呢兩日我都好唔貼市，繼昨天忘記惠理上市，錯失以低於上市價買入後，今日再在中午食飯時先發現SOHO趺到7.8。

諗左好耐，到底買SOHO好定係等招商和中移動，SOHO始終係新股，營運資料唔多，真係講個信字。如果只係睇今年頭三個月既資料，唔算特別好，但主席話全年必定達標。另外睇到一些報道話，SOHO既寫字樓真係好賣得，但係商場店舖比較差，有幾個商場仲同小業主有唔少風波。

市場擔心宏調，但其實宏調對象主要係住宅，SOHO全力做商廈，其實完全無影響，唔駛驚。公司有咁多年歷史，見過下風浪，兩位主要高層仲係年輕，北京搞商廈既對手唔多，絕對值得投資，關鍵係幾時值得去買。

中移動與目標仲有一段距離，招商似乎都好難破三十蚊，咁係咁易買多兩手SOHO都無大所謂既。定左7.8入兩手，點知下午一開始就升番上8蚊，尾市趺番少少都係去唔到7.8。諗咁耐，結果都係得個諗字。

心入面其實仲係想入惠理。基金公司情況就同保險公司一樣，你愈講得個樣係搵笨，而佢又係社會上必需既，咁做佢既股東，絕對係著數既。