最佳女主角，我無睇過《滿城盡帶黃金甲》和《鬼域》，點都好，我真係好想俾呢個獎劉若英，佢係《生日快樂》呢部戲真係無得頂，自然真實有感情，郭藹明既配音亦都出色。

最佳男主角，我只係睇過當中三部，劉青雲係《我要成名》既表現絕對值得得到呢個獎。其他對手既表現並不太出色。

最佳編劇，終於有一個獎我係睇哂五個提名，《黑社會以和為貴》 和第一集比較下明顯失色，《傷城》故事並不太特別，《我要成名》故事特別，真實亦有人情，《生日快樂》故事簡單，但真摰動人，《父子》將家庭內壓抑的情及恨講出來，老士得來近年少見，情感亦不過火，好。

最佳導演和最佳電影，同樣都係個五個提名，我睇過三部，以整體看，《父子》當之無愧，故事好，演員好，鏡頭、剪接和配樂好，造到節奏一氣呵成，無冷場。譚家明久休復出，展示大師級的技巧。