獎門人一口氣咁放左我地呢幾個月整既蛋糕上Darth Sweet，有時間記得去睇下，如果見到邊個款想食又或者有咩意見，即管話俾我地知。

大前研一《即戰力》和《M型社會》重點紀錄

近排一連睇左兩本大前研一既書，雖然佢都有小小"流行書籍"既特徵﹝所謂流行書籍，就係將一些大家都知既事，講完一次，再講一次，然後再講多一次，最後再講多一次，咁就會得到好多人認同為有料到既書，流行書籍既表表者就係《世界是圓的》，無記錯應該係梁文道提出呢種書既定義既﹞，但係佢入面提到既好多提升個人生活質素及工作能力既方法，都值得一睇，雖然你本身都知，但係結合左再包裝過咁睇，可能會有一些唔同既諗法。

我睇既兩本書分別係《即戰力》和《M型社會》。《M型社會》講既係M型社會既型成原因及情況，然後講左好多政府可以做既野去令人民可以過得更好和國家經濟變強。《即戰力》俾我既感覺就係既然政府無能，個人應該做咩野去在社會突圍而出同埋令生活變得更好。《M型社會》入面既經濟及統計數據極多，差不多兩三頁就有一個圖表。《即戰力》則以淺白文字為主。

重點咁講，大前研一認為政府﹝佢主要係指日本政府﹞應該作出以下既改革：

• 以資產稅取代入息稅。因為日本國內最大錢個班人就係個班已退休人士，佢地有好多錢，放係銀行做無息存款，同時政府有好多福利俾佢地。相反做緊野個班人，雖然日本人屬高收入，但係物價超高，稅項亦高，亦唔相信政府有能力可以一直保持福利政策直至佢地退休。
• 以道洲制取代中央集權。日本各地均以東京為中心，所有野都要先經東京才可以運住海外，但其實好多地方都可以利用本身既地利，去和鄰國直接經商，將更多國外既錢吸入日本。又例如北海道，日本旅遊勝地，但係佢同世界各地既交通都好唔方便，好多香港人去都要經東京轉機或者轉火車，十分唔方便。
• 取消經濟封鎖。唔講你可能唔知，日本既關稅超高，其他地區如果想入口貨物至日本，手續超煩及費用超貴。同一時間，日本政府大力資助一些無前途既舊經濟產業，例如係東京都既農業。咁既環境，令到好多日本人都享受唔到世界各地既平貨，同時政府亦不繼燒銀紙。
• 教育改革。要learn唔要teach，學生要知道點樣在不同既環境轉變，將舊既野重做一次已經唔可以期望佢work。教師數目亦要大減，只係搵最好既人作網上教學，學校老師只負責協助學生學習及俾意見佢地去解決成長時遇上既問題。
• 政府可以外判既就外判，輕形既政府可以有更多活力。

政府做咩我地都好難去期望，不如睇下個人應該點做，係《即戰力》一書，佢提出現代人應該具備以下三種才能，才可以在全球化不繼改變既社會"即戰"﹝即是在新環境可以立即戰鬥及做出成績既人﹞。

• 語言力。佢指既係英語，英語係世界最多人認同既語言。但要注意，從來無一個政府去做一些計劃令到英語國際通用，相反法文就試過，但係失敗。即使在美國，亦無強逼洲份只以英語作官方語言。英語之通行，純粹因為美國經濟之強。同樣道理，若你相信中國堀起，請盡早學習普通話。
• 財務力。好多人對個人財務既認知只停於計算收入和支出﹝Profit and lose﹞，但無進一步了解自己既資產負債表﹝Balance Sheet﹞。應該建立一個會自己錢生錢既資產組合，管理當中既風險，為自已產生一些工作以外既現金流。
• 解決問題能力。個案研習或標準答案都應該拋開，要識得分析問題，睇到問題既所在，以合邏輯既方法去解決。

除左另三樣，佢亦強調要有開會既能力，即係減少開一些無意義既會同埋點樣係會議講自己既意見。關於學習，佢認為應該多抽一些時間去學習，要預測錢會住那裡走，先人一步去認識那個地方。

關於改善生活，佢提出：

• 如果經濟負擔不來，唔好勉強以廿年債務去買一些遠離工作地點或市區超小型單位。租住一些鄰近工作地點既單位，減少交通時間，住得舒服一些，金錢既使用可以輕鬆一點，多一些時間去提升自己，轉工作地點既時候考慮亦更少。到差唔多退休，才在效區或生活物價較低的地方置業養老。
• 如果唔係經常需要開車，唔好買車，多搭公共交通公具，以搭車既時間去睇書和學習外語。週未想和家人去效外散步，可以租車。省卻大量養車既費用及時間，我諗唔係個個人都想星期六一早去洗車洗到無哂力去玩吧。
• 唔好盲目相信貴價一定好，可以多考慮一下出自其他國家，有相同功能但價錢較低既產品及服務。以醫療為例，書入面提到好多歐美既人去印度做手術，因為個度技術和美國差不多，醫生英語亦好。我知道現時好多香港人都去泰國做身體檢查，都係貪個度以平好多既價錢得到好好多既服務。

關於工作，佢亦提到要提升自己"身價"及"頭銜"。身價即是自己可以勝任既野，頭銜就係曾經做過既野。係大公司做過唔算係頭銜，曾經幫公司解決過甚麼問題就係頭銜，佢不繼強調這是一個著重個人能力既社會。

我個人都幾認同佢講既野，希望你地睇完都有得著。

招商銀行2007年業績

招商銀行於三月十八日晚上公怖業績，強勁。

• 淨利潤為人民幣152.43億元，增幅124.36%
• 每股攤薄盈利為人民幣1.04元，增幅96.23%
• 資產總額為人民幣13,105.52億元，比年初增長40.30%
• 每股淨資產人民幣4.62元，增幅23.2%
• 每股股息人民幣0.28元
• 客戶存款總額為人民幣9,435.34億元，增長21.94%
• 客戶貸款總額為人民幣6,731.67億元，增長19.00%
• 不良貸款率為1.54%，比年初下降0.58個百分點
• 撥備覆蓋率為180.39%，比年初上升44.78個百分點
• 平均總資產收益率（ROAA）達1.36%，較上年提高0.55個百分點
• 平均淨資產收益率（ROAE）達24.76%，較上年提高8.02個百分點
• 零售貸款總額佔客戶貸款總額的比例為26.00%，比年初提高7.97個百分點
• 金葵花客戶數達29萬戶，新增15萬戶，增幅107%

以上數據全部都係超強既表現。存款和貸款增長令人滿意；不良貸款率滅少，撥備覆蓋率增加，資產質素令人安心；ROAA和ROAE上升得咁勁，相信和舊年非利息收入超強有關，如果將來都可以保持到ROAE係廿幾個百份比就真係超強了；高檔客人大幅提升，變相令招行可以有更多空間去發展新產品，期待更多和中國人壽既合作。

但亦都有令人不安既地方

• 全年實現淨手續費及佣金收入人民幣64.39億元，增幅156.13%，佔營業淨收入的比重達15.67%，比上年提高5.56個百分點
• 成本收入比率為34.94%，比上年趺3.34%

無理由去預期今年或未來幾年國內既股市會好似舊年咁火熱，有理由相信將來既手續費及佣金收入將會大減；經營成本上升，因為開多左行，請多左人，員工股份獎勵計劃，將會賣多左金融產品，俾員工既佣金會再上升。所以係招行呢隻小老虎長大既同時，要一路都睇住佢既資產質素、員工質素和成本控制。

我期望佢未來三年平均都有大約廿個百份比既盈利上升，只要佢再下趺，我必定會再買。

參考：

1. 2007年度業績公告

上了一課，SOHO

SOHO是我第二隻IPO得番來既股票，第一隻係中銀，賣左九世，似乎我真係唔適合抽新股。

• 純利較二零零六年增長477%至人民幣19.66億元，比二零零七年九月二十一日上市招股書中的純利預期人民幣16.24億元超出21%
• 營業額較二零零六年增長300%至人民幣69.54億元
• 每股純利較二零零六年增長424%至每股人民幣0.477元
• 股息每股人民幣0.10元
• 二零零七年毛利率為55%，二零零六年毛利率為53%
• 每股資產值為人民幣3.55元

雖然業績睇落好靚仔，但係要注意：

• 3.3億特殊收入來自上市時之利息，估總收入16.8%，下年將唔會重現
• 上市時吹到好勁既前門項目，因為政府最新政策，好大機會有幾塊地買唔到

可能因為高地價，所以舊年集團無買新地，只係同人地買左兩間已建成既樓宇，執靚再賣出去，似乎毛利都幾好。

簡單咁睇，SOHO尚有佢既優勢：

• 以北京CBD區商業樓為主，唔受宏調影響
• 品牌效應強勁，但面對大量香港地產商既挑戰

始終都係覺得，自己只係睇到佢經濟上既優勢，盲目地相信佢當日過高既估值，現在唯有希望佢既業務可以快些追上。

參考：

1. 截至二零零七年十二月三十一日年度業績公告

我隻大遊艇，匯豐業績

輪到匯豐，如果計埋月供，匯豐差唔多等如我半個股票組合，所以大家應該想像到我既呢半年來既痛苦。

• 集團除稅前利潤上升10%，達到242.12 億美元（2006 年︰220.86 億美元）
• 平均投入資本回報為15.3%（2006 年：14.9%）
• 每股盈利上升17.9%，達到1.65 美元（2006 年：1.40 美元）
• 2007 年全年派發股息每股合共0.90 美元，比2006 年增加11.1%；2007 年第四次股息每股0.39 美元，增加8.3%。
• 第一級資本比率為9.3%；總資本比率為13.6%
• 2007 年的貸款減值及其他信貸風險準備為172.42 億美元，較2006 年增加66.69 億美元
• 成本效益比率為49.4%，2006 年則為51.3%

資本回報多左0.4%，好過無。第一級資本比率繼續高企，根本唔需要擔心無錢。成本效益減少左，希望可以改善。股息繼續增加，信心既保證。

係盈利分怖入面，要注意北美係2007年係接近無盈利既，而除香港外既亞洲其他地區則搵多左差唔多一倍，其他主要地區亦得到良好增長。呢一樣就係匯豐既優勢，業務分散全球，唔會完全依賴於個別市場。

係今年既盈利入面，有幾條數要特別注意：

• 賣出英國總部既收益未入賬，可以俾下年用
• 有接近10億特殊收入來自平安及興業A股上市
• 除稅前利潤比舊年增加了10%，但只交了舊年72%既稅

風險有：

• 亞太股市熱情完全減退，非利息收入將會大減
• 美國經濟不繼向下，影響全球
• 受某些激進派股東影響，改變一貫既經營作風

匯豐舊年既一些，都增加左我對佢地既信心：

• 無係高位增持或收購內地既公司
• 不繼擴大亞洲區既保險業務
• 拒絕放棄SIV持有人

雖然嚴重坐艇，但我會繼續持有。

參考：

1. 匯豐控股有限公司2007年全年業績 - 摘要

近期股市操作及宏利業績

手上既幾隻股份同埋心水股都公怖左業績，係咁易記載一下。

首先睇下我呢排有咩動作先。

• 一月二十二日以$29.5買入2628中人壽
• 三月十日以$23.8買入3968招商銀行
• 三月十七日以$21買入3968招商銀行

以復活節前價計算，除左最尾個注，其他全部坐艇。全個股票組合計，計埋股息在內，有多達7.6%損失。

好，先講係情人節公怖業績既宏利。

• 二零零七年度的股東收入淨額創新高達四十三億零二百萬加元，較二零零六年增加百分之八
• 全面攤薄每股盈利為二點七八加元，較去年的二點五一加元增長百分之十一
• 普通股股東資金回報由二零零六年的百分之十六點八上升至二零零七年的百分之十八點四
• 第四季普通股股東資金回報為百分之二十點五，較二零零六年同期上升二百五十個基點
• 第四季度派發的每股普通股股息為零點二四加元
• 內涵價值為廿一點八五加元，較二零零六年同期上升百分之四點四

成績咁好係因為保險銷量十分好，財富管理亦都吸左好多新錢，佣金大增。

• 第四季保險業務的銷售達六億四千二百萬加元，較去年同期上升百分之十五
• 第四季財富管理業務的銷售達一百一十五億加元，較去年同期增加百分之二十四

宏利另一優點係資產管理能力十分穩建，到現時為止尚未需要為任何次按產品撥備。宏利既可見風險有：

• 加元繼續強勢，抵銷非加元區，例如亞洲及美國既增長
• 信貸市場因為信心問題大幅下滑，令到手上既債券減值
• 利息過低，利息收入大減
• 北美市場出現飽和及經濟下滑，減少業務增長

睇番當日買入宏利既因素，今日繼續存在，所以我會繼續持有。

• 平穩增長，盈利以約十多個百分比上升，股息亦慢慢提升
• 受惠加元升值
• 在亞洲多個新興市場有領導性地位
• 管理層用心經營，專注於保險及財富管理

順帶一提，宏利係我持有最耐既股票，接近十四個月，亦係我倉內目前唯一有盈利既股票。

參考：

1. 宏利金融全年及第四季業績同創新高
2. Statistical Information Package

唔知幾時，我聽過人講，如果係喜瑪拉雅山山頂撥一下扇，幾個星期後，會令到太平洋產生一個龍捲風。雖然好似誇張左少少，但係偏偏人生就係咁樣，一些小事，吹下吹下，小事真係可以化大。

2004年3月18日，星期四

呢一日同平常既日子應該無咩分別，相信是有陽光，下午比較冷那種天氣。唔知點解，可能為左扮潮，我開始左寫blog。

當時重有人叫blog做weblog，即係記載一些網上既事，作為日記並唔係blog既主要用途。當時我雖然作為一個在城市長大既電腦科學系學生，但其實都無咩網上科技感想好記，所以我一心係當我個blog係一個日記。

熟悉我既人都應該知道，我既英文能力絕對係得啖笑。日記日記，日日都記，所要我個日記blog叫做Darth Mike DAILY，我諗差唔多過左一年，我先驚為天人咁發現，原來日記既英文係diary，die-ar-re，而唔係day-li。

可能因為改錯名，我真係daily都寫，頭個兩年重要係準時寫，強迫人地睇自己既無聊生活。但近年返工真係少左好多時間同埋心機去寫，搞到間唔時會一次過寫成個星期既日記，最短個日只得三個字，就係"星期一"三個字。

作為一個負責任既人，有些時候我都會盡力咁話俾大家知個日發生個咩事。好似2008年1月24日咁，我就清楚咁記低"唔記得自己做過咩野。"。

正所謂坦白是金，我相信如果你看到這裡都重睇緊，我相信你會係我其中一個最好既朋友，因為大家都係咁無聊。

數數埋埋，十一日後呢個blog就開左4年，我總共出過1419篇文章，總算都係我人生入面既一個小龍捲風。

為左保持(或者係挽回)文章既質素，我決定呢度以後都唔再daily咁記我既事，我只會係有野想講，而又有時間去講既情況下，先會出文，主要都係圍繞我既興趣同身邊發生既事。

多謝

二月十日

一早係屋企寫埋《藍莓之夜》和《長江七號》既影評，超鍾意《藍莓之夜》呀，勁想好似Judy Law咁有間小餐廳呀。

今日和獎門人整餅，造了兩個Opera和幾件Lemon Tart。我真係要節制下，次次整Opera都落勁多朱古力和咖啡cream，搞到個餅高左好多，不過超好味。

今次到我食濟左，可能因為冷親，搞到晚餐食得比平時少。

二月九日

昨晚去了尖沙咀文化中心睇煙花，好鬼老士都要講句天公造美，好天無咩雲加上有風，完全係無障礙咁睇煙花，勁靚，睇到O哂嘴。

不過有個壞蛋唔舒服wor，快d好番呀！

今日同埋忻忻去家姐屋企拜年，忻忻和家姐超friend。之後晚上去了獎門人家姐屋企打邊爐。

二月八日

今朝一早在家寫了《破事兒》的影評，為左要達成係今個假期寫哂既目標，我不斷咁利用搭車無野做既時間回憶番那些電影，再諗下自己有咩感想，然後係屋企既打出來，現在還差三部未寫呀。

年初一

恭喜發財，身體健康，心想事成，祝大家早日達成心願，並以健康的身體，與你最愛的人一起享受成果。

二月六日

年三十，好搞笑，今晚我同獎門人都俾人問點解咁早返屋企，係咪唔俾先？

聽日開始一連四日假了，好野！

二月五日

今個二月工作上有好多野都要好趕咁完成，攪到無咩時間去準備兩個節日。

我的家人將於年初一去四川放假，聽講個度日日都有雪落，不過無湖南那些地方咁反常。

二月四日

年廿八，除左沖涼同刷牙之外，我好像完全無做過任何同清潔有關既事。

希望係新年之前寫哂movie record，但似乎無咩可能，唯有轉為希望係假期內完成。

二月三日

快到新年了，今年好像沒有甚麼新年氣氛。

二月二日

中午去了看《長江七號》，故事其實都掂到貧富問題呢個重點，可惜無咩發展。

今晚獎門人造了木糠蛋糕和檸檬撻，一如獎門人所料，我超鍾意木糠蛋糕。

陳奕迅 - 我不好愛

二月一日

mother今日生日，佢今年生日食左三個蛋糕，勁。

一月三十一日

無驚無險又一天。

因為怕眼痛，所以已經一段日子無係西鐵睇書了，為此感到一點失落。屋企個本《白髮阿娥》亦都已經推荐左俾白髮阿媽睇，希望新年後可以繼續睇番書。

一月三十日

今日仲係咁多野搞，幸好都去到上堂。因為唔識路，去唔到想去既餐廳，結果求其一間茶餐廳搞掂。

一月廿九日

今日都仲係搞緊個d問題，超多野做，連那些一拖再拖既野都打埋來，搞到手語堂都無上。

一月廿八日

都唔記得講昨天中午返左公司FF，幸好趕得切去睇話劇。

今日還在搞緊那些問題。

一月廿七日

去了看話劇《我愛阿愛》，入面提了幾個愛既問題，都幾值得深思，可是結尾好像有點收得兒戲。

晚上和獎門人屋企做節，飽。

一月廿六日

今晚獎門人上堂整卡通朱古力餅面裝飾，重整左個豬頭丙tim，超勁。

一月廿五日

今晚獎門人來了打邊爐，超飽。

一月廿四日

唔記得自己做過咩野。

一月二十三日

《音樂殖民地》呢本香港唯一既音樂雜誌都已經停刊左一段日子，老總袁智聰亦都已經有左新地頭，就係電橙。

食飯時間稍稍咁睇下Radiohead新碟既碟評，嘩，真係袁智聰style，個d形容語例如"如沐春風的歌曲"、"流水行雲、美麗閃爍的結他演奏簡直是萬般婀娜流麗"、"柔揚閒適，儼如揚帆出海的美好感覺"等等，真係五體投地。

一月二十二日

大趺市，耐性太低，係上午已經出左手，以$29.5買入一手中人壽，收市已經差唔多無左兩千。

仲有小小彈藥預備俾大趺市第二回。

晚上食小祇園，兩口子去食中菜，感覺超溫馨。

一月二十一日

昨天早上在圖書館借了一本《Ajax on Java》，自己都覺得自己很好學。

獎門人喉嚨痛，要快d好番呀！

一月二十日

去了看《藍莓之夜》，其實我本身好鍾意《重慶森林》既後半部，好多人都話《藍莓之夜》似，所以其實我都有一些期望。

總算無失望，一部看得很舒服既電影，時間和距離還是王家衛既最愛，我覺得有城市感既王家衛係特別好睇既。

晚上食煲仔飯，正。

一月十九日

今天和獎門人四圍行，買了一些蛋糕盒及曲奇袋。今晚獎門人上堂整勁硬曲奇，好好笑。

由荔枝角行去美乎，原來都幾遠。

一月十八日

由2007年12月開始，股市就開始下趺，賬面上真係損失慘重，不過我對現有持股有強烈信心。今個星期連續幾間美國大行公怖業績，撥備多其實大家預左，但係都令到個市再趺多級。好多隻心水股都入左吸引價，但係我始終都係未買，可能將來會後悔，但係我始終希望可以忠於自己既計算。

好多都話$120既中移動係2007年廿五倍PE，我一聽都覺得幾唔錯，但我一睇中移動份中期業績，EPS有$1.87，如果$120係2007年廿五倍PE，即係2007年全年EPS係$4.8，即係下半年收入係$2.93，未免太樂觀吧？

唔好忘記中移動現價係反映左發A股和母公司注資既期望，但同時仲有大陸電訊政策和3G既不安因素。廿五倍PE無問題，我都承認中移動盈利增進可以做到2成至3成，但係過份既盈利預測我會覺得有危險。

中人壽2005年內涵價值係$4.26，2006年$6.8，升左59.7%，偶像林森池話中人壽2007年內涵價值可以有$10，即係升47%，合理既，中人壽有咁多高質國有資產，隨著陸續在A/H股上市，佢既價值有升無趺。昨日趺到差唔多$32即係3.2倍PEG真係一個超大既考驗，今日已經回升，將來我可能會後悔無買。

招商銀行上半年EPS為$0.42，假設全年為$0.9，然後期望佢2008至2010既平均盈利年增長係35%，以PEG=1計算，2008至2010既合理價係$31.5，$42.5和$57.4。我希望我既投資可以做到年增長15%，所以係未有全年確實業績前，我只會考慮$28以下既招商。

現價既匯豐極吸引，同好多網友既分析一樣，匯豐現金流及資本強勁，根本唔會減息，次按只係一個藉口俾佢撥備和收買其他公司。我唔買係因為我已經持有及月供緊，再買將會無錢買中資股，佢一次又一次既下趺只係不斷挑戰緊我既定力。而家唔買匯豐，可能會係將來令我最後悔既一個投資決定。

對於宏利係2007年第三季業績都仲可以話自己完全唔需要為次按或相關產品撥備，我感到十分恩惠，再睇到佢可以趁加拿大帝國銀行因次按而出現財政困難時，能夠注入資本，我感到更加安心。雖然歐美日既市場增長有限，而係中國既保險業發展亦困難重重，但睇住宏利佔左一半既中宏保險，係內地一個個城市咁插旗，我好相信佢地要將中國盈利大幅增加既決心。現價絕對可以買。

一月十七日

呢幾日都係度睇緊西西既《白髮阿娥及其他》，西西寫得白髮阿娥呢個婆婆好真實呢，我睇既時候完全諗起我既外婆，佢寫一個人過左七十歲之後，年齡其實由十七歲開始向前，寫得很貼切。

我尚未讀完呢本書，但因為佢真實而我又經常在西鐵(線)睇，所以都幾驚佢有一d感人情節搞喊我。

值得推荐既一本書。

一月十六日

上完跳舞堂之後，去左食利時對面食拉麵，呀，好一般呀，好失望呀，原本我係有期望架！諗極我都諗唔到有邊檔拉麵係香港係好味既。

一月十五日

今晚只有我一個上手語，不過唔緊要，我實會教番妳。

一月十四日

星期一，今日很落力工作，總算有一點成果，盡力的感覺是良好的。

一月十二日

好耐無寫影評了，今日寫了《神探》和《安娜與安娜》，屈指一算，原來都已經寫了三年。

和獎門人去了赤柱，週圍行，週圍坐，吹吹風，哂哂太陽，一個星期既忙碌都沖走哂。去了Pepperonis食午餐，食了一個Small Size Chicken Supreme Pizza和Fettuccine Salmone Pasta，個pizza幾ok，脆又夠味。Pasta超正，個汁一流，又酸又滑，好惹味。

今晚獎門人做了鮮果蛋白蛋糕，蛋白蛋糕感覺比較健康。

一月十一日

繼續英文作文。

話說今日上上下堂，有人打電話俾我，只係響左intro個兩下，就俾另一位同事/同學M發現左個首係Radiohead既〈No Suprise〉，咁都俾人認得出，我都幾suprise。經過交流一番，原來大家都係聽著Brit Pop讀書，大家都覺得係冷天既深夜聽Radiohead係最入型入格。

無端端遇上同道中人，個份樂趣真係難以言喻。

世界真係細，原來呢個同事/同學M，竟然係獎門人既朋友M既大同和朋友S既偶像。

因為同佢講開Radiohead，我又聽番最新既《In Rainbow》，竟然覺得愈聽愈有feel。

晚上和獎門人去了九龍灣，原本去睇一個不知名鬼佬演唱會，後尾我地覺得遠，懶得行，所以只在九龍灣食晚飯。食了一間係淘大既日本野，上菜勁慢，食套餐都要等勁耐。

一月十日

英文作文training第一日，重遇一些之前一起上presentation既同事，世界真細小。

原來公司有自己一套style，其中一項係盡量小用標點符號，所以Dear和Regard等後都唔好加comma。另外亦有一埋"old fashion business English"係唔建議用，例如"attached please find"、"kindly"、"thanks in advance"等。

有趣。

一月九日

今晚上跳舞堂，幸好獎門人趕到，唔駛孤獨探戈。之後去左食芝士麵，正。

一月八日

今晚開始上手語進階班，但係差不多半堂去左講電話。如果有得選擇，我情願深夜收到電話多過和妳在一起的時候。

數數手指，我又有三部戲未寫影評，一月二月又有勁多戲想睇，例如：藍莓之夜、聲夢奇緣、玩具掌門人、魔街理髮師、長江7 號、大吉利是有限公司和The Assassination of Jesse James by the Coward Robert Ford (The Assassination of Jesse James by the Coward Robert Ford)，有可能睇哂嗎？

一月七日

和同事去了公司附近的Laksa食Laksa，確係唔錯，幾好味。

一月六日

北上。去了那間傳說中既廚安居，可能因為物價高脹及人民幣升值，呢度既野已經無傳說中咁平la，不過我地都買左好多曲奇模。

所有匯徒要注意，鄧小閑重出江潮，立即唱好匯豐。

一月五日

今晚獎門人開始上蛋糕堂，整左紙包蛋糕和芝麻慕絲蛋糕，正。

今日在書店亦看了一些有關我們那個目標的書，有時間真係要計算一下實現呢個目標，到底有咩條件。

一月四日

在自己本賬簿度，加入左資產值呢一頁，計下自己有幾多錢。發現隨著十二月既股市下調，係賬面上，我十二月既現金流入竟然差唔多完全被offset哂‧‧‧幸好只是賬面上。

一月三日

昨晚上第一堂既社交舞進階，有男女導師及助手，果然係唔同d。唔再係一步一步咁教，好難呀。

一月二日

新的一年開始。

元旦

行左一輪旺角後便返屋企溫書。

除夕

早收工，四點未到就放工，返屋企hea左一輪，晚上去了阿風屋企玩及係佢屋企樓下打邊爐，正。

十二月三十日

兩家人一齊去了賞花，之後八個人分四堆咁玩，我和獎門人挑戰整麵包，好成功完成排包，個個都話好味。另外亦造了朱古力鬆餅，都係咁正。晚上食日本野。家姐今日勁受小朋友歡迎。

十二月廿九日

昨日打唔成邊爐，今晚打。

十二月廿八日

今晚和獎門人的朋友係旺角食咖哩大王，勁spice呀。

復工第一天

呢排勁聽有耳非文隻新碟《東京鐵塔下》，好relax，聽得好舒服。其實佢好多年前一出現我已經識佢，不過而家真係勁上癮佢隻碟，幾乎日日都聽。

點解呢d碟無獎？

扑聲day

今日係我年終六日假既最後一日。我終於係呢個假期，完成我對《Mastering the SAP Business Information Warehouse》呢本書既目標，就係睇完第一節，總算係今年年尾，知道咩係Data Warehouse、ETL、Data Mart，不過要注意，係得個知字而已。

和獎門人去了睇《破事兒》，都係好似主題咁講，一些鎖碎事，諗落都有一些意義既。不過觀眾真係最好睇戲前都係對部戲有番少少認識好，特別係一個中女帶阿媽或一個老師帶一班初中生睇戲。

聖誕節

傳說係二千零七年前既今日，有條友叫阿穌出世，之後影響後世深遠，是唯真正既神檯級人馬。但係，在這二千年既歷史入面，都無咩記載佢做過d咩孝順父母既事。

今日，我和獎門人比阿穌更偉大，因為我們以我們既假期，去睇檔，去換取我地既阿媽係屋企盡情唱歌既樂趣。

來吧，讚美我們吧！

昨天下午出外會合獎門人和她的朋友(Miss S&F & Mr. M)，原本諗住去ELEMENT溜冰，點知勁貴，放棄。放左去尖沙咀搵戲院睇《破事兒》，點知一係無上，一係時間唔夾。搭船去灣仔，再行去銅鑼灣。

天陰陰的一天。

五條友係咁行，係咁食，好似去左旅行咁。原本M想買Jenny曲奇，點知無開，無得食，諗起就想食。之後去左"again" b，層層疊無貨。睇傢私，主要係混吉。晚餐去左小男孩，食物水準真係唔錯，食完坐左好耐傾計，坐到間餐廳暗燈。話時話，呢間餐廳都幾有靈異氣氛，如果係七月係呢度講鬼故都咪話唔驚。

今日獎門人早放，一起回家做勞作。我地既藝術品差唔多完成左一半la。

昨天Miss S話我多界，唔夠我鬥。呢番說話當然令我飄飄然，但亦令我反思了一下自己。

黃子華係最近期呢次棟篤笑講，佢從來都未放棄過去追每一個潮流，縱使唔明，但係都要追。我搭車和等車既時候(我有時會覺得自己既人生，做得最多既就係等車)，反覆咁諗呢番說話，差點被感動到喊。

從懂性以來，我咪又係好努力咁去追每一個潮流，每一個潮流都改變了我一點，我既個性便是從這種極濫既搶知識方法所建立的。就好似一本書，由一點一劃在白紙上寫成的。

回想過去，Brit Pop年代，我唔係自誇，我到而家，都可以係三句歌詞內，認得出Radiohead、Suede、Verve、Pulp、Blur、Travis等樂隊既歌。裏原宿年代，唔好講笑，雖然當時我從末去過日本，甚至一件裏原宿系既產品都無，但係我絕對認得大部份當時Bape、Undercover、NEIGHBOURHOOD既衫，亦可以好似背書咁講起藤原浩和Nigo和高橋盾等人既關係。波鞋年代，比較令我自豪既係，雖然我唔買nike鞋，但係我識得分Dunk Low Pro和AF1。例子多不勝數，講廿年都講唔完。

人生既小節，就好似係喜瑪拉雅山山頂打個哈次，會造成太平洋一個龍卷風一樣，事態發展永遠都係咁出人意表。

追一些潮流，事後竟然令我愛上了讀村上春樹、卡夫卡、劉以鬯既書，睇張五常、林行止既經濟分析，唔好問我點解，我都唔知。可能只係因為我特別鍾意睇書，講到睇書，詹宏志、梁文道甚至劉德華都係我偶像，我信人唔睇書，真係會死呢番說話，所以曾揚言以後唔睇書既張五常都係我偶像。

如果硬要我認屬於邊一個界別，我會自認為電影界，雖然我重係一個小學生。

如果可以，我希望我既人生到目前為止都只係前言。

星期日

其實我正在放緊一個連續六日既假期，今日係第三日，如果早幾日行街踢到金既話，可能我而家已經同獎門人係築地既大和壽司門口排緊隊或者去台北睇下改左名既中正紀念堂，視乎踢到幾大舊la。可惜，踢到鞋穿腳破，都係踢唔到。

結果，我係呢個星期日既早上，八點幾就起身，上網睇報紙。係《明報》既〈聽齣好戲〉專欄，睇到介紹一部好多年前，好令人懷念既戲，就係梁朝偉做劉民醫生、劉青雲做臥底、許志安做見習醫生和梁詠琪做學生妹既《流氓醫生》。

《流氓醫生》係1995聖誕上畫，戲入面將中上環拍得勁有人情味，亦好似《明報》既專欄所講，呢部戲入面既音樂真係幾正。《流氓醫生》呢部戲講上流事業同時亦好有人情味，唔賣弄色情，唔賣弄暴力，其實香港都重有好電影。

本片導演李志毅同年亦拍了另一有心之作《救世神棍》，主角係陳小春和梁朝偉。

生日快樂。

今年生日，我地都好忙，但都希望妳鍾意為妳準備既那些驚喜la。

係將來既日子，我地都可能會愈來愈忙，為了事業和家人，我們既生活要變得重質不重量，花多點生思在生活上，享受及珍惜一起既時間。

星期五

因為聽晚要做節，所以今晚預早慶祝獎門人生日。

哈，先送了妳一盒我精選既Leonidas朱古力，自己都覺得好名貴呀。

難得妳今晚咁早放工，可以早少少去食晚餐，和妳去了伊藤 (Ito Shan)食。

叫了一個二人前既Shabu Shabu餐，有刺身、天婦羅和火鍋的牛肉、雜菜和烏冬。刺身都有差唔多十件，好新鮮，好好味。原本個餐唔係天婦羅，但因為我地唔想要燒物，所以師傅幫我地轉了做天婦羅，有兩隻蝦及一些雜菜，唔錯。牛肉真係好鬼正，肉味夠，無渣。

呢間餐廳面積比較細，位置亦唔方便，我相信住太古城和側魚涌都未必知有間咁既野。可能因為咁，所以客人以外語人士較多，即日語人及國語人，感覺良好。

希望妳鍾意我份禮物la。

星期四

今日在公司的咖啡店拿了一些用完的咖啡渣，聽講可以當肥料用，佢含有大量既氮，對好多植物都有幫助。

其實除左我公司既咖啡店，星字頭個間其實都有得拎，不過要預早打電話去，咁店員就會包好等你。

今晚我立即幫屋企既幾盆花花草草都放了一些咖啡渣，嘩，勁香。

星期三

昨天下午去了中環開會，竟然要考眼力，真係低級趣味。

獎門人開始了新的工作，希望妳做得開心LA。

一起努力吧。

星期二

星期六係銅鑼灣一個人行書店既時候，我決定左，唔再睇Peter Drucker既《The Effective Executive》了。

我呢個決定絕對唔代表呢本書唔好，佢入面講既野非常有用，我睇左半本，睇左佢講點樣分配時間和點樣貢獻自己去令更有效咁做正確既事，獲益良多。有機會和有需要既時侯，我一定會再睇或介紹俾人。

唔睇既原因，係我覺得與其睇點樣有效咁做野，不如身體力行去做野。

都休息了一段好長既日子了，好像很久都沒有做吸收，忘記了自己既致勝秘訣。

Stay hunger，但係都要學而時習之，咁先至不亦樂乎。

星期一

今天是獎門人的舊歷生日，我地兩個都放假，我一人獨力做蛋糕，目標係朱古力雜果蛋糕。

先焗一個朱古力海綿蛋糕，再將一些藍莓整碎及士多啤梨切片。點知個蛋糕竟然焗唔起，硬到成塊餅乾咁，勁大濟，唯有立即再搵其他食譜再整過，幸好今次個效果較好，起碼見得人。將蛋糕一分為二，中間加入混了朱古力既cream，再在中間放了很多藍莓溶和士多啤梨片，將另一塊蛋糕放上面，途上大量cream，將士多啤梨分半放好，用朱古力漿做了一些裝飾，再在中間用藍莓砌了一個A字，大功告成。

希望妳鍾意LA~~

星期日

中午去左行公園，勁relax。

今晚同屋企人去三聖食海鮮，個砵酒焗蠔真係勁好味，個邊夠硊，個身又多汁，正。不過今次個湯就無上次咁正la，相信因為d料無咁多la。椒鹽瀨尿蝦好惹味，正。

星期六

今晚去睇黃子華，想睇左好多年，終於有得現場睇。佢講追潮流既盲目和內心既二五仔都好正，我們就係需要有人肯講出我地係幾咁病，反思下自己既行為。

星期五

昨晚被妳教訓了，其實妳真係講得無錯，我無需要咁樣。

星期四

當你以為自己可以改變世界時，其實世界正在原諒你的無知。

星期三

世界好大，自己很小。

星期二

總覺得，自己正在溶解。

星期一

今日都重係好飽。

史丹利五為《千言萬語》寫左一篇好深入既分析，超利害，我既影評完全唔入流。

《千言萬語》絕對係香港近十幾年其中一部最重要既電影。

星期日

獎門人一家入元朗打邊爐，買左勁多野食，全海鮮宴，超正。今日有兩個生日蛋糕食，哈哈。

晚上係元朗散步，馬田個邊多左幾間靚餐廳，搵日真係要試下。

星期六

生日。

一早去打籃球，同幾個中學生打二打二，打兩場win兩場。

和獎門人去Mega box，買野做手工。

去睇michael lau玩具展，無得買DJ TOMMY，只有PRODIG，但係因為要抽，唔好彩抽中樣衰個款都幾慘，所以無買。玩左三次$100抽獎，中左一隻FAT WEST 6"公仔、一本Nike x Gardener書和一本SFCC書，收穫豐富。

晚餐係cwb間小男孩食荷蘭菜，籃貝真係勁好味。

估唔到妳有神秘野，多謝哂，錫哂妳。

星期五

平安無事。

阿雞生日快樂。

星期四

返工。

抽唔中中鐵。

星期三

再放假。

去了歷史博物館睇香港上海銀行發展史，之後再去科學館玩。

睇《安娜與安娜》，有點累，係咁訓，全靠獎門人事後講返俾我知劇情。

晚上跳舞，倒數第二堂。

星期二

週年日，放假。

昨天睇《東touch》既小克專欄，再一次證實左我一向認為小克比阿德其實更火爆係正確既。佢今個星期無畫畫，兩版係哂字，講現代人咩都要保護，電話要保護套，遊戲機要保護套，連做人都係，結果咩都唔敢試，咩都捱唔住，睇得我勁有感慨。佢亦都引用左一篇網上流傳既文，實在值得一睇。

今晚去了Bacu食飯，呢間野真係幾好味，不過今次好似咸左少少同埋攪到我地條成條食道都變左黑色。

見到陸東去為葉太站票，真係令人大趺眼鏡。我從《金錢之王》一書認識陸東，佢既形象一向都係勤奮有堅持有智慧，令香港人自豪既香港人，但估唔到係兩太之爭，你竟然選擇站在這一邊，真係令好多人痛心疾首。

今次選舉好睇，下次選舉重好睇，試諗下民主派係港島區有幾多有實力既人，點夠分？

星期日，立法會港島區補選，野人之戰。

不入流政客大戰敵人既敵人。

不入流政客之不入流，在於她的面具實在太假，呃唔到人，那些表情和語氣都將她出賣了。

敵人既敵人，係咪就係朋友？呢個係所有聲稱支持民主既人都應該考慮。王岸然話她為民主派的最大作用就是妥協，我覺得和事實不遠。

有心者，請看一看馬家輝講03年7-1遊行，再諗下應唔之應該支持敵人既敵人。

星期六，十二月一日。

今朝如常打籃球，外投既感覺真係返緊來了，太好了。

井上雄彥今個星期出左兩本書，我都睇左，分別係《浪客行》和《REAL》，《浪客行》一向都多道理講，估唔到今期《REAL》都有。

野宮教清春射外投，清春經過三日苦練後，稍有所成，野宮卻叫清春忘記所學，清春不明所以，野宮說"手持小刀，並不代表要出鞘"。

原來清春最利害的是野宮快速過人，如果比賽只記著外投，便會影響了本身最強的打法，外投只是一個秘密武器，亦即是要有兩手準備。

手持小刀，並不代表要出鞘。這代表要經常作好準備去把握可能會隨時出現的機會。

星期五

唔經唔覺，又到月尾。

星期四

稱得上係流行漫畫界入面，最令人摸不著頭腦既《二十世紀少年》，在兩次令人極度火爆既結局後，當大家以為又係一部虎頭蛇尾，故事偉大得失控既漫畫時，竟然，殺出了上下兩本既《二十一世紀少年》，為大家解開了呢咁多年來既所有迷團。

我未睇個本書，但據稱真係解左唔少之前既迷，仲話睇到之前個d失哂控既故事，係有計劃過既。

一日未睇，我都唔係好信。

星期三。

八步牛仔好難跳呀！

《舞‧舞‧舞》的男主角說，他的人生就像舞蹈內舞步，全部都是"被"預先編排的，他只能順著跳。但他要在固有的安排內，跳得令人驚嘆不己的好，這便是他的人生目標。

星期二。

呢排勁多戲想睇，《神探》必睇，《安娜與安娜》又係必睇，今日睇海報見到有新新戲《聽說你愛我》由岩井俊二做監製，都幾令人期待。

星期一。

今晚係尖沙咀間水星咖啡店慶祝阿風生日，呢間野既食物都真係幾高水準wor，不過最衰有人食煙，勁臭。我地星期六整個個蛋糕大受好評wor，勁。

之後行星光大道睇燈飾，尖東已經有好多la，但係港島都只係得好少。

星期日。

今次輪到家訪獎門人屋企，哈，打搞哂。睇哂今次雲南之旅既片，勁開心，好似去多次咁。

當然晚餐勁多野勁好味la。

星期六

今日係獎門人屋企整蛋糕俾阿風，話就話我係主力，但係都要獎門人指導。

晚上食素，個糖水轉左款呀，不過好彩新呢款都好飲。

呢兩日我都好唔貼市，繼昨天忘記惠理上市，錯失以低於上市價買入後，今日再在中午食飯時先發現SOHO趺到7.8。

諗左好耐，到底買SOHO好定係等招商和中移動，SOHO始終係新股，營運資料唔多，真係講個信字。如果只係睇今年頭三個月既資料，唔算特別好，但主席話全年必定達標。另外睇到一些報道話，SOHO既寫字樓真係好賣得，但係商場店舖比較差，有幾個商場仲同小業主有唔少風波。

市場擔心宏調，但其實宏調對象主要係住宅，SOHO全力做商廈，其實完全無影響，唔駛驚。公司有咁多年歷史，見過下風浪，兩位主要高層仲係年輕，北京搞商廈既對手唔多，絕對值得投資，關鍵係幾時值得去買。

中移動與目標仲有一段距離，招商似乎都好難破三十蚊，咁係咁易買多兩手SOHO都無大所謂既。定左7.8入兩手，點知下午一開始就升番上8蚊，尾市趺番少少都係去唔到7.8。諗咁耐，結果都係得個諗字。

心入面其實仲係想入惠理。基金公司情況就同保險公司一樣，你愈講得個樣係搵笨，而佢又係社會上必需既，咁做佢既股東，絕對係著數既。

星期四。

真係充滿驚喜，你有爭取過，唔係靠好彩，係應得既，比心機吧。

抽唔中惠理，開市倒趺，呢幾日真係咩都趺，招商勁吸引，惠理和SOHO好吸引，中移動仲要等。

星期三。

人生總是充滿起趺。

星期二。

放完三日假，今日番工完全係累爆，完全唔想做野。

上手語堂前食樂景，佢既漢堡真係正到爆。

今日放假，做左勁多野。今朝又去打波，真係一發不可收拾。回家後寫了四篇影評，分別係《色，戒》、《兄弟》、《夏天的尾巴》和《野良犬》。真係過份，國慶節睇既《色，戒》隔左成個幾月先寫。

終於去左剪頭髮，無咩新意。

睇雜誌先知，原來浦澤直樹既《二十世紀少年》並唔係爛尾，而係有《二十一世紀少年》，真係估你唔到。

朝早和leelok去工聯會報名，之後食早餐。

無投票了，民主派唔爭氣，又唔想投親中。

和獎門人睇《野良犬》，幾特別，結局有點可惜。

係獎門人睇《四百擊》，連睇兩戲，真係勁。今晚我地又煮野食，好味。

今朝去左打籃球，勁開心，好耐無打了。都係射左波同埋走下籃，跑多兩步都有d上氣唔接下氣，不過射波真係超開心，要記住，投球後隻手要繼續舉起，咁樣穿針個下聲先會好聽，型。

遲下搵人單挑先。

下午接獎門人放工，好耐無長週了，去食蘭芳園，之後係圖書館睇左好多本《Mook》，借左幾本漫畫返屋企睇。行銅鑼灣，超勁多人。今晚去太古城食日本放題，係比較貴，但都值得既，超多野食。

今朝為左慶祝三位同事升職，去布袋澳食海鮮。咁大個仔都未去過，原來我地八條友大部份都係未去過既。食左好多野，但感覺好像三聖比較好味和平。因為入到布袋澳已經黑哂，咩風景都睇唔到，只係知自己一個俾山包圍既海邊，勁大風。有兩個同事今日都有車，包接送，食完送到我返屋企樓下，勁開心。不過諗起要我楂都幾煩，條路又多人又多車，隧道又貴，原來而家大欖要成廿八蚊架，坐巴士真係勁抵呀。

不過如果一家大細，點都係自己車方便好多既。

聽晚father生日，但係我一早約左人，所以唯有今晚同獎門人番屋企為father慶祝。我地送左一部超級大部既計數機俾father，咁佢以後計數就易睇好多。今晚個湯幾好飲，獎門人飲完可以再飲。

星期三。

今晚上堂前食飯得三條友，食飽後仲有勁多時間，深水步又無哂野睇，結果係西九龍中心行左一大輪，勁廢。

學探戈，fing到條頸都痛都重係未掌握到個神韻。

今晚匯豐融資發表第三季業績，需要撇帳34億美元，當中７億元與地產抵銷信貸有關，其餘大部分與無抵押貸款及信用卡業務有關，此撇帳令到匯豐融資季度虧損15.8億美元。但匯控同時表示，若以整個集團計，因為其他地區如亞洲既強勁收入幫助，頭三季收入會有所增長。

詳細內容我未睇，但我懷疑匯豐今次係見間間大行都撇帳幾十億，自己又有其他地方補助，所以有咁多撇咁多，等幾年後亞洲增長減慢時，可以利用回撥，令到條數好似年年盈利都有增長咁。

星期二。

今晚上完手語堂，和獎門人去了吉野家食牛肉火鍋。係唔錯wor，牛肉同平時牛肉飯既一樣，有牛味又夠薄。可能呢度比較少人，所以服務態度比大家樂好得多，好快就有人來點火，上次我食大家樂由起爐點火至加水都係自助。

在sogo買了兩盒熊貓公仔，很有趣。在meter children counter見到meter，當然無打招呼，佢都唔識我地。睇佢個外表咁cool，都唔似上網寫野咁nice。

抽了一手惠理。事先聲明，我清楚知道以下不利因素

1. 在牛市結束時，惠理既表現費將會大減
2. 在現在的大牛市中，比較難去找尋價值型股份
3. 隨著基金的漲大，要達到過住的回報，難度極高
4. 是次發售的股份全屬原有股東舊股

對於一和二，我認為在牛市結束時甚至熊市時，正是價值型投資方法最有利的時候，因為到時將有大量錯價股份供選擇，短期盈利波幅是必然，但長線必定跑出。三是值得擔心的地方，同時集團近年亦開設了一些大路的產品，能否保持價值型投資，要多加注意。離場既原因可以有好多，但是次離場的是舊投資者，而不是管理層，謝清海和葉維義既持股不變，惠理支持者反而要多謝呢兩間售股既公司，如果唔係都無得持有惠理。

星期日。

昨天和獎門人去了睇《夏天的尾巴》，一部不錯的電影。台灣既鄉郊電影成日都拍得咁靚，香港幾時先有呀？

今天我們造了一個特濃朱古力蛋糕，個邊同個底焗燶左少少，哈，但係都幾好味。

借了一本有關BI既書，雖然和我工作上無直接關係，但都希望有一些基礎可以準備一下。

晚上食煲仔飯，又到這季節了。

還記得在讀小學既時候，和表弟坐著你的的士，穿梭於港九新界，坐綠色的士過海，呢種咁特別既經驗，係你俾我既。

從小至大，你對我既評價都係一樣，亦從來只有你咁形容我，我對你既評語亦深表認同，諗深一層，你睇到呢一點，其實你比我睇得更通透。

數星期前，你說除了歐洲以外，世界各地你大多都去過，亦希望在將來可以駕車遊歐洲。

一星期前，我和你同檯食飯，一張14人大檯，我坐在你的對面，我們沒有交談。在電車上，我和獎門人先行落車，我還聽到你對我屋企人說我們很有夫妻相。

這便是你的性格吧，總是大方地欣賞別人的優點，總是幫人，總是可以站在其他人的立場，總是不給別人麻煩。

安息。

咁快又到星期五，今晚既knowledge sharing，我地講左三個半topic，當中我講左個半，咁我之後就唔駛再講la。

Radiohead - Jigsaw Falling Into Place