這是十月二十六日的日記

今日遲左起身, 都唔知做左 d 咩就無左成個上午. 去荃灣和獎門人食野, 唔該哂, 特登幫我去借書. 食左個間成日都好多人排隊既車仔面, 正~

回校, hea 等上 EN, 鬼佬話我地寫得好, 勁開心. 肥仔同心, 其利斷金. 之後再 hea 等夠鐘去慶祝 lee hang 生日, 十幾人食野要搶先有得食, 真係好玩, 仲一路食一路玩 uno, 啤牌, 波子棋, 七級朱和 killer, 成班友好似返老還童咁.

之後 lee hang 請食糖水, 食左個成座冰山咁既西爪冰, 凍到阿媽都唔認得...返完獎門人番屋企, 坐的士落荃灣, 超型, 好似拍戲咁咁個司機過前面架巴士去前一個巴士站, 等我可以上到架巴士.

七點幾起身, 繼續寫 report, 今日俾 dr. poon 睇, 呢幾日真係寫到阿媽都唔認得. 午飯前終於寫完, 執過下 d 位, 英文就無點睇. 食完飯, 訓左陣就番學, 上 EN, 都唔知講咩, 之後去搵 dr. poon, 講左份 report 寫咩, 進度和我有咩問題, 連佢都唔係好識得 pair wise independent hash function, 講講下原來和舊年在 crypto 學的 finite field 有關, 講左一粒鐘, 佢話份 report 都幾好, 不過佢就無咩時間睇, 知道我寫左咩就得, 有咩野就再搵佢.

之後和獎門人及其他 software testing 人食飯, 之後抽中阿 jack, 勁開心.

寫左黑社會個 review, 我真心想同所有未睇呢部戲既人講, 真係好好睇, 好值得睇!

yeah~

連續六個鐘做 TA, 今日無咁累, 可能因為已經習慣左. 一班學生其實真係有好多種人. 今日獎門人新 LOOK 上陣, 型爆, 好似明星咁, 好多人同佢講野, 係咪想死? 不過獎門人今日真係好勁, 又教我做 ADA 導修, 又試到自己整既 RFID 程式.

ADB 派功課, 又是一份極大部份人都 100 分的功課, 真是糖衣陷阱.

ADA 挑戰題 3 出分, 今次 ACM 人主動出擊, DP 的吸引力真大, 但係我竟然做少左一部份, 無滿分, 諗落都幾搞笑, 唔知點解個陣時諗唔起要出埋個 plan, 只係講點搵個 value.

只能怪自己之前太懶, 而家先開始做 fyp 既野, 都已經係三個星期之前叫做. 但係就拖到而家先寫. 昨晚睇 paper 及試 program 到兩點半, 終於攪清楚了 L0-sketch, 其實關鍵是 martix. 今朝八點起身開始寫, 超勁眼訓, 寫左一日, 只係寫左 count query 既做法和証明, 寫完都無執過, 還有 min query, 希望可以在星期二完成. CM sketch 真係要靠自己, 但大難題都係 hash function.

雖然好多野做, 但和妳一起是很開心的, 忙裡偷閒可以增加功作效率, 妳不用怪自己, 係我自己分配時間唔好, 成日都咁懶~

唔該獎門人幫我開日記~~~

七點幾起身, 愈來愈早. 終於開始寫 report, 其實都係未明 L-0 sketch 的做法, 問 kit 仔借 code 一看, 都仲係未明, 最後只係寫左 notation 和基本 query 做法, 甚廢, 但起碼都叫做開始左. 但係成朝都係寫左勁少.

勁開心, 獎門人終於買左個兩件衫, 我都好鍾意. 我都買左條牛仔褲, 諗起要改短就勁驚, 個人生得高 d 就好 la. 係 apm 睇黑社會, 開場先知原來幕後陣容都好勁, 譚家明剪接, 羅大佑配樂, 仲有一貫杜 sir 班底. 部戲好緊張, 好暴力. 接力傳棍好特別, 幾個配角性格都好突出, 估唔到連雀仔和猴子都出埋, 真係好睇, 個人好鍾意.

食滿記, 之後俾個雪糕姐姐調戲, 唔知點解當時咁正直連姐姐個樣都無望, 只係識得望住 d 朱古力雪糕, 獎門人後尾話我知個姐姐都幾靚女~ 真係估唔到無端端會俾靚女調.

愛兄弟, 還是愛黃金?

無用

今日獎門人仲早過我起身, 真係勁. 起身睇完報紙雜誌都已經九點幾. 改左 EN 份功課, 彈下結他, 溫下 DS 又一個上午. 真係想搵日朝早去游水, 唔做下運動真係死左都唔奇.

話說早前 mcc 借了大量 x-japan 的 live 給我, 但係我個 windows media 太 out, 有聲無畫, 而家用 56k upgrade 又要成粒鐘, 所以都係當 cd 咁聽. 分開幾日聽哂成個 last live, 拉得很長的一個音樂會, 空場和唱歌時間差不多, 有幾次都唔差 d 唔記得自己播緊野, 有畫睇一定會好很多.

回校和大師兄, sam, mcc 及 patpat 食自助下午茶. 大師兄對我地真係好好, 無論係升學或就業都俾好多意見我地. 又講好多攪笑野俾我地聽.

之後聽 seminar, 那些學生以後更加誤會我是 year 2 了.

八點幾起身, 起左 EN 個稿俾獎門人過目. 勁難寫, 少少技術都驚鬼佬睇唔明. 其實唔駛人地講, 自己都知自己英文差, 因為我的英文完全是自學, 讀聽還可以, 但係一寫就出哂事, 文法上中三程度都無. 諗番以前中學作文, 滿佈紅線, 基本上一行有多於一個文法錯誤. 只能怪自己太固執, 一直堅相良好的內容比文法重要得多, 而完全不理會文法.

難得一早咁好精神, 但係有點肚痛, 趁有心機, 做埋 ADA 功課, 今次用手寫. 之後訓到十一點半食午餐. 飯後再寫 EN, 還是有點痛, 都唔識分係胃痛定係肚痛.

回校上 EN, 真係上到想爆粗, 完全係浪費光陰既一堂, 教既野廢, 做既野廢, 學生都變埋廢.

今日臨走要妳等咁耐我都有 D 唔好意思呀~~~

晚上和獎門人討論 EN, 之後修改, 真係煩爆既一科. FYP 全無進展, report 未寫, program 未寫.

一早起身, 去獎門人屋企整機, 呢部 RFID 真係手尾長. 失敗. 睇左細個既相, 很可愛呢~ 食象山快餐店午餐, 都係咁正. 回校上 EN, 勁打 winning, 無聊既一堂. 之後傾左陣 en asg, 等待落筆. 晚上 acm training, 大師兄講足 14 題, mcc 狂做那條 dijkstra 也是失敗, 很可惜, 仲未可以請食飯.

臨走係 lab 半個鐘做左題 10141 Request for Proposal. hea 題.

一早番學做 TA, CO 教既野完全唔記得, 對住 D 學生既問題都無咩辦法, 真係有點唔好意思. 2331 情況好很多, 同樣係全無準備, 大部份 2331 既問題都可以輕易解答, 這便是兩科成積不同的分別吧.

食完野上 ADA 導修, 呢科既功課全部人都咁高分, 變相 100% 計考試, 真係刺激. 將 ADB 份功課改完又改, 要獎門人幫手改英文, 我既英文真係其差.

回家後搵了一點 ADB 和 DS. 倦極而睡.

八點起身, 解決埋條10142 Australian Voting. 今日獎門人跟埋我地一齊番大陸, 大約十一點就去到阿哥屋企, 整左陣電腦, 坐左陣一點就去食野. 之後去左一個新商場, Mixc, 呢個商場超勁, 簡直係大陸版 ifc 加又一城加 apm, 超豪華. 晚餐食拉面, 勁飽.

好開心, 好累~

最近總是設法令自己覺得自己蠢, 成為兔仔是一件很危險的事. 縱使做事的成效不大, 但多做一點, 續少成多, 這才是我應做的求生方法, 千萬不能有自以為是的念頭.

很早起床, 全靠早睡, 早上八時起床並不感到痛苦, 秋天早上的涼意更令人精神一振. 去了獎門人屋企設置 RFID, 失敗, 似乎 LAN 卡是有一點問題. 象山快餐店好食, 抵食, 正. 這個星期我和象山的關係拉近了很多.

回校 ACM 集訓, 大師兄親自睇場, 但只得三人出席, 神勇的 SAM 連做兩題, 可惜我和 MCC 一題都做不到. 回家後才完成Autofish, 這題目是純粹模擬題, 幾有趣, 我的問題是出在 input 的格式, 真的是不夠熟手. 睇波時再試另一題 10142, 但未完成.

曼聯繼續起用 CR7, 還以為今場會用 GIGGS, 上一場 giggs 加 js park 的中場進攻這麼流暢, CR7 根本不入流, 對方球員在他接球後才可以作進攻的進備, 因為他必定會傳失波或出界.

我想, 每個輕鐵乘客, 也曾經有起過殺死那些輕鐵司機的念頭吧? 生活在現代社會, 等車是一件十分平常的事, 但當你明白你等車是因為那些司機不依時開車, 車程編排有問題時, 而你每一天還是要花上起碼五分鐘的時間去等車, 你也已經拿起了那把牛肉刀吧.

不幸的我, 每天也花了和搭車時間相等的時間去等車, 即是等十分鐘去搭一架車程十分鐘的車. 而且不只是一程車, 輕鐵, 西鐵, 巴士, 等車的時間足夠把一個司機殺死及清理. 但很可惜, 永遠最想殺死的那個人, 已經坐著車離開, 可以做的, 只有在車站望著車尾說粗口, 行徑和維園阿伯絕對相同. 大好青年, 天天也被交通工具弄得滿腔怒火, 但只懂站著叫罵, 這樣的人生還有甚麼用?

今天很早起床, 讀了一點書, 下午上了很多堂, 但全都不入腦. 精神不振. 想做好多野, 要做好多野, 結果咩都無做.

借了一本名為 "The Elements Of Style" 的小書. 其實我一直也是很進取的.

昨晚看了一會 DS 書便睡了, 這科還是自修好了, 其實有邊科唔係? 九點起身, 睇完報紙後便再讀一會 DS. 係咁讀 DS, 其實係因為昨天在圖書館借了 2005 版的 textbook, 有得睇就要睇快 d. FYP 愈走愈遠, 為了要進一步理解 L-0 和 CM sketch, 搞上了 stable distribution 和 pair wise independent hash functions, 純粹數學.

昨天也借了范曉萱及林九 live, 范曉萱很正, 林海峰隻碟錄得不太好, 還借了惡童漫畫, 想不到圖書館會有, 正. 三樣都係今日還左, 見到有得借范曉萱新碟, 雖然係好耐之前已經有 mp3, 但係個封面實在太靚, 忍唔住借左. 另外亦借左本張五常, 多看書是沒有壞處的.

陪獎門人去買 mini sd, 行左一陣就買左, 希望今次呢張唔好再有咩意外. 今日開始停用了有線上網, 但尚上申請新服務, 現在正使用學校的免費 56k 上網, 感覺不錯, 可以考慮長用. 作為一個電腦人, 我想我是十分十分落後的, P3, 128MB, WIN98, 56K.

在學校協助獎門人搞了一會 RFID, 那位人兄 A 真的有點兒廢. 之後還有時間上 DS 導修, 那位型仔 TUTOR 都一個無可奈何的樣子, 真的可憐了我們.

近日聽得太多 nirvana, sex pistols...討厭自己! 討厭自己! 討厭自己! 討厭自己! 討厭自己! 無時間想有時間, 有時間就唔做野, 無得飲又想飲, 有得飲又唔飲, 做咩都係咁, 自己都唔知自己想點. 不時也有很強烈的自毀心理, 破壞及糟蹋自己去令自己心理上過得好一點, 不能出氣在別人身上, 便出在自己身上. 真的想天天去街也拿一支鐵棍, 打爆哂那些 xx 個頭, 血漿流得一地都是, 手腳還在揮動, 作為一個閒人, 都叫做死得幾有型.

整天也很低潮, 完全失敗. 為妳做一些事, 令妳笑, 這便是我今天的唯一成就.

起身之後行行企企就和家姐食飯, 之後訓左陣就去街. 去左尖沙咀睇 uniqlo, 勁多人, 要行哂大運先入到去, 無咩特別者, 好普通既普通款, 無印整體上好很多, 期待別注版吧. 再去埋 sogo, 超勁多人, 兩條友四出破壞無幫襯後離去.

番屋企食飯, 哈, 有人怪我唔介紹有咩野食, 而搞到唔敢食~ 送獎門人番屋企後回家, 獎門人給了我一個整 mp3 的軟件, 很好呢, 之前在 lab 裝那個實在太有問題, 完全不行. 現在這個很好, 睡覺前聽得很愉快.

訓左六個鐘, 八點就起身, 返去做六粒鐘 TA. 食野後便上 ADA 導修, 呢堂注堂我係勁眼訓, 次次都釣哂魚.

落 LAB 睇二十世紀少年, 漫 SOC 真係好. 上 ADB, 遲左入去, 結果我地要坐最前排. 望住 TAOYF 咁訓, 真係唔好意思. 今日教 sampling 和 histogram, 和我的 fyp 十分接近.

之後去荃灣和獎門人二家姐一家燒野食, 好多野食, 個火又靚, 正. 忻忻訓覺個樣超可愛~~

連續兩晚搭同一班 n269 返屋企.

唱k，勁慶

八點幾起身, 搵 DS, 根本就係搵笨, 完全唔知想點.

和獎門人去了睇長恨歌, 都幾好睇丫, 節奏都唔算慢. 之後返屋企做 facial, 濕哂~ 玩叮噹, 超正

晚上去 CEO 和 JJ 慶祝生日, 唱到十二點走人. 聽朝仲有九點半堂.

八點起身, 九點幾開始搵 DS, 計埋之前, 用心地睇左兩課 notes, 發現滿是廢話. 上堂講的, 全是廢話. 這樣的形容, 令我想起狂人日記, 這兒快變成廢人日記.

十點三再訓, 十一點半先起身. 早上分段睡覺似乎是我的一個奇怪習慣.

係美乎幫獎門人拿了 hubs, 回校 training. 超廢, 做極都係 run time error. tea 後散水. RTE 了接近十多次後才發現, 自己弄錯了 words[1000][50] 和 words[50][1000], 竟然犯這種錯誤, 真係低能.

七點幾就起身, 返學上 EN 補堂, 今日 AA 有新口號. "Say Goodbye to your degree". 之後釘裝了 notes, 整齊了, 最令人擔心的還是 DS. 食吉野家, 愈食愈多人. 上 ADA 又訓左半堂, 其他時間打 winning. 上埋 ADB 導修後便呆等晚上的 DS, 勁 hea.

上 DS, 條友繼續廢話. 放學後係荃灣食野, 飽飽.

睡多了, 反而早上更眼訓. 最後都係無咩準備就返去搵 dr. poon, 原本約 11:15, 但係去到重未見完 mcc, 唯有係 cs dept 呆等左半粒鐘, 之後入去都係講番我想點做, 而家有咩問題, 佢都係叫我自己諗下, 重話如果我做到 max query 就 a, 咁即係做唔到就無 a. 之後又教訓我和 mcc 的英文唔好. 重話唔理係我地以前懶, 定係人地唔識教, 現在開始都要學好英文. 十多分鐘後閃人.

同 mcc 落 lab, 與 leehang 及 jj 爆 hea. lee hang 走左之後 angel 都到達, 2:30 就去左食自助茶餐, 食物被搶情況十分勁, 慢一步都無得食. kalee 中段加入, 最後我地順利五個人俾四個人錢. 勁驚.

上 DS 導修, 到左 week 5, 都係完全唔知呢科想點. tutor 又有型, 堂堂都自問自答, 勁快完場, lecturer 勁神化, 呢次真係大濟.

昨晚錄歌, 還是很差吧, 難得妳這樣支持. 不過都真係幾好玩.

原本想今朝去游水, 但起身很累, 無去到. 改完份 proj plan 就交左. 晚上收到回覆, 終於 ok 了. dr. poon 想我現在開始寫那些算法的細節, 可以當年將來 interim report 的一部份. 偉大的 dr. poon 真是日理萬機, 原來已經諗緊 interim report. 這樣現在我便要一邊用文字, 一邊寫程式了, 雖然完全未開始做.

上 EN 導修, 上星期的 quiz 比預期高分, 大部份同學都很高分. 鬼佬真係幾搞野, 有時又好像很認真.

定期利息有 2.9%, 真是高得令人難以相信. 領匯及建行快將在港上市, 來勢強勁. 領匯依靠公屋及公屋商場租金作收入, 我一直以為公屋的運作是靠政府補助, 實在想不通公屋的租金可以怎樣造成利潤, 那些商場更是鬼影都唔多隻. 有人說機市興旺, 有助增加領匯租金收入, 但是, 大家也知道, 公屋的租金加幅是怎樣也不及私人樓的. 建行是中國國營銀行的第四位, 亦是全國銀行的第四位, 第五位是交通銀行. 從報章圖片得知, 建行分行的樣子十分老舊, 記者亦說服務不及中銀及交行. 交行有 hsbc 支持, 建行有阿爺望住. 但是將那些排名轉個角度看, 建行是四大國營銀行的最後一位, 交行是私營銀行的第一位. 當然, 在共產國家, 相信國營機構是不二法門. 但是, 當大家有選擇時, 為何還要選這種黑盒內管治的公司?

話雖如此, 兩隻股票在招股時造成熱潮, 上板時有高升幅也是必然的. 畢竟, 大家也是追風一族.

想不到妳也會錄回一首歌給我, 而且這麼快便完成. 拍上妳的歌, 無論唱功, 音樂, 錄音, 妳也比我好很多呢. 我好鐘意呀!

八點幾就起身, 又睇 nana, 做埋 ADA 功課, 彈結他.

返學上 EN, 勁 hea, "Your FYP must fail, and you is died.", 精神病.

落 lab, patpat 講得好好, 我地成日落 proj lab, 但係都未開始做 proj.

今晚 acm training 由 duncan 主持, 一小時便結束了, 今次好像大家也很專心. 之後又落 lab, 裝左 vim 和 cgywin, 扮屋企寫 program 既環境, 做左一題 acm, Cutting Diamonds, 但係我都係未做到 Base64 decoder, 都已經兩年了.

妳成日話自己眼淺, 但不防話妳知, 我係 as 眼淺 as u.

今日係第一次由 9:30-3:20 連續六小時做 TA, 超累. 第一班既 2113 得六個學生, 一個 tutor 加一個 ta 教六個學生, 完全係小班教學既極端版.

上完堂便和獎門人去食野. 之後上 ADA 導修, 超眼訓. 之後和獎門人在 proj lab 上網等食飯上堂. 上 ADB, 勁訓, 還是覺得那些東西好像大多已經係 DB 學過.

在 exam 內的 草莓 100% 終於完結了, 好像已經寫了很長時間, 這樣的結局雖然無咩特別, 但都幾好, 起碼有種令人覺得人總需要向前走的感覺. 最後真中還是和西野在一起. 講起漫畫, 隨著電影的熱潮, 加上一口氣重出漫畫的關係, 我已經很 out 地成為 nana 的 fans.

未睇但係好想睇既好戲~~~

-->長恨歌(Everlasting Regret)
-->小企鵝大長征(Emperor Journey)
-->怪誕屍新娘(Corpse Bride)
-->Nana
-->親切的金子(Sympathy for Lady Vengeance)
-->一球成名(Goal)
-->最好的時光(Three Times)

九點幾起身, 成朝都好似無咩做過野, 勁 hea. 食完午餐後做左一陣 ADA 功課, 未做完就去左街.

今日和大同們燒野食, 原本話去烏溪沙燒, 但臨時轉為去泥涌燒, wiki 竟然連泥涌都 有, 真係勁. 個場得勁少人, 但係都搵左我, angel 和 bonnie 去搵爐, 入夜後更加係完全無燈, 全場又只得返我地, 勁得人驚. 燒完野食無再去食糖食, 陪 angel 返荃灣, 之後幸運地搭到 68m, 唔駛等 n269, 仲極快地 15 分鐘返到屋企.

返日有點迷失既感覺, 完全唔知聽咩歌好, 今日聽左幾隻碟, 分別係 metalica 既黑碟和 master, beyone 十五週年. 但係還是有種不太對位的感覺.

一早起身, 諗住做 challenging problem, 但係唔識做. 又勁眼訓, 昨晚睇 nana 睇到三點, 仲 send 左一陣 sms 之訓.

中午和 angel 及 vincent 係旺角食大家食, 之後去牛棚睇 bandshow, 去到行左陣書展, 那些 band 真是不夠水準, 又唔齊又扮型...睇完 KLC 就走, 今次 KLC 班忠實 fans 無出現.

勁搞笑, 係土瓜環坐車去左 vincent 屋企樓下大排檔食飯, 之後和獎門人行去新城市行街街.

proj plan 還不被接受, dr. poon 想我寫多一點 approximate 的方法, 並指出我的 "weakest point" 是表達能力, 需要下多一點苦功在寫及講. 坦白說, 對於那些方法, sketching 我只會一點, sampling 是完全不會, 真的完全唔知點寫好.

回校上 ADA, 繼續教 graph, 係咁打 winning 和睇 paper, 無咩聽書, 不過 dijkstra 在 year 1 的 discrete math 已經學過, acm 更加係寫過好多次. 2-path 就完全唔知係咩.

上 ADB 導修, 今日回復正常上堂人數, 可以開開心心做問題, 全堂只講左兩題, taofy 和 TA 都講得好詳細, 我之前讀 DB 都唔係上佢導修, 仲記得那個姐姐係最後個幾堂話其實自己都唔知自己教緊咩...幾經典.

食野後跟 patpat 上左 HALL, 破壞一輪後離去, 上 DS, JIAJIA 勁搞野, 見到個學生好驚訝咁問點解佢會係度, 原來個個人係 twins, 個大佬之前係跟 JIAJIA 做 fyp, 而家已經 grad 左, 搞左勁耐, 條友都係廢話居多.

昨晚睇波睇到 4 點幾先訓, 今朝十點多就自動起身. 今日收到小天使女一隻, 又買左好多野, 勁開心. 係信和買左兩件 band t, 好平呀!!! 一件 nirvana, 一件 velvet underground. 買左隻叮噹超合金, 超得意好玩, 送左俾獎門人. 之後過 cwb, 陪獎門人行左好多地方都買唔到鞋, 真係可惜. 不過去左睇超巨型 adi 鞋盒. 今晚係 club 35 肥食自助餐, 勁勁飽. 之後買左隻爬柱公仔, 超型.

好好天, 圍網亦已經拆去, 一早起身好好陽光, 成日都覺得充滿活力! 再改份 project plan, 決定都係做三種 query, 亦定下了最多只支援到 4 維空間, 訂下目標較詳細既目標, 自己都覺得定左, 希望今次 dr. poon 收貨.

去左恆生取消保險, 之後去還碟, 係圖書館有個男人發哂惡, 唔肯俾附件既罰款. 午餐食潮洲粥, mama 第一次整, 正!

回校上 en, 雖然今日精神好, 但我還是勁眼訓, 完全唔知上堂做緊咩.

今個星期六有兩個長時間 band show, 第一個下午 2 點至 9 點在牛棚, 第二個下午 4 點至零晨 2 點在九展. bandshow 都攪到 2:00, 真係勁, 不過我比較想去牛棚那個, 陣容較吸引.

其實我係上星期四已經睇左青春電幻物語, 咁多日都唔記得講. 不過睇完都真係唔係好明, 又黑又亂, 下次專心 d 可能好 d. 值得一提, lily chou, 除了名字上類似我 mama 的名再加上我的姓, 她的生日亦是和我一樣的, 只是比我早三年. 不過她是一個不存在的人.

早上溫左一陣 en, 感到很混亂, 睇左半個鐘就放棄了. 整理了一會 fyp 的資料, 下午去搵傑仔. 回校測 en, 第一題係重寫一段英文, 但根本上完全唔明那段英文講咩, 之後寫 referenec 那題也很煩, 係咁改. 要寫咁多野, 真係痛苦.

同傑仔傾左陣, 大致諗到個 implementation plan, 睇過佢 d program, 要建立 l-0 sketch 似乎真係並不太難, 但是原來只要有大約 500 種 color 便會爆記憶體, 真的有點無奈.

飯後 acm, 去到 csc 先知有 lab 火警同埋可能會泄漏輻射, 所以二樓被封, acm 集訓取消. 落 lab 寫 project plan.

一早返去上堂, 今日 2331 開始要學生寫 program, 情況都幾混亂, 學生既程度差距都好大. 中午食飯 canteen 超多人, 排隊排到去電梯, 最後係 garden cafe 食左個焗薯.

上 ADA 導修, 好像 dept head 也不太肯定 scheduling 那個 greedy 是對的. 成日都流連 proj lab, 今日獎門人一齊上 ADB, 不過大家都係咁訓, 佢上左半堂就去左圖書館了. 放學就一齊走人~

一早起身, 與一班立法會議員同時間北上, 幸好完全無影響我地過關. 去到阿哥屋企, 勁大雨. 幫佢整電腦, 之後食埋野就返屋企.

回家後晚上和 angel 去睇當年相戀意中人. 感覺好似迷失東京續集. 都睇得過既.

都唔知點改 project plan 好, send 左 email 約傑仔求救. 心情幾低落.

飯後回校 ACM, 煩足一個下午都係做左題無腦題, 10365 Blocks, 今次有一題係兩年前 training 既題目, 我一直都唔知點解錯, 到而家都唔知.

晚上上 ADB 補堂, 很齊人, 教 B-TREE 和 static/dynamic hashing.

終於肯將那些四散既相入落相簿, 兩本都唔夠, 還未入歐洲那些相.

上堂前去食野, 原本陪其他人食, 結果只得我和獎門人, m 記那個炸薯塊完全唔好食. 上 ADA, 病人 a 很辛苦呢, 真可憐, 咁鬼痛, 又嘔. 幸好之後好番好多.

send 左份 project plan 俾 dr. poon 睇, 但慘被狂插. 佢插我都好既, 起碼我重有得改. 大家都想做好件事.

晚上 DS, 今次係另一位人兄教, DR. 覃, 簡稱 JIA JIA. 上堂成日冷笑, 同埋講好多題多話, 不過個樣好似好勁咁, 但係上堂始終都重係一味講 terms, 好似得個講字咁.

整天也在寫 project plan, 短短幾十字, 真係改足一日. 定那個時間表也真的幾大濟, 十二月前要寫哂所有 program, 但係要之後才可以入正題.

之前那對教師自殺時, 多份報章也節錄了一首詩, 其實件事真係幾令人傷心, 但是她愛得轟烈. "你已變心, 我是不會原諒你的, 但是我卻是只愛你一個, 你既然已經死了, 我還有甚麼理由要做人?"

"我愛你, 我以一生的呼吸, 微笑, 眼淚來愛你. 只要上帝許可, 我死後將愛你更深." - 葡萄牙情詩

昨日整的 mp3 很細聲, 真煩. 但是 The Smashing Pumpkins 愈聽愈正. 一早去 hsbc 換銀行簿, 感到自己好窮.

在 friday 見到件衫好得意, 飯後便和獎門人去睇, 點知得童裝, 勁細件, 買唔成. 回校, 又借唔到 rfid, 勁無奈.

上 en, 眼訓到爆, 下星期 quiz, 但還是一頭霧水. 還未寫 project plan, 明天不用上學, 希望可以明天寫起.

九點幾起身, 做 acm, 但做唔到. 寫左摯愛既影評. 早左返學, 得到很多人幫忙下, 終於 join 到 domain. 上 en lecture, 係咁打 winning. 之後去上 ADA 導修, 超多人. 返 lab hea 陣就去食野, 之後 acm training, 全程發夢.

去了睇摯愛, 一般吧. 食了個爆谷筒餐, 食極都食唔完. 之後去灣仔街頭書展, 但係去到收哂檔, 咩都無, 可能今日已經完左...去朗豪坊睇左場 jazz show, 超正, 包以正(結他) x Ted Lo(Keyboard) x Peter Scherr(低音大提琴) x 恭碩良(鼓), 位位都好勁, 氣氛很 high, 獎門人都覺得很正!

只睡了不足六小時, 八點多便起身去拜山. 去完灣仔去柴灣, 再返灣仔食野, 之後回家小睡了兩小時, 變相俾平時訓得更多.

之後和 angel 睇波, 利物浦對曼聯, 0:0. 出尖沙咀和大同們賞月, 買左個蛋糕慶祝 mcc 生日, hea 字當頭, 在九龍公園踢營光波踢到成身汗, 一支蠟燭都未燒完, 九公就要關門, 我地慘變企街. 又九公門口企到星光大道, 最大娛樂是在街頭雙打 winning, 但係原來成班人都唔識打機, 打十世都入唔到一球.

和 angel 先行離去, 坐的士上象山, 司機竟然完全唔識路, 幸好獎門人教到佢, 如果唔係入左沙田就笑爆咀. 坐 n269 返屋企, 超逼人, 和昨晚完全係兩回事.

今日見家長. 日間去了一會 acm training, 聽說大家今天很努力.

無驚無險, 食餐飯. 很早便上了二家姐屋企, 等齊人便食飯, 一次見咁多人, 都咪話唔驚. 不過大家都對我好好, 唔會食左我既~ 最唔好係我唔舒服, 又感冒又喉嚨痛, 不過最後都無咩事.

之後去了尖沙咀, 睇唔到戲, hea 行, 中秋無野送俾獎門人, 請左佢食餐貴雪糕, 勁豪. 清盤.

七點半就醒左, 感冒繼續打擊我的身體. 九時多再訓至十一點半, 流了一些汗, 洗澡後感覺好了一點. 飯後便回校上課. ADA 教 greedy, 無厘頭地講 coin change, 0/1 及 scheduling, 真的懷疑有無人會明白. 上 ADB 導修, taofy 及TA 好似唱雙簧咁, 幾搞笑. 之後落 proj lab 拎機, 我部機幾襯我, 編號六十七. 好多野要裝, 勁煩.

上 DS, 勁無奈, 上兩堂都係講名稱定義, 希望之後會有趣一點.

今日又有獨家美食. 正!!!

MCC 生日快樂!!!

32B. 不知道這是那位小姐的上圍杯數, 但這是我一星期也會坐數次的落山巴士. 大多數情況, 我也是從總站坐至總站, 這架巴士的班次很小, 二十至二十五分鐘才有一班, 很多時我也等到心煩氣燥, 經典場面是 a 小姐回家後洗完澡打電話給我, 但我還在她樓下等車.

在晚上的時侯, 這架落山巴士通常也是只有一位搭客, 那就是我. 聽聞如果不是有西鐵, 這條巴士線已經被取消. 既然咁少人坐又咁大架雙層熱九, 就梗係任我坐, 可以試哂所有位吧. 但好坦白, 咁鬼夜我是打死也不會一個人坐係巴士既上層, 所以已經少了一半座位可供選擇.

我想大家也很容易想到這種舊式雙層熱九的樓下設計, 從最後睇起, 一行背部熱得死人既長椅, 然後前面左右垂直兩排坐位, 之後是左右各兩行二人位, 前面便是出口及樓梯, 再前左面是一行垂直位, 右面即司機及樓梯之間是沒有坐位的. 睇完設計圖, 再講下我到底坐咩位, 最尾勁熱位我又係打死都唔會坐, 因為係落山車, 如果坐垂直位, 就等如同自己個 patpat 作對. 到最後只剩下兩行二人位, 因為好多時都係得我一個搭客, 為免司機大佬唔記得架車有人, 而被我嚇親搞到撞車, 所以我亦只會坐左面那些在他倒後鏡範圍內的坐位. 而在那兩行中, 我亦只會坐後面那行, 因為前面那行頂住隻腳, 坐得唔舒服.

原本一架這麼多座位的雙層巴士, 最後我竟然只得兩個選擇. 有時上車既時侯, 見到個位有人, 我都會唔知點算好, 混亂一輪才會求其搵個位坐.

有人歡喜有人愁, 繼東京後, 再被點名叫去台北比賽, 大致去韓國的名單已經呼之欲出. 今次大家也很努力, 去唔到想去既地方都唔好太唔開心了, 比賽時盡力吧. 我已推卻了去台北的機會.

今早睇 paper, 終於大致掌握了 colored range counting, 又搬那部 hifi 去整, 但去到竟然咩事都無, 勁玩野, 但係返到屋企又無反應...

和mother食海皇, 之後便去了尖沙咀買禮物, 終於買左發條橙, 真係好. 回校上 ds tutorial, 勁廢, 問題和答案好像唔多有關. 交 project pc 機 form, 都唔知會同咩人一齊用.

病重, 全身無力, 對任何事物都感到極大火氣.

八點幾就起身, 做左題 History Grading, 十分正路的 LCS, 無甚特別. dp 題最好就是通常都只需要寫很少 code, 而且看來很強勁. 其他時間甚 hea, 飯後去了天水圍圖書館, 電腦話有新君王論 3, 但係去到搵唔到, 食s.

返學校上 en tutor, 鬼佬其實幾搞野, 好似對個 course 咩都唔知咁, 上堂做下野, 答下問題, 咁就落堂, 仲有人係度玩 psp winning, 真係豪. 係 city lib 又係係電腦搵到本 ds 書, 但係現實搵唔到, 一日遇兩次同類事件, 真係食哂 s.

食飯同屋企人講起, 其實我地一家人真係好慳, 唔壞再整唔到都唔會買新, 睇我部電腦就知, 仲行緊 98, 又無 dc, 家中自從超任之後都無任何遊戲機, 唔係咁慳, 點可以買咁多 cd, 衫, 鞋...

星期日才從電器店取回的 hifi 又壞, 聽日真係要去踢店.

雖然今日發生左好多不幸事件, 但係我都好開心, 因為食左三件獨家美食~~~ 好好味呀!!!

好鬼 hea, 訓到九點幾, 都唔記得起身之後做過咩野, 食完飯又訓左個幾鐘, 感覺自己好像訓了很多. 去左續八達通學生身份, 輕鐵人真方便. 比 angel 早左到美乎, 去圖書館借了 suede 及 smasking pumpking 的 cd.

上 en lecture, 係咁打 mcc 部電話個賽車, 打多左幾架車及賽道. 食 tea 後落 lab 爆 hea. 等到夠鐘 acm training, 點知 duncan 遲一個鐘先到, 我地繼續 hea. 今次講下上次大家都做到個三題, 同埋幾題 dp, 都無咩特別, 我只是在看亞洲電影節 有甚麼戲好睇. 繼上次悶到爆既珈琲時光, 今次侯孝賢既最好的時光, 又係好似有 d 內容, 今次比上次更盡, 上次少對白, 今次無對白. 血與骨睇落亦好似好正! 加埋金子, b420, NaNa...似乎又係要連續幾日, 係咁睇先可以睇到咁多好戲!!

等不及明年的國際電影節了, 先來看看亞洲電影節吧!! 可能這是最後機會睇 b420 了, 幾難得係有復仇三部曲, 真係型爆, 雖然尾門親切的金子有大長今做女主角, 好似勁 leung, 但係只要睇過復仇或者原罪犯既人, 都會相信, 金子, 除左親切之外, 都應該係變態, 暴力既...

• 親切的金子
• 小人物狂想曲
• 首爾星期天
• 只愛陌生人
• 17歲的夏天
• b420

一早番工, 今日都係講番 lab 1, 勁 hea, 都無咩特別問題. 之後和 angel 及 vincent 去食 tea, 行去食野時遇見一學生, 慘被他們離棄~

午飯後在 career center 拎左信, 做 oss 都要 mpf, 真係煩爆.

上 DAA tutorial, dept head 自說自, 無驚無險. 之後行又一城, 再食 garden cafe, 係 yahoo 約左個人交換鐵人兄弟, 勁正, 一隻 money 換一隻 must, 消防員超型!!! 晚上再上 ADB, 原本想 drop 左呢科, 因為想分多 d 時間做 fyp, 但係最後都係無 drop, 因為覺得呢科好似比其他科有趣, 要 drop 都應該 drop 其他, 結果引得 mcc drop 了 DS.

今日一早阿哥返屋企執野, 係咁執係咁執, 好鬼多野, 屋企超混亂. 今次呢濟真係勁野, 全屋大執位, 搞左成個月, 而家終於接近尾聲了...

和 angel 去了 cwb 行街街, 搵唔到街鋪有得散賣幾米. 食 dinner 有得自選 cake 一件, 師弟仔既選擇換來惡評如潮, 傷心~~~

九點起身, 昨晚睡了八個多小時, 可能因為睡多了, 整個早上都無咩心機, 懶洋洋, 咩都唔想做~ 中午去了荃灣搵 angel, 有得食好味蛋糕, 正!

之後返 city, acm mock contest 3, 今日玩單打獨鬥, 有幾題幾易, 做左三題, 10215 The Largest/Smallest Box..., 10242 Fourth Point!! 及 10252 Common Permutation. 連微積分都要賣弄埋, 好快就完成了 10215, 之後用了一個較慢的方法做 10252, 因為打錯字而錯左幾次先做到, 之後在未睇清楚題目下, 又係錯幾次先做到 10242. 之後散水. 今次係最後一次 acm 比賽了, 真的希望可以做得比較好.

大執位後, 可以一邊睇波, 一邊上網了. 曼聯對曼城打比 1:1, 曼城真的進步了很多. 亨利今個星期竟然無得踢. 頂!

八點起身, 好耐無試過咁早. 十點陪 angel 返學校見 ch lee, 之後係圖書館睇報紙, 好耐無睇信報了~ 右腳腳跟忽然勁痛, 行路都好辛苦. 食 kfc, 十二點都未夠就食午餐. 之後上 cs4482, 很失望, 因為 challenging problem 的不公平制度, 對這科已經無咩興趣.

有三個鐘無野做, 去左搵地方睇求戀期, 之後食 canteen, 上 distributed system, KY LAM 個樣好似世外高人, 好鬼多野要讀呀~~

昨晚看 kit 仔那份 paper 至 2:30, 好像明白得多了. 等不及睇英格蘭對北愛便去了睡.

九時起床剛好有線重播, 北愛 1:0 打敗英格蘭. 用大勇的朗尼打左中場, 放奧雲打單箭頭, 相信是不能解釋的錯誤.

今日做裝修工人, 拆櫃, 拆床. 超多野執, 重搞到個身勁污糟, 而家個廳同房都超亂. 有排執. 電腦也搬了入睡房, 正式完結一個人有兩間房的生活.

今期 e-zone 有mcc 等人, 超勁呢, 手機程式設計比賽拎第一!

寫一個日記, 在椅子上掉了下來兩次...

起床後便完成了 10813, 原來我之前係完全解錯題. 之後試用 n^2 既方法做 10810, 結果 time limit exceed. 灰爆.

返學前去左行旺角, 係 dusty 買左一件衫同一條褲, 有獎抽, 不過要睇東 touch 先知抽咩, 但係今期檔口好快賣哂, 我都無得睇. 回校上 en tutorial, 由西人阿 paul 教, 一見到條友個樣就想笑, 好似好得意咁, 但係好悶. 落堂後印埋 notes 就走人.

雖然我睇落唔緊張, 但係其實我都幾擔心架. 今個學期仲要咁多科都好似好難. 比心機吧.

聽日既唯一一堂取消, 可以有 dayoff, 剛好今晚可以睇波. 正!

在西鐵聽 lazy line painter jane, 感覺自己好像在拍戲.

起身做 acm 10813, 好快寫完, 但係連食七個 WA, 飯後回校. 今天正式開學俾人教. 上 EN lecture, 無無謂謂一小時. 之後去左 eric 佢地個 hall, 都幾好環境. 落 lab 整 mp3, 之後去 csc 等 acm training, 臨開始前先發現隻 cd 仲係 lab 部機度, 好彩返到去仲係度.

training 之後等理 CA 人就落南山食飯, 飯後便重遇 angel 走人.

今日開學, 要返學做 TA 教人, 好鬼驚呀!!! 上兩堂 CS2331 既 tutorial, 睇見 d 小朋友, 都幾懷念當年自己讀呢一科係幾咁 hea, mcc, vincent 同 patpat 都係在呢一班認識的. 第一個星期做既野超簡單, 大致上都無咩特別問題, 平安渡過, 仲有得早放, 不過隻腳仔就企到好累.

去旺角約埋 angel, 見到叮噹列車, 不過間野食水勁深. 之後 angel 買埋 blueberry cheese cake 番元朗, 好好味!

呀~ 獎門人有好多野都唔食得呀, 真係慘~

今天才攪清楚 joy division 的發音.

今日一早起身等收床, 大約十二點送到, 之後 father mother 便返大陸, 得我一個負責執野. 張床個櫃筒勁大, 同 11.5" 高, 放到好多好多衫. 執哂 d 中學書, 相簿, 玩具盒, 雜誌, printer, 唱盤等去床下底.

廢物利用, 運用可憐既木工技巧, 將家姊張舊床既櫃筒改裝成一個上格放 cd, 下格放 dvd 既架. 對制成品很滿意.

午餐落機下冬菇亭買飯食, 勁鐘意食蒸雞飯, 同一般盅頭北茹雞飯既分別, 就係佢無冬菇, 但係有木耳, 雲耳, 紅棗, 好鬼香, 另外雞好滑, 起骨起得好乾淨, 好好食, 盛惠 12 元正. 晚餐 m 記, 今個星期日食既野同上星期既一模一樣.

blogger遊戲

blogger遊戲

我被 Lee Hang 貼中, 他被 leader 貼中

規 則: 開始遊戲的人出一個題目，在自己的Blog上寫下答案，然後把題目丟給另外五個人，在文末附上這五個人的連結，並且到這五個人的地方留言。這五個被Tag 到的人，在自己的Blog注明(並附上連結)是從哪一個Blogger那裡傳來的題目，然後寫下答案，再去貼另外五個人，如此繼續下去。

我的怪癖:
1) 經常去街食飯都意圖只用一種餐具, 如筷子, 湯匙或只用一隻左手
2) 食飯好快叫好飽, 但其實還可以食好多野再加甜品
3) 腦內經常會有數十隻 cd 想買, 但通常最後一隻都無買
4) 不喜歡和新朋友說話
5) 一日 or 幾百次屎

被我貼了的人
cwk
雞
Sam
MCC
雞坤

意圖將 cd 將做 mp3, 但係試左幾個 software 都將部機攪到 hang 哂, 最後放棄, 都係唔好挑戰部機既效能. 係咁聽 dj shadow.

無去 acm training, 計劃屋企執下野, 因為聽日有新床. 落街巧遇 cwk 及阿爺, 多謝哂請我飲野 wor. 之後回家睇愉園對晨曦, 都幾悶下.

再找了一些 joy division 既歌, 勁愛 Day of the lords. 晚上邊睇海底奇兵, 邊拆床, 再拎埋去垃圾站, 真係好市民. 錄左 streamboy, 唔知幾時會睇.

繼續九點起身. 睇完報紙及上網後再睡至食飯, 飯後肚痛. 之後去了赤柱, 見到幾條短褲都唔錯, 但係無買. 去左咁多次赤柱, 今次先知有個地方咁八間屋, 幾無厘地咁連續八間一樣樣既屋, 又食泗益西多, 真係好好食! 炸魚飽都好食.

坐左架巴士由赤柱去尖沙咀, 架車環遊港島, 勁抵坐. 行 hmv, 又係特價, 今次發現有 smiths, japan, joy division, dj shadow 既碟, 全部都係 $69, 好吸引, 真係想全部都買哂. 睇影碟, 都係搵唔到求戀期, 阿雞, 你有無求戀期既碟呀? 有就借俾我, 謝.

今日係身邊發現好多排名榜, best of xxx 等東西, 首先是上網看到最佳 50 部獨立電影, 我只看過六部. 然後是巴士上的鈴聲排行榜. 之後是在 hmv 的一大堆 best of xxx 影碟推介, 我竟然睇過接近全部既 best of gangster. 兩個人好得聞咁睇哂所有 best of xxx 有咩戲, 原來我地係每個界別都起碼有一部戲睇過. 生活上有咁多指標推介, 到底重有無自我? 最後買了 DJ Shadow 的 Endtroducing.....

返荃灣食車仔面, 正. 之後行了一間新開既碟鋪, 原來係賣大陸版, 有好多 $25 隻既 dvd live, 搵好耐發現有 Guns and Roses 和 Yngwie Malmsteen, 但係最後都無買到. 完全運桔.

在家看邊個夠我薑, 都幾耐無睇過呢類戲. 正. 唔知呢類戲叫咩名好, 總知就鏡頭剪接勁快, 好多配樂, 超多角色, 關係勁混亂, 暴力, 吸毒, 角色無腦, 有大肥佬, 有行為搞笑既黑幫, 好多刻意制造既有型動作, 超多種族歧視, 更多既係粗口, 通常結局都幾係無厘頭和忽然. 近代最重要當然係迷幻列車, 最暴力及混亂既係落水狗, 拍得較整齊又好睇既有博擊會. 夠薑四小強及危險人物都算係代表作. 港產片都有唔少, 鎗火, PTU, 知法犯法都係表表者, 知法犯法都算係近年一部好被低估既戲, 起碼都有曾志偉及吳彥祖. 當然重有大量既獨立電影及不知名電影.

講番邊個夠我薑, 原來阿雞之前已經買左碟, 早知買佢借. 戲情都幾似導演既舊作夠薑四小強, 都係好多班人, 為左搶一粒勁大粒既鑽石, 打來打去. 有咁亂, 得咁亂. 好多角色, 幸好個個都幾搞野, 都勉強咁分得清, 有型既好有型, 無厘頭既好無厘頭. 不過配樂真係好大聲, 部戲本身又細聲, 所以次次出配樂都驚一驚.

通常我睇完呢類戲都覺得特別開心. 因為覺得個個人都係無無謂謂, ON ON 居居咁.

回校 xdea 會議, 大家的進展也不錯呢, 不過我還是完全幫不上忙呢, 我係大懶蟲~ 之後 ACM 習訓, 大師兄講解功課的解法, 原來上星期六有一題 all pair shortest path 呢, 之前也不發現, 知道後便立即做, 也沒有多聽大師兄的講解了. 雖然以前已經用過 Floyd-Warshall 去做呢類題目, 而且好易寫. 但係我都錯左四次先做到, 不過我竟然做左第六快既人, 真係估唔到, 我都無刻意去加快.

之後食南山, 好耐無食南山了, vincent 也加入和 acm 一干人等一齊食飯. 飯後散水.

Angel 的家姐的小女兒今日開始要番學了, 才只有兩歲. 我當年也是兩歲多入學的. 眾生皆苦, 小妹妹從今天起進入校門, 便要讀上差不多廿年書, 之後又要做野, 又要結婚, 又要生仔, 好似咩都要理咁, 再過多 4,5 個廿年, 就老到自己叫咩名都唔記得. 從此便和訓醒就亂叫, 食飽就訓既生活講 byebye, 也難怪差不多所有小朋友第一日番學都係喊到阿媽都唔認得, 我只係想像下 bb 從此要定時起床, 已經覺得好慘.

不想長大, 又不能回到過去, 唯有令自己過得開心, 最好的方法就是令身邊的所有人也過得開心, 那麼自己都會覺得開心.

九點未夠就起身, 睇完報紙就上網, 諗到一個好簡單既方法去做 10820, 但係要 n^2 咁多 memory, gcc 都 compile 唔到, 送上 online judge 仲變埋 run time error...

獎門人到訪, 和 mother 一齊食石岡, 正~ 之後番屋企睇相, 點解我細個咁得意, 而家成個賊咁既樣?? 之後去左文化博物館同科學館, 哈, 好好玩, 玩到唔捨得走. 但係都要趕去睇戲.

去睇人細鬼壞, 勁開心, 睇到好多巴黎景我地都去過. 呢部戲絕對唔適合俾細路仔睇, 個 bb 係咁自殺, 大人又係咁攪野, 仲有好多血腥鏡頭, 不過真係幾好笑, 個爸爸咁錫個仔都真係幾感人架, 最後個下變化都幾係估佢唔到, 部戲有葛民輝配音當然係對我既最大賣點 la, 超正!!!

九點半起身!! 拎左回鄉証, 好鬼多人. 係屋企同 mother 搵左好多好舊好舊既黑膠, 都唔知係邊個剩落, 好多都好靚, 我仲鼓勵佢唔好掉.

午後上網和掌門人打牌, 掌門人勁! 終於諗到點樣用 dijkstra 去做 Lift Hopping, 結果在飯後完成, 始終都係慢過大師兄好多, 真係想知佢點做.

今日專心寫 code, 聽了 radiohead, japan 和 guns and roses 的唱片. 愈聽愈寫愈起勁~

也要開始做 xdea 了, 我好像很久沒有參與. 哈...

如果知道我以下既 vcd 既下落, 請盡快通知本人, 謝.

• 夠薑四小強
• 香港製造
• 細路祥

中午和 angel 既朋友去奧海城打波齡, 好耐無打過, 同唔識打無分別~ 之後返 city, 係 proj lab 遇見 eric, vincent, patpat, 坐左陣就走人了. 企係街聽收音機真係得意, 係咁收唔到.

又買 vcd, 青春電幻物語及邊個夠我薑, 都唔知幾時先睇得哂. 可惜買唔到發條橙.

飯後開始做 acm, 都係未諗得到10801, 不過我肯定係用 dijkstra 做, 只係未搞清楚個關係. 轉做 Not That Kind of Graph, 自己愈做愈亂, 搞左幾個鐘, 覺都唔訓住先做到. 真係樣衰.

美好的星期日. 九點多起床, 原本想再早一點, 但實在很懶~ 雖然有好多碟未睇, 但係依然在午飯前重看了一遍重慶森林, 這是我最愛的王家衛電影, 可能因為看得多了那些無咩對白內容既戲, 覺得重慶的上半段故事好看易明了, 下半段當然就愈睇愈正, 其實王家衛既戲並不是那麼難接受, 就拿重慶來說, 其實很真實生活化, 故事十分重視時間, 距離等單位.

早幾天在史丹利五的網頁看他提到在日本有人為挪威的森林裡主角走過的路寫成旅遊指南, 他亦提意寫重慶森林入面梁朝偉及王菲在半山區行過既路. 真係一個幾好既主意, 整番條王家衛電影徑, 好過放 d 掌印係地下俾人行吧. 除左重廢森林, 我都好想行下阿飛正傳,花樣年華,2046入面既街影.

下午做 acm, 難個幾題未諗到, 只係做左 Andy's First Dictionary, 太耐無寫, 咁簡單都寫左好耐. 想用 dijkstra 做 10801, 但係未諗通, 只諗到一個幾暴力既方法, 未落手, 諗多陣先. 之後睇 Annie Hall, 好搞笑, woody allen 真係好野, 可以將咁多道理講得咁好笑.

大友克洋既 Streamboy, 竟然係唔多發現有上過畫既情況下, 下個星期六係有線播, 真係打死都唔可以錯過.

獎門人親臨接送, 食完飯後立即落街迎接. 係元朗行一輪後便返 city 了, acm training, 第一次見 duncan, 今日得六人出席, 分兩隊, 與 jj 及 mcc 同隊, 他們一人做一題, 我就一題都做唔到, 呆變雪條.

回家飲靚湯後, 搵阿爺及 cwk 食飯, 食 thailand 野, 昨日睇飲食男女介紹既, 好多人, 野食上得好慢, 等位同等野食都等好耐, 阿爺要係咁食煙頂肚. 食左咖哩炒蜆, 奄列炒飯, 泰式干炒雞河. 奄列炒飯個樣好吸引, 撈埋咖哩汁好好食, 蜆無咩蜆味, 咖哩好香, 炒河都幾好食. 之後回家睇波, 睇見車仔真係幾令人擔心, 到底有咩隊可以打底佢地? 寄望曼聯吧.

回校面聖, 偉大的他, 是我的老師, 是我的 FYP 導師, 是我的雇主. 一個人的三種身份, 就像 eva 內真冶的媽媽. 其實係番去開 cs2331 的學前會, 齊集了所有 lecturer, tutor, TA, 都係講下上堂做咩咁.

和病人 A 行旺角, 去左睇波, 廣洲XX體育會對香港XX小學, 廣洲隊超勁, 有小朋友版謝拉特和小朋友版朗拿甸奴, 全隊踢得好有隊形, 香港完全頂唔順, 6:0 完場.

番荃灣食野, 病人 A 個學生聽日考琴, 好緊張呀!!!

繼續睇戲, 昨日睇 1984 年既戲, 今日再舊多 30 年, 睇黑澤明 1954 年既七俠四義, 黑白片, 片長 200 分鐘, 但係絕無冷場, 七個武士及幾位村民性格在電影早段已經很分明, 多場混戰十分緊張精采, 愈睇愈投入, 最後結局武士阿頭講自己打敗再影去墳墓, 真係型到爆, 睇完之後心情久久都未能平復, 實在係太精采了...因為今次唔係一次過睇哂, 現在勁想一口氣 200 分鐘重看一次. 看來我已經深深迷上黑澤明, 幸好佢既 dvd 而家週街都特緊價, 要買都唔難.

開始看上次ckpoon 俾我個份 paper, 睇左 Intro, 相對之前睇既, 呢份比較易明, 可能因為集中講 color ranged query 和 sketching, 聽左咁多次, 今次睇字點都易明 d.

九點幾就醒左, 真係早起! 終於都睇完天龍八部和 3000 美金環遊世界了, 成日都天陰陰, 快快手咁去圖書館, 還埋 chopin 同生命中不能承受的輕, 無咩心機去承受, 借唔到中文版既 The Intelligent Investor, 無得睇埋個尾, 但係借左英文版, 好似好勁咁.

睇完天龍八部, 開始睇戲, 今日睇黃土地, 這部陳凱歌導演, 張藝謀攝影, 何群美術, 拍於 1984 年的電影. 對白唔多, 但係主角那些堅定的眼神配合那些黃土, 黃河, 意識真係幾勁, 大量既民歌, 最後既一段舞, 都取代了對白去表現角色的內心. 女主角對新生活的決心亦令人感到甚為激動及同情. 簡單咁講, 呢部戲既對白真係幾少, 但是卻將 50年代中國人求變求新生活內心的動力.

盧巧音的新碟和趙學而的最佳位置都很好聽, 但係更愛刻意係咁玩走音既魚蛋歌. 魚蛋!!! 魚蛋~ 魚蛋!!! 魚蛋~

一早俾天拿水味臭醒, 又油油. 今日係 add/drop 日, 但係無科好 add, 下午遊中環, 食 XTC, 真係重好食過係意大利食, 香港珍品之一.

去跑馬地, 終於都食到新昌明既炸魚皮, 果然係好鬼脆, 正!! 係黃泥涌圖書館借左 Led Zeppelin, Japan 既碟. 坐電車去灣仔再坐船過尖沙咀.

行尖沙咀, 咩都無買, 食芝士公仔面, 好味道.

係咁睇天龍八部, 還有三節便睇完, 真的覺得自己完成了一件大事.

下午大廈外層油油, 臭到死, 落左檔口避難, 順便睇 exam. 以前好想做 TA, 而家一做便是兩科, 多到爆左學校既工時上限, 要其他人幫手就時間, 真係唔好意思.

早前借了夏韶聲的精選 CD, 好正, 最愛"路中情"及"結他低泣時", 原來佢 D 歌真係幾好聽. 可惜唱片沒有寫樂手是誰, 幾首歌的結他都好爽勁.

blogspot 之死, 我已經有幾天不能上去了, 但是 blogger 卻能順利登入及出 post.

八點半起身, 先去 auntie 3 屋企, 再去拜山. 係咁落雨呀~~

之後會合病人 A, 係時代由底行到頂再行番落底, 下午茶當午餐, 肥. 去中央, 借唔到 Motorcycle diaries, 但係借到 Alberto Granado 既 Travelling with Che Guevara. 借到天龍八部喇~~好野.

話說 Che Guevara 係佢仲未係 Che 既學生年代, 曾經與比他年長數年的朋友 Alberto Granado, 由南美最南既家鄉阿根廷, 坐電單車由南往北, 經智利, 祕魯, 哥倫比亞, 到達委內瑞拉, 歷時七個月. 就是這段經歷, 令 Che 見識到革命比醫學更能救人, 所以放棄原本的準醫生, 而將一生投入了南美多國的革命. 聽落同我們的國父甚為相似. 而 Motorcycle diaries 就是 Che 當時旅行的日記, 而 Travelling with Che Guevara 就是 Alberto Granado 後來所出版的旅行日記. 電影哲古華拉少年日記便是結集兩本書的內容而拍成.

講起旅行日記, 其實係今次歐洲之旅既途中, 我係有寫既, 只係未整理及打出來. 各位如果睇完相都唔知我去左邊, 都唔好期望睇完個日記會知道, 因為個日記都幾係簡單, 而且廢話為主. 再者就算知道我那天去了邊, 再加埋 d 相, 都未必配對到. 不過我總係會打既...只係唔知幾時打完.

看英超重頭戲, 阿仙奴對車路士, 車路士擺出全攻型陣容, 阿仙奴就無咩人好出, 來來去去都係個幾個. 不過車路士一班剛踢完國際賽既正選都好似廢廢地, 但係阿仙奴都唔好得好多, 亨利都係唔好再做隊長了, 咁唔獨食係無用架, 最慘就係心愛既龍格寶一早就傷出, 阿仙奴前場變到得個"踢"字. 車仔大把人, 下半場換三個黑人, 睇見胡禮菲納斯就諗起孫繼海, 真係神傷. 新買既艾辛落場係除左隻鞋係紅色外, 一堆人既時侯同馬基利尼, 胡禮菲納斯都幾難分. 最得人驚係杜奧巴, 上次對阿仙奴入兩球, 好似天意注定咁, 今場無厘頭咁又係靠佢, 仲懶型咁, 真係想打爆佢個頭. 可憐阿仙奴真係得個踢字, 又唔知點解唔出伯金, 最後換個費明尼入場都唔知為咩, 不過新買既希比都打得幾好. 最後 1:0 完場.

好 hea 既一日, 上 yahoo 打牌. 放好 d 公仔, 氣勢強勁.

晚上原本話同班長食飯, 點知佢要十點幾先返到香港, 唯有我地自己食. 食完日本野就返屋企睇波.

呀, 借唔到天龍八部第五期, 好似無左精神支柱咁.

今日去左天水圍, 好似好耐無去過, 鬼咁多條輕鐵線, 都唔知坐邊架好.

借左本"廣東行知書", 放了很多歐遊相片上網, 想睇便問我取 link 吧. 和 mother 去訂了兩張床, 在大變身後, 我將由兩間房變成一間房, 好多野要執呀!!!

晚上和班長談起北上旅行, 講到兩個都好想去咁~ 佢去過北京了, 我好想去呀, 中國人, 一定要去!! 我要係天安門同毛主席合照.

昨晚睇三場國際友誼波, 車仔人馬分散各隊, 勁. 下午在家執野, 好多野呀~~~

今日返 city 學琴, 好難呀, 都幾好玩呀. 唔練習多一點係唔會學得識架...之後打波, 好累呀, 食左個西多, 蛋撻和一杯可樂, 見到有些新生在 O-Day, 呀, 覺得自己好老了.

去 apm 睇 Devilrobot 展覽, 好多豆付仔, 牛角頭呀!!! 係 quilsliver 同無印都見到條黑色長褲幾唔錯, 特價左之後都唔算太貴, 不過都無買, 但係之後係 u-right 買左條 $45 既啡色長褲. 哈.

昨晚係 openrice 見到係觀塘有間印尼餐廳好似幾正, 但係搵左好耐都搵唔到, 結果要打電話問間餐廳位置係邊, 原來是在後街, 唔怪得搵唔到. 終於去到呢間華苑印尼餐廳, 叫左加多加多飯卷, 梭多雞湯飯, 雜綿油炸小食, 飲青 07和 0雜. 飯卷好得意, 加埋加多加多, 好好食. 梭多雞湯酸酸地, 送飯一流, 雜綿有春卷, 薯仔牛肉飯及網上好多人話正既粟米餅, 粟米餅真係好多粟米, 不過好黏牙. 兩個人食得勁飽咁走.

係荃灣終於買左教父. 正!!!

今日繼續執野, 和 mother 一起掉左好多野, 哈, 原來我有好多件外套.

偉大的購物之神, 雖然我已經擁有超過二十件 t-shirt 及十多件外套, 但請容許我繼續在街頭巷尾, 發現大量精美特價貨品.

借了天龍八部第四期, 說來慚愧, 我再一次拜讀米蘭昆德拉的生命中不能承受的輕, 不知今次能承受多久...

yahoo 英超又再開始了~ 買完亨利之後咩人都買唔到~ 幾經辛苦先買齊一隊.

今日送新櫃及書檯來, 十點幾打來話十一至十二點送, 攪到我要即刻起身執野, 點知都係成一點先到. angel 到來幫手清潔公仔, 同埋俾相我睇~ 之後都係執下衫咁, 食埋飯就搵車河.

訓到十二點幾. 朝朝都咁遲起身, 唔怪得晚晚都訓唔到. 煮左個茄蛋公仔面, 不過那些是經歷歐遊回來的完全粉狀公仔面, 夾都夾唔到.

聽日有新櫃送到, 大執房及清潔, 攪了數小時, 將房內的很多東西都放了在廳. 繼續狂睇天龍八部, 明天可能已經睇完第三期. 星期二去借第四期吧. 數天前, 在圖書館借了 "3000 美金, 我環遊了世界", 這書也成了我回港後的讀物. 在書的頭數節, 主要是講作者怎樣從失戀和留學引起環遊世界, 及平日生活怎樣得到能夠平價而高質地環遊世界, 他說自己去到任何地方, 也會買當地的報章, 一來可了解當地文化, 二來可得到最新的特價資訊, 聽來也很有道理. 到進入開始旅程, 發覺這 3000 美金, 大約 2 萬 5 港元, 也幾搵笨. 首先, 他是只計長程交通費(火車,飛機)及住宿費, 當地交通, 入場費及飲食是唔計的. 再者, 他的機票價錢是令人難以相信的, 雖然他開章明義已說自己強項是找平貨, 但總不至於可以經常找到平至港幣 100 的機票吧...就待我引用部份例子吧, 信也好, 不信也不能做甚麼.

• 法蘭克福至斯德哥爾摩 2.51 歐元
• 布魯塞爾至倫敦 0.01 歐元
• 倫敦至薩爾斯堡 2 英鎊
• 法羅至倫敦 14.19 歐元
• 倫敦至雅典 11.99 英鎊
• 日內瓦至尼斯 15 瑞士法朗

希望有朝一日, 我也能學到這種神技, 一半也好. 試幻想用 $70 坐飛機去上海, 幾咁值得自豪.

如果只計火車, 飛機及住宿, 我想我們也能出一本 "1600 美金, 我環遊了中南西歐".

九點半起身, 約左 dr.poon 十一點. 準時返到 city, 第一句就問我係咪無做過任何關於 fyp 既野, 咁我見你問得咁直, 我梗係坦白話無 la, 佢都預左我係咁答. 事綠傑仔, 佢和一位 RA 度了一個 algorithm 去做 color ranged queries, 係 big O 上睇就係比現成既所有都好, 但係就唔知係實際應用上係點, 即係驚 big O 個 constant 勁大, 咁就想我試下係咪真係用到.

之後佢講左一輪 range queries 既歷史, 及有 color 和 color 在 1-d 上既做法. 和大約講了推廣至多維的方法. 講到十二點半佢另外有約, 咁我就閃人了. 佢就俾左佢地寫緊個份 paper 我番去睇下明唔明.

搵番 angel 食 lunch, 飽飽. 回家小睡, 晚上去 fat boy chan 屋企燒野食, 早段勁大風大雷大雨, 不過我地都係咁樣燒. 十二點幾番到屋企. 晚上又訓唔到, 睇天龍八部至差不多四點, 開學前睇哂似乎是可行的.

完全忘記了今天做過甚麼

繼續時差影響, 昨晚睇利物浦對索非亞中央陸軍到四點幾先訓, 謝拉特好勁, 無入波都有三個助攻. 訓到十點半起身.

終於上到網, mcc 覆左 dr. poon, 報錯料, 話我 18 號先番香港. 勁開心, 大師兄搵我, 林晨同 MCC 做 TA 教 CS2113, 有錢又好玩.

去食 M 記, 恨左好耐既一餐, 歐洲 M 記超貴, 一個包都要起碼二十. 之後陪人買書, 抽鐵人兄弟, 竟然連中兩隻同款, 有無人肯同我換呀?? 睇朱古力獎門人, 內容簡單, 大派頭, 睇得開心, 今次我無訓著, 不過有人勁訓.

之後過太子食 BB 任食, 近排食量大減, 一個鐘已經頂唔順. 返屋企坐車有得睇天龍八部, 唔該哂!!!

昨晚睇雜誌至四時才睡, 十二時起床和 father 食面. 去還書, 想借書, 但係無帶圖書証, 無得借. 係檔口拎左一大堆漫畫番屋企睇, 正!!

開左支莫札特小提琴朱古力食, 個盒尚算完好, 不過有 d 朱古力味, 要吹下先得. 回復一日睇三份報紙.

有線全日上唔到網, 睇電視又花, 打電話去問, 條友話呢區有問題, 要等維修, 話晚上九點後可以試下整好未, 結果是唔得.

坐左十二個鐘, 下午五點幾終於番到香港. 返到檔口仲趕得及推車仔. 係咁執野, 其實都唔係好多野, 因為無咩手信, 中大同, 真係唔好意思, 我無寄名信片俾你地.

dr. poon 好似知道我今日番香港咁 sent email 搵我同 mcc 講 fyp, 不過 mcc, vincent, patpat 同 eric 都失左縱, 唔知係咪去左旅行...

晚上受時差影響, 完全係勁精神, 難以入睡.

今日就出發了, 了無牽掛似乎都係無可能係我身上出現, father, mother, 家姐阿哥, 親友們, 大同中同, 檔口, 樣樣都好擔心, 好緊張.

哈, 咁都幾好, 起碼我好清楚知道, 我唔係只得一個人. 身邊重有好多對我好重要既人.

I will be back.

起身和 mother 食早餐, 還埋 d 書, 借左本西歐遊. 買左把縮骨遮. 之後返左 city 開茶會, 聽日就出發 la~ 晚上在家執野, 好多好多野呀, 超級重.

都從未試過離開屋企咁多日, 希望所有人都平安無事吧!!!!

沒有番工也十多天了, 實在是很好的生活, 別人看我很無謂, 我倒覺得很充實. 九點多起床, 看兩份或以上的報紙, 從頭版, 財經, 副刊, 體育到求職. 東方, 蘋果, 明報及經濟也是準讀物, 視乎銷售情況吧, 可惜是沒有了信報. 看雜誌卻不及看報紙那樣專心了, Milk 及東 touch 的水準也好像差了, 飲食男女介紹國內藝術反而不錯, 但專欄卻好像失色了. 旅行的準備也不錯吧, 之前計劃時反比現在實行來得緊張, 反正打到來也管不了太多了, 緊張也沒用, 就好像一般人喜歡考試一樣的道理.

在荃灣行左陣, 係宜家見到張書檯同我心水都幾接近, 又幾平, 但係我已經叫左人做了, 唯有希望料靚保數吧.

睇左幾個月股票, 還是未找到好的入手時間, 搵到好的公司, 又覺得價位高. 搵質優股票, 低買高賣, 作長線投資, 真的不是一件易事. 緊守信念, 總是有機會的.

剛寫了一些內地及本地的文化事, 還是有文化比較好.

看了一些天龍八部, 似乎要在出發前睇完第二期也真是幾高難度. 兩餐都是在屋企煮燒鴨死仔面, 整理了去旅行的物件, 也差不多了. 也寫下了一些在巴塞隆拿的主要景點, 雖然書無講, 從相及地圖睇, 那兒也是以建築物為主, 甚為密集, 週圍都是高第及米羅的作品.

正在聽不設劃位, 好耐無聽過了~~~

便利的飲食男女介紹了上海兩個新的藝術村落, 忽週的飲食男女又介紹了一個在廣州的藝術倉庫. 既然之前提過上海的那兩個, 那便講埋廣洲的這個吧. 因為有大量親戚住在廣洲, 所以自小都經常上廣州, 近年小了番去, 印像卻好不了, 可以說得上比香港更多人和更臭.

這間 Park 19, 位於江南大道中江南東路, 就像其他藝術村, 也是大及近. 前身是工廠, 當然大. 近是因為鄰近廣州美術學院. 雜誌介紹了三位藝術工作者, 還不錯呢, 有名的和新晉的混在一起.

看了三個內地的藝術村, 雖然都無講那些藝術工作者怎樣維生, 但若有一個地方, 租金平, 可自由放置作品, 賣一些作品, 接一些工作, 相信是足夠生活的. 在香港, 其實除了牛棚, 其實, 在火炭也有一個類似的藝術空間, 印像中是中大的一些藝術系師生, 租了一些工廠單位作工作室, 但詳情實在是唔記得了. 在網上找了一會, 原來政府打算將長沙灣工廠大廈打造為創意藝術村, 如果成事倒也不錯, 最好是有一些空間可以搞音樂會.

對於內地的藝術發展, 大家都可能以為很落後, 但是畢竟大陸地大人多, 好像甚麼事情也十分有發展空間, 特別是開放後第一代, 不會有前人的影子, 因為根本沒有前人, 甚麼也可以亂來. 單看簡體字書籍的種類及數量同樣多已可知道那種發狂地發展的動力, 從最古老及重要的外藉翻譯書, 到每星期也有大量新出版的國內攝影, 旅行, 歷史等書籍, 再看北京, 上海, 廣洲等地已發展出自身風格的藝術部落. 文化這東西假不了, 是由內的根, 到外的實驗. 祖國, 似乎真正的從內部發展出來.

無番工咁多日, 無論幾點訓, 日日都係訓 7 個鐘就自動起身, 好似有個鐘係自己個身入面咁. 開始執野, 雖然個人物件比較少, 但都係好多野呀...

下午番 city 影印左一些証件, 之後借了隻 dvd 睇, 一個睇一個諗去西班牙玩咩, 哈, 搵到一個聲稱係全歐洲最大既菜市場.

約 埋 vincent 去睇 bandshow, LIVEHOUSE 3週年3連GIG, 個場 d 聲好差呀, 聽到耳仔都頭三隊 band Soon, Sensation, 周口店都係好鬼悶, blackwine 又只係玩個四首, d 音量實在太大, 個場又細. 最後一隊 Infinity 之前未聽過, 開場前 set 左半粒鐘野, 玩技術野, 都唔錯既, 不過已經企到好累了, 耳仔又痛. 講開又講, 個場係工廠入面, 開場前我地三個都搵左一輪, 個度又大又似迷宮, 都幾得人驚.

一早起身便去了中銀開戶口, 網上預約左都要攪成粒鐘, 發生靈異事件, 職員話我而家個簽名同以前唔同左, 要我開本新既存摺, 呢樣野當然無問題, 又唔駛俾錢, 但係奇在我一星期前先用呢個簽名提左 euro 700, 唔通個日個名又無錯??

去了做櫃及檯, 好貴呀, 諗起遲下要執野就好好煩 la~~~

同 mother 行百佳, 又買左 d 餅, 之後拎埋火車證.

呢幾日元朗成日都好大雨呀, 又大風好大雨, 真係得人驚.

八點左右就起身, 睇完報紙又訓番. 中午食永年, 我都係唔食辣比較好. 哈. 之後過埋錢比 jj 就番左屋企, 勁大雨, 係屋企睇當碧咸遇上奧雲, 都唔係好知講咩野, 燈光, 人同音樂都好亂.

買左歐洲青年二等廿一日火車証, 又無左幾千, 仲有幾日就出發了.

發現一個好靚好舒服既地方, 成日經過都唔知原來個度晚上係咁靚.

mother 一早又呵又嘔, 所以我八點未夠就醒左了, 之後重派埋報紙. 求神拜佛都要 father 同 mother 係我去旅行期間唔好有咩病痛呀, 唔係另一個就好辛苦了. 下午都睇左一個鐘檔.

今日去左 5 次圖書館, 諗住去流動圖書館換左 d 書, 因為流動可以借較長時間, 但係好可惜, 有 d 書係電腦查到個架流動圖書館有, 但係會有可能無放上架車度. 結果我就無左本西歐遊同埋智慧型. 係石蔭食左個早午合一餐, 之後行左陣就坐巴士去荃灣, 俾九巴搵笨. 妳唔駛怪自己帶我行大運呢, 我平時都帶得妳多...哈...

寫左老友狗狗, 寫左好耐呀~

今日做左一些 xdea sigema 既野, 很呆很煩的工作, 唔想用腦就最好做呢類工作.

又被罰錢了, 幸好只是一天. 屋企已經俾我攪到超級亂了!!! 成地都係書, 卓面放滿旅行用品, 單, 雜誌.

今期飲食男女介紹了上海兩個新的藝術村落, 建國中路 8 號和莫干山路 50 號. 用村落去形容好像有點太誇張, 其實主要是一個地方, 有很多不同類形及新晉藝術家攪展覽及創作的工作室. 兩個地方也是改建舊工廠而成, 所以空間很大, 可以作不同形式的展覽. 看見這些, 便想起香港的油街, 有幸在認識至關閉這段短短的時間有去過睇 "2 打 6" 的展覽. 之後的牛棚, 就未去過, 雖然有幾次個度攪書展同賣物會都想去, 有點唔好意思講, 不過我真係唔識點去, 但是人們對牛棚的評價真的比油街差很多, 可能是失去了才會珍惜的道理吧. 縱然沒有任何藝術天份, 但希望本地藝術有好的發展吧. 西九還是算吧, 那根本不是這回事, 一流的足球場並不能培養出一流的足球員.

好鬼熱. 去左唱k. 之後去旺角買袋, 買左條 $18 既皮帶, 宣佈清盤.

九點起身, 睇天龍八部. 十一點出門口. 我支持妳呀, 唔駛擔心. 番 city 打波, 出埋單腳精神步法及入樽式扣殺都係無用, 唔通網球王子入面既招式唔可以打羽毛球用, 定係我未學得到家??

去會展睇老友狗狗的優先場, 部戲既手法都幾特別, 一路都相安無事, 點知最後個幾分鐘出哂事, 一個細路女加一隻狗, 一段第一人身的獨白再加一段第一狗身的獨白, 慘到爆, 真係喊到豬頭咁樣. 最大濟係部戲就咁散場開燈, 喊到聲都沙埋, 又會展行到去太源街都重想喊.

玩唔成跳樓機, 唯有搭下合和電梯, 手汗都出埋. 食潮園. 再去銅鑼灣行街街. 係荃灣買左當碧咸遇上奧雲的 vcd. 又多一隻未睇既碟.

做了實習生整整一年, 除了那些經驗及友情外, 說得實際點, 總得來個金錢上的總結吧. 月薪七千, 給了屋企二千, 電話及本年度學費的分期一千, 強積金三百五十大元, 每個月實際可用既有 $3650, 生日大哂, 支出最多的是十二月, 幸好其他月份尚算節儉. 一年總計, 從工作上, 共儲得 $23475.25, 平均一個月儲到 $1956, 自問對得住天地良心了.

一年來那張西鐵全月通也真的為我省了不少, $300 俾我個個月都坐 50-60 次, 不過今個月開始西鐵全月通已經成為八達通內的一個功能了, 以後都無獨立一張西鐵飛了.

換多 300 歐羅, 中銀賣出 9.32, 比上次在永隆買旅行支票足足少了 0.235, 借用財經版的名詞, 在帳面上, 我的身家已經蒸發了起碼 $235, 還未計手續費及只用了賣出價計算.

下午去了美孚借了天龍八部第二期, 之後在荃灣行, 在愉景新城有魔術睇, 拿了國際學生証信用卡. 張相好似俾人整扁左咁, 又變光左, 好樣衰.

七月了, 重有兩星期便去歐洲了, 今天得到了家姐的大 backpack, 個樣咁殘, 唔駛驚有人偷我野了~ 因為歐元近期係咁趺, 攪到我地都始終未換哂錢. 呀~ 雖然一早已經定了去那些地方, 但還未定當地的行程呀~~~ 好懶呀!!

一早起身, 係屋企睇左孔雀, 下午去了行街, 因為落雨, 又買唔成袋了. 係花園街買左件衫, 哈, 又係白色, 成個櫃都係白色, 真係無菌.

回家晚飯, 有線死亡, 又上唔到網, 又睇唔到電視, 幸好八點復活. 有人話今晚食飯識左兩個靚女喎, 哈. 好耐無搭 68m 去荃灣了. 食左條栗米雪糕, 多謝哂~~