伊坂幸太郎 - 家鴨與野鴨的投幣式置物櫃

原來睇完電影版，之後才看原著小說既感覺係咁唔過癮，一早知道哂劇情，無哂驚喜，睇既還要是出名將劇情大打亂既伊坂幸太郎﹝無錯，我又睇完一本伊坂幸太郎，呢度就快變成伊坂幸太郎專頁，實際上我現在亦正睇緊佢既另一本小說﹞。

講緊既係小說《家鴨與野鴨的投幣式置物櫃》，今次的故事相對上十分簡單﹝加上我一早已經知道了劇情﹞，分雙線咁去講兩年前和現在的故事，兩年前的那個故事主要一對日本男女和一個不丹人，現代的則是講一個剛搬入仙台的大學生和一位剛認識便邀請他一起偷書店的鄰居，兩段故事錯綜複雜，當中的人物亦有著相連的關係，令到兩年前的事件充滿神秘感。如果我唔係一早知道劇情，應該會睇得幾過癮。

假設我唔知劇情，相信我會如獎門人一樣﹝她是看完小說才看電影的﹞，在睇到中段的時候會好心急知道故事的發展，但去到最後卻可能會有一種失落的感覺，畢竟作者用了一種很間接的手法去描述結尾的慘劇，相信這亦是作者的刻意安排，正如書中提到不丹人所相信的輪迴精神，生與死本身並不太值得傷心。

故事中亦講了一些關於因果的道理，亦提到不少不丹人的博愛和相信輪迴的精神。文中亦講了好幾次日本人怕事和不喜歡外國人的情節，甚為逼真。

今次呢本書既主題曲，係Bob Dylan既〈Blowing in the wind〉。

破硬紀緣

我想今年可以破紀緣吧，只是五月頭，已經看了24部電影，以住最多那年都只是看了30部。

幸好到現時為止，我的影評還是追得上。

熱潮過後

經過三天的衝擊後，一切回復正常，難得是換來了兩個讚賞。

如果你真係未睇呢部戲，又想知呢部戲有咩好，可以睇下講鏟片既好片重溫，好詳細咁分析左其中一小段劇情入面，幾位角色的演出都表演到好自然和真實既反應。

《天水圍的日與夜》的得獎都關我事？！

很利害的金像獎，因為《天水圍的日與夜》的得獎，令到我的電影BLOG，由昨天至今日中午，達到過千次的檢閱紀緣。我個網平日都係得一百至二百人次，今次實在係破天荒咁勁。

好多部得獎電影我都有寫，就只係呢部戲既影評今日特別旺，係對上個一百個對訪入面，佔左八十一個，可能因為真正睇過呢部戲既人唔係咁多。

講番呢一部戲，舊年八月睇的，我寫的那篇影評，主要以社會角度去平反天水圍，可算係完全無講電影技巧，我自己都覺得寫得唔錯。

不論係電影還是我篇影評，如果你之前未睇，現在都好應該睇下。唔好諗住會好有驚喜，呢部始終都係一部很平淡的寫實片。

傳承 - 由二十去二十一

我第一次聽〈20th Century Boy〉呢首歌，是來自一部講Glam Rock年代既電影《紫醉金迷》(Velvet Goldmine)，當時聽既係Placebo番玩T-Rex呢首經典rock歌既版本，以下呢個直頭就係電影中抽出來既片段，Placebo更加係真人演出，更可以見到初出道既Jonathan Rhys Meyers和未係十分紅既Ewan Mcgregor。

後尾當然係搵左原版來聽，其實差唔多，最大分別可能只係係Placebo主音把聲姣d。

之後再接觸另首歌便是在漫畫《二十世紀少年》既第一期了，事隔多年，《二十世紀少年》變左做《二十一世紀少年》咁去結局，更加拍成三集電影版，可謂功德完滿。

想講既係當中既傳承，如果唔係一套九十年代既電影，我係唔會認識呢一班七十年代Glam Rock友及令我極度著迷既迷幻音樂。就算我當時無去到戲院睇呢部戲，我都可以係漫畫認識呢首歌，都有機會去追溯番呢個年代。就算我連漫畫都無睇，都可以係《二十世紀少年》電影版入面認識呢首歌，可以咁講，《二十世紀少年》將呢首歌﹝又或者係那個迷幻年代﹞帶左去二十一世紀。

《二十世紀少年》漫畫入面其實造左好多野去記錄主角們少年時既文化，係好有心咁去做一個文化傳承既記錄，萬丈目係死前所講既一番自白，其實係所有潮流追求者既哀歌，絕對值得細味。

故事內容既詳細討論會遲下在Darth Mike Movie Record講，不過現在有三部戲都未寫，有排等。

雜記

隨著奧運既開始，大家也展現出從未有過咁高既愛國心，不論係咩運動，只要有中國隊既，大家都會支持。令人驚喜既係，從電視見到現場有大量觀眾除了支持中國隊外，亦十分支持香港及台灣既選手，另一下真係見到人民既進步。

呢排睇左咁多體育項目，發現原來我睇過好多唔類型既運動漫畫，本身想整一個表紀錄低，但實在有點無聊，加上覺得會有好多唔記得，所以放棄左。

奧運會入面既運動員全部都好專業，但其實評述員都可以去到好專業，唔好計個別只講單項運動既教練及前運動員，如雷sir、方力申和李麗珊等，佢地當然對個別項目十分專業。想特別一提既係萬能型評述員，佢地好似咩類形運動都可以講到有紋有路，遇上前面所講既專業評述員時，更可以提出一些有啟發性既問題，兩台都有代表人物，分別係鍾伯光和徐嘉諾，網上更有"萬能鍾伯光vs百搭徐嘉諾"既討論。

講起評述員，實在唔可以提下今次明珠台既幾位廣東話評述員，佢地幾條友似搞笑多過講體育，唔係話佢地評述得唔好，而係佢地係評述既過程加插左大量既爆肚，更加有唔少人特登為左睇佢地而睇明珠台。

星期日原本諗住去行山，但實在太熱，轉變計劃去睇戲，睇《天水圍的日與夜》，實在唔錯，平實既一部戲。

火龍果已經有十支芽仔，但好似唔識大，好軟弱咁。昨晚幫其中一棵蕃茄換左一個大盆。

今日打風，九號風球，昨日好似大家都已經確定今日實打風咁樣，都幾有趣。

廣告兩則

廣告一

近排睇左兩部港產片，《青苔》及《深海尋人》。《青苔》真係點晴推荐，不容錯過。《深海尋人》屬製作極度認真既電影，故事、演員及特技都很好。

廣告二

我呢排好勤力，寫影評寫得好準時，可以係未落畫前寫完，自己都覺得自豪。另外，絕對係自大，我覺得呢兩部戲既影評都寫得幾好，希望大家可以支持下。

青苔

深海尋人