大前研一 - Off學. 會玩, 才會成功

 這是我看第六本由大前研一所寫的書，這本書有一些在他其他以工作為主題的書所沒有的生活點子，甚有意思，現記下重點以作日後參考。

• 要有計劃地安排休閒生活，否則很容易不知不覺便渡過了假期，重新工作後亦完全沒有充電後的感覺
  
• 將時間和金錢用於自己真正有興趣的地方，不要追潮流做一些其實興趣不大的事，浪費金錢和時間
• 在小孩的教育，最需要的是時間，不是金錢，培養小孩的生存能力，而不是短期的考試分數
• 對於真正有興趣的東西，應全情投入，並以親身參與為終極目標
• 結識工作以外，有共同興趣的終身朋友
• 找尋自己的標準日用品，省卻日後選擇的煩惱和時間
• 在選擇休閒的地方，應前住一些沒有壓力(不要太多人)和有開放感的地方，以取得最大的休息效果，否則事後可能會更累。
• 定期前住同一個休閒地點，建立熟悉的感覺和讓小孩見証大自然的變化
• 擊退憂鬱的星期一的方法
• 從週五晚上開始休閒活動，但需注要不可過度，否則影響了週末的體力。
• 在星期六進行體力形的活動，在星期日讓身心充份休息
• 在星期日的晚餐後，開始計劃未來工作的安排，但不要做實際的工作
• 重視自己的個人思考時間和將此變成一個定期的習慣，確實地思考一些長遠的問題
• 在週中選一晚進行家庭的定期檢查，和太太討論家庭內外的問題。最好在外用餐，減少事前煮食及事後清潔的壓力。不要把問題拖至週未，影響休息的心情。
• 預早安排平日晚上的活動，以免經常漫無目的地加班，及可放更多時間在興趣上
• 父親在家庭應盡量扮演司儀的角色，讓太太和小孩多談他們的事情
• 父親需確保自己在家中的活動空間(書房)，有三大優點
• 擁有自己的空間，可放鬆心情
• 安心學習，增加工作能力
• 讓小孩看到自己學習的樣子
• 第三點最為重要，可讓小孩知道父親的努力，從而珍惜自己所擁有的東西及明白終身學習的需要
• 不要讓小孩成為家庭的中心，事事以他們的意願而行，否則容易養成大爺般的性格
• 不要邊看電視邊食飯，破壞難得家人共聚的機會
• 享受夫妻間有個別的活動，從而增加對白的內容
• 給予太太自由和權限，讓她做想做的事，大家都會更快樂
• 確實訂立好時間的分配，和家人一起，和太太兩個人，單獨一人的時間，否則很容易失去平衡
• 在小孩一起的休閒活動，注意以下三點，不要勉強地陪小孩
• 在充滿自然的環境，而不是過份安全的地方
• 讓小孩自由的玩，而不要過份監視及緊張
• 和小孩一起玩，而不是高高在上的監視
• 讓小孩和不同年紀不同國籍的人玩，早日認知世界的真面目
• 多和小孩並肩散步，了解小孤的心事
• 不要教導小孩，應該協助他們學習
• 讓小孩統籌家庭活動
• 早日對小孩進行金錢教育

農夫夢

 大約由幾年前開始，我便一直有一個夢想，希望可以在內地的未開發山區，興建一個有機農莊，以最不影響大自然的方法，以科學的方法去營運，種植有機農作物。

對本地人是一件很好的事，首先，這個農莊是不可以破壞當地生態環境的，居民的健康不會受到影響。另外，亦為當地人提供就業機會，年青人可以不用出外打工，老年人亦可以發揮他們的耕種經驗。

如果呢件事真係做得好的事，商機一定不錯，內地的富有一族及香港人都願意付出比較貴的價錢，去買一些健康又好味的食物。

原來有兩位香港人在江西做了很接近的東西幾年，亦已經做得很好。今期飲食男女介紹了這間Providence Family Farm，由一位香港退休醫生及一位環境科學家所創辨，在江西一個人民窮連連農藥也買不起的地方，建立起一個有四個維園那麼大的農場。

農場以全有機的方式種植及飼養，亦善用植物之間亙補共生關係，將對大自然的破壞減至最低，並且可以重現食物的真味。另一方面，佢地亦為當地製造了很多工作機會，年青人可以在家鄉工作，令當地的村莊保持生氣。

值得尊敬。

猿人祥和雪印強

曾幾何事，在裏原宿還是一個要以朝聖心態前往的日子，香港水貨兵團大舉進攻當地，混入本地人的排隊黨，掃入大批限量新出貨品，運返香港以數倍價錢出售，明星潮人個個支持，走水貨的潮店店主成為潮流教父，報章更有以他們的日常生活為題材的連載。

時移世易，當bape都成為港資的時侯，香港人已經不再狂掃日牌，日牌的目標客戶，亦正如一眾世界級名牌一樣，北望神洲。

但水貨客是不死的。

有幸在落馬洲皇巴士候車站觀察了一個多小時，內心難免覺得，同胞們，你們是要把整個香港買走嗎?

一團團的運貨部隊，在皇巴站前分貨，labtop、奶粉、藥、清潔用品，咩都有。再約定在內地的某地集合，絕對不是小生意。

想當年報紙有食日本煙既猿人祥故事，話唔埋遲下，大陸報紙會有雪印強既故事。

不夠專業

不知不覺，已經工作了快五年，五年也在同一條team，負責的systems也是那幾個，當然工作性質已經變了很多。落手寫program的機會已經十分少，programming的工作大部份由國內同事負責，我變為一個把關人的角色，除此之外，大部份時間用了在面對business及和其他IT teams打交道。

簡單咁講，以skill set咁睇，呢幾年係technical方面我係無咩新野學到既，soft skills和project management就學了不少。仲讀緊書個陣，我會覺得自己係半個geek，但係而家，就已經完全唔係了(at least表面上)。

其實一直也覺得有點欠缺安全感，對很多新既技術都只係停係知道個名既程度。當然，我相信要用既話，好快就可以搵到好多有用既資料，同埋應該唔難上手，但係始終好多野未試過都係唔知詳情。

近期負責了一個新工作，就是要諗如果要整個更新現在的application，任吹，有咩新野可以用，同埋可以有咩幫助，即時企哂係度。

當然最重要是在user experience方面有咩可以改善，另外是底層那套framework。UI方面，自從那個"偉大"的web 2.0開始，我便脫節了，我單純成為一個用家，快樂地使用iGoogle和facebook等，我只要可以估佢地用緊咩，如果問我詳情，又係企係度。提到現在大熱的mobile environment，除了自己曾經非常突破性地寫了一個hello world的android app外，基本上係完全唔識。Framework方面，只係睇Java個條路，除了已經被人忘記的EJB之外，Struct2、Spring和JSF也是不懂的。

有見及此，體內既geek性開始重現，花了一些時間，畫一幅圖，列底左今時今日作為一個server side既專業IT人，應該要識咩野，睇下自己有咩唔識，再從中搵幾樣最需要盡快掌握既野，我唔打算係度講，在心中便可以了。

以此為記。

地震

上星期還在重看村上春樹的《天國子民在舞蹈》，此書寫於九十年代神户大地震之後，想不到現在又發生了另一次更大威力的地震，影響整個日本東部及太平洋。

重災區仙台，三個月前我還在這地方渡過我們的honey moon，仙台車站附近的環境還瀝瀝在目。加上看了那麼多伊坂幸太郎的小說(幾乎全部他的小說都是以仙台作背景)，雖然只係去過一次，但我對這地方很有親切感。

看著電視及網上的現場片段，我深深地感到一種失語的感覺，一時間實在唔知講咩好。無力感，真正既無力感。

一直以來，我都話自己反日情緒高漲，但實際上，日本係我去得最多次既海外國家，日常生活亦祟尚日貨。

無論如何，希望一切安好。

週未早上七點，由兒時夢想講起

好老實咁講，其實我年少既時侯，記者係其中一份我夢想既職業，走新聞，做專題，發掘真相，平反社會不平。後來，這個夢想正如一系列其他既夢想，不了了之。（更老實咁講，其實在我快要三張既這個時侯，我還是有些時侯會幻想自己成一位記者，或者一位傳媒人。）

做不成記者，諗落也不是一件壞事，韓寒講得無錯，記者之上還有編輯，編輯之上還有主編，主編之上還有老板，穿過咁多層人物，幾真既真相都會走樣（話時話，如果你未識韓寒，請睇佢係今年書展既對答，好有sound bite同埋知道底線既一個人，呢期佢最HIT。）。

再安慰一下自己，我都好鍾意叮噹呢一套漫畫，但係未去到一個會記得對白既程度。點解講起呢樣野？因為近日有單倫常新聞，有關人物懷疑係殺人後講左一番說話，唔知邊位記者大哥咁堅，竟然記得大雄都曾經講過類似既說話，連出自邊一集同埋叮噹用左咩道具去幫大雄都寫埋出來，從而竟然得出一個睇叮噹睇到殺人既暗示。大佬，搵兩餐，如果唔係超級fans，又點會連對白都記得，但呢位超級fans，為左出位既話題，竟然要出賣自己既偶像，都咪話唔慘。

又再老實咁講，我真係好尊敬兩種記者，一種係好認真咁做調查，然後清楚地寫出一個專題個種，我最愛既信報有唔少呢類文章，睇完真係學到野。第二類，就係個種諗得出那些爆衰格標題既娛記，近期最正既例子有壹週既“絕慾備戰 怕刮花 Jessica C禁男友㩒警鐘”，怕刮花呢一句真係拍案叫絕。再近期既例子係FACE既“內地劇大王私有化 百果園DaDa終極一露”，用私有化呢個原本只屬於商果既專有名訶又係另一絕，比“包”呢個字型好多，亦睇得出時下年青人既金融知識。

廿六

就係咁樣，廿六了。

有人話人生其中兩個最重要既決定，就係結婚同埋買樓，兩個決定我都係舊年做左，未來一年就係實行年。

昨日就係我既生日，呢一刻我心情異常地平靜﹝可能因為飯氣攻心﹞。回想昨日，獎門人安排了一系列的節目，最估唔到既係，獎門人竟然同我去左睇東亞運動會足球賽，香港對中國！

身處一眾狂熱球迷之中，被區旗和粗口所包圍，我們的手緊緊地拖著，過了一個幾千人陪我的生日，過了一個最滿足的生日，因為有一個了解我的人陪著我。

天公造美

我終於明白咩叫做天公造美。

倒帶番去九月十四日，考車日，中午三號風球，黃昏開始八號風球，全日狂風大雨。考車的時侯只是三號風球，下著綿綿細雨，事後細想，落雨考車確實有唔少好處，起碼工廠區一帶街上無哂工人，肥佬既原因完全係因為自己心急，小路出大路連環出錯，同打風落雨無關。

由九月十四日的晚上掛上八號風球，一連三天直至九月十六日都係落雨，我們約好了九月十八日拍攝婚紗相，天文台預測當日天晴，我們相信天文台，所以無要求改期。直至九月十七日中午，天色終於轉晴，在九月十八日當天，天氣好到不得了，萬里無雲，個天靚到好似假既一樣，水壩既水因為早幾日既雨水大增，氣勢超強，全日拍攝都十分順利。

九月廿一日至廿五日，台北之旅，出發前睇天氣預測，台灣北部連續五天都係陰天和落雨。但係講到唔信，我們只是在礁溪鄉那一個下午遇上雨天，浸溫泉落雨影響無咩所謂，仲無咁熱，就好似落雪浸溫泉咁樣，另外四天也是好天到唔信。

九月三十日，相約多時既海洋公園哈囉喂之行，遇上黃色暴雨警告，基本上我同獎門人係獎門人灣仔公司行去電車站途中已經濕哂，橫風橫雨，有雨傘都無用。去到金鐘都係咁大雨，海洋公園工作人員不斷同人講可以轉日子，但我地諗住落雨比較少人，無咁多人排隊，所以照去。奇績再次出現，一出香港仔隧道，完全好天，全晚一適雨都無落過。但係海洋公園都係咁多人，但幸好我地都可以係十二點前幾分鐘玩哂所有鬼屋。

十月一日，之前一晚落雨落到狗屎咁樣，但係我地呢日朝早又有一個相約多時之行山活動，由東涌去大澳，前一晚都諗住去唔成既多，點知一早好天到爆，九點正準時由東涌出發，天氣清涼，順利於下午一時半到達大澳食午餐。

希望個天下年我地結婚個日都係咁識做啦。

第一次

好像有一本書，叫做甚麼“對上一次的第一次“，確實的書名忘記了，網上也找不到，內容是講當我們有得咁上下年紀，“第一次“的機會便愈來愈少了。幸運地，我近期遇上了很多第一次。（當然，這亦代表我正親手搶奪了將來的我既第一次。）

第一次是美好而多變的，好像第一次的自由行，即是JJ及kalee那次，到目前為止，還是我們最經常回味的經歷。

近排發生的第一次，包括了第一次的開車，第一次擁有自己的數碼單鏡反光機，第一次影相可以換鏡頭，第一次為了production的死而深感自責。

當然，為了我們的婚禮，我們擁有了很多第一次，第一次好像睇樓咁樣睇酒店，第一次搵婚紗相攝影，第一次上專業攝影師的工作室，第一次上金都，第一次返大陸睇婚禮用品。

第一次陸續有來呢。

強制自我紀錄症

根據在大學時曾經修讀過兩科心理學的我，可以斷言，我已經患上了“強制自我紀錄症“。病徵是無時無刻都想記下自己擁有既野和做過既野，病徵相信是源自擁有太多和對記憶力失去信心。

以我為例，實不相暪，我記下了以下的事項：

• 看過的電影
• 自己的資產及現金流
• 植物的生長情況
• 相機和鏡頭的數目和型號
• 學車的時間、地點和內容
• 婚禮的進度和計劃
• 電腦的硬件
• 以往旅行的路線
  

除此之外，好想去記下既有：

• 所有看過的小說
• 所有看過的漫畫
• 電腦內使用了甚麼軟件
  

再進一步，可能我會想記下所有見過既人，所有講過既野，所有去過的地方，情況好像有點失控了。

除了部份資料可能有用外，有些真是不知道記來做甚麼，是因為內心少了一些安全感嗎？

謝師宴

近期在晚上的西鐵上，經常會看見一些穿著得異常隆重既女孩，想必是剛剛去完謝師宴吧。

看見那些女孩（還有那些男生），便覺得很壯觀，一大群十幾歲既靚妹，襯上一個明顯地是過火的化妝，穿著一件不太配合西鐵環境的吊帶晚裝，身旁那一群男生一係著左老豆既西裝，一係打扮得像陳浩南（再一次證明，在極端的左和右只是差一小步）。

雖然幾年後，佢地睇番自己個樣，必定會覺得自己好樣衰。但這始終是一種經歷，縱使是錯的配搭，也是開心地錯的，而這種開心，在長大後便不易得到了。

說回我的謝師宴，在中五那一年，“幸好”謝師宴那天我需要考英文ORAL，所以我是穿著得十分正常的，並沒有成為老西化或陳浩南化。如果你係我既朋友，係FACEBOOK可以搵到我係當晚既相。當然，那些團體相也是很壯觀的。

之後中七那個謝師宴我都無去了，大學有謝師宴嗎？其實我也不清楚，有也未必會去，視乎其他朋友吧，就像近期那個“甚麼”（我真的不記得那個是甚麼...)，便是完全沒有打算去了。如果要見大同，一齊係街度團圈便可以了，不用穿吊帶晚裝吧。

真正能夠令到香港地位動搖的，只有香港自己。

五月份既《讀書好》有一篇好值得睇既訪問，訪問對象係蔡東豪，講香港價值。hardcopy/softcopy都好難搵，我簡單咁記得重點。

近排社會上成日有人講，話大陸要打造上海成國際金融中心，香港地位遲早不保。蔡東豪係年幾前，曾經明言，係佢有生之年，上海都無可能取代到香港。佢係呢篇訪問，再一次確認呢一番說話。

佢認為要成為一個國際金融中心，包容度十分重要，係政府既指引下形成的，最多只可以是國內甚至地區的金融中心，絕無可能達到國際性。只有係健全法則下的自由市場，才可以吸引到最好既人材。

再一次，蔡東豪強調香港應走溫布頓路線，以一個最好既平台，去吸納世界級人材。香港作為一個小地方，追求本士天才有難度，但吸引天才來到，搞旺本地消費，那麼市民的生活便有保障。

最後，我覺得佢講好好，短期而言，真正能夠令到香港地位動搖的，只有香港自己。

太姥

早幾日搭車，係度諗緊《天水圍的日與夜》既劇情，諗起當中一段幾令人傷心既片段。話說憑此片得到金像獎最佳女配角的陳麗雲，在片中演一位獨居老人，她原本有一女兒，但女兒在嫁人後便死了，女婿亦娶了另一個人及生了孩子，自知有錢都只可以帶落棺材既陳麗雲，便買了一些金器，希望送給這位哎吔新抱和孫，但因為一直和他們的關係也不太好，所以買左都唔敢送，直至鮑起靜鼓勵和陪同她，她才有勇氣約女婿一家飲茶。

但很可惜，新抱和孫都無出現，女婿亦只是應酬式見下就算，並表示太太並不喜觀自己再和她有接觸，搞到自己好難做，最後亦沒有收到那些禮物，之後陳麗雲和鮑起靜便一起搭巴士番天水圍，途中的對話唔造作，但其實令人十分傷心，那些反應便是金像級演出了。

諗起佢，之後便諗起太姥。太姥的女兒也是在嫁人後便死了，阿BA之後亦娶了我的姥姥，幸好，阿BA一直都對她很好，加上我相信太姥對我阿媽七姐弟是很好的，所以她們長大後也一直也很照顧她。

她亦陪我走過了我的少年時代，小學時係舊屋，佢會靜靜地坐係我隔離睇我做功課（姥姥亦都有試過，多得眾人保佑，我既讀書成績總算係好多好多年後稍為好轉）。到我大個少少，中學個陣，有幾年我朝朝都會拖太姥去坐老人保母車去日間老人中心。

雖然有好多地方我地都未必可以做到最好和心滿意足，但總算我們都有過一些快樂的回憶。

吸?

三月話咁快就完左，工作上算是渡過了危險期，花紅也是不錯。

飲左幾杯茶，緊張之外我諗我都算淡定，真係學海無涯。有機會我會係呢度記低，扮下專家。

睇左三套話劇，《聖荷西謀殺案》、《黑天鵝》和《美麗連繫》，三套也不錯，故事內有好多野都值得諗和細心記下，可惜我拖拖下就無左件事。

爵士結他中班已經過左大半，可以講得上係完全跟唔上，逢星期四晚去坐一個鐘而已，返到屋企又無練。買了一個拍子機，幾個星期只係用過兩次。目標其實唔算高，希望彈到funk既節奏，睇到五線譜，記到幾個scale把位和7th chord。

電影節都開始左，到今日為止睇左三套，今年既選擇好正路，都是日本和台灣片，詳細會係movie blog寫。

看了《天鵝湖》，超期待第三幕既32個轉圈，果然利害。《天鵝湖》的音樂和舞蹈很配合，四幕都表達緊唔同既感情。

同一時間睇緊幾本書，有壹週既人物訪問，有《名偵探的守則》，有《質問力》。《名偵探的守則》既不斷反高潮令人睇到好悶。

四分一

話哂呢度都係我個blog，雖然勁耐無update，但係如果連生日都唔出番篇野，實在係太唔似樣了。

如果我有100歲命既話，我已經過左我人生既四分之一。有時我會諗，之後可以繼續行幾耐，到底可以行到幾遠，不過通通我都唔知，我只係知我想繼續行，行左先算，反正唔係咁易有得停。

成日都想開多瓣，但其實好清楚知道專業和興趣之間既分別，週身刀無張利真係玩唔長，手作仔開心下就好了。

我地已經一齊四年幾了，竟然已經可以去過咁多地方，食過咁多好野，愈去得唔同既地方多，愈發覺自己去過既地方少，重有好多野等緊我地呀。

一直以來，我都珍惜和家人及朋友一起的日子，希望自己可以製造多一些機會和大家見下面或參與多一些活動。話時話，可愛的facebook已經將我毀滅，如果你之前是我的朋友，你會發現我已經被"絕交"了！所有我之前造過既野，都已經消失哂，勁恐怖。

伸展操

下午三點半，當我在公司和全部同事一起跟著健身教練做伸展操的時候，內心傳來一陣連續的悲傷。

原來不單只我沒有改變世界，世界亦沒有改變到我，真相是我本來就是如此。

兩小時後的現在，我感到我的內心還在流血呢！

經濟唔好，不如睇多幾套話劇和音樂會幫助下經濟

經濟低迷，但係2009年既香港藝術節就完全無減價既意圖。今年我和獎門人預訂了一場音樂會和兩場話劇。

小野麗莎Bossa Nova經典50年─好期待小野麗莎既現場演繹，只希望唔會因為場地既問題而減少那種輕快既感覺。

聖荷西謀殺案─劉雅麗加彭秀慧，值得期待既戲碼，亦係難得一見既懸疑劇。

黑天鵝─此故事看來是關於未來城市人與人之間的疏離感，配以娛樂圈作故事背景，看似有趣，將會係第二次睇張繼聰既演出。

另外今日我們亦買了飛睇W創作社既新劇《Last Smile, First Tear》，之前錯過左《白雪公主灰先生》，今次不容有失。

連南義工之旅─後記

這麼快便完結了連南四天義工之旅，整體上感覺良好，但個別睇就好有"唔夠多"既感覺，對當地學生及獨居老人既幫助都唔夠，畢竟車程遠，四日內其實有兩日是在車上的，實際和當地人接觸的時間並不多。

講番上堂，情況絕對慘烈，學生基本上明白甚麼是數獨，但要他們在這麼短的時間內去完全一個數獨便很有難度了，希望佢地將來還會繼續玩這個遊戲吧。攤位方面，出發前在香港準備的材料完全用唔著，全靠獎門人的幫助，才能在一晚內在十本書中找出題目讓學生玩。以下便是攤位遊戲結束後的場地。

在第三日的早上我們跟隨一些學生去了山區上的老人屋企探訪，狀況其實是不太差的，反而山上的大自然風貌實在是令我們響往。

連南義工之旅─準備篇

明天一連四日便會和獎門人及steve和其他義工一起往連南做義工，去到當地既主要工作是以較輕鬆既形式對當地既初中生進行教學，當中包括一些課堂及攤位遊戲。我們三人負責的課堂是數學科，到時會教兩班中二生玩數獨，我和獎門人已準備了超大量數獨題目和教材。攤位方面，我會和另一位義工負責經典名著和當代文學，在獎門人的建議下，我準備了十五條關於《三國演義》的題目，學生到時需要以速讀去從書中搵答案。

以下就係個十五條問題，有幾題真係唔睇書係點都無可能知道答案既，哈哈。

1. 劉備、關羽和張飛誰人在桃園結義前是做賣酒殺豬的？﹝桃園豪傑三結義﹞
2. 何進是爲了殺死誰人而向各鎮發信，要求調兵入京？﹝得密詔董卓進京﹞
3. 董卓要立誰爲皇帝？﹝得密詔董卓進京﹞
4. 呂布投靠董卓前殺死了誰人？﹝得密詔董卓進京﹞
5. 誰人把七星寶刀借予曹操去剌殺董卓？﹝群臣設計殺董卓﹞
6. 誰人想出以貂蟬作美人計去離間董卓和呂布？﹝群臣設計殺董卓﹞
7. 曹操在殺了誰人一家之後說”寧教我負天下，莫教天下人負我”？ ﹝群臣設計殺董卓﹞
8. 呂布轅門射戟是爲了令劉備和甚麽人和解？﹝呂布命喪白門樓﹞
9. 徐庶向劉備推薦了何人？﹝徐庶薦賢﹞
10. 諸葛亮是臥龍，那麽誰是鳳雛？﹝徐庶薦賢﹞
11. 誰人在赤壁之戰使用苦肉計？﹝草船借箭﹞
12. 曹操在赤壁戰敗後，在華容道遇見了誰人？﹝赤壁大戰敗曹兵﹞
13. 誰人爲關羽刮骨療傷？﹝關雲長敗走麥城﹞
14. 誰人向曹操建議把戰船運在一起？﹝赤壁大戰敗曹兵﹞
15. 誰人滅魏國和吳國，一統天下並建立晉朝？﹝司馬氏一統天下﹞

另外今次既其中一個目的係增加該學校圖書館既藏書，所以我地個個人都要帶幾本書去當地。﹝那些書是其中一位義工買的，我地只是負責帶，及利用那些書去設計課堂和遊戲。﹞

雜記

隨著奧運既開始，大家也展現出從未有過咁高既愛國心，不論係咩運動，只要有中國隊既，大家都會支持。令人驚喜既係，從電視見到現場有大量觀眾除了支持中國隊外，亦十分支持香港及台灣既選手，另一下真係見到人民既進步。

呢排睇左咁多體育項目，發現原來我睇過好多唔類型既運動漫畫，本身想整一個表紀錄低，但實在有點無聊，加上覺得會有好多唔記得，所以放棄左。

奧運會入面既運動員全部都好專業，但其實評述員都可以去到好專業，唔好計個別只講單項運動既教練及前運動員，如雷sir、方力申和李麗珊等，佢地當然對個別項目十分專業。想特別一提既係萬能型評述員，佢地好似咩類形運動都可以講到有紋有路，遇上前面所講既專業評述員時，更可以提出一些有啟發性既問題，兩台都有代表人物，分別係鍾伯光和徐嘉諾，網上更有"萬能鍾伯光vs百搭徐嘉諾"既討論。

講起評述員，實在唔可以提下今次明珠台既幾位廣東話評述員，佢地幾條友似搞笑多過講體育，唔係話佢地評述得唔好，而係佢地係評述既過程加插左大量既爆肚，更加有唔少人特登為左睇佢地而睇明珠台。

星期日原本諗住去行山，但實在太熱，轉變計劃去睇戲，睇《天水圍的日與夜》，實在唔錯，平實既一部戲。

火龍果已經有十支芽仔，但好似唔識大，好軟弱咁。昨晚幫其中一棵蕃茄換左一個大盆。

今日打風，九號風球，昨日好似大家都已經確定今日實打風咁樣，都幾有趣。