玩, 可惜個個都係衰無錢. 仲有今晚我地個個都覺得石磨坊唔好食, 睇怕都幾難有下次去食.

畢業便要搵工了. 明天便要做 yahoo 的測試了.

早上又造了一點明天 present 的 powerpoint, 很緊張. 今天獎門人去恆生做 app test, 陪她去了九龍灣. 之後在 city 準備明天的 present. 廿八頁的 powerpoint, 要好好把時間控制在十五分鐘內. jj 有哂大相優惠, 給了去歐洲的相片我選擇. 這次是第一次看 jj 的歐洲相, 睇完 d 相, 就好想去旅行. 係學校差唔多夠鐘走既時候, 試玩了Google Reader這個 rss feed reader, 十分唔錯, 感覺良好.

回家後, 諗下聽日點講, 好緊張. 另外, 我重發現原來無人係識得讀 ngo 呢個姓既, 連跟 dr. ngo 既學生都唔識, 真係大濟, 聽日都唔知點叫佢.

不錯的早上. 換了在獎門人家拿的喇叭, 現在多了一個低音喇叭, 氣勢強勁. 左右喇叭也離開了地面, 放上在卓面, 正. 製作了計劃多時的宣傳卡掛飾, 把數張一路以來儲下的宣傳卡連上, 掛了在牆上, 狀甚藝術.

預備 present powerpoint. 做了十多頁, 簡略了技術詳情, 集中在簡介及結果部份. 也不知夠唔夠講十五分鐘.

yahoo 終於找上我了. 要在這一星期內其中一天做一個廿四小時的測試, 我選了在星期四, 現在還是專心做 present, 攪掂埋最後呢十分一.

養了廿九日的叮噹回去未來了. 最後還是尚欠兩件法寶未到手.

晚上和獎門人的家人去食自助餐, 勁多野食, 不過要排隊. 飽.

寫了<暗湧>的影評. hkifflink也連上了. 今天我的電影 blog 繼續有二百多人進入, 電影節效應認真強勁.

晚上看歐聯四強. ac 首回合以一球敗於巴塞. 支持 AC!

昨天交了 fyp 的終極報告了. 只差十分一, 整個 fyp 便告終結. 對成績有甚麼期望, 最清楚的便是自己. 付出過多少力, 做既野有無料到, 無人夠自己知得更多. 我想好成績是無成望的了. 好多應該做既, 都無做到. 又經常拖, 唔肯做野. 寫報告技筆又唔係好, 化腐朽為神奇與我有緣無份. 無論如何, 過埋 20 號的 present, 便完結了這件事, 總算放下了一件心頭大石.

數天前電視才播放<在世界中心呼喚愛>. 我是在戲院看這電影的, 感覺並不良好. 當時反而對另一名字都係個長既電影<宇宙只有我和你>更有好感. 昨晚我們在今個電影節看的最後一部電影, <暗湧>, 便是<宇宙只有我和你>導演的新戲. 相對下, 趣味是多了, 但深沉的感覺還在. 大約明白電影內容, 但卻不太感受到那份暗湧.

今天一早便回校辨一點事, 順利完成. 中午無野好做, 係學校借左兩部戲睇, 分別係<細路祥>和<A1 頭條>. 兩部電影獎門人都喜歡, 真好. 之後去了九龍灣, 行左陣街街. 計劃去土爪環個頭食日本野, 要出到打電話搵朋友呢招先至順利去到. 特別鳴謝 eric, mcc, bonnie, bonnie 家姐及 vincent 一干人等. 行咁耐搵到間野都叫做值得, d 野食真係幾好, 又唔算太貴.

香港國際電影節網上筆記連線連結了我的電影 blog, 一下子便破了成立以來一天訪客人數, 認真利害. 訪客來自七個國家, 可見現時資訊流通之快及廣.

原來國際台攪了一個叫"宮崎駿的夢"的東西. 在四月份一連五個星期日九點, 播放宮崎駿的電影. 錯過了頭兩個星期, 今晚播放的是<魔女宅急便>, 下星期日<夢幻街少女>, 下下星期日<歲月的童話>. 有時真係對亞視既行動感到有點可惜, 作為一個小台, 理論上她作突破性轉變的包袱沒有那麼大, 而實際上她亦曾經幾次突擊成功, 好像當年午夜不設防, 今日睇真 d 和百萬富翁等, 都係殺到無線手忙腳亂, 但是亞視總是不能乘勝追擊. 在無線大量充斥超現實電視劇和港台在一個進退失據的時機, 亞視大可減少不雅, 發展高品質文化節目, 現時電視觀眾以無知人士居多, 那類"有知之士"的家中並不是沒有電視機, 只是不願意看現時的低水平節目. 就像報界的信報, 小眾但聲譽良好. 隨著香港教育水平不斷提升, 文化節目是有前景的. 但是, 亞視總是做一些太無道德的行為. 重播徐步高的遊戲節目已經係無良. 係現在法庭也尚未有定案之時, 便大作宣傳, 開拍以徐步高為主角的電視劇. 無錯, 此類行為會得到惡評, 但可以得到更重要的收視. 用財經演員的對白來說, 這是投機, 而不是投資. 短暫的利益, 並沒有提升本身的價值.

這數天都因為發行商的誤會, 令到我沒有明報睇. 加上現在已經無得睇信報, 所以早上起床後都有小許迷茫. 今早便寫了<嘉比愛>的影評, 諗極部戲個內容其實都唔錯, 只係有 d 悶.

電視新聞講了一個男人娶了在結婚當日發生意外變成植物人的太太, 還生了孩子. 只可算是天意弄人.

上了獎門人教琴的地方接獎門人. 去了尖沙咀, 係 uniqlo 買左幾件衫, 算得上平靚正, $99 一件 andy warhol, 原價都要 1500 日圓, 點計都抵, 除左買俾自己, 我地都買左件童裝俾忻忻.

呢排好想攪 d 野. 又想整計劃左好耐既 post card 掛飾, 又想執下部電腦. 今日想將屋企用唔著的音箱俾電腦用, 點知原來個音箱已經俾阿媽用左.

收到 dr. poon 的回覆. 提了一些可以改進的地方. 對於自己有一個肯負責任的導師, 真的有點感動. 收到意見, 當然要改下份報告. 他說我還是有很多文法上的錯誤.

今天 aunt 2 回美國了. 中午發生了一些誤會, 引致很多人也浪費了很多時間在等待. 家姐和姐夫也來了一起午餐. 看了他們去歐洲的相片, 有些地方我也去過. 之後便去了 TM 找獎門人, 今天她去了幫大姐夫的公司整電腦, 幾勁. 今晚去藝術中心 agnes b. 電影院睇<嘉比愛>, 一如劇照, 衫靚, 屋靚, 道具靚, 但係我覺得勁悶, 獎門人就話 ok 好睇. 飯後便回家, 九點左右就返到屋企.

香港人支持廣東話, 廣東話維基!

迎日屋企都好大風. 原本夏天咁熱大風係好事, 可惜實在太大風, 這是有破壞性既強風, 將屋企既擺設也吹到地上. 逼於無奈, 我們唯有係屋企勁熱咁關緊窗口, 正是有風無所用. 因為太大風, 晚上也睡得不太好.

回校, 準備了一下 FYP 需要交既軟備份和示範短片. 那個製作短片的軟件 Captivate 很勁, 可惜我的 FYP 並不是製造應用程式, 有點浪費了這個程式的功能.

在 Sunny Chan 的電影與音樂札記看到一些 Portishead 在 NYC 的現場演出片段, 看著 Beth 唱歌和那班樂手的演出, 真的有點感動. 如果也能親身看一次這樣的現場便好了. Portishead 好像快要出新碟, 如果到時可以來香港演出便好了.

晚上玩起Google Calendar來, 功能不錯, 但對上網速度只有 56k 的我來說, 實在太慢了.

上午勁做 report, 加大了隔位, 終於有 49 頁, 不理了, 食飯前提交了給 dr. poon 過目. 飯後去了圖書館還書, 借了三本書, 一本是劉以鬯的<他有一把鋒利的小刀>, 一本<大小通吃在北京>, 和一本教 grammer 的書. 回家後, 不想再做 fyp 的事了. 一個下午, 寫了五篇影評, 效率絕對比寫 fyp report 快得多. 晚上 aunt 2 和 3 也在我們家住, 阿哥也回了來食飯, 勁多人.

今早七點多叮噹便醒了, 真神奇, 一向都是八點起身的. 做了一會 report. 午餐後便回校, 今天獎門人 demo. 獎門人準備十足呢, 做得幾好呀. 我也寫了一些 report, 現在有四十頁了.

cwk 個舊同學跳樓死左. 我都有睇個日既新聞, 不過我唔識佢, 睇完都唔知原來曾經做過同校同學. 報紙話係因為壓力大, 驚畢業變失業. 唉, 死左既, 就好似<香港製造>入面阿屏阿媽咁講, 永遠都咁年青. 但卻留下了痛苦給在生的人. 點都好, 安息吧.

上午在家無所事事. 下午回校做 report, 無進展. 寫到無野好寫, 都只係三十一頁, 點算? 晚上去看活地阿倫新戲<迷失決勝分>. 很普通呢, 舊年的<美蓮達與美蓮達>有趣得多.

今日睡了又睡. 十點接到獎門人電影還以為只是八點多. 中午回校, 做 report, 係咁寫, 好像要寫的也快寫完了, 但三十頁也沒有, 怎麼辦? 晚上放棄<亂步地獄>, 因為實在太倦了, 這電影的戲飛也是憑雜誌換的, 將來上再看有沒有機會看吧. 去了葵芬食野, 之後便回家了.

星期六. 今日和獎門人一家去澳門. 係船上面摺昨天印的那些富貴竹, 搭船都未摺完. 下午去了漁人碼頭, 呢個景點唯一可以同 disnay 鬥既, 就係鬥廢. 之後去了十月初五街食飯, 食了鴿鬆, 很特別, 用生菜包鴒肉, 幾好味.

星期五. 原本諗住今日可以慢慢咁係屋企執下野, 做下 report, 但係點知意外頻生. 先係要攪一 d 報紙檔既野, 再幫屋企人問旅行團既野. 最慘係 lab 部機又熄左, 真係慘到爆. 結果兩點幾就番左學校, 仲見到剛剛 demo 完既 william, 似乎反應甚好呢. 之後又係改下試下, 寫下 report 咁. 晚上和獎門人繼續電影節, 今晚又係兩部, <火車三段程>和<你, 我, 他她它>. <火車三段程>無中文字幕, 勁大濟. 睇番戲入面那些熟口熟面既火車, 真係重有 d 驚. 三段程最後一段講三個些路迪球迷去羅馬睇歐洲足協杯, 甚攪笑. <你, 我, 他她它>幾係無厘頭.

十點起身. 原本想去銀行, 幸好出發前醒起今日是假期. 中午食 M 記, 開心餐有 one piece 玩具, 但係異常低質素, 都係食普通餐. 下午寫 report, 愈來愈覺得自己無咩野好寫, 最盡都唔會過五千字. 經過計算, 証實了 L0 sketch 那份 paper 內的 log, 是以 2 為基數, 真是大濟, 又多樣野係解釋唔到. 數回書, 現在雜誌少了, 數回書也輕鬆了. 回想幾年前, 要兩條友做成個鐘先數完. 晚上都唔知做咩好. 林行止那本書也跳讀地算看完了, 明天便去一次圖書館還書和碟.

電影節今天開始.

一早便拿印花住灣仔換了兩張<亂步地獄>的戲票. 之後在金鳳食了一個午餐, 冷奶茶和煎雙蛋正. 在荃灣會合獎門人.

番屋企整曲奇, 今次做左好多奇怪形態, 連中文字都有. 勁.

晚上便是電影開場節目了. 看兩部電影, <黑社會 2>和<伊莎貝拉>. 見到勁多明星. <黑社會 2>有點不及第一隻 la, <伊莎貝拉>好睇, 影得澳門好靚. 睇完離場, 真人伊莎貝拉係身邊行過, 勁高. 之後搵左彭浩翔和金培達簽名, 勁 fans feel.

番到屋企都一點幾, 等多陣就夠鐘睇波. 米蘭雙雄勁廢, AC 最後都係靠好彩先入到四強.

如常咁早起身. 落街買報紙早餐. 專登係 ok 買野, 有五個加菲磁石, 但係當中四塊我係本身有. 非常特別, 這五塊磁石和家中舊有的是相斥的, 都唔知係屋企那些有問題, 定係呢五塊有問題. 自己攪掂午餐後回校.

都係寫 report 和行程式. 進度其慢. 用 visio 畫了一些公式, 感到自己很勁.

終於買了禮物給忻忻. 是買, 不是打. 聽講佢好鍾意, 重玩到成頭汗.

晚上再次自己搞掂. 屋企無人, 時間都好似過得慢 d.