收檔

我相信好多我既朋友都知道，我屋企係賣報紙既，而我係睇漫畫雜誌大既。我地周記報檔，係元朗都做左四十年以上，絕對係老字號，但故事總有結束既時候，兩老都決定退下來了。

我好多年前已經開始叫佢地快些退休，賣報紙唔算好辛苦，但好天曬落雨濕，最怕係開檔收檔個陣落大雨，真係連底褲都濕哂。同埋確實係有唔少體力勞動，如果可以，都想佢地可以休息一下，找尋一些生活上既其他樂趣。

大家可能以為全屋漫畫，一定個個仔女都係漫畫迷，但其實係錯既，我係三姐弟中唯一一個瘋狂追漫畫既人，長大後甚至追埋雜誌報紙，我係報紙檔得到既知識，永世受用。

讀小學既時候，我已經有機會一個人睇檔，賣野既經驗好有趣。同時我亦有機會接獲到好多行家，買貨賣貨借貨，成本價格利潤，小學已經實習緊，我地三個到現在都無一個做生意，其實真係有點浪費。

擺街邊，有咩未見過，十幾人追打幾個人，幾個人後尾班馬追番原本個十幾個人，唔係電影橋段先至有，只係電影美化左而已。

自從中二開始，因為father一次拉傷，我開始左負責收檔，晚上七點半至八點，直至讀大學，保守估計有八成以上既呢段時間，我都係正在收緊檔既。讀大學後因為遲放學，所以收檔既機會減少左，但都應該有一半以上，真正既減少是在工作後，現在幾乎完全由father和mother收檔。係呢十多年收檔經歷，我地搬過檔口，檔口亦由木板型，轉為超金屬強化版，再變身為超金屬強化版二代及三代，無論係咩型，對於收檔，我絕對係專家，每塊木，每塊鐵，每一個鎖，我都清楚知道應該放邊度，點樣放先可以用最少既位放最多既野，又要確保方便聽朝佢地開檔。

我鍾意收檔，因為鍾意個種感覺，晚上既天氣比日間稍為舒適，大量放工放學回家既朋友和我們講byebye，對面大排檔燈火昌明，街燈默默地照著，再上有一個由左邊向右邊走既月亮，勞動一輪之後返屋企食飯。我同我father關於收檔個架車仔既感情，真係可以比得上陳奕迅首〈單車〉，次次落雨都係我推車佢拎遮，佢掛住遮我，但係佢又唔多識遮人，然後兩個都濕哂﹝雖然通常係執緊野個陣都已經濕哂﹞。

今次真係要收檔了。

每個人都有野會唔捨得，我最唔捨得係收檔，mother話佢最唔捨得係睇住一個個小朋友長大，唔講你唔知，佢地絕對係好多小朋友既偶像，返學放學見到佢地都好似見到明星咁興奮，又成日請佢地食野，又要同佢地捱手，好多小朋友都係又出世睇到讀中學都重有同佢地打招呼，隨時friend過自己屋企既長輩。father做既時間最耐，四十幾年，佢唔捨得既野只會仲多。

放手，真係一個好難既決定。

各位住元朗既朋友，好好把握機會la，七月二號前，記得來幫襯下。