朝朝叫醒我既歌，The Pixies - Where is my mind

回家的時侯，剛步出西鐵站準備行番屋企，手機正好播完謝安琪的《Slowness》，正在想剩下的十分鐘路程應該聽咩歌，忽然想起了一首歌，The Pixies的〈Where is my mind〉，一首唔覺唔覺，原來近十年間一直在我身邊出現的歌，原來距離第一次睇《Fight Club》呢一部電影，已經十年了。

結果在步行回家的路上，我重覆聽了三次這首歌，亦想好了怎樣寫這篇文章。

如果有一日（希望無呢一日），我昏迷不醒，請在我的耳邊播放The Pixies的這首歌，奇蹟可能隨時出現。畢竟，我已經用了這首歌作為我的鬧鐘鈴聲數年，即使轉了電話還在繼續使用這首音樂。我相信，我是深深地喜歡上這首歌最頭的那一下“Start“和緊接著的INTRO。

第一次聽這歌，大約在中五那一年吧，在電影《Fight Club》之中。如果問我那一部電影最能夠影響我長大後的思想發展，《Fight Club》應該排在《香港製造》和《Transpotting》之前，戲中的反社會主義就像進入了我的血管一樣。電影之中，吸引我的不是型爆的Brad Pitt，而是論論盡盡的Edward Norton，〈Where is my mind〉這首歌便是出現在片未，Edward Norton剛剛開鎗打自己個頭去趕走Brad Pitt（SORRY，未睇過既人實在好難明白，點解開鎗打自己個頭可以趕走另一個人，如果你想知，就搵呢部戲去睇，可能改變你一生），然後一手拖住Helena Bonham Carter隻手，行埋窗邊望住一棟棟既商業大廈被炸毀，電影便是以這首歌伴隨著這個全片最“感人”的段落而完結。

The Pixies在香港並不流行，其實即使在世界上亦不算超級流行，但在法國，我倒遇上了他們。

Year3那年的暑假，我們四條友去了歐洲廿多日，在巴黎個幾日，我在地鐵經常都看到一個音樂節的廣告，The Pixies正是這個音樂節的其中一隊表演單位，最後我們當然（點解係當然？）沒有看這個音樂節，但作為一個小FANS，我總算和地鐵站內的這個廣告合照了一張相。

獎門人，仲記唔記得我們在巴黎那個形狀古怪的龐比度中心前面，曾經睇過一個男人表演拉線公仔嗎？那個男人正在用拉線公仔來彈結他，而當時那個公仔正在“表演”的，正是The Pixies的這首〈Where is my mind〉。

我假設大家也認識Nirvana這隊樂隊吧，超紅的主音及結他手Kurt Cobain便曾經表示極度喜歡The Pixies，wiki上面寫住"Avowed fan Kurt Cobain's acknowledgement of the debt Nirvana owed to the Pixies"。

奇怪既係，我喜歡的電影和喜歡的樂隊，也和這隊The Pixies有關係，但我竟然一直以來，從未試過找他們的其他歌曲來聽，甚至連他們有多少人，有咩人和甚麼年紀都唔知道，真係係街撞到都唔知，只是幾年來一直也只聽這一首歌，我甚至連呢首歌既內容係咩都唔知。呢個，睇怕真係一個千古之迷，今晚，已經太夜，我會讓這個迷延續。

村上春樹 - 1Q84

二月中農曆新年後完成了《1Q84》的Book2，我真心地希望村上春樹能夠保持身體健康及靈感充足，可以好好地完成Book3，以他廿年來一年跑幾次馬拉松的體格，我相信健康問題不大。

Book2和Book1的轉變甚大，雖然繼續以兩位主角主導，但故事的重心一下子由他們的個人經歷轉為描寫更多故事內其他的人物。值得注意的一點，作者在Book2十分決斷地把幾個看似甚重要的角色以不同理由"清除"，彷彿是要把代表故事發展的網收細一樣，但同時亦為故事派上懸疑的感覺。

故事發展峰迴路轉，組織、little people和空氣蛹逐漸打開神秘的面紗，組織領導人竟然向女主角求死，男主角開始搞清楚自己和父親的關係，在最後男女主角差點便可以相隔十多年重遇那一場亦寫得十分緊張。

完成Book2後，從Book1帶來的疑惑有增無減，十分期待可能係年中在日本出版的Book3。

租婚紗

上星期獎門人終於扚起心肝去睇婚紗，其實佢之前已經做左好耐功課，係網上及婚紗展睇左唔少資料，亦都問過訂造婚紗及晚裝的詳情，但係始終都做唔到決定，今次扚起心肝要去婚紗鋪實地考察及試衫，目標是在三月中之前決定，最後超額完成，二月最後一日搞掂。

星期日那天獎門人根據網上的評語及官網的照片，相約了當中精選的三間婚紗鋪，第一間係Charming Image，網上評語甚佳，可以免費無限任試，價錢亦都十分實惠。獎門人大約試了五件婚紗和差不多十件晚裝，款式也不錯，亦都合獎門人的心水，店員態度友善，雖然鋪頭細細，但人多既時候都唔算太混亂，店員亦都無出現火爆的情況。同店亦有出租媽咪衫，亦有一間同系店舖出售姐妹衫。

第二間係華麗邂逅，這裡的私人空間較多，但係款式就收埋哂，要店員介紹，不幸地，店員的態度甚為高傲，介紹的款式亦都不太合意，獎門人一件都唔試就好型咁叫我走人。

最後一間係In Wedding，我們在預約的時間之前先行探路，勁好生意，超爆多人，眼見有幾個客係度等緊人招呼，而且款式和價錢亦和第一間的差不多，所以我們便取消了預約。

經過一餐下午茶的相議，之後再回去Charming Image睇埋男裝和講了一大輪價，便成交了，又搞掂多一樣，遲下會搵一日再去揀衫。

收婚紗相

續前文，我地係一月尾一張相都未收到，結果係農歷新年亦即係情人節前夕，收到兩本大相簿、一本小相簿、一個水晶框相架、謝片、書片和簽名布，另外油畫、海報、雜誌和兩個座檯相架都要三月先有。

雖然比原定遲左少少，但我們到呢一刻都重係好滿意，相片既質素好高﹝當然好既模特兒十分重要﹞，幸運地，對我們的服務亦都一直保持良好，有問題亦都樂意跟進。

從小插曲亦可看到他們的細心，話說雜誌其實已經做好，但係因為釘裝上有問題，連佢地自己都唔接受，所以主動提出幫我地重做一本。從呢件事，縱使佢地唔主動提出，好明顯我地都唔會接受，佢地肯主動提出，算係一個幾有心既表現，值得一讚。

部份既相放左上網，朋友們應該已經睇到，我地唔會放哂上網，遲上可能會再放多幾張，想睇哂就上我地屋企睇。

買樓記 - 買樓後的三個半月

自從成交之後，已經足足三個月無係呢度update過買樓既事，其實中間已經搞左好多野，幸好，一齊都順順利利，傻人係有傻福既。

十一月中成交後，花了很多時間去比較市面上的按揭計劃，主要也是比較用HIBOR的那些計劃和我公司的員工計劃，基於免保費、準備將來可能出現的加息和較穩定的供款，最後還是選擇了公司的員工計劃。

之後也找了很多間律師行，咁大個仔第一次用律師服務，真係大開眼界，那些律師個樣重hea過我。

在年尾亦做了火險和按揭人壽保險，更加令到我覺得保險業真係一個穩賺的行業，中人壽，不要離我太遠。

話咁快就到一月中收樓，2010年1月20日，做左九千五百幾日人，成為業主。

做業主除左有一大筆既負債外，亦都要搞好多野先可以有一間可以住人既屋。好快就開哂水電煤，再約師傅睇裝修，我地只係小形裝修，全屋牆身天花起底油漆、打摩地板和造了一個小小的閣仔放雜物。裝修由二月一日開工，至二月廿六日完成，開工既日數小過我返一個月工，但係用左我一個月人工。我們總共為新屋選了七隻顏色，效果確實唔錯，我們也很滿意。遲下收傢私後還需要師傅執執手尾。

二月中我們便開始買像私，宜家、DSC和土瓜灣的傢私鋪都買左唔少，直到今日都總算買得七七八八，三月中送貨。最後都係個句，幸好我們沒有選擇困難症。

麻煩野確實係好多，但到左呢一步，成果都尚算良好，我地已經計劃緊之後一連串既house warming活動啦！等待我地既邀請啦！

跑步巧遇母校運動會前夕

昨晚原本約好打籃球，點知因為場地濕滑，換哂衫都打唔成，返到屋企後決定去跑步。

去了元朗大球場，這裡近年成為了天水圍飛馬的主場，連草地都靚埋。去到大球場，發現熟悉的運動服和校服，原來今天正是本人母校元中的運動會，看見很多學生在布置場地。我的中學分為元、朗、中、學四個社，昨晚所見，唯獨是本人所屬的朗社人影都無隻，只係聽到佢地話聽朝七點見，真係夠哂淡定。

今次跑步以慢跑兩圈再行一個圈為一個循環，循環之間加入數分鐘的足部拉筋，重複了四次，出了一身大汗，加埋事前的熱身及事後的鬆筋，用了個多小時。

請為大家的無力感默哀

無必要為谷歌獻花，因為死亡既係中國既網絡自由發展和國內網上公司的道德，看見一班國內網上公司和中央領導人對事件的回應，作為人民，只可以痛心，請為自己默哀。

類似既情況，亦發生在香港政府，功能議員和大商家身上，作為市民，一次又一次地感到自己的無力感。

事件不斷發生，不斷增強的無力感和失望，最終總會形成一發不可收拾的局面，這亦是不少人樂於見到的場面。

睇完村上春樹《1Q84》Book 1

利用返工放工時間，在西鐵上花了半個月，看完了四百多頁的Book 1，感覺甚好，緊接就會開始睇Book 2。

這個雙線發展的故事，在Book 1的中期開始出現接點，對於神秘組織和Little People的描寫，亦一直保持神秘感，之前曾經睇過月巴氏既介紹，係Book 1對於神秘組織的立場將會完全改變，十分期待。

明顯地係呢本書感覺到作者既野心，在保持個人風格之上，比舊作的觀感及故事都錯綜複雜得多，亦盡量控制在不似《世界未日與冷酷異境》的過份純意境的地步。

看著書背上的村上春樹創作年表，《1Q84》已經係我睇既第七本長篇小說，始終都係未睇《挪威的森林》，應該永遠都唔會睇了。

好味烏冬 - 自家烏冬

元旦日那一晚，在過海看叱吒前夕，和獎門人在尖沙咀重慶大廈地庫食了這間自家烏冬，稱得上係好食又抵食，值得一讚。

獎門人一向鍾情烏冬，我們之前也試過銅鑼灣一間號稱烏冬專門店的餐廳，但感覺欠佳，主要係烏冬無特別，加上份量過少，已列入黑名單。

這晚我們坐bar擡，點了海鮮湯烏冬、牛肉湯烏冬和冷烏冬。海鮮和牛肉的份量都唔少，味道亦唔錯，烏冬確實係一流，夠哂彈牙，偏粗的麵身亦合我意，冷熱兩種食法各有不同，烏冬的份量亦都唔細，堆單唔駛一舊水，確係唔錯。

好味吞拿魚 - 定食 Doraya

昨晚去了銅鑼灣找獎門人食晚飯，獎門人提議去一間我們之前曾經找過但最後無食既日本菜，印象中個度出名食吞拿魚。點知去到門口，才發現這裡根本就是那間在尖沙咀金馬倫道地庫的定食 Doraya，這間餐廳最初是由朋友介紹，及後我們也光顧過數次，價錢略貴，加一後大約百多元一份有藍鯺吞拿魚的定食，但味道確實唔錯。

我們昨晚便食了藍鯺吞拿魚扒定食和藍鯺吞拿魚片定食，兩款吞拿魚也很新鮮和好味，獎門人形容魚扒為入口即熔，魚片則需要咬，配上日本米確實唔錯。之前在尖沙咀分店食，定食多數也是跟十分滑溜的蒸蛋，今次跟餐的則是甜蛋，煮得比較老，質感較粗，幸好味道鮮甜。前菜的蘿蔔和麵豉湯也不錯，絕對唔係一般水準。

尖沙咀那間分店以日本人顧客為主，銅鑼灣這間便以本地人居多。

年頭檢討落後股之中移動

新一年開始，檢討一下手上的持股。現時持有的股票內，以宏利和中移動的損失最大，如果以百份比計算，SOHO都很嚴重，但因為份量太小，殺傷力細好多。

今日先睇中移動，中移動是我在2008年頭海嘯剛開始時買入的，當時已經從2007年尾的歷史高位一百五十蚊下趺了三分一至一百蚊，當時以為已經好超值，亦一廂情願下認為中移動能夠起碼保持15%以上的盈利增長，當時以2008年上半年既每股盈利推算，一百蚊連20倍市盈率都唔駛，股息亦有差不多三厘，係2007年根本無可能買到，結果個價一穿一百蚊就飛身入市。後果係點，大家應該好清楚，穿完一百蚊，再穿九十，最後趺到去最低既六十三蚊，比我既買入價低30%以上，真係慘不忍睹。

縱使在反彈的一年，中移動亦不幸地成為2009年恆指之狗，成為恆指成份股當中表現最差的一隻股份，嚴重落後大市。

做成這個落後的原因，主要有兩個，分別係市場開始飽和及政府不再偏幫中移動，甚至反向支持其他的國內流動電話服務供應商，從2009年上半年那接近無增長的盈利可見中移動的經營難處。另外3G和iPhone的引入亦帶出很多麻煩。

反省自己的問題，最大的教訓絕對是不要插手那些不熟悉和不明白的行業，對我這樣一個只知道手提電話除了講電話外，只可以收發sms的人，那些智能電話的制式和網絡，真係睇極都唔明，在研究公司運作時實在十分不清不楚。

幸好，中移動還是一頭強勁的現金牛，擁有強勁的固定收入，縱使是3G的基建亦已大致完成，派息方面絕對可靠，加上恆指之狗效應，希望2010年可以順利回到我的買入價甚至帶來利潤，假如有閒錢﹝好可惜無﹞，七十蚊以下入貨會幾安全。

黃泥涌水塘公園至鰂魚涌

昨天又去了行山，呢排去得好密。下午一點半由黃泥涌水塘公園出發，經陽明山莊入大潭水塘道，在水塘接上港島徑第六段行柏架山道。在大風坳旁的分叉路，向上行大約30分鐘便可到達柏架山上兩個無線電發射站，其中較細的一個可以十分清楚地看到港島東由鰂魚涌至小西灣和九龍東由九龍灣至將軍澳堆填區，超靚景。返回分叉路後繼續往鰂魚涌方向走，最後轉入了一段樹木研習徑連上衛奕信徑第二段到達鰂魚涌。

全程石屎路，行了差不多四小時，如果唔上柏架山和最後不入衛奕信徑，可以減少大約90分鐘。

開始睇《1Q84》

近期有兩本新出既小說，我都好想睇，分別係村上春樹的《1Q84》和陳冠中的《盛世》，今日Boxing day開始左睇村上春樹的《1Q84》。

多謝獎門人，我開始脫離了圖書館族，不用等一年就可以睇到新書。

獎門人買了《1Q84》台灣的珍藏版給我，最初還以為它只是比較厚，無咩特別，今日拎上睇才發現，原來在白色的書套下，是一個全黑的封面，在啞黑的表面上，以光身的黑色印著村上春樹的英文名和書名，整個設計黑得十分有型。為左呢個黑色既封面，真係貴幾十蚊都值。

睇了頭兩節，似乎係雙線發展地講兩個人的故事，距離睇哂兩本咁厚既書（分BOOK 1和BOOK 2），相信仲有一段好長既日子，到時再寫讀後感。

第三次行烏蛟騰至荔枝窩

事隔半年，在十二月二十日，我們又去了行烏蛟騰至荔枝窩，勁可惜，因為天氣未夠冷，所以蠔唔夠肥，可能三個月後又要去過。

衛奕信徑第五段

十二月廿五日聖誕節，和家人去了行衛奕信徑第五段，由沙田坳至九龍水塘。最辛苦一段為最初在慈雲山巴士站經觀音廟上沙田坳的一段超長樓梯，之後基本上全程平路，十分易行，甚至行到有點悶。入沙田後可以近距離見到望夫石和從高觀看獅子山隧道沙田入口，最驚險為尾段勁多馬騮，過百隻既馬騮在路邊看著我們，真係諗起都驚驚。全程用慢速去行，用了約四個多小時。

鹿湖郊遊徑

十二月五日去了行鹿湖郊遊徑，由西貢市區坐約＄80的士到達西灣亭，到達後便可以見到鹿湖郊遊徑的入口，整條路線除了其中一段需要連續上一大段樓梯比較辛苦外，其他也算易行，中途可以看見其他在西貢的名山，三個多小時便行完，終點在北潭路可以坐小巴回西貢市區。

廿六

就係咁樣，廿六了。

有人話人生其中兩個最重要既決定，就係結婚同埋買樓，兩個決定我都係舊年做左，未來一年就係實行年。

昨日就係我既生日，呢一刻我心情異常地平靜﹝可能因為飯氣攻心﹞。回想昨日，獎門人安排了一系列的節目，最估唔到既係，獎門人竟然同我去左睇東亞運動會足球賽，香港對中國！

身處一眾狂熱球迷之中，被區旗和粗口所包圍，我們的手緊緊地拖著，過了一個幾千人陪我的生日，過了一個最滿足的生日，因為有一個了解我的人陪著我。

伊坂幸太郎 - 沙漠

花了過多月的時間，在圖書館續借了五次，終於睇完伊坂幸太郎2005年出版的小說《沙漠》。這書的故事內容和困悶的書名完全相反，講述五位大學生由入學到畢業所經歷過的一些難忘事情，甚為熱血。五位大學生各有特色，智慧型美女東堂，擁有超能力的害羞少女南，立志維護世界和平的西嶋，鳥瞰形的北村﹝即故事內的第一人稱﹞和到處識女仔的鳥井。

伊坂幸太郎在這小說中顯示出他描述大學生生活的能力，故事的場景大量放在打牌，保齡球館和街上閒逛等大學生常做的之上，效果十分自然和有親切感。當中發生的幾件大事亦充滿緊張氣氛，令我看得甚為投入。

一如其他伊坂幸太郎的作品，故事內總是有很多很有趣的閒角，今次亦有充滿神秘感的保安員、熱愛Punk樂隊Ramones的阿姨和極度陽剛的拳擊手，仲有好多其他有趣的角色出現在他們的校內和校外生活之中，令到整個故事十分立體。

關於《沙漠》這個書名，其實書內有兩個地方提到沙漠。第一個來自西嶋在很早期說的話，他說只要有決心，沙漠也是可以落雪的。呢個咁熱血既解釋，近期好容易令人聯想到製造人造綠洲的杜拜，我只可以咁講，所有大突破係成功之前，聽落都係咁荒謬既。第二個出自北村的女友，她認為沙漠就是工作的世界，而學校就是沙漠內受保護的都市，學生總需要進入沙漠，自力更生。而北村的想法，便是在都市進入沙漠後，要以令沙漠下雪的決心去做人，但當然，鳥瞰形的北村絕對不會隨便表現他這種熱血的心態。

風險與回報不符，減持匯控

事先聲明，係十月中至十一月中，我已經分段減持匯控，如果唔係十一月尾出現回落，我會繼續減持。

簡單咁講，匯控唔係唔好，正如標題所示，賣出原因只因風險與回報不符。

匯控的最大優點是環球業務，但同樣承受著環球風險，阿根廷債務危機、亞洲金融風暴、美國次按和杜拜世界危機，全部匯控都係首當其衝。雖然，亦是靠著全球的業務，匯控總是能夠成為最快復元的企業。但環球風險總是不斷出現，地區與地區之間的經濟連繫亦愈來愈強，匯控在下次或者再下次的金融危機還是否能夠打不死，實在係未知數。

另一風險，來自銀行的本質。今年匯控交出了令市場給予正面反應的中期業績及第三季回顧，在多個業務亦做出好成績，環球資本市場的增長速度更加係極快。坦白講，匯控的業績報告在下實在睇唔明，特別係環球資本市場呢一部份，唯有信下街邊消息。街邊消息話環球資本市場的利潤主要來自親手落場炒賣。呢個消息對我分析呢一間銀行既影響力好大，一直以來，我偏好銀行股其中一個原因就是它們賺的是中間錢，風險有限和極受市場需要。落場炒賣既結果可以係好大上大落，風險程度十分高。

投資必定存在風險，在這兩個大風險之上，如果有十分可觀的回報機會，還是值得考慮，但基於環球因素，匯控總是會經常遇上各大大小小的危機，除非總是能夠成功捕浪，整體回報率實在不太高。加上那份相信無咩人睇得明既業績報告，我認為投資於更簡單易明的公司會較令人安心。

買樓記 - 成交

終於去到十一月十五日的早上，獎門人的屋企人今天也和我們一齊睇，經紀為我們約了數個碧堤的單位，款式還是昨天那兩款，只是座數和層數不同而已，但想不到卻出現了意想不到的發展。

第一個看的是第六座中層的690呎單位，其實第一期四座樓看似打橫一排，實則上呈半彎形，所以第六座的方向便和昨天看的有小許分別，加上位於甚高的樓層，甚光猛，昨天的暗房問題好像沒有了。前業主為一單身女子，加上甚少在港，室內環境可以算得上係家徒四壁，牆身天花地板都保持得十分好。

之後再看多了數個單位，但還是覺得第一間最好。但因為唔想太快決定，加上其實都幾係超出我們的預算，所以都係決定諗多陣，食完燒鵝後便離開深井。

下午和獎門人再三商量，始終覺得呢個單位不錯，除左向北之外，無咩其他問題，價錢上雖然超出預算，但相信還可以應付，所以最後便要求經紀再約當晚再睇多一次，今次我仲搵埋我既屋企人一齊去睇。

六點幾上到去睇，還是覺得不錯，雖然向山，其實離山好遠，風景不及海景，但也不錯。

經過一輪討價還價和計算，最後我們給了經紀一個價錢，佢去講得成就買，講唔成就算，我地便去食第二次燒鵝。其實去到呢個地步，都多數無問題﹝我地甚至認為經紀一早已經和業主講好價錢﹞，事實上亦都無問題，晚餐食到一半，經紀已經送來了簽好的臨時買賣合約。

無論如何，雖然錢係少左一大筆，但總算是完成了一件大事，緊接著還有很多很多大大小小的事項需要解決，要搵律師、搵銀行、諗室內設計、搵裝修、買傢私等等等等，仲有結婚既野，嘩，救命呀！！