星期三晚去了睇《Last Smile，First Tear》，第一次現場睇W創作社既作品。故事不錯呢，很喜歡梁祖堯的角色，扮開心去接近社會，對著所有人都在做戲，好似好誇張，但其實我諗現代人大部份都係咁樣。
最鍾意係那個圓形舞台，轉轉下咁樣好有趣，演員圍圈跑步和唱歌也很配合。其他演員都做得不錯，特別係梁祖堯阿媽，現場彈琴那位哥仔彈得好，但係好多時都係呆坐，感覺有點古怪。
2008年12月13日星期六
米蘭昆德拉 《笑忘書》
在生日那天，睇完了米蘭昆德拉的《笑忘書》，這本真的是一本不簡單既小說，利用數個故事，講了大量關於愛情、親情、政治、國家、文學和音樂既思想，當中既主題在於笑和忘記的界線。
關於忘記，最深刻是在那篇〈母親〉，原本只是一場純粹既3P，竟然因為母親既出現，引發到所有人為這場性愛加入大量自己既投射及自我幻想，這故事大量玩弄了自我幻想及選擇性記憶，高手法之外仍可以保留到故事既流暢性，極度強勁。
另外對於國家及地方的情懷，亦是本書的一個重點，布拉格的一點一滴，這地方發生過既事情，混合在故事角色的回憶中，亦是一個十分出色的以地方為主題的作品。
很利害的一本小說，充滿野心及嘗試，絕對值得一睇。
2008年12月8日星期一
四分一
話哂呢度都係我個blog，雖然勁耐無update，但係如果連生日都唔出番篇野，實在係太唔似樣了。
如果我有100歲命既話，我已經過左我人生既四分之一。有時我會諗，之後可以繼續行幾耐，到底可以行到幾遠，不過通通我都唔知，我只係知我想繼續行，行左先算，反正唔係咁易有得停。
成日都想開多瓣，但其實好清楚知道專業和興趣之間既分別，週身刀無張利真係玩唔長，手作仔開心下就好了。
我地已經一齊四年幾了，竟然已經可以去過咁多地方，食過咁多好野，愈去得唔同既地方多，愈發覺自己去過既地方少，重有好多野等緊我地呀。
一直以來，我都珍惜和家人及朋友一起的日子，希望自己可以製造多一些機會和大家見下面或參與多一些活動。話時話，可愛的facebook已經將我毀滅，如果你之前是我的朋友，你會發現我已經被"絕交"了！所有我之前造過既野，都已經消失哂，勁恐怖。
2008年11月19日星期三
鬱金香播種
之前種既蕃茄而家只係死剩兩棵，總算開過兩朵花。相信死因都係因為唔夠肥和陽光，同埋最初種得太貪心，一盆都係種一棵就好了。下次再種過，總有一次可以種到出蕃茄既。
火龍果種到得番三條，其他較幼既已經俾我殺死，三條分別都已經長出小刺，遲下要將佢地分開種，希望可以生長得強壯一點。
今年冬天希望可以種到鬱金香，個幾月前買左幾粒種球，雪左五星期後先種兩粒試下先，其他遲下再種。
2008年11月6日星期四
伸展操
下午三點半，當我在公司和全部同事一起跟著健身教練做伸展操的時候，內心傳來一陣連續的悲傷。
原來不單只我沒有改變世界，世界亦沒有改變到我，真相是我本來就是如此。
兩小時後的現在，我感到我的內心還在流血呢！
2008年11月3日星期一
John Ho - 蜂蜜綠茶
獎門人介紹我睇John Ho的繪本《蜂蜜綠茶》，今晚一口氣睇完，很喜歡呢，個種淡淡然既可惜，小小既點滴，化大影響了整個人生的路。
John Ho在書談到愛情、畫畫、母親和童年，可能大家都係港男，有很多地方都很有同感。之前講到個種淡淡然既可惜，其實來自事情既不完滿，亦是生活之現實。不是情聖，對著女孩也是只會發呆。等到勇氣十足，久保上身，一個過十個之後，對住龍門都係選擇單刀橫傳。
大家都係"拉仔"，我最鍾意John Ho寫佢阿媽俾佢十歲既時侯去學畫畫，然後阿媽臨終前好自豪自己有一個喜歡畫畫既兒子。
我諗伯母係天堂，會好開心你既書可以感動到世人。
﹝原來我地都鍾意食一蘭拉麵，但係我唔太喜歡聽Mogwai，不過陳奕迅和陳綺貞也是我的一杯茶﹞
雖然眼訓，但係都係忍唔住睇多左一次呢本書。
梧桐寨睇瀑布
盲俠四友昨日去左錦田梧桐寨睇瀑布，讀大學既時侯都同過lee hang等人行過，但當時中途放棄，今次就行左井底瀑、中瀑及主瀑，只係無去到因為山泥傾瀉而好難行既散髮瀑。
因為一開始行錯左路，行多左一大段斜路，我地去到萬德苑已經開始腳軟。
之後行大約廿分鐘山路就到達井底瀑，落井底瀑個條路比較難行，井底瀑好有神秘感，因為俾大樹包圍，感覺好清涼。離開井底瀑去中瀑，路程其實好短，但竟然有一隻死豬訓左係路上面，甚恐怖，我地來回兩次都搞左一輪先有勇氣越過隻豬。中瀑比井底瀑多水及高，氣勢強得多。
之後大約再行三十分幾難行既山路，就到達主瀑，呢度係全港最高既瀑布，有30幾米高，但係因為唔係好多水，所以感覺上無中瀑咁有氣勢。
我地原本計畫到達主瀑後便原路折返，但到達梧桐寨後才知主瀑附近重有一個散髮瀑，個度會有另一條路離開。但因為多年前的山泥傾瀉引致既阻塞，個條路好難行，加上當日有雨，路面都好濕滑，所以我地都係決定跟原定計畫離開。
晚上去了錦田鄉村俱樂部燒烤，環境及設施都唔錯，可惜太偏僻。
要睇相就去Facebook睇。
2008年10月25日星期六
身家大縮水
股災及通縮齊來，打工仔又要擔心隨時失業，廿年後睇番轉頭，應該會自豪自己曾經經歷過一段咁既日子，但係現在就比較難攪。
股市日日都創新低，我既身家已經大縮水，賬面上既損失係幾個月既人工，真係慘無人道。樂觀咁睇，現時個市處於超賣情況，隨時都有機會反彈，但亦有機會再趺﹝係咪好有財演既風格呢！﹞，入市除左需要金錢，亦需要大量既勇氣。星期四個日都忍唔住手定左即日盤入中移動和招商，但當日都唔到價，點知星期五即時趺到更低，星期四買唔到原來係好運，所以攪到星期五都無做任何行動。
股市大跌，更加覺得現金流既重要性。一般來說，我們最大份的現金流，便是我們的人工，所以係呢個時勢要更加努力工作，點都要增加自己係公司既重要性，保住份工，或者增加自己既能力，搵另一份更好既工作。以投資而言，股息便是現金流，幸好我持重倉既匯控及中移動現時股息都十分不錯，雖然賬面上係有重大損失，但實際上每季都有息收。經一事長一智，以後選股都更應該明白業務增長和穩定股息同樣重要。
另一樣要慶幸既，就係從未用過任何貸款去投資。用閒錢去投資，起碼唔駛急於斬倉，可以鬥長命。但都要選中既股票真係有回升既能力，並唔會跌到落無底深潭，我現時對我既所有持股都有信心。
講到公司，當然要提熱爆既中信泰富，雖然好可惜，但我諗大家都應該知道，佢輸幾多唔代表銀行贏幾多，銀行一定會係設計產品既時候，計好哂數，個市不論上落都只一係袋小部份，中信泰富事件既贏家好大機會其實係一整個外幣市場。老實講，如果銀行唔係計好哂數咁去推產品，下下都要贏到盡，第一間執既應該就係間銀行。
有人提議乘機回購東西隧，我覺得回購係好事，但要睇實個價，千萬不可俾機會政府好闊佬咁用市民既錢去救一間公司。另外就算唔回購，東西隧遲中有一日都係歸政府既，根本唔需要急。如果真係要買，就要用一個"趁你病"既極低價咁去買，否則為咩要急住買。
2008年10月22日星期三
圖書館CD收獲
始終都係覺得香港既圖書館係一個隱密地收藏左好多正音樂既地方，特別係佢以近乎係將所有音樂類別破壞性地以英文字母去排列，即係話只要你有心，求其選擇一個字母，係可以引出無限既可能性既。
今日放假，去圖書館還書，見有時間便睇下CD，係咁易就借左六隻碟。
Led Zeppelin《II》─此碟大部份既歌我之前已經聽過好多次，內有幾首十分重要既Led Zeppelin歌曲，例如〈Whole Lotta Love〉、〈Heartbreaker〉、〈The Lemon Song〉等，其中〈Whole Lotta Love〉既敲擊配上小提琴琴弓拉結他可以稱得上係超正。
Pink Flyod《Wish you were here》─只係聽過主題曲一首，甚期待。
包以正《Naked time》─本地jazz/blues結他手於1994年錄制的唱片，有Ted Lo合力監製，同樣期待。
另有三隻jazz雜碟，《Jazz up the Beatles》、《Jazz & the sunday times》和《Jazz for a day at the beach》，已經聽左第一隻碟，幾有趣，最種意Ella Fitzgerald玩〈Hey Jude〉，佢亦係我另一一位另隻碟識既人。
2008年10月21日星期二
經濟唔好，不如睇多幾套話劇和音樂會幫助下經濟
經濟低迷，但係2009年既香港藝術節就完全無減價既意圖。今年我和獎門人預訂了一場音樂會和兩場話劇。
小野麗莎Bossa Nova經典50年─好期待小野麗莎既現場演繹，只希望唔會因為場地既問題而減少那種輕快既感覺。
聖荷西謀殺案─劉雅麗加彭秀慧，值得期待既戲碼，亦係難得一見既懸疑劇。
黑天鵝─此故事看來是關於未來城市人與人之間的疏離感，配以娛樂圈作故事背景，看似有趣，將會係第二次睇張繼聰既演出。
另外今日我們亦買了飛睇W創作社既新劇《Last Smile, First Tear》，之前錯過左《白雪公主灰先生》，今次不容有失。
2008年10月20日星期一
2008年10月14日星期二
連南義工之旅─後記
這麼快便完結了連南四天義工之旅，整體上感覺良好，但個別睇就好有"唔夠多"既感覺，對當地學生及獨居老人既幫助都唔夠，畢竟車程遠，四日內其實有兩日是在車上的，實際和當地人接觸的時間並不多。
講番上堂，情況絕對慘烈，學生基本上明白甚麼是數獨，但要他們在這麼短的時間內去完全一個數獨便很有難度了，希望佢地將來還會繼續玩這個遊戲吧。攤位方面，出發前在香港準備的材料完全用唔著，全靠獎門人的幫助，才能在一晚內在十本書中找出題目讓學生玩。以下便是攤位遊戲結束後的場地。
在第三日的早上我們跟隨一些學生去了山區上的老人屋企探訪，狀況其實是不太差的，反而山上的大自然風貌實在是令我們響往。
2008年10月8日星期三
連南義工之旅─準備篇
明天一連四日便會和獎門人及steve和其他義工一起往連南做義工，去到當地既主要工作是以較輕鬆既形式對當地既初中生進行教學，當中包括一些課堂及攤位遊戲。我們三人負責的課堂是數學科，到時會教兩班中二生玩數獨，我和獎門人已準備了超大量數獨題目和教材。攤位方面，我會和另一位義工負責經典名著和當代文學，在獎門人的建議下，我準備了十五條關於《三國演義》的題目，學生到時需要以速讀去從書中搵答案。
以下就係個十五條問題，有幾題真係唔睇書係點都無可能知道答案既，哈哈。
- 劉備、關羽和張飛誰人在桃園結義前是做賣酒殺豬的？﹝桃園豪傑三結義﹞
- 何進是爲了殺死誰人而向各鎮發信，要求調兵入京？﹝得密詔董卓進京﹞
- 董卓要立誰爲皇帝？﹝得密詔董卓進京﹞
- 呂布投靠董卓前殺死了誰人？﹝得密詔董卓進京﹞
- 誰人把七星寶刀借予曹操去剌殺董卓？﹝群臣設計殺董卓﹞
- 誰人想出以貂蟬作美人計去離間董卓和呂布？﹝群臣設計殺董卓﹞
- 曹操在殺了誰人一家之後說”寧教我負天下，莫教天下人負我”？ ﹝群臣設計殺董卓﹞
- 呂布轅門射戟是爲了令劉備和甚麽人和解？﹝呂布命喪白門樓﹞
- 徐庶向劉備推薦了何人？﹝徐庶薦賢﹞
- 諸葛亮是臥龍，那麽誰是鳳雛？﹝徐庶薦賢﹞
- 誰人在赤壁之戰使用苦肉計？﹝草船借箭﹞
- 曹操在赤壁戰敗後，在華容道遇見了誰人？﹝赤壁大戰敗曹兵﹞
- 誰人爲關羽刮骨療傷？﹝關雲長敗走麥城﹞
- 誰人向曹操建議把戰船運在一起？﹝赤壁大戰敗曹兵﹞
- 誰人滅魏國和吳國，一統天下並建立晉朝？﹝司馬氏一統天下﹞
另外今次既其中一個目的係增加該學校圖書館既藏書，所以我地個個人都要帶幾本書去當地。﹝那些書是其中一位義工買的，我地只是負責帶，及利用那些書去設計課堂和遊戲。﹞
2008年10月5日星期日
近期股市操作 - 無操作
近呢幾個星期簡直係全球金額界既一個永世難忘既經歷，美國五大投資銀行相繼"消失"，股市小上大落，大部份人都損失慘重。美國專登做場戲去反對個救市方案，引多左幾個國家出手救市，但係個方案已經同最初那個面目全非，重有無功效無人知，不過現在最大問題始終都係市場信心盡失，講緊既係唔單止對金融產品無信心，更係對交易對手和交易平台無信心，呢樣野好難救。
講到我既操作，實際上係無任何操作，一味睇住趺，甚至有時連趺到幾錢都唔多記得，呢一個月唯一同股市有關既就係收左兩次股息。
咁算唔算係已經做到心中無股手中有股既最高境界？
傳承 - 由二十去二十一
我第一次聽〈20th Century Boy〉呢首歌，是來自一部講Glam Rock年代既電影《紫醉金迷》(Velvet Goldmine)，當時聽既係Placebo番玩T-Rex呢首經典rock歌既版本，以下呢個直頭就係電影中抽出來既片段，Placebo更加係真人演出，更可以見到初出道既Jonathan Rhys Meyers和未係十分紅既Ewan Mcgregor。
後尾當然係搵左原版來聽，其實差唔多，最大分別可能只係係Placebo主音把聲姣d。
之後再接觸另首歌便是在漫畫《二十世紀少年》既第一期了，事隔多年，《二十世紀少年》變左做《二十一世紀少年》咁去結局，更加拍成三集電影版，可謂功德完滿。
想講既係當中既傳承，如果唔係一套九十年代既電影，我係唔會認識呢一班七十年代Glam Rock友及令我極度著迷既迷幻音樂。就算我當時無去到戲院睇呢部戲，我都可以係漫畫認識呢首歌，都有機會去追溯番呢個年代。就算我連漫畫都無睇，都可以係《二十世紀少年》電影版入面認識呢首歌，可以咁講，《二十世紀少年》將呢首歌﹝又或者係那個迷幻年代﹞帶左去二十一世紀。
《二十世紀少年》漫畫入面其實造左好多野去記錄主角們少年時既文化，係好有心咁去做一個文化傳承既記錄，萬丈目係死前所講既一番自白，其實係所有潮流追求者既哀歌，絕對值得細味。
故事內容既詳細討論會遲下在Darth Mike Movie Record講，不過現在有三部戲都未寫，有排等。
影響力 - the verve - Forth
如果話verve影響左我既人生，又好似誇張左d，但係如果話影響左我既步行方式，就絕對無錯。我份人比較膚淺，我最鍾意verve既歌係佢地最hit既〈Bittersweet Symphony〉和〈Drugs Don't Work〉，而〈Bittersweet Symphony〉既招牌MV，Richard Ashcroft既垃圾頭同埋完全係無視於街上所有人既行走方式，絕對係永恆咁寫入左我既記憶。
我亦都有一段時間完全沉迷於〈Drugs Don't Work〉，真係感動到震，適合所有傷心緊或想營造一個傷心效果既人。
唔係話verve既其他歌唔好聽，而係我只識呢兩首，其他係《Storm in Heaven》、《Northern Soul》和《Urban Hymns》既歌就讓我永遠留有一個美好既期望吧。
在《Urban Hymns》的超成功後，verve便散band了，成員作了個別發展，我也擁有一張Richard Ashcroft獨立後既第一張唱片《Alone with Everybody》，並且被感動了﹝應該當年是和Travis一起被感動的，那個怪可憐既Brit Pop時期﹞。以下係樂迷以verve年代既片段自製既Richard Ashcroft獨立作〈I got my beat〉MV。
樂壇永遠都係咁神奇，一隊散左十年既band竟然可以重組，重可以出番一隻玩初出道風格既唱片。係今次既《Forth》，我絕對相信Richard Ashcroft和結他手Nick McCabe做左好多妥協，因為風格並不像他們最hit既《Urban Hymns》中以歌詞主導，反而像早期唱片般加入左好多結他既特別演奏，我諗今次Nick McCabe唔會再覺得自己似一個普通樂手吧。
而這隻《Forth》，終於成為我既第一張the verve既唱片了。
2008年9月22日星期一
Metallica - Death Magnetic
現在正在聽緊Metallica既最新大碟《Death Magnetic》，聽人講話佢地返左去佢地舉世聞名既黑碟前既風格，如果係真既話就真係全世界既金屬迷既喜訊。
目前為止聽左四首，全部都有有番咁上下長，起碼七分鐘一首，玩既係正牌抽鞭式金屬(Thrash Metal)，那些超快密集式既樂器真係好似抽鞭一樣，Kirk Hammett既結他和Lars Ulrich既鼓真係超勁，好似機關槍一樣，據說James Hetfield有嚴重既酗酒問題，但聽落把聲好似同以前無咩分別，可能其實一向都有呢個問題。
係Metallica出前一隻碟既時侯，我認為呢隊樂隊已經可以當佢地死左，但估唔到佢地可以咁樣行番轉頭，真係好野，如果可以睇佢地既live就好了。
我要高飛、獨男、爆粗BAND友
近排睇左好多漫畫，重新咁睇過哂全套《我要高飛》，古谷實既近作《獨男》和近年日本熱作《爆粗BAND友》。
《我要高飛》實在係日式運動漫畫既再一次成功示範，將體操呢一樣係漫畫題材中少見既運動，結合埋勵志、搞笑、友情等元素，難得是動作不算太跨張及主角唔係咁無敵，從而提高左可讀性。
古谷實既《獨男》應該係佢到現時為止，探索人性既作品入面，最完整及最受控制既一部。古谷實唔再畫《稻中》一類題材當然係人間一大可惜，但我覺得佢可以係成名後還不斷以唔同題材既故事，去實驗或展示人及社會既黑暗面和當中少見既希望，呢一下我覺得值得敬佩。結局個下平淡中見珍惜，可以講係將感情收得好埋既激動。
《爆粗BAND友》絕係係喜出望外，估唔到可以係有意義得咁緊要。全個故事也充滿反嘲既味道，對各式各樣既野不斷進行反嘲，潮人既弱智自我形象，金屬樂隊既現場表演以另一角度去睇其實好幼稚，好多內容都值得再三回味。
2008年9月17日星期三
2008年8月22日星期五
雜記
隨著奧運既開始，大家也展現出從未有過咁高既愛國心，不論係咩運動，只要有中國隊既，大家都會支持。令人驚喜既係，從電視見到現場有大量觀眾除了支持中國隊外，亦十分支持香港及台灣既選手，另一下真係見到人民既進步。
呢排睇左咁多體育項目，發現原來我睇過好多唔類型既運動漫畫，本身想整一個表紀錄低，但實在有點無聊，加上覺得會有好多唔記得，所以放棄左。
奧運會入面既運動員全部都好專業，但其實評述員都可以去到好專業，唔好計個別只講單項運動既教練及前運動員，如雷sir、方力申和李麗珊等，佢地當然對個別項目十分專業。想特別一提既係萬能型評述員，佢地好似咩類形運動都可以講到有紋有路，遇上前面所講既專業評述員時，更可以提出一些有啟發性既問題，兩台都有代表人物，分別係鍾伯光和徐嘉諾，網上更有"萬能鍾伯光vs百搭徐嘉諾"既討論。
講起評述員，實在唔可以提下今次明珠台既幾位廣東話評述員，佢地幾條友似搞笑多過講體育，唔係話佢地評述得唔好，而係佢地係評述既過程加插左大量既爆肚，更加有唔少人特登為左睇佢地而睇明珠台。
星期日原本諗住去行山，但實在太熱，轉變計劃去睇戲，睇《天水圍的日與夜》，實在唔錯，平實既一部戲。
火龍果已經有十支芽仔，但好似唔識大，好軟弱咁。昨晚幫其中一棵蕃茄換左一個大盆。
今日打風，九號風球，昨日好似大家都已經確定今日實打風咁樣，都幾有趣。
2008年8月12日星期二
火龍果播種及發芽
之前上網聽人講話火龍果好易發芽，所以果日食完個紅肉火龍果之後，專登食剩小小，洗淨種子後再哂左一日，點知真係咁鬼勁，播左種4日已經有幾粒種子發左芽。
不過要期望生火龍果似乎係無咩可能，因為好似要種幾年同埋要長到好似一棵樹咁大先有果實，所以今次都係當種草咁玩下。
2008年8月7日星期四
颱風後的蕃茄
好耐無影過我既蕃茄了，趁住昨日打風，即刻幫佢地影靚仔相。佢地放係室內，當然無怕打風。
除著佢地愈來愈高，就愈來愈容易偏埋一邊，所以七月尾係花墟買左幾技鐵去輔助下佢地。點知裝左都唔夠廿日，那些鐵枝已經唔多夠高了！可能因為分左盆有足夠營養吧。
不過其實我都有點坦心現在有徒長既問題，所以而家都諗緊係咪需要摘頂心及落基肥，去令到佢地可以長葉同埋更粗壯，不過我實在唔多識肥料既運用，有無人可以指教下呀？
另外竟然無端端有條新芽爆左出來，超神奇，又會慢咁多都有。
2008年8月6日星期三
匯控2008上半年業績
匯控在剛過去的星期一公怖了業績，詳細既分析可以睇報紙及其他專業得多既blog，但我覺得呢次又係一次良好既做數示範同埋期待管理既例子，好早就揚哂會有盈利倒退，所以連盈警都唔需要發，加上有效咁將特殊收益於唔同時期入賬，令到個成績可以係大家可接受既預期內做到保留盈利給將來可能出現既更壞機會。
值得一提既係，今次業積係幾個指標性數據上都做得唔錯，例如成本收益比、核心資本和賬面值，都有所進步。
另外更剛巧在同日亦公佈了匯豐銀行重奪香港樓按市場一哥，實在值得高興。
但要注意，根據最新既盈利數字，匯控既市盈率已經高過十了，但當中要視乎你點睇那些撥備，如果唔計撥備，上半年盈利比2007年上半年是有增長的，而其實上半年的撥備已經比2007年下半年少。
雖然我認為匯控管理層唔會咁做，但如果下半年情況真係會有好轉，然後那些次按撥備可以回撥，加上賣總部及法國業務的非經常性收入，個下增長都幾得人驚。不過我覺得匯控會將那些回撥留番比當那些新興市場增長放慢既時侯才慢慢用，去支持一條靚仔既數。
紫蘿蘭山至大潭篤水塘
上星期日一行四人去左行山，四人包括獎門人，阿風，阿爺和我，由黃泥涌水塘行去大潭篤水塘，中途越過紫蘿蘭山。
炎炎夏日，幾乎所有人都認為我地呢個行山行動係自取滅亡，但幸好我們亦能安全完成。因為當日雖然勁好太陽，但常有涼風吹過，只要多飲水便無咩問題，不幸既係，我地四個都係行左未夠7成路程已經無哂水。
呢條路最辛苦係開頭一段，由黃泥涌水塘行上去紫蘿蘭山山頂，上下落差都有成二百幾米，行左大約40分鐘終於去到高433米既紫蘿蘭山山頂，風景幾靚，望到維港兩岸及幾個離島，在此我地停留了一段時間，因為環境實在唔錯。
行左一段幾恐怖既落山樓梯之後，便與衛奕信徑第二段合併而行，中途沿著山崖行，見到幾個水塘及淺水灣，感覺甚為舒暢。
行多大約個多小時便去到大潭中水塘，要圍著水塘行至大潭水塘道才有水泥路行，此段幾唔好行，路面超多碎石，行到腳板都幾痛，行左超過半小時。
到達大潭水塘道後便可沿大路在大潭篤水塘邊行，行到去大潭道便有車去柴灣，全程完畢，行在大約三個半鐘，四人都在缺水狀態，係水塘邊缺水都幾無奈。
想睇相既話可以去我地既facebook睇。
離開既時侯，同阿爺一路行一路講，又再一次挑起挑戰毅行者既決心。但現時實在言之尚早，我們還是分段行哂全條麥理浩徑才再講吧。
2008年7月28日星期一
鐵拳浪子
看著你，我真的頭也抬不起來。
七月十三日，我和獎門人在銅鑼灣既江帆買了一大一小的拼圖，小的那個是漫畫《鐵拳浪子》內，矢吹丈和世界拳皇荷西比賽結束後，坐在台上的椅子全版變成灰調的那一幕，亦即是漫畫迷必定知道的矢吹丈將自己燃燒至化灰既超級經典畫面。
呢個網將劇情介紹得幾好，有心人可以去補習一下。
我唔係屬於《鐵拳浪子》呢一代既，應該足足差左十幾廿年，但係自細都知道有呢一部燃燒至極限既漫畫。同矢吹丈最近距離既一次，發生於《去吧，稻中兵團》入面既井澤身上，係故事入面井澤係矢吹丈既死忠支持者，甚至有一個矢吹丈髮型，簡直係型到爆。
真正睇《鐵拳浪子》係後期睇重出既版本，每一隻每一場比賽我都期待燃燒至灰燼，可見我之膚淺。
矢吹丈絕對係一個悲劇人物，少年時期坐監，去到邊都好似天地不容咁，直至遇上拳擊才找回人生的一些意義。但矢吹丈卻有一個永遠也擊不倒既對手，力石徹。力石徹是日本拳皇，所受到的持遇和尊重，和矢吹丈是天壤之別。
力石徹知道矢吹丈的利害，亦想在台上正式打倒矢吹丈，但礙於兩人屬於不同重量組別，力石徹需要減磅才能迎擊矢吹丈。兩人的對戰是本漫畫的高潮，力石徹真的將主角矢吹丈擊倒，但戰後力盡而死，矢吹丈永遠都唔可以係台上報唔到呢一戰之仇。
力石徹死後，矢吹丈完全無哂生存意義，及後以近乎尋死既作戰方法，先後挑戰無冕皇帝卡路斯和世界拳皇荷西，最後含笑死在台上。
矢吹丈並不幸運，亦不幸福，但他找到人生目標，並以人生既全部去追求，最後將生命燃燒至灰燼。
2008 書展
上星期四和獎門人去了一年一度的書展，收穫豐富。我喜歡睇書，亦意圖及企圖去追求文化。但到底書展係咪真係一個宣傳文化既問題，我無意見，對於我而言，書展提供一個可以最高八折最低無底線既機會俾我去買書。又可以咁睇，呢一個就係香港既文化，一大班人，咩年齡都有，愛書既有，買書唔睇書既有，睇書唔買書既有，搵偶像作家簽名既有，睇明星既有。
有人話一大班人，平時唔多覺真係咁鍾意睇書，特別係另幾日，為左去趁熱鬧而去迫聲死，好傻。但你睇西班牙掟蕃茄節，咪又係咁傻。我覺得任何一種主要由大眾市民造成既習俗，都有該地方既文化色彩，都能夠代表該地方既人和事。
2008年7月23日星期三
2008年7月19日星期六
買入一手匯豐
早一兩個星期，油價日日升，股市日日趺，好多股票都進入左吸引既價錢。
曾經考慮過趺到一零幾既中移動，但諗到以中移動既大約25%年增長率，及在3G和重組既陰影下，條安全線﹝profit margin﹞set深d比較安全，所以都係繼續我對中移動既估值，就係只考慮PE二十倍以下既中移動。
市況平淡，更覺股息既有趣，唔經唔覺呢一兩個月都好多股息收入，宏利、匯豐、中人壽既股息都相繼到手。
最後終於忍唔住係七月十五號買左一手匯豐，買入價$113.8，買完之後係咁趺，即日最低已經試過$112個幾，不過無咩所謂，匯豐現價真係抵。係呢次信貸危機，大家都睇得出匯豐處理問題既能力同埋環球部置既優勢。以匯豐現時既資本力，好大機會可以趁機買左不少處於賤價既優質資產。加上大約6%既股息率，絕對是趺左都可以繼續安心持有。好坦白講，如果匯豐趺多幾蚊，我好大機會會再入。
可能因為伊朗問題有轉機﹝國務院第三號人物去左同伊朗接觸，起碼叫做有得傾，伊朗和以色列開戰機會立即減少﹞，油價星期四開始係咁趺，股市變左係咁升。以星期五市價計，匯豐$120，如果係做短炒既，已經有二千四執，不過我當然唔會咁快放，匯豐個價而家重係偏低呀，得唔夠十倍市盈率，如果去番十五倍都咪話唔發達﹝以匯豐既增長率，係正常市況絕對配得起呢個市盈率﹞。
玩具大閱兵
七月五號下午，和獎門人去了排隊睇Michael Lau新figure，場面超勁多人，係工廠大廈天台排左個幾鐘，入到去再排個幾鐘，終於買左兩隻Jordon公仔，體力和金錢都大減。
即刻要同另一隻Michael Lau朋友Fat West打聲招呼先。
七月十號放左一日補假，係屋企執公仔，執完整齊哂，難得咁整齊，當然要影相留念。
訂閱：
文章 (Atom)
