上午在家無所事事. 下午回校做 report, 無進展. 寫到無野好寫, 都只係三十一頁, 點算? 晚上去看活地阿倫新戲<迷失決勝分>. 很普通呢, 舊年的<美蓮達與美蓮達>有趣得多.

今日睡了又睡. 十點接到獎門人電影還以為只是八點多. 中午回校, 做 report, 係咁寫, 好像要寫的也快寫完了, 但三十頁也沒有, 怎麼辦? 晚上放棄<亂步地獄>, 因為實在太倦了, 這電影的戲飛也是憑雜誌換的, 將來上再看有沒有機會看吧. 去了葵芬食野, 之後便回家了.

星期六. 今日和獎門人一家去澳門. 係船上面摺昨天印的那些富貴竹, 搭船都未摺完. 下午去了漁人碼頭, 呢個景點唯一可以同 disnay 鬥既, 就係鬥廢. 之後去了十月初五街食飯, 食了鴿鬆, 很特別, 用生菜包鴒肉, 幾好味.

星期五. 原本諗住今日可以慢慢咁係屋企執下野, 做下 report, 但係點知意外頻生. 先係要攪一 d 報紙檔既野, 再幫屋企人問旅行團既野. 最慘係 lab 部機又熄左, 真係慘到爆. 結果兩點幾就番左學校, 仲見到剛剛 demo 完既 william, 似乎反應甚好呢. 之後又係改下試下, 寫下 report 咁. 晚上和獎門人繼續電影節, 今晚又係兩部, <火車三段程>和<你, 我, 他她它>. <火車三段程>無中文字幕, 勁大濟. 睇番戲入面那些熟口熟面既火車, 真係重有 d 驚. 三段程最後一段講三個些路迪球迷去羅馬睇歐洲足協杯, 甚攪笑. <你, 我, 他她它>幾係無厘頭.

十點起身. 原本想去銀行, 幸好出發前醒起今日是假期. 中午食 M 記, 開心餐有 one piece 玩具, 但係異常低質素, 都係食普通餐. 下午寫 report, 愈來愈覺得自己無咩野好寫, 最盡都唔會過五千字. 經過計算, 証實了 L0 sketch 那份 paper 內的 log, 是以 2 為基數, 真是大濟, 又多樣野係解釋唔到. 數回書, 現在雜誌少了, 數回書也輕鬆了. 回想幾年前, 要兩條友做成個鐘先數完. 晚上都唔知做咩好. 林行止那本書也跳讀地算看完了, 明天便去一次圖書館還書和碟.

電影節今天開始.

一早便拿印花住灣仔換了兩張<亂步地獄>的戲票. 之後在金鳳食了一個午餐, 冷奶茶和煎雙蛋正. 在荃灣會合獎門人.

番屋企整曲奇, 今次做左好多奇怪形態, 連中文字都有. 勁.

晚上便是電影開場節目了. 看兩部電影, <黑社會 2>和<伊莎貝拉>. 見到勁多明星. <黑社會 2>有點不及第一隻 la, <伊莎貝拉>好睇, 影得澳門好靚. 睇完離場, 真人伊莎貝拉係身邊行過, 勁高. 之後搵左彭浩翔和金培達簽名, 勁 fans feel.

番到屋企都一點幾, 等多陣就夠鐘睇波. 米蘭雙雄勁廢, AC 最後都係靠好彩先入到四強.

如常咁早起身. 落街買報紙早餐. 專登係 ok 買野, 有五個加菲磁石, 但係當中四塊我係本身有. 非常特別, 這五塊磁石和家中舊有的是相斥的, 都唔知係屋企那些有問題, 定係呢五塊有問題. 自己攪掂午餐後回校.

都係寫 report 和行程式. 進度其慢. 用 visio 畫了一些公式, 感到自己很勁.

終於買了禮物給忻忻. 是買, 不是打. 聽講佢好鍾意, 重玩到成頭汗.

晚上再次自己搞掂. 屋企無人, 時間都好似過得慢 d.

今天 father mother 出發去長江三峽. 早上一起去食早餐, 回家一會後便送他們上車了. 又試一星期獨估全屋. 寫 report. 好似好落力咁寫, 寫左幾個鐘, 後尾計番, 其實內容只係寫左一小段, 其他時間都是在攪那些格式, 結構等.

晚上去了荃灣和獎門人食壽司. 正. 抽左三隻叮噹新蛋. 食左杯雪糕, 只是一般. 想打兒童節禮物俾忻忻, 但係唔知買咩好, 佢好似咩都有咁. 電影節和佐丹奴攪那個我最喜愛電影對白原來已經有左結果, 連衫都出埋, 我都唔係好記得自己投左咩. 現在印了衫的有<阿甘正傳>, <阿飛正傳>, <的士司機>和<甜心先生>的對白, $80 一件, 本身我鍾意<阿飛正傳>和<的士司機>, 但係<阿甘正傳>件衫靚 d, 所以我買左.

昨晚因為屋企停電, 錄唔到<無間道>. 今晚睇獎門人借 vcd 俾我睇, 正, 好好睇.

今早去荃灣和獎門人食早餐. 之後行左陣, 佢就去教琴, 我就番屋企. hea 寫 report, 但總算開始寫了. 晚上出了灣仔和家人食飯.

今天借了三張唱片. Bille Holiday, Louis Armstrong, 和 Beatles.

今日去左灣仔睇一個叫做<漫有引力>的本地漫畫家展覽. 呢個展覽展出左好多本地獨立畫家既作品, 好多都係經常係雜誌睇到既, 好似阿德, 小克, 志海咁. 個展覽既其中一個特別既地方係他們的畫都是畫在一個很大的七巧板上. 細細個場, 但係都好多野睇.

之後係灣仔行下行下, 係 ok 無厘頭咁中左個特別版, 之前咁難搵, 而家一開就中. 食"老"水豆腐, 好味.

又係睇波, 又係八九點開工, 情況和昨天如出一轍. 飯後和獎門人去了 APM 行, 巧遇 nike 足球宣傳活動, 見到林海峰和一班甲組足球員, 有最新足球廣告睇, 睇左場三人足球, d 球員係咁"的"波.

番學. sketch size 加大後效果並無幫助, 大失預算. 寫報告.

放學. 在 XTC 食雪糕, 尚差一次便夠十次, 有免費雪糕食, 好野~

原來我和獎門人的電話, 都是不能夠傳送 "~" 的, 傳送後的 "~" 會變成 "=", 生活真是充滿驚喜.

勁眼訓, 昨晚四點幾訓, 今朝樓下八點幾開始打椿, 隔離屋就九點開始裝修, 簡直係人間地獄, 結果醒下訓下咁訓到十一點.

今日去獎門人屋企. 挑戰焗蛋糕, 再次失敗, 到底是那裡出了錯?? 整梳乎厘, 焗既時候漲得好似好勁, 但係一出爐就完全倒塌. 陪忻忻去公園玩. 食埋飯, 再整多次梳乎厘就走人. 今晚勁等車.

繼續開檔, 勁眼訓. 派完報紙和 mother 及二姨食粥, 很飽. 回家看完報紙便睡到十一點多. 樓下打椿很大聲.

寫了<V煞>的感想. 看完<邊城>了, 好一個鄉間小故事. 還了書及三隻唱片.

終於開始諗 report 寫咩了. 大致上有個骨格, 但在實驗及結果這兩部份也未想清楚應該點寫. 參考了 tampo 舊年的 report, 發現人家真的做了很多東西, 自己好像只做了很少野.

下午要睇檔, 便終止了寫 report, 哈, 勁懶.

晚上起身和獎門人一起睇波. 阿仙奴勁.

因為 mother 背脊痛. 五點起身開檔. 微雨. 不太冷. 接近七點便做好報紙, 到寶城買麵包. 早上的麵包店很熱鬧, 有很多新鮮出爐麵包, 很多早出工作的人購買早餐, 熱騰騰的麵包很香. father 先行回家食野. 他下來後, 我便去派報紙, 之後我便回家了. 已經八點多, 平常的出床時間, 不太倦, 食過麵包, 看完報紙, 還是去睡, 十點多起床.

不用教 2172 了. 回校做 fyp. 電腦被人關了, 停了我的程式, 真是找死. 幸好只行剩一個, 希望之後不要再這樣. 諗 report, 有點頭緒, 但未動筆. 利用早幾天的實驗結果, 畫了一些圖, 很專業的感覺.

獎門人放學後, 我們便走了. 在荃灣大家姐食了點東西. 之後飲感冒茶, 勁苦. 買了一個數獨遊戲, 好像很有趣. 之後便回家了.

<邊城>也看到很後了.

原來我始終都係記錯, 昨天應該係 49 搭錯 47. 正確去數碼港的巴士是 M49.

今天去數碼港看<V煞>. 第一次去數碼港, 未出發先出事, 係香港站搭錯車, 47 搭錯 49, 上車 Do 完八達通先知. 去到數碼港, 大雨, 環境一般數碼, 工作地方似乎不多,貝沙灣倒很大很靚, 新開的酒店也不知在那裡.買完飛, 行下商場, 無咩野睇, 有間好大間既 Wise kid, 好多 Playmobile. 除此之外, 好多婚紗店. 商場下午有個港台既音樂頒獎節目, 好多名星.

<V煞>果然好有<二十世紀少年>既感覺, 鏡頭對白都好似. 好多政治性既對白. 最後飛刀一段勁型. 我覺得幾好睇.

返中環搵野食, 係電梯附近行左好耐. 最後搵左一間上樓餐廳, 食左兩碟意粉, 都幾好食, 不過份量比較少. 係中環行左陣, 有雨. 搭船去尖沙咀, 係海港城既 Panash 買左兩個飽食, 好味. 之後係 ok 食免費雪糕.

今天繼續待在家中. 一早看了<古惑仔三>和<蒸氣男孩>, 好睇. 午餐煮給 mother, 晚餐煮給 father, 今天兩餐也是我煮. 中午幫佢地報名聽日去一日遊. 在旅行社旁的一間夜冷見到數個木製胡桃夾子公仔, 其中兩個是消防員造員, 勁型, 原價五十, 但身上只得六十, 買唔到兩個, 講價後四十五一個入手, 現在大大隻咁守護著我的書架. 呢間就近朗屏藍橋既夜冷 d 貨幾正, 有幾個木製雕花相架都好靚.

雖然整天閒在家, 但也沒有怎麼看書.

獎門人被我傳染了, 要快點好番呀~

因為 mother 要去接 aunt 2 機. 獎門人今天來元朗和我一起睇檔. 我們先在水邊圍那邊食 thailand 野, 正. 不過之後勁大雨, 兩條友仔都濕哂先返到屋企. 終於睇左<是但up發花癲>, 都幾好笑, 回憶錄內那些工作紀錄很有趣. 睇檔個陣無咩雨, 勁好彩. 晚上一齊去打邊爐, 勁食.

昨天進行的測試, 因為計錯時間而作廢.

今天大家也斷背起來, 係咁話人斷背.

傷風. 無力. 打太極時有快要倒下的感覺.

上堂時玩數獨, 難.

課後去糖水佬. 八條友, 歐聯八強八隊波, 我撐 AC!

今早兩眼單眼皮. 午飯後左眼變回雙眼皮. 獎門人發表四份三理論, 偉大.

在獎門人協助下, 進行資料數目由 500 至 8000 的界限查詢(range query)測試, 希望明天下午可以完成.

排球課最後一堂. 無野教, 純粹比賽, 連續兩次敗在身穿清華大學的神秘同學之發球下. 茶點後回家.

<細說名城>輪到陳奕迅講東京. 趣味明顯不及前任主持, 專長吹水, 的陶傑了.

晚上收到學系內某著名教授的一封電郵. 內容是"I am very happy to receive your application for the study tour.", 多麼的可怕, 下一段更是面試的詳情. 以為被甚麼惡事搞上了, 但幸好還算是一名電腦系的學生, 深明寄錯電郵的常見, 特別在一些世外高人身上. 絕對深信這是一封錯寄了給全體學生的電郵. 誠然從不願和這位高人有任何關係, 亦未曾參與任何遊學團, 獎學金, 和學長計劃等事務, 但在這電郵內看到在面試時, 有關衣著上的說明, 當中"show the smartest look of yourself"和"consult a couple of your friends"兩點實在令人歎為觀止.

我是好息之徒. 放棄定期, 做了存款証. 銀行的職員是中學的不同班同學, 最後佢才問我是否認得佢. 多左本銀行存摺, 這本的外觀很差呢.

寫了<獨家試愛>的感想.

今天午餐食了接受兩個公仔面, 勁濟.

回校, 寫了一些程序去測試 L0 sketch 估計單一序列內非零項目的數量 (number of distinct non zero element in an array).

大師兄告知一些關於 cs2172 在剩下課堂的安排, 有點不好意思.

往荃灣找獎門人, 行左陣街街, 食下野.

今晚叮噹由我照顧.

在明報看到一些存款証的介紹. 有四厘幾息. 吸引好息之徒.

與 dr. poon 見面. 心灰, 但我不會放棄, 一定要做好. 他推薦我找幫手睇終極報告的英文文法, 那裡有這樣的幫手? 難道要登報請人嗎?

買了叮噹遊戲機, 就像他媽哥池的玩法, 不過係養叮噹, 有趣. 可以餵叮噹食豆花包, 又有其他朋友搵佢玩.

聽 Norah Jones, 感覺很像 Janis Joplin.

拜山. 今日原本以為回暖, 只著了一件短袖衫, 出到街就知死, 勁大風. 拜山後, 會合獎門人, 在奧海城買了飛睇<獨家試愛>後, 便行落旺角, 行經那個新建成的桃園街公園, 玩了一會. 係旺角見到部叮噹遊戲機. 之後搵唔到小巴搭番奧運, 唯有行返去. 會和獎門人的朋友們. 看戲. 有失控位, 但是電影的主題到底是甚麼? 一班人, 坐巴士慢駛返荃灣食野. 食和庭, 食左好多野, 都幾好食. M 記食雪糕. 風中途離開, 我們四處找尋, 但不果. 眾人擔心, 後似乎平安回家, 望風工作順利.

借了沈從文的<邊城>. 薄薄的一本小說. 在題記內, 作者說這書是給一些"本身已離開了學校，或始終就無從接近學校，還認識些中國文字，置身於文學理論，文學批評，以及說謊者造謠消息所達不到的那種職務上，在那格社會裡生活，而且及關心整個民族在空間與時間所有的好處與壞處"的人去看. 有趣. 另外借了三隻唱片. Norah Jones 的 Feel like home, Alirio Diaz 的古典結他集, 和 Miles Davis 的情歌集.

獎門人今天造型清新, 就像明星一樣. 和獎門人在 Uniqlo 睇衫, 她買了兩件很滿意的衣服. 之後去了天文台, 今天是天文台開放日. 勁多人, 排一輪隊後開了一些天氣常識展覽. 再排一輪隊印了一張有指定日期及我們名字的証書. 玩遊戲, 得到有雨及有雲公仔.

晚上和獎門人家人食素食自助餐. 食左勁多野, 四個人食左十二樣野. 飯後在吉之島行一會. 晚上回家電視無野好睇.

今天便是第二次面試匯豐了. 不是太緊張, 早上還在家看電影. 下午二點開始面試, 兩位 CBD 和一位 HR, 內容和第一次面試差不多, 都是實習那年做過甚麼, 有甚麼得著等. 還有怎樣解決同伴間既問題. 面試左大約半個鐘, 表現一般吧.

回家換便服. 之後去荃灣, 獎門人焗了蛋糕和曲奇餅. 正. 行左陣, 係 Pizza Hut 食下午茶, 飽. 之後便回家.

忘記了今天負責面試的人叫咩名, 就算 Victor 俾左 CBD 最新既架構表我都無用. 只知道不是 CRMS.

睇完<黑夜之後>了. 十二點多便和獎門人回校, 但是三樓實驗室冷氣維修, 不可進入. 無家可歸之下, 唯有到圖書館. 獎門人溫習今天測驗的中文計算, 我便看林文華的<蛋白質女孩>. 上堂無野做, 今個星期的學生都是在忙分組. 學到第二十式太極, 還有一堂便結束. 太極課後和獎門人在 Sport Complex 看電視播放的排球比賽, 十分緊張.

獎門人測驗的時候, 我便準備一下明天的面試. 對於這個長達四十五至一小時的面試, 實在唔知點準備好.

放學, 和獎門人去了朗豪坊食心太軟, 呢間野真係神經刀, 次次水準都唔同. 之後在 OK 得到五隻加菲磁石, 其中有一隻是特別版, 十分難得.

出了 FYP present 的臨時時間表. 和嘉莉及 Chris 同組, 多麼可怕的組合.

今天有得食獎門人昨晚做的芒果芝士蛋糕, 正. 相對地, 我造的曲奇便不值一哂了.

在樹記食午飯, 那些飯落了很多茨汁, 睇見都唔想食了.

倒數第二堂排球. 只得十三名學生, 所以在學習防守走位後, 比賽不用跟隊. 廿五分兩局打成一比一, 加一局五分決勝局, 結果我們險勝. 落堂後在 Garden Cafe 食下午茶. 落單時那位阿姐攪得一團槽, 攪到我無得食漢堡飽.

和獎門人在荃灣換了加菲月曆板給小強. 但係我唔見左買野送的那四塊加菲磁石. 勁可惜. 唔知係邊度趺左.

後天便見工了, 唔知點準備好. 需要惡補一下 Mainframe 嗎? 怎麼說 CBD 也是以 Mainframe 為主. 不知現在還是不是在攪 Mainframe 上的 Java. 如果係, 咁我在 Mainframe 都還有一些賣點. 如果係做 Front-end 部分, 真的不知是幸運還是不幸.

有線今年繼續同步播放數部電影節內的電影. 其中一部正是<天黑黑>及<人間狗鎮>的導演的新作<地獄莊園>, 原本我們也打算看這電影, 但怕太悶, 所以無買到飛, 現在電影有得免費睇, 真係好. 另外<有樓裝修>也好像不錯. 詳細的有線播放時間表在這裡看到.

在最初看見電影<V 煞>的造型時, 是有點想看的. 但得知這是<廿二世紀殺人網絡>的班底後, 便唔知點解無咁想睇. 題外話, 其實我從未完整地看過一集<廿二世紀殺人網絡>. 但當今晚在雜誌上, 看見影評說這電影勁 sell 無政府主義, 似<搏擊會>, 感覺上更似<二十世紀少年>及<Monster>這兩本漫畫, 雖然影評可信性不高, 但還是使我十分想看這電影.

快看完 <黑夜之後> 了. 不錯的小說. 之後看甚麼好?

改寫了 fyp 的測試程式. 測試了 Count Min Sketch, 效果一如所料那麼差, 實在想像不到為何會好.

試玩了一個把電郵地址轉成圖像的網頁 http://services.nexodyne.com/email/, 有趣, 如果可以自訂顏色和大小便更好.

晚上心血來潮, 造曲奇餅. 可惜不夠細心, 焗得太久了, 牛油曲奇變成朱古力或咖啡曲奇的樣子.

勁凍. 無神神又凍番.

今天寫了 CM sketch, 但未作任何測試. 午餐一條友食 M 記, 個姐姐話派哂點 JACK 卡, 但係佢俾錯左九件雞我, 我梗係快腳走. 2172 忙於分組, 作為 TA 的我, 完全無野做, 正.

多得雞坤指點, 在潮特買了可愛電話貼.

獎門人今日著得好靚.

今天去了維園花展, 雖然天氣不太好, 但花還是很鮮艷.

之後搵 ok, 估唔到係銅鑼灣同中環搵 ok 係咁難. 我地換左十隻, 但係都唔中特別版, 有點被搵笨的感覺.

原本想去動植物公園, 但行行下, 去左香港公園. 之後係中環行. 晚上食 pizza express, 正. 落雨, 行 IFC. 勁大雨, 放棄坐船去灣仔食雪糕. 坐地鐵去荃灣, 荃灣都有 gelati, 但係唔係咁好味.

早上寫了 <弦途有你> 的影後感. 在 wiki 找了一些 Johnny Cash 的資料, 似乎電影內大部份劇情都是真實的. 造芒果布丁. 之後便出發和獎門人會和.

獎門人今天臨時不用教琴, 可以陪我食飯, 真好, 原本還以為要食自己. 之後行了一會街街, 獎門人和朋友去街, 我則回校做 fyp.

攪了一整個下午, 才把很久以前寫的 Finite Field 從 bitset 轉回 int, 這樣 bit 的數目便不用硬碼. 完成這個改動已經差不多七點, 也還未開始做 Count Min.

今天食了數塊曲奇餅, 好好味呢~~

收到匯豐面試的通知了. CBD. 即是實習那年, 在改組後工作的那個部門.

和獎門人去電影中心看 <弦途有你>. 在看電影前, 在附近的街道買了一些造蛋糕的工具, 那間店有自助查價機, 我們好像大鄉里一樣, 咩都唔識. 部戲都幾好睇, 歌又好聽, 兩個主角都做得幾好.

之後行左去旺角, 飲左碗龜苓茶, 都幾好飲.

回家, 獎門人今晚在家造曲奇餅, 諗起都想食.

今日姐夫生日, 阿哥同家姐兩 pair 人去 disney. 七點幾就醒左, 睇完報紙食埋早餐都就快九點. 諗下個 fyp, 原本想做 count min sketch, 但要改之前寫既 hash function, 太煩, 所以唔做住. 諗下 report, 計落 sketch 和 sample 真的可以省下很多記憶體, 而且個準繩度重要唔錯, 雖然個運算時間會長左好多. 咁 report 就要以節省記憶體為最大賣點, 希望夠料寫.

結果諗完一大輪, 咩都無做. 睇<黑夜之後>, 一口氣看了四章. 唔知點解, 我總是很喜歡看村上春樹的作品, 不論長短篇. 但總有點懷念他舊作內常有的都市驚喜.

回校, 今個星期任職 TA 那一科要交功課, 攪到堂堂 tutorial 都勁多人, 全部學生都係度做功課. 勁多問題, 完全失控.

上太極, 今天教仆步, 老師再三強調是仆低那個仆, 企人邊那個仆. 學到十七式了, 好多細節忘記了.

晚上去食松記, 食 summer, 正.

感冒了. 晚上也睡得不好, 醒了很多次, 又熱又冷咁. 起身個陣腳軟軟頭暈暈. 雖然感到不適, 但還是耍了一會太極, 希望血液運行可以幫助身體. 不適還是要回校上堂. 遇上傑仔, 談了一會找工作的事.

獎門人逢星期三也專程回校和我食飯, 真是幸福. 但今天她也有點不適. 飯後返 lab 做左一陣野後, 便去了彈琴. 獎門人彈琴既時候隻手好靚. 我今日都彈左唔少, 老來學琴.

在旺角行了一會, 買左禮物俾小強, 之後便坐小巴送獎門人去食飯.

早年我和 Jean Michel Basquiat 在機緣巧合下相遇了. 事源我的家姐一年去四次日本, 她在其中一次買了一件心口印有一些奇怪公仔既衫俾我, d 公仔簡簡單單, 幾得意咁. 佢見我幾鍾意, 又平. 所以在之後的另一次, 買了兩件給我們兩兄弟, 但阿哥唔識貨, 唔鍾意心口有個公仔咁低能, 所以三件都係歸我所有. 後來有一次在 milk 看到一個皇冠頭標誌, 熟口熟面, 細看之下, 才知道那些衫上面的公仔, 正是這位傳奇普普藝術家的作品. 而呢位人兄, 正是那種少年得志, 中年都未到就吸毒死個種, 夠哂傳奇, 後尾重有人將佢既生平拍埋戲(輕狂歲月).

原來我們報檔現在是有訂信報的, 當然唔放過. 那麼, 現在早上看的報章便又變回兩份了.

寫日記時發現, 原來 Jean Michel Basquiat 和獎門人是同一天生日的. 已是我所認識的第四位在這天生日的人了.

睇完卡夫卡的城堡了, 下次還是看回他的短篇小說吧, 他的故事總是那麼不安和困惑, 長篇小說那一連串的不幸和異常的倫理實在係頂唔順, 而且短篇的架構較好, 故事性較強. 現在可以開始看黑夜之後了, 勁期待. 另外亦在圖書館借了林行止的英倫采風, 很早已經知道他言之有物, 平時看信報時亦會看他的專欄, 縱然書內都是很久以前的文章, 但總可得到一些社會經驗.

今天早了回校做 fyp, 進展不錯吧. 但是 dr. poon 還是未回我的電郵. 也不知明天是否去找他. 看了一點以往的終極報告, 真的不簡單. 和大師兄說了我的 first reader 是 liuliu, 想不到他的反應會這麼差...真係大濟...

獎門人造了朱古力蛋糕給我食, 勁正. 重拎左兩件俾爸媽食, 正.

有線電影 hmc 台將於本月 11 號至 19 號, 連續九晚播放波蘭傳奇導演, 奇斯洛夫斯基的九部電影. 我最想睇下"藍", "白", "紅"三片係咪真係好似傳聞咁勁, 另外對"殺誡"和"兩生花"亦好有興趣. 咁多戲, 都無時間睇.

又到星期一了, 今個星期教 excel, 呢次真係好多學生都叻過我. 在學校做了一點 fyp, 真的要做一點有意義的測試了.

早上看了一點奧斯卡, 回校後亦上網看即時結果. 一大堆得獎電影, 只看過無國界追兇, 相信是因為得獎, 今天有為數不少的人, 從 google, yahoo 等搜尋此電影, 並進入我的 blog. 點都要認下叻, 係 google 度搜尋無國界追兇, 排得第一的便是我.

一早起身, 和屋企人食早餐. 之後他們去看斷背山, 我便回家了, 下雨.

晚上, 在獎門人家食飯, 勁多野食, 超飽, 好像一次比一次多野食.

原本和獎門人計劃在電影節再多看數部電影, 查查時間表, 才發現原來電影節那二個星期, 正是 fyp 交終極報告的前夕, 真是驚到爆...諗諗下...還有個多月, fyp 便完結, 到時直至上班前, 我也是勁得閒, 真係點都要好好歎下...

不錯的一天. 早上在家睇報紙時, 我懷疑自己曾經失去知覺. 因為我感覺自己不是在睇閱讀, 亦不是在看電視, 但卻過了約十鐘, 感到有點可怕. 但因為無法証實, 只好當無事發生. 寫了天生一對的感想, 算是字數較多的一篇. 這是一部不錯的電影.

下午回校, 支持阿 bert 教 acm 和做 fyp. acm 今日教 shortest path, 是我的最愛呢, 但要學生一日內學會 dijkstra, bellman ford 和 floyd warshall, 是有點難度的. 原本對做 fyp 無咩期望, 畢竟這個 sampling 的問題也出現了數星期, 無論在那方面試, 也証明是我的程式有問題, 但怎樣也試不出那裡有錯. 今日竟然無意中發現是在 sampling level 處理上, 在 inital 和決定是否 sample 上都不太統一, 重整後便所有問題也沒有了, 表現得勁好. 20 個 data, 每個 data 有 65536 隻顏色, 做哂全部可能既 210 種 range query. 現在 sampling 及 sketching 也可以做到全部係 0.1 誤差內估中哂. 個一刻, 我感動到想喊. 離開前, 在電腦上執行了一次 2000 個 data, 做全部 20100 種 query, 自動執行, 直至全部中哂, 唔知幾時會做完呢.

晚上, 和獎門人同在元朗, 但沒有相見. 有點可惜.

起身. 試左陣相機, 都唔知點解係室外影得咁黑. 獎門人訂飛, 有兩部訂唔到, 所以我地今年電影節睇八部電影, 勁. 飯後和獎門人去睇"天生一對", 都幾好睇. 近期好像經常遇到很長的名言. 例如"用最好的心情面對最壞的事情"和"只要有真愛, 我們一定可以聽到對方的聲音". 之後和獎門人回家整曲奇餅, 第一次整, 都幾高難度. 算係失敗左, 可能做成錯誤的原因有很多, 下次要注意及小心一點. 和妳整餅總是很開心.

Darth Mike Movie Record建站一年多, 終於錄得 10000 次瀏覽人次了. 近月平日都有平均 40多次瀏覽, 有新文章的那數天, 便有百多人次進入閱讀. 算是幸運, 自問很多也是廢話, 意見空洞. 如果有注意, 會發現我是讚多過彈, 有時甚至模稜兩可. 但竟然也有一些朋友, 在自己的網頁放上我的連結, 或在 blogline 登記我的 blog, 等等行為也是難以理解的. 希望會有 50000, 或 100000 的一天吧.

起床望出街外, 便被公園的一大片紅色所吸引. 木棉花開得很紅, 很美.

電影節來了. 和獎門人選了十多部想看的電影, 真是瘋狂. 但今年是最後半價的機會了, 要好好把握.

晚上落堂後, 往深水步食糖水.

報了 yahoo! 了. 這幾天的日記好像都是在說我報了甚麼工作, 其實我花了很多時間在 fyp 上, 只是毫無進展. 對於 sampling 上那些錯誤, 實在是無哂符, 都唔知有咩問題. 灰爆.

這兩天, 在坐車的時間聽了 5 集 903 的廣播劇"來不及聽你說愛我". 那些填上新詞的舊歌很有趣. 故事本身也不錯. 難怪獎門人一口氣聽哂十集.

今天打排球, 全班也好像打得比上次差, 只是不斷等對方開波出界, 然後發球得分直至開出界.

獎門人今日又有野整俾我食, 真係正~~

今天又報多一份工了. 地鐵公司的物業管理. 如果所有報左既工, 都有面試機會, 其實都幾煩. 另外, yahoo 的工好像也不錯.

在學校做了數小時 fyp, 完全無進展, 始終都係未知 sample 那裡出了甚麼問題, 這問題也存在了個多星期了. 連 dr. poon 之前要求改善那些樹也未做.

三月. 都急不來了.

今個星期教 plam, 輕鬆搞掂. 中午又食 m 記九件雞, 都係中特務隻腳, 搵笨. 和獎門人做中文電腦功課, 獎門人教了我用 asp .net

現在是春雨, 還是冬雨嗎? 冷冷的, 有點清新的感覺.

Eric 神生日快樂~~~

今日家庭日, 和家人去了赤柱 wildfire食甜品下午茶自助餐, 好肥, 雪糕好味~~ 食左三粒鐘, 餐廳仲有野玩, 我地整左幾張沙畫, 靚, 獎門人仲送左張俾我. 之後係赤柱行左陣.

落銅鑼灣, 陪佢地去行旅行社, 之後食上海野, 唔錯吧.

回校教 acm, 課題是 MST, 有接近十名學生, 算是完成了歷史責任. 希望他們玩得開心吧.

用了數小時去報兩份工. 這些東西真是浪費時間.

現在早上已不看東方日報了, 一天看兩份報紙也好像太休閒了, 我還有一堆雜誌, 漫畫和小說. 頭版內的新聞及相片也太可怕了, 副刊, 財經及體育版的質素也不及明報, 所以我現在只看明報了.

和獎門人唱 k, 連唱 4 小時, 唱到夠. 做朱古力慕絲蛋糕, 熔朱古力十分好玩, 今次打 cream 唔知點解打得好快好靚. 去了忻忻屋企食 pizza. 晚餐後回獎門人家食蛋糕, 比較甜, 都幾好味.

數天前, 我已把獎門人送的金錢之王看完了. 我的性格十分容易受人影響, 多看一點勤奮故事, 是比看那些消極故事來得好. 我也感覺自己近來生活得積極了, 起碼我開始注重自己的發音. "講""廣""趕"開始懂得分了, "我"還是講不清, "你"已經好了很多.

今日獎門人做左我學生, 來了上堂. 攪到我勁緊張.

上太極堂, 教到第十式. 老師講了一段一九五四年太極掌門吳公儀與澳門白鶴派之陳克夫比武的往事, 引述他所說, 當年吳公儀講出一句"一招攬雀尾, 打遍天下無敵手", 令到當時武林人士不滿, 引得當年白鶴派少壯派中以一秒出五拳而聞名的陳克夫下戰書. 最後由澳門特首何厚鏵的父親何賢在澳門設下擂台, 所有收益撥交公益金. 兩人簽下生死狀, 各安天命. 到比武當日, 吳以太極基本手法"圈", 將陳的快拳化去. 陳兩手被打至無力, 出腳攻擊, 吳將腳勁化去後, 以一招"xxx" (sorry, 實在係唔記得), 將陳打至血流披面, 最後何賢見兩人愈打愈燥, 結束比武, 給了一個"不勝, 不和, 不負"的結果, 和氣收場.

原本我們應以認真態度去聽這一個故事, 但老師實在講得十分生動, 令我們覺得勁好笑. 特別以當中"所有收益撥交公益金", 及最後"各位有無聽過這故事?"為爆笑位. 回家後, 上網找了一些資料, 以下是數條有關的連結. 陳克夫親述48年前轟動武林, 吳陳比武話當年, 吳式太極吳公儀VS白鶴派陳克夫.

今天和獎門人看了很多份報紙, 真有趣. 午餐食印尼抄飯, 雞喇唦湯面和 kfc 雞卷, 飽飽.

等上排球, 測試一下程式, sample 那邊出現很奇怪的現象, 似乎是我的問題.

又一城有一些擁有新潮髮型的車輛展覽, 很有型. 我想, 在畢業後, 我們便不會經常行又一城了.

上排球堂, patpat 原本話 eric 和 vincent 都唔番, 但最後他們都有出現, 只有 mcc 北上無番. 今堂學開波. 之後比賽, 幾場比賽也出現一個現象, 就是直接發球得分(ACE 波)主宰了比賽, 連勝三場. 比賽後, 拳頭骨腫哂. 痛. 好玩.

收到退回學費的支票了. 學校在這的效率真的很低.

現在起床後, 除了睇報紙及食早餐外, 亦多了耍太極這環節, 真好奇我能維持多久.

獎門人上星期才買了一個小焗爐, 今天就造了一些朱古力蛋糕仔給我食, 好好味呢, 三個小小的蛋糕仔, 把身心也滿足了.

今日比上堂時間早了兩個多小時回校, 做 fyp. 做了一些測試, 改動了一下測試的程序.

要教一些本身也不太懂的東西, 是有一些難度. 用英文教, 難度便更高了. 話說在星期二的這班, 學生中有一名鬼妹(不用多想了, 是可怕的質素). 當她有問題時, 我便要以英文作答. 只好把這當做英文練習了, 但我總是不太聽得懂她在說甚麼.

今日教 flash, 哈, 平生第一次用 flash 就要教人, 幸好無驚無險, 教既都只係好簡單既技巧, 但我已覺得好利害.

嘗試把 fyp 內顏色的數量加至 2^18, 除了勁慢外, 亦出現了劃花記憶體的問題, 可怕. 另外現在 sketch 比 sample 來得準, 又要為 sample 想想辦法了.

現在才開始找工作, 遲了一點吧. 好工難求.

和獎門人行旺角, 睇左 d 錶, 都幾型. 食三寶, 獎門人話我地平均一星期起碼食兩次街頭小食, 肥. 計劃了一下將來, 真不簡單呢. 多了承擔, 身體感受地球的引力也好像大了, 實在了. 不再輕飄飄, 更能感受好的東西.

一早起身, 返深圳. 幫阿哥整電腦. 差唔多十二點就番香港. 係花墟會合獎門人. 買左好味曲奇餅, 正. 之後係石磨坊食野, 正. 坐車返獎門人屋企食飯. 睇左野蠻秘笈同購物狂, 無厘頭. 晚餐先係今日的第一餐正餐, 勁食, 飽. 同忻忻玩, 俾佢貼到成身都係貼紙, 條褲好似水族館咁. 重發現左原來忻忻好驚某獎門人架...

聽左幾次陳奕迅新碟. 幾首歌都有唔同風格, 頭兩首歌都係 acid jazz 的風格. 其實, 一隻碟得幾首歌, 統一風格會比較好.

主持 acm training, 今堂教 graph searching. 講了甚麼是 graph 後, 便是 BFS 和 DFS, 希望學生懂吧. 林晨和 bert 也回來了, 我也把學生交給他們後離去. 在 prj lab 遇見很多人.

和獎門人去了銅鑼灣, 係咁食, 首先係 sogo 燒八爪魚丸, 再來慈善雞翼和花生米滋, 之後係白沙道食日本咖哩牛肉飯和橋麥面, 再係銅鑼灣廣場食 gelato, 呢間鋪頭將 d 雪糕整得好靚, 就像意大利那些, 見到都想食.

有小小雨. 行左去搭船. 在船上聽著 eason 新唱片, 真開心. 在海港城行了一陣, 遇見南哥. 搵好耐, 才找到那個特賣場, 已關門, 只發現了兩個阿福.

係 ok 飲媽媽奶, 再去對六合彩, 未中住, 算馬會好彩.

星期五. 在今個學期, 我們兩人在星期五也不需要上學, 是很空閒的一天. 原先計劃了很多, 由早至晚, 又去土瓜環, 又過海, 但變下變下, 最後都係簡簡單單先去九龍城食好好食既牛肉餅, 再係九龍寨城公園耍公極, 然後一路唱歌仔, 一路行去黃大仙, 可惜因為天氣變冷, 兩人也感到不適, 但我們還是行埋 APM 才肯返屋企食飯.

看了兩位金錢之王, 要成功, 除了內在的能力要足夠外, 紀律也是十分重要.

我在想我的 fyp, 其實, 我想我的 fyp 比我做我的 fyp 的時間多很多. 回看現在已做了部份, 坦白說, 若專心地做的話, 一星期已是十分足夠. 我在遇到一些問題時, 總是會停留了一段很長的時間, 才繼續進行. 而做野和休息的時間, 總是數天和數星期之比. 我想, 這便是沒有紀律.

近期, 我對自己的信心愈來愈少. 英文讀寫聽俱不濟, 枉稱為一個學了快 20 年英文的大學準畢業生. 中文更是惡夢, 我的普通話是一個笑話, 想不到, 我的廣東話是另一個笑話, "廣""講""趕"不分尚算少事, 原來我連"我""你"也是讀錯的. 書寫更是可悲, 我懂得而不懂寫的中文字, 應比同類的英文字多. 原來, 我是一個不會表達自己的文盲.

意想不到. 把兩個 rand() 產生的 15 bits 數字連起來, 再轉到一個 0 至 1 之間的數, 所計算出來的 stable distribution, 在估算上竟然比用一個 rand() 時準很多. 另外, 在解決了那些除零的情況後, 所有 INF 和 NAN 也沒有了. 這次找 dr. poon 和傑仔的作用竟是這麼大.

一招攬雀尾, 打遍天下無敵手. 今天學了第六及第七式.

獎門人拿了 eason 唱片給我, 真好. 這天我們一起上學, 我們在地鐵總是有很多野玩. 絕對是壞乘客.

不知道這是甚麼心理, 有些人也很喜歡發問. 勇於發問原本是一件好事, 遇上難題或有不明白, 發問或討論也是好事. 但事事發問便不是了, 有哂指示, step by step, 也要發問確認. 沒有嘗試的勇氣, 卻有發問的厚顏. 事實上, 在發問確認前, 他們都是知道答案的. 如果他們不是沒有勇氣試, 便是想逃避做錯的責任, 雖然我實在不能理解做錯了那些習作中的一個步驟需要負上甚麼責任. 他們是從小學習這種態度嗎? 難道 step by step 還不夠嗎? 還是需要專人指導, 講一步行一步? 真的是怕做錯嗎? 我不明白. 我只希望在那六小時, 可以聽少幾次 "是這樣嗎?" 或 "按這個嗎?" 這些我只需要用一個字來回答 - 是 - 的問題. 想深一層, 這些也是比那些"下一步怎樣?", "唔知做緊咩"的好....好一點吧....

坐在檯前, 看著那兩本書, 真的有點感動. 我是很喜歡看書的, 雖然未至十分狂熱, 但一個月總是會看至少一本書的. 但對於買書, 我是十分節制的, 可算是節制得可怕. 如果全港書店或書展之間流傳一份永不幫襯打書釘王黑名單的話, 我很有信心榜上有名. 我也曾經害怕, 妳會不喜歡我這種只看不買, 好像很混桔的態度. 但幸好, 妳不單沒有不喜歡(假設沒有吧), 更留意到我最喜歡的是甚麼, 這兩本書, 我也在不同大小的書店拿起過無數次, 但總是在看了數分鐘後放下, 靜心等待他們在圖書館出現的一天, 但現在不用再等了. 甚麼也不用等了. 葡萄已經熟了. 有了妳, 我好像甚麼也得到了.

情人節了. 情人節快樂, 今年豬年有桃花, 未有情人既豬仔今年要好好把握.

情人節的早上, 還是在家 hea 了一陣, 飯後還小睡了一會才出發行動. 今天有點雨呢, 真是美中不足. 首先去了拿花, 雖然是預訂了, 但還是要等即場包花, 紫色鬱金花, 加埋配花, 好鬼紫, 好鬼靚, 好鬼重. 之後便坐火車返學校. 在我上堂期間, 獎門人便看到那些花了, 雖然無親眼第一時間目睹她的樣子, 但我知佢一定很開心的, 謝 lee hang 報導現場情況.

之後便去尖沙咀了, 行陣街後便去了 ashley 33 食, 環境氣氛都好, 食物就一般. 收到兩份禮物, 好鬼鍾意呀, 真係錫哂妳~~~

飯後便去睇演唱會了, 第一次去紅館睇演唱會, eason 好勁, 個台同埋那些 dancer 的服飾都好靚, 好開心.

錫哂妳~~~

拖了又拖, 終於收到 dr. poon 的追命信了. 幸好我原本已打算今日去找他. 雖然我自覺死路一條. dr. poon 亦想找我作另一科的 TA, 但我給了林晨, 以免他經常說我唔理佢.

上堂, 教這個 CS2172 難度真的不少, 一星期內六堂所需要教的東西, 我也是即學即教的, 全部我之前也是不會的. 最不好便是經常要獎門人等我上堂.

和獎門人在蒙民偉樓的平台野餐, 風光如畫, M 記的食物配上清靜的環境, 再冒著受到 H5N1 鳥糞攻擊的可能性下, 這一餐, 簡直是平淡中見特別, 另類中見清新.

上了獎門人家姐屋企燒野食, 首先在獎門人家拿了昨天做的 tiramisu, 加上朱古力粉和草莓, 簡直是大師級作品, 好味~

晚上重播的生還者快將結束了. 由以前的粉紅救兵至現在的生還者, 我們也喜歡看重播的遊戲節目, 而且總是看得很緊張.

好野呀, 有人唔等我自己開始先, 算妳都未壞得哂, 我仲有得浸手指餅, 之後又整湯丸我食, 今次就放過妳.

晚上和獎門人家人在灣仔食素食體驗, 之前我同獎門人食過, 今次專登叫埋屋企人來食. 瑞士雞翼正.

買埋份禮物, 很順利. 送禮給情人的心情是很複雜的, 她知道你甚麼時侯去買, 但唔知你買咩, 她會估, 我唔會開估. 兩個人朝夕相對, 如果一個唔小心俾左貼士對方, 佢又咁醒估中左, 又無哂驚喜. 另外購物既時候, 總係有點興奮, 好想講俾人知自己買左咩, 有幾好, 有幾靚, 但係又要忍住忍住, 如果忍到, 到送禮那一天, 看見佢開心個下, 就咩都值得了.

一早去攪左 d 野. 哈. 比想像中順利得多.

去接獎門人, 點知唔識去佢教琴既地方, 只可以係荔景呆等.

行左去葵芳, 食左個幾飽既下午茶當午餐, 之後行下新都會. 坐 32 號巴士去獎門人屋企, 獎門人記得今日有流動圖書館, 我地又去睇下, 重借左兩本書.

好野, 聽日整蛋糕.

經常朝早起身那幾個鐘都唔知自己做過甚麼, 無無謂謂咁, 早起都無用. 終於去了拿卡, 其實這張國際學生証都唔知有無用, 我又好少用信用卡, 不過唔駛錢又唔駛再填表又係最後一年可以申請, 就即管要續左一年.

哈, 都係自己出自真心咁諗好過抄人地咁老土.

本來打算今日有得拎 eason 隻碟, 點知都係未有, 幸好打左電話先, 如果唔係白行一次. 但係都去左尖沙咀拎抽中那隻 vcd. 亦都睇了真的愛你, 都幾感動, 細路仔喊就最感動. 搵地方食下午茶時, 唔小心爆左 d 野, 真係唔小心. 之後食左間日本野當下午茶, 都幾抵.

行下行下, 行到去尖東. 終於食到個間噹噹燒, 都幾好味, 燒餅好食過 sogo food court 那間. 間野好特別, 要除鞋, 重有一些漫畫任睇, 但是那些漫畫都無太清潔. 飯後已經好飽, 但係都係要食番杯雪糕, 去左食 da doice, 還是 XTC 好食.

在早前寫的紅黑樹上繼續工作, 加了 range query 及改了一些程序的怖置. 有做野已經算好了.

太極今日教左三式, 我都唔係好識, 上完堂要番 lab 問人, 原來好多人都係太極高手.

海南雞面比 la sa 面淡好多.

無業遊民. 我已經很久沒有做正經事了. 天天也在坐車, 等車, 睇書, 睇電視, 好像很得閒似的. 明知 fyp 的問題所在, 但不想諗, 不想做.

不想這樣, 晚上想了數個對策. 亦簡單地實踐了在紅黑樹上的 range query, 雖然我也不知道紅黑樹會否繼續使用.

消化不良. 朝早五點幾肚內便發生多場戰爭, 想吐, 想 or, 但吐不出, 亦 or 不出. 只感到肚內漲漲的.

九點多便醒了. 去了圖書館, 睇完島與半島了. 借左兩本書, 卡夫卡的城堡及新君王論 3. 飯後便回校. 做了一陣 fyp, 樹的問題沒有解決, 試了 sketch 和 sample 的加法. 找了一些工, 也是無進展. 上堂, 現在常常也對這麼多學生, 真的覺得很多學生的學習態度也很差, 睇到火都起, 不過我諗我自己都唔好得好多.

放學後買禮物, 哈. 之後和獎門人一齊返荃灣, 行左陣街街便坐巴士返屋企了.

今日除左上 cs2172 外, 重代左堂 cs1301, 學生全部都係內地學生, 呢班係大學前先修班, 要講國語同英文, 教 java script. 搞到遲左食飯, 不過獎門人勁好, 買左朱古力俾我食~~ 甜到入心. 落哂堂後行街街, 驚嘆又一城員工既行動之快速.

今朝好早獎門人就上門拜年了. 哈哈. 齊人後便拉大隊去八鄉食盆茶, 間野都幾混亂, 食食下仲無左個位坐. 之後行左陣就坐巴士去搭西鐵, 佢地去高伯度拜年, 我地就去左 cwb 行街.

好野, 今日終於睇到, 無白色, 不過都試左茶色, 靚靚, 睇見就開心.

係 ikea 食左杯雪糕, 都幾好食, 爆谷都好抵, 不過我地無食. 但係之後係餅店買了花生朱古力食. 晚上再次會合家人, 食 35 樓, 飽.

送獎門人回家後便返屋企了. 聽日返完假要返學教人了.

昨晚寫了紅黑樹, 因為有簡碼, 所以很快便寫完. 今天在諗點寫搜尋的部份時, 醒起所寫的紅黑樹不適合所需要的應用, 真的超大濟, B+ 樹那類才是合適的類型, 即是只有最底的樹葉才用作儲存. 諗諗下, 其實用紅黑樹也有好處. 雖然和理論不同了, 但較為省位. 下次仲有可以同 dr. poon 講下, 攪到自己好似好有心得咁. 重點當然係我唔想再寫另一種樹了.

下午和獎門人去了旺角的 snoopy cafe, 間野有好多 snoopy 呢, 勁開心, 想知 d 野食點, 就要睇下獎門人係 openrice 寫既食評了. 順便賣廣告, 我昨天也寫了春天花花同學會的感想. 食飽行去尖沙咀, 靚靚衫, 好想睇呀~~~

我真的落後, 這幾天才開始聽周杰倫的十一月的蕭邦, 現在都已經二月了. 其實我也不清楚那十一月是否和真實時間有關...

早上看 intro. to alg., 原來有哂 red black tree 的 pesudo code, 但我仲未寫. 洪水橋的親戚來拜年, 呆等了一個多小時, 飯都無得食, 小朋友們也大過仔了.

上獎門人屋企, 坐左陣, 見實在太好天, 便想出街行下. 我們兩個便和忻忻上了圓玄學園, 要行一段斜路, 忻忻唔肯俾我抱, 結果攪到獎門人超級累, 無哂力. 之後和忻忻在公園玩左陣. 食完晚飯便返屋企了, 今日專登去借了一本對倒給獎門人看, 我真的很喜歡這本書.

fyp 完全無進展. 這其實真是一個考驗, 長達一年的一份功課. 紀律, 完全沒有, 現在還在做 project plan 內所寫應該十一月做的事. 探究精神, 沒有, 但扮有, 否則怎可解釋慢了這麼多. 可悲.

和獎門人在旺角 fax, 行了一陣書店, 村上春樹的黑夜之後港版, 八折後只需四十多元, 有點想買, 但無買. 不知何故, 近日一拿起書本便想起卡夫卡, 公共圖書館只有很少他的書, city 便有很多, 下次回校要借來看看. 因為被卡夫卡影響, 所以連新借的書也無心機看, 昨天借了劉以鬯的島與半島, 書名很像周杰倫的歌名.

晚上竟然聽起 blur 的 13 唱片來. 正常在港長大, 年齡和我差不多的, 應該很難避免聽過 brit pop 時代的歌, 有些可能是聽了也不知道吧. 以 blur 來說, song 2 及 tender 當年也是電台熱播歌. 而那個時代, 正是後四大天王, 王菲又唔知去左邊, 陳奕迅古巨基又未紅, 基本上本地好聽的流行歌不多, 本地樂隊那個時候也乘勢而起, 以 LMF 興起的那個時候氣勢最強, 之後便靜下來, 剩下的也是有心有力的樂隊.

不如意事經常發生, 但不能放棄, 不能屈服於命運. 不久後回看, 也不過如此.

今晚父母便回來了, 執下間屋. 一個人在家, 最喜歡的時間可能是洗衫, 晾衫, 收衫, 和摺衫的時間. 將不潔洗去, 變得清新乾淨. 如果是洗牛仔褲便更加緊張了, 因為要看看褲上的紋變得怎樣. 講起牛仔褲, 穿了很多很多年的 levi's 已經由未洗水深籃色, 現在的紋都幾反映到我既袋野方法, 右袋放電話, 左袋放鑰匙, 所以右邊的色比左邊淺及面積少得多. 現在很期待之前係東京買的 uniqlo 未洗水深藍色會變成點, 以前條 levi's 好少洗, 而家呢條要經常洗, 試下有咩唔同. 不過, 如果無左洗衣機, 洗衫便一點也不好享受了.

和獎門人在荃灣睇春天花花同學會, 內容比前兩集更散, 有幾個位勁好笑, 感覺比王子開心, 王子內的感覺畢竟是太沉重了. 行行行, 和獎門人去了三棟屋博物館, 睇相話去行下對獎門人運程有幫助. 其實我都去過幾次, 不過我一直都覺得個度幾特別, 所以去多次都無咩所謂, 位置又咁方便. 獎門人對本地傳統文化都幾有興趣, 行下睇下都好開心.

晚上接車, 很多行李. 今天其實也是媽媽的生日, 回家放下行李後我們便去食飯了, 現在都唔敢食太飽了.

年初三. 今日繼續拜年. 去了獎門人大姐姐及我的姐姐屋企. 晚上家姐親自下廚, 仲有糖水. 這幾天眼睛也有點痛, 原因不明, 這幾天也比平時少打電腦和看書. 睡前看了 eason 在台灣的演唱會.

吃不消了. 胃痛到不得了, 放咩入口都想嘔. 全身無力, 手軟腳軟. 年初二便病了.

下午上了獎門人的家, 很多人呢. 晚飯時也吃得很少. 飯後飲了濟眾水, 好像趺打酒的味道. 幾有效, 飲完之後個人精神左, 有力左. 坐多陣, 見無咩作用便返屋企了. 阿哥阿嫂返左去, 今晚我獨佔全屋.

迎接年初一, 第一件事便是看完了酒徒, 倦極而睡.

訓醒, 忘記了今天是年初一, 在阿哥派利是時才醒起. 哈. 恭喜發財. 上了獎門人家拜年, 做了一個蛋糕, 收了很多利是, 食得很飽. 之後會合家姐阿哥, 上 auntie 3 屋企, 又食. 之後上三表xx (唔識打)屋企, 又食. 之後上 uncle 7 屋企, 又食. 超級飽. 食咁多野, 大大肥都就快無位企.

新一年有很多野值得期待, 先前已經知道的有 radiohead 及 portishead 的新碟, 晚上回家時聽不除劃位, 更聽了一首 belle and bebastian 的新歌, 感覺和以往很不同, 音樂很 funk, 他們今年也有新碟.

獎門人和我在 openrice 開了一個 account 寫食評, 以後又多一個層面發表意見, 這便是 internet 的一大好處, 咩都可以講.

早上和阿哥在家清潔, 攪左成朝. 父母一早便出發了, 今次連他們去旅行的地方在那裡, 我也不太清楚. 午飯後便裝了 qq 遊戲給阿哥阿嫂玩, 晚上回來時他們還在玩. 和獎門人行青衣, 給獎門人話我太有書卷味, 呵呵, 總好過有臭味. 上獎門人屋企, 和忻忻玩, 食飯, 好多野食. 飯後同埋獎門人媽媽落荃灣花市, 今年我行了三個花市, 一定行大運. 之後食埋糖水便返屋企.

近日發現, 原來我在不知不覺間, 使用了很多方法去逃避現實. 例如完全聽不懂歌詞的歌, 小說世界, 電影世界, 名人專訪等.

和獎門人一齊買禮物, 很有小家庭的感覺. 除了收利是一環外, 新年其實是一件很煩的事, 要對很多人講好說話, 如果有人錄起自己個樣, 睇番一定覺得好搞笑. 雖然有假期, 但這又是一個放完重累過未放既假. 但新一年新開始, 點都要過得開開心心.

晚上和家人食團年飯. 之後行元朗花市. 個花市搬左兩年都未行過. 行行下有幾陣雨. 唔算太多人, 阿哥買左野, 重見到個朋友. 送家姐上車後便番屋企了.

明報今天對於北京的冰點事件的處理手法, 值得讚揚. 眼睛是雪亮的, 明報不表任何立場, 直接轉載在冰點事件中的導火線袁偉時的"現代化與歷史書", 中青團的"處理決定", 和冰點主編李大同的公開信. 一篇學術性探討歷史的文章, 竟會引來政府正面批評, 以致刊登的雜誌停刊. 有人說胡溫新政是為人民的, 是現代化的, 是世界性的, 希望這些也是真話的. 希望造成這些不公平, 不合理, 不合法的決定, 是由小人, 由奉承者發出, 而不是由最高層下達.

這幾天其實也在迷小說, 酒徒這本書的內容, 其實有點似卡夫卡的小說, 一個忠愛文學之人, 受不住社會的種種, 終日借酒澆愁. 買醉, 買愛情, 賣自尊. 劉以鬯對王家衛是有絕對重大影響的, 花樣年華 及 2046 也充滿劉以鬯作品的影子, 連那些如追愛情, 賣感情, 放縱肉體等的女角, 也是似曾相識的.

TA 兩小時, 一星期上六次一模一樣的堂, 感覺是並不太好受的, 就像錄音機一樣回答相同的問題. 上太極課, 動作很搞笑, 上堂時勁想笑. 教左兩式, 起勢及左右野馬分鬃, 都幾好玩. 在 lab hea 左一粒鐘. 食完野就上 chi comp. 落堂去行維園, 超爆多人, 買左好多得意野. 過旺角食石磨坊, 食左個腰果糊, 唔太甜但幾香, 獎門人那個合桃糊也很香. 之後便回家了.

南方日報, 南方都市報, 新京報被整肅, 冰點停刊, 中國版 google 自我禁制. 中國版 wiki 被禁, 國內敢言 blog 被殺站. 在自由商業社會, 金錢利益殺良心, 殺真相. 在封閉社會, 政府強權殺良心, 殺真相. 我們偉大的祖國正合兩家之大成. 大量被金錢沖昏頭腦的人, 無視社會的前途. 像 64 的熱誠, 現在恐怕已經不能再強求. 金錢增加, 良心減少.

一早便回校了, 10:30 有堂. 落堂時獎門人已經係 lab, 真係快手, 仲拎左個正正蛋糕俾我食. 十一點幾去又一城食野都未算多人, 只需要排一陣隊買野食. 返 lab 做 fyp, 開始寫紅黑樹, 但很快便放棄了. 上排球, 很多自己人, 除了我和獎門人, 還有 mcc, patpat, vincent 和 eric. 熱身動作很高難度. 玩下手打到隻手紅哂. 成身汗, 肥人特別多汗. 回家. 今日無等小巴去西鐵站, 選擇了坐巴士, $2.7, 換來大約 20 分鐘, 幾抵. 返到屋企勁食野, 做勁多運動都無用. 獎門人感到不適, 嚇死人了. 休息一下吧.

快要工作了. 尚有不足半年便畢業. 我會有工作的熱誠嗎? 長久以來也認為, 讀多 d 書, 可以搵多 d 錢, 咁就有多 d 錢買 cd, 買衫, 買書, 買玩具, 去旅行, 簡單而言, 是為了玩而讀書, 這是我很多年前讀書的精神支柱. 入左大學幾年, 反而少左咁諗, 讀書都唔知為咩, 我想我對某些科目是真的有興趣的, 所以那些科目成積也較好. 現在都係時候停一停, 不要再讀下去了. 人大了, 總要工作, 除了要供養自己的興趣, 還要為家, 要對將來有打算, 要對家人有承擔. 平平淡淡地做一份無驚無險的工, 永世唔升, 可以養起自己的興趣. 但是, 要為家人提供一個較好的環境, 這樣是不夠的. 這便是熱誠的動力吧.

cwk 和我也入獄了, 我們奇妙地在洗澡時間和家人偷偷地相見, 抱著 mother 及獎門人, 三個人也哭了. 醒了. 莫名其妙其妙的夢, 無論怎樣, 不要做壞事, 無論怎樣, 不要她們再擔心了.

不想再浪費時間了, 上午便返左學校. L0 sketch 好像很多問題, 出現很多 NAN(not a number), 攪了一輪, 不把 array 入面 0 的那些數加入 sketch, NAN 便大幅減少了, NAN 應是一個勁勁細或大既數乘零時造出來的. 但當 array size 加大到數千時, 估計的效果勁差, 把 sketch 加大作用也不大, 更會谷爆 double, 勁出 INF. 那個 stable distribution table 對估算的效果影響很大, 但對它可做的控制是最少, 又唔想攪 NISAN PRG. 無咩計, 原本打算今日寫 TREE, 但係攪左好耐 sketch, 無咩時間, 就做左 L0 及 coordinated sampling 既加法.

很幸運, 我從少喜歡看書. 中學時已看了三國演義, 亦看很多金庸的武俠小說, 艾西莫夫的基地系列, 村上春樹的唔知咩小說, 名著看過不少, 睇完唔記得既亦都不少. 亦看過魯迅及卡夫卡的書, 近期最愛當然是劉以鬯, 連睇兩本, 原來香港也有一位這麼好的作家, 在七十年代便已寫出這麼獨特, 感覺寫實及新潮的書, 他給我的感覺比村上春樹更強烈, 比王家衛的電影更浪漫. 這是很可趣的世界, 我想看更多.

呢排都訓得唔係咁好, 一晚醒幾次, 起身都好累, 咁冷都訓得唔好, 不過我一向都覺得熱天係好訓 d, 冬天只係唔想起身, 唔係訓得好.

今日 cs2172 教 dreamweaver, 我即學即教, 型. 我覺得學生比我更強.

上 chi comp 導修, 完全脫節, 這些科也需要一個 TA 吧.

和獎門人去預訂了 EASON 的 EP, 抽中 VCD 一隻, 無得去後台, 無得去慶功. 去左九龍城, 等獎門人家姐, 行下公園, 買貼紙俾忻忻. 之後便一條友坐車去美乎, 架 2a 勁抵坐, 睇左 1.5 本 20 世紀少年. 返到屋企即刻有飯食.

一早計完回書單, 過左之前去水塘既相. 和阿哥阿嫂出灣仔會合家人去拜山, 天陰小雨.

之後再加入獎門人去 CEO 慶祝 MOTHER 生日, 唱唱食食. 十一點幾就散水, 送埋獎門人返屋企.

寫了戀人的感想, 對於看不明白的戲, 實在上是很難有甚麼感想的. 順便講下, 當日在戲院看戀人這電影的只有三人, 我, 獎門人和一大叔, 那大叔仲要一路睇一路講野, 戲院咁少人都幾恐怖, 幸好不是看鬼戲.

中午在荃灣等獎門人, 在碼頭好像很有型地看了一會海, 看了一會小朋友釣蟹, 看了一會中年人放狗. 和獎門人回家做酥角, 我們和阿嫂負責包. 包完好快媽媽就炸好, 好好食~~ 重整左一盒拎去俾獎門人屋企人, 佢地都好鍾意食.

之後去左獎門人家姐屋企打邊爐, 勁多野食, 超飽.

同平時一樣都係 8:45 分身, 換好衫, 執好野, hea 左陣先出門口. 今日 in 匯豐, 10:53 到達, 開始前要填份表, 好多英文都唔識, 亂填. 面試我那個人叫 eva, 之前做 test 都見過, 中文傾一陣, 英文又傾一陣, 全程約半個鐘, 都幾緊張, 講野唔清唔楚.

返屋企換番衫後, 就同獎門人去尖沙咀食野, 睇左部叫"戀人"既台灣戲, 睇完都唔係太明, 台灣戲成日都係唔係好明. 之後行去佐敦食澳洲牛奶公司, 炒蛋正, 都係獎門人食旦牛治最抵, 有炒蛋又有咸牛. 再行去旺角, 係潮特買左個花花公仔俾獎門人, 超級可愛. 之後獎門人便去教琴了, 我都番屋企食飯.

今晚睇"Beauty and Geek"結局, 很可惜係最後呢幾集先識睇, 呢部野實在係太搞笑 la, 更可惜既係我支持開個 pair 人最後都係要出局, 希望快 d 重播可以睇番之前個幾集.

準備下聽日見工, 只係服飾方面已經夠煩,衫褲鞋 Tie, 全部都各散東西, 搵極都搵唔到對鞋. 今晚都未搵到就大濟.因為之前獎門人同 kalee 都係見呢個人, 所以都大約知道會問咩, 準備下答案, 好多野都唔知點講好.

冷針事件. 今早我在家暈倒了. 在那一刻我完全無左知覺, 無哂力. 張開眼睛時, 已被媽媽扶著, 地上滿佈玻璃粹, 原來是一隻在裝飾櫃上的碟被我撞倒了. 媽媽抱得很緊, 好像很害怕我再次倒在地上. 在椅子坐下後, 逐漸回復清醒. 後來睇醫生話我係血壓唔穩定, 受驚過度攪到無血上腦, 平時飲下咖啡和食咸 d 就無事.

今次害得媽媽和獎門人也很擔心, 媽媽親眼目睹, 絕對係十級驚嚇. 獎門人今日見工, 俾我嚇一嚇, 攪到見工個陣要擔心我, 上次 EN present 前我又係唔舒服, 想不到現在自己的身體竟然係這麼差.

因為受傷, 今日無番學上堂, 打左俾 marian 請假. 亦都無去到那個原本想去的職業講座. 獎門人見工後, 便著到靚靚咁入元朗陪我. 我真係無用~~

在家休養, 睇哂本對倒, 借了酒徒, 這本書內容比對倒長, 相信要較多時間才可看完.

呢幾日都係度睇緊劉以鬯的對倒長版. 今日係西鐵睇到有一段, 老男角想起很多年前, 在上海別離母親到香港時, 竟然有想哭的感覺, 這是第一次睇小說有這麼強烈的傷心感覺. 晚上忍唔住, 終於上網搵下劉以鬯個鬯字點讀, 個讀音似乎係"唱", "暢"之類. 對倒值得推介, 這星期應該可以睇完, 之後我想睇酒徒.

問獎門人借左陳奕迅隻 U87 來聽, 當係演唱會前補習吧. 睇下製作單位, 估唔到差唔多全隻碟既鼓都係 davy 打, 之前係朗豪坊睇過一次 jazz live 表演既 ted lo 就係阿牛入面負責彈琴, 睇唔同人作曲都知有唔同風格, eric kwok 流暢, cy kong 比較有力, mark lui 似曾相識.

獎門人今日收到電話, 聽日就要面試 hsbc, 我就星期五, 佢咁趕真係幾大濟. 更新下個 CV, 自己都想搵份好工.

原本今晚獎門人要上 SQM 大課, 但係獎門人上左半堂導修就已經決定唔讀, 希望我 d 學生唔會有呢個衝動, 其實有都唔錯, 少 d 學生, 少 d 野做. 唔駛上堂, 早 d 離開 city. 九龍塘除左又一城都有好多好野食, 去左女青年會既會所餐廳 Teddy's cafe, 食左一個千層面, 一個意粉, 一個字, 好味. 細細間餐廳, 得幾個人, 氣氛都唔錯. 之後行落旺角, 係朗豪坊 Uncle Gene's 食左個心太軟, 一個字, 好鬼正. d 朱古力好似缺提咁流出來, 個蛋糕又好味, 個雪糕重要係已經想食左好耐既 moven pick 雪糕, 正正正, 真係一次滿足七個願望.

今天開學, 之前都唔記得講, 我已經申請左減少學費, 今個學期我只係報一些 PE 堂和做 fyp, 即係完全唔駛上堂. 但係我都仲係要成日返學校, 因為我個學期繼續做 TA, 今次負責既係 CS2172 Fundamentals of Computing, 教一d 我都唔識既野. 和上一個學期一樣, 我要教六個鐘堂, 但係今次係分開四日上, 真係搵埋車錢飯錢都唔夠. 星期一有兩堂, 呢一科係 OOD, d 學生好似真係咩都唔識咁, 但係當做到一些成果時都顯得很開心, 搞到我都好開心, 希望保持到個熱誠.

唔駛上堂個陣係 project lab, 勁多人, d 人番學上 security 同 chi. comp, 或者搵 YM, 個個都好多野做咁, 除左 patpat, 行來行去, 但係又話自己做緊 fyp, 都幾搞野.

今日協助了一下獎門人, 妳唔好話自己要靠我幫先做到, 如果唔係妳一路緊持住, 我都幫唔到, 再加上好肯定妳出既力係多我好多既, 我只係係有問題時先幫下手. 哈, 我係精神上支持多過技術上支持既~

今日同獎門人做導遊, 和家人去食咖哩, 抵食. 上城門水塘, 超多猴子, 天氣和風景都好靚, 呼吸下新鮮空氣, 心境都變得比較平和, 哈.

之後去尖沙咀食俄羅斯餐, 貴, 氣氛幾好, 有現場唱歌, 重唱生日歌俾 mother, 雖然佢未到生日, 但係野食無咩特別. 個次獎門人同我係同址樓下個間 thailand 野正好多.

食飽行下 uniqlo, 睇一輪, 全家都無收穫. 送完佢地上車, 就同獎門人去食 XTC, 正, 辣朱古力真係唔講得少, 辣到喉嚨都痛.

好累好累~~ 但係好開心, 因為送獎門人回家時, 獎門人支持我!!!

今日搵左獎門人笨, 去沙田文化館睇一個叫做講開又講我頭家既坐談會, 其實背後係重有一個叫做融 — 四頭家既展覽, 個陣容幾強勁既, 胡恩威, 夏永康, 葛民輝和陶傑. 聽落都好似好美滿, 咁何來搵笨呢? 原來, 個坐談會係無得 walk in, 去到門口都只可以望下葛民輝和陶傑縮下縮下咁既樣, 個展覽重慘, 聽日先至正式開放, 今日係未有得睇. 總結咁講, 即係白行一轉.

一場去到沙田, 都係新城市行左陣, 係 city sucker 買左個芝士餅干食, 勁多芝士. 又食雪糕車雪糕, 香滑甜.

另外請大家注意, 近期 m 記茄汁有怪味, 我和獎門人已經試過尖沙咀 hmv 底層及荃灣最大那間, 試左好多都係咁. 到期日係 07 年 6 月, 大家食野要小心.

睇錯鐘, 七點幾就起左身, 早左起身, 時間多左, 做野都多左, 睇完報紙雜誌沖埋涼食埋野都未到九點半. 今日同獎門人去尖沙咀唱 k, 兩個鐘話咁多就唱完, 食左好多雪糕, 正. 之後行街街, 買買買, 獎門人買左條褲, 我買左件衫俾 father, 又買左個公事包.

father mother 之前報那個團去唔成, 旅行社話係班機問題, 其實就係之前收得個旅費太平, 根本就夠出數, 而家臨急臨忙要再搵過其他團真係煩爆.

出左 interim report 個分, 都唔知以咩基準俾分, 感覺很黑箱作業.

信報易主近日又成為頭條新聞, 買家便是小小超, 部份報導言之鑿鑿, 好像快要成事. 信報本身有強烈的風格, 堅持報導方針, 是香港唯一一份純粹財經報紙, 報導中肯及有公信力, 易主本身已是一件壞事, 賣給李生更壞. 值得一提, 我並不是從信報上認識信報的創辦人及現任當家林山木, 我是在別人的書上的序上認識他的, 遠至張五常, 近至原復生, 他們也多次提到林先生對他們的提攜. 林先生給別人的感覺是勤力及重視人材, 另外那種企梗的態度亦不能少觀, 在當年 23 條炒得正盛的時候, 林生曾話過若 23 條通過, 他便摺埋信報. 李生是一個商人, 某程度上是不錯的, 若成功收購信報, 對本身已甚具實力的 now 新聞台, 便會更派吸引力. 但作為一個超級大富豪, 他的作風未免抄味太多, 良心太少, 另外, 若信報成為李家喉舌, 市面少了一份良心報章, 相信會是整個社會的損失. 持有 95% 信報股權的林生林太, 已經公開否認賣給李生一事. 但願這是真話, 及信報早日找到合適繼承人.

唔知點解, 用 STL's algorithm 個 sort 次次都死, vector 個 d 又慢, 結果L0 sketch 放棄使用 STL, 用回最原始的 dynamic array, 真是白搞.

對倒是一本很值得推薦的書, 寫作方式有趣及寫實, 內容亦有意義, 回憶對應憧憬, mother 及獎門人也對這書有興趣, 真好.

一起身就開機睇下考成點, 頂, 死鬼佬!, 結果兩科 EN 都係 B-, 正一英文白痴, 點會咁架?? 幸好其他科都幾好. 終於 DEAN 番一次, 下個 sem 可以放心咁咩都唔 take 了, 雖然要 fyp 勁勁勁好 (A+), 我既 GPA 先可以過 3.7, 即係接近無機會.

放成積可以有好多種心情, 但我諗, 盡左力但考得唔好而唔開心, 總好過無盡過力而後悔, 太多後悔, 做人都無意義, 反而唔開心重會成為下次更力努力既動力.

真係好, 今日協助獎門人做 FYP, 做左成個下午, 連獎門人自己都話好開心今日個進展咁好, 見到妳開心就好了~~ 但係我就慘 LA, 將 L0 sketch OO 化後失效, debug 幾粒鐘都未發現錯係邊.

死鬼佬!

一早落圖書館, 借左兩本書, 一本係劉以鬯既對倒, 另一本係東尼既投資書. 以前經常聽到劉以鬯的名字, 今次是第一次看他的書, 書內有短篇及長篇版本的對倒, 今天只利用坐車的時間便已看完短篇, 很有趣, 這樣的雙線描寫方法很寫實. 經常係雜誌睇東尼, 呢本書相信都係將連載的結集成書, 除了東尼 (Tony Measor) 是經典外, 負責翻譯的林少陽, 他是原復生的其中一位金錢之王.

今日 mother 有事外出, 所以要幫手睇檔, 今日好榮幸有獎門人一齊睇檔, 獎門人既表現重十分之專業, 絕無找錯錢, 行動亦十分快速. 不用睇檔的時侯, 和獎門人整 tiramisu, 整左接近一個鐘, 兩個人合力, 今次整得好好食, 晚上雪實拎出來分件, 放埋朱古力粉, wow, 實在係太靚, 絕對係大師級, 全家都好鍾意食, 正!!!!

食飯前無咩野做, 和獎門人去流浮山行下, 今日能見度極低, 去到海邊都望唔到大陸, 只係望到少少那座新橋. 獎門人話感覺就像去多次大澳.

晚上和獎門人一路打 yahoo 卓球, 一路等 result, 點知 12:00 都未有得睇, 之後便訓覺了.

起身睇緊報紙雜誌, 就幫 father 放哂 d 股票外幣, 今次終於順利放到, 真係好, 雖然唔係全日高位. 出荃灣同獎門人屋企人食野, 之後過灣仔二德惠買料聽日整 tiramisu, 係條街係咁食野, 茶葉蛋, 魚蛋, 之後重上左去食咖哩雞, 正.

間銀行做野勁慢, 幾日都未幫我 reset 個過數 limit, 攪到重未過到錢. 夜晚係屋企訓到唔記得去收檔, 電話叫醒先識起身落去. 獎門人搵左好多食譜, 希望今次成功.

在家千日好, 今日全日都無離開過屋企門口. 終於睇左發條橙, 真係幾勁, 暴力, 性愛, 超大聲古典音樂, 加上太空式既布置, 完全係挑戰感觀, 入面個故仔亦都係勁出位, 將惡人改造, 一想做壞事就想嘔, 都真係幾慘.

之後睇省港杯, 不濟. 晚上做了一點 fyp, 用了 pair wise hash function 後 coordinated sampling 的效果好像固定了. 另外亦稍為執了一下 code.

獎門人教完琴後去了長沙灣那間 uno uno 食左兩件餅, 正. 之後行去深水步, 電腦展超多人, 放棄進入, 去左睇花, 次次都好多花想買, 但總係因為之後仲有街去, 唔想拎住 d 花太耐而無買. 係旺角行左陣, 就上再二德惠睇野, 壞電梯, 要行十層樓, 但係咩都無買. 返荃灣食野, 食兩下就飽哂.

好憎自己, 總是這樣, 好事變壞事, 好憎自己.

今日旅行日, 勁. 一早同獎門人出發, 先在東涌坐巴士去昂平, 食左餐勁飽既素食, 寶蓮寺 d 花好靚, 影左好多相, 食飽行樓梯上大佛勁辛苦, 舍利子勁細粒, 都睇唔到. 落山後再食豆腐花及小食. 之後便坐車去大澳, 勁好笑, 架車到左總站, 但係成架車既人都唔識落車. 無咩計劃咁亂行, 行到好入, 見到好多水上屋, 好多狗, 好多蝦膏, 我地都買左兩樽, 另外重食左燒尤魚, 一個甜及一個鹹既茶果, 正. 係咁行, 行到去個唔知咩碼頭, 對住個海, 今日能見度又低, 海出面咩島都睇唔到, 好像到了世界的盡頭一樣. 行到好累, 四點幾便坐車出東涌轉地鐵去尖沙咀了.

係 sogo 食日式咖哩及橋麥面, 原本想試下個雪糕, 但係太飽, 所以無食到. 路過 Fabrica, 入左去睇展覽, 原來係智海, 小克, 阿德, eric so 及應霽攪既春卷展覽, 勁開心, 睇到小克整真人咁高既中央, 心入面立即傳出一句, "中央, 點算呀?". 另外亦看到一些阿德的原稿, 有看東 touch 最後面的漫畫的人, 便知道他們兩個是誰. "點算呀, 中央?".

之後行海港城, 買左對 adidas samba 黑底白間, 有 85 折, 平靚正.

獎門人, 唔好有事呀~~~

一早起身, 睇曼聯對阿仙奴重播, 半場時落街買料整椰汁糕, 獎門人買左我點整, 在 mother 支援下, 好快就搞掂, 雪左幾個鐘後個樣重好似好正咁, 不過食落就怪怪地, 原來我買錯椰汁, 應該用椰漿, 又落得唔夠糖, 搞到無咩味, 質感就幾好.

今日 add 科, 最後都係 add 左 dist prog 同 internet security, 另外亦同獎門人一齊報左排球及太極拳 24 式.

話咁快就睇哂早幾日買個本 Anna Paczuska 寫既社會主義思想淺介, 書名無改錯, 真係淺介, 所有野都係講少少.

結果都係無做 fyp, 真係大濟, 踢都唔肯做.

原本有諗個去剪頭髮, 但係又唔想求其去剪, 亦唔想俾人求其剪, 所以最後都係無剪到.

早上拎了蛋糕給獎門人食, 之後一齊返去做 fyp, 獎門人今日好勁, 幫了 server, connect 到 db, 仲 hack 埋人地個 applet, 勁. 今日繼續頭痛, 食 tea 個陣仲倒左 d 流水落獎門人度, 真係該死. 好似有 d 發燒既感覺. 明天便是 add/drop 了, 仲未決定讀咩好.

今日寫了一點 fyp, 寫了 finite fields 既加法同乘法, 及 pairwise independent hash functions. 有點頭痛. 昨天整的蛋糕勁正, 今日實左仲好食, 大師級水準. 看了一點早幾日買既社會主義, 晚上看生還者, 和英超. 頭痛.

今日同獎門人整檸檬芝士餅, 獎門人未到我就已經去買定材料, 點知樣衰爆, 竟然買左 cream 當 cream cheese. 今次我地打蛋白打得好靚, 真係倒轉都唔會趺. 整呀整呀, 整左一個鐘倒就攪掂, 雪完就食得. 好香好滑好好味, 大師級.

晚上出 cwb 和家人食自助餐, 飽飽. 在獎門人一齊睇 903, 諗起有得睇 eason 演唱會就開心.