黃金和A股ETF

因為QE3的關係，似乎全世界都認為金價真係會不斷上升。幾年前已經留意有咩方法去投資黃金，最好最方便都係黃金ETF。香港現時有兩隻，SPDR入場平d同埋成交多d，恵理就管理費平d。

有膽就入啦，不過我就無，真係唔識估，加上黃金唔似上巿公司，唔會製造收入，無復利可言。

A股近年不斷向下，有人話十八大之後就會回升，邊個知?但根據人棄我取理論，現在確是入巿良機。香港現有幾隻A股指數ETF，很多選擇，有實貨既，亦有以人民幣計價的。

另類博內地股巿反彈既方法係買H股，因為多數一齊升，買得好隨時升凸。再唔係買內險亦得，A股升即係佢地既投資收入上升。

我因為已經有接近一半的股票是內銀股，所以目前都唔想加大對內地的投資，即使會也應該用在加碼內銀股。

太古地產分析

太古地產

上星期太古母公司再一次減持太古地產，賣埋呢次，母公司就再無直接持有太地。普遍分析都認為太古完成太地上巿目的，係不失控制權下成功套現，太地應該再無被減持的風險。

以上消息引得我即時找了太地的年報來硏究，畢竟太古的地產項目出名管理一流，也不防一看。太地在香港、中國和英美也有收租物業，但以香港為最主要收入來源。

利好因素

• 受恵於愈來愈多寫字樓由中環東移至港島東一帶，太地在香港的寫子樓租金收入並沒有因為經濟轉壞而受壓，甚至變好。
• 內地項目進入收成期，廣州太古匯開始提供租金收入。
• 租金收入因為受合約所限，波幅較為細。

利淡因素

• 自由行效應減弱，長遠可能令商場租金減少，特別太古城和PP也是檔次高和不算新的商場。
• 母公司唔可以再減持，但難保太古會減持或在太地上供股抽水，始終都係唔知太古班老闆為咩呢一兩年咁需要錢。

簡單咁諗，太地質素高，但投資要睇買入價，我唔可能比太古母公司清楚太地值幾錢，我相信佢地一定有原因去支持自己以呢個價散貨。我會將太地放入觀察目單，直至廿蚊樓下才再作考慮。

Apple分析

 今年放core無去旅行，多左時間係屋企，硏究左幾樣新投資，但最後都無作出任何行動，現簡略記低考慮過既要點。

Apple

大約半年前開始諗買入Apple，利好因素係極受歡迎既產品和唔算高的巿盈率，但當時始終都係擔心iphone5既質量和從未投資過美股，最後告吹。經歷過最高位的700蚊美金，現在股價又回到640蚊附近。

利好因素

• iphone5比想像中更好，機身薄和輕，目前推出接近一個月，只出現了地圖和機身易花問題，對比4s時的接收問題，微不足道。
• Mini ipad極大可能在第4季推出，好有理由相信可以打低其他同類型對手。

利淡因素

• Apple之所以有今曰咁勁，係因為佢地既產品改變了巿場，而不是改良巿場現有既野。從最新既iphone和iPad，我地只係見到改善，追求更快更輕更靚既產品，而再唔係令人意想不到既野。這個走勢，大家還記得sony嗎?
• 過份地追求質量，最終只會令到供應商吃不消。iPhone5出唔切貨已經係一個好例子，短期我相信供應商會因為做唔到合約的出貨量而賠錢，但長遠對apple的形象和與供應商的關係造成重大影響。
• Steve Jobs係神，佢唔睇好mini ipad因為呢個產品並唔能夠建立新的巿場，Apple亦唔應該自降身價去搶低階巿場。

Tim Cook其實已經做得很好，我好肯定呢一年佢搞左好多野去改善投資者關係和供應鏈。我認為Apple在未來一兩年盈利繼續上升是必然的，只是假如沒有iphone或ipad級的新產品出現，增長必然下降，巿盈率亦然。以現時股價和歷史高位只有一成差距，十五倍巿盈率並不值得長線持有。

人民幣加息

萬眾期待，中國政府終於在今個星期加息四分一厘，我個人認為這絕對是一個好現象。

仲記得幾年前東尼曾經講過，一般情況下，加息和通脹都是好事，這些都是經濟良好才會出現的現象，失控才是壞事，兩者都比它們的相反好得多。簡單咁講，用加息去控制增長絕對比用減息去刺激經濟好(現時美國和日本既情況更慘，超低息只造就了利差交易和提高海外資產價格，對本土經濟幫助極小)。

利息提高，求安心既人可以增加存款，有勇氣在好景時發圍的，銀行亦有足夠的資本放貸。

投資角度，人民幣和或賺取人民幣的公司一早就已經需要在組合之內。人民幣升值彷彿是近年的必然發展，唯一和最大的問題在於好難估得到中國政府既行動。

依靠利息收入既保險股必定受惠，同樣利好既有避過不平行加息既銀行股，能否籍此增加息差，便要看個別銀行的存貨組合。將來既人民幣債券需要提高息率去增加吸引力，已經推出既必定會受到價格下跌的壓力。

A good day for sell

I made two transactions on the stock market today. The first deal is sold China Merchants Bank at $23. The bank’s EPS in 2010 1H is 0.65 RMB and its book value is 5.79 RMB. By layman prediction, the earning reminds the same in 2H (actually it should be lower due to lower interest margin and tighten loan requirement). The 2010 estimated EPS is 1.3 RMB. The dealing price equals to 15X PE and 3.4X PB.

China Merchants Bank still is my favorite stock (so I still keep some). The selling today is simply because I need cash and the price is good at this moment. As the 6^th biggest bank in China and the biggest non-government owned bank in China, it knows the way to survive and always can catch the chance to increase earning. Don’t forget it is still the so-called best service bank in China.

The second transaction is sold China Mobile at $83. I lose 13% from this deal. My first cut loses transaction. I had analyzed this company early this year. I still hoped I can get back my costs at that time. But my hope hasn’t come true at these ten months. The company itself is OK and it has a good dividend. But under the government unbalance policy, it only “allowed” to have a very slow profit growth. And after many years of discussion, it still failed to import i-phone while its competitor already earned a lot from it. Also, it has too much cash. I feel uncomfortable when I knew it developed its own phone and involved in banking business. They are just simply not their business. BTW, recently it had some progress for i-phone 4. This news may be the reason gives me a chance to sell it.

The company 2009 EPS is 5.67 RMB with a 2.3% growth than 2008. Very aggressive and random prediction, it makes a 10% growth in 2010, i.e., 6.24 RMB. The dealing price means 11.4X PE.

So, I had sold the best two stocks (China Life and China Mobile) suggested by Master Lam in his previous book.

On the same day, I changed my Canada dollar to HKD.

盈利升一倍就代表紅底有望？！

匯控於今個星期一發明了今年上半年的業績，無甚驚喜，舊年十二月寫的結論繼續成立。

盈利大增一倍，主要因為舊年的基數太低，基本因素並未有重大改變。盈利的上升，主要來自對北美部份的撥備減至海嘯以來的最低水平，但實際上我唔認為有人可以係呢一刻肯定到北美的問題是否已經完全解決。同一時間，歐洲的問題還是未知數，但可以肯定歐洲出現問題的話，對匯控的影響比早兩年美國出現問題更大。

和舊年一樣，今個上半年的盈利繼續依靠環球銀行及資本市場，盤房的交易收入能否保持高位是一個迷。息差向上會是對匯控的一個極大好消息，盈利升一倍未必可以上番去紅底，利息升一厘就應該得，但可惜大多數人都預期今明兩年都會保持低息。

最令人興𡚒的數字，來自核心第一級比率及第一級資本比率，分別為9.9％和11.5％。正如大部份分析所講，強勁的資本比率加上逐步明朗化的Basel 3，匯控幾乎必定會在第四季提高派息。

以最平民的方法分析，半年每股盈利港元2.95，假設下半年不變，全年每股盈利港元5.9，十五倍市盈率等如88.5，現時每股資產淨值港元57.23，一點五倍市賬率等如85.9。已此方法計算，現時只係合理價，持有可享比銀行存款高得多的利息回報，但需要準備全球的風險都會對匯控有影響，歐美風險尚在，亞洲亦不一定永遠好景。個人而言，因為有現金需要，將會在85蚊以上分段出售。

保誠收購AIA，好睇過睇戲

AIA同保誠呢單DEAL真係好睇過戲，AIA搞左好耐既上市，最後直路殺出程咬金。點知保誠主席原來係背水一戰，同班大股東都未傾掂數，佢老人家早個一兩個月四出遊說，但係班股東都依然唔多受呢單大收購。呢個時侯反而到AIA皇帝女唔休憂嫁，無端端叫人減價真係咪講笑，大不了重啟IPO，反正大部投資者都會覺得AIA既純亞洲業務比保誠吸引得多，李家誠早兩日個記者會，都係話對AIA有興趣，並唔係保誠。

點都好，最著數既一定係香港交易所、一班投資銀行和廣告商，最初搞唔成AIA上市固然係有點兒可惜，但係佢地應該已經做左唔少生意，後尾又多左隻保誠，搞搞下隨時AIA又有得翻撻，即係到時可能又週街都見到AIA個廣告。

上海國際版一日未成事，對於一班有興趣在亞洲集資的國際企業，香港都係首選。正如好多人咁講，香港應該把握呢段時間，盡量吸引多一些不同類型的國際企業和東盟的本士企業來港上市，進一步加大個盤，咁樣起碼香港都重可以食多金融呢條水一段日子。

年頭檢討落後股之中移動

新一年開始，檢討一下手上的持股。現時持有的股票內，以宏利和中移動的損失最大，如果以百份比計算，SOHO都很嚴重，但因為份量太小，殺傷力細好多。

今日先睇中移動，中移動是我在2008年頭海嘯剛開始時買入的，當時已經從2007年尾的歷史高位一百五十蚊下趺了三分一至一百蚊，當時以為已經好超值，亦一廂情願下認為中移動能夠起碼保持15%以上的盈利增長，當時以2008年上半年既每股盈利推算，一百蚊連20倍市盈率都唔駛，股息亦有差不多三厘，係2007年根本無可能買到，結果個價一穿一百蚊就飛身入市。後果係點，大家應該好清楚，穿完一百蚊，再穿九十，最後趺到去最低既六十三蚊，比我既買入價低30%以上，真係慘不忍睹。

縱使在反彈的一年，中移動亦不幸地成為2009年恆指之狗，成為恆指成份股當中表現最差的一隻股份，嚴重落後大市。

做成這個落後的原因，主要有兩個，分別係市場開始飽和及政府不再偏幫中移動，甚至反向支持其他的國內流動電話服務供應商，從2009年上半年那接近無增長的盈利可見中移動的經營難處。另外3G和iPhone的引入亦帶出很多麻煩。

反省自己的問題，最大的教訓絕對是不要插手那些不熟悉和不明白的行業，對我這樣一個只知道手提電話除了講電話外，只可以收發sms的人，那些智能電話的制式和網絡，真係睇極都唔明，在研究公司運作時實在十分不清不楚。

幸好，中移動還是一頭強勁的現金牛，擁有強勁的固定收入，縱使是3G的基建亦已大致完成，派息方面絕對可靠，加上恆指之狗效應，希望2010年可以順利回到我的買入價甚至帶來利潤，假如有閒錢﹝好可惜無﹞，七十蚊以下入貨會幾安全。

風險與回報不符，減持匯控

事先聲明，係十月中至十一月中，我已經分段減持匯控，如果唔係十一月尾出現回落，我會繼續減持。

簡單咁講，匯控唔係唔好，正如標題所示，賣出原因只因風險與回報不符。

匯控的最大優點是環球業務，但同樣承受著環球風險，阿根廷債務危機、亞洲金融風暴、美國次按和杜拜世界危機，全部匯控都係首當其衝。雖然，亦是靠著全球的業務，匯控總是能夠成為最快復元的企業。但環球風險總是不斷出現，地區與地區之間的經濟連繫亦愈來愈強，匯控在下次或者再下次的金融危機還是否能夠打不死，實在係未知數。

另一風險，來自銀行的本質。今年匯控交出了令市場給予正面反應的中期業績及第三季回顧，在多個業務亦做出好成績，環球資本市場的增長速度更加係極快。坦白講，匯控的業績報告在下實在睇唔明，特別係環球資本市場呢一部份，唯有信下街邊消息。街邊消息話環球資本市場的利潤主要來自親手落場炒賣。呢個消息對我分析呢一間銀行既影響力好大，一直以來，我偏好銀行股其中一個原因就是它們賺的是中間錢，風險有限和極受市場需要。落場炒賣既結果可以係好大上大落，風險程度十分高。

投資必定存在風險，在這兩個大風險之上，如果有十分可觀的回報機會，還是值得考慮，但基於環球因素，匯控總是會經常遇上各大大小小的危機，除非總是能夠成功捕浪，整體回報率實在不太高。加上那份相信無咩人睇得明既業績報告，我認為投資於更簡單易明的公司會較令人安心。

再見中人壽

常言道不要和股票談戀愛，我今天便忍著淚和中人壽說good bye，以$38.5賣出，獲利三成，成為我踏入股市以來，獲利最多的一隻股票﹝手上還有蟹貨一號宏利和蟹貨二號中移動，慘不忍賭﹞。

賣出中人壽，並不是看淡其前景，而是我確實需要現金，縱使在此刻我認為其價錢偏高，但只要計及其前景，我會認為現價是屬於可持有但不宜買入。經歷過大起大趺，還是多留一點空間給自己較好，逢低買入才是王道。

其實在中人壽數月前公佈中期業績之前，我已經為中人壽定下了賣出價$38，三十幾倍既PE和接近四倍既PEV，確係一個理性套現時機。但在這數月的波浪市，股價始終上不到$38，直至昨天交出了一個絕好的第三季業績，終於到價，仲比目標價高左5豪。

中人壽，總有一天你會再次屬於我！

China Life Insurance 2008 result

Finally have some free time to read China Life Insurance 2008 annual report. Basically the profit drop is caused by the decrease on investment income. Insurance business is still attractive and growing.

The insurance income increased 20.8% while the insurance and operational cost decreased 1.5%. On the other hand, the investment income dropped 61.4%. The total net profit of 2008 dropped 45.2% to 21B RMB.

Look into the financial asset distribution. The ratio of fixed income asset increased from 75.4% to 89.4%. This category includes bond, time deposit, and cash. The stock asset dropped from 23% to 8%. This change reflects the group investment direction. The asset pool created a 3.23% return on 2008, which is 6.03% lower than the fantastic year - 2007.

I still believe China Life Insurance is a good investment. Its insurance business remains strong growth and keeps a stable cost on running the business. The management team manages its asset well and makes good and fast decisions on global and local investment.

BTW, this stock has the highest chance to be the fastest “back to town” stock in my portfolio.

鑽石小知識

常言道鑽石恆久遠，一顆永流傳，但到底點先係一粒好石？同埋鑽石係咪真係有投資價值？

老套又好老實咁講，一粒石既好與壞，最重要當然係當事人自己既感覺，就算其他人講到識飛，如果俾錢個位同埋收貨個位唔鍾意，就講咩都無用。

當然，感覺既野好主觀，為左要有客觀既分析，各式各樣既証書相繼出現，當中現今最權威既，就係由GIA出既証書，佢地定下所謂4C既指標。

Carat - 克拉，即係幾多卡，如果純粹收藏，當然愈大愈好，但若果當作首飾配戴，當然要配合番實際情況，否則只會出洋相甚至受傷。盲目追求大，而忽視其他因素，便不能夠稱之為理性消費了。

Color - 顏色，鑽石以完全無色為之最靚，以GIA評級為例，D-F為之無色，G級之後開始偏黃。如果直接將兩粒石放埋一齊，顏色既差距會好明顯。

Clarity - 淨度，即係粒石係十倍放大鏡之下，見到幾多瑕疵，當中以無瑕FL為之最好，SI以上既一般憑肉眼都係無可能睇到有瑕疵。

Cut - 切割，4個C之中唯一一樣後天的因素，平時成日講既夠唔夠火和閃唔閃，便決定於切割。切割得好便可以將光線完全反射，達至勁閃既效果。切割不良的後果可以令到整粒石變得脆弱，出現斷腰的最壞情況。

除左4個C之外，另外仲有好多數據可以左右粒石既價值，例如對稱、磨光和石既切割比例，呢個網有勁詳細既介紹。

全世界既原石，一般都係來De Beers既批發，如果係香港買，據說某些店舖是可以比較優先選擇原石的，但可信性成疑。原石既切割則一般以歐洲既手功最好。鑲製首飾方面，有機器做亦有人手做，視乎你係咪相信人手既功夫較好。一般人都會將鑽石配上鉑或白金，白金硬度較強，但會隨時間脫去白色而露出金黃色，相對之下，鉑金的價值比較高。

個人認為，我會最重視顏色和切割，因為佢地最影響粒石既質素，大小就視乎用途和用家的體形，淨度屬於肉眼睇唔到有瑕疵便可以。因為白金會脫色，所以鉑金絕對是鑽石既最好朋友。

而到底鑽石既投資價值係點？根據網上流傳既報價表，長線而言，鑽石是升值的。但正如其他商品投資，例如名表和紅酒，鑽石同樣面對保養既問題，加上作為一個普通人，在無零售線既情況下，如何賣出商品是一個大問題，縱使網上拍賣，亦要有一定程度的折讓才可吸引到買家。當然，如果那一粒是十分珍貴既鑽石，便另作別論。

作為一份禮物/心意，一粒細心選擇的鑽石，絕對是十分有意義和珍貴的。

近期股市操作 - 無操作

近呢幾個星期簡直係全球金額界既一個永世難忘既經歷，美國五大投資銀行相繼"消失"，股市小上大落，大部份人都損失慘重。美國專登做場戲去反對個救市方案，引多左幾個國家出手救市，但係個方案已經同最初那個面目全非，重有無功效無人知，不過現在最大問題始終都係市場信心盡失，講緊既係唔單止對金融產品無信心，更係對交易對手和交易平台無信心，呢樣野好難救。

講到我既操作，實際上係無任何操作，一味睇住趺，甚至有時連趺到幾錢都唔多記得，呢一個月唯一同股市有關既就係收左兩次股息。

咁算唔算係已經做到心中無股手中有股既最高境界？

匯控2008上半年業績

匯控在剛過去的星期一公怖了業績，詳細既分析可以睇報紙及其他專業得多既blog，但我覺得呢次又係一次良好既做數示範同埋期待管理既例子，好早就揚哂會有盈利倒退，所以連盈警都唔需要發，加上有效咁將特殊收益於唔同時期入賬，令到個成績可以係大家可接受既預期內做到保留盈利給將來可能出現既更壞機會。

值得一提既係，今次業積係幾個指標性數據上都做得唔錯，例如成本收益比、核心資本和賬面值，都有所進步。

另外更剛巧在同日亦公佈了匯豐銀行重奪香港樓按市場一哥，實在值得高興。

但要注意，根據最新既盈利數字，匯控既市盈率已經高過十了，但當中要視乎你點睇那些撥備，如果唔計撥備，上半年盈利比2007年上半年是有增長的，而其實上半年的撥備已經比2007年下半年少。

雖然我認為匯控管理層唔會咁做，但如果下半年情況真係會有好轉，然後那些次按撥備可以回撥，加上賣總部及法國業務的非經常性收入，個下增長都幾得人驚。不過我覺得匯控會將那些回撥留番比當那些新興市場增長放慢既時侯才慢慢用，去支持一條靚仔既數。

買入一手匯豐

早一兩個星期，油價日日升，股市日日趺，好多股票都進入左吸引既價錢。

曾經考慮過趺到一零幾既中移動，但諗到以中移動既大約25%年增長率，及在3G和重組既陰影下，條安全線﹝profit margin﹞set深d比較安全，所以都係繼續我對中移動既估值，就係只考慮PE二十倍以下既中移動。

市況平淡，更覺股息既有趣，唔經唔覺呢一兩個月都好多股息收入，宏利、匯豐、中人壽既股息都相繼到手。

最後終於忍唔住係七月十五號買左一手匯豐，買入價$113.8，買完之後係咁趺，即日最低已經試過$112個幾，不過無咩所謂，匯豐現價真係抵。係呢次信貸危機，大家都睇得出匯豐處理問題既能力同埋環球部置既優勢。以匯豐現時既資本力，好大機會可以趁機買左不少處於賤價既優質資產。加上大約6%既股息率，絕對是趺左都可以繼續安心持有。好坦白講，如果匯豐趺多幾蚊，我好大機會會再入。

可能因為伊朗問題有轉機﹝國務院第三號人物去左同伊朗接觸，起碼叫做有得傾，伊朗和以色列開戰機會立即減少﹞，油價星期四開始係咁趺，股市變左係咁升。以星期五市價計，匯豐$120，如果係做短炒既，已經有二千四執，不過我當然唔會咁快放，匯豐個價而家重係偏低呀，得唔夠十倍市盈率，如果去番十五倍都咪話唔發達﹝以匯豐既增長率，係正常市況絕對配得起呢個市盈率﹞。

金錢之王 II 讀後感

又講下近排睇左咩書，獎門人最知我心，蔡東豪既《金錢之王 II》一出，就買俾我睇。《金錢之王 I》俾我既影響，絕對大過任何一本投資書籍可以俾到既影響力，呢套書雖然叫做《金錢之王》，但其實放左好多筆墨係呢一班金融界高人在生活及工作上既態度，好像葉維義既紀律、陸東既自信、林少陽既上進，不論任何行業，全部都值得學習。

《金錢之王 II》講既係一班和另類基金有關既人，本地經營既對沖基金尚在發展中，但對沖基金既用家卻多的是，有超級大戶，亦有Fund of funds既經理。另一方面，私募基金及創投基金在香港反而較為成熟，主要是因為香港面對中國這片大森林。

睇完呢本書，明白到投資既風險真係在於無知，只要清楚風險，作好準備，唔貪心，戰勝通脹及絕對回報是可以的。但要做到清楚風險和作好準備，當中要求做到長時間對投資極度專注，睇得清市場既消息，又有幾多散戶可以做到？兩者既分別，就好似大人同細路踢波，一係奇蹟，一係慘敗。專業投資需要既長期專注力，絕對唔少，以我為例，睇過幾本投資既書籍，睇財經報紙，睇公司年報，但比較起真正既專業投資者既專注度，絕對不值一哂。講到持久力，就更係無得比，對投資都叫做好有興趣，但好坦白講，現在已經好難維持最初對各種消息既敏感和有耐心去深入研究，我個人投入對上一隻買入既既股票中人壽既時間，已經少過之前既其他股票好多，近月更係和市場隔離，只係對維他奶進行過年報式既研究﹝因為俾澳元升值及低糖維他奶吸引左﹞。

但係隨之而來既問題係，邊度可以搵到值得信賴既投資專家？好坦白講，以我們既吸引力，係搵唔到。因為好多一級既基金，以百萬美元為單位作入場費，如果要做到適量分散風險，起碼要有五隻一級基金以上，但好多人一世都搵唔到任何一隻既入場費。

就係咁，Bejinmin Graham講得無錯，畢菲特講得無錯，林森池講得無錯，蔡東豪講得無錯，指數基金真係我地最好既朋友。Bejinmin Graham和林森池既書都有教過人點樣選擇最值租既指數基金，值得一睇。

招商銀行2007年業績

招商銀行於三月十八日晚上公怖業績，強勁。

• 淨利潤為人民幣152.43億元，增幅124.36%
• 每股攤薄盈利為人民幣1.04元，增幅96.23%
• 資產總額為人民幣13,105.52億元，比年初增長40.30%
• 每股淨資產人民幣4.62元，增幅23.2%
• 每股股息人民幣0.28元
• 客戶存款總額為人民幣9,435.34億元，增長21.94%
• 客戶貸款總額為人民幣6,731.67億元，增長19.00%
• 不良貸款率為1.54%，比年初下降0.58個百分點
• 撥備覆蓋率為180.39%，比年初上升44.78個百分點
• 平均總資產收益率（ROAA）達1.36%，較上年提高0.55個百分點
• 平均淨資產收益率（ROAE）達24.76%，較上年提高8.02個百分點
• 零售貸款總額佔客戶貸款總額的比例為26.00%，比年初提高7.97個百分點
• 金葵花客戶數達29萬戶，新增15萬戶，增幅107%

以上數據全部都係超強既表現。存款和貸款增長令人滿意；不良貸款率滅少，撥備覆蓋率增加，資產質素令人安心；ROAA和ROAE上升得咁勁，相信和舊年非利息收入超強有關，如果將來都可以保持到ROAE係廿幾個百份比就真係超強了；高檔客人大幅提升，變相令招行可以有更多空間去發展新產品，期待更多和中國人壽既合作。

但亦都有令人不安既地方

• 全年實現淨手續費及佣金收入人民幣64.39億元，增幅156.13%，佔營業淨收入的比重達15.67%，比上年提高5.56個百分點
• 成本收入比率為34.94%，比上年趺3.34%

無理由去預期今年或未來幾年國內既股市會好似舊年咁火熱，有理由相信將來既手續費及佣金收入將會大減；經營成本上升，因為開多左行，請多左人，員工股份獎勵計劃，將會賣多左金融產品，俾員工既佣金會再上升。所以係招行呢隻小老虎長大既同時，要一路都睇住佢既資產質素、員工質素和成本控制。

我期望佢未來三年平均都有大約廿個百份比既盈利上升，只要佢再下趺，我必定會再買。

參考：

1. 2007年度業績公告

上了一課，SOHO

SOHO是我第二隻IPO得番來既股票，第一隻係中銀，賣左九世，似乎我真係唔適合抽新股。

• 純利較二零零六年增長477%至人民幣19.66億元，比二零零七年九月二十一日上市招股書中的純利預期人民幣16.24億元超出21%
• 營業額較二零零六年增長300%至人民幣69.54億元
• 每股純利較二零零六年增長424%至每股人民幣0.477元
• 股息每股人民幣0.10元
• 二零零七年毛利率為55%，二零零六年毛利率為53%
• 每股資產值為人民幣3.55元

雖然業績睇落好靚仔，但係要注意：

• 3.3億特殊收入來自上市時之利息，估總收入16.8%，下年將唔會重現
• 上市時吹到好勁既前門項目，因為政府最新政策，好大機會有幾塊地買唔到

可能因為高地價，所以舊年集團無買新地，只係同人地買左兩間已建成既樓宇，執靚再賣出去，似乎毛利都幾好。

簡單咁睇，SOHO尚有佢既優勢：

• 以北京CBD區商業樓為主，唔受宏調影響
• 品牌效應強勁，但面對大量香港地產商既挑戰

始終都係覺得，自己只係睇到佢經濟上既優勢，盲目地相信佢當日過高既估值，現在唯有希望佢既業務可以快些追上。

參考：

1. 截至二零零七年十二月三十一日年度業績公告

我隻大遊艇，匯豐業績

輪到匯豐，如果計埋月供，匯豐差唔多等如我半個股票組合，所以大家應該想像到我既呢半年來既痛苦。

• 集團除稅前利潤上升10%，達到242.12 億美元（2006 年︰220.86 億美元）
• 平均投入資本回報為15.3%（2006 年：14.9%）
• 每股盈利上升17.9%，達到1.65 美元（2006 年：1.40 美元）
• 2007 年全年派發股息每股合共0.90 美元，比2006 年增加11.1%；2007 年第四次股息每股0.39 美元，增加8.3%。
• 第一級資本比率為9.3%；總資本比率為13.6%
• 2007 年的貸款減值及其他信貸風險準備為172.42 億美元，較2006 年增加66.69 億美元
• 成本效益比率為49.4%，2006 年則為51.3%

資本回報多左0.4%，好過無。第一級資本比率繼續高企，根本唔需要擔心無錢。成本效益減少左，希望可以改善。股息繼續增加，信心既保證。

係盈利分怖入面，要注意北美係2007年係接近無盈利既，而除香港外既亞洲其他地區則搵多左差唔多一倍，其他主要地區亦得到良好增長。呢一樣就係匯豐既優勢，業務分散全球，唔會完全依賴於個別市場。

係今年既盈利入面，有幾條數要特別注意：

• 賣出英國總部既收益未入賬，可以俾下年用
• 有接近10億特殊收入來自平安及興業A股上市
• 除稅前利潤比舊年增加了10%，但只交了舊年72%既稅

風險有：

• 亞太股市熱情完全減退，非利息收入將會大減
• 美國經濟不繼向下，影響全球
• 受某些激進派股東影響，改變一貫既經營作風

匯豐舊年既一些，都增加左我對佢地既信心：

• 無係高位增持或收購內地既公司
• 不繼擴大亞洲區既保險業務
• 拒絕放棄SIV持有人

雖然嚴重坐艇，但我會繼續持有。

參考：

1. 匯豐控股有限公司2007年全年業績 - 摘要

近期股市操作及宏利業績

手上既幾隻股份同埋心水股都公怖左業績，係咁易記載一下。

首先睇下我呢排有咩動作先。

• 一月二十二日以$29.5買入2628中人壽
• 三月十日以$23.8買入3968招商銀行
• 三月十七日以$21買入3968招商銀行

以復活節前價計算，除左最尾個注，其他全部坐艇。全個股票組合計，計埋股息在內，有多達7.6%損失。

好，先講係情人節公怖業績既宏利。

• 二零零七年度的股東收入淨額創新高達四十三億零二百萬加元，較二零零六年增加百分之八
• 全面攤薄每股盈利為二點七八加元，較去年的二點五一加元增長百分之十一
• 普通股股東資金回報由二零零六年的百分之十六點八上升至二零零七年的百分之十八點四
• 第四季普通股股東資金回報為百分之二十點五，較二零零六年同期上升二百五十個基點
• 第四季度派發的每股普通股股息為零點二四加元
• 內涵價值為廿一點八五加元，較二零零六年同期上升百分之四點四

成績咁好係因為保險銷量十分好，財富管理亦都吸左好多新錢，佣金大增。

• 第四季保險業務的銷售達六億四千二百萬加元，較去年同期上升百分之十五
• 第四季財富管理業務的銷售達一百一十五億加元，較去年同期增加百分之二十四

宏利另一優點係資產管理能力十分穩建，到現時為止尚未需要為任何次按產品撥備。宏利既可見風險有：

• 加元繼續強勢，抵銷非加元區，例如亞洲及美國既增長
• 信貸市場因為信心問題大幅下滑，令到手上既債券減值
• 利息過低，利息收入大減
• 北美市場出現飽和及經濟下滑，減少業務增長

睇番當日買入宏利既因素，今日繼續存在，所以我會繼續持有。

• 平穩增長，盈利以約十多個百分比上升，股息亦慢慢提升
• 受惠加元升值
• 在亞洲多個新興市場有領導性地位
• 管理層用心經營，專注於保險及財富管理

順帶一提，宏利係我持有最耐既股票，接近十四個月，亦係我倉內目前唯一有盈利既股票。

參考：

1. 宏利金融全年及第四季業績同創新高
2. Statistical Information Package