除夕

早收工，四點未到就放工，返屋企hea左一輪，晚上去了阿風屋企玩及係佢屋企樓下打邊爐，正。

十二月三十日

兩家人一齊去了賞花，之後八個人分四堆咁玩，我和獎門人挑戰整麵包，好成功完成排包，個個都話好味。另外亦造了朱古力鬆餅，都係咁正。晚上食日本野。家姐今日勁受小朋友歡迎。

十二月廿九日

昨日打唔成邊爐，今晚打。

十二月廿八日

今晚和獎門人的朋友係旺角食咖哩大王，勁spice呀。

復工第一天

呢排勁聽有耳非文隻新碟《東京鐵塔下》，好relax，聽得好舒服。其實佢好多年前一出現我已經識佢，不過而家真係勁上癮佢隻碟，幾乎日日都聽。

點解呢d碟無獎？

扑聲day

今日係我年終六日假既最後一日。我終於係呢個假期，完成我對《Mastering the SAP Business Information Warehouse》呢本書既目標，就係睇完第一節，總算係今年年尾，知道咩係Data Warehouse、ETL、Data Mart，不過要注意，係得個知字而已。

和獎門人去了睇《破事兒》，都係好似主題咁講，一些鎖碎事，諗落都有一些意義既。不過觀眾真係最好睇戲前都係對部戲有番少少認識好，特別係一個中女帶阿媽或一個老師帶一班初中生睇戲。

聖誕節

傳說係二千零七年前既今日，有條友叫阿穌出世，之後影響後世深遠，是唯真正既神檯級人馬。但係，在這二千年既歷史入面，都無咩記載佢做過d咩孝順父母既事。

今日，我和獎門人比阿穌更偉大，因為我們以我們既假期，去睇檔，去換取我地既阿媽係屋企盡情唱歌既樂趣。

來吧，讚美我們吧！

昨天下午出外會合獎門人和她的朋友(Miss S&F & Mr. M)，原本諗住去ELEMENT溜冰，點知勁貴，放棄。放左去尖沙咀搵戲院睇《破事兒》，點知一係無上，一係時間唔夾。搭船去灣仔，再行去銅鑼灣。

天陰陰的一天。

五條友係咁行，係咁食，好似去左旅行咁。原本M想買Jenny曲奇，點知無開，無得食，諗起就想食。之後去左"again" b，層層疊無貨。睇傢私，主要係混吉。晚餐去左小男孩，食物水準真係唔錯，食完坐左好耐傾計，坐到間餐廳暗燈。話時話，呢間餐廳都幾有靈異氣氛，如果係七月係呢度講鬼故都咪話唔驚。

今日獎門人早放，一起回家做勞作。我地既藝術品差唔多完成左一半la。

昨天Miss S話我多界，唔夠我鬥。呢番說話當然令我飄飄然，但亦令我反思了一下自己。

黃子華係最近期呢次棟篤笑講，佢從來都未放棄過去追每一個潮流，縱使唔明，但係都要追。我搭車和等車既時候(我有時會覺得自己既人生，做得最多既就係等車)，反覆咁諗呢番說話，差點被感動到喊。

從懂性以來，我咪又係好努力咁去追每一個潮流，每一個潮流都改變了我一點，我既個性便是從這種極濫既搶知識方法所建立的。就好似一本書，由一點一劃在白紙上寫成的。

回想過去，Brit Pop年代，我唔係自誇，我到而家，都可以係三句歌詞內，認得出Radiohead、Suede、Verve、Pulp、Blur、Travis等樂隊既歌。裏原宿年代，唔好講笑，雖然當時我從末去過日本，甚至一件裏原宿系既產品都無，但係我絕對認得大部份當時Bape、Undercover、NEIGHBOURHOOD既衫，亦可以好似背書咁講起藤原浩和Nigo和高橋盾等人既關係。波鞋年代，比較令我自豪既係，雖然我唔買nike鞋，但係我識得分Dunk Low Pro和AF1。例子多不勝數，講廿年都講唔完。

人生既小節，就好似係喜瑪拉雅山山頂打個哈次，會造成太平洋一個龍卷風一樣，事態發展永遠都係咁出人意表。

追一些潮流，事後竟然令我愛上了讀村上春樹、卡夫卡、劉以鬯既書，睇張五常、林行止既經濟分析，唔好問我點解，我都唔知。可能只係因為我特別鍾意睇書，講到睇書，詹宏志、梁文道甚至劉德華都係我偶像，我信人唔睇書，真係會死呢番說話，所以曾揚言以後唔睇書既張五常都係我偶像。

如果硬要我認屬於邊一個界別，我會自認為電影界，雖然我重係一個小學生。

如果可以，我希望我既人生到目前為止都只係前言。

星期日

其實我正在放緊一個連續六日既假期，今日係第三日，如果早幾日行街踢到金既話，可能我而家已經同獎門人係築地既大和壽司門口排緊隊或者去台北睇下改左名既中正紀念堂，視乎踢到幾大舊la。可惜，踢到鞋穿腳破，都係踢唔到。

結果，我係呢個星期日既早上，八點幾就起身，上網睇報紙。係《明報》既〈聽齣好戲〉專欄，睇到介紹一部好多年前，好令人懷念既戲，就係梁朝偉做劉民醫生、劉青雲做臥底、許志安做見習醫生和梁詠琪做學生妹既《流氓醫生》。

《流氓醫生》係1995聖誕上畫，戲入面將中上環拍得勁有人情味，亦好似《明報》既專欄所講，呢部戲入面既音樂真係幾正。《流氓醫生》呢部戲講上流事業同時亦好有人情味，唔賣弄色情，唔賣弄暴力，其實香港都重有好電影。

本片導演李志毅同年亦拍了另一有心之作《救世神棍》，主角係陳小春和梁朝偉。

生日快樂。

今年生日，我地都好忙，但都希望妳鍾意為妳準備既那些驚喜la。

係將來既日子，我地都可能會愈來愈忙，為了事業和家人，我們既生活要變得重質不重量，花多點生思在生活上，享受及珍惜一起既時間。

星期五

因為聽晚要做節，所以今晚預早慶祝獎門人生日。

哈，先送了妳一盒我精選既Leonidas朱古力，自己都覺得好名貴呀。

難得妳今晚咁早放工，可以早少少去食晚餐，和妳去了伊藤 (Ito Shan)食。

叫了一個二人前既Shabu Shabu餐，有刺身、天婦羅和火鍋的牛肉、雜菜和烏冬。刺身都有差唔多十件，好新鮮，好好味。原本個餐唔係天婦羅，但因為我地唔想要燒物，所以師傅幫我地轉了做天婦羅，有兩隻蝦及一些雜菜，唔錯。牛肉真係好鬼正，肉味夠，無渣。

呢間餐廳面積比較細，位置亦唔方便，我相信住太古城和側魚涌都未必知有間咁既野。可能因為咁，所以客人以外語人士較多，即日語人及國語人，感覺良好。

希望妳鍾意我份禮物la。

星期四

今日在公司的咖啡店拿了一些用完的咖啡渣，聽講可以當肥料用，佢含有大量既氮，對好多植物都有幫助。

其實除左我公司既咖啡店，星字頭個間其實都有得拎，不過要預早打電話去，咁店員就會包好等你。

今晚我立即幫屋企既幾盆花花草草都放了一些咖啡渣，嘩，勁香。

星期三

昨天下午去了中環開會，竟然要考眼力，真係低級趣味。

獎門人開始了新的工作，希望妳做得開心LA。

一起努力吧。

星期二

星期六係銅鑼灣一個人行書店既時候，我決定左，唔再睇Peter Drucker既《The Effective Executive》了。

我呢個決定絕對唔代表呢本書唔好，佢入面講既野非常有用，我睇左半本，睇左佢講點樣分配時間和點樣貢獻自己去令更有效咁做正確既事，獲益良多。有機會和有需要既時侯，我一定會再睇或介紹俾人。

唔睇既原因，係我覺得與其睇點樣有效咁做野，不如身體力行去做野。

都休息了一段好長既日子了，好像很久都沒有做吸收，忘記了自己既致勝秘訣。

Stay hunger，但係都要學而時習之，咁先至不亦樂乎。

星期一

今天是獎門人的舊歷生日，我地兩個都放假，我一人獨力做蛋糕，目標係朱古力雜果蛋糕。

先焗一個朱古力海綿蛋糕，再將一些藍莓整碎及士多啤梨切片。點知個蛋糕竟然焗唔起，硬到成塊餅乾咁，勁大濟，唯有立即再搵其他食譜再整過，幸好今次個效果較好，起碼見得人。將蛋糕一分為二，中間加入混了朱古力既cream，再在中間放了很多藍莓溶和士多啤梨片，將另一塊蛋糕放上面，途上大量cream，將士多啤梨分半放好，用朱古力漿做了一些裝飾，再在中間用藍莓砌了一個A字，大功告成。

希望妳鍾意LA~~

星期日

中午去左行公園，勁relax。

今晚同屋企人去三聖食海鮮，個砵酒焗蠔真係勁好味，個邊夠硊，個身又多汁，正。不過今次個湯就無上次咁正la，相信因為d料無咁多la。椒鹽瀨尿蝦好惹味，正。

星期六

今晚去睇黃子華，想睇左好多年，終於有得現場睇。佢講追潮流既盲目和內心既二五仔都好正，我們就係需要有人肯講出我地係幾咁病，反思下自己既行為。

星期五

昨晚被妳教訓了，其實妳真係講得無錯，我無需要咁樣。

星期四

當你以為自己可以改變世界時，其實世界正在原諒你的無知。

星期三

世界好大，自己很小。

星期二

總覺得，自己正在溶解。

星期一

今日都重係好飽。

史丹利五為《千言萬語》寫左一篇好深入既分析，超利害，我既影評完全唔入流。

《千言萬語》絕對係香港近十幾年其中一部最重要既電影。

星期日

獎門人一家入元朗打邊爐，買左勁多野食，全海鮮宴，超正。今日有兩個生日蛋糕食，哈哈。

晚上係元朗散步，馬田個邊多左幾間靚餐廳，搵日真係要試下。

星期六

生日。

一早去打籃球，同幾個中學生打二打二，打兩場win兩場。

和獎門人去Mega box，買野做手工。

去睇michael lau玩具展，無得買DJ TOMMY，只有PRODIG，但係因為要抽，唔好彩抽中樣衰個款都幾慘，所以無買。玩左三次$100抽獎，中左一隻FAT WEST 6"公仔、一本Nike x Gardener書和一本SFCC書，收穫豐富。

晚餐係cwb間小男孩食荷蘭菜，籃貝真係勁好味。

估唔到妳有神秘野，多謝哂，錫哂妳。

星期五

平安無事。

阿雞生日快樂。

星期四

返工。

抽唔中中鐵。

星期三

再放假。

去了歷史博物館睇香港上海銀行發展史，之後再去科學館玩。

睇《安娜與安娜》，有點累，係咁訓，全靠獎門人事後講返俾我知劇情。

晚上跳舞，倒數第二堂。

星期二

週年日，放假。

昨天睇《東touch》既小克專欄，再一次證實左我一向認為小克比阿德其實更火爆係正確既。佢今個星期無畫畫，兩版係哂字，講現代人咩都要保護，電話要保護套，遊戲機要保護套，連做人都係，結果咩都唔敢試，咩都捱唔住，睇得我勁有感慨。佢亦都引用左一篇網上流傳既文，實在值得一睇。

今晚去了Bacu食飯，呢間野真係幾好味，不過今次好似咸左少少同埋攪到我地條成條食道都變左黑色。

見到陸東去為葉太站票，真係令人大趺眼鏡。我從《金錢之王》一書認識陸東，佢既形象一向都係勤奮有堅持有智慧，令香港人自豪既香港人，但估唔到係兩太之爭，你竟然選擇站在這一邊，真係令好多人痛心疾首。

今次選舉好睇，下次選舉重好睇，試諗下民主派係港島區有幾多有實力既人，點夠分？

星期日，立法會港島區補選，野人之戰。

不入流政客大戰敵人既敵人。

不入流政客之不入流，在於她的面具實在太假，呃唔到人，那些表情和語氣都將她出賣了。

敵人既敵人，係咪就係朋友？呢個係所有聲稱支持民主既人都應該考慮。王岸然話她為民主派的最大作用就是妥協，我覺得和事實不遠。

有心者，請看一看馬家輝講03年7-1遊行，再諗下應唔之應該支持敵人既敵人。

星期六，十二月一日。

今朝如常打籃球，外投既感覺真係返緊來了，太好了。

井上雄彥今個星期出左兩本書，我都睇左，分別係《浪客行》和《REAL》，《浪客行》一向都多道理講，估唔到今期《REAL》都有。

野宮教清春射外投，清春經過三日苦練後，稍有所成，野宮卻叫清春忘記所學，清春不明所以，野宮說"手持小刀，並不代表要出鞘"。

原來清春最利害的是野宮快速過人，如果比賽只記著外投，便會影響了本身最強的打法，外投只是一個秘密武器，亦即是要有兩手準備。

手持小刀，並不代表要出鞘。這代表要經常作好準備去把握可能會隨時出現的機會。

星期五

唔經唔覺，又到月尾。

星期四

稱得上係流行漫畫界入面，最令人摸不著頭腦既《二十世紀少年》，在兩次令人極度火爆既結局後，當大家以為又係一部虎頭蛇尾，故事偉大得失控既漫畫時，竟然，殺出了上下兩本既《二十一世紀少年》，為大家解開了呢咁多年來既所有迷團。

我未睇個本書，但據稱真係解左唔少之前既迷，仲話睇到之前個d失哂控既故事，係有計劃過既。

一日未睇，我都唔係好信。

星期三。

八步牛仔好難跳呀！

《舞‧舞‧舞》的男主角說，他的人生就像舞蹈內舞步，全部都是"被"預先編排的，他只能順著跳。但他要在固有的安排內，跳得令人驚嘆不己的好，這便是他的人生目標。

星期二。

呢排勁多戲想睇，《神探》必睇，《安娜與安娜》又係必睇，今日睇海報見到有新新戲《聽說你愛我》由岩井俊二做監製，都幾令人期待。

星期一。

今晚係尖沙咀間水星咖啡店慶祝阿風生日，呢間野既食物都真係幾高水準wor，不過最衰有人食煙，勁臭。我地星期六整個個蛋糕大受好評wor，勁。

之後行星光大道睇燈飾，尖東已經有好多la，但係港島都只係得好少。

星期日。

今次輪到家訪獎門人屋企，哈，打搞哂。睇哂今次雲南之旅既片，勁開心，好似去多次咁。

當然晚餐勁多野勁好味la。

星期六

今日係獎門人屋企整蛋糕俾阿風，話就話我係主力，但係都要獎門人指導。

晚上食素，個糖水轉左款呀，不過好彩新呢款都好飲。

呢兩日我都好唔貼市，繼昨天忘記惠理上市，錯失以低於上市價買入後，今日再在中午食飯時先發現SOHO趺到7.8。

諗左好耐，到底買SOHO好定係等招商和中移動，SOHO始終係新股，營運資料唔多，真係講個信字。如果只係睇今年頭三個月既資料，唔算特別好，但主席話全年必定達標。另外睇到一些報道話，SOHO既寫字樓真係好賣得，但係商場店舖比較差，有幾個商場仲同小業主有唔少風波。

市場擔心宏調，但其實宏調對象主要係住宅，SOHO全力做商廈，其實完全無影響，唔駛驚。公司有咁多年歷史，見過下風浪，兩位主要高層仲係年輕，北京搞商廈既對手唔多，絕對值得投資，關鍵係幾時值得去買。

中移動與目標仲有一段距離，招商似乎都好難破三十蚊，咁係咁易買多兩手SOHO都無大所謂既。定左7.8入兩手，點知下午一開始就升番上8蚊，尾市趺番少少都係去唔到7.8。諗咁耐，結果都係得個諗字。

心入面其實仲係想入惠理。基金公司情況就同保險公司一樣，你愈講得個樣係搵笨，而佢又係社會上必需既，咁做佢既股東，絕對係著數既。

星期四。

真係充滿驚喜，你有爭取過，唔係靠好彩，係應得既，比心機吧。

抽唔中惠理，開市倒趺，呢幾日真係咩都趺，招商勁吸引，惠理和SOHO好吸引，中移動仲要等。

星期三。

人生總是充滿起趺。

星期二。

放完三日假，今日番工完全係累爆，完全唔想做野。

上手語堂前食樂景，佢既漢堡真係正到爆。

今日放假，做左勁多野。今朝又去打波，真係一發不可收拾。回家後寫了四篇影評，分別係《色，戒》、《兄弟》、《夏天的尾巴》和《野良犬》。真係過份，國慶節睇既《色，戒》隔左成個幾月先寫。

終於去左剪頭髮，無咩新意。

睇雜誌先知，原來浦澤直樹既《二十世紀少年》並唔係爛尾，而係有《二十一世紀少年》，真係估你唔到。

朝早和leelok去工聯會報名，之後食早餐。

無投票了，民主派唔爭氣，又唔想投親中。

和獎門人睇《野良犬》，幾特別，結局有點可惜。

係獎門人睇《四百擊》，連睇兩戲，真係勁。今晚我地又煮野食，好味。

今朝去左打籃球，勁開心，好耐無打了。都係射左波同埋走下籃，跑多兩步都有d上氣唔接下氣，不過射波真係超開心，要記住，投球後隻手要繼續舉起，咁樣穿針個下聲先會好聽，型。

遲下搵人單挑先。

下午接獎門人放工，好耐無長週了，去食蘭芳園，之後係圖書館睇左好多本《Mook》，借左幾本漫畫返屋企睇。行銅鑼灣，超勁多人。今晚去太古城食日本放題，係比較貴，但都值得既，超多野食。

今朝為左慶祝三位同事升職，去布袋澳食海鮮。咁大個仔都未去過，原來我地八條友大部份都係未去過既。食左好多野，但感覺好像三聖比較好味和平。因為入到布袋澳已經黑哂，咩風景都睇唔到，只係知自己一個俾山包圍既海邊，勁大風。有兩個同事今日都有車，包接送，食完送到我返屋企樓下，勁開心。不過諗起要我楂都幾煩，條路又多人又多車，隧道又貴，原來而家大欖要成廿八蚊架，坐巴士真係勁抵呀。

不過如果一家大細，點都係自己車方便好多既。

聽晚father生日，但係我一早約左人，所以唯有今晚同獎門人番屋企為father慶祝。我地送左一部超級大部既計數機俾father，咁佢以後計數就易睇好多。今晚個湯幾好飲，獎門人飲完可以再飲。

星期三。

今晚上堂前食飯得三條友，食飽後仲有勁多時間，深水步又無哂野睇，結果係西九龍中心行左一大輪，勁廢。

學探戈，fing到條頸都痛都重係未掌握到個神韻。

今晚匯豐融資發表第三季業績，需要撇帳34億美元，當中７億元與地產抵銷信貸有關，其餘大部分與無抵押貸款及信用卡業務有關，此撇帳令到匯豐融資季度虧損15.8億美元。但匯控同時表示，若以整個集團計，因為其他地區如亞洲既強勁收入幫助，頭三季收入會有所增長。

詳細內容我未睇，但我懷疑匯豐今次係見間間大行都撇帳幾十億，自己又有其他地方補助，所以有咁多撇咁多，等幾年後亞洲增長減慢時，可以利用回撥，令到條數好似年年盈利都有增長咁。

星期二。

今晚上完手語堂，和獎門人去了吉野家食牛肉火鍋。係唔錯wor，牛肉同平時牛肉飯既一樣，有牛味又夠薄。可能呢度比較少人，所以服務態度比大家樂好得多，好快就有人來點火，上次我食大家樂由起爐點火至加水都係自助。

在sogo買了兩盒熊貓公仔，很有趣。在meter children counter見到meter，當然無打招呼，佢都唔識我地。睇佢個外表咁cool，都唔似上網寫野咁nice。

抽了一手惠理。事先聲明，我清楚知道以下不利因素

1. 在牛市結束時，惠理既表現費將會大減
2. 在現在的大牛市中，比較難去找尋價值型股份
3. 隨著基金的漲大，要達到過住的回報，難度極高
4. 是次發售的股份全屬原有股東舊股

對於一和二，我認為在牛市結束時甚至熊市時，正是價值型投資方法最有利的時候，因為到時將有大量錯價股份供選擇，短期盈利波幅是必然，但長線必定跑出。三是值得擔心的地方，同時集團近年亦開設了一些大路的產品，能否保持價值型投資，要多加注意。離場既原因可以有好多，但是次離場的是舊投資者，而不是管理層，謝清海和葉維義既持股不變，惠理支持者反而要多謝呢兩間售股既公司，如果唔係都無得持有惠理。

星期日。

昨天和獎門人去了睇《夏天的尾巴》，一部不錯的電影。台灣既鄉郊電影成日都拍得咁靚，香港幾時先有呀？

今天我們造了一個特濃朱古力蛋糕，個邊同個底焗燶左少少，哈，但係都幾好味。

借了一本有關BI既書，雖然和我工作上無直接關係，但都希望有一些基礎可以準備一下。

晚上食煲仔飯，又到這季節了。

還記得在讀小學既時候，和表弟坐著你的的士，穿梭於港九新界，坐綠色的士過海，呢種咁特別既經驗，係你俾我既。

從小至大，你對我既評價都係一樣，亦從來只有你咁形容我，我對你既評語亦深表認同，諗深一層，你睇到呢一點，其實你比我睇得更通透。

數星期前，你說除了歐洲以外，世界各地你大多都去過，亦希望在將來可以駕車遊歐洲。

一星期前，我和你同檯食飯，一張14人大檯，我坐在你的對面，我們沒有交談。在電車上，我和獎門人先行落車，我還聽到你對我屋企人說我們很有夫妻相。

這便是你的性格吧，總是大方地欣賞別人的優點，總是幫人，總是可以站在其他人的立場，總是不給別人麻煩。

安息。

咁快又到星期五，今晚既knowledge sharing，我地講左三個半topic，當中我講左個半，咁我之後就唔駛再講la。

Radiohead - Jigsaw Falling Into Place

十一月八日。

惠理今日開始招股，好快咁係網上睇左本招股書。自從當年第一次睇《金錢之王》，已經知道呢間公司好勁。自己又鍾愛價值投資，其實真係好應該抽。但最大既問題係，既然覺得佢地投資咁利害，而佢地又唔趁今次增持或回購，係咪即係代表佢自己都唔覺自己公司係現價係一個價值既投資？

不過點我都會抽架la，有時間就睇下招股書入面既主席函件，可以稍稍睇得出謝清海既性格。正所謂投資係性格既延續，佢值得我buy。

同期有兩隻大陸新股，最好個個都去抽，唔好抽惠理，等我可以中。

十一月七日。

昨晚宏利公佈業績，基本上完全係預計之內，美國收入減低，一來加元超強，二來美國經濟差，亞洲增長繼續強勁，但都因為超強既加元而令到收益減少，每股基本及攤薄盈利0.7元，按年升１３％。又加股息，0.24加元一股。

十一月六日

今晚報左名學手語進階，學落真係幾有趣。社交舞都應該會學進階，下個學期仲想學埋急救和西餐其中一樣。

十一月五日。

為自己在晚飯後和星期六日的早上那些無無謂謂既時間，訂下了一些活動，但願可以持之以恆。

十一月四日。

上獎門人屋企整電腦，可惜整唔到，無頭緒。獎門人整左美味曲奇俾我返工食。

晚上和親友食飯，好事變壞事之又一事例。

十一月三日。

今日上stella屋企開party，我和獎門人勁早殺到，係stella幫手下先整左個個朱古力慕絲。齊人後開party跳舞，L Ming一日學咁多隻舞，真係勁。

晚上大食會，有腸仔茄汁車輪粉溝貝殼粉，菜心牛肉，甜醱汁煮玉子豆腐，雖然得三味，但係份量都好大，五條友竟然全部食哂！

十一月二日。

星期五。

奸人堅大結局。

更新左Darth Sweet。

十一月一日。

今日放假，在家休息一天。

有網友係我個movie blog寫comment讚我，開心到爆，立即追寫番《出埃及記》既感想。

晚上找mcc拿特價戲飛，呀，mcc轉左工之後就無左呢個優惠la。

講起我個電影blog，不經不覺都寫左快三年，寫左八十篇，當中《生日快樂》失左縱，即係登左七十九篇，另外有兩部戲睇完未寫。星爺既《功夫》係我寫既第一份感想，2008年將會上佢部新戲，超期待。

十月三十一日。

原來由雲南番香港，都只不過係一個月，感覺上已經過左好耐，身心亦已經ready哂去下一次旅行。

下次去既地方，目前為止首選都係東歐，但係其他地方既誘惑都好大，向更高進發既西藏係其中一個。日本就最危險，一講起日本，就諗到勁多好野食，一蘭拉麵、吉祥寺既牛肉球、築地既海膽，仲有好多好多，最衰就係日本鬼咁方便，真係唔怪得有咁多人去到停唔到。

十月三十日。

今晚上完手語堂，原本想食Shake n bun，點知勁多人，無哂位。轉食強記越南餐廳，食左咖哩牛肉金邊粉、牛肉凍檬和法式牛油雞翼，好味。

十月廿九日。

昨晚的演唱會太興奮，今日重回味緊。

十月廿八日。

今日獎門人一家作客我家，又係大飽口福之時，傳說今晚有黃金蝦，芝士蝦，炒蟹，雲吞，炸雲吞，雞包和咸魚頭湯，但係無我同獎門人份！

因為今晚我地要去睇陳奕迅！

咁難得去到紅磡，體內既為食之既血自然發作，立即去搵期待以久既時新快餐店。幸運地，好快就搵到。時新最出名就係漢堡包，我地一人一個。雙層漢堡加煎蛋加芝士，我要沙律汁，獎門人要茄汁，你鍾意可以要咖哩汁。塊漢堡好味，但不及灣仔既樂景，但夠哂大份，第一次食漢堡包有煎蛋係入面，好特別，值得一食再食。

陳奕迅演唱會當然正LA，係勁正。雖然我同獎門人坐一前一後，但現場好HIGH，成日都全場企哂係度跳，咁我地一前一後就可以聽，一路抱抱，重好過坐隔離。

十月廿七日。

昨晚Uncle 5殺到，今早和他早餐。

中午和獎門人去了南丫島，專登去食書蟲，食番我地舊年第一次去食那個Brunch Egg Florentine，超好味，另加一個Juicy Beanburger，勁正，加多杯Sunshie shake，超滿足。

之後行左去那個風車，原來企係風車底望住佢轉都幾恐怖，好似會俾佢打中咁。

最後當然要食Shelly Cake Express，今次我地終於試左最出名既豆腐芝士蛋糕，真係好清好好味，另加仲有一個草莓芝士蛋糕，都係好正，仲外賣左一包雙重朱古力曲奇，正。

全日係咁食，唔好俾佢停。晚上去了灣仔太原街搵呀蛇王燊，食蛇羹、龜苓湯和蛇腩炒飯。另外亦買左兩隻玩具，包括一隻HG既Z高達，聽日同獎門人玩。

十月廿六日。

昨晚為忻忻慶祝生日，呀，看著小朋友長大，便是等如自己開始老去。

為Radiohead的網頁download了他們的最新唱片《In Rainbow》。勁開心，真係唔駛錢有得合法聽新歌。其實都無理由去期待Radiohead去製作多一首類似〈Creep〉或〈Paranoid Android〉出來，因為他們一向都有新野搞。今張碟在搖滾和電子之間，似乎較為偏向搖滾，要慢慢聽。

在我的認知上，聽Radiohead便是像在今晚這樣的晚上，稍冷，無雲，有暗湧般靜靜的環境。

十月廿五日。

mcc都真係講得無錯既，交行真係追落後。如果強行話招商現在既PE和PB係合理，咁交行縱使質素差，其實都係差少少既ja，咁交行都重有好多升幅既空間。

講到追落後，我真係想知幾時會輪到匯豐追，盈利升，股價唔升，你話有咩計。剛開始發力，便遇上調整。

不過我係向長線睇既，始終相信股價和盈利是會一齊增長既，亦都只有咁樣安慰住自己先。

十月廿四日

年尾有連續幾個好消息。

首先係Radiohead出新碟，傳聞話會有番《OK Computer》年代既搖滾風格，如果係就超正了。

另一個就係Portishead都就快會出碟，超級期待。佢地對上一隻正式既碟，已經係十年前了，真係等到勁都斷。

十月二十三日。

唔好諗了，人比人，比死人，股比股，死得更慘。

招商銀行正式出通告咁宣佈盈利增加1點2倍，升幅竟然不及交通銀行。交通銀行阿頭只不過係咁E係非正式場合講下AH股亙換和盈利增加6成，加上再次傳出外資行有望可以增加內場銀行的持股量，就咁升兩成。

匯豐星期一成為跌市中跌得較少既股份，略略比恆指跌少dd，但星期二回升竟然只係升得仲少，真係行前一步，倒後三步。買匯豐除左要有財力，其實更加需要忍耐力。

十月二十二日。

全部人都預先知道今日會跌，所以一定唔會跌得太多，因為有準備既就唔會成為災難。

招商頭三季盈利比舊年多120%，真係超級勁。

十月二十一日。

今朝一早和家人飲茶，之後便送親人上車。

之後去了獎門人家飲果汁。

晚上去為細B慶祝生日。

十月二十日。

今日和獎門人去了青衣視察環境，有妳一齊真係超幸福。

晚上又去Elements，是為了食Three Sixty，超多人。

十月十九日。

重陽，假期。

和獎門人行花墟，新開左間四層樓高既鋪頭，賣假花和擺設，好得意。食左貴族曲奇和芳叔蛋撻，超正。

係新世紀既戲院同信用卡積分換戲票睇《兄弟》，無失望，因為本身無期望，玩味性太少。

晚上在獎門人家食飯。

伯父一家到訪。

十月十八日。

今個星期我由對阿里巴巴有興趣變到無哂興趣，除左貴，佢既B2B業務有太多負面新聞，掏寶和支付寶都不在上市範圍內，吸引力真係好一般。

相反近日SOHO都係浮浮沈沈，如果期望佢08會比07收入多30%，$10以下都可以考慮。不過我而家都係唔會買住，因為等緊調整，現時都係繼續持有近期輪流破歷史高位既股票，同時儲多些現金。

十月十七日。

可能昨晚食得太多野，今日肚痛，下午請病假回家休息。

晚上照上跳舞堂，繼續跳慢三和另外教了一隻新舞。上堂前食大家食，勁搞笑，我地四個都係食茄蛋牛。

超正，係縱橫行用$100買左一隻一比七既阿拿堅天行者，型爆。

十月十六日。

今晚上手語堂前，我們去了樂景食芝士漢堡，超好味。上完堂，去左大家樂食火鍋，飽飽。

十月十五日。又到星期一。

近日都係度狂睇陳冠中既《香港三部曲》，三個故事兩短一中，言簡意賅，影響深遠。

第一個故事講1978年的〈太陽膏的夢〉，故事主角宋家驄話"當大家從反叛的一代變為me-generation，我發生認同危機"，多麼的感同身受，正如佢既朋友所言，"因為看不到社會任何的整體出路而轉向享樂主義"，就像在看自己的故事，宋家驄最後的下場是駕車撞樹死亡。

第二段，1999年的〈甚麼也沒有發生〉，典型香港醒目仔，這種生活曾經在小時候曾經係我既目標，但大概在十多歲時，便放棄了，搵錢雖然過癮，但生活上還有很多值得細味的東西，過份的無牽無掛並不是一件好事。這中篇故事內有太多野值得深思，關於感情、家人、性、工作、生活品味等。

最後一個短篇，2003年的〈金都茶餐廳〉，金都又名can do，一班茶客集資救一間茶餐廳，北上定係留港，有無得do，do定唔do？

十月十四日。

昨天獎門人的手鏈上多了一架小棉羊仔，很有型呀！

今日家庭日，獎門人家造訪我屋企。事緣上個月去旅行，我阿媽被獎門人阿媽既手勢所吸引，所以約定了回港後要一試對方的拿手好戲，即係今日。當然，除左食野，佢地仲唱歌，唱到天昏地暗，鬼哭神嚎。我地細既就玩出前一丁大富翁，我father第一次玩，竟然以倍數勝出。

晚上個餐就真係勁多野食，同勁好味，食到個個都超級飽。

十月十三日。

由昨晚開始，我們連續廿多個小時在一起。

今日係獎門人第一個短週，超值得紀念。我們去了圓方行街街，呢個場真係有好多地方俾人坐，勁舒適。係商場上面有個露天廣場，感覺亦都唔錯，哈，你話要幾有錢先可以住係西九？

商場入面既鋪頭都係高檔為主，勁大間既Three sixty，行得超開心。但係我地最後幫襯既係H&M，我買了一件毛衣。

之後搵唔到免費車離開，唯有行出尖沙咀。傳聞免費車係有入無出既。

晚上獎門人做豪客，請我食吉列。吉列真係超好味，而家有埋炸牛肉食，都係咁超好味。呢間野真係所有野都咁好食，不枉佢咁鬼貴。哈，我係餐廳入面用濕紙市袋，發出開香檳般既聲音，令到全場既人都呆左，哈哈。

十月十二日。

今晚睇楊千嬅演唱會，但係遲左放工，攪到要搭的士落尖沙咀會獎門人。

雖然演唱會入面既歌，九成我係唔知咩名，五成係從未聽過，但係都睇得好過癮，加上今次坐得勁前，第五行，睇得勁清楚，超開心。

十月十一日。

昨天寫錯左，手語係星期二學，星期三係學社交舞。

現在逄星期三，stella都係諗定食咩，次次都有推介，之前食過又平又好味既日本野，今次食係西九食越南野，正，咖哩汁好味，雞絲炒粉絲都幾好味。

昨晚學慢三，大家都唔肯定有無跳錯。

十月十日。

雙十節。

劉建威係《信報》話，佢覺得係《色，戒》入面，李安其實係用左那些學生作業口號式革命團體去暗示台灣的民主政治，如果係真，呢個比喻真係夠恨。

今晚手語堂學的新字都好難記。

十月九日。

SOHO昨天上市，收$9.54，比招股價高少少，今日收$9.57。今次SOHO我絕對係長線之選，只要見過佢地既樓，都會明白佢地既產品質素係幾咁高，少地唔係大問題，簡單咁舉例，一層國金，好過幾條屋村。重有，SOHO管理層可以早幾年就知道要專攻商業樓，以防住宅俾政府宏調，事實証明佢地真係好醒，唔係豬頭炳。

講到尾，其實我係希望佢趺，等我可以入多一些。

十月八日。

又是展開工作的一天，今個星期五我地team內部有個技術分享會，我打頭炮，講MQ、MQ cluster和JMS，我又用番我個陣教FLASH、Dreamwaver個招，即學即教。

十月七日。

昨晚去了沙田的Shakey's Pizza，用個多小時等了一百個號碼。食Crab Cannell和Salmonata，飲First Date和Iceberg，都幾好味。這裡有很多服務員，反應都很快。新城市有一個石頭宴展覽，幾有趣。

日記變做月記，今朝去完銀行，就由九月十七日寫到今日，寫左差唔多三粒鐘，真心推介，雲南之旅值得一睇。

十月五日。

抽中一手SOHO，對於現在既股市，我真係唔識睇，手持既招商已經完全高於我既估值好多，宏利亦開始偏高，匯豐終於過百五，算係開始接近佢既合理價，市面上其他有興趣既股票，已經完全失哂控。

係呢個時候，我唔會放手上既持股，因為四隻我都係打算持有數年的，我唯一可以做既就係繼續增加手頭上既現金，等待調整，雖然唔知要等幾耐。

十月四日。

今次旅行，我和獎門人兩家加埋哂左五百幾張相，今晚獎門人在家分相，真係辛苦哂妳了。

收到匯豐第二季股息。

十月三日。

返工頭兩日既晚上都要上堂，真係累到爆，日頭係公司真係全程同周公玩。

十月二日。

放左假一星期，今次重拾工作心情得好快，但係都重係好累。

無睇股市一星期，原來已經升左好多，宏利已經企定係$310以上，招商亦都已經過哂$30，匯豐都開始上力了。

唔記得講，我係雲南既時候，已經收到sms，得知自己抽唔中遠洋。

十月一日，返到香港後既第一日。

昨天返到香港後，會合家姐阿哥，一齊去荃灣食素食，好味。

返香港第一件事，就係睇戲，《色，戒》，李安既戲我一部都未睇過，今次呢部真係勁，竟然引到我同獎門人第一時間去睇。睇完好多感想，寫影評既時候再講。

晚上打邊爐。

雲南之旅第八日，完。

今日都係去一些購物點，但當中的咖啡館和花市都很值得行，勁多咖啡類產品和好平好靚既花，收穫不少。

要返香港了。

今次八日旅程，去左四個地方。昆明有好靚既花、大理有好舒服既環境、麗江有好有吸引人既古城、香格里拉充滿神秘感，全部都想再去。

獎門人比我勇，話今次我地無高山症，下次，便要去更西和更高既地方了，睇完小既布達拉官，下次就要睇真既，好，只要有你，有咩地方我唔敢去？

雲南之旅第七日。

今朝一早便坐早機返昆明了，早上和司機傅師傅影相留念，他和我地由大理走到這裡，車了我地六日了，更重要既係，佢開車個陣，半張開口像在笑的樣子，簡直就係mcc咁既樣，實在太可愛了。

返到昆明，像從古代返回現代一樣。

去左七彩雲南，買了很多野。去左金殿，好大雨，見到李自成把刀，好大把。去左大觀樓，有好靚既花。

呀，聽日要返香港了。

雲南之旅第六日。

今日早上出發便坐車去香格里拉，忘記左講，麗江的導遊叫小和。第一日昆明那位導遊阿雪曾經對香格里拉有以下呢番評語，佢話香格里拉，唔去就後悔一生，去左就一生後悔，聽完都咪話唔得人驚。

今次去香格里拉途中就無入雲了，不過中途經過長江第一灣，金沙灣，無咩野睇。之後遇上香格里拉導遊小李，便去虎跳峽。虎跳峽位於玉龍雪山和哈巴雪山，虎跳峽是一條很水流很急的河流，當中某些地方兩岸相距比較少，河中更有一些大石，活像一塊踏腳石。虎跳峽同時分開麗江和香格里拉，相傳當年住在人煙較少的香格里拉的老虎，便是在這兒跳去較多人居住的麗江搵食。

講完故事，講番景色，我們今次不用行很長的樓梯，但要行約半個鐘的平路進入虎跳峽的上虎跳，不過途中景色都十分靚，感覺上比行樓梯好得多。

之後再坐車，便到達香格里拉了。

先去納帕海，這裡在夏天會是大草原，冬天會變是大海川，我們唔冷唔熱到來，剛好見到整個草原被水浸著，感覺就像太平洋水位上升，地球快要變成大水球一樣。

之後去松贊林寺，這裡被叫作小布達拉官，雖然小，但係都幾壯觀。

晚上去壯族家庭家訪，勁熱情，玩得好開心。

今晚住在天界神川酒店。

雲南之旅第五日。

第一點是睇白沙壁畫，之後便去玉水寨，一個很靚既地方，一層層既流水好靚，如果有時間，真係可以影幾百張相。

午餐後便去睇表演《麗江印象》，唔講得笑，真係好壯觀及感動，睇到喊。

之後就係全程重點，上高達4500米既玉龍雪山冰川。我們穿上有陣臭味既大衣，拿著氧氣，乘坐吊車﹝今次終於係大包圍式﹞上這個冰川。在吊車行駛中途，我們不斷進出雲層，當進入雲層時，車外只有白色，咩都睇唔到，連前後架車都睇唔到，勁神秘。

坐左大約廿分鐘，便到達冰川公園。原來都唔係咁凍，根本唔需要那些大衣，雪只是見到，但摸唔到，有少少可惜。但係呢度既天氣變化真係好快，一陣就好好太陽，睇住舊雲飛過來就變到咩都睇唔到，勁有趣。

領隊吩咐唔好係度多過30分鐘，我地當然聽話，影哂相就走人落山，雖然無高山反應，但都吸番幾下氧氣開心下﹝其實一點兒感覺都無﹞。

之後便去了白水河，牛牛好得意呀！！然後在甘海子影下相。

今晚都係昨晚那間酒店，自助早餐幾好食。

雲南之旅第四日。

可能大理既環境實在太好，我既高山反應已經無哂。

今朝一早就開車去麗江，途中多次駛入雲層，感覺十分神奇。

到達麗江，立即覺得麗江比大理多了很多商業味道，到處都是那些大銀行和保險公司的廣告。

第一點是黑龍潭公園，傳說好天既時候可以在黑龍潭看到玉龍雪山的倒景，但今日多雪，咩都睇唔到，不過呢個公園都幾靚既，今個行程去左幾個公園，都覺得唔錯。

第二點是木府，木家是古代麗江的大家族，木府建築很壯觀，在高樓的地方更可睇哂全個麗江古城，靚。

之後便行麗江古城，我地又黃昏行到天黑，真係各有各靚，古城內有很多食店及自由行旅館都好像很好的樣子，勁想自由行再來這裡，要親身入住古城，由未天光睇到天黑。

晚上入住旺寶國際大酒店。

雲南之旅第三日。

昨晚和今晚入住的都係大理的風花雪月大酒店，酒店內的庭園幾靚，昨日下午我們都影左好多相。

今日先去蝴蝶泉公園，公園內的山山水水都幾靚，有個好大既溫室，入面有好多活生生既蝴蝶，好靚。

然後去嚴家大院，飲三道茶及欣賞白族表演。

之後去大理古城，全城都有流水，街道兩旁滿是商店，有些小食都幾吸引。

晚上自助餐。中秋節快樂，晚上天陰有雨，看不到月亮。

雲南之旅第二日。

今朝要坐飛機去大理，早到連酒店早餐都未有得食就要出發了，去到機場都重係有肚痛，但係之後就好轉了。

八點幾就去到大理，導遊阿劉出場。

第一點是遊洱海，大理是一個真正背山面海的地方，全個城市都背對蒼山面對洱海。

我個人很喜歡大理，天然環境一流，到處都是農地，風景及天氣都好舒服，真係好想可以係度渡下假。

之後去了三塔寺公園，《天龍八部》無講大話，大理真係一個好信神既地方，寺廟勁多勁大。

然後去坐吊車上蒼山，又係腳吊吊個種，坐吊車差唔多廿分鐘，勁哂，條頸紅哂。

蒼山有十九度山峰，十八條溪水，將山上的雪山流入洱海，真係一個靚爆既地方。

然後去天龍八部影視城，哈哈，一場來到大理，緊係要耍番兩招大理王子段譽既六脈神劍和淩波微步，哈。

之後返酒店休息，我們出了酒店多行街街，買了雪條和花生食，Yeah。

雲南之旅第一天。

今朝四點幾就出門口，坐N269去荃灣，會合獎門人一家再坐N30去機場，會合領隊阿Yen後食早餐。

真係大濟，我一去到機場就肚痛。

坐八點鐘既香港航空去昆明，十點到達，昆明導遊叫阿雪。

因為早到達，所以今日先去石林及加遊九鄉。

石林，唔講得笑，真係勁多又大又怪既石頭，勁壯觀。係呢度要考下你既想像力，睇下那些石頭俾到咩幻想你。

九鄉，有趣既地方，又會有咁大既山洞，好靚既一個地方，離開既時候坐腳吊吊勁驚險既吊車落山。

可能因為我肚痛身子唔係咁好，我竟然係全程最低既昆明有高山反應，全日都感覺呼吸困難及頭痛。

晚上入住海逸酒店，聽朝又係勁早起身。

九月二十二日，星期六。

抽一手SOHO，老實講，我覺得呢個係一個高危既投資，SOHO既地唔多，賣點真係只有管理層質素。我都係個句，抽一手開心下無謂，上市後短期內如果趺破招股價先會再考慮，不過趺破招股價既可能性好低。

聽朝勁早就出發了，雲南GOGOGO！

九月二十一日，星期五。

呢排返工唔係咁忙，所以放假前都無咩野需要交低，係咪即係暗示我可有可無？

九月二十日，星期四。

就快出發了，今次跟團，所以安排既野比較少，反而有點唔係咁自在。

九月十九日，星期三。

昨晚上第一堂手語，很有趣，導師演技十足。

今日肚痛，無番工。

今晚上第一堂社交舞，學Cha Cha。

九月十八日，星期二。

對今次既旅行有點緊張，驚高山症，驚冷，驚車程長及危險，驚相處有問題。

九月十七日，星期一。

抽一手遠洋地產，睇中中遠及中化的背景，睇中遠洋地產近幾年在北京的賣樓量，希望抽中吧。

中國地產前景係好，但我真係唔識睇，少少地抽下新股就無所謂。

九月十七日，星期日。

借左都有一段日子既《The Effective Executive》，始終都係睇得少少，唔知有無可能睇得完。

九月十五日，星期六。

準備旅行中。

今日team lunch，因為我個team只得三個身在香港既人，所以team lunch都係得三個人。多一點這類輕鬆既談話都係好既。

匯豐保險再對越南出手，亦傳聞會對南韓出手。

匯豐保險20億入股越南保險

遠洋地產今日開始招股，如無意外我都會抽。遠洋地產既資產主要係北京，亦會發展天津、瀋陽，位置幾好。另外，中遠集團既管理質素一向都幾可靠，總比那些民企可信得多。

國內地產絕對係睇超長線，呢隻同之後既SOHO一樣，都係抽到既話就長期持有。但係要注意國內市民會唔會因為高息而買少左樓，因為國內地產商現時差不多九成收入係靠賣樓，租金收入仲係佔好低，買樓情緒會好影響佢地既收入。

不過我對呢點既擔心唔太大，利息加得唔夠市民收入加得快，影響唔大。仲有唔好忘記國外既買家。始終需求係大，地產係一定有機會，再來便是要比較個別地產商之間既質素。香港都經歷過黃金日子，地產都係發到豬頭咁，但最後卻只有數間地產商的增長比整體經濟強。

今晚和獎門人及阿爺去睇《出埃及記》，哈，如果呢部係西片，我地會話係大師級，因為全片好多地方都係以藝術片既手法去拍，但因為係港產片，我地就會覺得佢係扮大師級。

死啦，我成日都打C eight，有d驚。

星期三。

我發現自己調整心態既能力好低，自從兩星期前的四天假，我直到今天才有番小小心機做野。但係一星期多後我又放假了。

星期二。

快去旅行了。雲南真係備受好評既地方，同左幾位大陸同事講去雲南，佢地都係有讚無彈。呀，好緊張呀，好想係清晨時份無咩人既時候行下麗江古城呀，希望間酒店位置近古城啦。好期待白水台呀，睇親相都見到有隻牛係梯田度食草，型鬼爆，仲有十多日咋。

匯豐呢輪好多動作，但對股價尚未有任何幫助，不過我最關心佢呢幾個動作對公司未來盈利有無實際幫助。

• 匯豐表示，同意收購南韓外換銀行的51%股權，作價約63億美元。
• 匯控德國附屬公司HSBC Trinkaus & Burkhardt AG有機會收購受次按問題困擾的德國工業銀行(IKB Deutsche Industriebank)。
• 匯豐保險集團（亞太）表示，出資逾４０００萬美元，與印度的Canara Bank及印度東方商業銀行(OBC)於印度成立合資壽險公司。
• 匯豐保險獲准於台灣成立分公司，並取得營業執照。

兩項收購都係趁人唔掂既時候出手，保持一向既手法，但收購能否達成及整合的效果如何，需要時間去驗証。

匯豐銳意發展保險業既決心好強，銀行賣保險真係好方便，係發達社會保險既重要性愈來愈高，保險既利潤又真係好高，呢條路幾值得繼續去。

今日去旅行社交尾數，check埋飛機時間，今次會坐香港航空，新嘗試，好興奮呀！

之後去黃金買左部DigiMate，加一個120G既硬碟，實夠用，點影都得呀。

今日去左小欖燒烤樂園慶祝stella生日，由三點燒到九點半，真係燒到自己都熟埋。上次來都無發現，原來出面有個沙灘，水唔太清但沙算幼，日落前有好多細路一家大細係度摸蜆，日落後見到星星幾粒，見到對面海機場既飛機起飛同降落，都幾有情調。

睇左新一期《讀書好》，有詹宏志既訪問，佢話我地睇書，其實隱藏左一份改變自己既意圖，幾有道理。

今晚係最後一晚跳舞堂，俾人發現左原來我係唔識跳既，哈。

肚痛。

今朝一早去博覽館睇Group CEO阿mike講野，好似朝聖一樣。丫，之前走左個位亞太區CEO又係阿mike，係咪叫阿mike既都特別勁？呢個係一個迷。

終於買到陳奕迅演唱會，真係買左成個月，買到就好了。

晚上係獎門人屋企食飯，梅子鴨正。

星期三。

mcc條友果然勁，買個隻就升個隻，以後香港唔只有股神四叔，股仙六叔，重有股王mcc叔，簡稱c叔，最出名就係佢後面那個股。

哈，講笑ja。不過你真係勁，回報高我好多呢，我得個位增長咋。

係香港討論區見到有人講市場先生個種將股息當係減少買入成本個種計法係一種財技，可以將回報率放大，諗諗下都幾有道理。原本我都係用開市場先生個種計法，而家都將股息分開番咁計，似乎真係比較真實。

另外亦有人介紹左一種將自己既投資當係基金咁計既計法。

休息左四日，今日復工，真係完全投入唔到，哈。

獎門人終於買左電話，好野，有新電話用，等左咁耐，勁好彩咁等到有最鍾意個隻色賣同埋又有減左價，真係一石二鳥，獎門人再一次證明耐性既重要性。

再一次看《博擊會》，真係型到爆。呢部電影係一部反社會既電影，Brad Pitt既對白就好似教條一樣。港產片都有反社會電影，就係《去年煙花特別多》，超有意義既一部戲。

晚上慶祝Uncle 7生日，一齊食飯。哈，我mother同我一樣咁有眼光，見到妳條鏈咁得意。

昨天搭左好多次車和船，讓我有足夠時間睇書，終於睇完村上春樹本《舞‧舞‧舞》。

我都睇左好多本村上春樹既書，呢本亦係關於"我"既，即係由《聽風之歌》開始那個"我"。對於呢本書，正如其他村上既書，我覺得沉重感和無力感都很強，真係無奈爆，人生既一步步，只能像跳舞一樣，安排了的舞步，一步步地踏上，要跳得令人驚訝地好。

但我真係估唔到，呢本書既結局竟然有咁大既突破，好像一生都注定被命運戲弄的"我"，竟然找到一個對自己這麼重要的人，為了她，在最後個幾頁紙故事，他終於肯為了自己既將來去行動，一定要捉緊她的那份心意，在最後爆發，令我很感動。

今日和獎門人去了食九記牛腩，真係如傳說般咁好味，牛腩"林"，入味，湯底正，麵有咬口，另外聞到咖哩好香，下次都要試下。

今日繼續放假，搭天星小輪來回左中環及尖沙咀兩次，唔知大家有無注意到，係中環海邊，有好多人睇刮泥。

刮泥，現場是天星碼頭舊址對出海面，船上的大型機械臂插入海底，撈起大量黑泥及黑水，再放入呢一隻船。我無知，唔知呢個動作對填海有咩幫助。其實由舊年年尾，已經有得睇刮泥，我當時係尚未封既皇后碼頭，已經睇左差唔多十幾分鐘。

相信好多人都行過新天星個條橋，好方便既一條橋。次次行過，都見到起碼10個以上既遊客及本地阿叔係度睇刮泥，通常都係睇到呆左，感覺幾特別。

到底，有咩咁好睇？

我相信，這是一種心靈上既發洩。看著機械臂插入海底，撈起黑泥，就像一把手術刀，把心入面既黑暗切去。

可惜，內心既黑暗，就像黑泥，撈起後總有大量流回大海，始終都殘留在我們的心內，揮之不去。

一千。

今明兩日請假。

一早接妳上班，真係好，勁想日日都係咁。

晚上去了食意廚，環境好靚，可惜有油煙味。食物一流，我地既選擇如下：

前菜：白酒蒜子乾椒大蜆

湯：辣蜆湯

主菜：牛肝菌松露汁牛肋骨、蟹肉唔知咩菜意大利雲吞、雜菜藍芝士意大利飯

甜品：蜜桃拿破崙

個白酒蒜子乾椒大蜆真係好好味，入味到爆，又保持到鮮甜。辣蜆湯真係幾辣，幾特別。牛肋骨係無骨上碟既，已經起左肉，好多肉汁，好味。意大利雲吞比較硬，但都幾好食。我地大大話話都食過好多次意大利飯，基本上我地已經決定左以後唔食，因為覺得飯粒太硬，唔好食，但因為受到藍芝士既吸引，所以再食多次意大利飯，但點都估唔到，呢度既意大利飯竟然令到我地改觀，真係好食，令人十分回味。拿破崙份量都幾大，唔錯。

真係幾正既餐廳，可惜洗手間環境比較差。

我近來真係無哂物慾，估唔到妳都買到一份我咁需要既禮物，真係超級抵鍚。希望妳都鍾意我份禮物 la。

九百九十九。

在圖書館借了昨天提過的《Effective Executive》，最鍾意這些小書，拎出街都唔覺重。

上星期播種的三小盆植物，經過接近一星期，已經發哂芽，長哂葉，俾左其中一盆獎門人。龍貓呢排好忙，日日都和兩個小朋友一齊跳舞。

亞洲電影節，今期《Milk》有好詳細既介紹，好多節目都好吸引，台灣幾部青春片都像幾有趣。

上半年的表現評估，有可以做得更好的地方。

今晚獎門人上西餐堂，我放工後在尖沙咀行了一會，行Page One、商務及Uniqlo，見到原裝《Effective Executive》，原來是一本小書，看了一會，好像幾有趣。《小狗懶擦鞋》？一本介紹粗口的書，好多從未見過既字。Uniqlo特價，$39買了一件衫。

獎門人做了一個白胡椒汁鴨加意粉及酥皮海鮮湯，好味，我用足足一程234X食哂，心滿意足。

好難得，七點幾都未放工，但係我上網寫日記。

無咩野好記，世途險惡。

中人壽業績之發見。假設下半年只有上半年盈利的八成，全年盈利為$1.476，今日收市價$35.15，2007預測市盈率為23.8，PEG極低，近乎超值。但中人壽和平安令人不安的地方相同，就是保險收入的倒退及盈利倚重投資收入，簡單咁講，即係固定收入既本業難做，唔固定既又水份既高，無人知A股幾時會爆。因為呢兩個因素，令到我對佢地有保留。

另外，未見到佢個EV係幾多，不過相信網上好快就有人計好。

完成《巴黎戀曲》觀後感。

今日買禮物。

下午去了獎門屋企，好似無停過口咁食野。

一早寫了《五星級大鼠》和《導火線》既感想。

在史丹利5的blog看他選了回歸十年十部特別有代表性的港產片，我都好認同佢既選擇，有時間就睇左佢既選擇似唔似你既心水。

下午去了看夏日國際電影節的《巴黎戀曲》，有少少摸不著頭腦。

晚上去了阿爺屋企，大個仔la，有自己間屋la，打邊爐，打wii，好開心。

昨晚幫盆小植物轉了一個較大的盆，在三個小盆播了那些種子，要快高長大呀，龍貓幾時來我屋企幫手令到那些種子發芽呀？

跳舞堂計埋今晚都重有三堂。今晚上堂前食了麥文記既蝦子撈麵和牛腩麵，好味。7-11有得換叮噹，一次買四支雪條，廿蚊可以有五隻叮噹，如果你有又唔要既，請俾我。

陳奕迅演唱會電話訂票，我打左一星期，今日終於接通，但竟然已經賣哂，重要係加場都賣哂，希望遲下重有公開發售。

係無彈藥準備出手既時候，其實我真係好想控制自己唔去睇股價，但偏偏就係忍唔住，5、945、3968、941、2628‧‧‧一日睇勁多次，如果有一日我連自己股票既號碼都唔記得就好了。

我唔知呢個只係我既情況還是大部份香港青年既問題，我地現在儲錢，唔計買樓結婚，最主要目的竟然是為了投資，而不是創業，傳說話工字不出頭，但現代人都安樂於有穩定的收入，心機都花在如何運用那份薪金。這是所有行業都有世界級大企業橫行既後果嗎？縱使有創業目的既人，都唔係話要開另一間長實/思捷出來，野心小了，想開店的都是要開一些有個性和型格的小店，生意能過活，不用受老闆氣，能夠做到自己想做既野，已經係一個很好的目標。

這似乎是一個有趣的課題。

因為姐夫有免費飛，所以今晚太子的豪華戲院睇《導火線》，甄子丹和葉偉信的第二次合作，估唔到可以咁cult，有驚喜。

手頭上的工作接近完成，攪左個幾月，算係幾大工程，有驚無險。

今晚和獎門人的家人食Pizza Hut，食到肚到脹，Pizza Hut始終都係有一定水準。

上星期五既Deep V，有一班人痛恨自己係低位放走優質股，有一班人痛恨自己現金不足，唔可以用難得既低價買優質股。幸好我都尚能係接近低位入左一手招商，拉低左自己既平均買入價。

我傾向相信個班低位放貨既人當中，大部份係需要現金去平其他倉，即係逼於無耐。如果單純地因為趺而放，咁就真係很可惜。一棵菜值十蚊，十五蚊既時候唔好買，十蚊既時候可以買，五蚊既時侯更加要買。

今次係一個教訓，要增加自己既現金流，緊守自己既信念、分析和估值，係牛市既時候應該保存一筆現金，以應付小調整。

今日整蛋撻，原本話全程由我完全負責，但因為我整既蛋撻太厚，獎門人睇唔眼，決定出手相助。哈，可能因為我手腳慢，所以都整左好耐先完成，幾好味。

睇番昨晚的《Hell Kitchen》大結局，我竟然錄少左十五分鐘，無左個結局，超失策。

獎門人教我彈《不能說的‧秘密》既四手聯彈，超難，希望我有生之年可以學會。

係旺角花墟買左一盆小植物和一包Basil種子，希望快高長大。有時真係想盡可能過一些簡單既生活，盡可能環保，唔好浪費食物，唔開咁多冷氣，但事實永遠事與願違，當口頭上講關心一件事，但現實卻在傷害它。

去旅行社收集了一些九月尾和家人去雲南的資料，一定要八日團先去香格里拉和上玉龍雪山，六日團就只去昆明、大理和麗江。另件重發生了一些技節事情，令到我地虛驚一場。

今晚是最後一課西餐堂，完全唔哂參與，睇哂老師做。整節厘比干牛肉、西蘭花忌廉湯、芝士薯仔、超薄多士和墨西哥包，全部都勁好味，食到超飽。

林一峰 - 一枝煙的時間

今日真係歷史性既一日，除左考驗財力外，EQ既考驗更加大。

$24.65入多一手招商。

驚你唔記得，我係$141.3入左一入HSBC，但係我到而家都覺得呢個價係超值既。當然，如果你今日買到就更超值。

星期四。

到中移動，EPS升25%，上客量繼續大量增加，又係一份強爆既成績表。

平保都係今日。純利大增139%，但當中保險部份好似有問題，增長主要靠投資收入，但係國內A股既強勢仲可以玩幾耐，無人知。所以佢都係一份強既成積表，但未係我既目標。

星期三。

康仔聽日番加拿大了，今次佢番香港兩個幾月，做左兩個月暑期工，又番大陸玩左十幾日，大個仔la。

星期二。

昨晚去了看《五星級大鼠》，喜出感外。

仲有，星期日晨早寫了《不能說的‧秘密》既影評。

星期一。

今日拜山，康仔在港的最後一個星期日。晚上在跑馬地食素，十九道菜，好正好味。

差d唔記得講，昨日八號風球，我絕對相信當中有政治及經濟因素。

今晚煮牛排，塊牛好鬼厚呀，唔知幾多成熟，入面好多血，食到好飽呀。

昨晚輪到招商，EPS升多過80%，息差增加，非利息收入增加，收入成本減少，不良貸款減少，最佳國內銀行既示範。

可以睇下Forever個blog入面d人既分析。

再一次俾業績吸引，$28.3收左一手招商。

宏利昨晚公佈的業績比預期好，ROE升至18.5%，EPS增加左18%至0.71加元。另外亦表示只持有極少和次按有關的投資，無打算為此作任何撥備。期內回購了大量股票，在派息要扣稅，市況極旺既時候，回購確是明智之選。

但值得注意的是美國的財富管理收入減少了，要睇下集團有咩方法去增加未來收入來源。

港機工程公佈中期業績，勁，香港和內地的出售服務時間都有良好增長。呢隻野真係由蔡東豪係《信報》介紹，再俾當時重係員工既Lee Hang推薦，睇住佢由唔夠一百，升到家下百四，重要似乎盈利可以繼續有增長寺支持咁既去勢，真係諗起都令人心思思。

不過，我對呢個行業真係完全無認識，就好似對太平洋恩利咁，太遠，需要好有想像力先可以了解佢地既行業。

宏利今晚公佈中期業績，相信佢地都不能倖免地會持有美國次按證券，今晚應該會公佈持有幾多，希望唔多，同埋希望集團有方法應對。

同事N將會轉職去當我們的user，世事無絕對，又host變成user。遲下部份同事又會搬，呢度日日都變緊。

週一，重新投入工作的一天。

今年已經有三個十分著名既導演去世，楊德昌、英瑪褒曼和安東尼奧尼，三個有一個共通點，就係我一部佢地既戲都無睇過。

楊德昌去世之後我曾經希望過有線會播佢既戲去紀念佢，點知無，有點可惜。唔知遲下另外兩位有無。

OPERA。

一早去買埋朱古力和牛油，就上獎門人屋企整Opera蛋糕。最正統既Opera蛋糕有好多限制，高度、層數和形狀都有限制，詳細請自己上網搵或親自去食下。

比預期快完成，出了一些步驟上的錯誤，但個蛋糕都重係幾好食，詳情遲下寫上Darth Sweet。

晚上去文化中心睇《暗戀桃花園》，精彩，演技竟然可以好到咁，故事亦都十分有意思，好睇。

今日中午去了食大婆牛肉麵，個湯唔係好似網上流傳咁大藥味，少少失望，不過牛肉真係幾好味。

係二德惠買左一些材料，準備聽日挑戰OPERA！！

行Sogo超市，見到好靚既菠蘿，忍唔住買左一盒。之後係另一個商場就地解決一盒菠蘿，勁，相信有足足一個。

今晚煮千層麵，幾好味。

Vincent生日快樂~~

唉，就是不夠成熟，總是無大無細，做野講野之前都無諗過後果，出哂事。

呢個幾月香港既天氣簡直好到唔似香港，太陽伯伯日日都唔休息，哂足一日，真係哂到係公司有冷氣都覺得熱。

調整原來未完，但係我已經忍唔住，出左手。

大炒家賣股平日圓倉

以141.5買入400股匯豐，以2006年既盈利計，2007年盈利只要增長13%，PEG便接近一，以亞洲既強勁增長、保險業務和CIBM既增長、北美撥備既減少，13%真係一個好鬼保守既預測，絕對有信心達到。

今日招行同移動都好吸引，但係已經無錢LA，加上我認為佢地只係吸引價，並未係超值價，不防同大家講，我預期招行和移動未來五年既平均增長分別係35%及20%，匯豐及宏利係15%，只要你識用PEG，咁就可以大約知道我心目中既合理價係咩。

唔好玩LA，咁快就調整完？中資股距離我個理想價重有好遠。

現價既宏利(二百八十幾)其實好吸引，不過我已經持有，想分D錢比其他股票。

匯豐公佈業績，營運數據既分析自己睇報紙。

扣減每股0.09美元來自交通銀行和興業銀行A股上市的特殊收益，2007上半年的每股盈利為0.95-0.09=0.86美元，比2006上半年多10.2%，比2006下半年多38.7%。賣出倫敦總部的收益將於下半年收帳。

有時間的話，請詳細咁睇下匯豐份報告，有幾樣野真係值得睇。第一，對於市場最擔心既美國次按，佢地真係有決心有計劃咁去解決，亦好有信心咁認為問題已經在控制之內。第二，佢地提到未有社會既三個必然發展，亦已有足夠部署去迎接這些機會。第三，佢地亦提到三個可見既世界性危機，亦表示已有準備去面對。

當市場悲觀既時候，佢地沉著應戰，同時亦不斷因應社會結構，而作出改變，亦勇於與股東分享將來可見的機遇及危機。心服口服吧，百幾年既經驗，真係唔講得笑。

今晨的health check在三點幾的時候被通知取消了。

寫左《每當變幻時》和《哈利波特》的感想，在Darth Sweet加入獎門人整柚子大菜糕。

下午和獎門人去了看三角關係劇團的《秘密願望》，第二次看這個劇團的作品，感覺良好，如果可以平d或者有學生價就重好。

晚上和獎門人家人食飯。

昨晚歐美再趺，如果下星期一匯豐交出一張預期下既成績表，相信丁蟹效應將會再一次應驗。

對於匯豐，我個人相信本港及亞洲區的盈利將會有驚喜，但以匯豐一向的經營方式，亦都會撥備得比一般人預期多，所以今次呢份成績唔好預期太多，但係要記住，Lose a battle and win a war，而家撥得多，最後笑既係邊個都重未知。關於匯豐的撥備策略，可睇麟記雜貨的林森池講座筆記。

今日同獎門人係尖沙咀四圍行等上煮野食堂，呀，我地兩個今個月爆哂quote呀，物價高漲呀。

今晚學整豬排，我唔食得，結果兩個人整左六塊拎哂去獎門人屋企。

今晚三點要起身做Health check，要早d訓。

星期五。

Old news is so exciting，都重係次按和利差交易，昨晚歐美股市皆大趺，香港今日都跟住趺，其實香港又年頭至今都未有調整過，間唔時趺下其實係好事。

我係yahoo個投資組合監視開大約廿隻股，今日出現全紅，輕則2%，重則4%，如果同樣幅度既下趺係下星期再出現兩日，我就會用哂所有我可以用既現金去入貨。

目標係招商、中人壽和中移動，如果個價真係太低，可能會忍唔住入匯豐和宏利。不過事先聲明，我既本絕對唔夠我買哂以上既股各一手，最多只可以選兩隻，買邊隻就視乎趺幅而定，較希望係前三者，因為三隻未來都會有好多增長，而我又一股就無。

星期四。

獎門人借了馬仔的《我的低能之道》給我看，果然低能，有趣。

事實證明，獎門人的睇書速度是比我高的。

星期三。

獎門人執了Darth Sweet的版面，有空請去看看。

星期二。

睇左部份《平民資本家》，相比起佢既第一本書，呢本既書既鋪排結構比較亂和散，但係尚算容易明白。

我相信好多人都咁會咁覺得，第一本係教人選股(Buy what)，第二本係教人計合理價(When to buy/sell)，所以難免會覺得第二本既內容比較空泛。

今天去了中環開大會，一個早上便這樣流去了。

原本預期今日A股會有調整，點知完全相反，所有想買既股都升，真係得個睇字。

一早去書展，去到灣仔同獎門人去左食粥，勁有家庭feel。

比預期少人，兩個都好多收穫，我買左三本書。

林森池 - 平民資本家 (忍唔住)

阮佩儀 - 盡是有情 (這是壹週刊的人物專訪，03年出版，現在半價)

Meter - 地道人 (一本好多年前初初出已經想買既日本書，隔左咁多年，用超特價買左)

獎門人都買左四本書，四本加埋先至接近我本林森池既價錢，真係一d都唔平民。

之後去左食墨魚頭麵和牛肉餅河，灣仔真係多好野食。

去奧海城，睇哈利。

睇睇下，我後面個細路係咁講野，佢似乎好期待哈仔同張秋打車輪，開頭我都覺得條細路好煩，過左陣，我差d眼淚都流左出來。

我見到呢個細路，咁鬼期待哈仔打車輪，呢種心情就好似我細個睇神鵰俠侶，期待睇小龍女俾人強姦一樣。

我傷心並唔係因為我覺得自己心邪，亦唔係因為覺得而家d細路眼界低，而係深深地感到自己已經比而家既小朋友足足1老左唔只一代，佢期待既係張秋，我期待既係小龍女。

晚上在大角咀的大同食，一份二人餐，另加一份燒茄子，好好味。william，還記得大同嗎？那間殘舊的日本店，還有那個找錯錢的阿婆。

今朝同獎門人食早餐。呢個係咪完滿既早餐呀？

下午去了尖沙咀某酒店食一個以芒果為主題既甜品自助餐，有十二款食物，補給得快，但係款式唔多，好快就試哂。

晚上上西餐堂，今日整日式甜燒三文魚、椰茶花薯仔忌廉湯和wasibi炒飯，正。

工作左一年，資金開始多左少少，即係現金流強勁左，可以有能力去作出擴張或收購。現時無計劃進修及創業，所以唔會擴張，唯一可以擴張既就係身上既脂肪。

美其名叫收購，實質係以經營既心態去投資看好的股票，當然，找到好股，還需要等好價。近日我為中移動、中人壽和平安訂下了買入價，基本上近期都無可能達到，所以只有慢慢等。

一向都有睇開hiking呢個blog，網主愛行山亦愛投資，佢今日有幾句野，好鬼有道理，雖然絕對係老生常談，但實行絕對十分困難，需要很大的忍耐力，我現在都對抗緊呢個考驗。現在節錄俾大家睇下。

"林森池強調PEG的G，我沒有他的智慧，在整個財務報表中，較為實在的是流金流入(mike: 相信係講現金流入)，最實在的卻是派息，與其以不肯定的數據計數，不如只看息率，好公司不怕數據唔update，因為只會增加safety margin。"

"若果有人給你一支槍，要你選擇向自已的太陽穴開槍，或者向自已身體的其他部位開槍，你會如何選擇？我會選擇不開槍。"

更新了Darth Sweet，加入星期日整杏仁曲奇的記錄，今次我隻玉手粉墨登場，即刻食慾大振。

我有三個blog，其中兩個一張相都無，另外一個勁多相。

《Wish you were here》係一首好舒服好感動既歌，好鍾意。

Pink Flyod - Wish you were here

今日宏利收市報$300，由今年一月十九日買入至今剛好半年，回報達15.65%，用半年時間達成我一年的目標，可喜可賀。

預期業績公佈後股價將回落，守唔守到三百視乎公佈業績前可以升到幾多。個人認為，三百係比合理價高，但未算過份，完全無需要賣出套利。

今日宏利過左$300一陣，之後回左少少，最後收市都係過唔到$300。不過唔緊要，其實佢而家既股價對我來講無咩所謂，期待係中期業績可以睇下佢美加既財富管理和亞洲市場發展成點。

今日強烈推薦左林森池比阿爺，希望佢會有心睇，盡早找到王道。

我好信一樣野，投資是個人性格的延續，長線短線，投機投資，止賺唔止蝕，止蝕唔止賺，打牌睇到人格，睇投資可以重得重清楚。

週日。今日唔駛番工，八點鐘便起床，聽著Pink Floyd的《Dark side of the moon》唱片，很優美的感覺。

昨天打書釘地看了部份林森池的新書《平民資本家》，主要睇國內金融股。對於國內銀行業，林認為銀行成為調控工具，對銀行的盈利可以有很大影響。個別銀行數據咁睇，招既P/B最高，但若以PEG計則最抵。未睇到有講銀行之間管理及質素既比較。

以銀行股和保險股比較，中國政府現在偏袒保險業。保險業可以做銀行，銀行唔可以做保險；保險公司既投資渠道愈來愈多，從而可以增加盈利的多樣性及穩定性，銀行既主要收入係息差，但利息水平控制在政府手上，加息更係必然的事。

麟記雜貨為昨天的《林森池「如何在股市泡沫中求存」講座 》做了一些筆記，林在講座中說，根據歷史，保險業的增長比銀行業強很多，所以在他的千里馬行列中仲未有中資銀行。

但係，同時佢亦都承認完全低估左中資銀行盈利既增長，應該係見到招和工近日的100/50通告而有感而發。佢亦都話招既貸款質素高，所以貴得有道理。亦明言，如果煤價再升，而電費再唔加的話，便要將華電換馬至中資銀行股。

最後，佢係書既最後，再介紹多一次以長線投資匯豐而致富既方法，匯豐只係例子，換上中移動和中人壽亦可。

(本報訊)城大ACM隊係無左臨神、陌中中和badbad一干人等後，重見光明，在今年的香港ACM本地賽中得到第一名。

雖然同自己已經無咩關係，但都感到高興，賓賓好野！

我那隻和大牛市好像無咩關係既宏利，今日都破了歷史新高，可能又開始炒業績，期待。

投資御宅族 Investment Otaku簡介了數隻參與中國市場的ETF。根據歷史，指數基金在經濟發展中的市場表現都是十分強勁的，中國絕對是未來廿年經濟發展最強的市場。

簡單咁講，我對標智滬深300中國指數基金好有興趣。

星期四。

招就快三十了。唔通真係要係自己諗一個理由去買？

re-org。

again。

因為同事B的BB比預期早和大家SAY HELLO，所以同事B既假期既提前了。對於受慣保護既人，今次真係一個考驗。

絕對需要承認，不論實習個年還是現在，我在公司也是受到充足的保護，當年有J，現在有B。簡單咁講，我只需要做，所有交際應酬都有佢地搞掂。咁既模式有好有壞，壞係我獨立唔到，好係我只係專心做，質量會比較有保證(哈，係掛!?)。

少左層layer，我覺得自己好似一日到黑都係度打電話和聽電話，少哂時間做自己野。看來我今次真係要好好咁學習將工作下放和應付別人。

竟然，竟然會有這種通告。100%以上！

招行今日上升了7.99%，收$26.35。

雖然講左好老套，但真係要認，我睇得太多價值投資既書，而價值投資者係呢種時勢起步，真係無啖好食。

今日和獎門人家去了行金山郊野公園。完成4.6/100。

行沙田，勁多人，買左飛月尾睇話劇。係圖書館避暑，遇見JJ，大談公事，哈，竟然話我地似渡假，好彩唔係似偷渡。

番荃灣，今晚睇《每當變幻時》，係荃灣廣場行左一陣，係史路比餐廳坐左個幾鐘，睇戲，幾好睇。

拖著手仔食雪糕，最開心就係咁。

三間一向給人管理優良感覺的公司近日都進行了一些收購。

Manulife Financial signs agreement to acquire Berkshire-TWC Financial Group Inc.。嘩，Berkshire，畢菲特？如果真係個間既話，宏利已經升到$400，哈，發夢都無咁早，Berkshire-TWC係加拿大一間財富管理公司(Canada's largest independent privately-owned financial planning and wealth management organization)，同畢菲特一點關係都沒有。宏利此次收購將可擴張加拿大本士的財富管理業務，實屬貫徹集團方針之舉，加拿大亦是集團最熟悉的地方，可算是一個十分保守的收購。絕對可見集團管理層言行一致，值得信賴。

匯豐增持越南商銀至15%。今個星期越南係報紙出現左好多次，連施永青都話有人搵佢去越南開鋪。其實越南呢個新興市場已經紅左一段日子，只係中國既勢頭實在太強橫，先令人無咁注意越南呢個地方。銀行業既增長大多數時間都比當地既平均增長多及穩定，匯豐能夠係咁多新興市場插旗，其世界級地位更經常取得一些法律上的優勢，這便是林森池所講的市場專利。

大家樂3000萬投資咖啡店。講緊既係illy，以後唔駛去星街都有得飲。大家樂既快餐業務係本港已經可算係發展到完全飽和既狀態，營運成本減低及營業額增加既空間都十分有限。正如宏利要攪財富管理，大家樂都極力咁攪特色餐飲業務，兩者既邊際利潤都比較高，發展空間亦較大。

有計劃，有方向，一步一步小心地實行，當你持有這些公司，你每晚都訓得安心。

台灣大師級導演楊德昌去了。

作為一個聲稱自己熱愛電影及台灣社會的人，我感到極端失落。你最有名的《牯嶺街少年殺人事件》、《獨立時代》、《麻將》 、《一一》，我都未睇，你便去了。

錯過了，雖然本質上你在生與否，對你的電影內容完全無關，但內心總是會有點分別。就像在看村上春樹和看卡夫卡的小說，距離感的不同， 頭上天空的不同。

羊男在《舞‧舞‧舞》對"我"說：每次失去一些東西時，你也會把另一些東西都放下，不斷失去，不斷放下，不斷地分解自己...

R.I.P.

中午既時侯比較了幾間中資銀行(招、交、工、建)既數據，睇左賬面值增長、貸款增長、盈利增長、股息增長、資本回報、成本收入比和壞賬比率，因為全部都係新上市，幾間國有銀行係上市前條數都幾難搵。

除左成本收入比意外地比工商高2%外，所有比率都以招商最好。

幾好都無用，我都係未買到。

招行2006盈利為0.53，2007首季為0.17，縱使好進取咁預期未來5年平均有30%增長，三十幾倍市盈率真係幾令人心寒。

決定了以$23買一手招商，算係向現實低頭，$20以上已經非常唔理性，但係真係升到唔會停咁。

不過掛左兩日都係未買到。

前日整既其實係柚子茶大菜糕。

星期日睇番之前咁多集《Hell kitchen》，幾有趣。

今天做了柚子茶果凍，好味，大受歡迎。

有了一個新目標，希望在一年內達成，開始計的日子是進行的第一日。

今日係七月一日，回歸十週年。

在時間的巨輪下，我和你算甚麼？

今日勁藝術，與獎門人及stella去會展睇阿爺個畢業展，阿爺當然在場做導遊啦。入場前係灣仔樂景快餐店食芝士漢堡包，真係好味到爆。

去會展中途警察封路，要俾國家領導人車隊通過。

今次呢個其實係大一既畢業展，阿爺既功課有幸地有得展出，我地當然要去捧場。個展覽好有趣，阿爺之前係咁話半個鐘睇完，但最後我地都睇左接近一個鐘。

與其後悔當初未盡全力，為何不及早發力。

晚上煮野食堂，今晚煮既野我全部都食得，不過有羊肉，所以獎門人唔食。

上星期日係屋企同屋企人睇左《姨媽的後現代生活》，對當中平常人在現代千變萬化的無奈都幾有感想，有機會再講多一點。

昨晚和獎門人去了睇《跟蹤》，今日食完午飯時寫了影評，我諗我都係覺多d故仔，講少d技巧比較好，因為我都唔識那些技巧。

講番昨晚睇戲，真係大鄉里出城，竟然入錯院，《神奇四俠》出畫頭既時候先發現，老士到爆。睇戲之前我地去左L'Atelier de Joel Robuchon食甜品，豪華到爆，檸檬味撻好好味。

今日同獎門人商量左一些事，多謝妳咁信我。

利用林森池在《證券分析實踐》中教的現金折現法，粗略地計算了匯豐、宏利和招行的內在價值，全部以十年計，即2007至2016，折現為5%。

十分保守地估計招行EPS和股息十年內的平均年增長為20%，折現後十年內總共可收取2.7股息，而十年後的EPS為3.28，以PE15倍計再折現為30.2，以這保守估值計，現在的內在價值為32.9，現價在未計算人民幣升值下比現價出現37%折讓。

預測匯豐及宏利的平增長均為10%，折現後十年內總共可收取分別85.02和65.53股息，十年後的EPS為28.22和43.99，以PE10倍和12倍計再折現為173.27和324.11，內在價值為255.29和389.65，分別比現價出現77%和35%的折讓。

這計法有太多假設，40%以下的折讓未能令人安心，現價計只有三股中只有匯豐值得買。

投入工作其實是一件很有趣的事，如果對工作提不起興趣，工作實在會很辛苦。幸好，我熱愛做IT工。

聽日放假一天。

JJ，有無收到我的訊息？

今晚差點唔記得睇《Live from Abbey road》，今集有John Mayer、Richard Ashcroft和Norah Jones，正。

係時候同大家介紹，我第三個blog，Darth Sweet。

今朝去拜山，真係熱到嘔。但係行下山，睇下花草樹木，探下祖先，其實都係唔錯既家庭活動。

頂。

我已經老到要諗家庭活動了。

今日見到mcc，佢幫我地買了兩張平飛，真係唔該哂，不過你對我就遲到，對女就準時呢種行為，真係想打你一穫。

之後和獎門人去了旺角的deli食，我地特別鍾意係個度食，貪個度係旺角區稍為無咁多人既地方。

食完係咁行街，行到夠鐘上堂，今晚整焗蠔和墨西哥炒飯。

昨天寫了《綁架》的影評，真的是一部不錯的電影。

今日上網睇下近排有咩人睇我個網，偶然給我看到這個。原來我那篇《迷失天使城》的影評，竟然有人話好睇，仲可以同名作家也斯相提並論，真係唔講得笑。其實之前已經有人寫個comment話好，真係好感動，原來我個blog真係有人睇，個三萬幾下唔係自己按出來。

昨晚和獎門人的朋友食元6。就像獎門人一樣，她的朋友都是品性善良的人。同樣係中同，我的中同卻像魔鬼一樣，哈，數天前阿爺還力勸我炒美亞和相信他那套賭波大細法。

收了宏利$119股息，雖然微不足道，但收取股息確是最實際的投資收入。

今個月開始又有番少少錢，想入市，但係那幾間目標公司都在火位，都係諗清楚先好行動。

名言：在別人恐懼的時候你要變得貪心，在別人貪心的時候你要變得恐懼。

昨天，今天，明天，都好似無咩分別，最掛念還是四個人在歐洲的日子。威尼斯橋底的pizza，羅馬有氣既水，巴黎既燒雞，巴塞隆納街角的音樂，雖然過了兩年，還是記憶猶新。

J和K，我們打算下年再出發，雖然言之尚早，但有興趣再續前緣嗎？

起身都重係頭痛和喉嚨痛，但體力總算回復過來，半死咁既狀態和康仔出荃灣，會合獎門人一齊睇戲，故仔有應該有參考《天國與地獄》，但唔係抄，因為故事發展和表達既野都完全唔同，幾好睇。

之後精神開始好轉，食了星期日整的那個藍莓芝士蛋糕，好味。

去赤柱睇龍舟，塞車塞到爆，去到見到成個沙灘滿哂人，都幾震撼。睇左兩場，哂到著火，就去左市集。去赤柱就一定要去泗記食西多士，可能因為就快收檔，差唔多所有野都賣哂，獎門人最鍾意既魚柳飽都無得食，幸好重有西多士，但好奇怪，賣哂奶茶，但竟然有鴛鴦賣，簡直算得上係另一個城市怪談。

晚上返屋企食粽。今日係我合約既最後一日，但係聽日都要返工。

林一峰 - 一支煙的時間

放左工之後去游水，基本上都係浸下玩水，一點兒都唔劇烈。但游完之後食飯，我竟然累到半死，真係連一步都唔想行，全身無力，頭又痛，返到屋企更出現累到訓唔到既情況，真係十分痛苦。

呀，點解變得咁無用？

今日睇《明週》既時候發現，原來我一向有睇開細書最尾那個《人間慢步》專欄既作者，就係《老港正傳》既導演趙良駿，佢既戲我都睇過幾部，但係未睇過(甚至未聽過)佢認為最好既《真心愛生命》，真係唔明點解以前無睇到係佢，重成日係度諗咩人期期都放隻腳係度咁串。

和獎門人開工做了兩個蛋糕，分別係藍莓芝士蛋糕和日式芝士蛋糕，第一次整藍莓芝士蛋糕，效果十分良好，有專業既味道，正。

晚上和獎門人家人食飯慶祝父親節，之後去左買飛星期二睇戲《綁架》，勁正，11:35早場只需要$30，真係抵到爆。

中午和獎門人係旺角行街，真係熱到嘔。晚上去上堂，煮西餐，今堂煮薯仔沙律、蟹肉莧茶忌廉湯和米蘭吉列羊脾，我地獄廚神真係一出馬就威盡四方，炸羊脾既時候攪到個鑊著哂火，連累到美女廚神個塊羊脾都燒黑哂，真係唔好意思。不過，好彩一人有兩塊，之後個塊就炸得靚好多，總算見得人。

整完野食之後大家即刻開餐，感覺都幾搞笑。

分析員的告白列舉左一些本地中小型優質公司，當中某些我都睇過，都認為係只要價錢好，入左就可以安心慢慢等佢升既股票。

望穿好多個秋水，我終於借到林森池本書，立即開始睇。係頭兩節，林森池分析左好多香港著名公司既經濟模式，淺白易明，睇得好開心。中國既黃金三十年，真係唔可以錯過，要選中行業，選中千里馬。週期性股票需要較專業既分析及對該行業既認識要較深，並不適合我這類業餘投資者。

星期四。好一個星期四。

星期三。好一個星期三。

hello

hi

唔講唔覺，你都已經擁有左我好多年了。

係呀。你身上充滿我的汗水。

但係你成日都唔陪我。

哈。

點呀？

無呀，你而家日日都俾另一個人抱著，快樂嗎？他好像令到你很快樂呢。

對呀，簡直好像去了另一個世界。

是我負了你嗎？

唔好咁講，你現在也比平常多了抱著我呀。

你都識講，兩個世界呀。

我係你既，我都想和我進入那個世界的人，是你。

今晚上了獎門人家食飯，飯後我們在電腦玩些小遊戲，我終於識玩新接龍了，哈，簡直係天才。

只要同妳一齊，開心就係咁簡單。

勁大雨的星期日。

早上和獎門人的father一起早餐，之後便去銅鑼灣和家人會合。四位女士去歎世界，我地四位男士就在大雨下四處遊蕩，結果上了中史圖書館避雨加歎冷氣。

大約兩個多小時後，大家都歎完，哈，真係又香又滑。

行左陣街，晚上便一齊去時代廣場間CPK食，呢間野真係幾PK，服務態度個個都好特別，不過個WHITE PIZZA真係正，我幾乎次次幫襯都食。

呀，聽日又要返工。

今朝聽番林森池上星期係港台既節目，佢入面講到中人壽的抵買位係預測內含價值既三倍，宏利既同樣比例係兩倍，到底中人壽憑咩可以估高咁多？我真係好大疑惑，中國市場的確前景很好，但係咪真係好得咁緊要？趁著開始調整，真係要思考清楚條路點行。

週五。股市出現了小下趺，很多股份都趺了1至2個百份點，如果再趺，我就真係要計下，到底幾時買招行好。好多人都介紹過太平洋恩利，往績及前景都似乎十分良好，但真係唔識捕魚呢個利業，係無深入資料下，錯過機會總比做錯決定好，正如，畢菲特所言，我們應該限制一生人所做的決定，這樣可以有效減少做錯的機會。

港元及美元的沒落，未來幾年既投資都唔可以再買以港元或美元資產和業務為主的公司，除非平得好緊要，歐洲、加拿大及中國都係重點，夠膽既可以睇埋其他新興市場，我地最熟既當然係中國，要得到最大回報，當然要搵到最有前途的公司。招行服務及資產管理質素高，亦壓倒所有外資，被選為最受國內富豪及中上層歡迎，當然是我的目標，但現在歷史市盈率接近40倍，要買入真係要一些勇氣。

親情與理智本來無咩關係，但偏偏就係有人咁喜歡利用親情咁打動別人的理智，三番四次都係咁樣，利用親情的人正是最唔重視親情的人，無奈，睇住一家人由好變壞。

生活總是充滿無奈，好心做壞事更係十常八九。

新買既衫，新買既褲，明明已經好小心好小心咁去著，人地係好心幫手洗，幫手燙，幫手改短，但總是有一些意外，好心的人做了壞事，新衫新褲就咁被破壞。

意外已經發生，再固執都無用，與其怪責自己和別人，倒不如快樂地接受了，件衫爛左已經改變唔到，但開心定唔開心自己可以決定，話唔定件衫仲可以有另一個著法呢。

美元真係唔值錢了，睇住歐羅、加元和人民幣係咁升，都咪話唔驚，而家都係去日本玩最抵，不過最衰就係我重有貴日元係手，幸好我都有宏利，佢呢幾日都跟住加元係咁升，但其實加元升對宏利唔係絕對有好處，無錯佢既加國資產係升左值，但係當佢係年結時將美元或港元等弱勢貨幣收入兌過加元做結算時，便將收入減少了。

繼舊年招行後，另一期待以久既新股快將上市，就係SOHO了，今次我會點，我都唔知。

六四。

福佳，始終有你。

多得雞坤，有得聽陳綺貞演唱會，只係聽左幾首已經覺得好正，陳綺貞唱《吉他手》既時候，問大家"說甚麼"那一下，真係型到爆。

一早去左荃灣游水，勁好太陽，黑上加黑。

中午去了唱k，新都會間YO Park原來已經執左，真係快。

晚上和家人去重慶食咖哩，新德里真係好味。

今日和獎門人造了三個tiramisu，正。

寫了《刺青》和《加勒比海盜：魔盜王終極之戰》的感想，愈來愈懶了。寫了兩年半，快有三萬人次了。心思思想整多個blog，講...

林森池就快出新書，佢本舊書輪左咁耐都未到我。有時間聽下佢既電台訪問吧，係呢個形勢到底應該點樣做投資決定？

終於到左星期五，希望下星期我們回復正常。

連續兩晚無得同獎門人一齊放工，真係衰。

雖然A股有小調整，但係距離我會買招行既價位重差好遠，所以現階段我都係唔諗為妙。

開始睇材上春樹既《舞‧舞‧舞》了。

雖然A股有小調整，但係距離我會買招行既價位重差好遠，所以現階段我都係唔諗為妙。

開始睇材上春樹既《舞‧舞‧舞》了。

大陸股票印花稅由0.1%加到0.3%，對強勁既A股來說，加幅實在小到應該睇唔到，但係人民就係驚政府既下一招或者係再下幾招，A股大趺，亦影響了香港股市。

隨著加元升上兌美元的歷史高位，宏利今日破了全年最高位。

今個星期繼續上星期的博殺，因為要對DATA，睇到隻眼都痛。

中午和家人去了灣仔飲茶，之後和獎門人行cwb，好大雨呀，晚上在CEO慶祝阿哥生日。

若要錯失永不能守
得到也不代表長久
假使快樂有盡頭
痛苦也未會不朽
寂寞半點假如不能承受
這生命註定過得不易
笑與淚 亦有時候

今個星期我地team真係唔黑仔，今日開會，領導人E話我地燒得好似荃灣工廠大廈咁勁，可想而知有得甘，甘到連我都要ot，聽日都要返。

假期，和獎門人及康仔去左睇《魔盜王三》，比較失望，我發現呢部戲有一個不繼重複既格局，這電影本身亦都係屬於呢個格局，所講既就係雷聲大雨點小，由海女王，東印度公司，八大海盜等等，通通都係得個講字，全部都係流料，班海盜又一日都黑都有事閃人，無事作威，連第二集既成龍式特技都無埋，真係幾失望。

之後去左尖沙咀，行左陣之後就去西九長廊影日落，但係個度既欄勁高，重高過我地支腳架，幸好部相機都重可以放係欄上面影。呢度既環境都幾好，不過真係好鬼遠。

星期三，聽日唔駛返工。這星期是一個在星期四有一日假期的星期，注定與眾不同。更妙既係，呢日假期係星期四，即係返三日就放假，放完呢日假，當俾鬼責，過多兩日又到星期日。唔怕同你講，我上星期已經期待緊聽日。

Massive Attack - Angel

早幾日睇返之前幾星期錄既《Live From Abbey Road》，係全無準備既心情下，睇左三首Massive Attack既歌，開心死，最正就係我唔係聽過好多Massive Attack既歌，但係咁好彩咁三首我都聽過，仲要有一首有Cocteau Twins主音一齊唱，我睇完真係開心左幾日。

悶熱的星期一，未見阿爺一排，今日午餐和晚餐都一齊食。

有很多個我。有面對中同的我，比較懶及多粗口。有面對大同的我，比較多冷音。有面對同事的我，比較靜和自閉。有面對家人的我，比較獨立。有面對妳的我，比較需要妳的愛護。

我就是我。

啊，今日康仔返香港做暑期工，六月至八月都會住係我屋企，屋企轉得更熱鬧。

下雨的星期日。

今日和獎門人及我的father mother行沙田。係新城市行左一陣後，行宜家，宜家間餐廳勁爆多人，食大快活，相對地少人。食完繼續行，行宜家係一種樂趣，亦係一種沉淪，就好似睇蔡san旅遊節目一樣，間唔時睇下行下係樂趣，但絕對會上穩。係過程入面，你付出既只係時間和腳力，但宜家俾你好多好靚既家，蔡san介紹你去好多連當地人都唔識既地方。

但係其實呢d野都好像幻覺一樣，人好容易在當中迷失，只懂追尋一些永遠未曾存在既野。

幸好，我們都懂節制，懂得從幻覺中返回現實。看看那件家具適合我們的家，計劃一下下次旅行的目的地。

mcc君，唔好為左d無謂人勞氣。

民建聯既底子和實力，大家都好清楚，現代人對佢地或一般親中喉舌既講話，都已經識得自動分類，可以歸入你有你講，我有我聽既類別。現在香港傳謀，最危險的反而是《東》字一系的報紙雜誌，受大眾歡迎，但立場結論永遠是歸於一邊，好容易慢性改變市民既諗法。

《秋天的童話》、中大學報、咸相男。

安息吧。

勁！男子在網上色情討論區放咸相連結被捕；中大學生報搞情色版，有關學生全部有罪。

勁！有人上網走入色情討論區，見到奇女子對波太大，忍無可忍，要報警投訴，勁。以後係街見到警鐘波唔好大驚小奇，因為你既一句讚嘆都可能有罪。

勁！Google和Yahoo都有罪，因為當你search "sex"既時候，幾萬條咸link為君送上。

勁！中大學生報色情版，認真討論兩性、同性關係，一份問卷，收集到原意以外的資料，原來，社會的文化水平仲係咁低，勁。

勁！中大校長好野，免費親身為全港市民示範，做人最高絕招，推卸責任，唔關我事唔關我事唔關我事唔關我事唔關我事唔關我事唔關我事唔關我事，學生既錯，唔關我事唔關我事唔關我事唔關我事唔關我事唔關我事。

勁！一份問卷幾條問題俾人話亂倫，相同邏輯下，聖經古蘭經大量古籍，全部有罪。出動吧，衛道之士，為所有刊物都包上有色封套，連阿媽都包埋，因為佢生得你出來，就搞過野，就係有罪，出動吧，一眼睇哂全港有所有電視電影電台，所有不文都不能接受，電話隨時接通電檢署，出動吧，衛道之士，完成後所有任務後，記得晚上沖涼既時候，拿著阿婆的絲襪，自己打飛機，然後把自己殺死，世界便清潔了。

勁！聖經俾人投訴，教會人士話投訴人唔尊重人，知識份子話投訴人無知，勁。我想話你知，投訴聖經，投訴google，唔係因為我地係衛道之士，而係想話過你知，投訴人地係色情討論區放咸相，投訴學生係校報討論性，一樣係咁唔尊重人，一樣係咁無知。

繼方卓如後，小曹和港燦也復出了。

已經開始睇新書了，星期六那日去圖書館借了三本書，《一碗清湯蕎麥麵》、《萬歷十五年》和《舞‧舞‧舞》，我又看村上春樹了。

《一碗清湯蕎麥麵》是一本小書，星期六那天已經睇完，俾左獎門人睇。個故事雖然短，但係好感動，我搭西鐵個陣睇，睇到勁想喊。

我已經睇完《我城》了，看著阿果和麥快樂的故事，我聯想到七十年代電影內的張國強，那些充滿活力的男孩。

這是我城嗎？這是我城嗎？

今日好早就去左獎門人屋企，因為我地今日要整兩個靚靚蛋糕俾我地既媽打，但係我竟然唔記得拎栗子，幸好獎門人機智，改整士多啤梨味。

結果我地整左兩個朱古力芒果士多啤梨味蛋糕，獎門人用朱古力整左好多字係蛋糕面，好鬼靚。

晚上去了家姐屋企食慶祝媽媽節。

週未。

其實我一向都搞唔清楚週未係指星期六，定係星期日，定係星期六及星期日，有心人請講我知。

今日下午和獎門人去了又一城的Beams Cafe，虛榮到爆，呢間Beams Cafe其實即係Page One cafe，係City讀左四年都無幫襯過，轉個期間限定既名牌，就自動送上。

食左個黑椒牛肉伴日式蕎麥麵下午茶餐，另外加一件雙重朱古力蛋糕，個麵幾好食，生牛肉切粒食落好過癮，雙重朱古力蛋糕既朱古力都唔係好夠重，但係都幾好味。

之後行左陣又一城，豪多一次，係Godiva食左杯朱古力雪糕，真係一生總要豪一次，$39一小杯。

晚上和獎門人屋企人食飯慶祝媽媽節。

有留意開英國音樂既人都應該知道，Travis近排出左新碟，有樂評話幾好。講起Travis，我諗好多人都識，佢地係Brit pop熱潮最後期既時候出道，憑一隻《The Man Who》係音樂界造成一股慘到爆既氣氛，當時既〈Why does it always rain on me〉、〈Turn〉、〈Writing To Reach You〉等歌都十分流行，老實講真係幾好聽。

到佢地之後出多幾隻碟，我聽過當中幾首歌，覺得無咩新意，質素亦無《The Man Who》咁高，所以我都無買。

今晚係YouTube聽左〈Closer〉和〈Hit my baby one more time〉，感覺上無咁慘，傳統搖滾味重左。問我有咩感覺，我會話，Travis最好既唱片，都重係《The Man Who》。

今晚是獎門人最後一晚來元朗上蛋糕課，雖然離聖誕節有一段很長的日子，但係今堂整既蛋糕叫做白色聖誕。

一層層既蛋糕中間有好多栗子，表面擠滿栗子忌廉花，上面有一間朱古力屋，好靚，亦都好味。經過呢十幾堂，整左咁多咁高難度既蛋糕，獎門人既功力相信已經提高左好多，正。

獎門人經過昨晚的大睡後，今日情況好轉，今晚重要一試新買的焗爐，聽講話要整曲奇餅，聽日有得食。

工作實在夠忙，但係我都無OT，彷彿跑向死亡一樣。

眼睛很累，今晚唔用電腦了。

獎門人仲未好番哂，所以今晚好早便休息了。

係網上成日聽人講國內地產公司SOHO好勁，係國內前景最好的地產公司，就像銀行界的招商銀行，今期便《東週刊》訪問了SOHO的總裁張欣，佢好細個由大陸來香港做女工，搵錢讀書，讀到做劍橋大學碩士，畢業後係華爾街做投資顧問，之後係機緣巧合下，遇上了來自北京的潘石屹，在三次見面後便結婚了，第一次見面時，潘石屹還是和女朋友在一起。

之後張欣便跟隨潘石屹返北京，成立了SOHO地產公司，十多年後，他們是國內三大納稅最多的地產公司，被喻為最有前途的地產公司。雖然現在SOHO主力發展商廈，但原來我係幾年前已經聽過佢地既大作，著名的長城公社，佢地就係發展商，這個咁勁既項目，為SOHO帶來世界的注目。

從這篇訪問，可以睇到呢間公司既活力，但係對於夫婦檔，我始終有小小保留，錢和權力都是萬惡的來源。SOHO今年應該會係香港上市，根據現在新股熱潮，我好肯定我到時都係認為定價過高，保持唔抽新股既態度。

在網上發現潘石屹的BLOG，如果對有錢人、內地地產或想係抽新股前認識一下公司管理層既，都值得睇。

十一點了，快睡吧。

星期一，近排工作都好忙，好多野都好趕，幸好今日做野都無咩特別事發生，可以好專心咁做，所以進展都唔錯，但係都仲係好趕。

獎門人重有咳，把聲低音左，今晚我們去了佐敦的彌敦粥麵家，食了一碗粥和一隻粽，環境很舊式，但整潔，食物味道亦幾好，粥的杰度適中。食完之後上跳舞堂，終於跳哂成首歌了，由頭跳到尾勁累，仲有三堂玩。

大約一年前，我們買了一個維尼熊焗爐。在這一年內，我們焗製過很多美食，好像曲奇餅、芝士蛋糕、疏乎尼、鬆餅等等等等，好多人食過，好多人話好。但因為這個焗爐功能上並不全面，無得控制溫度，容量亦不大，好多時都焗鬆餅都焗到頂天立地。因為要走向專業，及製造更美味的蛋糕，我們近來都在物色一個較專業的焗爐。

我們看中了一些忠臣牌的焗爐，功能夠多，有上下火控制，有熱風對流，容量大，價錢平，而且網上用家的評價亦不錯。所以我們今天便在荃灣買了這個忠臣牌型號PT-928的焗爐，我們兩人用盡全力咁搬個焗爐返屋企，執個靚位擺好，心情興奮。

老友，想食好野就報名啦。

今日和獎門人去醫生，去到醫生度探熱，已經退燒了，但係仲有咳同埋喉嚨痛，要多喝水。

之後回家休息，晚上落荃灣上攝影課，快結束了。

今日係五四運動八十七週年，時勢出英雄，現在已經縱使可能有像蔡元培那樣開明的人，都沒有像李大釗和陳獨秀等的人了，就算有，都不會造成對社會造成這麼大的影響了。現在的青年，有時間肯拿起魯迅的《吶喊》閱讀，已經很難得了，那些難明的社會主義書籍，實在太沉重了。

宏利公佈第一季季度業績，美國的保險業務及加拿大業務的都賺少左，原因係投資收入減少，相反美國的財富管理及亞洲業務都賺多左，中和後整體賺多左。因為改變了會計製度，作了一筆一次性的支出，令到每股盈利只上升了三個百份比，每股資產回報亦降至十五個百份比，若不計此支出，兩個數字分別是十三和十七點三個百份比。

因為業績無驚喜，令到一些炒業績既人離場，所以股價下趺至$280，下星期可能會再趺。但係對我無影響，如果我有錢，我會等機會入手，但係我無。另外我亦無打算放，因為宏利的前景明亮，中國的業務開始有成果，增長只會加快。

獎門人發燒了，很燙，很擔心，希望妳快些康復。習慣了和妳一起，一個人靜靜地過的晚上並不好過。

又到星期四，返埋下星期，獎門人就上完呢個蛋糕課了，今日係尾二個堂，做歌劇院蛋糕，呢個係佢上呢個堂既最大目的。

歌劇院蛋糕由多層蛋糕組成，每層都有咖啡忌廉和果仁，表面有超大量既朱古力包住，頂層用朱古力寫左字，另外重有金薄，十分名貴。

因為由多層組成，而每層都有好多料，加埋表面既朱古力，進食既時候感到十分幸福，先係朱古力味，再來便是強勁的咖啡味和牛油味，絕對係回味無窮。

話說昨日係南丫島書蟲俾多了一百蚊，始終念念不忘，係即管試下既心理下，我中午時打電話去和他們說明一下情況，店員在明白後說要問下老闆先，因為昨日收我錢的正是老闆。在下午放工時間，這位老闆阿ken就打電話俾我，話唔好意思找錯錢，仲好主動咁肯俾番錢我，之後在大約六點半，我地便在中環收回那一百蚊。

係呢件事，我真係見識到咩野叫做大量，我唔信佢真係埋數計到多左一百蚊，因為假日人客多，貼士好難估，佢今次真係講個信事。

好野，原來呢個世界真係重有咁有心既好人，同佢見面既時候，佢重係咁叫我地再去幫襯，又話請番我地飲野。

幫襯，我們當然會，因為書蟲除左食物正之外，連d人都係咁正。

是日勞動節，雖然平日番工都係坐係度居多，無咩勞動，但係都可以休息唔駛番工，同左獎門人去南丫島。

十一點幾去到碼頭，嘩，勁多人，排哂長龍，南丫島呢個香港最後既樂士都就快俾好似我呢類咁既遊客破壞。

落船後，第一時間去搵食，入得南丫島，當然要去書蟲食番餐。作為一個以書及素食為賣點的餐廳，書蟲的食物份量及質素都絕對是一流，服務及氣氛都十分良好，雖然有點貴，但絕對超值。

我和獎門人食了一客pizza和一份pancake，pancake內包了很多蔬菜，勁好味，pizza用了自家番茄及"a lots of"芝士，超正。

食飽，心滿意足。行了一陣街，就向洪聖爺灣進發，經過見到Shelly Cake Express搬左，位置更加方便，決定回程時食。去到沙灘，行左陣，又坐左陣，參觀完那個有機農場便回頭了。

去到Shelly Cake Express，點了一件芒果芝士蛋糕和一件曲奇芝士蛋糕，侍應﹝可能佢就係Shelly﹞勁好服務，介紹得好清楚，連食邊件餅先都講教埋，真係勁禮貼。芒果芝士蛋糕味道清甜，和獎門人造的差不多，曲奇芝士蛋糕都好好味，食完兩條友飽到震，係碼頭附近個公園坐左一輪，講下理想，之後就番香港了。

落船後又坐船去尖沙咀，因為星光行間商務就快搬，所以去參觀下呢間被評為香港最佳既書店。去到見到有好多特價書，我地都買左兩本，加埋第六期既《字花》，丫，我連第四期都未睇完呀。

係我地行緊書店既時候，獎門人醒起，我們在書蟲結帳時，竟然找少了一百蚊，真係勁無奈，雖然明知無補於事，但兩個人都是唔開心了一輪。

晚上番荃灣和獎門人家人食飯。

會考對於我呢d老人家來講，好似已經係幾十年既事咁，但係年年四至六月就會出現好多會考既新聞，仲要係次次都咁搞野。

今年中文會考作目，條題目叫〈檸檬茶〉，咁無厘頭都竟然俾一位補習老師估中，有考生投訴，懷疑有內鬼。

其實個老師估既係〈冷檸茶〉，呢度有得睇原文。

我一睇呢單新聞，即刻覺得考試局好醒，特登整條超無厘頭題目做餌，引大魚上釣。另外，有考生投訴唔公平，因為有人背左篇文，實高分，其實講呢句說話個位考生真係勁低能。首先，作文唔同其他考試，無標準答案，照背補習老師個篇都唔一定高分，因為補習老師唔一定作得好。第二，件事咁揚，如果我就係照背個位人兄，一定驚到訓唔著，因為實俾人捉抄文，隨時紅牌出場，無分取消資格。

重有，而家既新聞報導真係唔全面，我其實好想知呢位補習老師到底估左幾多條題目，同埋佢估左咩，如果佢除左冷檸茶，仲估左冷檸水、冷檸啡、冷檸七、冷檸賓，咁我就會信佢係清白，可惜呢類消息並無報導。

今日舉家一行十多人，去左錦田既紅磚屋跳蚤市場，同介紹一樣，係西鐵錦上路站行過去十分鐘都唔駛就到，証明香港人既時間觀念比日本人好，因為係三鷹博物館都係話十分鐘就可以由三鷹站行去，但結果我們行了接受45分鐘。

個場以前係貨艙，現在利用紅磚在室內間了幾條街出來，賣有機食物、雜貨和精品﹝唔好問我咩係雜貨，咩係精品，因為我都唔知﹞。因為係室內場，又無冷氣，所以都幾熱。個氣氛都幾唔錯，如果可以有現場音樂就仲有。

下午番屋企，開工，和獎門人忙了一大個下午，造了廿多隻栗子撻和一盒提拉米蘇，兩個人都散哂。幸好大受歡迎，幾累都值得。

晚飯後一齊玩出前一丁大富翁，結果鐵路這隻強勁的現金牛令我成為首富。

開心的一天，希望我們也能有健康的身體去迎接未來。

今日同獎門人去食勝香園，檸檬蜜糖脆脆真係好正，酸酸甜甜好過癮。另外食左個番茄牛肉腸仔炒蛋餐肉﹝我當然無份食餐肉﹞通粉，勁大碗，獎門人再多過朱排包，食到我地兩個都好飽。

不過我地唔識路，幸好得到朋友指點，先至搵到間鋪。但係去到勁多人，要排隊食大排檔真係第一次，排左大約半粒鐘，但係都值既。

之後去左灣仔，幫auntie 3買左部ndsl。再係cwb行左陣，晚餐又去灣仔，食再興，獎門人今次滿意了。

今日係新元朗中心拎左新一期既《讀書好》雜誌，呢本書真係好有心思，除左介紹書之外，亦講有作者及讀者的訪問分享。

聽講梁文道教人準備一個wish list，列底想睇既書，有意無意間可以迫自己快d睇，似乎係一個好主意，等我都整番個先。

星期四。今晚獎門人整熱情果慕絲蛋糕，好香。

考慮左一日，取消了那個八年儲蓄保險計畫。

一年5%，我其實好有信心。

保險。

近日睇左一本漫畫叫《樂與路》，幾有感觸，令我諗起麥兜係《麥兜菠蘿油王子》入面講既野。麥兜話，阿爸活係話去，阿媽活係將來，而我‧‧‧

只有我，活係現在。

拜山。植樹，將祖父墳墓上的樹，移植部份新技去祖母的墳墓。愛，不斷製造奇蹟。下午在獎門人家睇《忘了，忘不了》，好感動。天意愛作弄人，但無人阻擋到愛。

永恆新世界有兩篇文，〈招商銀行的市場專業〉和〈誰能得到平安的金湯勺 ?〉，講招行和平安，兩隻既前景都十分明亮，招行我睇左好耐，未係香港上市前已經有留意，我覺得佢係中國未來幾十年發展中最有機會跑出的國內銀行，佢既服務係國內超班，勁受高端用戶歡迎，好似信用卡購物會收到電話短訊呢招，連香港既銀行都未有，招行就做到先。但係招行一直既市價都好高，雖然佢有強勁增長率支持，但我都重係覺得貴，加上我現錢唔多，所以我一直無買，希望今年內可以買到。

由上個星期一開始，國際台晚上八點有一個叫做《Live frm Abbey Road》既節目。Abbey Road錄音室因為當年被Beatlesok使用而被人認識，係之後幾十年有好多著名音樂單位係個度錄個音。呢個節目就包括左一大堆著名音樂單位係個度既演出，第一集有Paul Simon、Corine Bailey Rae 和 Primal Scream，我錄左都未睇。

另外，奧卑利街新開左間食店，叫做POP bites，食野之餘，勁sell音樂，有機會真係要去下，當年Chemical Suzy到執左我都未去，始終係一個遺憾。

最佳女主角，我無睇過《滿城盡帶黃金甲》和《鬼域》，點都好，我真係好想俾呢個獎劉若英，佢係《生日快樂》呢部戲真係無得頂，自然真實有感情，郭藹明既配音亦都出色。

最佳男主角，我只係睇過當中三部，劉青雲係《我要成名》既表現絕對值得得到呢個獎。其他對手既表現並不太出色。

最佳編劇，終於有一個獎我係睇哂五個提名，《黑社會以和為貴》 和第一集比較下明顯失色，《傷城》故事並不太特別，《我要成名》故事特別，真實亦有人情，《生日快樂》故事簡單，但真摰動人，《父子》將家庭內壓抑的情及恨講出來，老士得來近年少見，情感亦不過火，好。

最佳導演和最佳電影，同樣都係個五個提名，我睇過三部，以整體看，《父子》當之無愧，故事好，演員好，鏡頭、剪接和配樂好，造到節奏一氣呵成，無冷場。譚家明久休復出，展示大師級的技巧。

最佳攝影，除左黃金甲，我四部都有睇，四部都咁鍾意。《伊莎貝拉》 拍得懷舊，《父子》拍得純樸中有暗湧，《放‧逐》有新意，《傷城》 拍得有時代感，五部提名有兩部係澳門拍，都係拍到澳門好靚，得《傷城》係香港景 ，可能有分加，所以得獎。

最佳新演員，我有睇吳澋滔、霍思燕和Matthew Medvedev。Matthew Medvedev係bb仔，佢拍得好應該係全靠拍攝時工作人員及家人的幫肋，吳澋滔交到咁多面情，抵有獎，但係我其實覺得霍思燕做得更加好，真係好似做番自己咁。

最佳女配角，五個提名，我只係睇過《父子》和《我要成名》，兩位都唔值得有獎。

最佳男配角，五個提名，《父子》 和《黑社會以和為貴》 我都有睇，演員來說我鍾意張家輝，但係佢係呢部戲機會唔多，唔應該有獎，任達華亦似男主角多過配角，表現亦不及第一集。吳澋滔係咪咁好我唔知，但肯定既係佢既角色係部戲入面好重要，而佢亦十分演職。但係我唔明，部戲講兩父子，點解老豆係主角，仔係配角？唔係應該兩個都係主角咩？

2007金像獎已經過左幾日，我當日都有睇直播，得獎名單click入去呢度可以睇到，對於各個獎項，我有一些意見。

新晉導演，有三個提名，《四大天王》係我唯一無睇既作品，我認為吳彥祖的得獎是因為他在宣傳上的突破，搞到傳謀真假不分，但葉念琛及羅永昌均很出色，《獨家試愛》講現代愛情，《天生一對》講職業女性面對家庭、愛情、朋友及自己的身體，兩部戲都拍到結實唔造作，其實都不錯。

最佳剪接，五個提名，《父子》、《放‧逐》及《傷城》我都睇過，得獎個部無睇過。我真心認為香港電影的剪接技術是世界一流的，係我睇過那三部電影，各有特色，譚家明在《父子》的鏡頭清脆利落，所有位都無多無少，就係夠將觀眾入戲。《放‧逐》內充滿玩味的鏡頭，有快有慢，有闊有近，將那些槍戰場面拍得好有型。《傷城》不得不提那些案件重演的手法，有新意得來亦運用得宜，既講戲情亦唔會拖慢節奏。

聽日繼續。

招商銀行公佈業績，好。

電話轉了新歌，Beatles的〈Nowhere Man〉。

He's a real nowhere Man,
Sitting in his Nowhere Land,
Making all his nowhere plans
for nobody.

Doesn't have a point of view,
Knows not where he's going to,
Isn't he a bit like you and me?
Nowhere Man, please listen,
You don't know what you're missing,
Nowhere Man, the world is at your command.

(Lead Guitar)

He's as blind as he can be,
Just sees what he wants to see,
Nowhere Man can you see me at all?
Nowhere Man, don't worry,
Take your time, don't hurry,
Leave it all till somebody else
lends you a hand.

Doesn't have a point of view,
Knows not where he's going to,
Isn't he a bit like you and me?

Nowhere Man, please listen,
You don't know what you're missing,
Nowhere Man, the world is at your command.

He's a real Nowhere Man,
Sitting in his Nowhere Land,
Making all his nowhere plans
for nobody.
Making all his nowhere plans
for nobody.
Making all his nowhere plans
for nobody.

今晚上跳舞堂，上一堂因為去左東京無上到，幸好有stella親自傳授，所以我兩都未至完全跟唔上。今堂好多腳陪動作，好累。

father出院。

今日戶外攝影，去了雲泉仙觀和北區公園。天氣幾好，哂到我地兩個都黑左。

因為擁有，所以快樂。

因為快樂，所以珍惜。

因為珍惜，所以擁有。

今日陪father入院。

晚上獨自回家收檔。

星期五，聽日又放假。今晚和獎門人選擇了一些去日本的相，聽日拎去哂。聽日father入院。

復工第一日。

今晚獎門人造了很美味的Apple批，正。

寫埋《莫失莫忘》和《愛情回水》的影評了，假期最後一日總算有點作為。回顧今次電影節，《愛情回水》都算得上係今年電影節既最大驚喜了，娛樂性十足。《底下》的反思令人感到害怕，但表達得太直接，就似一把利刀，插死左都未知痛。《十三棵泡桐》講內地少年，有趣。《明明》的打鬥片令人難忘，勁。《莫失莫忘》相對失色，有點摸不著頭腦。

呀，聽日要返工了。

長達好幾個月，我終於睇完十二本《基地》，感覺就像完成了一個創舉。我覺得這個故事在尋找地球開始便無咁好睇，太多超能力，機械人及外世界的人都過於新奇，雖然無疑是增加了科幻性，但卻減少了早期有趣的歷史性。

其實《基地》尚有前傳和後傳，但我短時間內都唔會睇了，連續睇左咁耐科幻小說，都需要吸收一下其他類型既書籍。

在去日本之前借的《解讀巴菲特》，經過呢幾日既全力閱讀，都已經看了超過一半。這書主力分析巴菲特的投資決定，當中提到他的投資思維是如何受Graham和Fisher所影響。我都睇過Graham既《The Intelligent Investor》，明白安全界線既重要性，但好坦白，我唔識計一隻股票的內在價值，但我都覺得呢本書好有用，講左好多投資基本心理及面對波動應採取既態度。而Fisher既《Common Stocks and Uncommon Profit》我就想睇好耐，有機會就會睇，Fisher比較著重於找尋最優質的企業，然後訓身。巴菲特集兩家所長，找尋最佳企業，再等待機會以存在安全界線的價位大手買入，之後長期持有。

今晚和獎門人及mcc去太古城睇今年電影節最後一部電影《愛情回水》，有趣爆笑浪漫的一部電影，雖然部份情節極度低級趣味，但在拍攝技巧方面是用了一些心機，讓我在影評再談。今日寫了《底下》及《明明》的感想。

今日到我出馬，和獎門人聯手整朱古力撻，整左足足一個下午，造了十幾件，成個人都散哂，不過真係幾好味，今次用呢隻V字頭牌子既56%朱古力，唔太甜亦唔苦，果然係名牌子。

不如又講下我係東京聽過既音樂，主要都係我係一些商店入面聽到既背景音樂。講都唔信，佢地大部份都好念舊，因為我聽到好多Nirvana和Beaties，勁得我歡心。係下北澤既時候，都行過一間唱片鋪，傳說中下北澤有好多正二手唱片店，不過我地時間唔係好多，所以都無細搵。

呀，有三部戲未寫感想呀。

今日到我出馬，和獎門人聯手整朱古力撻，整左足足一個下午，造了十幾件，成個人都散哂，不過真係幾好味，今次用呢隻V字頭牌子既56%朱古力，唔太甜亦唔苦，果然係名牌子。

不如又講下我係東京聽過既音樂，主要都係我係一些商店入面聽到既背景音樂。講都唔信，佢地大部份都好念舊，因為我聽到好多Nirvana和Beaties，勁得我歡心。係下北澤既時候，都行過一間唱片鋪，傳說中下北澤有好多正二手唱片店，不過我地時間唔係好多，所以都無細搵。

呀，有三部戲未寫感想呀。

昨天我係屋企發呆，獎門人就在家造了很多精美好味的曲奇，我地係自由之丘買左一套曲奇餅模，係二十六個英文字母，另外係東急手亦買左一套維尼熊和朱仔的餅模。獎門人用這兩套新模，造了很多米蘭曲奇，今日俾我同屋企人食，勁受歡迎，好快就食哂一大盒。

今日去左家姐屋企打wii，呢部機真係中哂市場，男女老少都咁鍾意。對於呢類科技公司，畢菲特既睇法好正確，佢認為某些科技公司的確擁有很強的盈利能力，但係R&D的成本和產品的受歡迎程度的關係絕非常人所能夠預測。以PS3為例，今日我同獎門人係又一城見到有promote，個sales玩緊一隻網球game，畫質真係高到真既一樣，不論球場實景、觀眾甚至球員肢體的擺動都近乎完美。但係，你問一般人想買一部wii定係PS3，我諗答案會好明顯，同期既X-BOX更加係差唔多已經無人記得。

所以身為高科技的用家是一件好事，但作為高科技的投資者便不見得了。

今日係屋企，寫哂咁多日旅行既日記，勁多錯字，又寫少左好多野，睇到你一頭煙唔好怪我。

我相信好多人都知，日本人係唔興係火車or地鐵既車廂入面講電話，咁佢地到底做咩多呢？係日本呢幾日，我地發現原來不論車內甚至街頭，都係好少人打機，唔似得香港，一卡西鐵十幾部NDSL，齊哂所以顏色。

原來日本人搭車，如果唔係訓覺和發呆外，最多的便是睇報紙和睇書，閱讀風氣之強令人妒忌。身為報販及愛書人，我當然有注意下佢地睇咩，報紙方面，多數係中午上班族睇，而睇既以《讀賣新聞》為最多，格式似香港既《信報》，勁多字配少量圖。

書方面，因為日本書店鍾意幫讀者用書店自己既包書紙包住本書，所以基本上係唔知佢地睇緊咩既，比較可惜。

到底香港既讀書風氣會唔會有復活既一日？閱讀雖然係個人活動，但能夠有書友一齊欣賞和批評卻是一件樂事。就像香港最有承擔的中年和香港最有承擔的青年之間的友情，我都想有一位痛快的朋友。

返到香港第一日，今晚已經又要睇戲了，電影節的第四部戲，原本叫《愛情征服一切》，但係後來改了名做《莫失莫忘》，基本上都係一頭煙，今年電影節我們選了的都是一些新導演或實驗味較強的電影，結果多次令我們迷失。

睇完戲都仲早，去了山林道的老趙晚餐，大蝦餐好正，咖哩鴨都好好味，正，最鍾意同獎門人食好野。

最後一日了，次次去旅行到最後一日都勁唔捨得。

八點半離開我地住左幾日既屋企，便坐JR山手線往上野，在火車站的locker室放低哂大件行季，便坐Tokyo Metro銀座線往淺草，大家係淺草的仲見世通買了很多手信及食了很多街頭小食，好開心。獎門人仲係淺草寺求了一支一號大吉籤，真係好彩。

十二點返回上野，在上野公園行了一會睇櫻花，這裡都有很多櫻花，但已不及第二日在井之頭那些咁靚了，之後在一間日本餐廳食了一個都幾好味既午餐，係上野幾條橫丁行左個多小時，買了很多零食做手信，之後便坐京成特急去機場了。

五日既旅程，真係話咁快就玩完。我地要俾心機做野，搵多d錢，咁將來就可以年年都去旅行。獎門人你講得無錯，我真係唔可以成日發脾氣，如果唔係會無哂朋友。

今日勁早出門口，因為要去築地食魚生，七點鐘就出發，坐Tokyo Metro丸之內線往銀座，轉Tokyo Metro日比谷線，八點都未到便到達築地市場，行了很久才找到那些食魚生的店舖，因為Stella和阿爺都唔食魚生，所以我們三人點了兩個套餐食，真係好正，魚生很鮮味，最正係海膽，十分鮮甜。

因為我地都算早去，所以只係排了大約半小時就有得食，十點多便食完走人。坐都營大江戶線往新宿，轉小田急小田原線住下北澤。

下北澤又係個種好自由既地方，都幾舒服，行了差不多兩小時便離去。

返回新宿後，在JR買了橫濱自由乘車券，Stella在此時開始肚痛，情況都幾令人擔心。在新宿坐JR新宿湘南線往橫濱，好快，中途只有兩個站，勁訓。

到達橫濱後，參觀了日本丸紀念公園，再在一個遊樂場玩了一會，很有趣。之後在一個商場內午餐，Stella食飽後情況轉好。之後我地去紅磚屋，因為近海加上陰天，好鬼冷，在紅磚屋內行了好耐，主要都係想避冷。之後去了皇后商場，和勁大SNOOPY映相。

原本想係橫濱映夜景，但係見大家都累和橫濱實在無咩好行，所以提早回程。

返到池袋後，我和獎門人再戰池袋shopping，但都只係我買左件外套。晚餐再食一蘭，真係好正，今次除了stella外，大家都要了加底。

昨晚落雨，今日還未停雨，天氣變得很冷。

今日首先坐JR山手線去了原宿的明冶神官，參觀了兩小時，好冷。之後在明冶通的街口一間餐廳食了午餐，有PIZZA食，正。

之後沿著設計好的路線shopping，明治通，原宿通，原宿遊步道，表參道，明治通，到達涉谷。但我們沒有在涉谷停留，便坐東急東橫線住自由之丘，在自由之丘找到傳說之甜品器材店，獎門人收穫豐富。之後在一間很大的甜品店內hea了一會，大家都覺得自由之丘整體真的令人有一種很自由既感覺。

返涉谷後，坐JR崎京線前住台場，行了朝日電視台、小香港和筋肉擂台遊樂場，之後便映夜景，彩虹橋、自由神像和彩虹摩天輪都好靚。

今日第一站是去三鷹博物館，即是宮崎駿博物館。池袋出發，JR山手線往新宿轉JR中央線往三鷹，在行入博物館途中經過的散步道上有很多櫻花，好鬼靚。十時前到達三鷹博物館，等開門，有好多小朋友。入到去好多野睇，係一個好有教育意義既博物館，好多製作動畫的模型，很有趣。看了一部動畫短片，講一隻走失了的小狗，簡單及充滿溫情，很有宮崎駿早期風格。行了兩個多小時便離去。

之後行去鄰近的井之頭公園賞花，真係好靚，滿天滿地都是粉紅色的櫻花，此行的最大目的已經達到。因為今年東京早熱，其實我地只要遲一星期，那些櫻花樹已經出哂葉，所以我地都算很好彩，睇到咁靚既櫻花。

離開井之頭後，行去吉祥寺，食了一個西式午餐，都幾好食。之後去排隊食吉祥寺勁出名既炸松板牛肉球，落住雨排左好耐先買到，表面比較油，入面真係好多汁，好食，如果唔係剛食完午餐可以一次食兩三個。

坐番JR中央線住新宿，在新宿行左幾個百貨公司，講都無人信，今次東京五天遊，我地去得最多既店鋪應該係夾公仔鋪頭，我地係歌舞妓町既夾公仔鋪頭，除左我之外，個個都有收穫，重要係唔只一隻。

晚餐是在一間叫做富士的面檔食，我和獎門人食了一個加底冷面，好味。

離開新宿，坐地鐵大江戶線住六本木，上了Tokyo City View睇夜景。

早上八點半機，一行五人﹝我、獎門人、Stella、馬騮和阿爺﹞約了早上六點半在機場等。大約五點半便和獎門人出門口，六點半未到便到達機場，因為已在網上劃位及check in，所以好快就攪好手續，過關後食burger king早餐。

下午一點多到達東京成田機場，過關也很順利，之後乘坐京成特急線住日墓里，再轉JR山手線住池袋。

四點半到達池袋，因為池袋之家的員工講普通話，而我們又不是住在主館，所以要在火車站聯絡他們，引領我們去我地間屋。所以馬騮出動了他的普通話，流暢程度令我們咋舌。

原來我地間屋勁近火車站，一出池袋北口，一分鐘都唔駛就到，方便到爆。上到樓，原來唔跟封面，比之前睇相個間細，不過整體十分良好，又包早餐，good。

整頓後我們便落街shopping，在池袋行了Tokyu Hands，終於食到松屋既牛肉飯，牛肉肥美多汁，撈蛋食幾過癮。食飽再行，行左animate和sunshine city，日本有樣野唔好，就係鋪頭普遍都好早收檔，九點已經收哂，無野好行。之後我地食第二餐，去了本次行程其中一個重點，一蘭拉面。呢間鋪好得意，獨立座位，睇唔到其他人食面個樣。雖然佢地只提供一款拉面，其實佢地有好多選擇，面既硬度，湯既濃度和辣度都有得選擇。無野好講，真係好味。

明天便出發了，今天中午和mother去了食炒冰，因為明天一大早便要出發，所以今晚去了獎門人屋企訓。

後天便出發了，今天上網找橫濱的資料時發現，當地一個叫MM21的地方，被喻為日本三大夜景之一﹝唔好問我另外兩個係咩，因為我都唔知﹞，睇相真係好靚，希望我地去到見到都真係咁靚。

天氣報告話，日本未有幾日都會勁冷，得幾度，仲會有雨。而上野既櫻花亦都已經盛開，可以盛開幾多日都係一個迷，希望天氣冷會令花既壽命長一點。

睇完《1973年的彈珠遊戲》，今日又去圖書館，元朗圖書館裝修完一部份，好多封閉左大半年既書重見天日，借左三本書，《基地》第十二期，《解讀巴菲特》，和西西的《我城》，夠睇一個月。

今晚獎門人造了雜果紫米朱古力蛋糕，雜果我有份幫手切，正，聽日食。

回mcc：

你講到無錯，大快活的確係陳幼堅既生招牌，美心、Franc Franc和city super等都有搵過佢攪品牌設計，但都無大快活既效果咁大，好大程度係因為兩個原因，一係大快活管理層及員工真心想做好既公司，二係個宣傳過程做得比較專一，相對於美心，大快活就係杜文澤、橙色、牛仔褲牆身和大字標誌，而美心就有好多港日藝術家既插畫，又放電腦又放雜誌，定位唔清晰。

食物方面，我只係試早餐，大快活近年的確進步左好多，款式及配搭都多了，食物亦都唔再凍，煎蛋既水準好穩定，熱飲既杯亦好拎左。而美心，我好耐無食了，因為最近個間已經執左。

所以我覺得，形象只會為間公司造就一些機會，把唔把握到才是核心問題。

完。

今天開始放假，再一次証明，我係個種放縱地優閒既人，我和獎門人午餐後，便去了中環大會堂圖書館借書，之後我便在皇后碼頭和大會堂之間的椅子，坐了數小時睇書和睇填海。

先講借書，原本想借一些華人老一派作家的小說，好像張愛玲、西西、沈從文和錢鍾書等人的作品，但行落又唔知睇邊本好，最後借了的卻是村上春樹的《1973年的彈珠遊戲》，這令我想起星期一晚和獎門人在澳洲牛奶公司食飯時的對話。佢話我成日同人講澳洲牛奶公司既炒蛋好食，但係次次去到都自動自覺咁叫煎蛋，心入面明明有左決定，但自己都唔發覺。

再講填海，其實我唔知個班工人做緊既係咪填海既工作，只係見到一些在船上的機械臂，插入水底，抓起一大團的黑水和黑泥，再放進另一隻船。坦白講，成個過程都好壯觀，看得我目瞪口呆，除了我之外，還有數個起碼六十歲以上的阿伯係度睇，共通點係大家睇既時候都係張開口。

壯觀之外，對大自然的影響到底有幾大，我唔敢想像。

今晚電影節雙響炮，下年都係唔好再玩雙響炮連睇兩套了，身心都支持不來。頭場係首映既《明明》，好多明星，故事一般，但太著重氣氛了，很多場合都拍得太像mv，龍珠式的打鬥反而很有趣。

第二場係《底下》，導演係劉浩，前作係幾出名既《好大一對羊》，佢今晚都有出席。呢部戲很奇妙，睇完都唔知想點，俾多幾日我諗下，睇下寫影評既時候諗到未。

今早在家寫了《十三棵泡桐》的影評。

幾星期前，在《信報》讀了一個專訪，內容是Bossni請了曾經改造大快活的陳幼堅去改造Bossni。大快活近年的成績不用多說，大眾接受性高了很多，在本地市場可算力追大家樂，改革之年更剛好遇上本地快餐業有紀錄以來最好景的一年，陳幼堅幫大快活攪的年輕化功勞絕對不淺。

相對地，現在的Bossni比過去大快活的情況只可以用更差去形容，本地低價時裝品牌在面對外地中價時裝及內地超低價的競爭，無一個頂得順，曾經輝煌及以良好管理盟名的佐丹奴都趺入低潮，改造Bossni絕對比改造大快活難，即管睇下陳幼堅及其團隊點樣出手。

首先，近日電視和雜誌都多了很多Bossni的廣告，電視上的那個肥仔彈琴廣告雖然有點莫名其妙，但感覺不老土，期待同一系列的其他廣告。另外，繼從未有過廣告的泊車入錶機在舊年首次粉墨登場成為模特兒後，那部尚播著那首陳年經典音樂的雪糕車，昨天便讓我在柏麗大道外看見它換上了全綠色的新裝，賣的正是Bossni廣告。最後，最重要還是店內的產品和服務，大家如果得閒睇下，一些比較大量既Bossni都係裝修緊或已經裝修完，並且加入了大量童裝。

這是一場好難打的仗，到底一兩年後，在Bossni的股東大會，小股東會唔會對管理層報以真心的掌聲？我好期待。

講番昨日部戲，《十三棵泡桐》，原來係一部大陸戲，認真唔講得笑，講國語，無中文字幕，要追英文字幕，簡直係兩文三語大考驗。電影改編自一本小說，名為《刀子與刀子》，內容是講一班少年在學校內發生的成長故事，在語言半失效的情況下，尚算有趣。

上個星期曹仁超係《信報》既〈投資者日記〉講點解你到今日都未有一百萬美金的理由，節錄如下：

一、你浪費太多蚊年追求物質生活上，而冇專注建立自己財富，包括花費太多錢時裝、化妝品、旅行及購買奢侈品上。

二、你對開支冇預算，例如經常利用信用卡貸款去消費而支付高昂利息，而非等到自己有足夠蚊年時才去消費。

三、你有壞習慣，包括吸煙、蒲酒吧、賭波、賭馬，耐唔耐去澳門。自己未擁有大量金錢前，早已花掉「種子錢」（Seed money）。

四、你冇目標，尤其係財富目標。你寧願上網玩遊戲，亦唔學習財富管理。

五、你冇心理準備。例如六十年代我老曹因為未有資本，所以每天做三份工（除返證券行外，將自己投資心得寫成文章到報館發表賺稿費；從證券行放工後替人家子女補習賺錢）。我老曹最初一萬元資本就係用呢個方法獲得。

六、你太歡喜炒短線。例如用一萬元去賺三千元，用十萬元去賺一萬元，而不讓利潤往前跑，結果賺係「細」錢，一唔小心卻輸「大」錢。

七、你以為別人會為你管錢。你可以諮詢許多人意見，但決定權仍你自己手上，別人係唔會為你金錢做決定，因為最後得失係你自己。你損失，別人唔會賠畀你；你賺，亦唔會將利潤50％分畀別人。

八、你投資自己唔識東西。例如越南股市，我老曹去年雖睇好但冇投資，因為自己不懂。

九、你怕輸，不明白「止蝕唔止賺」道理。只要心理上準備損失15％投入資金，你已可心安理得地去投資。但太多人寧願將錢存入銀行畀通脹蠶食都唔投資，因為怕輸錢，唔明白「小財唔出，大財唔入」道理。

十、你根本上冇興趣擁有一百萬美元以上財富。唔少人對賺錢興趣唔大，身上只要有Ｄ錢便想辦法花掉，而冇興趣學習錢搵錢。寧願去行街、睇戲、食飯、唱K，連每天睇《信報》都視為苦差，又點可賺得一百萬美元以上財產？你唔理財，財點會理你？

現在是星期日的下午，下星期同樣時間我已經在東京了，一個懶洋洋的星期日。今晚我和獎門人要去時代廣場看我們今年電影節的第一部電影，《十三棵泡桐》，雖然今年我們只看五部電影，但我都係已經完全唔記得呢部戲既資料，故事內容及出產地都豪無頭緒，雖則我現在可以查看一下電影節那本特刊，但係我特登唔查，因為咁可以讓我真正咁試下係全無準備下咁去睇一部戲。

係屋企收拾行李，好懶，連聽咩歌都懶得諗，就咁將電腦內的全部mp3放哂入play list再隨機播放吧。咁樣聽歌有一樣壞處，就係大細聲太大分野，隨時會嚇親自己，聽完Miles Davis溫柔地吹〈Summer〉，再接著Slayer的〈Angel of death〉，真係心升少d都唔掂。

但係，當你係全無準備既情況下，聽到王菲的〈愛與痛的邊緣〉那種喜悅，卻是更珍貴。

我而家係生果皇帝，因為我頭上有生果皇冠，威唔威先？

今個星期去左好多間書店，為既係安德魯‧馬修斯既《我變快樂了》。聽個名都知，呢本書係講一些生活上的道理，教人應該點樣面對生活上的起趺。咁都幾適合我和獎門人睇，因為我係火爆王，佢係緊張大師，學識"放得低"及"輕鬆"對我們都有好處。

呢本1999年出版的書，彷彿好像已經在市面上的書店絕版一樣，搵極都搵唔到，只在圖書館尚有藏書。咁我唯有去圖書館借，其實我一向都認為睇書去圖書館借比去書店買有效得多，一來有時間限制，會睇得比較快，二來唔駛錢，三來睇完唔駛係屋企搵地方擺。但係我覺得呢類生活哲學既書，平常咁睇一次無咩用，要係唔同心情既時候一睇再睇，咁先會有所得著，呢個亦係我咁想去買呢本書既原因。

但係搵唔到，想買都無用，唯有睇下其他同類型既書，其實現在都有很多這類型的書，結果我選了同一作者的另一本書，《隨心所欲：尋找生活及工作的意義》，去送給獎門人，希望佢睇完可以輕鬆一點去面對工作。

今個星期去左好多間書店，為既係安德魯‧馬修斯既《我變快樂了》。聽個名都知，呢本書係講一些生活上的道理，教人應該點樣面對生活上的起趺。咁都幾適合我和獎門人睇，因為我係火爆王，佢係緊張大師，學識"放得低"及"輕鬆"對我們都有好處。

呢本1999年出版的書，彷彿好像已經在市面上的書店絕版一樣，搵極都搵唔到，只在圖書館尚有藏書。咁我唯有去圖書館借，其實我一向都認為睇書去圖書館借比去書店買有效得多，一來有時間限制，會睇得比較快，二來唔駛錢，三來睇完唔駛係屋企搵地方擺。但係我覺得呢類生活哲學既書，平常咁睇一次無咩用，要係唔同心情既時候一睇再睇，咁先會有所得著，呢個亦係我咁想去買呢本書既原因。

但係搵唔到，想買都無用，唯有睇下其他同類型既書，其實現在都有很多這類型的書，結果我選了同一作者的另一本書，《隨心所欲：尋找生活及工作的意義》，去送給獎門人，希望佢睇完可以輕鬆一點去面對工作。

今晚和獎門人去沙田大會堂睇芭蕾舞劇《羅密歐與朱麗葉》，這是我第二次看香港芭蕾舞團的演出，已經認得某些演員。唔好話我扮高深，其實我完全唔識睇佢地跳得好唔好，但看到一大班舞蹈員在台上無對白，純粹以身體動作去表達故事，這其實好值得去諗一下語言的重要性。若果全世界的人也以身體的動作去表示內心的意思，那麼是否可以減少不同國籍人士的隔膜？是否可以解決語言不可信的問題？

在科幻小說《基地》內，有一個名為第二基地的組織，成員間以面部表情去溝通，傳達意思的速度可以比語言快很多。

根據進化論，人類的下一項進化，會是語言的一體化？還是捨棄語言？

有些時候，我們會遇上挫折，感到工作的不順利，但不要害怕，問題解決後便不是問題，更可以得到經驗，有助將來的合作及計畫，最重要的是，工作之外，你的家人和朋友都在默默地支持著你。

數天前收到了平生第一次股息，宏利的0.2加元，扣除25%加拿大政府稅，兌現港幣約一元多，把我的平均成本價減至$260.59。

加入了Google Adsense十多日，在Darth Mike Movie Record中加了Adsense for content和兩個商品廣告，都唔知幾時先夠一百蚊美金，可以收支票。

把握食飯時間，寫了《英女皇》的影評，呢部戲真係幾特別，可以一睇，權力、自由等問題都值得反思。

今日同左阿爺去大角咀街市個度食午飯，好抵，廿蚊一個餐，有一整條蒸鱸魚，一碟白飯，一大碗例湯和一杯熱飲，兩條友仔都食唔哂自己份餐。

今天，我在維園教訓了一名男子。

我覺得自己在這件事件所受的教訓比任何人都多，多謝妳。

今朝同獎門人食早餐，一心諗住夏天已經來臨，著件短袖衫出街，點知去到中環又冷又大風又落雨，搞到食完野，去埋金鐘買飛聽日睇戲就即刻返屋企。

去到金鐘，係HMV試聽左一些新碟，AIR隻碟真係好有電影感，好鬼好FEEL，似足佢地之前為《迷失東京》配樂個首〈Alone in kyoto〉咁。

初入股市，真係見識唔少。自由社會，真係講咩都得。有人話近期跌市，有三大原因，分別係大陸股市泡沫爆破、carry trade和美國樓市泡沫爆破引發的次按問題。三個原因都有人支持，亦有人話心理影響多過實際影響。首先我認為解釋股價的上落完全是一件無意義既行為，長遠只有一樣野可以影響股價，就係盈利。短期咁睇，我認為三個原因基本上係連帶關係，carry trade影響資金流動，自然影響風險較高的市場。

市場上可以存在很多消息和建議，有大行話美國樓市會是匯控的一個長尾問題，但亦有大行同時建議趁低買入次按資產，到底誰是誰非，引用一下《信報》既名句，木宰羊。

食完午飯，行左去大眾書局，看到一本名為《相忘江湖的魚》的書，作者叫做葛亮，作者介紹話佢係港大的文學博士，前作《瞇鴉》係香港和台灣都得到唔少獎。《相忘江湖的魚》是由數個短篇故事編成，好快咁睇左頭幾頁，感覺良好，文筆很細膩，雖然頭幾頁只是由故事主角講下自己的外公外婆的生世，淡淡然得來很有感情，看得很舒服。

返到公司上圖書館個網到查，竟然完全無呢位作者既書，有點失望。

我發現自己真係一個好無記性既人，基本上全部野都可以唔記得。

今日中午行左去一號銀海個邊，呢幾日都無行到去咁遠。雜誌話，我地平時食完飯覺得眼訓，主要原因係體溫係消化既時候會低左，所以會覺得眼訓。咁照計我食完飯去散步，行到個人覺得熱，咁下午就唔會咁眼訓。但係實驗証明我下午都係咁眼訓。

四叔今日教人買龍尾股，佢話龍頭股已經升左好多，無咩肉食。

有錢佬就係有錢佬，係佢叫人買人龍頭股既時候，佢已經擁有大量龍頭股係手。到炒得咁上下，佢就叫人買龍尾股，佢手上有幾多就不得而知了，可憐個班幫佢推高身家既散戶。

獎門人今晚係置地既L'atelier The Joel Robuchon買左件好靚好靚既榛子朱古力mousse俾我食，真係好精美。食落去個陣mousse真係又軟又滑，好味到難以形容，不過都幾貴，間唔時食下就好。

第二堂跳舞堂，我地呢個課程會教跳一首歌既舞步，今堂教左32步，跳到亂哂。

今日同獎門人一家去長洲睇櫻花。天氣唔係咁好，天陰間中有雨大風。

獎門人昨天學左映相點樣構圖，今日就識得學以致用，真係有慧根。東灣個邊勁大風，冷到嘔。又上山又落山，終於都去到關公忠義亭，原來收錯風，行錯左路。有三棵櫻花樹，但係d花都差唔多落哂，得番唔係好多，不過個度除左櫻花重有好多其他花都好靚。

食左紅豆餅，去左張保仔，今日張保仔洞勁多人，去咁多次都未試過咁多人。之後係長洲食海鮮，好抵好味，一人$50都食到好鬼飽。

返香港，係船上勁訓。返元朗打邊爐，今晚東京五人組第一次集會，情況良好，食到好飽。

今朝好鬼忙，一早就去左天水圍幫father拎身份証。天水圍同元朗雖然好似好近，但係多得輕鐵呢樣咁偉大既交通工具，順利咁令我等車既時間再次多過我搭車既時間。一來一回攪左成粒鐘。

之後去左尖沙咀，買三鷹美術館既入場券，香港買要$130，日本買只需要一千YEN，都貴左差唔多一倍，好處係無左到時唔識買既風險和無入場時間限制。買完飛，係尖沙咀行左陣，就去左油麻地二德惠，中途亂咁行。二德惠既蛋糕盒唔係咁靚，所以無買到。落旺角。

睇左陣踢波，係兆萬買左兩隻22CM高既馬利奧公仔，勁靚。會合獎門人，去左CPK食下午茶。行多陣街就返荃灣上攝影堂，個攝影老師真係吹水王，個半鐘絕無冷場。

係《信報》睇左一篇王岸然既評論，佢指現在公民黨或一般民主派正俾緊鴉片香港市民食，為渴求民主既市民製造短暫既快感，但現實上其實對民主進步完全無幫助。這篇文章幾值得睇，特別是當你我都覺得梁曾兩人的辯論很有趣既時候。更有趣是，他建議梁家傑在選舉當日宣佈退出，重投民眾，在中環示威，杯葛小團子選舉。如果發展到咁樣，呢場戲就真係愈來愈似拍緊戲了。

又到左星期四，返左工之後，日子過得快左好多。但自從上星期開始，星期四便變得令人期待。因為獎門人在星期四晚有蛋糕課，即是我在星期四晚和星期五早上也可以食到她做的蛋糕。今個星期的蛋糕是鬆餅，獎門人本身都識整鬆餅，可算是成名絕技之一。今堂佢整左三種味道，朱古力、肉桂蘋果和藍莓味，賣相比佢平時整既企身，但係咬落無咁脆，食落都係唔夠佢比時整既好味。不過佢上蛋糕堂既目的都係想學習一些技巧，同埋最緊要就係佢開心，加上我又個個星期都有好野食，真係諗起都正。

唔經唔覺，在這半年，我睇左好多本《基地》系列既小說，由《基地三部曲》、《基地邊緣》、至現在睇左三分一既《基地與地球》。在完成《基地》之後，我希望可以看回一些本地作家的中篇小說，學習一下別人講故事的技巧。

畢竟，我始終希望能夠寫一些好故事，題材可以很簡單，主角也許便是我吧，說一些生活的事情，就像一個每天上班下班也需要轉好多程車，但經常走車既人。

雖然我曾經投稿失敗，但我把火其實未熄。

昨天匯豐公佈業績，美國業務一如預期對集團盈利造成重大傷害，但其他地區的業務都有良好增長，每股盈利上升3%，一如上任主席龐約翰所言，股息將會有加無減，現價股息有大約四厘七，好過做定期好多。

同日公佈業績的恆生，每股盈利上升6%，但派息無增加，因為要保留資金作發展。恆生以往多將九成以上的盈利派送給股東，近年一改以住的派息政策，是好是壞取決於管理層點樣運用資金。

如果純粹為左股息，匯豐的吸引力便比恆生高了，因為匯豐的派息空間比較多。

恆指今日下趺了777點，國內A股同樣大趺，晚上全球股市都趺到無影無蹤。有人話今次趺市係因為中國泡沫爆破，但更可信係隨著日元加息及轉強，玩Carry Trade個班友縮沙。

點都好，宏利今日趺5蚊至257.2，低過我個買入價，但係我未驚過，我始終相信宏利既盈利及股息的增長能力，只感到可惜無足夠現金，如果唔係可以把握機會加碼或買匯豐。就算今日大趺，我都重係覺得五行三保高，招商銀行，我等緊你。

今晚上爵士舞堂，上堂前去左麥文記食面，蝦子撈面好香，面身有咬口，正。上堂，全女班，廿幾人只有導師和我係雄性。一個鐘的堂，基本上都講得上係完全跟唔上，得啖笑。

今日上左獎門人屋企整電腦，順便睇左《兩生花》和一陣《對她有話兒》，獎門人覺得《兩生花》幾好睇，但係我就唔係好明個故仔講咩，中途煮左個福字米粉食，正。

巴郡出左業績，畢菲特作為將價值投資用得最出色既人，他給股東的信永遠值得細讀。

仲有唔夠一個月就去日本la，YEAH！

點都估唔到，電影節個網上訂票咁鬼唔可靠。上星期六個訂票原來係無效既，又煩左獎門人一輪。

今晚獎門人上蛋糕課的第一堂，做了一個綠茶紅豆卷蛋，好味。

The Venus in Furs - Bitter-Sweet

唔經唔覺，聽日就三月了。

東尼在昨天的《都市日報》專欄提到宏利的價值被低估，他指出股價的波動其實取決於供求定律，常人難以捉摸，只有盡量唔好買貴貨。但股票的價值卻來自公司的增長，能夠長線支持股價只有盈利不斷的增長。他認為以宏利現在的盈利加上未來的前景，現價已貼近底線。

宏利今日除息，除息0.2加元，我未知港元實際係幾多，但係我會跟隨市場先生的作法，在成本價中減去股息，即是每次派息，我的初始成本也會相對減少，講唔定有一日成本可以減至零。

過左《紫醉金迷》隻原聲大碟入電話聽，真係正，你話仲有邊度可以聽到Thom Yorke、Jonney Greenwood、Bernard Butler既組合？

改編自《無間道》的《無間道風雲》在奧斯卡得到四個大獎。心中對此有一點矛盾的感覺，首先，我很喜歡《無間道》，三集都很喜歡，第一集令人耳目一新，續集雖然充滿《教父》的影子，但吳鎮宇演出技驚四座，我絕對認為《無間道》在國際間應得到更大的回響。給馬田史高西斯來一個改編重拍，將故事美國化，睇完預告我已經覺得唔開心，因為根本上連鏡頭的角度，也是抄港版的，馬田史高西斯，你到底在幹甚麼？

其實，我是很喜歡馬田史高西斯的，你的《的士司機》和《盜亦有道》我都睇過，《盜亦有道》更是我認為最佳的黑幫片之一，我曾經希望你能夠令《無間道》更上一層樓，點知你只是來了一個美國化，但你竟然得到了這麼多的大獎，實在令人再一次對奧斯卡失望。

有人話《無間道》被誤當日本片，足以顯示美國人心中只有兩個國家﹝美國和非美國﹞的無知，對此我無話可說。但我認為唔應該以一個人去代表一個國家的水平。

一早去左睇《門徒》早場，$30真係抵到震。

話說昨晚係屋企睇電視，睇左陣《無主之城》，我經常向人推薦呢部電影，充滿人性，氣氛亦十分緊湊。當我睇到電影中的拳王尼的故事時，我對獎門人說，有些人，因為生在一些唔好的環境，好多野都唔到自己控制，做好人便只有被人欺負，只有做壞人才能自保，但最後都係被其他壞人殺死。

拳王尼的故事，是這樣的：拳王尼目睹自己的女友被黑幫輪姦，全家慘遭亂槍掃射。拳王尼加入了另一黑幫，展開了巴西史上最利害的一次黑幫鬥爭。

估唔到，事隔一晚，當我在看《門徒》時，竟然有類似的想法。令我引起這想法的，是片內張靜初的女兒，一名吸毒女人的女兒，不足五歲，但已經要自己照顧自己，甚至照顧阿媽，因為阿媽上完電太high，連針筒都唔識拎走。

雖然《門徒》唔似《無主之城》取材自真人真事，但我相信離事實不遠。可怕的是，《無主之城》講的是幾十年前巴西的貧民窟，而《門徒》卻是現在的香港。

睇完戲，同左獎門人和獎門人媽媽去行花壚，買左兩個花盆和一包泥去幫我之前買個兩盆小植物轉盆。係超群買左兩個蛋撻食，唔係講笑，超群既芬﹝芳﹞叔蛋撻真係全港最正。

今朝因為要陪father去天水圍換身分證，上唔到網買飛，要獎門人和mcc出馬，hkiff個網真係勁廢，搞左佢地成朝，真係唔該哂，下年我盡量親自搞掂。

中午係中環試左麥奀記雲吞麵，都幾貴，總算係試過。

之後入左元朗，仲一齊睇檔，點知天公不造美，落雨，真係辛苦哂獎門人。

會計仔個網今日有兩篇文，〈 匯豐 - 商譽減值與物業重估虧損〉和〈匯豐 - 再探林森池之預言〉，分析匯豐盤數，雖然好難明，但值得一睇。

點都好，我距離買一手匯豐仲係好遠，可以慢慢睇清楚匯豐班新管理層點樣處理英美兩地的樓按及個人信貸問題。值得一提，從近日多間美國建築物料商，例如Home Depot，發表2006年的業績都出現盈利大倒退，可見美國樓市真係好差。而英國最大的零售銀行亦需要為英國個人信貸提高撥備，可估計匯豐的景況亦唔會好。

但係我都係個句，市場總有上落，懂得如何在最壞的時候做好防守，甚至利用這些壞時機去為日後的好環境計劃才是最高的招數。

原來聽日電影節已經開始網上賣飛了，今日立即係咁上網睇有咩戲想睇，但係hkiff個網實在令人睇得好辛苦，睇到眼都痛。

初部選左廿幾部，但係因為要就番上堂時間和去旅行個幾日唔睇得，加上有些戲似乎必定會上正場，所以最後得番五部，分別係《十三棵泡桐》、《明明》、《底下》、《愛情征服一切》和《愛情回水》。

呀，今年再唔係學生，無得廿幾蚊睇戲了。

第二日復工。已經無咩利是收了。

都係好hea咁過左一日。天氣亦都係繼續一片灰。

返工。

基本上都重係放假既心情，係咁睇網頁。

年初三，適合拜年。

一早去了大老細在禮頓山的屋企拜年，運吉。

下午去了家姐屋企拜年，之後去了赤徑行山，行得勁快。

晚上食Pizza Express，好味！

聽日要返工了。

唔知幾時開始，我無時無刻都在追車。

朝早起身番工，一出門口，我便快步去追輕鐵，一個唔好彩，是需要等五分鐘的。落輕鐵之後，我以快步加上跑電梯去追西鐵，一個唔好彩，是需要等四分鐘的。落西鐵之後，我通常都是跑落樓梯再跑過地鐵站再跑上電梯，一個唔好彩，是需要等五分鐘的。

放工。我多數會陪獎門人去荃灣，引入了綠色小巴這種令人又愛又恨的交通工具。與獎門人講拜拜後，我再次以接近跑的速度去到地鐵站下面的小巴站，唔好彩的時候，等候的時間是無限。落小巴後，通常都是心煩氣燥的心情，我是以狂奔的形式走向西鐵站，一個唔好彩，是需要等八分鐘的。落西鐵，因為心靈已經死了，在浮游狀態下離開西鐵站，落到地面，如果遠望輕鐵站見到只有一架輕鐵的話，我會以自己都不能相信的快速奔向該輕鐵，但有大約接近一半的機會，我是剛好可以跑去和該輕鐵上的乘客說再見，然後發現下一班列車將於八分鐵後開出。

大概，這便是現在的我。

年初一。恭喜發財。

在豬年的第一天，我回想我在2007年第一天的三個願望，坦白講，三樣都未有做到。

中午睇賀歲杯，悶到訓著。

晚上睇了獎門人送給我的DVD，尚奴高達最出名的電影，《斷了氣》。看見片內男女主角在巴黎散步的街道，彷彿和2005年我們去的時候沒有兩樣，但不要忘記這是1959年的黑白片。

除了巴黎的街道外，Jean Seberg都好靚，戴了帽後的男主角Jean Paul Belmondo更加係型到爆。電影初段的那些斷鏡的確是很利落，全片的音樂更是令人聽出耳油。

年三十。

早上執搭了一下房間，書、碟和玩具變得稍為整齊了。

晚上在家中和屋企人食團年飯，之後去了行元朗花市，今年只行了元朗和荃灣，無行維園了，實在係太多人。

今日上埋第二日既英文會話堂。我地個組竟然係事前準備得最多既一組，所以基本上當其他人都在準備時，我們全日都在吹水，和綵排了很多次。

對於公司提供培訓給員工，我認為當中除了可能可以提升員工的知識外，保持員工經常抱持學習的心態亦很重要。

晚上去了獎門人家姐屋企團年。當看見阿哥這個小朋友，赤著腳，站在床上，表情認真地表演小提琴，只有大約一米高的他，在我的心中成為了一個巨人，身後更好像有光芒發出。

昨天當然第一時間看了宏利的業績報告，符合各方預期，最震撼的是原來集團主席Dominic D'Alessandro的中文名是鄧立忠，集團財務總監Peter Rubenovitch則是雷鵬智，真是有趣的中文名。

2006全年每股盈利為2.53加元，比對上一年增加23%。第四季的每股盈利為0.71加元，增加25%，派息0.2加元，派息比率接近三成。第四季的股東回報有18%，全年計算的股本回報亦提升至16.8%，達到集團的目標水平。

報紙既分析話，作為一間成熟既世界級保險金融機構，宏利在保險金方面的收入增長將會較少，幸好宏利早已發展財富管理的市場，靠此可以保持到集團的盈利增長。

過左DJ Shadow隻《Entroducing》入電話，今日食完飯聽，勁有雲遊太空既感覺。今晚有線播《兩生花》，校好錄影。

今晚去了赤柱的德國餐廳食情人節餐。坐係美利樓既露台，兩個人坐一張六人檯，感覺當然極好。情人節餐通常都無咩特色，但幸好這裡的食物尚保留到德國食物味道濃郁風味，不過我地都唔太欣賞味道咁勁既食物。

我又俾人搵笨了！今年既花比舊年更衰。

收到好多份禮物，最知我心就係妳！

有了你 陳百強

作詞：鄭國江　作曲：鍾肇峰　編曲：鍾肇峰

有了你頓覺增加風趣
我每日每天都想見你
那懼風與雨
那懼怕行雷
見少一秒都空虛
有了你頓覺輕鬆寫意
太快樂就跌一交都有趣
心中想與你
變做鳥和魚
置身海闊天空裡
並著翅在飛輕鬆自如
同吸清新空氣
游來又游去　湖面多美
拋開人生的顧慮
有了你頓覺輕鬆寫意
太快樂就跌一交都有趣
心中想與你
變做鳥和魚
置身海闊天空裡

今日返工training，題目是英語會話。

晚上過mp3入電話。

在網上做了一個九型人格的測驗，我是第七型─享樂型 ，勁。

明天晚上宏利便公怖2006年第四季及全年業績。這將會是我第一次以股東身份去睇年報，遲下會是第一次收取股息。

睇完第九期《基地》了，故事內講到宇宙三種發展，第一種以權力領導，第二種以精神領導，第三種全宇宙不論生物和死物都擁有共同意志，無分你我，亦即是沒有自我。真的很佩服艾西莫夫，創作了一個這樣宏大的故事。

獎門人造了一個很大很靚的朱古力蛋糕，今日真係充滿驚喜！

晚上入了東涌食朱朱廚坊，有私家車接送，真係威到爆。全晚最正就係個湯，好味到爆，其他食物都正，份量都幾大份，好難得我地會食剩咁多野。

斷了戲？斷了氣！

獎門人昨天已經提左我，部話劇叫做《二人餐》，更加係一部音樂劇，有現場演奏的鋼琴、小提琴和結他。故事以食物作為引子，講一對情侶，從相識、熱戀、沖淡、分開、復合到年老。愛情就像整甜品，即使所有材料及份量都是天依無縫，在製造的過程，有些材料只要好少好少的份量，有是要攪拌好耐，有時唔可以攪得太勁，最後還是要等，等，和等。有心人最後還是造到一個精美好味的甜品。

今朝媽打同我講，唔知邊個親戚入左HSBC Finance做，幾錢人工都知埋，仲話如果入到會計師樓﹝相信係四大﹞就立即轉工，因為發展較好。無可否認，四大或投資銀行的機會都會比HSBC大，咁有上進心，真係祝佢好運。

講到上進心，我唔知自己有無，可能係小到自己都唔覺有，我總是覺得自己無法投入正業。雞坤成日都話社會好黑暗，想返古代做農夫。如果俾我選擇，我想做漁民，因為我比較喜歡海。如果住在內陸，我希望可以養大笨象。

今晚會同獎門人及朋友去睇話劇，坦白講，我連部話劇叫咩名都唔知，只係知道個故事同食物有關。

今次係我第二次睇話劇。

近來食完午飯，我都會落街行大約廿分鐘，有時更會聽住歌咁行，基本上同阿伯無分別。呢幾日都係聽緊Radiohead既《Ok Computer》，好舊既一張碟，但係絕對永遠都係咁好，真係百聽不厭。

當我一個人在散步既時候，聽到〈Subterranean Homesick Alien〉，真係感動到想喊。

今日有兩單out到爆哂炸既事，第一就係我由二月一日開始等priceline寄俾我既電子機票，原來就係當日收到既email，等我仲以為會有一張電子機票寄去我屋企。

第二件事就係原來我有個同事剛剛結左婚，可能我係附近最後一個知道呢件事既人，足以證明我係公司係幾咁孤獨。點都好，佢係一個友善的人，祝佢百年好合，蜜月愉快。

匯豐銀行發出盈利警告，美國業務的撥備需要提高，但同時指出，其他業務附合預期，股價應聲下跌至$140。如果我有足夠資金，我今日或者下星期便會入，甚至係數星期前已經入了。匯豐在美國的按揭是新收購項目，需要一段時間去消化，加上美元的弱勢，可算幾唔好彩，但係歷史話俾我地知，匯豐總是能夠在壓力下為新收購的業務改變形勢。

另外，在去年，全球的知名投資銀行，相信除了匯豐的CIBM外，全部也是在掌聲下作年結的。首先，大家要了解，CIBM在投資銀行界還是一個初哥，它的知名全因匯豐在零售銀行的聲名，我們絕不能對一個初哥有太大的期望。對於將來的發展，還望管理層能多吸引教訓及自己的優勢。

咁點解我睇好匯豐？因為佢既業務分佈在世界各地，不論成熟或新興市場都有足跡，以中國的市場為例，匯豐便以交通銀行、平安保險、恆生銀行和自己本身品牌進攻，前兩者已有足夠市場，後兩者更以國際級的服務搶攻，我實在睇唔出佢係中國市場會有咩問題，而中國市場，只是它的其中一個戰場。

更重要的，我實在喜見匯豐沒有在交通銀行和平安保險在A股上市時以天價增持去維持持股量，雖然盈利會被分薄，但足見匯豐管理層保持一貫的穩健作風。

今日一返工，便看了市場先生的這篇文章，覺得很有意義，轉送了給雞坤和獎門人睇。雞坤話佢人生到目前為止都無呢個人咁勁，將來亦無咁大希望。

我諗唔駛咁灰既，我知道我地都有為自己及伴侶的生活努力。

我地而家既情況，好多野都好似未殺到埋身，但其實時間過得好快，以為佢未殺到埋身，其實已經入左肉，流緊血。點都好，行動最實際，除左第一步，之後的堅持亦好重要。

其實在買宏利之前，我已經注意了它的網頁一段時間，除了在投資者關係的資料有用外，它亦經常更新集團在世界各地的消息，今日該網頁便報導了宏利在本港的一種從未在香港出現過的全新保險計劃。

作為一個小小小股東，當看到公司勇於開發及推廣新產品，當然感到高興。

順便講下，今日宏利跟隨美加走勢，一口氣升了$5.2，即接近2%，雖然比起一眾當炒股幅度並唔算多，但烏龜有自己的步伐，最後超過白兔。

"Where is My Mind" - Pixies

Ooooooh - stop

With your feet in the air and your head on the ground
Try this trick and spin it, yeah
Your head will collapse
But there's nothing in it
And you'll ask yourself

Where is my mind [3x]

Way out in the water
See it swimmin'

I was swimmin' in the Carribean
Animals were hiding behind the rocks
Except the little fish
But they told me, he swears
Tryin' to talk to me to me to me

Where is my mind [3x]

Way out in the water
See it swimmin' ?

With your feet in the air and your head on the ground
Try this trick and spin it, yeah
Your head will collapse
If there's nothing in it
And you'll ask yourself

Where is my mind [3x]

Ooooh
With your feet in the air and your head on the ground
Ooooh
Try this trick and spin it, yeah
Ooooh
Ooooh

今日係獎門人屋企整日式芝士蛋糕，雖然我攪錯哂落材料既次序，但係都幾好味，屋企人食完都話好似伊籐家，勁。

晚上回家時想起《博擊會》，如果現實中真係有戲內那個反社會，反文明的組織，我都想加入。

機票及住宿也攪掂了，東京之旅可以成行了！

早幾日話想睇《聽風之歌》，今日在等獎門人放工既時間，我便用了大約兩小時看完這本小書了。事隔咁多年再睇，坦白講我已經完全唔記得內容了，這是村上春樹的第一本作品，在他廿九歲的時侯寫成，內容是他自身在廿一歲的時候回鄉放暑假的回憶，除了他的好友老鼠外，還遇上了一個只有九隻手指的女孩。

那年的夏天，吹著微風。

今晚和獎門人在檔檔燒食燒餅，好耐無食，個燒餅重係咁好食，芝士燒雞翼都好正。

Pink Floyd - Wish you were here

呢排食完午飯，我都會落街行大約半個鐘，多數行去一號銀海，最遠試過行去南昌站。飯後散步除了可以幫助消化外，更可以在這小休的時間，想一想接下來的下午的工作，停一停想一想，對生活很有用呢。

今天宏利跟隨美加股市，升了超過一個百份點。對於這些短期升趺，我其實唔係太在乎，我只關注他的盈利增長，因為以宏利的質素及十六倍的市盈率，我期望他07年尾可達$285。

獎門人呢幾日都幫得手咁搵左好多飛機同住宿既資料，咁唔好彩我呢幾日又唔得閒，成團人都靠哂佢，辛苦哂。

今晚媽媽生日，去左去泰國野慶祝。飯後送獎門人番屋企，等左好耐32B，傾左好多計，真係好鍾意同妳一齊輕輕鬆鬆既時間。

今日訂左四月去日本既機票。

係一個日本旅遊書既作者的blog上睇到，佢話賴明珠翻譯村上春樹的小說好唔掂，老實講，我唔識日文，同人講睇左村上春樹差唔多十年，但係其實一路都係睇賴明珠既翻譯本，我唔知佢翻譯得好唔好，但我一直都睇得好開心。

個本《Freaknoimic》，睇完第一章了，睇到作者用左一些數據及分析技巧，去解釋一些人的行動，真的得益不淺。但係，我決定唔睇了。都係重投小說的世界吧，希望可以在新年前睇完《基地》，之後睇村上春樹，好想再睇一次佢既舊作《聽風的歌》和《一九七三年的彈珠遊戲》。

今日同雞坤講起，想攪個睇戲會和食飯會。

睇戲會就係一班人夾錢買陪投影機，然後定期搵個地方，可以係工廠區，一齊睇戲，戲既種類可以好自由，可以輪流作出選擇/推荐，其他成員如果對今期既戲好無興趣，可以唔到，只要有一個人都播。

食飯會簡單好多，就係一班定期約埋去食餐好野，可以係又名貴又出名既餐廳，好似黃色門或Nobu或Jimmy Kitchen，可以係江湖傳聞好好食既大排檔，好食就一齊開心，唔好食就一齊爆粗。睇戲會運作上困難會好大，首先前期資金已經唔少，加上搵地方亦唔容易，要一班人輪流搵戲亦好講恆心，可能好多人會覺得點解唔去戲院睇新戲，但係我始終覺得有人會好似我咁，希望可以係一個比較大既螢幕睇自己心愛既電影。

食飯會屬於講就易做就難，要定期約齊人實在好煩，呢點問下lee hang就最清楚，地點其實亦好難定，邊個做話事人都會得失一些人，最後可能都係圍圈。

中午和獎門人屋企飲茶，之後陪小朋友們在冒險樂園玩，睇見阿哥同一班細路係度玩一集叫做《甲蟲王者》既遊戲。睇左一段時間，發現呢班細路係玩呢個遊戲既時候，當中運用左好多手段和技巧，甚至不少欺騙既成份，俾張五常睇到就夠寫多一本《賣桔者言》。

下午和我的屋企去了行青山，上青山寺院。要行一條勁斜既路，上同落都咁難。之後去左三聖郊食海鮮，好新鮮同埋平，只係煮得比較咸，淡少少會好好多。

一早起身，寫左《生日快樂》既感想，但係連唔到上blogger，放唔到上網。

中午去了看《盛夏光年》，鄉郊的景色好清靜，好平和。

番元朗和阿爺及cwk食飯，係大家樂食芝士火鍋，好一般呢。之後去左食炒冰，好特別，正。

今晚睇《One Piece》，前進船終於被燒毀了。作為一部漫畫，在這船臨死前，將它變成一隻有靈魂，識得講再見既船都唔算太過份。但這個道別場面實在太感人了，害得我變成跟漫畫中的路飛、烏索普、奈美和索柏一樣。

這部漫畫的劇情，其實在很早以前已經完全失控，角色及唔同既勢力都超級多，講得上係亂到爆炸，但係睇落都重係咁好睇。

今日雞坤過左呢邊上intro，所以一齊食飯，對於公司內的事，我們也無法控制及估計。

原來Yahoo!財經可以加入美股去個人投資組合，所以立即加入了宏利的美股。

昨晚利用坐車時間，係咁睇《基地》，但係都係未睇哂，就快到期了。

今日股市大升，開心當然有，一入市就升，但係我要克制，現在我只希望能積極收集及有10%的年回報率，一點兒也不高。除了宏利外，匯豐和太古現價都好吸引，但係無錢。大家樂、恆生、新地和中電都不錯，中資股就唔考慮住了。

重申一點，我絕對唔讚成亦唔會借錢去投資。因為短錢不適合用作投資，我只相信長期股價會反映公司業績及前景，短期波幅太受外來因素影響。

昨天早上寫了《Nana 2》的影評，唔記得記低。

今日同左獎門人屋企去行街。晚上打邊爐。

始終都係忍唔到手，261.6入了一手宏利。

睇了一小部份《Freakonomics》，作者指曾經令到美國政府和犯罪學家等無哂符既超高罪案率，在二千年之前神奇地大幅下降至歷史低位，當中之原因竟然和六、七十年美國全國墮胎合法化有關。原因一些根本無心或無力的人，他們可以合法地墮胎，而不會把孩子生下來，由得他自生自滅。

佢咁講，信唔信由得你，但係我絕對認為富家仔都有能會做壞事，好像很多校園槍擊案的凶手都是在小康家庭中長大便是一例。

祖雲達斯終於升上榜首！

看了最新一期的《二十世紀少年》，我一直也覺得，這漫畫比《Nana》搖滾很多很多倍。浦澤直樹的作品其實有點像村上春樹，兩人的作品內都是充滿了作者個人生活上的喜好和細節。講開又講，原來村上春樹曾經做過cafe的廚師，所以有番咁上下既烹飪手勢。有一本由叫做村上春樹廚房閱讀同好會所編的書，《村上Recipe》，紀錄了一些曾在村上的作品上出現過的食物的烹調方法，這本書現在正在我的手上。

但是，我怎樣也記不起在《聽風的歌》內，當"我"造訪老鼠的家時，老鼠曾經食過熱香餅澆可口可樂這種奇怪的食物。

好想睇村上春樹。

睇了一些學弟們在ACM比賽時的照片，實在十分懷念。雖然我們從來沒有得到甚麼榮耀，但那些日子實在十分好玩。在多年之後，我還能記得，在高雄，我們曾經被一名MM欺騙，飲了幾杯漱口水；我們住進那只有英雄才能忍受的英雄館，雖然對面是女子中學，但相機zoom到最盡都係睇唔到樣。在台北，我們再一次飲錯野，今次我們每人飲了一杯500cc的台式飲品，印象中有幾位勇士飲哂，但好像無我份；我們看到了林晨愛情的誕生，但可惜這花並沒未結果。在東京，我們被流放至深山，一個人享用一個浴場，在浴池內游泳；在同樣的地方，我聯絡唔到妳，撤夜難眠，在之後的比賽，我們得到不錯的成績，但我的狀態卻是最差的，比賽後終於搵到妳，知道妳在網上得知我們的成績，真係開心到想喊。

回憶有好多，但唔知點解，諗起既時候總係覺得好好笑。

終於收到預約左幾個月既《Freakonomics》，正。點解毒販可以同阿媽一齊住？老師會唔會改學生試卷去提高合格率？張五常都講左幾十年，經濟學是可以用來解釋生活，並不只是象牙塔內的產物。

晚上看了由李克勤、容祖兒和梁詠琪合唱的新一輯心繫家國廣告片，勁驚，冒著汗睇了歌詞﹝鬼話聽不進耳，只能用眼看﹞，很害怕，感覺像看了一部恐怖片。

請停止這類口號式的灌輸！

“事件曝光 傳媒各界爭相指責
D咁既社會問題我問你地究竟邊個負責
個特首剩係鍾意威 D口水議員就大隻西
經濟低迷 奸商又偷雞
班無能官員智慧低 我問你點睇”

﹝摘自LMF〈人渣〉﹞

今日與獎門人及家人一起去西貢行山。由海下行去灣仔，再坐船去黃石碼頭搭巴士回程。

晚上一齊去假牛肉館食，還是真那間好味。

之後與獎門人去了旺角行街街，買了很多玩具，正~

今朝同左阿爺去天水圍睇居屋，因為剛開門，無咩人，所以個個保安都同我地講早晨，勁威。之後同佢係天水圍行左陣，搵旅行社，點知搵左幾個商場都搵唔到。

中午係屋企睇《一個字頭的誕生》，在為銀河映像的支持者，一直都好想睇呢部開山經典之作。早幾日有線做，即刻錄低。今日終於一嘗心願，呢部野真係cult到爆，故事及手法上都十分破格，好事變壞事、壞事變好事不斷輪迴，夠膽死係開場半個鐘將全部角色殺死哂。勁爆。

未日前，大家也在猜測。

今晚和大同們食飯，在尖沙咀亂行了幾粒鐘，最後才在CPK等到位，一路食一路估中環個邊有咩野大廈，真係搞野。

今朝搭車返工，見到有個乘客睇緊個份免費報紙，有一個東尼既專欄，但係睇唔出佢個份係咩報紙。返到公司打俾獎門人，得知原來係《都市日報》。獎門人知道我鍾意，而佢公司又有一大埋舊報紙，就幫我剪左前幾日既專欄，真係勁抵鍚。

原來這專欄是由今個星期開始連載，逢星期一有新文章，而星期二至五的就是轉載自他早前出的書。

基本上東尼講既野無咩新意，這亦顯示出佢對自己既投資及分析既堅持和信心。佢既投資信念其實好簡單，重視真實盈利，股價不能偏離資產值，公司需要增長力，股息亦重要，最關鍵是不要被潮流影響，長期持有增長優質股必勝。

講就容易，做就難。佢有五十年經驗，見過好多風浪，雖然近年已經從戰線退下來，但老人的意見還是很值得參考。

今日獎門人開始睇《原是物語》，重話覺得幾好睇，聽見都有些感動。

睇左Steve Job個簡報會，i-phone和iTV都好正，但最正都係當佢一開始講i-phone，台下觀眾既歡呼聲。那些歡呼聲完全顯示了Apple fans對Steve Job係幾有期望和信心，一個科技品牌竟然可以培育出一個有部族，真係利害。

今日放工第一時間閃人，同獎門人去灣仔樂景快餐店，食恨食左好耐既漢堡飽和薯條。漢堡飽真係好味過M記，但係都係Shake 'em Bun正，不過呢度平好多倍，薯條亦都正，因為係即叫即炸。

之後過左對面再興，獎門人食傳說中最正既义燒，我就食左燒鵝。獎門人要瘦义，個伙記話一定瘦，點知來了個半肥瘦，吹脹。

終於復工。

用了差不多兩小時去清電郵。得知那個放假前那天OT趕工完成的function被棄用了，雖然有點無奈，但其實這更好，因為當時我很清楚，這function的設計本身有問題，我可以寫到，但將來維護將會十分困難，現在對整個系統都有好處。

昨晚發夢，夢見自己和一班隊友一起步入運動場，換上球衣，聽教練的指示，我的教練是東尼。在步出球場時，我看見東尼和他的太太站在教練席。在那一刻，我知道自己在發夢，信奉價值投資的東尼並不是一個足球教練，而我亦清楚知道，發夢踢一場波，會令到我明天很累。我強行令到自己離開夢境，不再想那球場，我望著遙遠的東尼說，再見，我不能踢這場波，我明天還要上班。

今朝去了工聯會報名，參加了一些興趣班。

中午和獎門人去了銅鑼灣，行左陣街就去灣仔，係潮苑買左牛肉餅和墨魚頭去獎門人家姐屋企打邊爐。

打邊爐前去了沙田睇居屋，其實都幾好既，我覺得佢既實用性高過好多相同面積既私人樓。

去了看《Nana2》，幾失望，唔係好掂。

和獎門人買了一些小植物，希望可以快高長大，但唔好太大，因為無位放。

睇戲前食了Mos Burger飯堡，正。

公仔面之父。

D。

假期快將結束。

在這假期，吸收比生產多。差不多睇完《The Intelligent Investor》了，只欠Jason Zweig在最後一章的評論和一些附錄未讀。《字花》第二期也看了大半，只是現在多了一本第四期。看了《祖與占》和《教父》系列，但是還未睇之前錄的幾部黑澤明，亦去戲院看了《戀愛夢遊中》和《傷城》，明天應該會去看《Nana2》。當然，還有幾部在有線重看，好耐無睇但其實睇過好多次既戲。

原本想寫一個短篇，但係最後寫唔成。都想另外裝多一個linux，但係最後無裝。

寫了兩個影評，經歷了失去網絡的日子，網上生活變得很有阻滯。整了一次甜品，製造了一件小禮物。

休息之後便要重新上路，加上新一年的開始，有三個願望，分別是與身邊的人、工作和興趣有關，且看能否做到。

今朝睇埋《教父第三集》既第三隻碟，終於睇完《教父》系列，係個一剎那，我有重頭再看的衝動。但當然，全個系統總長九小時，重看真係唔係講笑。

再睇多一章《Intelligent Investor》，在尾二的這一章，作者講到股民和管理層的關係，當中談到股息和回購的部份很有意思。

去旺角，在田園書店買了第四期的《字花》，行落太子花壚，係貴族餅店買了朱古力曲奇給獎門人和一個萄撻自己食，一路食一路睇花。最後行過超群，見到個度有一種叫"芬叔蛋撻"好似好正，食左一個，果然正，買多一個俾獎門人放工食。

知日部屋登了一篇關於元朗拆彈珠機場的報導，本地的污染問題值得注意。

Nirvana - Rape Me

假期開始倒數了，《Intelligent Investor》只剩下二章半，希望可以在未來數天解決。今天看了《教父第三集》的頭兩隻碟，真的是一個偉大雄壯的故事。《字花》第二期還未睇完，因為得知《字花》第四期有一些關於卡夫卡的文章，有點想購回，似乎我注定有一堆未睇既野。

讀《Intelligent Investor》有感，在第十六及十七章，Benjamin Graham列舉了很多泡沫公司和抵買公司，當中差不多全部泡沫也是由對某行業的過份樂觀所產生，而在市場亦的確存在很多有盈利、有資產的被低估公司，証明價值投資是可取的。

早上一個人去了老人院探望表弟的爺爺。

中午和獎門人食飯，等食等左好耐，攪到我地要食得好急。送獎門人上班後，在中環行了一會，在暫時回復清靜的天星碼頭和快將展開另一場抗爭的皇后碼頭拍了一些照片。

過海。

坐一號車去了旺角，行了玩具店、二樓書店、唱片店和睇阿伯踢波。無咩野好做，旺角又無咩好地方可以靜靜地睇書，結果坐701去南昌，係地鐵站入面睇書。

夠鐘就去搵獎門人放工，返到荃灣，一如所料，我真係過左入站時限，感覺就像一個Expire了的Session，被罰了廿六蚊。

有雨，頭有點痛。

在今個假期，我還是保持早上七點半起床的習慣，一直也平安無事，但係唔知點解，今日起身後還是覺得很累，在大約十時便重投床上，睡了大約半小時，訓得唔好，心情便變得很差了。

交通意外。意外總是防不勝防，受了輕傷已是大幸。生命脆弱，真的要好好珍惜。

今日和獎門人一起整朱古力鬆餅，新鮮最好味，好脆。和忻忻玩了一會，和小孩玩最開心。打邊爐，食左好多野，正。

晚上和獎門人一齊聽903頒獎禮。