租婚紗

上星期獎門人終於扚起心肝去睇婚紗，其實佢之前已經做左好耐功課，係網上及婚紗展睇左唔少資料，亦都問過訂造婚紗及晚裝的詳情，但係始終都做唔到決定，今次扚起心肝要去婚紗鋪實地考察及試衫，目標是在三月中之前決定，最後超額完成，二月最後一日搞掂。

星期日那天獎門人根據網上的評語及官網的照片，相約了當中精選的三間婚紗鋪，第一間係Charming Image，網上評語甚佳，可以免費無限任試，價錢亦都十分實惠。獎門人大約試了五件婚紗和差不多十件晚裝，款式也不錯，亦都合獎門人的心水，店員態度友善，雖然鋪頭細細，但人多既時候都唔算太混亂，店員亦都無出現火爆的情況。同店亦有出租媽咪衫，亦有一間同系店舖出售姐妹衫。

第二間係華麗邂逅，這裡的私人空間較多，但係款式就收埋哂，要店員介紹，不幸地，店員的態度甚為高傲，介紹的款式亦都不太合意，獎門人一件都唔試就好型咁叫我走人。

最後一間係In Wedding，我們在預約的時間之前先行探路，勁好生意，超爆多人，眼見有幾個客係度等緊人招呼，而且款式和價錢亦和第一間的差不多，所以我們便取消了預約。

經過一餐下午茶的相議，之後再回去Charming Image睇埋男裝和講了一大輪價，便成交了，又搞掂多一樣，遲下會搵一日再去揀衫。