八點左右就起身, 睇完報紙又訓番. 中午食永年, 我都係唔食辣比較好. 哈. 之後過埋錢比 jj 就番左屋企, 勁大雨, 係屋企睇當碧咸遇上奧雲, 都唔係好知講咩野, 燈光, 人同音樂都好亂.

買左歐洲青年二等廿一日火車証, 又無左幾千, 仲有幾日就出發了.

發現一個好靚好舒服既地方, 成日經過都唔知原來個度晚上係咁靚.

mother 一早又呵又嘔, 所以我八點未夠就醒左了, 之後重派埋報紙. 求神拜佛都要 father 同 mother 係我去旅行期間唔好有咩病痛呀, 唔係另一個就好辛苦了. 下午都睇左一個鐘檔.

今日去左 5 次圖書館, 諗住去流動圖書館換左 d 書, 因為流動可以借較長時間, 但係好可惜, 有 d 書係電腦查到個架流動圖書館有, 但係會有可能無放上架車度. 結果我就無左本西歐遊同埋智慧型. 係石蔭食左個早午合一餐, 之後行左陣就坐巴士去荃灣, 俾九巴搵笨. 妳唔駛怪自己帶我行大運呢, 我平時都帶得妳多...哈...

寫左老友狗狗, 寫左好耐呀~

今日做左一些 xdea sigema 既野, 很呆很煩的工作, 唔想用腦就最好做呢類工作.

又被罰錢了, 幸好只是一天. 屋企已經俾我攪到超級亂了!!! 成地都係書, 卓面放滿旅行用品, 單, 雜誌.

今期飲食男女介紹了上海兩個新的藝術村落, 建國中路 8 號和莫干山路 50 號. 用村落去形容好像有點太誇張, 其實主要是一個地方, 有很多不同類形及新晉藝術家攪展覽及創作的工作室. 兩個地方也是改建舊工廠而成, 所以空間很大, 可以作不同形式的展覽. 看見這些, 便想起香港的油街, 有幸在認識至關閉這段短短的時間有去過睇 "2 打 6" 的展覽. 之後的牛棚, 就未去過, 雖然有幾次個度攪書展同賣物會都想去, 有點唔好意思講, 不過我真係唔識點去, 但是人們對牛棚的評價真的比油街差很多, 可能是失去了才會珍惜的道理吧. 縱然沒有任何藝術天份, 但希望本地藝術有好的發展吧. 西九還是算吧, 那根本不是這回事, 一流的足球場並不能培養出一流的足球員.

好鬼熱. 去左唱k. 之後去旺角買袋, 買左條 $18 既皮帶, 宣佈清盤.

九點起身, 睇天龍八部. 十一點出門口. 我支持妳呀, 唔駛擔心. 番 city 打波, 出埋單腳精神步法及入樽式扣殺都係無用, 唔通網球王子入面既招式唔可以打羽毛球用, 定係我未學得到家??

去會展睇老友狗狗的優先場, 部戲既手法都幾特別, 一路都相安無事, 點知最後個幾分鐘出哂事, 一個細路女加一隻狗, 一段第一人身的獨白再加一段第一狗身的獨白, 慘到爆, 真係喊到豬頭咁樣. 最大濟係部戲就咁散場開燈, 喊到聲都沙埋, 又會展行到去太源街都重想喊.

玩唔成跳樓機, 唯有搭下合和電梯, 手汗都出埋. 食潮園. 再去銅鑼灣行街街. 係荃灣買左當碧咸遇上奧雲的 vcd. 又多一隻未睇既碟.

做了實習生整整一年, 除了那些經驗及友情外, 說得實際點, 總得來個金錢上的總結吧. 月薪七千, 給了屋企二千, 電話及本年度學費的分期一千, 強積金三百五十大元, 每個月實際可用既有 $3650, 生日大哂, 支出最多的是十二月, 幸好其他月份尚算節儉. 一年總計, 從工作上, 共儲得 $23475.25, 平均一個月儲到 $1956, 自問對得住天地良心了.

一年來那張西鐵全月通也真的為我省了不少, $300 俾我個個月都坐 50-60 次, 不過今個月開始西鐵全月通已經成為八達通內的一個功能了, 以後都無獨立一張西鐵飛了.

換多 300 歐羅, 中銀賣出 9.32, 比上次在永隆買旅行支票足足少了 0.235, 借用財經版的名詞, 在帳面上, 我的身家已經蒸發了起碼 $235, 還未計手續費及只用了賣出價計算.

下午去了美孚借了天龍八部第二期, 之後在荃灣行, 在愉景新城有魔術睇, 拿了國際學生証信用卡. 張相好似俾人整扁左咁, 又變光左, 好樣衰.

七月了, 重有兩星期便去歐洲了, 今天得到了家姐的大 backpack, 個樣咁殘, 唔駛驚有人偷我野了~ 因為歐元近期係咁趺, 攪到我地都始終未換哂錢. 呀~ 雖然一早已經定了去那些地方, 但還未定當地的行程呀~~~ 好懶呀!!

一早起身, 係屋企睇左孔雀, 下午去了行街, 因為落雨, 又買唔成袋了. 係花園街買左件衫, 哈, 又係白色, 成個櫃都係白色, 真係無菌.

回家晚飯, 有線死亡, 又上唔到網, 又睇唔到電視, 幸好八點復活. 有人話今晚食飯識左兩個靚女喎, 哈. 好耐無搭 68m 去荃灣了. 食左條栗米雪糕, 多謝哂~~

今天是我在 hsbc 做實習既最後一日了. 都真係有唔捨得架. 由最初幫 hcc team cert 機, CAS R1 testing, 做 CRMS sales form, CAS R2 由開發, 測試到出街, 好煩既 SD testing,  CAS R3, CRMS sales form. 一年來, 做左唔係好多野, 都重可以記得自己負責咩野, 遇過咩野問題. 唔係幫過好多人, 但好多人幫過自己. 技術上學到既野係有, 但在管理, 人際間的見識就更多. 隊員唔多, 本地既只有三位, 三個都好好人, 對我十分好, 從來唔會指黑路俾我行. 今日佢地都有叫我下年返來做, 如果可以入番 crms team 我又無所謂呀.

一早係西鐵見到 lorian, 最後一日佢先發現我住係元朗, 全程都有講野, 真係識左一年, 都唔夠今朝一程南講既野多. 返工都係睇左 log, 準備埋俾 cas benchmark test cases, 下午教埋另一支 team 既 thomas 點做 stress test, 咁我做無野做了. 送出了兩封 byebye notes, 一封俾 teammate, 一封俾左 80 個人, 都有幾個人回覆我, 真係好開心. 等埋老大開完會番來, 同老大 eric, jessica 和 malcolm 講 byebye 之後就走了, 離別總是很傷心的.

雖然我日日都準時放工, 但自問將要做既都做得好, 亦從無人話我做得唔好, 但自知與盡心盡力還差很遠, 希望我下一份工可以比多 d 心機去做 la!

佢地係咁叫我 extend 一個星期做埋 stress test 同 benchmark, 我當然唔肯. 還是要改 program, 寫了一整年 frontend, 連個人都變得婆媽.左. 都唔知將來再出來做野點算.

有人來接放工, 真係好, 食左個飽飽下午茶.

唔知點解今日好眼訓. 企係度都訓得著.

今天上班少了妳. 上午超級多野做, mortgage 真係煩爆, 又改 host formatter, 又改 actlog. 連上網都無時間. 中午買了三文治係位食, 食得好飽. 下午的工作逐步完成, 五點便準時閃人了.

還了天龍八部第一期, 但係借唔到第二期, 借了原氏物語 2 睇. 順便一提, 那本智慧型股票投資人, 我已經睇到第十五節, 而從一開始, 我已將自己定為保守型.

CAS 因為網絡問題, UAT 取消了大半日.

寫錯字係呢個日記既特色, 我唔係孝順, 只係考順, 全寫是考試順行.

俾萬眾呃左十五元正, 食屎.

睇完本天龍八部第一部先發現本書係一星期前已經到左期.

今日做考順仔, 同 father mother 去長洲. 係香港站間西龍傳香飯糰買左個飯糰, 去到碼頭剛剛走左班船, 要等一個鐘, 就去左 IFC 食飯糰及行 CITY SUCKER.

一上船, 轉左幾次位之後勁訓, 在水中央落大雨. 落船後係就搵野食, 係碼頭附近一間餐廳仔食, 個蒸魚午餐幾靚 wor, 條魚聽完個名都唔知邊咩, 不過品種應該係未哂既鹹魚, 蝦仁炒蛋 d 蛋都好滑, 平靚正. 食完諗住行去東灣先, 但在碼頭見到有街渡 $3 去西灣張保仔洞, 就上左船了.

唔駛五分鐘, 已經到左西灣, 上岸後都未行到去天后廟又落雨, 等左陣無雨就行上去張保仔洞, 中五個陣已經落過洞, 今日又濕, 所以唔做阿福去遊洞了. 天色好了很多, 影了很多相. 之後行番去碼頭坐街渡出番去.

之後行了去東灣, 在玉虛宮行個圈, 便沿著沙灘行, 上山時路過長洲醫院, 救護車細細架好得意 在體育館休息了一會. 長洲其實真的是一個很多人的離島, 成條街都係人, 好雜, 開滿市區常見的連鎖店舖.

早一晚在 openrice 看到一檔有很多人都話好正既紅荳餅, 我們也買了來食, $10 三件, 很多紅豆, 好新鮮, 好清甜, 只有純正紅豆味, 真係幾好食.

之後四圍行搵晚餐食, father 見到大排檔 d 油炸鬼好似幾靚, 咁我地三個就大熱天時係大排檔食粥. 粥幾清唔鹹, 炸兩同魚片腸粉都好大碟, 炸鬼真係幾脆. 食飽飽就行去碼頭坐船走人了. 在差不多落船的時侯, 剛巧遇著夠鐘放煙花, 今次係第二次係船上無意中睇到煙花, 上次是和妳一起睇的~

今日去了 jessica 的婚禮, 係幸福街一號, 祝佢同老公一齊行到尾. 教會的婚禮要唱歌, 我地又唔識唱, 其他人又好似全部識唱, 幾得人驚. 花女好得意, 影左張 hsbc 新娘合照便散水.

之後去左旺角睇袋, 好多好多好多, 唔知點選擇. 又行了幾間聲稱特價緊既書店, 但係上到去都遇到同一個問題, 就係唔知邊 d 書特價.

食 delfrance, 個包超硬, 食完同三個 bb 影左好多相.

今日mortgage 既 log 開始出現, 五點幾重發現左一個好大既問題, 原來之前 host 同我地都 check 少樣野, 要加番就要作好大既改動, 要同 kelly 和 malcolm 搵埋老大 eric 商討. RSQA 又鬼咁多問題, 都唔知聽日做新娘個位阿姐係點做野~ 用 windows 起那部 crms server 都係未得, 都無時間去攪佢.食屎, Piston vs Spur 第七場, 74-81, 頂.

今朝一早就覺得好唔知咁樣, 係南昌站行左幾轉. 一返工就試 uat 了, 真的很多 log, 而家轉左位, 同 host 人坐近左, 一日到黑都睇佢地玩 mainframe, 不過都係唔知佢地係度做咩. 老大無端端要我去整一部 crms server 俾人玩, 真係玩我.

放工係輕鐵訓過站, 要搭回頭車, 番屋企勁訓, 無收檔, 唔到食飯都唔起身, 成隻豬咁.

為了歡送我及另一位同事, 今天老大及老大大們請食飯, 食魚翅城海鮮酒家, 原來都驚去到樣樣野都有豬, 無野食得, 幸好大部份都食得, 雞湯翅有好多翅, 甜品幾好食, 食左好多西瓜, 一圍十一人, 老大大在內的三位女性原來都係師姐.

今日 CAS 好多 log, jessica 又要趕在放假前交低哂 d野, 所以都好多野做, 明日便開始試 mortgage 了, 真係大濟, 7 點半先離開. 看了幾天 kelly (男) 用 mainframe, 都係唔知佢係度做咩, 佢實在太快了.

繼 jj 後, kalee 今日開始都唔駛返工了, 我也只剩下不夠十天.

200 日了.

晚上去了尖沙咀的一間係樂道二樓既南印度素食餐廳食, 間野叫Branto, 上到去勁驚, 除左我地, 得另外兩個食客係講中文, 其他全部都係印巴藉和鬼. 餐牌只有那些完全睇唔明既印度英文, 向待應問那些餐有咩咩食, 講左好耐佢先俾本相薄我地睇, 整體來說, 全部野食個樣都好奇怪, 跟住我地叫左兩個餐. 一上菜就知驚, 一盤過, 先來片胡椒餅, 好脆. 有個超級長及大既卷餅 Masala Dosa, 起碼 30cm 長, 7cm 高, 入面有薯仔及豆, 好鐘意個餅皮, 好軟熟, 唔連餡食都好正. 另外重有兩個炸波波 Vada, 入面既陷同卷餅一樣, 有 d 似平時食開既咖喱角. 兩個餐都有碟印度白飯, 點解叫印度白飯, 因為用左印度又長又幼既米. 最奇妙既野, 就係跟餐一齊來既四碗液體, 一碗係酸乳酪, 一碗係好杰和有椰子味既白色液體, 另外兩碗較稀都係紅色, 完全食唔出係咩. 結果我地都係用左紅色個 d 汁混飯食, 酸乳酪實在太酸, 都食落. 其實已經好飽, 但係都係叫左一杯自家製既南印雪糕 Kulfi, 細細杯, 有四, 五舊雪糕仔, 上面有果仁, 賣相甚好. 一入口, 味道實在令人難忘, 椰子味, 和印度奶茶一樣, 有很強的香料和薑味, 頭一兩淡有 d 怪, 之後愈食愈正. 飽到精神進入迷幻狀態, 搭車勁訓.

一番去就知道有一班完全唔識既高層會 farewell 一個高層, 再順便 farewell 埋我, 真係完全唔識佢地係邊個.

host team 準備 uat 超忙, mortgage 也試唔出 d 咩. host team 的 Kelly (男) 用 mainframe 向我展示他們一些東西, 快到唔知佢係度做咩. 老大叫我準備一份 on-hand item 清單, 以便他安排接手, 但其實我 on-hand 的都是之前 handover 左俾我之後既手尾, 最後個清單入面有九成都係 "ready for uat".

我們的 uat 終於開始, 又要將 TD 當 newsgroup 咁睇, 四點過後已經 fix 左 4 個 log.

放工返 city, angel 及 william 去搵 chlee, 我就去了圖書館, 點知一份信報都未睇完, 佢地已經見完.

巧搵 ckpoon, 打了一下招呼. 食完野在又一城行街街. 在 pageone 看了幾頁黑夜之後.

七點幾就俾人叫起身去拜山. 今天堂姐及姐夫走了. 晚上去了 CEO 唱 K, 慶祝父親節.

實習年的最後一個長週, 想當初都真係俾 smart causal 考起, 不過我一直都係咁 causal. 大家也很忙地準備下星期 uat. 今次 mortgage 真係大濟, 到今日都重有 requirement 改, 真係搞錯.

中午去了中環食那些快無得做的大排檔, 食了民園麵家和 玉葉甜品, 幸好食個陣唔算太熱, 唔係食左都補唔番, 民園的牛腩及玉葉的糖不甩都唔錯, 坐係斜玻度食面, 都真係幾特別, 好似會趺咁樣. 為了找這兩間大排檔, 在中上環行了數圈, 見到好多很靚又不太貴的食店, 但當時都不是我們的目標.

再行了一會便在上環坐地鐵去觀塘, 上環站真係驚驚. 行左幾個鐘觀塘廠及 apm, 只係買左包糖, 無其他收穫.

之後兩個人去了九龍灣打邊爐, 超級飽.

耳仔又好痛了, 痛到半邊頭都痛, 真係食屎.

cas uat 快開始了, 好像很趕的樣子~ 老大下午要和女兒去小一面試, 祝小妹妹好運.

AIA 話我 03 年無交保費, 兩年加埋收我四十幾美金利息, 食哂屎. 如果遲多幾年都未發現, 講唔定有收數佬上門噴油. 無端端無左二千幾. 頂, 真係越窮越見鬼.

堂姐及堂姐夫到訪, 住幾日, 我又要轉床訓, 似乎我已經好耐無試過連續一星期訓自己張床.

原來公司有時差, 昨天那個下午茶原來係今日先食. 四人幫又共同創作了一個故事, 今次的內容比昨天好, 但結尾還是那麼奇妙, 因為要放工.

slastdot 介紹了一個 brower base 的 unix-like 操作系統, 叫做 JS/UIX, 報稱係全 javascript 寫成. 但係我去唔到佢個網頁.

找了一首 dragon ash 的新歌 crush the window 來聽, 初聽有點失望. 聽著 DA, 好有放假的感覺. FANTASISTA, Let yourself go, let myself go, Greatful Days.

想知道 google 怎樣做排名嗎? 看這個吧. 有助知道怎樣令你的網頁出現在 google 內.

頂. 放工等食下午茶, 等到六點都無聲氣. 毛都無條, 風就有得食. 等食期間係度做 mortgage, UAT 快開始了.

睇 paper, 完全唔明, 睇到無哂心機. 和 angel, kalee 及 william 一人一段咁作左個故仔, 劇情轉折極多, 五點鐘寫完.

仲有差唔多十日就失業了, 無回定收入, 唯有靠哂 xdea 吧. 在 OSS 的工作中, 有一份是在宿舍做網絡支援, 需要在晚間工作. 只是想像已經覺得好正, 可以在晚間去女生宿舍 shotting (trouble shotting).

放工後, 好似個小朋友咁食格仔餅.

四天假期後, 重回公司. 都係完全唔想做野, Insurance retention 的 Nonbank 做了一天. 都係上網為主. 中午去了中銀打簿, 在奧海城行大運搵中銀, 聽落真係好意頭.

天氣實在是太熱了. 請大家不要開冷氣, 減少熱氣的排出, 通通風吧.

Billy Holiday - Smoke get in your eye

今日返大陸, 幫阿哥整電腦. 之後係街度買到一間酒樓放左隻鱷魚同埋好多小動物係門口, 當然我地無入去食. 去左食間之前未去過既新疆餐廳, 手抓飯同羊肉串燒超一流, 手抓飯入面有提子, 口感甚好. 羊肉串唔似平時食那些, 很香很滑, 細細舊, 容易入口.

早上睇檔遇上一中年男子, 指著南華早報話曾蔭權唔識英文, 唔敢和學者見面, 只會搵低下層來抬高自己. 計我話呢個阿伯真係亂講, 曾身為港英餘孽, 英文絕對是十分好. 曾自知必勝, 與其他連入圍都成問題的對手攪公開論壇, 只會有可能提高對手的勝算, 對自己全無好處. 對手話佢當選過程唔夠民主又如何, 只能怪自己能力太低.

下午去了欣澳, 即是陰澳. 近距離睇迪士尼列車, 個站既設計都幾靚. 天氣實在太好, 熱到熔. 係海邊行左陣睇插哂係水入面既木, 有幾條浮下浮下既木, 好似一舊舊屎. 無行到對岸既小碼頭, 因為實在太熱. 為左配合氣氛, 唱他約我去迪士尼.

回家收檔後, 整了個人經濟試算表, 內有定期及收支的資料. 亦找回中銀的紅簿構仔, 好耐無打過簿了, 上中銀網及得 eric 的資料提供下, 相信是不用罰錢的.

係屋企大聲唱浮誇, 真係好誇. 家人都去了大陸, 端午節做節晚餐是公仔面一個加一隻雞蛋, 飯後甜品是雪糕一杯.

又是五點起床, 星期五的報紙最厚又最遲返齊. 九點諗住睇 nba, 見有線同本港台都無播, 就去左訓覺, 十一點幾起身先發現原來係國際台播, 睇了最後的四分鐘.

美國聯儲局局長格林斯潘話美元會繼續加息, 美股及歐元都立即下趺, 歐元曾趺至 9.505 港元, 可惜未有把握時機, 後段重回 9.555. 歐元成員國近期並無任何利好因素, 如果美元真正加息的幅度和市場預期一樣或高, 歐元再趺的機會十分大. 幸好我們買入的歐元都是為了去旅行, 是不能省的, 趺了也不用太心痛.

交通銀行的招股炒得好勁, 相信好大機會以接近上限推出, 如果以上限 2.55 出售, 股價/賬面值將超過 2 倍, 縱然有匯豐射住, 但本身不良因素實在不少. 推出初期應會跟市場熱賣消息而上升至接近三元, 但長線股價應不會有太大升幅. 既然不能以低價買入, 又不想炒短期, 不如靜心睇下呢隻第一家在港上市的內地銀行表現, 考考自己的眼光.

五點便起床, 真係唔講得笑. 7 點都未夠就做哂報紙, father 返屋企食完野, 我再派埋報紙, 八點就番屋企訓覺. 因為之後阿哥睇檔, 我就訓到十一點了. 之後一點至兩點半再睇檔, 重落埋雨, 真黑仔. 之後係屋企睇天龍天部睇到四點半又再落去, 重係落緊雨, 不過過一陣就停雨. 睇住佢落, 睇住佢停. 約六點便去了交國際學生信用片的申請表, 重拎埋火車時間表及地圖.

今日終於睇到信報了.

在睇檔期間, 深思了本業與投資的關係. 一般人在本業擁有足夠的知識, 能夠得到安穩的收入, 在去除支出後, 便形成儲蓄. 怎樣去運用儲蓄, 便是投資. 可以投資在自己的興趣, 去旅行, 去睇世界杯. 可以投資在自己的能力, 增加自己在本業的能力, 或學習另一種本業的能力. 存款也是一種投資, 利息雖少, 但低風險, 最大問題是存款是經不起通脹的考驗, 金錢的價值是有機會下趺的. 定息債券及存款証等都算是較高息的存款, 風險同時增加. 股票的保值能力較大, 利潤的多少, 完全視乎選股及時機, 結果可以是一無所有. 若能以合理價錢買入優質股, 縱使未必有短期波動造成短炒利潤, 但長期持有的股息是絕對比存款多, 而且優質股的股份比現金來得保值.

看來找到一個優質股是十分好的一件事. 但是問題便是, 若花了太多時間在股票市場, 而得到的利潤又不多. 反而會害了本業的能力, 造成更大的損失. 就像一隊球隊只著重研究前鋒的攻擊戰術, 而完全忘記了訓練後防及中場的供應. 這隊球隊最後只會降班.

係公司上 flys 中木馬, 頂. 之後做了一個八小時的病毒驗查.

放工終於去了食車品品, 食左個車仔面, 都唔錯既, 不過份量比較少, 都係永年正. 之後飲左支維他牛奶, 個多小時後便出事, 在朗豪坊解決, 朗豪坊絕對是旺角區內最佳的解決地方. 之後在頂樓看了半首現場 jazz, 便去食 kfc.

有個西班牙大學的學生, 竟然向我求助. 佢想要Instant Complexity既源碼, 佢話 20 號前都做唔到就會肥佬. 我當然唔會俾. 呢條題目好陰濕, 當年我做極都做唔到, 之後放低左成年, 得聞睇番先發現左一些陷阱, 之後一下便完成了. 今年出賽的隊友試試這題吧, 很煩的.

阿哥受傷, 拿了四天病假. 所以明天開始 mother 去旅行, 但檔口多了我, 阿哥和阿嫂. 真是及時幫了我一把.

CRMS 的工作已完成了, host 的 online 測試也超級順利地通過. 開價個半月, 一星期已做哂, 現只剩下 cas 的小小工作.

全日都在睇交通銀行上市資料, 呢隻野有唔少不良因素, 不良貸款偏高, 貸款過度集中在個別行業, 94％的存款是在1年內到期, 68％外借貸款將於一年內到期. 睇見都驚.

招股價相對於帳面值約1.6倍至2倍, 呢個比率在銀行界相當吸引, 值得長期持有. 而公司和 hsbc 的關係亦是一大賣點, hsbc 持有 20% 股份, 並在 2009 前不得注資其他同類銀行, 提供一大信心支持. 一手最多亦只需 $2550, 相信會有好多人入股, 以接近上限出售機會很大.

還是要再相清楚未來的走勢及預期回報, 現在存款利息高, 年可達 2-3%, 錢放在銀行, 風險低很多, 若投資回報不大, 只有 4-5%, 那麼不如訓得安心一些吧.

事隔多年, 再讀金庸. 都已經唔記得自己睇過邊本, 肯定自己睇過既有《射鵰英雄傳》、《雪山飛狐》、《飛狐外傳》、《俠客行》、《笑傲江湖》、《倚天屠龍記》. 唔肯定睇左未既《碧血劍》、《連城訣》《鴛鴦刀》、《白馬嘯西風》. 今日借左本《天龍八部》, 成五本, 今年內睇得哂都係一個奇蹟.

週身骨痛, 起身都成問題, 行路又行得慢, 真是俾錢買難受~~

真係唔好彩, 又整親, 睇見都覺得痛. 不過, 而家開始就無事了. Pain will fly~ Happy is arrive~ So don't cry~

完成了 crms 的開發, 只待和 host 做介面測試. 一次過 turn 八十幾個檔案. 真是勁.

crms 實習生的上上代湯馬士今日好像很無奈呢, 希望佢以後無論係邊度做野都順順利利.

今日 jj 來了和我們一起去 euro gogo 食午餐, 六個人一齊食, 正!!

呀, 真係成身都痛...

今日去打 war game. 早上十點幾打到五點, 超級累, 身中數十鎗, 手腳都損哂, 成身散哂.

打完無跟大隊返旺角, 坐車返元朗食印尼. 日間打得太勁, 一合埋眼就覺得子彈橫飛, 勁得人驚. 晚上睇星戰 Return of the Jedi

一早便出了旺角銀行中心永隆買旅行支票. 勁呀, 從未試過一次係銀行拎咁多錢. 以 9.555 匯率買入一千元歐羅旅行支票. 勁玩野, 個銀行職員係最後細細聲講旅行支票其實幾唔方便...又唔一早講...

回家安置了從公司拎回來的玩具, 又整理了一大堆青年旅舍証, 旅行支票, 國際學生証既單張. 去圖書館還了昨天已經睇完的 7-11 及三張唱片, 又借了 03-04 西歐遊.

回家睇傑志對祖雲達斯, 傑志繼舊年打低 ac, 今年再打低祖雲達斯, 連續兩年擊敗意甲一哥, 証明傑志的實力是比所有意甲球隊強勁. 范大哥的防守真的很勁, 好有路數, 加埋卓卓, 都擋左唔少祖雲達斯既攻擊.

晚上和中同們打邊爐, 由原本的好多人燒野食, 因為落雨變做七人打邊爐. 呀, 俾佢地話我成日都講錯野呀, 我又真係衰左 d 既...

因為捐左錢, 所以今日有得任坐九鐵及地鐵, 俾左九鐵 mother, 自己坐地鐵, 搭了三次, 真係無謂.

花了一天, 終於明白了 wsbcc 既 uibean, 下午完成了在全部 sales form 的 mandatory field 加粒星, 好似好低能, 其實都要改 bean 同 jsp 架. 咁 crms 既 1.5 個 hcm, 已經完成了 1.4.

上午睇了一點債券及存款証的資料, 晚上睇旅行支票, 活像一個銀行界份子.

Music

• 陳曉琪 - 念口簧
• The Pancakes - November Cat

昨天忘記了說, 我之前無計錯, 今次考試拿了一個甲和一個丙. 算是不錯了, 日文不肥已經很好彩.

crms 的工作順利, 咁耐無做過都可以做得咁順利, 真係好運.

昨晚問了 eric 關於存款証既野, 似乎唔錯, 但入場費比我預算高很多. 阿宏都幫我問左銀行朋友, 真係唔該哂大家既幫助.

晚上看亞視的 nba 重播, 太陽被解決了, 真是可惜, 今年成隊太陽都打得好好, 只是未能最強陣容出戰, 史杜達米亞低位進攻超勁, 鄧肯都係得個睇字, 寄望下年吧!!!

sogo 將會在尖沙咀之前小熊國的位置開分店, 個人認為在那個位置開的 sogo 將不能以銅鑼灣店的形式生存, 一來那個位置沒有大量主婦, 二來位置太少, 不能存放大型家電. 如果可以大膽地引入日本中高檔服裝及生活用品, 主題超市. 格式而言, 如果管理良好, 以統一風格怖置, 這商場還是不錯, 有望做到全尖沙咀最自成一角及性格鮮明的地方. 有空再看一下 sogo 香港公司利福國際集團有限公司 (1212)的資料吧.

因為旅行, 將無緣參加今年 7月14日的本地 ACM 比賽. 呀! 入大學後第一次無份玩呀~~ 我的隊友 sam 及 patpat 將與一 year 2 組隊, 你地要加油呀, 唔好靠哂人地呀, 要等我歸隊呀!!!

最後一個月的開始, 工作還算不錯吧, 只是早上有點混身不自在. crms 的進展在放工前變得很好, 但餘下的部份真的無咩方向. 有幾個新實習生來了, 但很可惜我後繼無人, kalee, franz 及細chris 都有後人.

晚上在旺角看了一場東南海七人足球賽, 應該是南華對花花, 濕膠地踢波, 好似滑水咁, 花花個幾個黑人前鋒都無用既, 結果南華勝出. 下一場星期五打.

今個月的定期是上年四月的 200 部, 真是驚人的差距. 藉此機會, 計算過去一年在定期儲蓄的回報率, 有 0.6%. 如果不是近半年的年息率以倍數上升, 回報率可能連 0.1% 也沒有.

有時間想睇下存款証既資料, 我想減少定期的本金, 部份用作去旅行 (最好唔駛), 另外部份想在現在高息時期買入存款証以作一至兩年期的存款.

結果 dept page 既內容最後都係由我寫, 向 jessica 及 malcolm 求救, 不過佢地都話無寫過呢類野, 幫唔到我. 問 host team 的大哥 simon, 佢叫我照抄佢地個網頁, 咁即係兩個網頁內容一樣. 寫了差不多兩小時, 之後再在上午完全 mortgage edr.

下午開始做 crms, 完成了部份 sales form, 但有部份真的唔知點做.

今日 farewell 細 chris, 佢請食下午茶, 正!!! 下個月到我地走了.

經過計算, 我的日文打破了我的最低成積, crypto 則和預期差不多. 假設是我無計錯, 明天真相便會大白.

有請今年度歐冠得主利物浦門將 Dudek表演 , 蛇舞.

CBD dept page 的人追收 teampage 內容, 我只能等待老大的指示. 在離開前的一個月, 變得很忙. 將 RCF 和 Mortgage 的開發交給 pdc, 在 cas 的開發, 我便只負責全部的 enhancement. 以為少左, 但係要寫 EDR, mortgage 有差不多一百個格, 逐個寫, 個流程又有別於其他 retention, 寫足一日都未寫完. 老大叫我將 CAS 交給 pdc, 卻將 crms 的工作交給我, 高層的心態真的偉大, 我只剩一個月, 但根據叫價, 他交給我的工作是 1.5 HCM, 即是個半月. 無言.

中午去歡送 joan 姐, 坐旅遊車去尖沙咀食, 好像學校旅行. 其實嗡咁耐以來都只係同 joan 姐講過好少野, 佢都未必知我係邊個. 不過今次都係前 cbw 既 re-union 既.

坐 32 號巴士送妳回家, 經過了很多完全唔知係邊道既地方.

星戰的劍法原來有七種之分. 今日午飯和其他同事講起, 原來很多人都喜歡星戰. 其實好耐之前係日記我都講過, 星戰我最感動的是第六集最後的一場, 不同種類的生物, 機械人和平在一起. 和平是最好的. 還是比較喜歡原始的東西.

開始閱讀那本 Intelligent Investor 的中譯版, 智慧型股票投資人. 這麼強勁的書名, 實在需要一點勇氣才能在街上閱讀. 在車上還是看那本 7-11 吧, 看下來這書其實也不錯的.

Music

• Anodize - 4
• The Pancakes - Stereo radio / left
• The Cranberries - The Best Of 1992-2002

十一點起身, 食完飯睇了無線播的險角. 方中信真係有型. 之後去了圖書館, 借了 Benjamin Graham 的 Intelligent Investor 中譯本及 pancake, crabressies 和 pretenders 的 cd.

馬刺似乎要將我喜愛的球隊全部殺掉, 金塊, 超音速, 對太陽已經 3-0, 真的希望太陽連勝四場踢佢走. 東岸的熱火和活塞我也喜歡, 邊隊出線無咩所謂. 最緊要唔好比馬刺第一.

晚上看星戰 ep5, 這集的雙線發展比 ep2 好很多.

寫了天邊一朵雲的感想, 但未找到喜歡的戲照.

連續兩星期長週, 並無特別痛苦, 應該是因為星期四放了假吧. 幫 jessica 攪了一陣 RSQA, 又改了一些 EDR, 之後完成了在 Ins 的 enhancement. 便走了.

番屋企食午餐, 之後再去電影中心睇天邊一朵雲, 有人係 miniforum 話睇到噴飯, 我話直頭睇到噴精, 那些色情場面絕對是 4 仔級數, 不過電影內男主角是 4 仔主角, 那些場面也真的講他在拍戲. 最印象深刻的不是片未導演, 燈光和收音一齊"輔助"一個熱到無哂反應的女人和男主角搞野, 而是一開場, av 女把西瓜放在大腳上, 男主角用手指狂插, 再將西瓜肉塞入 av 女口內, 將西瓜比喻女性陰部, 真是爆絕. 部戲其中一個搞野位係此片其實係一部歌舞片, 片中出現多次大形及小形的歌舞, 演員會無端端著哂奇裝異服係度唱歌跳舞.

去尖沙咀, 在無印看不到 monday 寫的那對用純棉製的鞋. 之後回元朗.

今晚第二度食飯慶祝阿哥生日, 今日有生日蛋糕食, angel 都上了來, 食得飽飽~

早上開隊伍進度會議, 簡直就像一場演講. 下午意圖改 EDR. 終於訂了巴黎的住宿. 唔該哂大家.

等地鐵的時侯聽著 portishead, 看見玻璃門反射的自己, 穿著整齊, 掛著籃色布袋, 髮型混亂, 就像一具行屍走肉. 好大雨, 行哂雷, 坐西鐵既時侯想起 cwk 講過佢曾經見到西鐵路軌俾閃電打中...即時勁驚.

呢幾日晚上都有彈結他, 上少了網, 看多了書, 真是好. 講 7-11 那本真的不太行, 那個日本作者的文筆真差. 看了五十多頁, 全部的風格也像文革宣傳品, 充滿口號式字句, 不斷讚揚 7-11 的管理, 將日本 7-11 的社長說得像神一樣. 很多內容也只是作出像新聞頭條式的形容, 並無任何分析及意見.

繼數天前的阿仙奴十二碼擊敗曼聯後, 今早利物浦再一次做出奇蹟, 上半場先失三球, 下半球一開始就連追三球, 再在十二碼射低 AC. 縱然可觀性不及, 但今年的利物浦的進級情況有點像舊年的決賽對伍 Monoca 和 Porto, 三隊都是在無人睇好的情況下, 爆出一次又一次的冷門. 2004 年歐洲足球先生舒夫真高射失本季最後一個最重要既十二碼, 看著一個個失落的米蘭俊男, 又想起 keyman 曾經講過足球是傷心的人比開心的人多. 本季歐洲賽事, 意甲無甚驚喜, 祖記和 ac 都是打出應有的水準, 歐洲國家杯令人有深刻印象的卡斯辛奴就像消失了一樣. 西甲有巴塞季初超強勢, 朗拿甸奴, 迪高, 古利及伊度奧打出歐洲最強的進攻. 還有好像開始回復功力的朗拿度. 英超令人意想不到, 曼聯已經沒落到全季也好像依靠傑斯一人, C朗拿度的在入球和助攻的作用之少, 是應該被棄用的. 阿仙奴在季初曾藉一班新人的超好狀態, 連勝很多場, 但之後在歐冠出局, 聯賽亦脫離一, 二位. 車仔最後都係靠一班舊領隊買落既人打得好, 但都唔可以唔計摩連奴既領導既. 利物浦成季都係越強越強, 越弱越弱, 唔到你唔服.

一路訓一個睇, 六個入波, 除左第一個外, 其他五個都係我飲水, 訓著既時侯入...踢到加時射十二碼, 爸媽都起身去開檔了.

訓醒都已經十一點, 今日要睇檔, 食完粽就落左檔口. 坐左兩個鐘, 係檔口睇埋本原氏物語. 之後去左圖書館, 一行一行咁行去搵書睇, 結果借左本"日本 7-Eleven 消費心理學", 似乎我對便利店著了迷. 另外亦借左隻 The Cranberries 既碟, 係佢地既 THE BEST OF 1992-2002 既 bonus disc, 有幾首現場, 幾好聽!

上午改了一點 teampage, 以防開會被問起進度唔知點算好. 下午會議由兩點開到五點半, 主要是講 cas 3, host team 都有參與. 聽著大部份由我做的 rcf 和 mortgage 變做 pdc 跟, 心情真的有點奇怪. 其實我覺得公司的會比我們 xdea 的會好不了多少, 只是 UR 比較實在清楚及同伴間有高低級之分, 因為 UR 出左一陣就開會, 所以覺得高層們都係無咩點睇過, 寫得好清楚都係要講一大輪.

做左就快一年, 最可惜都係唔知 host 係點樣運作, 總覺得 host 既 program 比 front end 來得有趣.

今晚睇歐冠杯決賽, AC米蘭對利物浦. 一直都覺得 AC 那個正選陣容係完美陣容, 單從球員質素看, 只有巴塞及車仔可以一較高下, 但係踢波唔係只係講球員既, 仲要睇狀態, 隊形及運氣既. 但情感上亦支持利物浦, 今年佢地既表現簡直係"想要身體好, 咪買利物浦", 即係越強越強, 越弱越弱. 越睇好 ac, 利物浦機會好似越大咁...

換了新滑鼠, 十分暢快. 今晚開快車, 完成了賣桔者言, 第二次讀張五常的書, 比起上次科學談需求, 今次明白的內容是比較多的, 對於用經濟學去解釋市場及社會現像深感興趣, 但是真的缺少經濟學的基本知識, 真的要好好充實一下這方面, 找找經濟學的入門書籍才行.

自從唔駛番學, 同埋坐車少左訓覺之後, 睇書既進度立即快左, 賣桔者言同埋原氏物語都有望本週完成. 希望可以係 7 月前睇多一至兩本書, 睇下圖書館有無" 顛覆傳統文學的天才作家"查理布考斯基 既書先得.

今個 summer 都係唔讀野, 我既大學生涯都係注定年年放長假.

坐新位, 執完野先食早餐, 勁肚餓. 上午無做野, 但睇完運程話我今日努力做野會有運行, 咁十一點四十五分就開始做野, 和 host 試 rcf.

下午繼續工作, 亦研究了利亞零售(8052)這間公司, 主要業務是香港區的 ok 便利店. 公司主席是馮國經, 董事有馮國綸, 錢果豐, 管理層能力值得信任. 業務前景亦十分良好, 本港分店數目保持增長, 普及性雖不及 7-11, 但近年藉較年青化的宣傳令形像變好, 市場能力可以信任. 澳門業務期望期望於今年內由一間開至二十間, 增長過快, 存在一定風險. 公司亦大力開拓國內市場, 廣州分店已增至二十間, 期望利用收購將分店數目在五年內加至五百間, 可以想像到需要極大量投資. 而美國 ok 便利店總公司亦有意入股利亞以控制國內市場, 成事後, 公司資金將會增加, 但亦有機會影響現任管理層的自由度. 公司現金數年連續上升, 2004 年年尾公司現金有 5.3 億元, 並無銀行借貸.

良好金錢紀綠, 管理層值得信任, 宣傳手法及優惠起碼任到我去買野, 具有國內及澳門市場開展空間. 成交量不多, 現價 2.6, 近年保持有派息. 值得注意走勢. 我對 ok 甚有好感, 亦明白公司收入來源. 1.有興趣 2.明白公司經營方式. 若根據畢菲特的投資心得, 我絕對合符投資利亞的條件.

今日問完阿宏咩係溢價後, 佢叫我寫下財經野, 我對股票真係唔多識, 最多講下覺得間公司好唔好, 但係股票買賣最重要不是公司能力, 而是睇準時機. 不論多喜歡或支持一間公司, 唔搵個好時侯買, 真係難逃做蟹. 高位買入回然慘, 買入後唔上唔落, 等十世都係升趺唔駛 1%, 水頭充足都可以當收息, 但係沽貨個陣真係手續費都多過賺到既錢.

我對金錢太小心, 咁多種投資產品, 我都係最愛儲蓄. 要投資, 我會選擇投資自己, 增進知識. 如果一定要買股票, 短期炒賣不適合我, 我好大機會會買自己工作的公司, 畢竟信人不如信己.

一早起身番大陸, 去左阿哥屋企睇炸樓, 十二點廿十分已經上左天台睇, 點知原來一點先炸, 熱到出水. 天台開頭無咩人, 後尾勁多人. 去到一點, 響左幾聲, 兩秒都唔駛, 十幾坐野就好似咸蛋超人入面的建築物咁訓低哂, 之後 d 沙塵好勁, 方圖幾十米都好似仙境入面咁.

之後去左食阿豐餃子, 炸餃超級正, 似乎我意圖試哂成個深圳既炒土豆絲, 屋企人都頂唔順, 但我真係鐘意食, 我地仲係隔離間蘭洲拉面買左三碗牛肉拉面, 超級好味, 最愛蘭洲拉面的牛肉湯, 好清.

之後行左去華強路, 上左新開既戊豐百貨, 係樓下間新開既星巴克試飲左一杯咖啡, 苦到阿媽都唔認得. 當屋企人係 d 按摩椅都訓哂既時侯, 同阿哥玩跑步機, 跳彈床和打沙包...弄傷背部, 感到好痛.

之後去左食酒樓食飯. 好食, 片皮鴨好靚. 今次北上無買碟又無買書, 過關無咩人, 幾乎係直行直過.

返屋企睇星戰, 勁正呢. 越來越覺得 darth vader 無咩腦, sith 入面都係 darth maul 最型.

番工勁早, 搭 k16 都無遲到. 又調位, 好順利咁虛渡一個早上, 和 william 食完 euro gogo 後便回家訓覺.

之後出了 cwb, 小強抽了兩隻暴力熊都中唔到豬排. 去睇 michael lau mr.shoe 展覽, 個 d 鞋仔公仔真係超級得意, 最鐘意發條橙及 miffy. 係維園都係見唔到那個賣餅阿伯. 坐電車去金鐘睇星戰.

勁正, 呢場係可樂同 milk 一齊搞既星戰特別場, 入場會俾四個白兵掃射, 之後會見到拎住可樂既黑武士同矮白兵. 重有免費可樂飲, 今次中獎真係好.

勁感動, 一開始睇, 見到 r2d2 咁鬼勁已經好感動, 呢一集真係好好睇, 空戰場面一流, 比劍場面重正. 睇完前傳一二集, 已經預左個今集故仔要連番第四集, 係劇情上必定會有缺陷, 但幸好都不太多, 最不滿的都是 yoda 及 obiwan 就咁放棄, 無端端去靜待時機, 佢地當時只係要打 darth sidious 一個 sith, 唔通兩個打一個都咁驚. jedi 被滅殺及白兵作反都甚為驚喜, 真係一陣間就死剩兩件 jedi, 算拍得幾狠.

愛情一向不是星戰的賣點, 今集也不例外. 反而 obiwan 及 anakin 的亦師亦友關係更為感動. 其實 jedi 真係幾無用, obiwan 如果狠 d 殺左 anakin, 就唔會有 darth vader. 另外 anakin 都係幾蠢, 好似好易就俾 darth sidious 欺騙咁. 不過都係為左連番 4,5,6 集, 無得好講, 只能怪第一, 二集講得慢.

今晚俾好多小動物嚇, 俾隻貓嚇到爆粗...

今日試用了 cx 的 cX__ga Poster在 xanga 開日記, 甚為有用.

kalee 對於我昨日的那個故事, 回應是 "plx have sex to stop this kind of thinking"...甚為經典. 我和 william 都只能以 "o..." 來回應.

晚上在家看有線, 又播知法犯法. 知法犯法絕對是香港近年其中一部最不為人知的好戲. 黑味十足, 曾志偉加吳彥祖的演出, 麥子善的導, 不是女人的故事. 意識上甚為大膽, 音樂燈光也很玩味. 故事整體結構不夠精密, 但在細節場口玩得很好. 絕對是近年香港黑色電影的代表作.

聽著我的血腥情人 (My Bloody Valentine) 的有時 (Sometimes)及收音機頭的無足輕重的人 (Creep) 寫日記, 甚為愉快. 想彈 Creep, 但是 intro 那些 bar chord 已經弄得食指很痛...

正在等妳的電話, 但看來妳已經發緊第二十七個夢, 就看看今晚的 nba 經典重播能夠令到我支持到甚麼時侯吧~

今日即席創作了一個集倫理, 人性, 變性, 死亡的故事. 兩位親愛的讀者都睇得一頭煙. 故事的中文版是:

John 喜歡 Mary. 但是 Mary 喜歡她的父親 Peter. 有一天, Peter 死了. Mary 很傷心, 姦了屍. 但給 John 發現了, John 看見 Mary 坐在屍體上感到很興奮, 走到他們身邊打炮. 並射了在 Peter 身上. 就在這一剎那, Peter 復活, 並對他們說 "yo, just sex~". 之後 John 發現自已原來只是發了一場夢, 現實中 John 是一個女人, Mary 是她的老公, Peter 是他的兒子. John 不能描離夢中的角色, 十分討厭現實, 所以把老公, 兒子及小狗 David 都殺了. John 去了做變性手術, 並與男醫生 David 結婚. 在 John 的蜜月期間, 一名男警員 Johnny 發現了 John 的殺人證據, 並展開調查. 但是在調查 John 的身世期間, Johnny 發現了 John 原來是自己的孖生姐妹, 原來在很小的時侯, 她們的家人和她們去了泰國旅行, 但不幸地和 Johnny 失散了, Johnny 並被當地人做了變性手術. Johnny 在得知真相後, 失去了捉 John 的決心, 他終於明白為何自己那麼喜歡在更衣室偷看其他男人, 他對於自己不是一個基佬感到十分高興. 並預約了 David 幫他做手術變回女人. 做手術的日子終於來到, Johnny 感到特別高興, 因為他終於能夠做回自己, David 亦對手術充滿信心. 但十分不幸, 在手術期間, John 推開手術室的門, 並一刀把 David 殺了, 原因是他發現了 David 有外遇. Johnny 感到十分痛苦, 因為手術只進行了一半, 他現在是一個不男不女. 而 John 亦在過後的日子亦不繼殺人. 故事亦到此完結.

希望中文版較容易明白. 真的是一個變態的故事, 都唔知點解番番下工會諗到 d 咁既野.

放工去了申請國際青年旅舍証, 那兒的員工服務態度很差呢. 最後都是沒有 book 地方訓. 之後在又一城食飯.

在 Page one 發現好書. 查理布考斯基的進去.出來.結束 (Hot Water Music). 簡直是現代廢人聖書, 有機會絕對需要拜讀. 看了四個章節, 甚為感動. 一事無成難道不是一種成就嗎? 主角小時侯已經會去藉去朋友家玩來偷看朋友母親的大腿, 然後回家打炮. 這個網頁有得試讀, 真的值得一看, 其實我們也是在過好不了多少的生活.

一首 Led Zeppelin 的 Stairway to heaven 便把我從妳家樓下的山頂星空, 送到海邊的西鐵站. 其實我是很喜歡晚上站在靜靜的街上, 冬天和夏天也是, 涼風吹過的感覺很好, 晚上空氣也好像清一點.

五月19,20,25,26,27日晚上七至九時在朗豪坊都有 jazz 樂隊表演, 有時間便去看看. 張震嶽在六月也有數個 show, 真的不能錯過.

為了清假, 請了下星期四放假, 放假為睇波...老大 eric 給了一份機密工作給我, 叫我千萬不要和其他人講, 真係驚驚. 無拎飯, 去 M 記買野食, 點知咁好彩今日魚柳飽買一送一, 連食兩個, 正! Host 終於有得試了, online 的感覺真好. 呀~ 還未睇 victor 俾我那些 mortgage 既 code 呀~

唔駛返學真係好, 放工返屋企訓覺, 睇賣桔者言, 彈結他.

mother 叫我唔好浪費那些假期, 提議我去北京 4 天團, 但係我又想下年 or 今年年尾自己先去北京, 佢又叫我去 $899 海南島四天.

聽著 radiohead 及 pulp 的炎夏晚上. 希望妳快些好番, 小心身體呀!!

好似放左好耐假咁, 其實只係三日假期, 考試後心情, 訓得少加外地親友來訪混合一起的假象. 上午還很精神, 下午便眼訓得張不開眼睛. 自從將 RCF 及 MORTGAGE 交給 PDC 們主力開發, 感到自己變得更忙. 我們的那一個 chatroom 真的是 placement 們之樂園, 鐘意可以唱下歌, 講下粗口, 今日重玩埋英文接字, 身為文盲, 我完全慘敗. 放工後在台灣野食西多士, 好像比平時好食.

晚上回家, 才知道五姨一家今晚係度食飯, 好多野食. 同康仔落街搵佢女朋友個家姐, 佢地講野好似 nicam 咁, 又中又英, 都幾搞笑. 之後便 byebye 了, 唔知幾時先會再見呢~ 希望快些吧, 康仔都好想再來香港, 又叫我去多倫多, 不過佢自己都話多倫多悶過香港好多. 其實我都有叫佢去下第 d 地方, 唔好次次都返香港.

一早就給美麗動人dep的母親及兩位阿姨嘈醒~ 之後去食日本野, 點知原本想去個間無開, 去左另一間, d 服務鬼咁差. d 野又唔好食. 真係請都唔再去. 返屋企, 同康仔玩左陣結他就去街了.

去到 apm, 見到薛凱琪, 見到條頸已經知道係佢, 真係勁. 太多人, 五分鐘後離去, 係 d 工廠度行左陣, 超級熱, 去左又一城, 行左陣又去左九龍城. 睇人踢波, 見到一個無進攻意識既肥仔前鋒. 超級大發現, 係街邊小店發現 $5 一本既 Keith Haring 既 Baby Book, d 公仔超級得意, 兩本入手, 一本黃色, 一本綠色. 食牛肉館, 正, 不過要等四十五分鐘. 之後係地茂館食糖水, 芒果豆腐花正, 甜!

Auntie 5 一家快要走了, 次次都係咁唔捨得.

九點幾就起左身, 睇左 nba 熱火對巫師, morning 最後那個封波很勁, 在經歷幾次大病和傷患, 現在能有這狀態, 可見他除了本身的能力外, 強大的恆心是更重要. 熱火勝出, 今年熱火真的很強.

午餐一大班親戚一齊係我屋企食, 和表弟去了尖沙咀, 在通利玩了很長時間, 佢彈結他真的不錯. 之後行了星光大道, 發現李連杰隻手都幾細.

會合家人, 去左流浮山食海鮮, 他們說我和表弟走寶了, 因為他們之前在海邊看了一個就像油畫般靚的日落. 回家後看曼聯對修咸頓, 修咸頓護級失敗. Keyman 在賽後說了一番說話, 意思大約係"足球呢個遊戲, 表面風光, 其實傷心既人比開心既人多. 成功既, 只係一小部份人."

似乎 keyman 在名人語錄及演講做左好多功課, 懂得係適當既時侯講一些無咩立場又盪氣回腸既說話. 起碼我用左幾行字去講佢.

零晨五點起床, 開檔. 身為一個報界人士, 我造報紙的速度真是太慢了, 完全不及收檔快, 我還是比較喜歡破壞. 八點鐘返屋企訓到十點, 睇一個鐘 tutorial, 再訓多半個鐘, 食野執野, 十二點半回校應考.

比考試時間兩點早了 45 分鐘到達, 幸好 patpat 和 mcc 也早到, 今日 city 有中學生唔知咩科學展覽, 三人進場睇童顏. 遇見一齊考試的 pauline, 但交談後失散. 在因為沒有富豪捐款而未有命名的 LT-15 考試, 鄰近的 LT-17 tutor 姐姐衣著性感, 引得 mcc 入錯課室, 我們一致認為他是去睇女仔的.

考試保持測驗風格. "This is an interesting course", 所有考生也在試卷寫上這說話. 整個考試有八十分是只要小心地跟 sample quiz 1 和 2 便可以得到. 關鍵是那廿分, 問題是關於 Oblivious Transfer, 提及 1-out-of-2 和 all-or-nothing protocol, 完全唔知係咩, 死了, 希望亂寫那些答案有分吧.

試後食了 city 公仔面, 之後在旺角行了一會便回家了. 收檔. 晚上奇幻潮的故事明顯地參考了死亡筆記.

還是在做 cas r3, 交接的工作進行了數天, mortgage 的開發已盡量交由 victor 進行. rcf 因為無咩新野做, 所以 jacky 好似做住其他野先. 今天 eric 完全沒有提過我昨天問他關於 ins 的事情, 真係唔知忘記了還是甚麼.

mother 病了, 放工便立即回家, 陪佢去睇醫生, 之後買野俾佢食, 之後收檔, 之後買野俾自己同 father 食, 好似重忙過返工. 聽朝要幫手開檔及上午睇檔, 考試當日早上五點起身勞動. 勁. 充滿危機感, a+ 有希望了.

昨晚發了一個夢, 夢見和 patpat 晚上 12 點幾去超級市場買野食, 在買咖哩雞的地方, 巧遇一名靚女超市員工, patpat 問我 "如果我而家同個女仔講, 好想同佢一齊, 你估佢肯唔肯?". 之後 leehang 和 eric 在夢中加入一齊食雞, 而 patpat 就唔知去左邊. 在 patpat 離去後, 那個靚女竟然問我地 "如果我同那個男仔講我想同佢一齊, 你估佢肯唔肯?". 之後 patpat 回來, 他們便真的一起了, 狀甚親熱, 之後我們離去, 我叫 patpat 等埋個女仔放工, 跟住 patpat 問個女仔幾時放工, 佢話早上八點, 即係重有差唔多七個鐘, 之後我們便遺下那女孩走了.

真是一個奇怪的夢.

早了起床, 遲了出門, 因為在家看電視而遲到, 這真的是一個壞習慣. 全日都在做 cas r3, eric 給了很多意見, 基本上可能連 xoops 都用唔著, 離開前問了他一些 ins 既問題, 之後發現可能係自己誤解左, 但係佢已經被我老點左去搵 host 查問, 等了一陣佢重係講緊電話, 咁唯有閃人.

飯後活動繼續是足球機, william 可以改名做球王, 實在太勁. 今天他們也說我的射門有力了, 真好, 但是還是沒有任何腳法可言. 還跟宏學習了燒雞翼式射門, 第一次使用使中場入波, 不過之後幾次再用都係變左向後射, 幸好無 own goal.

收到幾日前 bid 的 Pulp cd 了, 整晚也在聽, 目前已經聽了三次. 我的第一隻 Pulp cd, 就係 Different Class. 唱片的書仔背後寫著...

Please understand. We don't want no trouble. We just want the right to be different. That's all.

見到我聽歌, 即係知道我終於讀番書了. 還是不很明白最後個課那些 MR1 和 MR2 的意圖, 及和 paypal 有咩關係.

Malcolm 今日開始放三日假, 其實成 team 人無左佢就最大濟. 好多野都變左我或者 PDC 做. RCF 既 EDR 有野改, 文書工作, 真的很感動那些用家這麼細心睇我寫既野, 雖然份野比佢地改到五顏六色.

放工同 william 去左食三保. 再一次證明聽金屬容易入睡, 係西鐵聽 Mayhem, 訓到差 d 過站, 只是耳朵有點痛楚. 回家小睡至收檔, 今晚都係無讀書既....已經連續三日完全無讀過, 星期六便考試了, 哭.

今日是 brother 的好朋友結婚, 佢一早就去左做兄弟. 今晚我都要去飲, 咁就唯有係公司寫定日記先~ 又多一個失去自由了, 無知少女變成無知少婦. 哈!

係公司做左個新既 enhancement, 對呢類好像加一兩個 field, 對一些 field 做 validation 等的 enhancemnt, 真的是可以用機械式既心態去做, 反而對於用家那些奇怪的要求, 更加感到有趣. 中午飯後又打足球機, 這已經成為飯後最佳活動, 但我的射球還是這麼軟弱無力, 就像回傳一樣. 很想打籃球和踢波呢...

今朝一早問秘書小姐, 得知我係無得唔放假拎錢走既, 咁唯有搵幾日好日放左佢. 連埋星期六日, 都可以連放五日架, 諗起都覺得開心.

星期一番工. 呢種痛苦既感覺, 好快就會無. 早上開小組進度會議, 談了一些 crms 和 cas 下一次出街的安排, 出街的日子我都已經走了. 也談了一些我的離去及 jessica 的假期安排, 主要意思是要我盡快完成交接. 國內員工將會成為重心開發人員, 祝 HSBC 好運. 會後下午 malcolm 都承認我和 jessica 都不在的日子, 他會負責所有事情.

勁大雨, 無傘, 濕哂咁食日本野. 回去後上了十七樓看 william 影相. 下午全力將源碼放上 MKS, 這種源碼管理工具, 雖然要承認它的作用, 但絕對為開發員造成不便. 希望能順利將 RCF 及 Mortgage 交給兩位 PDC 吧.

返 City, 還是很多人. 食了 M 記的買一送一麥香雞, 正! 勁大雨, 在荃灣行了一會便回家了, 在大欖轉車站有很強烈會即將死亡的感覺, 但平安無事回家. 在樓下見到 brother 去街, 但佢行得太快, 見我唔到. 返屋企又食提子, 又食雪糕, 肥仔.

聽著 Suffocation 的 Effigy of the forgotten, 那些低音鼓及勁快的結他, 真的可能會震破我的耳朵. 近年我的聽力及視力也差了, 不再耳聰目明. 出了下年度上學期的選修科目, 很多之前選了想讀的都沒有, 都唔知之前選來做咩, 食屎吧!

十點都唔夠就起身支持姚明, 點知成隊火箭除左姚明同 T-Mac 識入波外, 全部人都唔識入波, 加埋球證又好似偏幫小牛, 打到第三節, 感覺成隊火箭都已經放棄左, 就無睇了. 反而看了亞視 nba 播放早幾年熱火和紐約之間的火爆對戰, 印像最深刻的不是球員那些好像摔角手般的身手, 而是紐約教練雲根迪抱著熱火中鋒莫寧的小腿, 意圖制止打交的場面, 他是真心為了球隊和球員的.

下午便努力讀書了, 睇了 tutorial 和昨天未睇的筆記, 看見那些 Oblivious Transfer 的應用, 真的感到有點好笑. 結果還是沒有溫習 Micropayment 那課, 因為真的不明這個題目想怎樣, 好像在說一些萬無目的的東西.

約六點多便看顧長衛的孔雀, 但係隻碟好花, 斷下斷下, 換左兩部機, 從頭睇左幾次, 戰鬥了一小時後宣怖放棄. 小睡片刻後, 便睇有線播我的父親母親. 好像完全變了大陸片的支持者.

晚上看 ac 對祖雲達斯, 很高水準呢, 攻守都很強. 再看星戰前傅第一隻既後半部份. 之後家人便回來了.

今日聽了一次 Jimi Hendrix 的 Electric Ladyland, 一次 Saturday night live, 和三次 The Velvet Underground & Nico. 首先是 Blowfish, RC5, RC4 到 AES 的 cipher, 再到 Public key 的 RSA, Diffie-Hellman, 然後是和 message authentication 有關的 MAC, Hash, MD5, SHA-1, RIPEMD-160, HMAC, 最後一堆 digital signature 和 certificates 的 protocols, 好多好多個名, 勁亂, 感覺上全部也是差不多, 真是白混.

下午睇左一個鐘檔, 條街好暗, 人和空氣也不是很好. 繼蕩女 blog 後, 再發現一個台灣人的 blog, 作者寫了對很多唱片的感覺和對他自己的影響. 能夠以完全自發性及無薪形式, 做這些對心力時間需求都不少的事, 寫的目的純為興趣, 個人認為是一個很正面的活動, 我也有寫一些電影的感想, 只是對於音樂的感想, 真的信心不大. 最大原因不是資料不足, 反而是語言所限, 以非技術純感覺層面去評論音樂, 會出現一個問題就是形容詞過度重覆, 總不能所有唱片也說"動聽", "悽美", "耐聽" 等完全主觀的形容詞吧.

讀書的速度慢了. 是因為 crypto 教既野太多, 還是只是危機感不足, 以致未有盡力?? 我想兩個也是對的, crypto 的東西實在很多及很深, 只是之前的測驗難度太低. 期待考試的難度增加, 我比較喜歡很難的考試, 這樣才能做到比一般人好, 而自己其實也不太會, 但成積卻又很好的情況.

兩點半都仲未訓, 明天早上還要起身支持姚明的火箭隊在第七場打低小牛出線!!!

今日返工, 俾 eric 簽多次修改後的 placement report. 上午做了 rcf 的 actlog, 在 acct combo 下了一些手腳, 之後試了另一個做法. 飯後打足球機, william 就 happy la, 認識了貓眼姐姐. 下午收到報稅用的糧單, jessica 和 malcolm 的反應一致, 都是驚訝自己收入之多.

回家收檔後陪 brother 買了部 mp3 機. 之後便攪了成晚, 結果連續兩日都係無溫書. 呢次真係大濟.

上網 bid 了 pulp 的 different class, 聽一隻完整的唱片, 感覺是十分好的. 正!!

返工, 真係時日無多了. 完全唔係做野, 將"等"呢一門功夫發揮到極至. RCF 等偉大既 Host 開功做野, Mortgage 等更偉大既 user 出 UR. wish list 就等決定要唔要. 而家就等悶到爆, 一個星期後就變成人地吹交貨, 真係搞笑. 其實而家未有 UR, 已經有人要我寫 EDR.

中午飯後和宏再去 10/F 遺址參觀, 就快可以成為景點. 放工回家. 看了 ac 對 psv 的比賽, 兩條人參真係好勁, 不過好可惜都係出唔到線, 決賽係 av 對利物浦, 今年利物浦真係夠哂出人意表.

一如放工後的預計, 十一點我還是未開始溫書的.

You scored as Aussie. You are Aussie! Aussie 90% Japanese 85% American 75% Chinese 70% German 65% French 60% British 45% HongKonger 45% Taiwanese 35% Singaporean 30% What will you be after reborn? created with QuizFarm.com

一起身, 口腔附近位置滿佈血跡, 牙齒形成了一塊血膜, 真係可怕, 幸好已經無再流血. 今日無昨天那麼腫了.

上午無咩點做野, 只是跟宏及william 談讀書, 看書, 善用時間的方法. 交了 placement report 和 biweekly log 給 eric, 唔知佢會唔會簽哂呢?? 中午食海南雞飯, 之後與 william 失散, 跟了阿南等人去了 12/f cbw 新址. 下午索性溫書, 我也快要考試了.

晚上回校, 天使考試, 實驗室無開, 去了圖書館溫書, 溫了差不多兩小時, 在這環境我也能專心讀書, 真的很佩服自己的定力及對學習的專注.

原本計劃考完試個星期一請假去玩, william 今朝講起先知原來個日係公眾假期, 真好. 不過我都真係夠衰, 人地試前請假溫書, 我試後請假遊玩.

這一兩天也是在聽 Japan 及 David Bowie 的歌. Japan 的 Ghost 很正, David Bowie 一首 Space Oddity, 差點以為在聽 Placebo. 聽到 The man who sold the world 的原版, 有點驚喜, 之前只是聽過 Nirvana 的番唱版本, 竟然有兩種完全無同的感覺.

番工. 整左少少 teampage, 完全唔想做野, 好多同學仔都請左假, 得番 wang, william 同我. 全日都和 william 睇一個蕩女既日記, 像極電影內的人物, 到底甚麼人才會過這種生活? 同類的問題, 遠至木子美的遺情記, 近至 AV, 我都問過.

除左東隧, hsbc canteen 都加了價, 今日和 william 二人世界食了兩餐. 回家再看牙醫, 被佢攪到勁痛, 飯都無食, 成口血, 醫生話呢一兩會不停咁流. fight club 入面好似話過飲多過一個份量既血會死, 唔知我幾時會死.

睇 nba 睇到三點幾, 韋伯最後個球三分真係無腦, 簡直係倒自己米. 訓到九點就醒左. 成日都係迷幻狀態. 溫 crypto, 成十幾課, 都唔知點溫, 放假去街, 返工又累到嘔. 係屋企迷幻到三點幾行去朗屏搭西鐵.

係南葵涌圖書館借左本 audit 書, 同埋 Japan 及 David Bowie 的唱片. 之後想去數碼港, 但去到香港站搵唔到車去, 轉去尖沙咀. 成個下午都拎住本 audit 書, 勁重.

回家聽緊 Japan 的現場唱片 Oil on canvas. 其實自好多年前已經喜歡David Sylvian的聲音, 好男人, 好滄桑

八點幾就起身...睇左陣 nba 就同屋企人去大球場睇出會, 成三十隊人, 十條龍, 勁多獅. 睇到三點鐘. 返屋企訓左陣, 讀左少少書, 之後去左接機, auntie 5 全家回港放假, 表弟唔認得我, 真傷心, 但係佢想我幫佢剪頭髮.

提早慶祝母親節, 食意大利野, 正!!! 今晚等睇 nba~

Your Birthdate: December 8

Born on the 8th day of the month, you have a special gift for business, as you can conceive and plan on a grand scale. You have good executive skills and you're a good judge of values. You should try to own your own business, because you have such a strong desire to be in control. You are generally reliable when it comes to handling money; you can be trusted in this regard. Idealistic by nature, you are never too busy to spend some time on worthwhile causes, especially if managerial support are needed. There is much potential for material success associated with this number.

What Does Your Birth Date Mean?

番工係西鐵見到阿爺, 真好. 一齊搭 k16. 係公司寫左 placement report, 再一口氣寫半年 bi-weekly log. 放工後和 patpat 在新世紀睇女, 之後和 jj, kalee 一齊食飯. 在美乎交收了早幾日 bid 的 mook 雜誌, 係等賣家既時侯勁肚痛. 之後重回新世紀食雪糕, 無厘頭地在太子入站和出站, 變了搭貴車. 看了一會婚紗展, 模特兒離哂罩. 經荃灣搭巴士返元朗, 勁訓.

睇醫生, 話我應該係牙肉發炎, 過一排就會無事. 去左搵 leelok, matt 及雞, 一齊食台灣野, 之後睇打機, 再食糖水便返家了.

連放兩日半假, 完全唔想讀書, 聽朝八點有 nba 睇, 希望起身睇到下半場 la...

無咁痛了, 但還是有點不自在. 早上寫了 RCF 的 EDR, 中午和 kalee, william 及宏在 UG 重逢, 真好. 之後重遊 10樓, 這兒有很多回憶呢, 就快要離開了. 開始做 teampage, 還是用 xoops, 不知老細們喜不喜歡. 完成了 cas 2.2 的開發, 只需數十分鐘, 但 jessica syn 了一日, 搞到佢同 malcolm 好似就快打交, 搞到我勁想笑又勁驚.

放工後和 william 去了旺角, 睇左陣電話, 用了 $33 買線插那個 4gb 的 harddisk, 都幾貴. 回家, sister 回家食飯, 飯後和 mother 買影碟. 今晚阿哥阿嫂返來.

在 google search free av movie, 可以搵到我的 movie blog. 好像經常和這些東西連上關係.

痛. 今日隊友們都很遲才回來, jessica 講左陣野就去開會, 今日佢生日, 又收花, 不過佢唔係位, 成日都收花, 唔知會唔會收到悶. 上午將 cas 連上 MKS, 因為有個 enhancement 收到錢做, 咁就要用 mks turn 野. 午飯重回 UG, 但係都係得兩個人食. 飯後不事生產, 又痛, 只好發下呆, 等放工.

放工後去了圖書館, 睡了一會, 睇了一會書. 含冰令痛楚減輕. 回家在西鐵聽著公爵的爵士樂, 還是牙痛. 有甚麼音樂可以減輕痛楚嗎? 回家想看 nba, 但有線無重播今朝個場, 亞視重播歐冠車路士對利物浦, 重正. 而家等緊睇 nba 重播陳年比賽, 公牛對爵士, 正, 重點觀看馬龍對洛文.

看來我已經忘記了考試將近.

又無返工. 食了勁大份量早餐後去看醫生. 痛足一日. 止痛藥都無效, 呢次真係The drugs don't work. 好痛, 讀書無心機, 訓覺訓唔到, 今日又無 nba 睇, 連電影台都無野好睇, 成日都係屋企呆痛.

睇左部份舊日記, 發現原來我有一樣野無變, 就係 placement 前同 placement 就快完都係咁唔想返工既. 重有係 placement 早段日子, 都會放工去街玩到 2,3 點先返屋企, 而家 8 點返屋企食飯都覺得好累, 真係老人家.

雨很大呢, 早上也淋了一點雨. 真係痛足一日. 希望聽日無事吧, 真的很無奈.

原來 linux 的核心已經快將去到 2.6.12. 我還是在用 2.4.19 呢, 真是老土, 雖然我還是不太用得著那些新的功能, 而且太強大的核心, 會令我感到很不潔, 就像 windows 一樣, 盡是一些大部人都唔會用得上既功能, 浪費資源. 近日想轉換 Window Manger, 但未有心水, 現在的 Fluxbox已經用了接近一年, 之前的 Window Maker也用了一段很長的時間, 有無人有新推介?

今日勁做 mortgage 既 summary page, 在高度隻中情況下, 一日已經差不多做完. 下午 jessica 去開會時, 收到一個 user (把聲勁似查小欣) 用 TD 的 log, 代為解決了, 很高興, 一向都好少直接聯絡 user, 這個 user 竟然 send 個 notes 來唔該我, 真係估唔到. 好似真係幫到人咁, 很高興. 可惜未能見到 cas 的 user, 因為做左成年, 最主要都係做 cas 的 retention 同 overview. 由 R2 的 card 和 nonpersonal overview, 到 R3 的 RCF, Mortgage 都可以算係由我製造 (當然有其他人幫手 la), 竟然唔捨得自己寫既 system, 真係多情.

放工買了兩件星戰 T, 很低能, 但好鐘意, $39 件. 星戰未上, 已買了不少星戰產品. 重未諗到個幾支可樂放係邊, 我而家已經轉用方法二去放水.

很多朋友們近日都不約而同地對身邊及社會的一些標準及條列表示不滿. 我相信是沒有人喜歡被規則所限制的吧. 但不得承認, 規則限制事物的同時, 亦都保護事物. 正如捉棋, 好的棋士, 最必要的條伴就是清楚規則, 清楚怎樣去利用規則. 規則如果是能夠執行公正的, 那麼, 便可以將之使用, 以令自己得益及限制敵人. 當然, 如果規則是對人不對事, 那麼便無法順從了.

標準的定立, 在自由發展市場特別重要, 要做到百花齊放及自由創作, 概念上, 標準要將限制減到最低, 但要確保產品不會傷害到顧客. 認証是標準的朋友, 某人制造了一些產物, 並通過了某團體的標準, 便可算得到該公司的認證. 得到認證, 並不代表得到該團體的推介, 感覺上很多人有這誤解, 而事實上亦很多人以這些認證作為賣點. 標準(認証)和規則的最大分別, 就是你可以不跟從標準, 但不能不守規則, 你的網頁可以不通過 w3c 的標準, 但是不能有非法內容. 坦白說, 亦沒有人會認為通過 w3c 的網頁比較好, 通過 w3c 亦似乎不能成為一個網頁的賣點. w3c 是對制成品的認証, Open Source Initiative 或 GNU 等便是對製造及發行過程的認証.

為 RCF 加入了 validation 的 logic, 開始將 RCF 的開發交給 victor, 自己專注 mortgage. 自從開始做 cas 3 後便開始無咁眼訓. 但是 teampage 還是未開始做的.

因為一首 starman, 愛上了 Ziggy Stardust時代的 David Bowie, 很動聽. 找了數首同期的歌聽. 有兩個版本的 Moonage Daydream, alternative 那個版本比較好聽.

十點幾起身, 都唔係好記得自己做過 d 咩...同時間睇左兩場 nba playoff, 塞爾特人對溜馬和帝王對超音速, 帝王的 Bibby 射極都唔入, 勁慘. 塞爾特人比以住好看, 但還是不喜歡 Walker! 支持 Miller.

食雞飯, 正. 之後睇了一課 crypto, 都唔知講咩. 上網找幫可樂放水的方法, 攪了數小時, 最後都是開左飲哂佢, 即係方法一. 睇了一些賣桔者言, 其實都重係唔係好明佢講咩.

睇了可可西里, 可惜未能專心地看, 畫面很壯觀, 人在那些環境更能表現比大自然的細小, 故事內的巡隊都很偉大. 大自然和人都是很危險.

十時起床, 打了一個電話, 真討厭. 和 father 食完午餐便去了睇檔. 一點多回家, 看了一會電視便睡了. 三點起身, 再睇檔. 順利地以一排八罐裝汽水得到四個款式的罐, 尚欠 yoda 及 darth vader. 在家嘗試以一針在罐底開一小孔, 點知在拔針時, 汽水就好像雷射鎗一樣噴出, 弄得天花板及成個頭都濕哂. 之後一路飲一路睇銀牌賽決賽.

晚上填 form 報 hall, 才發現大家的填法都唔同, 都唔知邊個錯. 真搞笑. 寫了戀愛地圖的 movie record, 次次都寫咁鬼耐. 結果今日係完全無讀過書. 賣桔者言睇左幾章都其實唔係好明. 真係浪費人生.

搞左陣 mortgage, 就去左做 rcf, 除左做 program, 重要做 prototype. 做到一半俾左 victor 做. 走火警, 勁熱. 等完走火警就等走人.

去了荃灣睇戀愛地圖. 都 ok, 李小璐好鬼靚. 靚過伊東, 中國人好野!!! 尚未找到好看的劇照, 要睇自己搵.

星戰可樂罐好型. 必入.

在網上看到 7-zip, 很 7 的名字, 聲稱比 zip 壓多 30-50%.

繼續做 mortgage 的開發. mortgage 一版有六個區域, 亦要做到動態顯示. crms uat 要加 48 個 sas acct, 決定用人手遂隻加, 比用 script 直接加入 db 可靠.

回家收檔, 新開的冷肉店, 很大, 很光. 晚上看了 magic 對 heat, 無咩睇今年 nba, 原來已經係常規賽既最後一場, 而 magic 今年是無法進入季後賽的, 真可惜, 季初 grant hill 打得那麼好.

睡前, 看了 98 年 nba 公牛對溜馬, 正, 有 佐敦, 柏賓, 米拿...重有 洛文. 一直都很欣賞洛文的打法, 很聰明, 手法怎樣不是問題, 勝利是最重要.

一早番去整 TD, 繼續開發 mortgage, 但係 user 重係有好多 requirement 未俾我地. 午飯後去了還碟. 放工後去了借張五常的賣桔者言和 03/04 地中海遊.

走堂. 回家在椅子上睡了, 沒有收檔. 晚上聽著 Frank Zappa 的 Happy Together, David Bowie 的 Starman, Leonard Cohen 的 The land of plenty, 還有 Joy Division 及 Travis 的歌.

pXtpXt 和 mXX 兩人在火車上看到好東西. 他們站在身穿低X衣服的美女前面看她心跳.

第一天在十五樓工作. 上午很專心地做 mortgage 既開發, 以這這種專心程度, 很快便可完成. 飯後做了一個搜尋頁.

下午開始 hea 下 hea 下咁做, 二點幾有一大班人在 jessica 個位學 TD, 咁多人係附近, 驚驚.

放工後去了尖沙咀學聯問國際學生証及歐洲火車証事宜. 選擇真多, 比兩難還要難. 之後回家.

在輕鐵上聽著莫札特的 k545 鋼琴獨奏, 想起有線 18 台, 魚樂無窮, 天氣報告和王精甫...人的聯想是一件很奇妙的事, 竟然由莫札特連接到王精甫. 曾經用 knowledge representation 的 semantic net 去解釋自己點解成日諗衰野, 因為衰野係腦入面形成的結點 (node) 佔有既位置太多和地位高, 所以面對大部份事情, 最快聯想到的都是衰野.

Darth Mike Movie Record在安裝 counter 後的不足兩星期, 觀看次數已經超過 400次, 令日更有高達 115 人次, yeah~ 更開心的是, 終於有人俾 comment, 有人睇已經好開心, 有人肯回應, 真係訓唔著!!! 一口氣寫埋珈琲時光, 聽著王羚柔的當我們同在一起唱片~

今日無返工. 一早去睇醫生, 該死. 在家溫日文, 寫收條, 睇獨臂刀, 睇新聞, 睇人搭掤, 睡覺.

回校測日文, 勁難, 測完, 又讀完一科, 好似咩都唔識咁, 讀左等如無讀.

在荃灣行街街, 真開心. 回家勁食.

把 lisa ono 入了機數天, 今晚終於可以聽, 隨機都差不多首首中. 好聽好聽.

睡到十一點. 寫了AV 的 movie record. 電影節網上筆記登了我的電影節 review, 即刻多左人去睇. 在家看了少林搭掤大師, 不得不佩服香港的功夫片, 可以將舊式長木椅及竹掤當兵器咁用, 重玩得得好.

還了長征, 借了 5 本旅行書. 有空便可以看了.

一邊看反日, 一邊溫日文.

點解會發生咁既事, 討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭討厭. 討厭自己.

晚上天使幫我溫日文, 唔該哂!!!

今日搬位去 15/f, 新位好可憐, 連地下 lan port 同電線插頭都無. 之前決定左 malcolm 坐我右面, jessica 坐我後面. 但今日 jessica 發現我左面個位闊些, 所以強行交換. 我搬完自己野重要幫佢搬埋. 第日一齊坐, 一定煩死我, 睇下幾時打爆部機.

放工後找了 patpat 和 eric 在旺角食韓國野. 之後返 city 睇 fyp present, 但係我最後都係無睇, 係 lab hea 左陣, 等埋天使一齊食 tea 就去打羽毛球, 打足一粒鐘, 勁累. 之後返 lab 和 kalee 及 jj 討論歐遊. 食 kfc, 回家在巴士勁訓.

還未決定住唔住 hall 好...如果住, 就好難係 grad 左之後去多次旅行. 同埋少左時間同屋企人一齊, 又無得收檔. 做左野之後就好難陪屋企人.

返工做 TD, 成日都度同 jessica 推來推去, 浪費哂 d 時間, 都叫做開左個頭做 Mortgage 既開發. 執左陣野, 其實無咩野執, 個位有好多野都唔知係邊個既.

放工後第一時間去了茘枝角談 xdea 新生意, 第一次見客, 勁想笑, 希望下次可以表現得好一點, 我想在 hsbc 最想學到既野就係對事情可以睇得長遠些, 及想多一些可能會發生的問題, 及對時間可以掌握得好一點. 轉位後無得再向某女高層偷師了, 她的講數技巧真的是一流.

之後在旺角開了 xdea 成立以來最齊人既一次. 希望我地可以做得開心, 搵多 d la.

之後係旺角無太旺的地方食 deli-f

上午完成安裝及設定 drill 機. 中午食 pizza, 勁正!!!! 下午去了 cbd 參觀新位, 位置很差, 而家個位實在太好, 唔想走. 設定了 jet form, 而家我部機終於可以 crms 同 cas 一齊出 print form, 而我亦係飯後加裝了 was 5 server, 救回我的 crms. 執左陣野, 星期六要自己搬位. 之後 set TD 俾 CRMS 做 UAT, 再上 CBD, 要用個度 D 機先可以加 user, 一條友坐係 host team 個 aip 個位做野, 勁緊張.

晚上有線播放 94 年 playoff 公牛對紐約人, 公牛第一年無左 MJ, Phil Jackson 話個年係三角戰術 (Triangle offense)發揮得最好既一年. Ewing 好勁, 動作快, 身位勁, 有中距離, 一開波就連取十分.

PHP核心開發人員Zeev Suraski將於本週六在香港開一個名為Driving PHP to the Enterprise既講座. 好似幾唔錯咁.

今日成日都係整一部機俾 malcolm 做 drill 用. 超多野要裝, 部機係 p4 3.0ghz, 但係得 256 mb ram, 慢到震, 裝完 db2, wsad 同 mks 後, 做任何動作都要等起碼幾秒. 最慘既係要 setup 個 crms dev env, 我自己部機根本都未 set 好. 遇到很多問題, 唯有向 malcolm 求助. 結果今日完全無做 cas r3 既開發.

因為遲放, 所以自己一個人返 city 食, 見到 jj 和 kalee. 遲到半小時, 訓左個半鐘, 連落堂都唔知. 上 tutor 難得地認真, 做咩咁多題問題.

今日繼續做 RCF, 差不多完工了, 只欠 host msg 和 print form. 明天開始做 mortgage 吧. 今日想到將 RCF 放入 ILS 的 package 內, 果然方便了開發.

今日要交拍賣網和簡體網的同意書, xdea 內起了很大爭論, 幸好最後也能平息風波, 我也不應常常也這麼好火氣.

放工後去圖書館借了原復生的原氏物語, 排了三條隊才借到書, 最後都係信人手借書好過用機借書. 呢本書係我睇的第二本財經書, 第一本係張五常既科學談需求, 今次這本看似無咁理論, 希望睇得明, 我係呢方面既知識簡直係零.

晚上溫了一點點日文及 crypto. 在型男索女區發現勁似公司樓下姐姐的相片.

特別介紹 yagoohoogle

又到左勁眼訓既星期一. 今日返工, 好落力咁開發 RCF, 不過自從 cas link 左 mks 後就攪到個 wsad 勁慢. 自從無得係公司 check email 後, 為左滿足 login 同 logout. 一日入 blog 同 statcounter 幾萬次, 重係 blog 度加左 d logo link 去其他網頁.

中午食完海南雞飯, 就開始肚痛. 成個下午都感到不適.

晚上日文, 勁訓.

在西鐵站和輕鐵站交界, 發呆期間想起, 還是多做一些事情吧. 很多事情也是可以做得更好. 時間不要過得太快呀, 訓少一點吧.

五點多被叫醒轉床, 返回自己張床後既第一個感覺係...屎急.

訓到九點幾, 搵左 brother 幫手剪頭髮, 個頭兩邊勁短, 中間一行同後面較長, 好似隻雞咁. 心目中理想既一行係再闊少少, 不過而家都唔錯, 勁驚返工俾人話.

之後去左深圳, 同 brother 兩個人食我最愛既蘭洲拉面, 一個牛肉拉面, 一個土豆絲炒飯, 一個大餅, 誠惠 14 元. 拉面保持一向咁正, 面條同湯都係一流, 睇住師傅當街路邊拉面, 正! 土豆絲炒飯唔係一般既炒飯, 土豆其實即係薯仔, 個炒飯其實係飯同土豆絲分開, 要自己混來食, 土豆絲很幻, 炒得很香, 比較酸, 混著飯一起食, 十分可口, 可惜比較多油. 大餅好像是從鄰店拿來的, 很大個, 分了很多小塊, 很脆, 有些胡椒味, 記得要熱食, 冷左會變硬.

之後去東門, 國內公安對今次反日可算準備十足, 雖然我們全程沒有遇見示威人士, 但街上公安明顯地比平日多很多很多, 東門附近街道, 條條都有十數個公安, 回程時在公車上更在松下電器的樓下看到起碼數十個公安及大量公安車守著.

深圳有線電線播放的香港亞洲電視, 在六點至六點廿十分, 連續播放了廿分鐘廣告.

買了兩部中國電影的碟, 分別是顧長衛的孔雀及陸川的可可西里. 都係唔知幾時會睇.

• Mozart - Piano Sonatas K333, K545, K475, K457

昨晚終於睇完長征. 不得不認同毛主席的能力之極高, 只是有些手段是比較可怕, 雖然可以相信很多事情是完全在他掌握之內. 十點幾起身, hea 了一會, 便和 mother 去了食海皇. 飯後便去街了. 看見電視內提及國內的反日行動, 令人想到很多問題.

反日的最新原因之一, 是日本修改國內教科書的歷史, 意圖美化二戰期間日本的暴行, 國內同胞及韓國人對此都極度不滿. 較令人失望, 台灣人及香港人都沒有太大反應, 台灣民進黨和日本關係好像還不錯, 國民黨會否借此反日機會, 再加強與中共的第三次合作? 個人相信中共對此次反日行動, 只會採保守方針, 完全不打壓示威已能顯示中共支持反日, 但應不會採任何強硬手段.

說到修改歷史去欺騙人民, 這可以中共的絕技, 新一代連六四是甚麼也不知道, 趙紫楊死去並沒有造成任何事件, 已可証明, 中共在國內對六四事件的作法, 只能忍著錯說是成功了.

去了 juice 睇 Eric so 的 SOLOGY-Eric So Exhibition -Stand By Me Figure Exhibition, 還是 eric so 一向的面形風格. 之後去了美華氐, 很多平 T, 但無任何入手. 之後過海, 在尖沙咀食健康晚餐, 之後再食正正雪糕. 今晚 aunt 3 來了, 我要睡 sofa.

香港國際電影節網上筆記連線的人, 希望我可以分享在 Darth Mike Movie Record 內一些電影節節目的影評, 我當然答應, 難得有人睇我寫既野.

今日寫左好多 RCF, 上午攪左好耐 mks, 但係我個 crms 都係未 run 到. 中午 malcolm 請食飯, 正!

放工後, 係 lib 借左 d cd 聽.

• Mozart - K545 - I Allegro

係 yahoo Search darthmikemovie, 竟然和 sex movie 拉上了關係. 除左操口, 仲可以講咩野.

今日係公司整了 apache, 正諗住開始整 team page 既時侯, 又俾人叫做左 crms May release 同埋 CAS R3 - RCF 和 Mortgage 先.

• Nirvana - Where did you sleep last night

"世上本無事,庸人自擾之"

差少少...差少少就可以完完全全無做過任何公司既野. 係 DarthMike Movie Record 加左個 counter 做 stat, 希望我 d review 有人睇 la. 今日試左 w3c 個  Makeup language Validator, 攪左一陣, 先順利地令這一版通過測試, 可以好似好勁咁放個 w3c logo 係度.

上 crypto, 教番之前跳左無教既 Chinese Remainder Theorem 亦即是孫子定理, 完全唔明. 訓左兩個鐘. 發放測驗卷, 比預期高了一分, tutorial 繼續唔知發生咩事. 一場朋友, 我覺得自己好應該幫 patpat 搬屋.

今日繼續聽 nirvana, 這次是 unplugged. 27 歲時, 我會在做甚麼? Jimi Hendrix, Joplin Janis, Jim Morrison 到 Kurt Cobian. 也是 27歲

"Hope I die before I get old."

昨晚睡前想了一些關於有性無愛的睇法, 但起身後唔記得哂. 今日睇電影節最後一部戲 - 珈琲時光, 點知出門口唔記得拎戲票, 要坐回頭輕鐵番屋企, 之後索性坐巴士出去尖沙咀, 坐巴士係好訓好多.

部戲基本上無故事, 只係講一個人既日常生活, 同屋企人, 朋友食下野, 飲下野, 坐下火車, 對話都唔無咩...因為坐文化中文高座, 要向下望, 更易訓著, 部野又咁悶, 所以中途都訓著左好多次.

之後係一間好似幾靚既餐廳食下午茶, 估唔到公仔面可以煮得咁難食. 原本諗住去 sta, 點知間間都係假期休息, 真係好景, 可以唔駛做. 同 jj 和 kalee 兩人商議了一些行程的事, kalee 提出了去西班牙的可能性, 真好, 西班牙和英法一樣, 都是曾經擁有很多殖民地, 但英法喜歡改變其他國家, 而西班牙感覺上則喜歡引入其他國家的特色, 所以西班牙有很濃烈的中南美洲國家的特色, 總算稍稍地同時滿足了去南美的希望.

晚上去重慶食加喱, 再次受到人堆攻擊, 幸好並未做成傷亡, 但已經夠恐佈. 食得好飽, 飲左好多野, 頂住個肚好辛苦. 勁去廁所.

今日係 kurt cobian 死忌, 全日都只是在聽 Nirvana 的 Bleach.

返工, 早上很有心機地準備了一些唔知有無用既野, 俾旅行計劃用. 又做 prototype. 攪到成個下午都好唔得聞, 都唔明點解 d 人要用 excel 整 html, 攪到 appl tips d code 咁恐怖. 在和 ng, jj, kalee 討論中, 我提出女性在經前和經期間, 性需要特別強. 得到 ng 認同. kalee 反問男仔幾時想要, jj 話 all time, 我話 365*24*60*60. 事後醒起, 經前是最危險期 (未經證實, 如有心人知道, 請告知), 和 ng 一起驚歎人體的奧妙, 在最危險的時間, 卻最想要. 對於單純的性需要, 人還只是一個為了生育的生物.

晚上進行一個關於第三者的調查, 目前只問了四人, 發現奇怪現像, 唔通我真係咁無厘頭?

01:00-02:00 寫了美蓮達與美蓮達的 review, 產行了一番對人生的感想, 請看這個.

十點起身, 一心諗住清潔下電腦房, 點知 hea 下 hea 下, 用左差唔多兩個鐘先將 d cd, vcd, 玩具, 書, 大量唔知有咩用既野搬離房間. 十二點先開始沬. 因為想快 d 沬完食飯, 所以一個鐘都唔駛就沬完. 飯後爆 hea, 三個幾鐘先將 d 野放回原位. 一個長達 6 小時的行動, 基本上是睇唔出有任何成效. 但總算做左 d 野.

由提出開始, 長達半年, 今日, 我們終於去了出機票. 尚算順利. 希望所有野都好似今日咁順利 la, 雖然我今日心情極度混亂. 不過諗起要搭飛機就覺得好痛苦.

晚上回家, 我真的很想將工作的地方搬回睡房, 我真的十分喜歡這個街影. 還有星星. 原來, 我真的十分之討厭長大.

• Joy Divison - Disorder

一早食 m 記熱香餅, 正爆. 開工第一件事就係搬番部 team server 去 jessica 個位, set 好哂佢就番到來, 真係好. 之後要做 prototype, 一個上午剛剛好做完, 星期六返工反而係最充實.

放工前一刻 kalee 找了一個好像不錯的 BA, 未 detail 睇就閃左人. 之後買左飯番屋企食, 食埋個橙, 身體感到好了很多. 在家看了頭半段的獨臂刀, 很想睇哂, 但係要出街.

去了赤柱, 食勁正西多士, 呢間野 d 西多真係正到爆, 法蘭西人未食過左都唔知呢個世界有咁正既野食. 飲左杯楊桃雪梨汁, 靚聲番哂來. 原本想去正灘, 卻去了聖士提反灣, 順道去了軍人墳場參觀, 環境真的不錯, 亦有很多人在此拍照. 之後行左陣市集, 但係今次咩都無買. 臨走等車先發現原來正灘係勁近, 不過兩個灘都係無咩人, 可能因為時侯不早和天氣不好 la...

係利舞臺睇左 av, 成部戲最唔好都係唔知點解係要提 city 同 bu 個名, 明明成部戲都無一秒鐘係 city 拍. 除此之外, 其他地方都好正, 我覺得都幾寫實既, d 人都無想像中咁衰, 好多人都成日諗 d 更衰既野, 只係會唔會實行 ja. 最唔真實都係班友仔 d friend 入面有咁多靚女, 又唔見我識到 d 咁既 friend. 個人最愛推介係扮壞人追龍 (糖版) 去引女仔注意力.

直至五月, 都唔會有得做 fei 既 stress test. 即係唔駛再做. 將 team server 機由 nt 升級到 2k, 出奇地順利, 不過之後要落好多 patch.

因為咳得太勁, 所以無法和拍賣網有關人等見面. 放工後便回家休息了. 晚上有線竟然播 1991 nba 總決賽公牛對湖人第五場, 勁正, 勁快既 Jordon, Magic Johnson, 超勁既 Pippen, Horace Grant, 仲有尚年青的 divic, ac green, 金保 等人, 但太累, 睇了半場便睡了, 勁可惜.