近期有兩本新出既小說，我都好想睇，分別係村上春樹的《1Q84》和陳冠中的《盛世》，今日Boxing day開始左睇村上春樹的《1Q84》。
多謝獎門人，我開始脫離了圖書館族，不用等一年就可以睇到新書。
獎門人買了《1Q84》台灣的珍藏版給我，最初還以為它只是比較厚，無咩特別，今日拎上睇才發現，原來在白色的書套下，是一個全黑的封面，在啞黑的表面上，以光身的黑色印著村上春樹的英文名和書名，整個設計黑得十分有型。為左呢個黑色既封面，真係貴幾十蚊都值。
睇了頭兩節，似乎係雙線發展地講兩個人的故事，距離睇哂兩本咁厚既書（分BOOK 1和BOOK 2），相信仲有一段好長既日子，到時再寫讀後感。
就係咁樣，廿六了。
有人話人生其中兩個最重要既決定，就係結婚同埋買樓，兩個決定我都係舊年做左，未來一年就係實行年。
昨日就係我既生日，呢一刻我心情異常地平靜﹝可能因為飯氣攻心﹞。回想昨日，獎門人安排了一系列的節目，最估唔到既係，獎門人竟然同我去左睇東亞運動會足球賽，香港對中國！
身處一眾狂熱球迷之中，被區旗和粗口所包圍，我們的手緊緊地拖著，過了一個幾千人陪我的生日，過了一個最滿足的生日，因為有一個了解我的人陪著我。
花了過多月的時間，在圖書館續借了五次，終於睇完伊坂幸太郎2005年出版的小說《沙漠》。這書的故事內容和困悶的書名完全相反，講述五位大學生由入學到畢業所經歷過的一些難忘事情，甚為熱血。五位大學生各有特色，智慧型美女東堂，擁有超能力的害羞少女南，立志維護世界和平的西嶋，鳥瞰形的北村﹝即故事內的第一人稱﹞和到處識女仔的鳥井。
伊坂幸太郎在這小說中顯示出他描述大學生生活的能力，故事的場景大量放在打牌，保齡球館和街上閒逛等大學生常做的之上，效果十分自然和有親切感。當中發生的幾件大事亦充滿緊張氣氛，令我看得甚為投入。
一如其他伊坂幸太郎的作品，故事內總是有很多很有趣的閒角，今次亦有充滿神秘感的保安員、熱愛Punk樂隊Ramones的阿姨和極度陽剛的拳擊手，仲有好多其他有趣的角色出現在他們的校內和校外生活之中，令到整個故事十分立體。
關於《沙漠》這個書名，其實書內有兩個地方提到沙漠。第一個來自西嶋在很早期說的話，他說只要有決心，沙漠也是可以落雪的。呢個咁熱血既解釋，近期好容易令人聯想到製造人造綠洲的杜拜，我只可以咁講，所有大突破係成功之前，聽落都係咁荒謬既。第二個出自北村的女友，她認為沙漠就是工作的世界，而學校就是沙漠內受保護的都市，學生總需要進入沙漠，自力更生。而北村的想法，便是在都市進入沙漠後，要以令沙漠下雪的決心去做人，但當然，鳥瞰形的北村絕對不會隨便表現他這種熱血的心態。
事先聲明，係十月中至十一月中，我已經分段減持匯控，如果唔係十一月尾出現回落，我會繼續減持。
簡單咁講，匯控唔係唔好，正如標題所示，賣出原因只因風險與回報不符。
匯控的最大優點是環球業務，但同樣承受著環球風險，阿根廷債務危機、亞洲金融風暴、美國次按和杜拜世界危機，全部匯控都係首當其衝。雖然，亦是靠著全球的業務，匯控總是能夠成為最快復元的企業。但環球風險總是不斷出現，地區與地區之間的經濟連繫亦愈來愈強，匯控在下次或者再下次的金融危機還是否能夠打不死，實在係未知數。
另一風險，來自銀行的本質。今年匯控交出了令市場給予正面反應的中期業績及第三季回顧，在多個業務亦做出好成績，環球資本市場的增長速度更加係極快。坦白講，匯控的業績報告在下實在睇唔明，特別係環球資本市場呢一部份，唯有信下街邊消息。街邊消息話環球資本市場的利潤主要來自親手落場炒賣。呢個消息對我分析呢一間銀行既影響力好大，一直以來，我偏好銀行股其中一個原因就是它們賺的是中間錢，風險有限和極受市場需要。落場炒賣既結果可以係好大上大落，風險程度十分高。
投資必定存在風險，在這兩個大風險之上，如果有十分可觀的回報機會，還是值得考慮，但基於環球因素，匯控總是會經常遇上各大大小小的危機，除非總是能夠成功捕浪，整體回報率實在不太高。加上那份相信無咩人睇得明既業績報告，我認為投資於更簡單易明的公司會較令人安心。
終於去到十一月十五日的早上，獎門人的屋企人今天也和我們一齊睇，經紀為我們約了數個碧堤的單位，款式還是昨天那兩款，只是座數和層數不同而已，但想不到卻出現了意想不到的發展。
第一個看的是第六座中層的690呎單位，其實第一期四座樓看似打橫一排，實則上呈半彎形，所以第六座的方向便和昨天看的有小許分別，加上位於甚高的樓層，甚光猛，昨天的暗房問題好像沒有了。前業主為一單身女子，加上甚少在港，室內環境可以算得上係家徒四壁，牆身天花地板都保持得十分好。
之後再看多了數個單位，但還是覺得第一間最好。但因為唔想太快決定，加上其實都幾係超出我們的預算，所以都係決定諗多陣，食完燒鵝後便離開深井。
下午和獎門人再三商量，始終覺得呢個單位不錯，除左向北之外，無咩其他問題，價錢上雖然超出預算，但相信還可以應付，所以最後便要求經紀再約當晚再睇多一次，今次我仲搵埋我既屋企人一齊去睇。
六點幾上到去睇，還是覺得不錯，雖然向山，其實離山好遠，風景不及海景，但也不錯。
經過一輪討價還價和計算，最後我們給了經紀一個價錢，佢去講得成就買，講唔成就算，我地便去食第二次燒鵝。其實去到呢個地步，都多數無問題﹝我地甚至認為經紀一早已經和業主講好價錢﹞，事實上亦都無問題，晚餐食到一半，經紀已經送來了簽好的臨時買賣合約。
無論如何，雖然錢係少左一大筆，但總算是完成了一件大事，緊接著還有很多很多大大小小的事項需要解決，要搵律師、搵銀行、諗室內設計、搵裝修、買傢私等等等等，仲有結婚既野，嘩，救命呀！！
從第一次睇樓既經驗，我們總算是摸清了底線，知道了以這個價錢及這個呎數，還是可以買到幾合心水的地方。有見於此，我們本來唔著急既心情就變得更加唔著急。
第二次睇樓已經係相隔三星期既十一月十四日。因為我們反映了上次睇的單位太細，所以經紀便安排了同區另一較新的碧堤半島給我們。碧堤半島由會德豐及九倉建成，第一期於2003年入伙，我們睇的便是第一期的兩房向山單位。
第一期即是第6至9座，一層有八個單位，當中有兩款為690呎和703呎的兩房單位，左右相反加埋便有四個較細的單位。好像看了五個單位，感覺唔係咁好，690呎那款細房隻窗太細，令到成間房都好暗，703呎那一款在入口有一條走廊，極度唔好用。這裡的優點是廚房夠大。
兩款相比，各有好壞，所以我們最後都係決定放棄，反正唔急，但係經紀話聽日再約多幾間，反正有空，我們亦都應承了。
話咁快就係第三次睇樓，但係其實唔係之後一日既十一月十五日，而係十一月十四日既晚上。
該晚我們約了另一區的經紀，睇青衣的藍澄灣。藍澄灣由長和系於二千年頭建成，相鄰酒店。經紀帶我們看了數個兩房單位，但都係唔係好得。問題有幾個，第一，建築物料感覺化學，入伙十年都無，但係室內已經有舊既感覺。第二，相鄰酒店，部份單位可以望到酒店的走廊，容易令人感覺不安。第二，又係相鄰酒店，樓下的商場以旅客為主，人流甚雜。第三，最大的問題，和相鄰酒店的連體，講都唔信，大廈的會所和酒店是共用的，真正既酒店級會所，但係我諗我好難可以安心享用。
雖然青衣之行睇樓失敗，但係總算有得著。話說這位青衣經紀，相比深井那兩位，實在老實得多，起碼佢肯講個盤有咩野唔好，唔係一味有讚無彈，加上明知我地兩條人超低能勁搞笑，教左我地好多野，包括好多問銀行借錢既野。更重要既係，佢原來好熟柏麗灣，甚至本身就係住係柏麗灣，佢講左好多柏麗灣既優點和缺點比我地知，仲叫我地諗清楚，如果肯去柏麗灣，佢有大把盤。
熟我地兩個都應該知道，柏麗灣真係我地既最愛，除左打風要被隔離，柏麗灣真係無野唔好，最正就係有得游繩，原來個度打大風，係要游繩返屋企架！！！超正！！！
估唔到，我地連買樓都買得咁快。
大家應該知道，我和獎門人2010年年尾便會結婚，住屋絕對是新婚人士其中一個需要面對既難題。
在租和買這個問題，我地既立場係，睇到鍾意又價錢許可就買，如果唔係租亦無妨。所以我地定下了一個時間表，2010年年中前要買到樓，如果唔係就一心去搵樓租。買到樓既要點有兩個，第一係搵到好地方，第二係遇到好價錢。
可以講得上係唔好彩，今年既樓價升到好似上左火箭，幾乎返到去97年既水平。係人都識講，升得耐，就自然會有調整，甚至爆破既一日，但呢一日係幾時無人知，所以我地都無刻意去等，幸好股市亦都同期上升了很多，可以乘機套現部份去買樓。
可能因為佢係獎門人既前雇主，可能因為我成日睇佢份免費報紙，可能因為佢個老闆夠過癮，可能因為我成日上佢個網睇地圖，可能因為有人介紹，我地由始至終都只係搵同一間地產代理。
先來講一下我們的要求，廳是我們的生活中心，要夠大，可以hea得夠舒服。因為我地兩個都鍾意入廚，廚房要夠兩個人走動和有多些空間整野食。要有陽光，因為我要種野。間隔要四正好用，唔要鑽石形。相比之下，睡房不需要太大，但最少都要放得落床和一個櫃。我地都有好多書和擺設，要有地方放。要有兩房。地點一般方便就可以，因為我地兩個本身都唔係住開市區，講得上係轉慣車，少少偏遠可以接受。坐向是我們現階段較願意放棄的一點，只要沒有西斜便好了。
入正題。
第一次睇樓係十月廿四日下午，睇深井的浪翠園。之前有一晚我和獎門人在電腦前做了幾小時研究，發現這個地方，新地九十年代出品，當年既過萬蚊呎豪宅，當中既第一期係地圖上係最近深井市區，亦有一些價錢附合我們條件的兩房單位，所以便要求經紀為我們找一些樓盤睇下，經紀係電話上極力推薦第三期，所以我地亦接受安排睇埋第三期。
當日由荃灣坐小巴入深井，十多方鐘車程，亡命程度一般。一如經紀係電話咁講，一期係平面上係較近，但實際位處山上，需要先經過第三期和第二期才能到達。看了兩個一期的單位，感覺十分不好，太近公路，好嘈，室內物料尚可，但實在太細，平台的設計亦十分惡劣。
相比之下，三期的兩房向山單位便好得多。因為和公路之間相隔了一座小山丘，十分安靜，平台亦都很闊大，感覺十分簡潔，單位內很四正，廳夠大，最大問題係兩間房都好細，放了床後便會立即無哂位，第二個問題係廚房只係一般大小。
基於兩個大問題，縱使呢度完全合乎我們的預算，我們還是放棄了這裡﹝其實我地亦看了一些向海向南的兩房單位，房間大小小，有可以一次過睇哂汀九橋、青馬大橋和吸水門大橋的無敵海景，但實在太貴，所以我地亦都放棄了﹞。
常言道不要和股票談戀愛，我今天便忍著淚和中人壽說good bye，以$38.5賣出，獲利三成，成為我踏入股市以來，獲利最多的一隻股票﹝手上還有蟹貨一號宏利和蟹貨二號中移動，慘不忍賭﹞。
賣出中人壽，並不是看淡其前景，而是我確實需要現金，縱使在此刻我認為其價錢偏高，但只要計及其前景，我會認為現價是屬於可持有但不宜買入。經歷過大起大趺，還是多留一點空間給自己較好，逢低買入才是王道。
其實在中人壽數月前公佈中期業績之前，我已經為中人壽定下了賣出價$38，三十幾倍既PE和接近四倍既PEV，確係一個理性套現時機。但在這數月的波浪市，股價始終上不到$38，直至昨天交出了一個絕好的第三季業績，終於到價，仲比目標價高左5豪。
中人壽，總有一天你會再次屬於我！
星期日那天約了婚禮化妝師Yuki來我屋企幫獎門人試妝，試了差不多三小時，試左出門妝加頭和晚妝加頭，另外亦試了幾款髮型上的變化，我們都幾滿意效果，感覺幾年輕有型，無咩老土既感覺，不過佢事先聲明正日會比試妝化得濃，因為要配合番當日服飾。
現場所見，Yuki係一個隨和既人，和獎門人都有講有笑，希望可以係正日個日令獎門人無咁緊張，又肯幫獎門人轉多幾個髮型和配唔同既頭飾，都幾合作，加上跟足全日價錢都唔算貴，所以我地就即場確認。
又搞掂多一樣野，同搵攝影師一樣，都係一試就鍾意，其實正如我同獎門人講，只要對方唔係太樣衰，我地大部份時間都係好隨和同友善既，質素方面，其實係見面前我地已經上網睇左好多相和睇別人既意見，都係有信心先至會約見面，見到都係睇下真人夾唔夾，會唔會係睇見就想打一身個種，如果唔係就已經無咩問題啦。
BTW，我個日個頭同埋個樣都係靠佢。
剛過去的星期六去了行馬鞍山郊遊徑，在耀安村坐四十蚊的士到達馬鞍山村，從這裡出發，一開始是連續上山大約廿分鐘，之後便會到達一涼亭及一路牌。左邊是大金鐘，我們選擇直行前往昂平，中途看見有兩人在玩滑翔傘，狀甚過癮，其中一人在降落時撞樹。
過昂平之後便開始落山，落山大部份是甚難行的石路，但景觀一流，全段落山路都係望住西貢海，大約半小時後便到達茅坪，之後再經菠蘿輋的民居，便到達西貢市，全程只需一個多小時。
國慶當日，和獎門人上司的朋友們行東涌至大澳，據聞有兩條路線，一條上山，一條沿海，今日我們行的便是沿海那條。
從東涌地鐵站出發，先行至逸東村，過侯王廟後便開始進入郊區，一直也是沿著東涌灣行，途經田心、沙螺灣和深屈，大約四小時便可到達大澳。沿途可以隔岸咁見到飛機起飛，有紅樹林，海岸風景亦不錯。
幾易行的一條行山路線，絕大部份是平路，只有小量的上落斜及石頭路，所以行行下都會覺悶。
在深屈的士多有涼茶賣，重有估唔到咁好食既冰凍大樹菠羅，值得一試。到達大澳後我們去了東方小祗園食午餐，荔茸卷和鹽焗雞都幾正。
我終於明白咩叫做天公造美。
倒帶番去九月十四日，考車日，中午三號風球，黃昏開始八號風球，全日狂風大雨。考車的時侯只是三號風球，下著綿綿細雨，事後細想，落雨考車確實有唔少好處，起碼工廠區一帶街上無哂工人，肥佬既原因完全係因為自己心急，小路出大路連環出錯，同打風落雨無關。
由九月十四日的晚上掛上八號風球，一連三天直至九月十六日都係落雨，我們約好了九月十八日拍攝婚紗相，天文台預測當日天晴，我們相信天文台，所以無要求改期。直至九月十七日中午，天色終於轉晴，在九月十八日當天，天氣好到不得了，萬里無雲，個天靚到好似假既一樣，水壩既水因為早幾日既雨水大增，氣勢超強，全日拍攝都十分順利。
九月廿一日至廿五日，台北之旅，出發前睇天氣預測，台灣北部連續五天都係陰天和落雨。但係講到唔信，我們只是在礁溪鄉那一個下午遇上雨天，浸溫泉落雨影響無咩所謂，仲無咁熱，就好似落雪浸溫泉咁樣，另外四天也是好天到唔信。
九月三十日，相約多時既海洋公園哈囉喂之行，遇上黃色暴雨警告，基本上我同獎門人係獎門人灣仔公司行去電車站途中已經濕哂，橫風橫雨，有雨傘都無用。去到金鐘都係咁大雨，海洋公園工作人員不斷同人講可以轉日子，但我地諗住落雨比較少人，無咁多人排隊，所以照去。奇績再次出現，一出香港仔隧道，完全好天，全晚一適雨都無落過。但係海洋公園都係咁多人，但幸好我地都可以係十二點前幾分鐘玩哂所有鬼屋。
十月一日，之前一晚落雨落到狗屎咁樣，但係我地呢日朝早又有一個相約多時之行山活動，由東涌去大澳，前一晚都諗住去唔成既多，點知一早好天到爆，九點正準時由東涌出發，天氣清涼，順利於下午一時半到達大澳食午餐。
希望個天下年我地結婚個日都係咁識做啦。
終於睇完伊坂幸太郎的《重力小丑》，這作品和我之前看伊坂幸太郎的作品有點不同，節奏相對《蚱蜢》比較慢，結構亦甚為複雜，但依然保存了伊坂幸太郎作品的最大特色－故事首尾呼應及充滿關連性。
這故事主要講兩兄弟，以阿哥為第一人稱，整個故事也是以阿哥的親身經歷及回憶去進行，內容主要是兩兄弟及父親調查市內的連環塗鴉和縱火案的關係，加插了很多關於藝術和人性的對話，基因亦是本故事的重點。
相對於伊坂幸太郎後期的作品，我覺得此故事布局較多及沉重，解迷的部份亦無咁爆炸性地驚人，本故事值得追看在於事件的神秘性及對人性善惡的探討。
甚期待此小說的電影版！！
又去台北，今次同埋獎門人和四老一齊去，自由行。
台北市就真係無咩特別，都係去個幾個景點影下相，夜市食下野咁。反而台北市以外既地方就唔錯。
首先係礁溪，呢度既溫泉真係唔錯，晚上市內亦有好多野食，酒店亦都幾平。
另外係小人國，那些模型真係幾真，今年仲多左個叮噹樂園，有好多叮噹既場景，甚有趣。
最驚喜係中壢，原本全無期望，點知原來都好多野行，行街一流。
龍潭大池係去小人國途中發現既地方，環境幾好，食物又平好靚。
今次旅行出發前都有唔少問題，幸好最後都順利齊人出發，栢宇和家姐都總算捱得過呢關。
由六月初在婚紗展選擇了Zara Bride，中間經歷了修身和試衫，終於在九月十八日拍了我們的婚紗相，並且在九月廿七日睇埋相。到目前為止，我們的感覺良好，並沒有hardsell及搵笨的感覺，拍照當日亦很順利，相片出來的效果亦十分滿意。
由試衫講起，我們的套餐有兩套婚紗、兩套晚裝、一套白禮服、一套黑禮服和一套男裝自備便服。我們在九月一日晚上試衫，當晚只有我們一對客人試衫，所以空間甚多，獎門人的兩位姐姐亦有到場幫手。協助我們試衫的是Irish和Cherry，兩人的態度也很好，我們試了很多件衫也沒有黑面，並且給了獎門人不少意見，整個過程也很流暢。
之後便是拍照當日，那天我們早上九點便到達Zara Bride。最初發生了一些事情，令我們擔心了一會，但幸好很快便放心了。事情是這樣的，話說我們的套餐是送Dickie化妝，Dickie是這間公司的生招牌，但在當天早上，幫我們化妝的並不是Dickie，而是另一位化妝師Heidi。我們明白到在早上九點，Zara是沒可能再幫我們換化妝師了，所以我們也不作任何表示，以免影響大家心情，更重要的是，在看了Heidi幫獎門人化妝後，我們對她的信心大增，整個妝也很靚和自然。另一件事，就是執錯了我們的衫，幸好他們發現得早，在我們化妝期間便幫我們執過哂。第三件事，我們在試衫那天加了錢，請化妝師跟拍外景，但Heidi竟然沒有收到通知，幸好 Heidi在核對過後，亦十分願意跟我們出外景。
以下是當日的員工：
Part 1 - Studio (Angel: 白色宮庭式婚紗、Mike: 白色中山裝領禮服)
化妝過後，十一時多便開始拍studio景，有一樣野我們之前完全唔知，就係其中一件婚紗，原來唔可以出街，只可以係studio用。我地立即有少少不滿，但幸好最後都覺得三件衫拍外景都好夠。
Part 2 - 大潭 (Angel: 白色青春形婚紗、Mike: 白色中山裝領禮服)
大約十二點半就出車，先去大潭，因為前幾日好大雨，所以水壩既流水量好強，出來的效果亦很好。我們亦在水壩旁的樹林亦拍了一會，獎門人便在這裡餵蚊了。因為落唔到碼頭，所以我們在這裡拍唔到大潭的經典碼頭相。
Part 3 - 石澳後灘 (Angel: 籃色晚裝、Mike: 白色中山裝領禮服)
後灘這裡很靚，海和石灘的效果也很好，仲俾我地見到好多海膽。但係十分熱和比較難行。
Part 4 - 石澳彩屋 (Angel: 籃色晚裝、Mike: 自備便服)
由後灘行去正灘中途便是著名的彩屋，我們用了很多色彩繽紛的屋和牆來做背影，狀甚有型。
Part 5 - 石澳正灘 (Angel: 籃色晚裝、Mike: 自備便服)
在這裡玩水，正值日落，出來的效果很靚。但當時比較辛苦，因為我們都係差不多全個下半身濕哂，獎門人條晚裝變得超級重。
Part 6 - 中環立法會、電車站和火水燈樓梯 (Angel: 紅色晚裝、Mike: 黑色禮服)
這個便是大家在FACEBOOK上見到的造型，獎門人這套衫是我們最愛的，配襯上中環夜景的效果十分良好。火水燈樓梯是因為有時間多而後加的，效果亦不錯。
最後便是九月廿七日睇相，有三百幾張相，大多也十分滿意，精挑細選了八十張，以下是我們將會有既野，最遲一月尾交貨。
身為一個香港土生土長漫畫迷，我當然有睇大量既本地漫畫，正如人世間各種關係，有些時侯可以有始有終，有些時侯會在事後才發現緣份已盡。
話說今朝晨咁早就去左學車，學完車番荃灣洗埋牙食埋午餐都未夠一點鐘，諗住返屋企寫下影評，行經荃灣廣場，看見一個《天下》的展覽，即時令我回想起自己和《天下》的一段關係。
我從小開始看漫畫，但好坦白，我並不是從第一期開始看這本現存最經典的本地漫畫，我是大約從步驚雲和聶風一起被冰封開始睇的，當時主筆的計劃是將故事重心轉至主角們第二代（《天下》漫畫內過份倚靠幾位老人主角支撐，一直也是此作品最美中不足的地方），事後我們都知道這計劃是失敗的，理論上超老既無名繼續超勁。事後再看回一些合訂本，總算是了解了漫畫內的大部份人物關係，唯獨聶風入魔一段例外，之後一直也追看了數年。
我和《天下》的絕交，是一個SHAPE CUT，從father無做那一期開始，我便一頁也沒有看過了，現在劇情發展成怎樣，我完全不知道，只記得最後是看到步驚雲四出招兵買馬，搞了一個字頭出來。
如果用長跑去形容這段關係，我會這樣說：
我從後追上了一位已經跑了多年的它，再一起並肩走了數年，之後我停下來，而它則繼續跑。雖然我唔知道，在未來的甚麼時侯，我們會否再在某一個彎角重遇，但我始終都會記住它既一招一劍。
要睇既，始終會睇。
從《毅行者》呢本書在2006年最初出版開始，我已經想睇呢本書，熟識我既人都會知道，我睇書多買書少，一心等特價或者等圖書館有得借。呢本書等左三年，今年書展終於係上書局既攤位以一個很特惠既價錢買入這本書。
計埋原復生和孔少林兩個身份，呢本書已經係我睇既第十本蔡東豪既書，繼續有佢一貫既流暢文筆、生動既講故事手法和正面的態度。
呢本書訪問了數個和毅行者這個源自香港而世界知名的行山活動有關的人和組織，從這本書可以了解更多關於這個活動的精神及實況，當中充滿熱血的故事，難得的是，這些熱血故事大多都是經得起時間考驗的。在訪問當中亦加插了很多蔡東豪個人的感想，他本人亦參加了多年的毅行者。
知得愈多，愈發現自己的無知。
從數年前第一次知道有毅行者這個活動，已經好想參加，不追求時間，只希望能夠完成全程。但一直礙於隊員不足及"得個講字"，所以從未真正計畫參加。在讀這本書的時候，真實地感到自己的幼稚。縱使只求行完全程，當中所需要的團隊精神、個人訓練、物資準備和支持者的熱誠，是大得遠超想像，否則輕則中途退出和受傷，重則友誼受損及精神極度失落。
以訓練而言，如果沒有三數個月的每星期行山訓練及實地試行，臨場失敗機會極高，更重要的是這些訓練需要全隊四人一起出席，人人都有自己的私生活及家人，試想像平日約朋友去街都咁難，更何況要連續數月都要交出一個週未去跑山，事後還需要處於近乎企唔穩的狀態，返到屋企同死物無異，唔好諗住可以再去街。
比賽既最有趣之處，在於極多平常估唔到既事發生，毅行者亦然，四個人行一百公里，變數之多無法估計。正如《毅行者》呢本書既作者，最初都諗唔到自己最高調參賽既一年，竟然要中途退出，幸好，佢還有參加後來幾年的比賽，但他在那次退出之後那一年的感覺，有理由相信是極之難受。
要睇既，終於睇左。要行既，唔知幾時會行。
幾星期前忽然之間，我極度渴書，勁想睇小說，但係去左幾次圖書館都借唔到有興趣既書，最後幸得獎門人山手，幫我借左一本伊坂幸太郎有份寫既合輯小說─《I LOVE YOU》。
呢本書由不同作者的小故事組成。打頭陣的伊坂幸太郎寫了一個叫做〈透明色北極熊〉的故事，這是我在此書最喜歡的是故事，內容是兩對情侶的一次遊動物園經歷，當然唔少得伊坂式既人物關係。當中講到了他們所面對的問題和對於前路的不安，睇表演和煙花那段都很好，表達了對愛情的信任。
另一個較喜歡的是石田衣良的〈魔法按鈕〉和中田永一的〈百瀨，轉過頭來〉。〈魔法按鈕〉的感覺很清爽，最後對白那段亦很特別。〈百瀨，轉過頭來〉的故事有點兒老土，但只得兩分的男主角很討好。
正如另一篇文章所講，我們最近買了一部數碼單鏡反光機，扮起野上來。
我們買的是Nikon的 D5000 Kit版，有一支18-55mm f/3.5-5.6鏡頭，另外我們隨後亦多買了一支35mm f/1.8鏡頭，現在去街影相可以好似咁勁咁樣換鏡頭了。
其實我們計劃買機已經係好幾年前既事了，但一直都覺得好貴（和好重），現在獎門人終於幫我下定決心，去實現這個多年的夢想了。
多得大光圈和人手對焦，現在可以很輕易地玩到淺景深的效果了。
現在最重要的，是多思考及觀察，縱使沒有相機在手，有些時侯我也會看身邊的事件，想像一下可以怎樣拍，才能夠拍得出一些“記錄“相以外的照片。
這實在是一門十分深奧及可遇不可求的學問。
好像有一本書，叫做甚麼“對上一次的第一次“，確實的書名忘記了，網上也找不到，內容是講當我們有得咁上下年紀，“第一次“的機會便愈來愈少了。幸運地，我近期遇上了很多第一次。（當然，這亦代表我正親手搶奪了將來的我既第一次。）
第一次是美好而多變的，好像第一次的自由行，即是JJ及kalee那次，到目前為止，還是我們最經常回味的經歷。
近排發生的第一次，包括了第一次的開車，第一次擁有自己的數碼單鏡反光機，第一次影相可以換鏡頭，第一次為了production的死而深感自責。
當然，為了我們的婚禮，我們擁有了很多第一次，第一次好像睇樓咁樣睇酒店，第一次搵婚紗相攝影，第一次上專業攝影師的工作室，第一次上金都，第一次返大陸睇婚禮用品。
第一次陸續有來呢。
根據在大學時曾經修讀過兩科心理學的我，可以斷言，我已經患上了“強制自我紀錄症“。病徵是無時無刻都想記下自己擁有既野和做過既野，病徵相信是源自擁有太多和對記憶力失去信心。
以我為例，實不相暪，我記下了以下的事項：
除此之外，好想去記下既有：
再進一步，可能我會想記下所有見過既人，所有講過既野，所有去過的地方，情況好像有點失控了。
除了部份資料可能有用外，有些真是不知道記來做甚麼，是因為內心少了一些安全感嗎？
好野，又搞掂一樣野。好友Nat早前介紹了婚禮攝影師Frankie給我們，她原本是想找她拍攝她的婚禮的，可惜Frankie當日無期。
其實之前我們都在網上看了不少婚禮攝影師的作品，但始終無一個能夠特別地感動我們。直至看了Frankie的照片，從他的作品中看到了婚禮當日新人和親友真實及輕鬆的笑容，唔造作，但卻很有美感。另外，最能夠感動我的，是他那個price list的手寫設計，簡單得來有美感，是我們一直追求的東西。
在網上查了他的工作表，確定他在我們婚禮那天有空後，我們便相約了在昨天上他的工作室見面。昨天下午落了多場大雨，意想不到的是我們竟在他的工作室一坐便坐了兩個多小時，陽光和雨聲也交替了很多次。
在這兩小時，公事上Frankie給我們看了數套照片，當中包括了類似我們的出門環境、註冊地點和酒店。我們兩人就像在上高級攝影班一樣，看著Frankie遂張照片告訢我們他如何打燈去解決場地問題和事後如何執相去令到照片主題更明確。
公事以外，Frankie對我們就像朋友一樣，說了他的目標和計劃。正如Frankie所說，現在他可能不是最TOP，但我們明確的看到他求進步的心和對美感的執著，這個便是我們選擇Frankie的原因，與其選擇一個食老本的高人，我們察可選擇一個不斷向前的 “新人”，那份對專業的執著及心意，是無價的。
其實昨天我們在工作室的sofa已經決定左要用Frankie，只係Frankie要我地考慮，我地先至考慮。我們出到門口第一件講既事就係，仲有咩要考慮？所以我們落到樓下便打電話給Frankie confirm了，這麼快confirm也嚇了Frankie一跳。（行事異常地迅速一直也是我們的特色。）
我們用了2P1V的套餐，有Frankie和Raymond攝影和雲師傅綠像。
對了，請注意我不叫Frankie做 snap shot攝影師，因為他說snap shot框住他的創作，現在他是一個婚禮攝影師，將來他更可能進一步成為一個婚禮記綠師。（你睇，連咁既說話都講得出，仲唔係有 heart？）
近期在晚上的西鐵上，經常會看見一些穿著得異常隆重既女孩，想必是剛剛去完謝師宴吧。
看見那些女孩（還有那些男生），便覺得很壯觀，一大群十幾歲既靚妹，襯上一個明顯地是過火的化妝，穿著一件不太配合西鐵環境的吊帶晚裝，身旁那一群男生一係著左老豆既西裝，一係打扮得像陳浩南（再一次證明，在極端的左和右只是差一小步）。
雖然幾年後，佢地睇番自己個樣，必定會覺得自己好樣衰。但這始終是一種經歷，縱使是錯的配搭，也是開心地錯的，而這種開心，在長大後便不易得到了。
說回我的謝師宴，在中五那一年，“幸好”謝師宴那天我需要考英文ORAL，所以我是穿著得十分正常的，並沒有成為老西化或陳浩南化。如果你係我既朋友，係FACEBOOK可以搵到我係當晚既相。當然，那些團體相也是很壯觀的。
之後中七那個謝師宴我都無去了，大學有謝師宴嗎？其實我也不清楚，有也未必會去，視乎其他朋友吧，就像近期那個“甚麼”（我真的不記得那個是甚麼...)，便是完全沒有打算去了。如果要見大同，一齊係街度團圈便可以了，不用穿吊帶晚裝吧。
近期日忙，無咩時間寫BLOG，所以連我決定左考車都無記低。話說我地下年年尾就會結婚，而蜜月既地點，其實早係年幾前已經決定左，而那些地方又似乎可以自駕遊是方便得多的，所以便趁早先考車牌，再申請國際牌。（可能因為天氣的關係，最後會放棄自駕遊，但這是後話了。）
我是在五月尾在金鐘報名考車的，咩都唔知的我，話咁快就排左期六月尾考筆試，好似好快，但其實都有足足一個月。時間過得好快，結果我也只是在最後那一個星期才開始讀，幸好得到Stella的MC題集和Steve的指導，讀起來也無咩難度。
上星期四便去了長沙環考筆試，二十題MC，用了三分鐘做完，覆題一次後交卷，即時知道結果。當然係合格啦，但係，“咩都唔知的我”再一次出現，原來即時就會排埋期考路試，仲要係無得選擇地點，這個便是駕駛學院和私人的分別吧！
排了九月十四日下午在油糖考，很多人都話油糖好難考，我地係行動派，星期日我們便去了現場視察。睇完之後只係可以講粗口，三條路線都係勁多斜路，又有的士、小巴和巴士，真係大濟。
打到黎就要頂住，油糖就油糖，斜路就斜路，驚都無用，最重要都係搵返個教車師父先。
中同三人組（阿爺、CWK和雞）幾年前都係用同一個師父係元朗學，三個都係一TAKE PASS。我第一個都係搵呢個師父，但係後尾諗諗下由元朗去油糖都幾遠，實地試車個幾堂都幾貴，所以就放棄左。
後來係網上搵到有人話一個師父幾好，打去一問，原來已經退左休，但係佢話可以介紹另一個俾我，結果我就跟左呢個師父，等我將來合格先開佢名啦，費事搞臭人地個名。
星 期二晚就上左第一堂，上左兩個鐘，頭一個鐘講左好多理論野和車的結構，之後半個鐘就由佢開車係九龍塘那些無咩人既街轉來轉去，最後半個鐘就由我開。開始既 時侯係咁開車停車，之後再試下轉彎和過交通燈，最後我更加由九龍塘開返去旺角警署，中途經過左幾條大街和燈位，十分得人驚！！！
所以，我而家開始學車啦，曾經何時，我仲咬牙切齒咁話一定唔會學車，正如路飛和卓洛係《One Piece》咁講，我們也需要一個理由。
星期日一行八人返大陸，主要目的係去睇結婚用品和飲飲食食慶祝父親節。前一晚上網睇過，深圳有一個地方叫荀崗，有兩個文具精品批發市場，有好多結婚用品賣，所以我地食完午飯就去左荀崗。我地係福田口岸附近食飯，之後分兩架的士去荀崗，點知架的士唔識路，行遠左好多路，一架車要大約$38人仔。
網上講個兩個批發市場分別係荀荀崗文具玩具禮品批發市場和百合隆文具玩具批發市場，名不虛傳，果然係有勁多玩具精品賣，賣結婚用品既主要有幾間，都有好多唔同種類既貨，問左幾樣野，價錢都似乎比香港平﹝其實我地係未係香港格個價既！﹞，而且質素和香港差唔多﹝應該係同一批貨﹞。另外一樣野，就係呢度似乎好難講價，咁樣就有好有唔好啦。
見到既產品種類有喜帖、敬茶茶壺、利是封、假花、布藝布置、剪紙布置、花鞋、上頭用品、紅傘、戒指枕、花籃和小禮物盒，遲下係香港睇完價錢，會上去再睇和買。
晚飯去了中發源，好多羊，煎餃和魚頭湯最好味。
如果皇馬在未來數月，在建造那隊像笑話一樣的水兵時，再唔增強後防的話，我可以肯定以下三件事必定在下個球季發生：
第一點和第二點可謂十分肯定，在皇馬得到卡卡加C朗這對一個用腦加一個無腦既驚人組合後，聽說還想買列貝利和聿拿，完全無加強中場防守及後防的消息，簡直諗起都驚，就像一個女人花盡金錢去把自己的樣子整容成一個美女，身上卻長滿怪毛及奇臭無比。
第三點會否發生，視乎卡斯拿斯到底當唔當自己係一個人。他的情況就像一個大婆，老公在外包2、3、4奶，大婆就係屋企照料哂全家上下三代，做到死都唔會得到老公歡心。在這幾季有眼既都應該睇到，卡斯拿斯絕對係皇馬上下最痛苦既一人，完全無支援，縱有鋼門之身手都無用，前線那班明星又只懂踢風流波。如果佢仲有自尊，就好應該強烈表示不滿，球會對佢唔好，佢無需要繼續為球會賣命。
今日試玩了Google Maps，畫了2005年的歐洲及2008年的北海道旅遊路線，感覺不太好用，但用作粗略地計劃及紀緣行程也是不錯的。
在較大的地圖上查看Darth Mike Travel Path
在較大的地圖上查看Darth Mike Travel Path
星期日去左行山，又係行烏蛟騰->亞媽笏->荔枝窩->印洲塘->三椏村->烏蛟騰，最主要都係為左去三椏村食客家菜和蠔，但好可惜，夏天既蠔無咁肥美，問過伙計，12月既蠔先靚，咁我地可以等半年後先再去，幸好還有不錯既三杯鴨。
唔計食飯，全程行左四個鐘多少少，上落比較多，不算太好行。
試用了google地圖去畫今次的行程，但地圖的細節不夠，我只是憑衛星圖去估我們的路線出來。
在剛過去的婚紗展，我們的取得意想不到的進展。除了本身已經決定好的酒店外，我們亦即場選擇埋婚紗攝影公司。
正如之前既文章講過，我地已經hold左一間酒店，係星期六個日，我地正式落訂同埋簽臨時合約，我地亦順利咁講左幾樣我地希望有既著數，呢間酒店就係海景嘉福。酒店既Michelle亦很合作地解答左我地好多問題，我地亦成為左佢sales生涯既第一張單，希望之後我地一直都合作愉快啦。
搞掂酒店之後，我地就開始睇影婚紗相，原本諗住今日只係收集資料，絕對唔做決定。
但是在睇第二間攝影公司Zara Bride的時候，看見那個套餐本身唔錯，而我地亦確實講了勁多著數返來，感覺上似乎已經係無可能再抵及再多禮物，加上Zara的相片質素亦唔錯。在即場問了其他朋友，亦得知此公司在網上的評語甚好。另外因為Zara是一間新公司，近期亦有很多廣告，感覺上設備及服飾應該會比其他公司新款，所以我便答應了。
後來我們亦在網上看了很多Zara用家的意見，大部份都是良好的，希望我地都可以一次過影到心滿意足既靚相啦！
兩星期前既今日，係圖書館借左五隻cd，聽得最多既係Beatles既《Revolver》，呢隻係我第四隻聽佢地既碟，入面可以見到佢地玩左好多音效及加入印度元素。
在〈Tomorrow Never Knows〉和〈Yellow Submarine〉可以聽到好多特別既音效，例如倒播和回音，當時而言應該係好新奇。
係〈Love You To〉聽到佢地既印度風格，George Harrison彈Sitar真係幾勁。
結他部份當然係Beatles強項，好多首歌都有好多強勁的riff，例如〈Taxman〉和〈She Said She Said〉。〈And Your Bird Can Sing〉的獨奏更加係我既全碟最愛，超正。
Beatles係呢隻碟有玩弦樂，在〈Eleanor Rigby〉一曲，重型和不繼重覆的小提琴聲，令到整首歌有一種高壓的感覺。
全碟我最鍾意既係〈Here, There and Everywhere〉，很溫柔很輕的一首歌，就像細細聲在耳邊唱那樣。找不到Beatles的版本，聽住Paul McCartney的個人現場版本頂住先吧，反正呢首歌本身都係佢作和唱的。
另外三隻聽過既係《Rubber Soul》、《Sgt. Pepper's Lonely Hearts Club Band》和《The Beatles》﹝白碟﹞
林行止在昨天的專欄提到，在香港建立一個六四資料館，以不加插立場的方式展示對事年的不同意見，並分析的六四的後影響，不單止對當事人及中國政府，還有香港的回歸問題，台灣和海外的影響等，作一個全面和完整的整理。
對於在港建立六四資料館一事，我十分讚成，並且會以此為榮，但始終係一個好遠既夢，實行上存在很大的障礙。
建立資料館，不離民辦或公辦。民辦者，經費上會存在很大的問題，總不能期待十五萬支持者，每個月也前往支持一下。另外，民辦者亦必定被有關人士扣上得外國勢力支持的帽子，容易失去中立了解事件的第一立場。
公辦可算是一個不可能完成的任務。近十年的香港政府在建立不論紀念館、資料館和藝術館也好，必定反民意而行。單是一個事在必行的李小龍博物館也弄得好事變壞事，更可笑的是曾灶財的作品保育事件，竟然因為一個不能定論曾灶財的塗鴉是否藝術的問題，而一直放任曾灶財的作品在街上一個又一個的被"清潔"，可算係無能之最。
之前提到我地去左好多酒店拎酒席資料睇，經過一輪挑選，一堆超高級既酒店好快已經俾我地放棄左，港島區可以算得上係全軍覆沒。
我地既初選以場地容量、場地形狀、酒店地點和價錢為主，有七間較合心水，我們亦把握上週末的時間，用了兩天約埋經紀親身去睇場地。現簡單咁記低視察結果，我唔公開價錢及最低消費，始終係人地既商業秘密，有興趣可以直接問我。以下次序跟我們的睇場次序，不代表喜好。
現時有一間俾我地hold左，另外亦有兩間屬於我地既心水。要進入更詳細既考慮了。
Finally have some free time to read China Life Insurance 2008 annual report. Basically the profit drop is caused by the decrease on investment income. Insurance business is still attractive and growing.
The insurance income increased 20.8% while the insurance and operational cost decreased 1.5%. On the other hand, the investment income dropped 61.4%. The total net profit of 2008 dropped 45.2% to 21B RMB.
Look into the financial asset distribution. The ratio of fixed income asset increased from 75.4% to 89.4%. This category includes bond, time deposit, and cash. The stock asset dropped from 23% to 8%. This change reflects the group investment direction. The asset pool created a 3.23% return on 2008, which is 6.03% lower than the fantastic year - 2007.
I still believe China Life Insurance is a good investment. Its insurance business remains strong growth and keeps a stable cost on running the business. The management team manages its asset well and makes good and fast decisions on global and local investment.
BTW, this stock has the highest chance to be the fastest “back to town” stock in my portfolio.
Last weekend I told Angel what chords should belong to a key in generally case. She asked me why. That is really a good question. I just listened from jazz guitar teacher but never think the reason behind. I pick up my pencil and draw out their relationship. Finally got the reason (actually the guitar teacher should explained in class, just I forget).
Take C key as example, the following chords are basically match with it.
Cmaj7 Dm7 Em7 Fmaj7 Gm7 Am7 Bm7b5
Why? Let list out the note in each chord.
| Cmaj7 | Dm7 | Em7 | Fmaj7 | Gm7 | Am7 | Bm7b5 |
|---|---|---|---|---|---|---|
| C | D | E | F | G | A | B |
| E | F | G | A | B | C | D |
| G | A | B | C | D | E | F |
| B | C | D | E | F | G | A |
This seems not much special. However, you may notice that all elements in these 7 chords are belonging to C major scale. It would be more obvious if showing their so-fa name in C key.
| Cmaj7 | Dm7 | Em7 | Fmaj7 | Gm7 | Am7 | Bm7b5 |
|---|---|---|---|---|---|---|
| Do | Re | Mi | Fa | So | Li | Ti |
| Mi | Fa | So | Li | Ti | Do | Re |
| So | Li | Ti | Do | Re | Mi | Fa |
| Ti | Do | Re | Mi | Fa | So | Li |
So, that's means?
All these 7 chords are made by C major scale, so their sound would be match with a song in C key. However, this is just generally correct. In some cases a half-step tone would make the song much more interesting.
睇完《名偵探的法則》了，之前話呢本書玩反高潮玩到好悶，睇到中段就無左呢個感覺，因為作者已經唔再刻意去製造查案的高潮，全力去玩偵探小說的經典橋段，盡數當中的不合理，幾有趣。
之後便立即開始看伊坂幸太郎的《蚱蜢》了，看了兩部由他的作品改編而成的電影，終於正式看他的書了。
這是一個關於殺手的故事，看了數十頁，感覺十分良好，描寫得很有電影感，很緊湊，人物性格亦很立體，一大班出場人物由無關係慢慢講到背後原來好多關連，令人有一直追看的感覺。
今個星期無跑步，昨天早上去了城門谷游水，因為主池維修，只能夠去室外的細池游，細池只有25米長，最高的水深亦只有1.2米，每游一個直池便休息一次，游了大約45小時，總共游了14*25＝350米。
池水太淺的最大問題，便是休息的時侯唔可以企直，否則便大半個上身伸出水面吹風。
最值得一提既係，我落水剛游了一個池，便給一位阿伯捉著，佢好熱心咁指出我動作上的錯誤，更捉著我的手和頭去教我，佢亦親身示範了給我看。隨後他亦有“跟進“我的改動，並再作出指導。
我未夠十歲就係市政局既暑期班學自由式（到現在我也只是識自由式），從來都未試過有專人教授，自己亦唔知自己既動作有無問題，今次遇上這位阿伯真是不錯，所以我都對佢講左好多次唔該。
記低佢既重點：
Last night Jazz guitar lesson taught altered tension. The altered feeling is funny. Listed what I understand here for reference. This is pure music theory and could apply to all musical instruments.
II-V-I is a progression which has a relax-tension feeling.
There are two kinds of tension could apply to the V chord.
Nature tension: Adding 9 or 11 note of the V chord to rich the sound
Altered tension: Adding b5, #5, b9 or #9 note of the V chord to make an altered feeling
Play altered tension by chord (key = C major). The G7b9 would make an altered feeling in the chord progression.
| Dm7 | Dm7 | Dm7 | Dm7 |
| G7 | G7 | G7 | G7b9 |
| Cmaj7 | Cmaj7 | Cmaj7 | Cmaj7 |
For scale, we can substitute the V scale by scales which contain those alter notes (b5, #5, b9 and #9). For example, we can replace G scale by Ab major scale or F# major pentatonic scale. Both of them hit the alter notes and chord tones. There are more than two possibility scales for substitution in reality.
| Ab major scale | Ab | Bb | C | Db | Eb | F | G |
| Relevant position of G | b9 | #9 | 4 | b5 | #5 | b7 | #7 |
| F# major pentatonic scale | F# | G# | A# | C# | D# |
| Relevant position of G | 7 | b9 | #9 | b5 | #5 |
Note: while substitute the scales, remember to let the solo in tension part walking close to resolution part. Otherwise the sound would be too odd when changing back to the resolution chord. For example, putting C/F/G as the last note in the solo of Ab major scale (C/F/G belongs to C major scale).
回Callets，再戰舞林係一個好主意，但跳得多其實都幾悶，又唔係跳得好，完左course之後又好快唔記得哂。另外我現在比較想練氣，所以一些長時間的運動比較適合。
回O Steve，做gym都係一個好主意，如果係，我會希望係朝早同中午做，但又驚無力做公司野。如果半年後我既現行計劃唔掂，才做gym吧。
說回五月九日早上的跑步，以下便是當天的路線圖。
黃色是跑步，藍色是步行。那天一開始便跑了一條大直路，之後便覺得胃部有點不適，行了大約大半個元朗公園，便再開始跑，但很快又痛過，所以過了元中後便又行過，行到返屋企。
和以往不同，今次未開始無氣和腳累，已經再跑唔到，係因為胃痛。但那天我明明只是在出發的半小時前食了兩塊方包，完全無飽既感覺，還在家中做了一輪熱身運動。下次要試下行到去元朗公園才開始跑，如果身體無異樣，可以試下跑加行混合地走數圈。
跟進一下減肥者的守則，九點半那條簡直係難到爆，有一晚我九點半才開始晚餐！還有勁多來自零食既吸引力！
番查一下才發現，原來我之前寫小左一條守則，現在要補回，就係只食一半份量既雞皮﹝不包括雞亦﹞，例如去飲，有炸子雞食，如果我總共食四件，那麼便有兩件不可以食皮。其實我之前已經有咁做，只不過沒有一半那麼多。
要開始收身了。
頂著一個大肚腩始終唔係咁好睇，加上面部兩邊在這兩年確實是脹了不少，手腳都不是太粗，但可以講得上完全係肥肉。
其實對比舊年高峰期的150磅，現在已經少了大約十磅，我的目標也只是要求 130-135磅，重量相對地不是重點。重點是減去肚腩，次要是收緊手臂的肥肉。
計劃其實已經開始，主要打擊的是改變飲食集慣及保持定期的運動，我稱此計劃為“減肥者的守則”（為了紀念那本我看了很久都未睇完既《名偵探的守則》）。
飲食篇
運動篇
今天早上便去了跑步，斷斷續續跑了數段，總共跑了不足廿分鐘，已經感到胃部扭作一團，連埋步行的時間，連一隻《海角七號》OST都未聽完，希望數月後可以做到連續跑二十分鐘吧，畢竟這也是一個可以靜靜地聽歌的好機會。
飲食篇應該不難達成，除了九點半那一項，始終有些時侯是真的很晚才吃飯，和朋友外出時也經常在晚餐後有糖水節目。
Just read an interview of Larry Ellison about Oracle acquired Sun during lunch. Few points about the hardware stuffs.
Actually my concern is on the future of Open Office. Its future is quite danger. It's totally can’t link up with any Oracle hot product.
Java should be no problem as both IBM and Oracle rely on it very much. MySQL may be used to fight for low-medium market and link up with Oracle DB related products. Adding a “upgrade-to-Oracle-able” value to MySQL would be not bad too.
五月份既《讀書好》有一篇好值得睇既訪問，訪問對象係蔡東豪，講香港價值。hardcopy/softcopy都好難搵，我簡單咁記得重點。
近排社會上成日有人講，話大陸要打造上海成國際金融中心，香港地位遲早不保。蔡東豪係年幾前，曾經明言，係佢有生之年，上海都無可能取代到香港。佢係呢篇訪問，再一次確認呢一番說話。
佢認為要成為一個國際金融中心，包容度十分重要，係政府既指引下形成的，最多只可以是國內甚至地區的金融中心，絕無可能達到國際性。只有係健全法則下的自由市場，才可以吸引到最好既人材。
再一次，蔡東豪強調香港應走溫布頓路線，以一個最好既平台，去吸納世界級人材。香港作為一個小地方，追求本士天才有難度，但吸引天才來到，搞旺本地消費，那麼市民的生活便有保障。
最後，我覺得佢講好好，短期而言，真正能夠令到香港地位動搖的，只有香港自己。
坐言起行，為左結婚，我們已經準備了一個行動清單，附上所需lead time，以便逐一擊破。
昨天我們便去了酒店拎酒席資料，我地首先去中環係文華東方和四季，之後轉去金鐘既萬豪和香格里拉，再過海去尖沙咀馬哥索羅、太子、朗庭、半島、九龍、喜來登、洲際、萬麗、香格里拉、帝苑、富豪、海景嘉福和日航，最後去埋旺角既朗豪。
唔駛咁驚，我地去文華東方、四季和半島等超高級酒店，都只係諗住見識下所謂既最好係點樣。但係世事無絕對，世事既發展好難講。
我地兩條友行到腳都斷，由第一間既勁緊張，去到之後完全唔緊張，拎埋超多酒席資料。酒席既種類好多，最貴同最平可以差足足一倍以上，有些包酒水，有些包名車接送。場地既形狀亦都個個唔同，有些真係睇見都覺得怪，最後個幾圍事必要睇電視。
之後我地會首先進行filter，再約酒店睇場地，傾細節，到時再update。
聰明既你可能一早就估到（其實我好懷疑，呢個你係唔存在既，唔係話你唔聰明，只係我覺得呢個blog其實係無人睇），無錯，我無端端咁走去學咁多鑽石既知識，就係因為我要買，買既原因亦都好咁簡單，因為我要用。
咳咳，等我清一清喉嚨，再同大家宣怖，我地結婚LA！！！
係大約十日前既一個晚上，我向獎門人求婚了，除左介指，鮮花和我自製的蛋糕，加上我既愛意（請自盡嘔吐袋，BYOVB - bring your own vomit bag），獎門人答應了我的要求，從此，我地可以同大家講，我地係engaged。
因為一個我地覺得好重要既原因，所以我既婚事應該會係冬天進行，如果要０９／１０既冬天，可能太趕了，所以我地暫定既婚期會係１０／１１既冬天，摘日亦都會選擇這段時間。
我假設你會恭喜我地，所以我首先同大家講聲多謝，同埋到時早Ｄ到。如果我搵你做兄弟姐妹，伴郎伴娘，亦都希望大家盡量唔好托大掙。
由而家開始，我地兩條友，就要準備好多結婚既事，重有搵新屋，到時講唔埋又要大家幫幫手，希望大家幫到就幫ＬＡ，thank you thank you!
身為一個半死不活的IT人，我其實尚有注意現今IT界的新發展的（如果連這也沒有，便可以稱為全死而永無復活了）。近月令我最有興趣的，便是好多地方都有講既雲端計算，在看了很多文章提及呢樣野有幾咁HIT之後，我終於在個多月前係IBM developer works搵了一些雲端計算的資料睇下。
簡單咁講，即係不論數據和程式，也是存放在雲端服務供應商內，而這些供應商的服務是以硬碟／CPU計算時間／網絡數據用量來收費，客户基本上可以完全唔駛埋硬件的保養，對於新公司或資金有限的公司，更可以完全免去買 servers的問題。
不同的雲端服務供應商亦會提供不同的程式給客户使用，Google既設計屬於 CISC，Amazon的屬於RISC，一個方便上手，另一個就靈活多變。
雲端計算亦有很多問題。第一個問題是公司的客户資料，存放在不知名的地方，安全性成疑。第二個問題是對供應商的依賴，如果供應商大幅加價，我相信將整套系統連數據搬住另一供應商的複雜性極高，好有走唔到既感覺。
以現時提供的功能來看，似乎亦未能做到BI的分折，對公司製訂長線發展路向幫助唔大。
個人認為作為一間短期運作的公司、數據並不需要長期保存的公司和當中並不包括私人和公司機密的資料，雲端計算絕對是一個唔錯的選擇，好像舊年北京奧運的結果發送系統，便是一個很好的應用了。
早幾日搭車，係度諗緊《天水圍的日與夜》既劇情，諗起當中一段幾令人傷心既片段。話說憑此片得到金像獎最佳女配角的陳麗雲，在片中演一位獨居老人，她原本有一女兒，但女兒在嫁人後便死了，女婿亦娶了另一個人及生了孩子，自知有錢都只可以帶落棺材既陳麗雲，便買了一些金器，希望送給這位哎吔新抱和孫，但因為一直和他們的關係也不太好，所以買左都唔敢送，直至鮑起靜鼓勵和陪同她，她才有勇氣約女婿一家飲茶。
但很可惜，新抱和孫都無出現，女婿亦只是應酬式見下就算，並表示太太並不喜觀自己再和她有接觸，搞到自己好難做，最後亦沒有收到那些禮物，之後陳麗雲和鮑起靜便一起搭巴士番天水圍，途中的對話唔造作，但其實令人十分傷心，那些反應便是金像級演出了。
諗起佢，之後便諗起太姥。太姥的女兒也是在嫁人後便死了，阿BA之後亦娶了我的姥姥，幸好，阿BA一直都對她很好，加上我相信太姥對我阿媽七姐弟是很好的，所以她們長大後也一直也很照顧她。
她亦陪我走過了我的少年時代，小學時係舊屋，佢會靜靜地坐係我隔離睇我做功課（姥姥亦都有試過，多得眾人保佑，我既讀書成績總算係好多好多年後稍為好轉）。到我大個少少，中學個陣，有幾年我朝朝都會拖太姥去坐老人保母車去日間老人中心。
雖然有好多地方我地都未必可以做到最好和心滿意足，但總算我們都有過一些快樂的回憶。
常言道鑽石恆久遠，一顆永流傳，但到底點先係一粒好石？同埋鑽石係咪真係有投資價值？
老套又好老實咁講，一粒石既好與壞，最重要當然係當事人自己既感覺，就算其他人講到識飛，如果俾錢個位同埋收貨個位唔鍾意，就講咩都無用。
當然，感覺既野好主觀，為左要有客觀既分析，各式各樣既証書相繼出現，當中現今最權威既，就係由GIA出既証書，佢地定下所謂4C既指標。
Carat - 克拉，即係幾多卡，如果純粹收藏，當然愈大愈好，但若果當作首飾配戴，當然要配合番實際情況，否則只會出洋相甚至受傷。盲目追求大，而忽視其他因素，便不能夠稱之為理性消費了。
Color - 顏色，鑽石以完全無色為之最靚，以GIA評級為例，D-F為之無色，G級之後開始偏黃。如果直接將兩粒石放埋一齊，顏色既差距會好明顯。
Clarity - 淨度，即係粒石係十倍放大鏡之下，見到幾多瑕疵，當中以無瑕FL為之最好，SI以上既一般憑肉眼都係無可能睇到有瑕疵。
Cut - 切割，4個C之中唯一一樣後天的因素，平時成日講既夠唔夠火和閃唔閃，便決定於切割。切割得好便可以將光線完全反射，達至勁閃既效果。切割不良的後果可以令到整粒石變得脆弱，出現斷腰的最壞情況。
除左4個C之外，另外仲有好多數據可以左右粒石既價值，例如對稱、磨光和石既切割比例，呢個網有勁詳細既介紹。
全世界既原石，一般都係來De Beers既批發，如果係香港買，據說某些店舖是可以比較優先選擇原石的，但可信性成疑。原石既切割則一般以歐洲既手功最好。鑲製首飾方面，有機器做亦有人手做，視乎你係咪相信人手既功夫較好。一般人都會將鑽石配上鉑或白金，白金硬度較強，但會隨時間脫去白色而露出金黃色，相對之下，鉑金的價值比較高。
個人認為，我會最重視顏色和切割，因為佢地最影響粒石既質素，大小就視乎用途和用家的體形，淨度屬於肉眼睇唔到有瑕疵便可以。因為白金會脫色，所以鉑金絕對是鑽石既最好朋友。
而到底鑽石既投資價值係點？根據網上流傳既報價表，長線而言，鑽石是升值的。但正如其他商品投資，例如名表和紅酒，鑽石同樣面對保養既問題，加上作為一個普通人，在無零售線既情況下，如何賣出商品是一個大問題，縱使網上拍賣，亦要有一定程度的折讓才可吸引到買家。當然，如果那一粒是十分珍貴既鑽石，便另作別論。
作為一份禮物/心意，一粒細心選擇的鑽石，絕對是十分有意義和珍貴的。
很利害的金像獎，因為《天水圍的日與夜》的得獎，令到我的電影BLOG，由昨天至今日中午，達到過千次的檢閱紀緣。我個網平日都係得一百至二百人次，今次實在係破天荒咁勁。
好多部得獎電影我都有寫，就只係呢部戲既影評今日特別旺，係對上個一百個對訪入面，佔左八十一個，可能因為真正睇過呢部戲既人唔係咁多。
講番呢一部戲，舊年八月睇的，我寫的那篇影評，主要以社會角度去平反天水圍，可算係完全無講電影技巧，我自己都覺得寫得唔錯。
不論係電影還是我篇影評，如果你之前未睇，現在都好應該睇下。唔好諗住會好有驚喜，呢部始終都係一部很平淡的寫實片。
三月話咁快就完左，工作上算是渡過了危險期，花紅也是不錯。
飲左幾杯茶，緊張之外我諗我都算淡定，真係學海無涯。有機會我會係呢度記低，扮下專家。
睇左三套話劇，《聖荷西謀殺案》、《黑天鵝》和《美麗連繫》，三套也不錯，故事內有好多野都值得諗和細心記下，可惜我拖拖下就無左件事。
爵士結他中班已經過左大半，可以講得上係完全跟唔上，逢星期四晚去坐一個鐘而已，返到屋企又無練。買了一個拍子機，幾個星期只係用過兩次。目標其實唔算高，希望彈到funk既節奏，睇到五線譜，記到幾個scale把位和7th chord。
電影節都開始左，到今日為止睇左三套，今年既選擇好正路，都是日本和台灣片，詳細會係movie blog寫。
看了《天鵝湖》，超期待第三幕既32個轉圈，果然利害。《天鵝湖》的音樂和舞蹈很配合，四幕都表達緊唔同既感情。
同一時間睇緊幾本書，有壹週既人物訪問，有《名偵探的守則》，有《質問力》。《名偵探的守則》既不斷反高潮令人睇到好悶。
昨日睇完村上春樹既新作《關於跑步，我說的其實是......》，唔講唔知，原來村上春樹已經跑左廿幾年馬粒松，及玩左幾年三項鐵人賽。此書主要係近幾年他在練習、準備比賽和比賽後的隨筆，內容有關於運動，亦關於寫作和一些人生的事情。
村上春樹既文字一向比較平實﹝請唔好問我到底我係喜歡村上春樹本身還是賴明珠的翻譯，因為我都唔知﹞，在這本書，可以清楚睇到，佢都係一個平常的人，在練習長跑時會感到累，會受傷，跑了一大段馬粒松後會產生自曝自棄的感覺，在單車群中落斜會感到害怕，寫作時會有唔知寫咩好既問題...
關於寫作，呢本書主要講佢會成名前既情況，fans應該知道，村上春樹在成為作家前，是經營一間小餐館的，那種細小而有現場jazz演奏的餐館。最早期的《聽風的歌》和《1973年的彈珠玩具》，也是在收檔後，在深夜每晚寫一兩小時而成的。聽到這種事情，某程度上也是有一些鼓勵的感覺。﹝順帶一提，近年好紅既東野圭吾和伊坂幸太郎在成名前也是以這種業餘性質寫作的，伊坂幸太郎更加係一名系統工程師。﹞
看深一層，便會發現，村上春樹其實唔係一個平常既人。連續廿幾年，長時間既訓練長跑，每日跑廿公里以上。餐廳收檔後，還要清潔盤點，連續兩年每晚花兩小時去寫作。成名過後，繼續每日都進行寫作...這些不是短時間的才能，這是需要在擁有才能的情況下，再加上超長時間的耐力及痛苦才能成就的。
正如村上春樹所講，痛苦更加証明了人的存在。
跟進一下我既難得傑作。
鬱金香三號仔順利係新年前送去獎門人屋企，之後再長高了少許及完全開花，成為親友到獎門人屋企拜年時既一大景點。
一號和二號都已經枯左，已經俾我連根掘出。超神奇，球根由最初一粒分體成幾粒小球根。後來上網睇才知道，原來落花後再種多幾個月，子球根才會變大，下一年便可獨立種植。即係我太早掘出了，不過就算我唔掘，那些葉都已經幾乎枯哂。
一下一號和二號唔識開花，最大原因都應該係雪得唔夠耐，下次再種我一定雪夠兩個月。
另外一棵球根植物愛麗斯，係開出小小紫花後枯了，死因可能係水太多及天氣熱。
近期又重新種蕃茄，用了獎門人家中那棵蕃茄的果實去種，落種三粒有兩粒發到芽，已經轉左去大盆，今次我必定俾夠肥、太陽和水。
另外亦落了四粒大理花種子，未發芽。
近排都在輪流聽陳綺貞、王若琳和方大同的唱片，各有所好。
太陽 - 最種意〈另一種平靜〉，有post-rock的感覺，聽落有點似radiohead既〈airbag〉。〈倔強愛情的勝利〉和〈煙火〉都唔錯。
Joanna & 王若琳 - 我覺得佢似Cat Power多過Norah Jones，可能因為歌曲既拍子比較重，加上把聲都比較沙。最種意第一隻碟的〈Aubrey〉，有一種散場落幕既感覺。
橙月 - 聽左幾次呢隻碟之後，成個人都swing左。〈Singalongsong〉和〈1234567〉都好正，最正係〈如果愛〉。
