這麼快便完結了連南四天義工之旅，整體上感覺良好，但個別睇就好有"唔夠多"既感覺，對當地學生及獨居老人既幫助都唔夠，畢竟車程遠，四日內其實有兩日是在車上的，實際和當地人接觸的時間並不多。
講番上堂，情況絕對慘烈，學生基本上明白甚麼是數獨，但要他們在這麼短的時間內去完全一個數獨便很有難度了，希望佢地將來還會繼續玩這個遊戲吧。攤位方面，出發前在香港準備的材料完全用唔著，全靠獎門人的幫助，才能在一晚內在十本書中找出題目讓學生玩。以下便是攤位遊戲結束後的場地。
在第三日的早上我們跟隨一些學生去了山區上的老人屋企探訪，狀況其實是不太差的，反而山上的大自然風貌實在是令我們響往。
明天一連四日便會和獎門人及steve和其他義工一起往連南做義工，去到當地既主要工作是以較輕鬆既形式對當地既初中生進行教學，當中包括一些課堂及攤位遊戲。我們三人負責的課堂是數學科，到時會教兩班中二生玩數獨，我和獎門人已準備了超大量數獨題目和教材。攤位方面，我會和另一位義工負責經典名著和當代文學，在獎門人的建議下，我準備了十五條關於《三國演義》的題目，學生到時需要以速讀去從書中搵答案。
以下就係個十五條問題，有幾題真係唔睇書係點都無可能知道答案既，哈哈。
另外今次既其中一個目的係增加該學校圖書館既藏書，所以我地個個人都要帶幾本書去當地。﹝那些書是其中一位義工買的，我地只是負責帶，及利用那些書去設計課堂和遊戲。﹞
近呢幾個星期簡直係全球金額界既一個永世難忘既經歷，美國五大投資銀行相繼"消失"，股市小上大落，大部份人都損失慘重。美國專登做場戲去反對個救市方案，引多左幾個國家出手救市，但係個方案已經同最初那個面目全非，重有無功效無人知，不過現在最大問題始終都係市場信心盡失，講緊既係唔單止對金融產品無信心，更係對交易對手和交易平台無信心，呢樣野好難救。
講到我既操作，實際上係無任何操作，一味睇住趺，甚至有時連趺到幾錢都唔多記得，呢一個月唯一同股市有關既就係收左兩次股息。
咁算唔算係已經做到心中無股手中有股既最高境界？
我第一次聽〈20th Century Boy〉呢首歌，是來自一部講Glam Rock年代既電影《紫醉金迷》(Velvet Goldmine)，當時聽既係Placebo番玩T-Rex呢首經典rock歌既版本，以下呢個直頭就係電影中抽出來既片段，Placebo更加係真人演出，更可以見到初出道既Jonathan Rhys Meyers和未係十分紅既Ewan Mcgregor。
後尾當然係搵左原版來聽，其實差唔多，最大分別可能只係係Placebo主音把聲姣d。
之後再接觸另首歌便是在漫畫《二十世紀少年》既第一期了，事隔多年，《二十世紀少年》變左做《二十一世紀少年》咁去結局，更加拍成三集電影版，可謂功德完滿。
想講既係當中既傳承，如果唔係一套九十年代既電影，我係唔會認識呢一班七十年代Glam Rock友及令我極度著迷既迷幻音樂。就算我當時無去到戲院睇呢部戲，我都可以係漫畫認識呢首歌，都有機會去追溯番呢個年代。就算我連漫畫都無睇，都可以係《二十世紀少年》電影版入面認識呢首歌，可以咁講，《二十世紀少年》將呢首歌﹝又或者係那個迷幻年代﹞帶左去二十一世紀。
《二十世紀少年》漫畫入面其實造左好多野去記錄主角們少年時既文化，係好有心咁去做一個文化傳承既記錄，萬丈目係死前所講既一番自白，其實係所有潮流追求者既哀歌，絕對值得細味。
故事內容既詳細討論會遲下在Darth Mike Movie Record講，不過現在有三部戲都未寫，有排等。
如果話verve影響左我既人生，又好似誇張左d，但係如果話影響左我既步行方式，就絕對無錯。我份人比較膚淺，我最鍾意verve既歌係佢地最hit既〈Bittersweet Symphony〉和〈Drugs Don't Work〉，而〈Bittersweet Symphony〉既招牌MV，Richard Ashcroft既垃圾頭同埋完全係無視於街上所有人既行走方式，絕對係永恆咁寫入左我既記憶。
我亦都有一段時間完全沉迷於〈Drugs Don't Work〉，真係感動到震，適合所有傷心緊或想營造一個傷心效果既人。
唔係話verve既其他歌唔好聽，而係我只識呢兩首，其他係《Storm in Heaven》、《Northern Soul》和《Urban Hymns》既歌就讓我永遠留有一個美好既期望吧。
在《Urban Hymns》的超成功後，verve便散band了，成員作了個別發展，我也擁有一張Richard Ashcroft獨立後既第一張唱片《Alone with Everybody》，並且被感動了﹝應該當年是和Travis一起被感動的，那個怪可憐既Brit Pop時期﹞。以下係樂迷以verve年代既片段自製既Richard Ashcroft獨立作〈I got my beat〉MV。
樂壇永遠都係咁神奇，一隊散左十年既band竟然可以重組，重可以出番一隻玩初出道風格既唱片。係今次既《Forth》，我絕對相信Richard Ashcroft和結他手Nick McCabe做左好多妥協，因為風格並不像他們最hit既《Urban Hymns》中以歌詞主導，反而像早期唱片般加入左好多結他既特別演奏，我諗今次Nick McCabe唔會再覺得自己似一個普通樂手吧。
而這隻《Forth》，終於成為我既第一張the verve既唱片了。
現在正在聽緊Metallica既最新大碟《Death Magnetic》，聽人講話佢地返左去佢地舉世聞名既黑碟前既風格，如果係真既話就真係全世界既金屬迷既喜訊。
目前為止聽左四首，全部都有有番咁上下長，起碼七分鐘一首，玩既係正牌抽鞭式金屬(Thrash Metal)，那些超快密集式既樂器真係好似抽鞭一樣，Kirk Hammett既結他和Lars Ulrich既鼓真係超勁，好似機關槍一樣，據說James Hetfield有嚴重既酗酒問題，但聽落把聲好似同以前無咩分別，可能其實一向都有呢個問題。
係Metallica出前一隻碟既時侯，我認為呢隊樂隊已經可以當佢地死左，但估唔到佢地可以咁樣行番轉頭，真係好野，如果可以睇佢地既live就好了。
近排睇左好多漫畫，重新咁睇過哂全套《我要高飛》，古谷實既近作《獨男》和近年日本熱作《爆粗BAND友》。
《我要高飛》實在係日式運動漫畫既再一次成功示範，將體操呢一樣係漫畫題材中少見既運動，結合埋勵志、搞笑、友情等元素，難得是動作不算太跨張及主角唔係咁無敵，從而提高左可讀性。
古谷實既《獨男》應該係佢到現時為止，探索人性既作品入面，最完整及最受控制既一部。古谷實唔再畫《稻中》一類題材當然係人間一大可惜，但我覺得佢可以係成名後還不斷以唔同題材既故事，去實驗或展示人及社會既黑暗面和當中少見既希望，呢一下我覺得值得敬佩。結局個下平淡中見珍惜，可以講係將感情收得好埋既激動。
《爆粗BAND友》絕係係喜出望外，估唔到可以係有意義得咁緊要。全個故事也充滿反嘲既味道，對各式各樣既野不斷進行反嘲，潮人既弱智自我形象，金屬樂隊既現場表演以另一角度去睇其實好幼稚，好多內容都值得再三回味。
隨著奧運既開始，大家也展現出從未有過咁高既愛國心，不論係咩運動，只要有中國隊既，大家都會支持。令人驚喜既係，從電視見到現場有大量觀眾除了支持中國隊外，亦十分支持香港及台灣既選手，另一下真係見到人民既進步。
呢排睇左咁多體育項目，發現原來我睇過好多唔類型既運動漫畫，本身想整一個表紀錄低，但實在有點無聊，加上覺得會有好多唔記得，所以放棄左。
奧運會入面既運動員全部都好專業，但其實評述員都可以去到好專業，唔好計個別只講單項運動既教練及前運動員，如雷sir、方力申和李麗珊等，佢地當然對個別項目十分專業。想特別一提既係萬能型評述員，佢地好似咩類形運動都可以講到有紋有路，遇上前面所講既專業評述員時，更可以提出一些有啟發性既問題，兩台都有代表人物，分別係鍾伯光和徐嘉諾，網上更有"萬能鍾伯光vs百搭徐嘉諾"既討論。
講起評述員，實在唔可以提下今次明珠台既幾位廣東話評述員，佢地幾條友似搞笑多過講體育，唔係話佢地評述得唔好，而係佢地係評述既過程加插左大量既爆肚，更加有唔少人特登為左睇佢地而睇明珠台。
星期日原本諗住去行山，但實在太熱，轉變計劃去睇戲，睇《天水圍的日與夜》，實在唔錯，平實既一部戲。
火龍果已經有十支芽仔，但好似唔識大，好軟弱咁。昨晚幫其中一棵蕃茄換左一個大盆。
今日打風，九號風球，昨日好似大家都已經確定今日實打風咁樣，都幾有趣。
之前上網聽人講話火龍果好易發芽，所以果日食完個紅肉火龍果之後，專登食剩小小，洗淨種子後再哂左一日，點知真係咁鬼勁，播左種4日已經有幾粒種子發左芽。
不過要期望生火龍果似乎係無咩可能，因為好似要種幾年同埋要長到好似一棵樹咁大先有果實，所以今次都係當種草咁玩下。
好耐無影過我既蕃茄了，趁住昨日打風，即刻幫佢地影靚仔相。佢地放係室內，當然無怕打風。
除著佢地愈來愈高，就愈來愈容易偏埋一邊，所以七月尾係花墟買左幾技鐵去輔助下佢地。點知裝左都唔夠廿日，那些鐵枝已經唔多夠高了！可能因為分左盆有足夠營養吧。
不過其實我都有點坦心現在有徒長既問題，所以而家都諗緊係咪需要摘頂心及落基肥，去令到佢地可以長葉同埋更粗壯，不過我實在唔多識肥料既運用，有無人可以指教下呀？
另外竟然無端端有條新芽爆左出來，超神奇，又會慢咁多都有。
匯控在剛過去的星期一公怖了業績，詳細既分析可以睇報紙及其他專業得多既blog，但我覺得呢次又係一次良好既做數示範同埋期待管理既例子，好早就揚哂會有盈利倒退，所以連盈警都唔需要發，加上有效咁將特殊收益於唔同時期入賬，令到個成績可以係大家可接受既預期內做到保留盈利給將來可能出現既更壞機會。
值得一提既係，今次業積係幾個指標性數據上都做得唔錯，例如成本收益比、核心資本和賬面值，都有所進步。
另外更剛巧在同日亦公佈了匯豐銀行重奪香港樓按市場一哥，實在值得高興。
但要注意，根據最新既盈利數字，匯控既市盈率已經高過十了，但當中要視乎你點睇那些撥備，如果唔計撥備，上半年盈利比2007年上半年是有增長的，而其實上半年的撥備已經比2007年下半年少。
雖然我認為匯控管理層唔會咁做，但如果下半年情況真係會有好轉，然後那些次按撥備可以回撥，加上賣總部及法國業務的非經常性收入，個下增長都幾得人驚。不過我覺得匯控會將那些回撥留番比當那些新興市場增長放慢既時侯才慢慢用，去支持一條靚仔既數。
上星期日一行四人去左行山，四人包括獎門人，阿風，阿爺和我，由黃泥涌水塘行去大潭篤水塘，中途越過紫蘿蘭山。
炎炎夏日，幾乎所有人都認為我地呢個行山行動係自取滅亡，但幸好我們亦能安全完成。因為當日雖然勁好太陽，但常有涼風吹過，只要多飲水便無咩問題，不幸既係，我地四個都係行左未夠7成路程已經無哂水。
呢條路最辛苦係開頭一段，由黃泥涌水塘行上去紫蘿蘭山山頂，上下落差都有成二百幾米，行左大約40分鐘終於去到高433米既紫蘿蘭山山頂，風景幾靚，望到維港兩岸及幾個離島，在此我地停留了一段時間，因為環境實在唔錯。
行左一段幾恐怖既落山樓梯之後，便與衛奕信徑第二段合併而行，中途沿著山崖行，見到幾個水塘及淺水灣，感覺甚為舒暢。
行多大約個多小時便去到大潭中水塘，要圍著水塘行至大潭水塘道才有水泥路行，此段幾唔好行，路面超多碎石，行到腳板都幾痛，行左超過半小時。
到達大潭水塘道後便可沿大路在大潭篤水塘邊行，行到去大潭道便有車去柴灣，全程完畢，行在大約三個半鐘，四人都在缺水狀態，係水塘邊缺水都幾無奈。
想睇相既話可以去我地既facebook睇。
離開既時侯，同阿爺一路行一路講，又再一次挑起挑戰毅行者既決心。但現時實在言之尚早，我們還是分段行哂全條麥理浩徑才再講吧。
看著你，我真的頭也抬不起來。
七月十三日，我和獎門人在銅鑼灣既江帆買了一大一小的拼圖，小的那個是漫畫《鐵拳浪子》內，矢吹丈和世界拳皇荷西比賽結束後，坐在台上的椅子全版變成灰調的那一幕，亦即是漫畫迷必定知道的矢吹丈將自己燃燒至化灰既超級經典畫面。
呢個網將劇情介紹得幾好，有心人可以去補習一下。
我唔係屬於《鐵拳浪子》呢一代既，應該足足差左十幾廿年，但係自細都知道有呢一部燃燒至極限既漫畫。同矢吹丈最近距離既一次，發生於《去吧，稻中兵團》入面既井澤身上，係故事入面井澤係矢吹丈既死忠支持者，甚至有一個矢吹丈髮型，簡直係型到爆。
真正睇《鐵拳浪子》係後期睇重出既版本，每一隻每一場比賽我都期待燃燒至灰燼，可見我之膚淺。
矢吹丈絕對係一個悲劇人物，少年時期坐監，去到邊都好似天地不容咁，直至遇上拳擊才找回人生的一些意義。但矢吹丈卻有一個永遠也擊不倒既對手，力石徹。力石徹是日本拳皇，所受到的持遇和尊重，和矢吹丈是天壤之別。
力石徹知道矢吹丈的利害，亦想在台上正式打倒矢吹丈，但礙於兩人屬於不同重量組別，力石徹需要減磅才能迎擊矢吹丈。兩人的對戰是本漫畫的高潮，力石徹真的將主角矢吹丈擊倒，但戰後力盡而死，矢吹丈永遠都唔可以係台上報唔到呢一戰之仇。
力石徹死後，矢吹丈完全無哂生存意義，及後以近乎尋死既作戰方法，先後挑戰無冕皇帝卡路斯和世界拳皇荷西，最後含笑死在台上。
矢吹丈並不幸運，亦不幸福，但他找到人生目標，並以人生既全部去追求，最後將生命燃燒至灰燼。
上星期四和獎門人去了一年一度的書展，收穫豐富。我喜歡睇書，亦意圖及企圖去追求文化。但到底書展係咪真係一個宣傳文化既問題，我無意見，對於我而言，書展提供一個可以最高八折最低無底線既機會俾我去買書。又可以咁睇，呢一個就係香港既文化，一大班人，咩年齡都有，愛書既有，買書唔睇書既有，睇書唔買書既有，搵偶像作家簽名既有，睇明星既有。
有人話一大班人，平時唔多覺真係咁鍾意睇書，特別係另幾日，為左去趁熱鬧而去迫聲死，好傻。但你睇西班牙掟蕃茄節，咪又係咁傻。我覺得任何一種主要由大眾市民造成既習俗，都有該地方既文化色彩，都能夠代表該地方既人和事。
早一兩個星期，油價日日升，股市日日趺，好多股票都進入左吸引既價錢。
曾經考慮過趺到一零幾既中移動，但諗到以中移動既大約25%年增長率，及在3G和重組既陰影下，條安全線﹝profit margin﹞set深d比較安全，所以都係繼續我對中移動既估值，就係只考慮PE二十倍以下既中移動。
市況平淡，更覺股息既有趣，唔經唔覺呢一兩個月都好多股息收入，宏利、匯豐、中人壽既股息都相繼到手。
最後終於忍唔住係七月十五號買左一手匯豐，買入價$113.8，買完之後係咁趺，即日最低已經試過$112個幾，不過無咩所謂，匯豐現價真係抵。係呢次信貸危機，大家都睇得出匯豐處理問題既能力同埋環球部置既優勢。以匯豐現時既資本力，好大機會可以趁機買左不少處於賤價既優質資產。加上大約6%既股息率，絕對是趺左都可以繼續安心持有。好坦白講，如果匯豐趺多幾蚊，我好大機會會再入。
可能因為伊朗問題有轉機﹝國務院第三號人物去左同伊朗接觸，起碼叫做有得傾，伊朗和以色列開戰機會立即減少﹞，油價星期四開始係咁趺，股市變左係咁升。以星期五市價計，匯豐$120，如果係做短炒既，已經有二千四執，不過我當然唔會咁快放，匯豐個價而家重係偏低呀，得唔夠十倍市盈率，如果去番十五倍都咪話唔發達﹝以匯豐既增長率，係正常市況絕對配得起呢個市盈率﹞。
七月五號下午，和獎門人去了排隊睇Michael Lau新figure，場面超勁多人，係工廠大廈天台排左個幾鐘，入到去再排個幾鐘，終於買左兩隻Jordon公仔，體力和金錢都大減。
即刻要同另一隻Michael Lau朋友Fat West打聲招呼先。
七月十號放左一日補假，係屋企執公仔，執完整齊哂，難得咁整齊，當然要影相留念。
我相信好多我既朋友都知道，我屋企係賣報紙既，而我係睇漫畫雜誌大既。我地周記報檔，係元朗都做左四十年以上，絕對係老字號，但故事總有結束既時候，兩老都決定退下來了。
我好多年前已經開始叫佢地快些退休，賣報紙唔算好辛苦，但好天曬落雨濕，最怕係開檔收檔個陣落大雨，真係連底褲都濕哂。同埋確實係有唔少體力勞動，如果可以，都想佢地可以休息一下，找尋一些生活上既其他樂趣。
大家可能以為全屋漫畫，一定個個仔女都係漫畫迷，但其實係錯既，我係三姐弟中唯一一個瘋狂追漫畫既人，長大後甚至追埋雜誌報紙，我係報紙檔得到既知識，永世受用。
讀小學既時候，我已經有機會一個人睇檔，賣野既經驗好有趣。同時我亦有機會接獲到好多行家，買貨賣貨借貨，成本價格利潤，小學已經實習緊，我地三個到現在都無一個做生意，其實真係有點浪費。
擺街邊，有咩未見過，十幾人追打幾個人，幾個人後尾班馬追番原本個十幾個人，唔係電影橋段先至有，只係電影美化左而已。
自從中二開始，因為father一次拉傷，我開始左負責收檔，晚上七點半至八點，直至讀大學，保守估計有八成以上既呢段時間，我都係正在收緊檔既。讀大學後因為遲放學，所以收檔既機會減少左，但都應該有一半以上，真正既減少是在工作後，現在幾乎完全由father和mother收檔。係呢十多年收檔經歷，我地搬過檔口，檔口亦由木板型，轉為超金屬強化版，再變身為超金屬強化版二代及三代，無論係咩型，對於收檔，我絕對係專家，每塊木，每塊鐵，每一個鎖，我都清楚知道應該放邊度，點樣放先可以用最少既位放最多既野，又要確保方便聽朝佢地開檔。
我鍾意收檔，因為鍾意個種感覺，晚上既天氣比日間稍為舒適，大量放工放學回家既朋友和我們講byebye，對面大排檔燈火昌明，街燈默默地照著，再上有一個由左邊向右邊走既月亮，勞動一輪之後返屋企食飯。我同我father關於收檔個架車仔既感情，真係可以比得上陳奕迅首〈單車〉，次次落雨都係我推車佢拎遮，佢掛住遮我，但係佢又唔多識遮人，然後兩個都濕哂﹝雖然通常係執緊野個陣都已經濕哂﹞。
今次真係要收檔了。
每個人都有野會唔捨得，我最唔捨得係收檔，mother話佢最唔捨得係睇住一個個小朋友長大，唔講你唔知，佢地絕對係好多小朋友既偶像，返學放學見到佢地都好似見到明星咁興奮，又成日請佢地食野，又要同佢地捱手，好多小朋友都係又出世睇到讀中學都重有同佢地打招呼，隨時friend過自己屋企既長輩。father做既時間最耐，四十幾年，佢唔捨得既野只會仲多。
放手，真係一個好難既決定。
各位住元朗既朋友，好好把握機會la，七月二號前，記得來幫襯下。
呢排我真係好鍾意種植，其實以前都種過幾樣野，但係成日都好快死，次次我都好傷心。近排開始種蕃茄，"的"起心肝要種到開花結果，借左本《成為養花達人的100個有機妙招》，當中教左100個種花既技巧，好多都好有趣，好似用蛋殼和洗魚水施肥，自製殺蟲劑和化肥既方法等。
除左睇書，我仲上網睇左好多種植既資料，知道咩野化學元素對植物有咩作用，知道咩月份應該種咩植物﹝愈來愈明白不時不食既智慧，除左價錢，質素及營養價值都可以相差好遠﹞，獎門人亦都教左我好多，例如摘心既方法。
我覺得種花除左需要技巧，耐性及愛心才是最重要，天天和我既植物傾計，佢地就會乖乖地長大。
我相信小王子都會好認同。
又講下近排睇左咩書，獎門人最知我心，蔡東豪既《金錢之王 II》一出，就買俾我睇。《金錢之王 I》俾我既影響，絕對大過任何一本投資書籍可以俾到既影響力，呢套書雖然叫做《金錢之王》，但其實放左好多筆墨係呢一班金融界高人在生活及工作上既態度，好像葉維義既紀律、陸東既自信、林少陽既上進，不論任何行業，全部都值得學習。
《金錢之王 II》講既係一班和另類基金有關既人，本地經營既對沖基金尚在發展中，但對沖基金既用家卻多的是，有超級大戶，亦有Fund of funds既經理。另一方面，私募基金及創投基金在香港反而較為成熟，主要是因為香港面對中國這片大森林。
睇完呢本書，明白到投資既風險真係在於無知，只要清楚風險，作好準備，唔貪心，戰勝通脹及絕對回報是可以的。但要做到清楚風險和作好準備，當中要求做到長時間對投資極度專注，睇得清市場既消息，又有幾多散戶可以做到？兩者既分別，就好似大人同細路踢波，一係奇蹟，一係慘敗。專業投資需要既長期專注力，絕對唔少，以我為例，睇過幾本投資既書籍，睇財經報紙，睇公司年報，但比較起真正既專業投資者既專注度，絕對不值一哂。講到持久力，就更係無得比，對投資都叫做好有興趣，但好坦白講，現在已經好難維持最初對各種消息既敏感和有耐心去深入研究，我個人投入對上一隻買入既既股票中人壽既時間，已經少過之前既其他股票好多，近月更係和市場隔離，只係對維他奶進行過年報式既研究﹝因為俾澳元升值及低糖維他奶吸引左﹞。
但係隨之而來既問題係，邊度可以搵到值得信賴既投資專家？好坦白講，以我們既吸引力，係搵唔到。因為好多一級既基金，以百萬美元為單位作入場費，如果要做到適量分散風險，起碼要有五隻一級基金以上，但好多人一世都搵唔到任何一隻既入場費。
就係咁，Bejinmin Graham講得無錯，畢菲特講得無錯，林森池講得無錯，蔡東豪講得無錯，指數基金真係我地最好既朋友。Bejinmin Graham和林森池既書都有教過人點樣選擇最值租既指數基金，值得一睇。
從mcc個blog得知，原來近排勁hit既廣告歌〈豈有此理〉，係參考左當年Blue Jeans既同名歌曲，我之前都無聽過呢首歌，聽落覺得都旋律幾好聽，歌詞又優雅，証明當年Blue Jeans玩Pop Rock/Ballad係真係唔錯既。
講開Blue Jeans，即時諗起Chyna，Chyna樂隊可以稱為Blue Jeans既前身，樂隊成員有黃良昇、蘇德華、單立文和Donald Ashley，前三人後尾組成Blue Jeans，Donald Ashley後尾就去左台灣組過另一隊Chyna。
Chyna四位成員對香港樂壇都算有影響力，全部都做過好多幕後工作，近年有睇陳奕迅演唱會既，都應該會認得單立文，佢係台上既台風絕對唔比eason差﹝如果有睇過佢既戲，更可以睇到佢既雄風。﹞。另一成員Donald Ashley當年更被稱為亞洲鼓神，都咪話唔惹少。
九十年代既香港樂壇有好多唔同類型既音樂，有玩Pop Rock既Blue Jeans、Beyond、太極，較Hard Rock既有Anodize，cute既有AMK，實驗既有盒子，藍調既有包以正，當時來說都叫做唔同類型音樂都有人接受，近年來雖然重有好多地下樂團，但音樂既類型反而少左，呢個到底係觀眾既接受能力低左，還是新一代音樂人眼界細左？
係四月四日至四月七日，我又去台灣la！﹝既然個個都話我又去，咁我都順應民意話又去la﹞
其實今次係我第一次同獎門人去台灣，亦係第一次自由行去台灣，亦係第一次同同事去旅行。
對於我同獎門人，今次既主題當然係食。其實今次旅行既發起，都係因為我地有一日係咁諗起台灣既美食，而決定連住清明節咁去，請一日假就可以去四日旅行，真係幾抵諗。
我地梗係食左好多好多野la，幾乎日日都食六、七次野以上，除左最出名個d野食，我地今次仲試左好多新野，好似飲左一杯好足料既果汁。
不過今次真係行左好多路，晚晚我地四個人都一齊浸腳，幾鬼識嘆！
去左好多之前未去過地方，我終於係台灣實現左睇企鵝既心願，仲同時實現埋睇樹熊、大笨象、長頸鹿、班馬、水牛等等等等既心願。台北動物園果然係一個好地方，門票又抵，地方又大，動物種類又多，陽光又多...
九份大家聽得多，我地更上一層樓，去十份(分)。十分有好多瀑布，係一個睇自然景色既好地方。十分車站位於一條小商店街，同民居連左一起，基本上我地係一直係火車路上面上，最驚險係有一度我地入左一條火車隧道入面行，諗起都仲係好驚，如果有火車行我地真係死梗。
十分有兩種手信都幾有趣。佢地既名信片很有趣，將一張大卡片印到好似火車票咁，而個目的地就係十分"幸福"、十分"快樂"之類既祝福字句。另一樣係天燈，呢度有幾間店舖都有賣迷你天燈，因為呢度附近有得放天燈，仲有個天燈節tim。
十分係一個好地方，山明水秀，使得我和steve，引笛一吹，吸引了數名小孩圍觀。
講下我地買左咩野，好有趣，我地分別係幾個地方都買左陶笛﹝原本我地係計劃去做陶瓷既，但因為製成品要一個月先有，所以放棄左﹞，我地兩位男遊客仲係十分一路行一路吹，十足一名才子。晚上係酒店我地都有吹，但因為似乎太大聲，所以放棄左。
我同獎門人各自都買左兩本書，係台灣買台版書真係幾抵，平時香港賣台版書既匯價係除四，自已去買係除三，仲要書店有七九折。我買左張大春既《認得幾個字》和張鐵志既《反叛的凝視》，前者講中文字和兒童教育，後者講社會反抗既故事。
我仲係機場買左兩隻jazz碟，特價，兩隻加埋都唔駛$50，兩隻分別係Charlie Parker和Miles Davis既《The Birth of Bop》和Billie Holiday既《A Jazz hour with Billie》。《The Birth of Bop》個隻原來仲有第三位大師，就係Dizzy Gillespie，呢隻碟超正，不過我真係唔識分小號同埋色士風既聲，有無人可以教我？Billie Holiday個隻既現場錄音好差，好多雜聲，聽得唔係咁過癮。
牛肉麵、雞排、臭豆腐、蛤仔煎、綠豆糕...睇下你地幾時又引到我同獎門人去搵你地la~~
距離個次決定唔日日寫blog之後，話咁快就兩個月了，中間只記了一些公司業績和大前研一既事評，可以話我真係懶到爆。
在三月八日我曾經提過一個理論，“如果係喜瑪拉雅山山頂撥一下扇，幾個星期後，會令到太平洋產生一個龍捲風。”原來呢個理論個學術名稱係蝴蝶效應，佢最為人知既例子係“一隻蝴蝶在巴西輕拍翅膀，會使更多蝴蝶跟著一起輕拍翅膀。最後將有數千隻的蝴蝶都跟著那隻蝴蝶一同振翅，其所產生的巨風可以導致一個月後在美國德州發生一場龍捲風。”
發明呢個蝴蝶效應既氣象學家羅倫茲於四月十七日病逝。
同日，香港神檯級體育新聞報導員伍晃榮病逝。
如果話蝴蝶效應令我了解到小事可以化大呢個道理，伍晃榮係佢一次退出新聞報導，客串現場講波既時候，講個一番說話，令我明白到咩野叫做謙虛、幽默和User Expectation Management。
佢話“完左場既波我就識講，踢緊既我就唔識。”
一句說話，令到大家都唔可以一相情願地以為佢講波可以好似講新聞咁一針見血。講呢類說話好似好易，但要一個上左大師級既人去講，又要講得語氣適當，就唔係咁易。
睇完mcc個blog有關tech個篇文，感嘆左幾分鐘，從夢境返回現實，到達點解會咁樣？出左咩問題？
想當年city cs acm兩大肥仔，今日彷彿都變成街坊股神，滿口都是招商/匯控，講得最多既jargon係pe/peg/pevg，一至五過左七點就唔想再提任何和IT有關既野，除左941既3G之外。
說到底，我可以肯定，代埋MCC講，我地係熱愛利用電腦科技去完成工作既，亦喜歡完成後既自我滿足感，我地只希望可以繼續追求令自己產生興趣既技術，去完成更多既野，去方便自己既生活，去滿足自己。
今日係聽日已經係昨日，過左去既事，好既係幸運，唔好既係教訓，再諗以前已經係無用架LA。
點都好，都要搵番條癮出來，反思一下自己，可能會發現自己做緊既野其實都好有意義，只係在乎你用咩角度去睇。
識轉身走位，都要自己盡備好，等接到波後要把握到。
近排一連睇左兩本大前研一既書，雖然佢都有小小"流行書籍"既特徵﹝所謂流行書籍，就係將一些大家都知既事，講完一次，再講一次，然後再講多一次，最後再講多一次，咁就會得到好多人認同為有料到既書，流行書籍既表表者就係《世界是圓的》，無記錯應該係梁文道提出呢種書既定義既﹞，但係佢入面提到既好多提升個人生活質素及工作能力既方法，都值得一睇，雖然你本身都知，但係結合左再包裝過咁睇，可能會有一些唔同既諗法。
我睇既兩本書分別係《即戰力》和《M型社會》。《M型社會》講既係M型社會既型成原因及情況，然後講左好多政府可以做既野去令人民可以過得更好和國家經濟變強。《即戰力》俾我既感覺就係既然政府無能，個人應該做咩野去在社會突圍而出同埋令生活變得更好。《M型社會》入面既經濟及統計數據極多，差不多兩三頁就有一個圖表。《即戰力》則以淺白文字為主。
重點咁講，大前研一認為政府﹝佢主要係指日本政府﹞應該作出以下既改革：
政府做咩我地都好難去期望，不如睇下個人應該點做，係《即戰力》一書，佢提出現代人應該具備以下三種才能，才可以在全球化不繼改變既社會"即戰"﹝即是在新環境可以立即戰鬥及做出成績既人﹞。
除左另三樣，佢亦強調要有開會既能力，即係減少開一些無意義既會同埋點樣係會議講自己既意見。關於學習，佢認為應該多抽一些時間去學習，要預測錢會住那裡走，先人一步去認識那個地方。
關於改善生活，佢提出：
關於工作，佢亦提到要提升自己"身價"及"頭銜"。身價即是自己可以勝任既野，頭銜就係曾經做過既野。係大公司做過唔算係頭銜，曾經幫公司解決過甚麼問題就係頭銜，佢不繼強調這是一個著重個人能力既社會。
我個人都幾認同佢講既野，希望你地睇完都有得著。
招商銀行於三月十八日晚上公怖業績，強勁。
以上數據全部都係超強既表現。存款和貸款增長令人滿意；不良貸款率滅少，撥備覆蓋率增加，資產質素令人安心；ROAA和ROAE上升得咁勁，相信和舊年非利息收入超強有關，如果將來都可以保持到ROAE係廿幾個百份比就真係超強了；高檔客人大幅提升，變相令招行可以有更多空間去發展新產品，期待更多和中國人壽既合作。
但亦都有令人不安既地方
無理由去預期今年或未來幾年國內既股市會好似舊年咁火熱，有理由相信將來既手續費及佣金收入將會大減；經營成本上升，因為開多左行，請多左人，員工股份獎勵計劃，將會賣多左金融產品，俾員工既佣金會再上升。所以係招行呢隻小老虎長大既同時，要一路都睇住佢既資產質素、員工質素和成本控制。
我期望佢未來三年平均都有大約廿個百份比既盈利上升，只要佢再下趺，我必定會再買。
參考：
SOHO是我第二隻IPO得番來既股票，第一隻係中銀，賣左九世，似乎我真係唔適合抽新股。
雖然業績睇落好靚仔，但係要注意：
可能因為高地價，所以舊年集團無買新地，只係同人地買左兩間已建成既樓宇，執靚再賣出去，似乎毛利都幾好。
簡單咁睇，SOHO尚有佢既優勢：
始終都係覺得，自己只係睇到佢經濟上既優勢，盲目地相信佢當日過高既估值，現在唯有希望佢既業務可以快些追上。
參考：
輪到匯豐，如果計埋月供，匯豐差唔多等如我半個股票組合，所以大家應該想像到我既呢半年來既痛苦。
資本回報多左0.4%，好過無。第一級資本比率繼續高企，根本唔需要擔心無錢。成本效益減少左，希望可以改善。股息繼續增加，信心既保證。
係盈利分怖入面，要注意北美係2007年係接近無盈利既，而除香港外既亞洲其他地區則搵多左差唔多一倍，其他主要地區亦得到良好增長。呢一樣就係匯豐既優勢，業務分散全球，唔會完全依賴於個別市場。
係今年既盈利入面，有幾條數要特別注意：
風險有：
匯豐舊年既一些，都增加左我對佢地既信心：
雖然嚴重坐艇，但我會繼續持有。
參考：
手上既幾隻股份同埋心水股都公怖左業績，係咁易記載一下。
首先睇下我呢排有咩動作先。
以復活節前價計算，除左最尾個注，其他全部坐艇。全個股票組合計，計埋股息在內，有多達7.6%損失。
好，先講係情人節公怖業績既宏利。
成績咁好係因為保險銷量十分好，財富管理亦都吸左好多新錢，佣金大增。
宏利另一優點係資產管理能力十分穩建，到現時為止尚未需要為任何次按產品撥備。宏利既可見風險有：
睇番當日買入宏利既因素，今日繼續存在，所以我會繼續持有。
順帶一提，宏利係我持有最耐既股票，接近十四個月，亦係我倉內目前唯一有盈利既股票。
參考：
唔知幾時，我聽過人講，如果係喜瑪拉雅山山頂撥一下扇，幾個星期後，會令到太平洋產生一個龍捲風。雖然好似誇張左少少，但係偏偏人生就係咁樣，一些小事，吹下吹下，小事真係可以化大。
2004年3月18日，星期四
呢一日同平常既日子應該無咩分別，相信是有陽光，下午比較冷那種天氣。唔知點解，可能為左扮潮，我開始左寫blog。
當時重有人叫blog做weblog，即係記載一些網上既事，作為日記並唔係blog既主要用途。當時我雖然作為一個在城市長大既電腦科學系學生，但其實都無咩網上科技感想好記，所以我一心係當我個blog係一個日記。
熟悉我既人都應該知道，我既英文能力絕對係得啖笑。日記日記，日日都記，所要我個日記blog叫做Darth Mike DAILY，我諗差唔多過左一年，我先驚為天人咁發現，原來日記既英文係diary，die-ar-re，而唔係day-li。
可能因為改錯名，我真係daily都寫，頭個兩年重要係準時寫，強迫人地睇自己既無聊生活。但近年返工真係少左好多時間同埋心機去寫，搞到間唔時會一次過寫成個星期既日記，最短個日只得三個字，就係"星期一"三個字。
作為一個負責任既人，有些時候我都會盡力咁話俾大家知個日發生個咩事。好似2008年1月24日咁，我就清楚咁記低"唔記得自己做過咩野。"。
正所謂坦白是金，我相信如果你看到這裡都重睇緊，我相信你會係我其中一個最好既朋友，因為大家都係咁無聊。
數數埋埋，十一日後呢個blog就開左4年，我總共出過1419篇文章，總算都係我人生入面既一個小龍捲風。
為左保持(或者係挽回)文章既質素，我決定呢度以後都唔再daily咁記我既事，我只會係有野想講，而又有時間去講既情況下，先會出文，主要都係圍繞我既興趣同身邊發生既事。
多謝
二月八日
今朝一早在家寫了《破事兒》的影評，為左要達成係今個假期寫哂既目標，我不斷咁利用搭車無野做既時間回憶番那些電影，再諗下自己有咩感想，然後係屋企既打出來，現在還差三部未寫呀。
一月二十三日
《音樂殖民地》呢本香港唯一既音樂雜誌都已經停刊左一段日子，老總袁智聰亦都已經有左新地頭，就係電橙。
食飯時間稍稍咁睇下Radiohead新碟既碟評，嘩，真係袁智聰style，個d形容語例如"如沐春風的歌曲"、"流水行雲、美麗閃爍的結他演奏簡直是萬般婀娜流麗"、"柔揚閒適，儼如揚帆出海的美好感覺"等等，真係五體投地。
一月十八日
由2007年12月開始，股市就開始下趺，賬面上真係損失慘重，不過我對現有持股有強烈信心。今個星期連續幾間美國大行公怖業績，撥備多其實大家預左，但係都令到個市再趺多級。好多隻心水股都入左吸引價，但係我始終都係未買，可能將來會後悔，但係我始終希望可以忠於自己既計算。
好多都話$120既中移動係2007年廿五倍PE，我一聽都覺得幾唔錯，但我一睇中移動份中期業績，EPS有$1.87，如果$120係2007年廿五倍PE，即係2007年全年EPS係$4.8，即係下半年收入係$2.93，未免太樂觀吧？
唔好忘記中移動現價係反映左發A股和母公司注資既期望，但同時仲有大陸電訊政策和3G既不安因素。廿五倍PE無問題，我都承認中移動盈利增進可以做到2成至3成，但係過份既盈利預測我會覺得有危險。
中人壽2005年內涵價值係$4.26，2006年$6.8，升左59.7%，偶像林森池話中人壽2007年內涵價值可以有$10，即係升47%，合理既，中人壽有咁多高質國有資產，隨著陸續在A/H股上市，佢既價值有升無趺。昨日趺到差唔多$32即係3.2倍PEG真係一個超大既考驗，今日已經回升，將來我可能會後悔無買。
招商銀行上半年EPS為$0.42，假設全年為$0.9，然後期望佢2008至2010既平均盈利年增長係35%，以PEG=1計算，2008至2010既合理價係$31.5，$42.5和$57.4。我希望我既投資可以做到年增長15%，所以係未有全年確實業績前，我只會考慮$28以下既招商。
現價既匯豐極吸引，同好多網友既分析一樣，匯豐現金流及資本強勁，根本唔會減息，次按只係一個藉口俾佢撥備和收買其他公司。我唔買係因為我已經持有及月供緊，再買將會無錢買中資股，佢一次又一次既下趺只係不斷挑戰緊我既定力。而家唔買匯豐，可能會係將來令我最後悔既一個投資決定。
對於宏利係2007年第三季業績都仲可以話自己完全唔需要為次按或相關產品撥備，我感到十分恩惠，再睇到佢可以趁加拿大帝國銀行因次按而出現財政困難時，能夠注入資本，我感到更加安心。雖然歐美日既市場增長有限，而係中國既保險業發展亦困難重重，但睇住宏利佔左一半既中宏保險，係內地一個個城市咁插旗，我好相信佢地要將中國盈利大幅增加既決心。現價絕對可以買。
一月十一日
繼續英文作文。
話說今日上上下堂，有人打電話俾我，只係響左intro個兩下，就俾另一位同事/同學M發現左個首係Radiohead既〈No Suprise〉，咁都俾人認得出，我都幾suprise。經過交流一番，原來大家都係聽著Brit Pop讀書，大家都覺得係冷天既深夜聽Radiohead係最入型入格。
無端端遇上同道中人，個份樂趣真係難以言喻。
世界真係細，原來呢個同事/同學M，竟然係獎門人既朋友M既大同和朋友S既偶像。
因為同佢講開Radiohead，我又聽番最新既《In Rainbow》，竟然覺得愈聽愈有feel。
晚上和獎門人去了九龍灣，原本去睇一個不知名鬼佬演唱會，後尾我地覺得遠，懶得行，所以只在九龍灣食晚飯。食了一間係淘大既日本野，上菜勁慢，食套餐都要等勁耐。
